الأربعاء، 12 سبتمبر، 2012

ابغض الحلال... الحلقة 15

الحلقة 15
نادية بتلبس
"رايحة فين يانادية"
"يحيي مصمم نتقابل بره معرفش ليه"
"وامبارح لما قال جاى برضه جه قعد نص ساعة ومشى...هو زعلان من حاجة"
"معرفش يانسمة والله...من امبارح وهو غريب لما جه ومشى بسرعة والنهاردة مصمم نخرج وقلت له مش عايزة انزل بس صمم"
"ياستى اخرجى وغيرى جو انتم من يوم خطوبتكم مفرحتوش"
"ومين له نفس يفرح"
رن موبايل نادية
"ده يحيي وصل تحت... مش عاية حاجة وانا جاية"
"لا شكرا"
               ********************
نادية بتركب العربية مع يحيي
"ازيك يا يحيي"
"اهلا"
استغربت نادية من رد يحيي وسكتت وهو ماشى بالعربية
طول الطريق متكلموش الا بعد فترة
"تحبى تروحى مكان معين"
"لأ اى مكان... بس عايزة اعرف مالك"
ركن يحيي العربية على جنب...وكان شارع مش زحمة اوى
"انتى بتسألينى انا اللى مالى.. انا ملاحظ انك متغيرة معايا اوى .. حتى امبارح جيت لك من غير ترتيب علشان اشوف هتبقى فرحانة ولا زعلانة..لقيتك قاعدة معايا زى ماتكونى قاعدة بالعافية...باباكى كان بيرحب بيا اكتر منك... فيه ايه يا نادية"
"مفيش حاجة "
"بصى... لو انتى عندك حاجة عايزة تقوليها خليكى صريحة معايا وقولى"
"حاجة ايه...مفيش حاجة"
"يعنى لو حاسة ان حبنا جه بسرعة وانك استعجلتى علشان كده متغيرة معايا قولى... عادى انا مش هتجوزك غصب"
والتفتت له نادية وبصت له باستغراب
"انت ايه اللى بتقوله ده يا يحيي"
"فسريلى... مكالمات بتكلمينى بالعافية... خروج لما توافقى نخرج بصى فى المراية وشوفى عاملة ازاى... لما بجيلك البيت بتقعدى معايا وانتى عايزة تقولى لى قوم امشى"
"لا طبعا كل كلامك ده غلط"
"بكرر لك يا نادية... انا مش بفرض نفسى عليكى لو عايزة نفسخ الخطوبة براحتك"
عيطت نادية من كلام يحيي
"معقول يا يحيي تكون مش عارف انا بحبك قد ايه... ده انت الحب الوحيد ف حياتى وعمرى ما تخيلت انى هحب كده الاقيك مش واثق فى حبى ليك"
اخد يحيي منديل من قدامه ومسح دموع دموع نادية وادالها منديل تانى
"اهدى ومتعيطيش...احنا بنتكلم"
"مش مصدقة انك بتقول كده...ده انت كل حاجة حلوة ف حياتى"
"طيب فهمينى مالك... انتى حتى الدراسة بدأت ومبتروحيش المدرسة...يبقى مالك"
"يبقى جوايا حاجة محدش حاسس بيها يا يحيي... مقهورة وحزينة على صاحبة عمرى اللى راحت ف لحظة... مش قادرة افرح وانا عارفة انها مبقتش موجودة... مش عارفة اعيش حياتى وانا عارفة ان حياتها انتهت"
"ايه كل ده يا نادية... انتى مؤمنة بالله وحرام تقولى كده"
"جوايا نار ومش قادرة اعيش حياتى ولا افرح... كل ما افتكر ان وهى بتموت كنت انا عروسة وف فرح"
مسك ايدها...وشد عليها وباس راسها
"متزعليش منى... انا كنت هتجنن لما حسيت انك مش طايقانى... لازم تقتنعى ان ربنا قدر لكل واحد نصيبه والحياة مبتقفش على حد... وياريت ترجعى المدرسة وترجعى للدروس بتاعتك...معقول دى نادية اللى انا عارف ومتأكد انها قوية"
"ربنا يخليك ليا يا يحيي... الكلام اللى قلتهولك ده كان جوايا وبفكر فيه ليل ونهار... ارتحت لما خرجته وان كان مغيرش احساسى بالحزن على اميرة"
"الحزن بيبقى كبير ف اوله يا نادية واحنا لازم منوقفش حياتنا... هترجعى المدرسة امتى"
وابتسمت ابتسامة حزينة
"كنت ناوية اجدد الاجازة بس خلاص يومين وارجع المدرسة تانى"
"ايوه كده ...هى دى نادية حبيبتى اللى اعرفها... ممكن بقى اطلب منك طلب"
"طبعا يا حبيبى"
"اى حاجة جواكى تقوليهالى من غير ما اسألك...متسيبينيش اخمن وافضل افكر والظنون تخلى راسى تجيب وتودى"
"حاضر... وانا عايزة اطلب منك طلب...اوعى تانى ييجى ف بالك انى مش بحبك او انى اقدر ابعد عنك"

