الأربعاء، 31 أكتوبر، 2012

لسه بحب... الحلقة 18

الحلقة 18
"محممممممد"
انتبه محمد لانجى وهو واقف سرحان يبص على اميرة
راح على مكتبه وراحت انجى وراه
"شفت ياعينى مش على بعضها ازاى"
"اه شفت...ليه؟؟"
"رايحة تسأل عن حبيبها"
"هى ايه الحكاية بالظبط"
سألها محمد علشان يعرف هى عارفة ايه...وعلشان يكمل اجابات لاسئلة كتيرة عنده
"بص يا سيدى... اميرة من زمان كانت بتحب واحد جار جدتها وكانت بتتكلم عنه كتير اوى واحنا ف الكويت ولما نزلت الجامعة هنا.."
"ثوانى...هو انتى كنتى ف الكويت؟؟"
"ايوه ...قبل امريكا"
"مقلتليش يعنى"
"بجد مقلتلكش؟؟ عادى يعنى اكيد مجتش مناسبة"
"كملى الحكاية وبعدين"
"لما جت الجامعة هنا عرفت انه بيحبها وفضلوا يحبوا بعض لحد ما اتقدم لها وباباها ومامتها رفضوا وغصبوا عليها تسافر معاهم تانى.. من بعدها اخباره اتقطعت خالص حاولت تكلمه موصلتلوش وكل ما تسأل جدتها عنه تقولها متعرفش حاجة عنه لدرجة انى روحت سألتلها عليه اول ما جيت"
"روحتى تسألى على مين؟؟؟"
"على محمد اللى بتحبه...اسمه محمد برضه... روحت وعرفت انه مشى من هناك من بعد ما سافرت ...قعدت كام سنة على امل اى حاجة تحصل ولما يأست وافقت على عريس كان متقدم لها ... كانت هتتجوز وتسافر غصب عنها لحد ما..."
دخلت واحدة من الحسابات
"استاذ محمد ... اعمل ايه ف الكشف ده"
انجى"طيب انا هقوم اكمل شغلى"
محمد باهتمام"استنى يا انجى... سيبيلى الكشف يا ايمان وشوية وهبعتلك"
سابت ايمان الكشف... خرجت
"كملى يا انجى...لحد ما ايه؟؟"
"ايه يامحمد اول مرة تهتم بحكاية كده"
واتظاهر محمد بعدم الاهتمام
"اصل الحكاية غريبة شوية وعندى فضول اعرفها...كملى"
"المهم بقى ف سوم سمعت مامتها وجدتها بيتكلموا وعرفت ان محمد راح سأل عليها وانه فاكرها ومتجوزش... من لحظتها قررت انها مش هتتجوز وفعلا صممت انها تسيب عمر وتعبت لحد ودخلت المستشفى بعدها مامتها وباباها استسلموا وقالولها انهم موافقين"
"بعد ايييييييه"
"بعد ايه ليه...هى رايحة تسأل عليه ف شغله وان شاءالله هتلاقيه ونفرح كلنا انا وانت وهما"
مسك محمد الاوراق اللى قدامه... بعد ما عرف كل حاجة
"هى دى جيجى اللى كانت بتتكلم عنها... ازاى انا مربطتش انها راجعة من امريكا وبين ان اميرة كانت بتحكى عنها
"هييييييه...روحت فين"
"سرحت بس ف الكشف اللى جابته ايمان"
"طيب هروح اكمل شغلى"
"ماشى"
خرجت انجى من المكتب... ساب محمد الكشف اللى ف ايده
مسك ورق اميرة... فضل يبص لصورتها اللى على الشهادة
"وحشتينى اوى اوى يا حبيبتى... معقول تكونى جاية تدورى عليا ... مش هينفع اضيعك من ايدى تانى...مش ممكن ابداااا"

اميرة طالعة تجرى على سلم الفيلا...لمحتها منى...طلعت وراها
"مالك يا اميرة"
دخلت اوضتها وحست انها اخيرا وصلت للمكان اللى تقدر تخرج فيه كل اللى جواها... منى وراها
"مالك يا اميرة فى ايه"
"شفت محمد"
وباستغراب
"وبعدين...ايه اللى حصل يخليكى عاملة كده"
"شفته مع جيجى... محمد خطب جيجى"
انهارت اميرة ...منى ساكتة مش مستوعبة الصدفة
"تخيلى يا ماما لما اشوف الاتنين وابقى خايفة اى حاجة تبان عليا... محمد مدير الحسابات ف الشركة اللى جيجى بتقدم لى فيها... ويبقى خطيب اقرب صاحبة ليا.. انا كنت خايفة مقدرش امسك نفسى من الصدمة ... كنت مرعوبة جيجى تفهم ولا تحس بحاجة... انا حاسة انى بموت يا ماما"
حضنتها منى وهى قلبها موجوع عليها
اميرة بتعيط ف حضن مامتها
"ومحمد عمل ايه"
"معملش حاجة... اتفاجئ زى ما انا اتفاجئت"
"اميرة... هيبقى صعب اوى لو روحتى اشتغلتى معاهم"
"مش هقدر طبعا... انا ما صدقت انى مشيت من هناك مع انى مكملتش 10 دقايق بس حسيت انهم كتير... مش هقدر استحمل يبقوا هما الاتنين قدامى"
"ايوه يا اميرة... خليكى بعيد احسن ومع الوقت هتنسى"
"ياريت اقدر انسى يا ماما"
رن موبايل اميرة
"مين"
"دى جيجى"
ردت اميرة وهى بتحاول صوتها يبقى عادى
"ايوه يا جيجى... انا ف البيت... لا ملقيتوش... سألت ف المدرسة قالوا سافر السنة اللى فاتت ومحدش يعرف عنه حاجة...لا خلاص هدور فين... جيجى متقدميش الورق بتاعى... لا مش عايزة اشتغل هقعد ف البيت احسن ... انا كويسة... غصب عنى يا جيجى لازم اكون متضايقة... كنت على امل الاقيه وخلاص ملقيتوش... مش هعمل حاجة... طيب هستناكى...مع السلامة"
سألتها منى بعد ما خلصت
"صدقتك؟؟"
"اه... تخيلى ياماما انها حاسة بيا اوى وبتقولى انها هتجيلى تقعد معايا... بتحاول تخفف عنى...متعرفش ان جرحى صعب اوى... ربنا يقدرنى انى اداريه"

