السبت، 27 أكتوبر، 2012

لسه بحب... الحلقة 15



الحلقة 15
محمد وانجى قاعدين
"ماما جت اهى"
شاورت لها انجى ...راحت مامتها ناحيتهم
قاموا وقفوا وقدمتهم انجى لبعض
"ماما...ا\ محمد مدير الحسابات... د. نجوى مامتى"
محمد"اهلا وسهلا يافندم تشرفنا"
نجوى"اهلا بيك يا محمد ...انجى كلمتنى عنك كتير"
قعدوا ال3 مع بعض
اتكلموا كتير... فى مواضيع عامة
طلبوا العشا واتعشوا مع بعض
محمد"ياااه انا من زمان مقعدتش اتكلم مع حد بالراحة دى"
نجوى"والله يا محمد انا قاعدة معاك كأنى اعرفك من زمان"
محمد"ربنا يخليكى"
انجى قاعدة بتسمع للحوار اللى اغلبه بين محمد ونجوى
بص محمد ف الساعة
"ياااه انا اتأخرنا اوى... نقوم؟؟"
نجوى"اه يدوب... كلنا عندنا شغل الصبح"
وشاورت نجوى للجرسون
"الشيك لو سمحت"
وبتطلع فلوس من شنطتها
"حضرتك بتعملى ايه؟"
"العزومة دى عليا النهاردة"
محمد"لا طبعا ميصحش... مش كفاية انكم خففتم عنى كتير النهاردة"
انجى افتكرت كلامه عن قريبه اللى مات
سابت نجوى شنطتها
"خلاص يوم الجمعة انت معزوم ع الغدا عندنا ان شاءالله"
انجى فرحت من عزومة مامتها
محمد اتفاجئ ومعرفش يقبل ولا يرفض ولا يقول ايه
نجوى"هنستناك ان شاءالله"
محمد "ان شاءالله"

منى سمعت علاء داخل م الباب
"تعالى يا علاء... الحقنى مش عارفة اعمل ايه"
"ايه اللى حصل"
"اميرة قالت لعمر انها مش عايزاه وقلعت دبلتها وهو نزل زعلان ولما نزل قلتلها بلاش كلام فارغ والبسى دبلتك...قعدت تعيط وتصرخ وتقولى كفاية تحكم فيا ولو هموت مش هتجوزه"
سكت علاء شوية
"اعمل ايه ياعلاء... احنا هنسكت؟"
مشى علاء ناحية اوضته  ومنى وراه
"ايه ياعلاء... هنعمل ايه"
"هنسكت"
"هنسكت؟؟"
"ايوه... هنبين لها اننا مش مهتمين بكلامها ونشوف هتعمل ايه"
"يعنى ايه"
"يمكن متضايقة شوية وهترجع لعقلها"
سكتت منى بتفكر ف كلامه
"انتى قلتلى لها حاجة على زيارة محمد"
"لأ طبعا"
"يمكن مامتك؟؟"
"هقوم اتصل بماما حالا واسألها"
                           *******************
اميرة ف اوضتها من ساعة ما خلصت كلام مع مامتها
وقررت انها مش هتتجوز عمر طول ماهى عايشة
"خلينى ف اوضتى لحد ما اموت او يرحمونى من جوازة من واحد وانا لسه بحب واحد تانى"
                      *********************
منى ف اوضتها
"انا كلمت ماما وبتقولى انها متكلمتش مع اميرة ف سيرته من زمان"
"طيب خلاص... استنى ومحدش يفتح معاها الموضوع ده لحد مانشوف هتعقل ولا لأ"
"طيب يا علاء... اما نشوف"

محمد بعدما رجع بيته... فكر ف اليوم الغريب اللى مر بيه
اول اليوم صدمته ف اميرة وف نسيانها ليه
واخر اليوم ربنا بعتله 2 حس انهم قريبين اوى منه انجى ونجوى
ازاى وهو معاهم كان حاسس ان فيه حد مهتم بيه وانه مش لوحده
تفكيره فيهم هما الاتنين كان محتل تفكيره وخفف من تفكيره ف اميرة اللى نسيته وهتتجوز وبدأت حياة جديدة
وفكر ...يوم الجمعة لسه عليه 3 ايام
هيجيب لهم ايه وهو رايح؟؟