دخلت نادية البيت... واول مادخلت جريت عليها نسمة
"نادية نادية نادية"
"ايييييييييييييييه"
وقالت بفرحة
"نوال حامل"
سكتت نادية... وقعدت وهى بتردد الكلام
"حامل"
"اه حامل...مالك مش فرحانة ليه"
"وافرح ليه"
"تفرحى ليه... تفرحى علشان نوال تفرحى اننا هنبقى خالات"
"انا خايفة عليها"
"من ايه"
ومسكت نادية راسها وهى بتحاول تطرد منها الافكار الوحشة اللى فكرت فيها
"مفيش حاجة يا نسمة"
وقامت ودخلت اوضتهم... غيرت هدومها وقعدت على السرير والنور مطفى ...وسرحانة

فاتت شهور
نادية بدات ترجع لحياتها واحدة واحدة
نسمة نجحت فى التيرم الاول
نوال عايشة نفس الحياة الصعبة وساكتة ومتحملة
سمير كل مايروح يزور نوال تقابله ف بيت حماتها ولما يسألها عن حياتها متحكيش وتقول بس الحمدلله
سعاد بينها وبين نوال تليفونات فى بيت حماتها برضه
ونادية ونسمة دايما بيزوروا سعاد
بلال ومديحة مستنيين الاجازة علشان يقبضوا الجمعية ويروحوا يخطبوا ليلى
نسمة بتمتحن... ونادية فى امتحانات... وحددوا معاد الجواز بعد الامتحانات على طول

خلص فرح نادية... وصلوها كلهم البيت بفرحة
وبعد مانزلوا ...مديحة مع نسمة وسمير
مديحة"الفرح كان جميل ونادية ويحيي كانوا زى العسل"
نسمة"احلى من الخطوبة 100 مرة"
سمير"ربنا يسعدهم وعقبالك يا اخر العنقود"
نسمة وهى بتمسك فى ايده اكتر
"ربنا يخليك يا بابا"
مديحة"احنا على الشهر الجاى كده هنخطب لبلال"
اتغيرت ملامح نسمة غصب عنها... وحاولت تكون طبيعية
"مبروك ياعمتو"
سمير" مبروك يا مديحة...ياترى مين"
مديحة"الله يبارك فيكم...واحدة كانت معاه فى الكلية بس اصغر منه لانها لسه بتدرس"
سمير"ربنا يتمم لهم بخير"
مديحة"بس قوللى كان مالك فى اخر الفرح كده شايفاك بتزعق لنوال"
سمير"انا مش عارف البت دى جرالها ايه... بقولها تعالى بكرة اتغدوا معانا لقيتها بتقولى مش عارفة لما اشوف ظروف البيت وحد جاى من اخوات رامى ولا لأ"
مديحة"يمكن جايين لها"
سمير"يا ستى لأ...دول بيروحوا بيت مامتهم ولازم هى تكون موجودة.... سألتها انتى مرتاحة تقولى الحمدلله وانا شايفها كل يوم بتخس وتدبل وبقت شكل الخدامات"
نسمة"يابابا هى يمكن مرتاحة مع جوزها"
سمير"مرتاحة ازاى بس.. اللى ميشوفش م الغربال يبقى اعمى"
مديحة"ربنا يهدى سرهم يا سمير... دى حياتها وهى ادرى باللى يريحها...وبدل هى راضية خلاص"

