الحلقة 17
جت ممرضة على صراخ نادية
ساعدتها انهم ينيموا نوال على السرير
نادية بتصرخ فيها
"فين الدكتوووووووور"
ارتبكت الممرضة
"هشوفه ...هشوفه"
مشيت الممرضة ونادية بتعيط وكل شوية تكلم نوال تتأكد انها واعية
"متخافيش يا نادية ... متخافيش"
نادية بقت مش عارفة مين المفروض يطمن مين
عايزة تطمن نوال ونوال اللى بتطمنها
الاتنين ماسكين ايد بعض
"لو جرالى حاجة يانادية متسيبيش ابنى مع حماتى الله الله يخليكى"
نادية بتعيط
"متقوليش كده... الدكتور هييجى دلوقتى ويلحق النزيف ده ان شاءالله وهتبقى كويسة"
بعد حوالى ربع ساعة كل 5 دقايق نادية تطلع تشوف الممرضة ومتلاقيهاش
جه دكتور شاب صغير وعلى وشه اثار نوم
كشف على نوال
"مفيش حاجة ولا نزيف ولا حاجة"
نادية"ازاى مفيش حاجة...والدم ده كله ايه"
الدكتور"دم نفاس عادى"
نادية"انت متخصص؟"
الدكتور اتضايق من سؤال نادية
"مش متخصص بس برضه انا دكتور"
نادية"هتكدب عينيا ...انا عايزة اعرف اختى مالها"
الدكتور"اختك والدة وطبيعى يبقى فيه دم نفاس"
نادية"دم بالشكل الفظيع ده...مش ممكن ده اكيد نزيف"
الدكتور بنفاد صبر
"خلاص اكشفى عليها وعالجيها انتى"
خرج الدكتور من الاوضة
"متخافيش يا نادية خلاص قال عادى"
نادية مش قادرة تقتنع...اتصلت بواحدة صاحبتها
"هتكلمى مين دلوقتى الساعة 3ونص"
مردتش عليها نادية
"الو...ازيك يا نجوى...سورى انى صحيتك دلوقتى... هو الدكتور اللى كان ولدِك تقدرى تجيبلى تليفون موبايله دلوقتى... انا معاكى... طيب ابعتيهولى مسدج...بسرعة الله يخليكى ...اختى ولدت وبتنزف وانا عايزاه...الله يسلمك ...مع السلامة"
"يا نادية انتى مكبرة الموضوع ليه..متخافيش"
"يا بنتى انا اللى مش فاهمة انتى اخداه ببساطة كده ازاى"
"كل واحد بياخد نصيبه...ولو كان فيه حاجة مكنتش هبقى بكلمك عادى كده"
"والدوخة اللى وقعتك"
"معرفش"
اتصلت نادية بالدكتور...وقالتله ييجى بسرعة
وفعلا جه الدكتور فى اقرب وقت
وبعد الكشف على نوال
"بصراحة يامدام انتى خضيتينى... مفيش اى حاجة وكل شئ طبيعى جدا وده مش نزيف ده دم نفاس عادى...بس من اهمال المستشفى سابوها كده من غير حفاض كويس ومع قومتها اندفع الدم زى ما انتى شوفتيه"
"والدوخة دى وقعت منى"
"طبيعى لانها عاملة عملية وكانت نايمة ومأكلتش حاجة فلما تقوم مرة واحدة لازم يجيلها هبوط... متقلقيش هى كويسة"
اخيرا اقتنعت نادية ان نوال فعلا كويسة...ده دكتور كبير ومعروف وكتير من صاحباتها بيولدوا عنده وكلهم بقوا كويسين
بعد ما الدكتور مشى..