طول الايام الباقية انجى ومحمد كانوا اقرب
يومين من ال3 ايام اتقابلوا بعد الشغل

يوم الجمعة الضهر...راح محمد على محل شيكولاته
واختار علبة شيكولاته شيك ومختلفة
وراح لمحل ورد... عمل بوكيه شيك
                     ******************
لما وصل بيت انجى
كانت انجى ونجوى ف استقباله
محمد قعد معاهم ومفكرش ف اى حاجة غير ان الوقت بيجرى معاهم بسرعة
الاهتمام اللى شافه منهم كان غير متوقع
لما قامت نجوى ترد على التليفون
"انجى... هو باباكى ليه مرجعش معاكم"
"هو وماما انفصلوا من 4 سنين ولما ماما شغلها بقى هنا عرض عليا اقعد معاه بس انا وماما قريبين اوى من بعض ومتعودناش اننا نبعد فطبعا رجعت معاها"
"بصراحة انتى فعلا مامتك اللى يعرفها ميقدرش يبعد عنها ربنا يخليهالك"
"ربنا يخليك... اعملك نسكافيه؟"
"لا مفيش داعى ..شكرا"
"انا هعمل لنفسى...واعملك معايا..اوك"
"ماشى"
جت نجوى وقامت انجى
"ماما اعملك نسكافيه معانا"
"قولى لام جابر تعمله"
"لأ... انا هعمله لمحمد بنفسى"
راحت انجى تعمل النسكافيه
"قولى بقى يا محمد بدأت ف الماجيستير"
"لسه ... بس هبدأ قريب ان شاءالله"
"ربنا معاك... انا ليه حاسة ان ملكش اصحاب"
"ليا معارف بس انما بعد وفاة مامتى حسيت انى لوحدى وفعلا كل اللى بحبهم بعدوا عنى ف نفس الوقت فبعدت وركزت ف شغلى والدراسات اللى بعملها"
"وليه متجوزتش ولا خطبت... اصل الوحدة صعبة وخصوصا على شاب زيك بتاكل وتشرب وتعيش ازاى"
"والله يادكتور فعلا صعبة جدا ... بس هعمل ايه بقى مضطر"
"ان شاءالله ربنا يرزقك ببنت الحلال"
دخلت انجى بصينية النسكافيه ومن غير ما تسمع
"انا جيييييييييييييييت"
بص لها محمد وهو بيربط بين دعوة نجوى "بنت الحلال"
وكلمة انجى" انا جيت"

