الجمعة، 28 سبتمبر 2012

ابغض الحلال... الحلقة 27

الحلقة 27
نادية بتحط الاكل ع السفرة وتروح وتيجى م المطبخ
يحيي جاى من الحمام وبيقعد ع السفرة
نادية خلصت وقعدت معاه وبدأوا الاكل
"سخنت الاكل كذا مرة يا يحيي ..اتأخرت اوى"
"ماهو لما باباكى اتصل وقال عايزنى وانا كنت قريب منهم قلت اعدى عليه الاول وبعدين اجى"
"كان عايزك ف ايه"
"هرفع قضية خلع ونفقة لنوال"
"احسن... ومش هترفع اى حاجة على الزفتة حماتها"
وبص لها باستغراب
"اى حاجة ازاى يعنى"
"هموت منها الولية دى... يخربيتها غايظانى"
وضحك يحيي
"وهى علشان غيظاكى نرفع عليها قضية"
ضحكت نادية
"انا عارفة بقى يا يحيي... اصلها ست قوية ومفترية"
"خلاص بقى المهم اختك خرجت من عندهم كويسة وخلاص الحمدلله"
"الحمدلله يا حبيبى... بقولك ايه يا يحيي ماتيجى نسافر لنا كده يومين ف اى حتة نغير جو"
"اااه علشان انتى ف اجازة عايزة تسافرى"
"لو انت مش فاضى خلاص"
"يا حبيبتى حتى لو مش فاضى افضى نفسى... مش زى ناس"
وردت نادية بجدية
"قصدك ايه"
ضحك يحيي
"ايه يا ستى مقصدش حاجة ...تقلبى ف ثانية"
ابتسمت نادية علشان تنفى كلامه
"ايوه كده...دى حبيبتى اللى بحبها مش التانية اللى بتقلب"

نسمة قاعدة على السفرة والاكل اللى جابته سعاد ونوال محطوط قدامها بنفس اللفة بتاعته
قاعدة حاطة ايديها على خدها وساكتة
مستنية بلال ييجى يتغدا... مجاش
                 *******************
بلال ف اوضة مامته نايم على السرير صاحى
فاتح التليفزيون على قناة اخبار وسرحان من غير ما يبص على التليفزيون
جت نسمة وقفت على باب الاوضة
"مش هتتغدا"
"هتغدا... انتى خلصتى"
"الاكل محطوط بره بقاله 4 ساعات من ساعة ماما ونوال ما كانوا هنا"
"طيب انا جاى وراكى اهو"
                    ***************
نسمة بتفتح ف الاكل الملفوف بالورق الحرارى
بلال بيبص على الاكل وبيضحك بسخرية
"هه... اكل عرايس حمام وكباب ...هى مامتك متعرفش اننا بنمثل ومصدقة ولا ايه"
"ماما هتعرف منين كلامك ليا امبارح... وحتى لو عرفت نوال متعرفش"
"ربنا يهون"
"انت ليه كل كلامك معايا كده... كل لحظة بتفكرنى بغلطتى الوحيدة ف حياتى ...غلطتى انى حبيتك ووثقت فيك"
وخبط ايده على الترابيزة
"اسكتى... متقوليش حب...اللى يحب حد ميورطوش ويضيعله احلامه زى ما عملتى"
"والله... انا اللى ورطتك وانا اللى ضيعت احلامك... وانت معملتش حاجة صح...انا كل الشيطان وانت الملاك البرئ"
"غلطت... ايوه غلطت وبدفع التمن"
"التمن ده انا اللى بدفعه ...دفعته كل لحظة خوف وذل وانا بتحايل عليك تتجوزنى...دفعته انكسار وانا بحكى لماما اللى حصل... دفعته لما اول مرة اتحدى بابا ويمد ايده عليا... انا اللى بدفع التمن يا بلال مش انت"
خلصت كلامها المخنوق وجريت على اوضتها تعيط