"قومى معايا واحدة واحدة بقى تغيرى هدومك دى"
كانت نادية بتجيب هدوم من الشنطة...والتفتت لقت نوال بتضحك
"بتضحكى على ايه"
"ع الرعب والفزع اللى كنتى فيه لدرجة انى اتخيلت انى مُت خلاص"
وضحكت نادية
"بتضحكى.. انا قلبى وقع والله كنت هموت م الرعب"
"اجمدى كده انتى لسه هتعدى بمراحل كتير"
"مراحل ايه"
"الحمل والوحم والولادة والتعب ده"
"لا يا حبيبتى انا كده فلة الحمدلله"
"يعنى ايه"
"يعنى لا اقدر على حمل ولا ولادة ولا الكلام ده كله"
"ازاى يا نادية ايه الكلام الغريب ده"
وقفلت نادية الكلام
"قومى بقى معايا تغيرى هدومك قبل ابنك ما يصحى"
تانى يوم الصبح... وحوالى الساعة 10
جت سعاد بدرى واول ما دخلت راحت على نوال تسلم عليها وتبوسها
"حمدالله على سلامتك يا حبيبتى"
نوال"الله يسلمك ياماما"
وسلمت على نادية وباستها
"كده يا نادية اختك تولد من امبارح ومعرفش غير من ساعة"
نادية"معلش ياماما كنا ملبوخين بيها...عرفتى منين"
سعاد"نسمة كلمتنى من ساعة كده وقالت انها بتعمل اكل وشوية وجاية"
نوال"شوفى ياماما صبرى "
بصت سعاد لنادية وهى بتقول
"صبرى!!!"
ضحكت نادية وهى بتحاول تكتك الضحكة
"ام رامى صممت يبقى اسمه على اسم جده"
سعاد"هى عاملة معاكى ايه يانوال"
نوال"الحمدلله"
نادية"مش ممكن تكون معاكى عادية...دى ست فظيعة...عارفة ياماما امبارح مسكت فيها وكنت عايزة اطبق ف زمارة رقبتها"
نوال"امتى ده"
نادية"وانتى ف العمليات...يخربيتها نرفزتنى"
سعاد"وانتى متتوصيش يا نادية بتتعصبى على طول"
نادية"طب والله بابا كان هيتعصب عليها هو كمان"
سعاد"انتى هتقوليلى ماانتى طالعة له"
وسمعوا صوت ام رامى بتقول بره للمرضات
"السلام عليكم"
نادية"يوووو...ياريتنا جبنا سيرة حاجة عدلة"
دخلت ام رامى
"سلامو عليكو... ازيك يانوال... فين حفيدى الغالى"
وكان صبرى فى ايد سعاد... اخدته ام رامى من غير استئذان
لسه نادية هتتكلم غمزتلها سعاد بالسكوت
نسمة بتلبس ...خبط عليها الباب
راحت تفتح...لقت بلال
وقفت لحظات ساكتة ...وسمعت عمتها
"خلصتى يا نسمة ولا لسه"
تجاهلت نسمة وجود بلال وردت على عمتها
"اه خلصت يا عمتو"
مديحة"ادخل يا بلال شيل الاكل ووقفلنا تاكسى"
دخل بلال وهو مبيبصش لنسمة خالص
راحوا المستشفى وكانت لسه سعاد هناك وام رامى ونادية سمير
فى المستشفى نسمة قاعدة ساكتة مبتتكلمش خالص
سمير بيلاحظها ...شايفها مش بتتفاعل مع اى كلام كالعادة
استأذنت سعاد تمشى... وهى ماشية قام وراها سمير
وبره الاوضة
"سعاد لو سمحتى عايزك ف كلمتين"
استغربت سعاد ان اول مرة سمير يكلمها من يوم ما اتطلقوا
دارت استغرابها وردت عليه
"نعم"
"نسمة مالها"
"نسمة؟؟ مالها؟؟"
"ما انا بسألك علشان مش عارف"
"هى بتكلمنى عادى وانا مش ملاحظة حاجة"
"لا هى متغيرة اوى بقالها فترة كده زى ماتكون مكسورة كلامها قليل وبعد ما كانت شعلة نشاط ف البيت قاعدة على طول ف اوضتها وف السرير معرفش صاحية ولا نايمة ساكتة بتتكلمش"
"انت هتقلقنى عليها ليه"
"ماهو انا لو مكنتش قلقان مكنتش قلت لك... عايزك تتكلمى معاها كده وتشوفى مالها يمكن محتاجالك"
"بقولك ايه انا هقولها تيجى تقعد معايا كام يوم تغير جو واهو احاول اعرف مالها"
وسكت سمير لحظات يفكر...