منى اتصلت بعلاء بالتليفون
"ياعلاء ... سيب شغلك وتعالى حالا... عمر ومامته جايين كمان ساعة وانا مش عارفة اقولهم ايه...متسيبنيش لوحدى... يالا متتاخرش"
                       ****************
عمر ومامته ومنى وعلاء قاعدين بيتكلموا مع بعض
عمر"انا مش فاهم هى قلبت مرة واحدة كده ليه...كنا كويسين مع بعض وفجأة قالت نسيب بعض"
منى" تلاقى بس شيطان دخل بينكم "
فيفى"لا يا منى اميرة بتتدلع... مش علشان عمر كويس معاها تعمل معاه كده... كان لازم يبقى وحش وقليل الادب علشان تعمله حساب"
منى بصت لعلاء وهى مش عاجبها الكلام
علاء"لا يا مدام معلش... ماهو لو وحش ولا قليل الادب مكناش دخلناه بيتنا اصلا"
عمر"انا بتصل بيها مبتردش عليا وانا مش عارف اخرتها ايه"
منى"معلش ياعمر... سيبها يومين كده وهتبقى كويسة"
فيفى"بصى يامنى احنا زى مادخلنا بالمعروف نخرج بالمعروف...بنتكم مش عايزة ابنى وهى الخسرانة... انا جاية اخد الشبكة والهدايا اللى عمر جابها"
منى"ليه كده يافيفى ...بتقطعى مرة واحدة"
فيفى"لو عمر مش عاجبها فيه الف واحدة تتمناه... وكل شئ نصيب"
علاء"قومى يا منى هاتى الشبكة وكل حاجة عمر جابها"
قامت منى وهى متضايقة ومضطرة
                        *********************
دخلت منى الاوضة...كانت اميرة نايمة على سريرها صاحية
"عمر ومامته جايين ياخدوا حاجتهم"
"الحمدلله"
"نفسى اعرف ايه اللى قلبك كده"
"ماانتوا عارفين من الاول انى مش بحبه... ومكنتش هحبه"
"يا بنتى انتى عايشة ف وهم... الحب ده مش كل حاجة"
"يمكن عندكم مش كل حاجة بس انا غيركم.. انا مش هتجوز غير اللى بحبه يا اما مش عايزة اتجوز خالص"
"وهو مين اللى بتحبيه ان شاءالله"
"اللى دخل البيت وانتوا طردتوه"
"انتى عايزة تجننينى...وهو فين دلوقتى"
"يمكن معرفش مكانه بس اللى متاكدة منه انه جوه قلبى ومخرجش منه ومش هيخرج"
"انتى ايه البجاحة اللى بقيتى فيها دى"
"كان نفسى تاخدينى ف حضنك وتقوليلى انا حاسة بيكى"
دموعها نزلت وهى بتتكلم... اخدت منى الحاجة من الدولاب وخرجت من الاوضة من غير ما تتكلم


نجوى مع انجى ف اوضتها
"ليكى حق يا انجى تحبيه... محمد يتحب فعلا"
"مش قلتلك ياماما"
"بس شكله كتوم اوى"
"فظيع ياماما... شوفى بقالنا مع بعض ف الشغل قد ايه ومش بيحكى حاجة عن نفسه الا بالعافية"
"انا حاولت اجرجره كده بس برضه صعب... قمت رميت له كلمة يمكن يفكر"
"احكى قلتى له ايه"
"قلت له ان الوحدة صعبة وكلام معناه ان الجواز احسن له"
"وقالك ايه"
"هو بيقول حاجة خالص"
"بس تفتكرى يعنى ممكن يكون بيفكر فيا"
"ماهو لو مش بيفكر فيكى كان هييجى ليه وكان هيخرج معاكى اليومين اللى فاتوا ليه"
"يارب يا ماما"

فى اوضة منى ... بالليل
بتتقلب وهى نايمة
قام علاء من النوم
"ف ايه؟؟؟ عمالة تتقلبى كده ليه"
"مش عارفة انام"
"ليه"
"قلبى بيتقطع على اميرة... النهاردة قالت لى كان نفسى تاخدينى ف حضنك... قلبى وجعنى اوى"
"واحنا عملنا لها ايه"
"احنا قسينا عليها اوى... اميرة لسه فاكرة محمد ومش عارفة تنساه"
"وهو كان يعنى هيقدر يعيشها ف نفس المستوى"
"ما احنا مكناش هنسيب بنتنا تحتاج"
"ماهو اللى مشى يومها ... لو كان عايزها كان حاول تانى وتالت"
"متنساش مقابلتنا ليه وكلامنا كان ازاى"
"يعنى نعمل ايه دلوقتى يامنى"
"انا هروح لبنتى... اخدها ف حضنى واسمعها واحس بيها... هستسمحها واقولها اننا غلطنا ف حقها"
"هنروح نتحايل على الواد ده ولا ايه"
"لأ ...احنا منعرفش طريقُه بس انا حاسة اننا السبب ف اللى هى فيه... دى بقالها 3 ايام مبتخرجش من اوضتها غير للحمام وبس... الاكل مبتحطوش ف بؤها واختها اتحايلت عليها ومفيش فايدة"
"ماشى يامنى ... روحى لها واللى هى عايزاه تعمله"
قامت منى خرجت من الاوضة
وبمجرد ما وصلت لاوضة اميرة... سمع صوت منى بتصرخ
"علاااااااااااااااء.... الحقنى يا علاااااااااااااء... اميييييييييييييييييييييييييييييييييييييييييييييرة"
­­