فات اكتر من ساعة وهى بتعيط فى اوضتها
سمعت خبطتين ع الباب وبعدها اتفتح
ظهر بلال ع الباب... هى دورت وشها بعيد عنه
"ممكن نتكلم من غير زعل"
"انا مزعلتكش يا بلال انت اللى كل شوية بتتعمد تجرحنى"
"غصب عنى والله... من يوم اللى حصل ده وانا بقيت واحد تانى لا طايق نفسى ولا طايقك"
بصت له بغضب
"تانى؟؟"
"بصى يا نسمة احنا طول عمرنا اخوات... انا عايز نرجع علاقتنا كويسة تانى ... انتى عارفة انك واخواتك كل عيلتى واخواتى... انا اسف بس بجد انا كمان ف ظروف وحشة وحسيت انك انانية ومش همك غير نفسك وبس"
"وانت مكنتش انانى مش شايف غير نفسك وبس"
"بصى احنا الاتنين غلطنا وبندفع التمن... يبقى نشوف اقل الخساير اللى هنخرج بيها من الموقف ده"
"اللى هى ايه"
"اولا متزعليش منى على كل اللى فات انا فعلا كنت بجرحك كتير ووعد منى خلاص مش هتكلم ف اللى فات واللى حصل حصل"
"كويس... وبعدين"
"نشوف هنتصرف ازاى ف اللى جاى... ماما كلها اسبوع وهتبقى معانا ف البيت ومش عارف هنتصرف ازاى"
"اللى انت شايفه انا هعمله"
"انا محتار..نبين اننا مش مرتاحين مع بعض علشان الطلاق يكون طبيعى ولا نبين اننا كويسين والطلاق يكون مفاجئ ليهم"
"ماهو لو بيننا اننا مش كويسين من اول اسبوع اكيد هيسألونا ف ايه"
"ف جميع الاحوال هيسألونا عن السبب"
"معرفش يا بلال... انا مش بعرف امثل واكيد هيبان عليا"
"طيب خلينا عاديين قدام ماما...يعنى زى ماكنا قبل كده وشهر كمان بالظبط نعمل خناقة على اى حاجة ونتطلق فيها... كويس كده"
"حاضر"
"انا اسف على كل حاجة حصلت"
قالها وخرج من الاوضة.... مسحت نسمة دموعها وهى بتقول لنفسها
"ياريت الاسف كان يرجع الزمن ولا يصلح اللى اتكسر جوايا"

فات اسبوعين
وف بيت ام رامى
الباب بيخبط... ام رامى بتفتح
"السلام عليكم يا حاجة... رامى صبرى موجود"
"ايوه يا بنى... انت مين"
"انا محضر من المحكمة ومعايا اعلان... تستلميه ولا هو يستلمه"
"محكمة؟؟ اعلان ايه يعنى... ثوانى يا بنى"
ونادت ام رامى
"يارااااااااااااااااامى"
جه رامى على صوتها
المحضر"امضيلى بالاستلام هنا لو سمحت"
راح رامى مضى على الاستلام وبعدها سأل
"هو ايه ده"
"ده اعلان بجلسة خلع رافعاها نوال سمير"
مشى المحضر بعد ما خلص كلامه
رامى واقف ماسك الورقة ومش بيتكلم...واول ما قفل الباب
"شفت الواطية بنت الكلب... عايزة تحبسك... هتدخلك المحاكم يا بنى... منها لله ربنا ينتقم منها... اشوف فيها يوم هى وابوها وعيلتها كلها"
ام رامى بتتكلم وهى بتطلم وبتصرخ
"انا لازم اتصل بابوك ييجى يشوف محامى ... يا مصيبتى يانى لاحسن ياخدوك يحبسوك... اللى كانت عاملة طيبة طلعت مياه من تحت تبن... ربنا يولعك يا نوال يا بنت...هى امها اسمها ايه"
"سعاد"
"يا نوال يا بنت سعاد"
كانت بتتصل من التليفون... واول ما خلصت كلامها...صرخت
"انت فين يا صبررررى... تعالى بسرعة... ابنك هيتحبس يا صبرى... تعالى شوفلنا محامى... يا مصيبتى يانى... ياحبيبى يابنى... بسررررعة متتأخرش"
قفلت التليفون... واخدت رامى ف حضنها
"اوعى تخاف يا حبيبى... متخافش ابدا"
"هما ممكن صحيح يحبسونى؟؟"
"اومال المحكمة دى ليه... هنشوف محامى ونطلعك متخافش ابدا يا عين امك"