"ماشى... معنديش مانع"
"انا مش هقول لها دلوقتى علشان تيجى طبيعية منى"
"طيب... بس جوزك مش هيتضايق يعنى"
"لا مش هيتضايق"
خلصت سعاد كلامها معاه ومشيت..ودخل سمير تانى الاوضة لنوال
كام ساعة وبدأت نوال تستعد انها تروح...بعد ما رامى جه
نادية"هتيجى عند بابا مش كده"
ام رامى"لا طبعا... ابن ابنى يرجع على بيته"
سمير"ها يا نوال ...هتروحى معانا"
سكتت نوال وهى بتبص لحماتها وبعدين ردت
"لا هروح ع البيت احسن"
سكتوا كلهم... وكل واحد فيهم بيقول
"ان كان صاحبة الشأن راضية"
نفس اليوم بالليل... مديحة كانت عند نسمة وسمير
مديحة"اهو بلال لقى شغل كده ف محل بس بيقول مش هيستقر فيه على طول وبيدور على شغل تانى...حتى الخطوبة أجلها"
سمير"انا مش ساكت والله يا مديحة بدور له من ناحيتى وربنا ييسر"
مديحة"طول عمرك واقف جنبنا ربنا يخليك يا سمير"
رن تليفون نسمة... وقامت ترد على سعاد...وبعد ما رجعت
"بابااا...ماما عايزانى اروح اقعد عندها"
"ماشى يا نسمة لو عايزة تروحى روحى"
"مش هتتضايق"
"لا روحى اقعدى مع مامتك كام يوم وارجعى تانى"
ابتسمت نسمة بعد فترة من العبوس... ودخلت تحضر هدوم تاخدها وهى رايحة تانى يوم
استغربت مديحة من التغير المفاجئ لسمير
"انا مش مصدقة...انت وافقت ان نسمة تروح لسعاد كام يوم"
ووطا صوته وهو بيتكلم
"انا اللى طلبت من سعاد كده"
"فهمنى..ليه"
"نسمة فيها حاجة مش عاجبانى وزى ما قلتى يمكن نفسيتها تعبانة بعد جواز اخواتها والبيت بقى فاضى علينا قلت يمكن لو راحت لمامتها شوية ترجع احسن"
"والله يا سمير عين العقل وكان ده المفروض يحصل من زمان"
فى اوضة نسمة... اتصلت ببلال
"الو...ازيك يا بلال"
"الحمدلله"
"انا رايحة بكرة عند ماما اقعد عندها كام يوم"
"وانا مالى انتى حرة"
"يا بلال انت برضه مش مقدر اللى انا فيه حرام عليك"
"حرام عليكى انتى ...انتى لخبطى حياتى ... بسببك انتى مش عارف اتصرف ولا اقرر هعمل ايه"
"مش محتاجة تفكير ... انت لازم تتصرف"
"ااااه قولى كده بقى ...انك قصدتى تورطينى علشان اتجوزك"
ومسكت نسمة نفسها من الرد عليه وهى بتعيط
"الله يسامحك... ده جزائى انى كنت بساعدك"
"استحملى غلطك...شايفانى راجع سكران ومش ف وعيي بتدخلينى البيت ليه ومفيش حد معاكى"
"علشان واثقة فيك... واثقة فى ابن عمتى اللى طول عمرنا مع بعض... مكنتش متخيلة انك هتعمل كده"
"انا معملتش حاجة وانتى السبب مش انا"
"نهاية الكلام يا بلال هتسيبنى كده اتفضح"
"قلتلك سيبينى افكر ف حل... انتى كل يوم والتانى تزنى عليا كده"