هناك 22 تعليقًا:

  1. to7fa awiiiiiiiii ya nhaaaaar :))

    ردحذف
  2. ana metab3aky men zaman awiii w all ur stories to7fa bs makontsh ba3rf ezay aktop Comment
    3ola :))

    ردحذف
  3. ايه التشويق ده بقى ؟!!! :)
    بس بجد حلوة اوى يا فنانتنا :]

    ردحذف
  4. أمتي الحلقه اللي جايه باه

    ردحذف
  5. ممممممممممم حاسة ان أميرة هربت
    بــــس شكراااا يا دينا انك كتبتي ف العيد :) ^_^

    ردحذف
  6. بجد راااااااااااائعه وبجد افتقدناكي يوم الخميس ويارب دايما في نجاج

    ردحذف
  7. حلقه جميييييييييله :)

    ردحذف
  8. حساها انتحرت ربنا يستر

    ردحذف
  9. ديناااااااااااااا الحلقة تحفة بس يارب محمد مايخطبش انجي ويرجع لاميرة بقااااااااااااا <3

    ردحذف
  10. يارب يرجعوا لبعض بقى تسلم ايدك يا دينا

    ردحذف
  11. الحلقة حلوة اووى يادندونة بس ياريت نهايتها تبقى حلوة ومحمد يرجع لاميرة

    ردحذف
  12. very nice ya dina

    i hope the end be amazing

    plz

    ردحذف
  13. يا نهااااااار هى انتحرت ولا ايه ؟؟؟؟؟؟
    " بص لها محمد وهو بيربط بين دعوة نجوى " بنت الحلال"
    وكلمة انجي "انا جيت" "
    بس بجد يا دينا انتى زاااااااائعة عجبنى اوى التعبير ده وربنا يستر واميرة تلحق محمد قبل ما يتم اى حاجة بس المشكلة انها اكيد لو لحقته حتى هتخاف على زعل صاحبة عمرها وشكله كده هيبقى الوضع كما هو عليه
    ميرسى على الحلقة طول عمرك بتيجى فى وقتك


    ddy dody

    ردحذف
  14. انا دلوقتى 3 صعبانين عليا اميرة وانجى ومحمد

    ردحذف
  15. بجد حلوة اوى الحلقة دية وياترى اميرة اية اللى حصلها انا متشوقة جدا انى اعرف ياريت مش تتاخرى علينا بقى ياجميلة




    yasmeen

    ردحذف
  16. bgd a7la mn ra23a
    w eslobek 7elw 2wyyyyyy :)

    ردحذف
  17. حلوه موووووووووووت
    ياريت يرجعوا لبعض

    ردحذف
  18. حلوة اوى بس ياريت محمد يحب انجى

    ردحذف
  19. اوبااااااا ربنا يستر بجد يا دينااا علينا :)
    تسلم ايدك يا قمر

    amira slama

    ردحذف
  20. تحفة بجد كملى بقة بسرعة

    ردحذف
  21. حلوووووووووة وبكيت اوى لانى بحب واحد اسمو محمد جداا من صغري وخلاص برضو اتفرقنا عن بعض اهئ اهئ حرررام فكرتيني بالذكريااتلا ربنا يخليكي كملى بحس انى بقرء حكاايتى

    ردحذف
  22. اوووووووووووبس انا حساها انتحرت مش هربت بس بلييييييز رجاء عام بلاش نهايتها تكون وحشة

    ردحذف

قول رأيك بلاش تقرا وتقفل من سكات...ارائكم تهمنى