صبرى اول ما قفل الموبايل... قام من ع الكنبة اللى قاعد عليها... وشال طفل من على حجره
"رايح فين يابابا"
"معلش يا حبيبى... بكرة هاجى ونقعد مع بعض كتير"
"ماااااااماااااااااااا"
جرى احمد على مامته ... خرجت سلوى من اوضتها
صبرى"انا همشى يا سلوى معلش"
سلوى"ليه بقى ان شاءالله... خايف برضه من مراتك العقربة"
صبرى"اتصلت بيا ويتقول فيه مصيبة تخص رامى"
سلوى"عليا النعمة تلاقيها هى اللى طفشت مرات ابنها...دى خرابة بيوت"
صبرى"اللى حازز فيا الواد الصغير..هتجنن واشوفه"
سلوى"هتيجى امتى"
صبرى"بكرة بقى ... خلى بالك من احمد... احمممممد هات بوسة لبابا قبل ما انزل"

فى بيت ام رامى... رامى قاعد ومامته جنبه ومش بتسكت وبتعيد نفس الكلام...
"هو ابوك اتأخر كده ليه... انا مش عارفة الراجل ده بقى مبيسمعش الكلام على طول ليه... اتصل بيه تانى"
وطلع رامى موبايله... واتصل بباباه
"الو... بابا؟؟"
وقام اتنفض من مكانه
"ايه... مستشفى... طيب احنا جايين حالا"
بكل فزع سألته
"ايه يارامى...فى ايه"
"ماما البسى بسرعة بابا تعبان وف المستشفى"

فى المستشفى... وف اوضة ف عنبر مليان ناس
صبرى نايم على سرير... وراسه ملفوفة وايده ورجله متجبسين
وواقف جنبه بناته ورامى وام رامى
صبرى بيتكلم بصعوبة
"واتخبطت بالعربية وبعدها مدرتش بنفسى غير وانا وهنا"
ام رامى"وفين اللى خبطك..محدش لحقه"
صبرى"انا اللى كنت ماشى بفكر... رامى ماله؟؟"
رامى"خير يابابا... متقلقش انت بس"
صبرى"طمنى... هتتحبس ليه؟؟؟ايه اللى حصل"
اخت رامى"مفيش حبس ولا حاجة يابابا ... ماما اللى فهمت غلط"
صبرى"انا عايز اشوف صبرى.... عايز اشوفه يارامى"

بيت سمير.... جرس الباب بيرن
نوال بتفتح... شافت رامى قدامها
معرفتش تعمل ايه... لحظات تفكير وبعدها
"بابااااااااااااااااااا"
نادت على سمير ولما جه سمير دخلت هى
سمير"نعم... خير"
رامى بانكسار
"ممكن ادخل اتكلم معاك ومع نوال"
سمير"جاى لوحدك ليه...ومامتك فين ولا انا حافظ هتقول ايه... انا جيتلك وانت قلت نعمل اللى عندنا... مش هنتنازل عن القضايا يارامى"
سمير كان بيتكلم...ورامى واقف مكانه... الدموع بتلمع ف عينيه
"عايز ابنى"
نوال كانت واقفة فى الطرقة بعيد عن مرمى بصر رامى واول ما سمعته...جت تجرى ووقفت قصاده وهى بتصرخ
"الا ابنى يا رامى... مش هتاخدوا ابنى منى ابدااااااا"
رامى بدموعه
"ابويا ف المستشفى بيموت وعايز يشوف صبرى... ارجوك يا عمى...ارجوكى يا نوال متحرموهوش انه يشوف حفيده"
بص سمير لنوال اللى سكتت فجأة
نوال"لا... دى اكيد خطة انتوا عاملينها علشان تاخدوا ابنى منى...باباك صحته كويسة ومبيشتكيش من اى حاجة"
رامى"لو مش مصدقين تعالوا معايا... بابا عمل حادثة وكل اللى عايزه يشوف صبرى... ارجوكم يشوفه"