"طيب فكر براحتك... انا لسه واثقة انك مش هتسيبنى كده"
"ربنا يسهل... مع السلامة"
وقفل معاها بسرعة من قبل حتى ما ترد السلام
فى بيت نادية... نادية خارجة من الحمام ورايحة تنام
يحيي قعد جنبها وقرب منها
"وحشتينى"
"وانت كمان يا يحيي... بس راجعة هلكانة عايزة انام"
"طيب اقعدى معايا شوية"
"بكرة"
واترفز يحيي
"فيه ايه يا نادية"
وقامت اتعدلت وقعدت
"فيه ايه انت"
"بتصدينى كده ومفيش حتى كلمة حلوة وانا مشفتكيش من امبارح"
"اااااه كلمة حلوة... طيب ... وحشتنى اوى يا حبيبى يا روحى يا قلبى يا عمرى... كلام كتير حلو اهو...تصبح على خير بقى"
"تصدقى انتى معندكيش احساس... انتى بتتريقى عليا"
"انت بتشتمنى... انت اتجننت"
رد وهو بيقوم وبيفتح دولابه وبيلبس
"انا فعلا مجنون... مجنون علشان مهتم بيكى وانتى ولا ف دماغك ولا بتهتمى بيا نص الاهتمام ولا بتقدرينى حتى"
"انت هتغضب زى العيال الصغيرين"
"اخرسى خالص علشان مغلطش فيكى"
"تغلط...."
"قلتلك اسككككككتى"
بسرعة البرق لبس يحيي ونزل من غير نادية ماتعرف رايح فين
فى بيت سعاد... قاعدين كلهم مع بعض
اسامة"بصى بقى يا نسمة انتى النهاردة هتنامى جنب مامتك وانا هناك عند اسلام"
نسمة"لا ياعمو متغيروش نظامكم علشانى... انا هنام ف اى حتة ممكن هنا ع الكنبة"
اسلام"وتنامى ع الكنبة ليه انتى تاخدى اوضتى وانا انام هنا"
نسمة" لا يا حبيبى خليك فى اوضتك"
سعاد"هو اسامة قسمها صح... يالا بقى يانسمة نقوم ننام وخليهم هما شكلهم قاعدين"
اسلام"انتوا فراخ هتناموا بدرى كده"
سعاد"ايوه...انا عايزة اقعد مع بنتى حد عنده اعتراض"
بص اسلام لباباه
"عندك اعتراض يا بابا"
رد اسامة"انا عايز اكل عيش مقدرش اعترض"
قامت سعاد ومعاها نسمة وهما بيقولوا لهم
"تصبحوا على خير"
دخلوا اوضة سعاد... وهما الاتنين ممددين جنب بعض
"مامااااا..خدينى ف حضنك"
اخدتها سعاد فى حضنها
"يااااااا يا نسمة... متتخيليش انا سعيدة بيكى النهاردة ازاى... مش مصدقة انك معايا نايمة جنبى وف حضنى"
عيطت نسمة
"محتاجة حضنك اوى ياماما...اوووووى"
"مالك يا حبيبتى... انتى متغيرة بقالك فترة"
"مفيش حاجة"
"قوليلى متخبيش عليا...مالك"
"صدقينى مفيش حاجة"
"انتى مكسوفة تحكيلى"
وخافت نسمة من تلميح مامتها... وسألتها بارتباك
"هتكسف من ايه"
"يعنى لو انتى بتحبى حد مثلا ... مشاعر من اللى اى بنت ف سنك ممكن تحس بيها...احكيلى يا نسمة مش هتلاقى حد يخاف عليكى قدى"
وقالت نسمة ف سرها
"يا ريتها كانت مشاعر بس... يا ريتنى اقدر احكى...بس مستحيل اقول لحد اللى جوايا...مستحيل ابقى ف نظركم وحشة وعديمة الاخلاق...مستحيل حتى لو هموت"