بعد اسبوعين...رجع بلال من الشغل بعد مانزل بساعتين
واول ما فتح الباب...كانت نسمة ومديحة قاعدين مع بعض
مديحة"بلال... ايه اللى رجعك"
قعد بلال وشكله حزين
نسمة"مالك يابلال...انت كويس"
بلال"اه كويس متقلقوش"
مديحة"اللى جابك دلوقتى انت مش بتبات ف الشغل"
بلال"خلاص مفيش شغل"
مديحة"مفيش شغل ازاى...ايه اللى حصل"
بلال"ابدا... شافوا ان عدد العاملين ف المصنع كبير قالوا يسرحوا شوية...وانا من اللى سرحوهم"
مديحة"ازاى كده...من غير ماتعمل حاجة"
بلال"من غير ما اى حد يعمل حاجة"
نسمة"معلش متزعلش متعرفش الخير فين"
مديحة"وهنعمل ايه ف الجمعية هندفعها منين"
بلال"مش عارف"
مديحة"يادى المصيبة.. هتصرف ف فلوس الجمعية منين"
نسمة"ايه ياعمتو... متشيليش هم حاجة ابقى خديهم من بابا"
بلال"ليه يا نسمة معهاش راجل يعرف يتصرف"
نسمة"مقصدش يا بلال...انا قصدى اساعدها"
بلال"متشكرين ياستى"
مديحة"ايه يابلال... نسمة كتر خيرها متقصدش حاجة"
قامت نسمة وهى بتحاول تمسك دموعها لحد ماتنزل
"تصبحو على خير"
ونزلت جرى من غير ما ترد على مديحة
"ايه اللى قلته لبنت خالك ده"
"معرفش بقى كلامها نرفزنى"
رن موبايل بلال...وقام دخل اوضته يرد
"ايوه يا ليلى...كويس الحمدلله... مكنتش فاضى... لا استنى متكلميش حد عندك دلوقتى... يمكن نستنى كام شهر كمان... ظروف معلش... ظروف يا ليلى ايه مش هتستحملينى كام شهر كمان... بقولك ايه ده اللى عندى...مش هقدر اجى اكلم اهلك الايام دى زى مااتفقنا... انتى حرة بقى"
قفل بلال وهو بيزعق... دخلت عليه مديحة
"بتزعق كده ليه"
"كل كلامها هتيجى امتى...اقول لاهلى امتى انك جاى.. ولما قلتلها تستنى اتقمصت من غير حتى ما تقولى مالك ولا ايه اللى مضايقك"
"وهى هتعرف منين بس... اهدا يا بلال ربنا يرزقك بشغل تانى احسن ان شاءالله"
"انا نازل شوية"
"رايح فين"
"مش عارف...متقلقيش هبقى اكلمك لو هتأخر"
نزل بلال... وهى ف الشارع قابل احمد
وقفوا مع بعض وحكى له احمد اللى حصل له ف الشغل
"ياعم ما قلتلك تعالى اشتغل معانا ف الكباريه"
"مش عارف يا احمد... قلقان"
"طب عندى فكرة... تعالى النهاردة غير جو واسهر وفرفش كده وانا اعمل معاك احلى واجب يروقك"
"هههه يروقنى...ياريت"
"تعالى جرب انت هتخسر ايه"
"ولا حاجة... يالا  السهرة معاك النهاردة بس هكلم ماما اطمنها انى هتاخر"
"طيب طمنها انك مش هترجع قبل 9 الصبح...نبقى نرجع مع بعض"

طول الليل ف الكباريه... وبلال بيتعمل معاه واجب من وجهه نظر احمد...خمرة وحشيش طول الليل وبلال بيشرب بدون وعى
لحد الصبح كانت حالته صعبة من شدة السُكر
بعد ماخلص احمد الشغل... اخد بلال يوصله البيت
وعند باب العمارة
"بلال هتقدر تطلع ولا ايه...انا مش عايز مامتك تشوفنى وانت كده"
"ت ...تم... تما... تمام"
بدأ بلال يطلع على السلم وهو بيتسند وبيطلع وهو دايخ وبيتكعبل فى كل خطوة
نسمة كانت واقفة على السلم بتطلع الزبالة لما شافته
"بلال؟؟؟ مالك فى ايه "
كان هيقع...سندته بسرعة... اتسند على كتفها
"مالك يا بلال... يادى المصيبة اتصرف ازاى انا دلوقتى...يا بلال مالك"
"كو...كويس... كويس.. هشرب قهوة و.. و  ابقى ...كويس"
"عمتو راحت السوق... طب تعالى اعملك قهوة"
دخل معاها بلال وهو بيتسند عليها قعدته على الكنبة الكبيرة
"خليك هنا لما اعملك قهوة واجى...طيب انت محتاج دكتور ولا حاجة اتصل ببابا ييجى نوديك لدكتور"
شاور لها بلال بايده  لأ
دخلت عملتله قهوة ورجعت لقيته نايم على الكنبة
قعدت على ركبها تصحيه بشويش
"بلال...بلال... انت نمت هنا"
فتح عينيه...كانت قصاده بالظبط
"نسمة"
"نعم"
"اسندينى اقوم"
"حاضر"
سندته تقومه... كان ماسك فيها اوى... هو اتقل منها
حاولت تشده... وقعت... فى حضنه
حاولت تنسحب بهدوء...حست بيه بيضمها اكتر ليه
"بلال... بلال...مينفعش كده"
سكتها بقبلاته المتلاحقة...قاومت فى البداية ... واستسلمت
استسلمت لاحساسها بيه.. ولكلمة بحبك اللى اول مرة تسمعها منه