فى المستشفى وف نفس العنبر وعلى نفس السرير
صبرى زى ماهو وحواليه بناته وام رامى...
جه رامى وسمير بصبرى الصغير
ام رامى اول ما شافته
"جاى تتشفى فينا... كله منك ومن بنتك ...منكم لله ... منكم لله"
دخل دكتور بيزعق
"ايه الزعيق والصوت العالى ده...انتى يا ست ف مستشفى مش ف سوق...لو عليتى صوتك تانى هطلعك بره"
سكتت ام رامى وشاور صبرى لسمير انه عايز الولد
قرب منه سمير وهو بيقرب منه صبرى يشوفه ويبوسه لانه مش عارف يشيله بايده المتجبسة
"سلامتك يا حاج صبرى ان شاءالله تقوم بالسلامة"
صبرى الكبير ... بيبوس صبرى الصغير... وبايده السليمة لمس وشه وشعره
"الحمدلله انى شفتك يا حبيبى"
قربت ام رامى من سمير ومدت ايدها تشد الولد
"هات اما اشوفه "
سمير وهو بيبعده عنها
"بالراحة يا حاجة شوية...فيه حد يشد طفل كده"
ام رامى"وانت هتعلمنى اشيل عيل صغير ازاى"
سمير"مفيش فايدة فيكى... طب ملكيش دعوة بيه"
لف سمير وبعد عنها ومتجه للباب ولسه ام رامى هتجرى وراه
سمعت واحدة من البنات
"باباااااااااااااااااااااااا.... لاااااااااااا... بابا رد عليااااااااا"
رجعت ام رامى على جوزها...فضلت تصوت هى وبناتها ويهزوا فيه...رامى واقف ثابت مكانه ودموعه نازلة وهو بيحرك شفايفه ويقول "بابا" بصمت
 جت ممرضة بسرعة... جست نبضه وبصت ف عينيه بكشاف صغير
"البقاءلله يا جماعة شدوا حيلكوا"

هناك 29 تعليقًا:

  1. انتى رائعه تحفه

    ردحذف
  2. صغيرة اووووووووووووووووووووووووووووووي يا دندون لا لا لا

    ردحذف
  3. ههههههههههههههههههه اتارى الراجل مش سهل لى حق يتجوز عليها دى لازم تتعلم الادب والحلقه صغيرة اوووووووووووووووى بس جميييييييييييييييييييله

    ردحذف
  4. تحفه يادينا ... انا متابعه من زمان اوي بس في صمت ... ربنا يولع في ام رامي دي اللهم لا شماته يعني بس مش هيكفيني فيها صاروخ زي بتوه بن لادن كدهون

    ردحذف
  5. تحففففففففففففة بجد يا دينا ... تسلم الايادى يا قمر .. وبجد مفجأة اووووى حكاية احمد دى وسلوى :))

    amira slama

    ردحذف
  6. صغيرة اوى يا دينا بس تحفه بجد تسلم ايدك

    ردحذف
  7. جميلة بصراحة تسلم ايدك بس ياريت تقولى فاضل كام حلقة وتنزلى الحلقات بدرى شوية لان دى دراسة محدش بيسهر كده