"ايه يا نسمة بتفكرى تحكيلى ولا لأ"
"لأ يا ماما انا بس استغربت من استنتاجك... صدقينى مفيش حاجة"
"طيب يا حبيبتى...لما تعوزى تحكى اى وقت هتلاقينى بسمعك"
اتفتح الباب فجأة عليهم... دخل عليهم اسلام
"ماماااااااااااا ... إلحققققققى"
حلوه قوى يا دينا بس انتى كده هاتشوقينا ليوم السبت والف الف الف سلامه عليكى
ردحذفالحلقة صغيرة اوووى يا دينا :/
ردحذفوبعدين كمان بكرة اجازة :(
يعنى لسة يوم السبت
AYA
جامدة جدااااااا تسلم ايديكى يادندن بس انا متضايقة من بلال ده وزعلانة من نسمة وكمان سلبية نوال دى وهخنق ام رامى وعليتها ونادية بقت ش ظريفة لازم تصالح يحيى عشان هو حد طيوب
ردحذفحلقة النهارده قصيره اوي بس مش مهم المهم الف سلامه عليكي
ردحذفكل شويع تشويق تشويق يعنى ينفع كده يعنى انام افكر ف اللى هيحصل بكره ههههههههههههههه
ردحذفحلوة اوى يا دينا
احمد جعفر
شخصية نادية حقيرة جدا جدا
ردحذفبس ااي انا مستغربة منو ليش تقرري انو هاد اللي بيصير مع نسمة وفعلا بلال برضو حقير
ونوال عليقتيها مع رامي و عيلتو لو خليتي الولد يموت مهو اجا بالسابع مش بوقتو
هاد رايي
و اكتر وحدة حبيتها سعاد
والله يستر من اسامة شكلو صارلو شي هههههههههه مسدقة القصة عنجد
روعة تسلم ايدك :):):)
ردحذفgamda tslm edek w alf salama 3aleke,, ghada mahmoud
ردحذفجامدة اوووووووووووووى
ردحذفمستنية الحلقة الجديدة
ايه القفلة دى يا دندون انا كده مش هاعرف انام لحد ماعرف ايه الى حصل بس بجد انتى بارعة وانا بحب كل قصصك تسلم ايداكى
ردحذفاية
دينا مش احنا اتفقنا ان مفيش تشويق قبل يوم الاجازة؟؟؟
ردحذفبس الحلقة تحففة
Tu2aa
الحلقة جامدة اخر حاجة بس كان المفروض بسمة تقول لمامتها واكيد اسامة حصلو حاجة يلا بكرة مش بعيد هتفرج عليها بكرة
ردحذفهيا لحد دلوقتى حلوه اوى ياريت نهيتها تبقى حلوه مش زى نهايه حكم القلب
ردحذفانا حاسه انه اسامه هيموت وسعاد هترجع تتجوز سمير تانى مش عارفه ليه قلبى بيقولى كدة :)
ردحذفlola7amd
وانا برضو حسة كدة وياريت ده يحصل واسامة تجيلوا عقدة هههههههههههههه
حذفالحلقةتحفةبس ياريت ت تنزلى الحلقات بدرى عن كدةشوية عشان المدارس
ردحذفيا تري ايييييه اللى حصل ؟؟؟
ردحذفانتى بهدلتينا معاكى بالتشويق دا
حلوة اوووووووووووووووووووووووووووووووووووووووووي
ردحذفحلوه اوي الحلقه
ردحذفناديه مضيقانى اوووى عصبيه ورخمة
ردحذفناديه بقة رخمه اويييييييي وبلال ده حيوان والمفروض نسمه تحكي لمامتها وهي هتقولها تتصرف ازاي
ردحذف