هناك 30 تعليقًا:

  1. روووووووووووووووووووووووعة بجدددددد
    تسلم الايادى

    ردحذف
  2. حلوة أوي الحلقه بس قصيرة أوي معلش عارفين انك مشغولة وأحلي حاجة إن ناديه ويحيي إتجوزوا

    ردحذف
  3. تحفه جداااااااااااااااااااااااااااااااااااااااااااااا

    ردحذف
  4. الحلق قصيره اوووي يا ديناو قطعتى عند حته جامده عوضيها بقى المره الى جايه ^_^

    ردحذف
  5. حلوه جدىىىىى




    shosho saleh

    ردحذف
  6. رووووووووووووووووووووووعة تسلم الأيادي يا دوندون ................. يارب تطولي الحلقة شوية

    ردحذف
  7. 7elwa awiiii

    ردحذف
  8. تسلم ايديك وربنا يوفقك للأحسن دائماً

    ردحذف
  9. واووووووووووووووو حلوه اوووووووي بجد روعه

    ردحذف
  10. تجننننننننننننننن بجد انا هتجنن من كتر ما قصصك حلوة بجد
    انا عمرى ما كنت بطيق انى اقرى ابدااااااااا
    ومن ساعت ما ابتديت اقرى قصصك بجد وهى بقت شغله كل وقتى
    انتى فنااااااااااااااااااااانه ومبدعه بجد
    lola7amd

    ردحذف
  11. جميييييييييييييلة اوى الاحداث بدات تولع :D:D:D

    ردحذف
  12. جمييييييييييييلة اوى يا دينا مستنيه الجديد بسرعة ماتاخريش علينا
    اية

    ردحذف
  13. الحلقة خطيرة انا مستنية الحلقة الي جاية علي ناااااااااااار
    هولي

    ردحذف
  14. Opaaaaaaaaaa :D
    El mawDoo3 Baazz 5aaaaaaaaaaaaaalssss :D
    Drama b2a y2oom Sameer Daaaaaa5l 3alehom :P

    LA GamDa el 7al2aaa ,, bs Blaal nayll el denya 5als b2a ay wa7d y3oz yarfch yskarr !!

    ردحذف
  15. اوباااااااااااااااااااااااااااااااا ولعت يا دينا XD

    ردحذف
  16. حلقة تجنن

    ردحذف
  17. الحلقه روووووووووووووووووووووووووووووووووووووووعه بس يا ريت تطولى الحلقات شويه

    ردحذف
  18. wooooooooooooooooooooow to7fa ya dondon a elgmal da bs m4 3arfa tkmly 4wia kman

    ردحذف
  19. روووووووووووعة

    ردحذف
  20. lallala keda eldonia baaaaaaaaaaaaazet
    rabena yostor b2a mn elly gay bs mosh methy2ly en 7d hy3rf f elawl
    shw2tena :)))

    ردحذف
  21. حلوة اوى بس خايفة على نسمة (شرى )

    ردحذف
  22. ههههههههههههههههههههههههه يادي المصيبه البنت الغبيه ضاعت

    ردحذف
  23. تحفة بجد بس طولى الحلقة شوية يا دندن
    وربنا يستر على نسمة

    ردحذف
  24. 7elwa gedaaaaaaaaaaaaaan bs 2na 5ifa 3la nesma :(

    ردحذف
  25. حلقة حلوة موووووووووووووووووووووووووووووووووت

    ردحذف
  26. شكلهم كدا حيتورطوا و حيضطر يصلح غلطته فيتجوزها و هو مش بيحبها و يفضل يفكر في حبه اللي ضاع و يعيش كارها و هي بتحبه و تتعذب هيا و يمكن تطلب منه الطلاق و يتطلقوا وبعدين يمكن يكتشف انه بيحبها فيرجعلها

    ردحذف
  27. تسلم ايدك والله

    ردحذف
  28. حلووووه كتير عن جد بتعقد انا ماكنت حب القراءه بس هلا صرت اموت عليها

    ردحذف
  29. الحلقه حلووه اووي بس ياتري ايه اللي هيحصل بعد كده دينا انتي مبدعه جداااااااااااااااااااااااااا

    ردحذف
  30. الحلقه حلوه بس البت السازجه دي هي اللي غلطانه وبلاش حد يقولي مبرر ربنا اعطي لنا عقل

    ردحذف

قول رأيك بلاش تقرا وتقفل من سكات...ارائكم تهمنى