    ردحذف
  8. gamela awe ya dena mn naga7 l naga7

    betawfee2
    ^___^

    sara

    ردحذف
  9. يمكن الولية دى تفوق كتها قرف مقرفة وعقربة وجابتلى الضغط

    ردحذف
  10. جاااااااااااااامده اوى
    بس ايه المفاجاة ده صبرى متجوز ده شكلها هتولع على ام رامى الوليه الشرسة ده

    ردحذف
  11. انا قرأت الحلقات من الأول دلوقتي , والصدمة جاتلي بضحك مش عارفة ليه :D
    يلا يارب تفوق بقا !

    ردحذف
  12. صغيره اوووووووى الحلقه دى بس حلوه ابقى خليها كبيره شويه يادودو

    ردحذف
  13. تسلم ايدك الحلقة مشوقة بس صغيرة شوية

    ردحذف
  14. قصصك رائعةجدا وياريت تدخلى فيها الحجاب والصلاة والقرءان مع تحياتى ام عمر

    ردحذف
  15. الحلقه صغيره اوووويييي بجد بس حلوه اوي رامي صعب عليا :'(

    ردحذف
  16. هيييييييييييييييييه

    ردحذف
  17. هنا بس هتبدأ أم رامي تنكسر وخاصة لما تعرف إن صبري متجوز عليها هههههههههههههههههه أنا فرحان فيها جدا .. بس بردو لازم نعزرها لسبب واحد بس إنها جاهله جدا وواخده الدنيا بالعرض

    ردحذف
  18. هنا بس هتبدأ أم رامي تنكسر وخاصة لما تعرف إن صبري متجوز عليها هههههههههههههههههه أنا فرحان فيها جدا .. بس بردو لازم نعزرها لسبب واحد بس إنها جاهله جدا وواخده الدنيا بالعرض

    ردحذف
  19. والله الحج صبري ربنا بيحبه واترحم من العقربه مراته نفسي اشوفها بقي لما تعرف انه متجوز ههههههههههههههههه

    ردحذف
  20. حاسس و متوقع ان في امل ان بلال ونسمه يتعدل حالهم مع بعض
    بس اللي عملوه دا صعب يتنسي

    اللي مستنيه اكتر بقي ان سعاد و سمير يرجعوا لبعض هتبفي فله اوي
    والسيناريو يمشي حلو بقي وناديه تخلف من يحيي
    و نوال ترجع لرامي و رامي يبقي دكر حبه مع امه :D
    و كدا تبقي نهايه زي الفل لقصه زي الفل من كاتبه زي الفل

    وسلمولي علي الحاجه ام صبررررررررررررري :D

    ردحذف
  21. بجد من احلى ما قرأ
    بس فين حلقة انهاردة ؟؟؟

    ردحذف
  22. ايه ده يا دندون دى الحلقة كلها مفاجآت تسلم ايداكى بجد روووووووووووووعة والبقاء لله فى الحاج صبرى اياك مراته العقربة على رأى سلوى تتعدل

    ردحذف
  23. امتى الحلقة الجديدة يا دينا ؟؟
    الحلقات كلها والقصص كلها تجنن بجد ما شاء الله عليكى

    ردحذف
  24. فين حلقه النهااااااااااااارده

    ردحذف
  25. فين الحلقة عاوزين ننام

    ردحذف
  26. الحلقات بقت بتتأخر أوى كده لييييه؟!؟!؟!

    ردحذف
  27. ليييييييييييييه حق يتجوز مرة واتين وتلاته وخمسسسسسسسسسسه كمااااااااااااان يالهووووووووووووى هو فى ناس كدهو ايه ده

    ردحذف
  28. هههههههههههههههههه انا فرحانه جدااا فى ام رامى بجد مفاجاه

    ردحذف

قول رأيك بلاش تقرا وتقفل من سكات...ارائكم تهمنى