انجى داخلة مكتب محمد
"محمد ايه ده"
"ايه ؟؟"
"الشغل اللى انت خلصته ده فيه لخبطة كتير اوى"
"لخبطة ازاى ...ورينى"
"اهو... ده انت كأنك مركزتش خالص"
"طب سيبيه يا اميرة "
"اميرة؟؟"
واتخض محمد لما اتلخبط ف الاسم واتظاهر باللا مبالاة
"اصل انا كنت مع ممدوح بيه وكنا بنتكلم على اميرة وقالى انها ممكن تيجى تستلم من يوم السبت"
"طيب متتلخبطش ف اسمى تانى لو سمحت"
"حاضر... انا اسف يا انجى"
"انا كلمت اميرة وقالت انها مش عايزة تيجى تشتغل"
وانفعل محمد
"لييييييه"
"هى اتصدمت لما ملقيتش حبيبها وشكلها عايزة تفضل ف البيت شوية"
"بالعكس المفروض تيجى وتشتغل ومتسيبش نفسها للزعل... وبعدين انا اتكلمت مع الراجل خلاص مينفعش تحرجنى"
"حاضر يامحمد هقولها بس انت منفعل ليه"
"مش عايز اتحرج ... يعنى اللى جاية من ناحيتنا تقصَر رقبتنا"
"ولو انى شايفاها عادى بس ماشى هقنعها تيجى الشغل... انا اتفقت معاها انى رايحة لها بعد الشغل"
"طيب"
"وعلى فكرة بابا جاى بعد بكرة وقاعد شوية علشان نجهز للخطوبة"
"بسرعة كده؟؟"
واستغربت انجى
"بسرعة ايه؟؟"
"انه عرف ييجى مصر يعنى"
"اه... وبيقول انه أجَر فيلا... كويس علشان نبقى نعمل فيها الخطوبة"
محمد تجاهل كلامها... مسك الاوراق وانشغل بيها
"هسيبك تكمل شغلك... اوعى تتضايق انى ممكن انشغل شوية مع ايمى...اصلها وحشانى اوى "
"لا براحتك"

انجى عند اميرة... الاتنين ف الاوضة
اميرة متماسكة قدام انجى وبتحاول تقنعها انها اتقبلت الامر الواقع
"تصدقى محمد النهاردة كان من كلامه حاسس انك مش هتلاقى محمد"
"هو عرف ايه بالظبط"
"انا حكيتله كل حاجة... استغرب حكايتك اوى"
"ليه يا جيجى"
"ليه ايه"
"ليه حكيتيله"
"انتى اتضايقتى؟؟ انا كنت بتكلم عنك عادى وهو كان مهتم اوى يسمع الحكاية"
"وبعدين"
"مفيش... بس بيقولك لازم تيجى تستلمى الشغل يوم السبت ومينفعش تستلمى للزعل وتقعدى ف البيت"
وحست اميرة ان محمد بيحاول يساعدها تكفيرا للى حصل منه غصب عنه وهو انه خطب صاحبتها... اتضايقت من احساسها انه بيشفق عليها وهو مكمل حياته عادى
لقيت نفسها بترد بسرعة على انجى
"قوليله مفيش حاجة تخلينى ازعل... وهستلم الشغل ف المعاد"
رن موبايل انجى...ردت بسرعة
"الو... ازيك يا حبيبى... انا عند ايمى... متقلقش معايا العربية... طيب هستناك...مع السلامة"
اميرة بتتظاهر انها بتتسرح قدام المراية... والغيرة بتقطع قلبها
"ايمى قومى البسى"
"البس ليه؟؟"
"محمد عازمنا ع العشا"
"لالا مش قادرة انزل...روحى انتى"
"انتى ليه عايزة تحبسى نفسك هنا... قومى انزلى معانا وغيرى جو"
"معلش يا جيجى سيبينى براحتى"
قامت انجى وفتحت الدولاب... طلعت هدوم لاميرة
"يالا ...البسى علشان هتنزلى معانا"

محمد قاعد ف مطعم مستنى اميرة
كل شوية يبص ف الساعة... هو عزمهم مخصوص علشان يشوف اميرة... مقدرش يستنى لحد ما تيجى تستلم الشغل
شافهم داخلين... حس ان قلبه هيسبقه ويحضن اميرة
شاف انجى بتشاور له... رجع تانى يفتكر الوضع الصعب اللى هو فيه
انجى هى خطيبته... واميرة حبيبته

اميرة لما شافته مقدرتش تمنع قلبها انه يدق ولا قدرت تنكر انها فرحانة انها هتشوفه... حاولت تسيطر على اعصابها علشان انجى متحسش بحاجة
انجى سلمت على محمد
ومد ايده يسلم على اميرة...مدت ايدها تسلم عليه
لمحت الساعة اللى جابتهاله اول مرة جت فيها مصر
عملت انها مخدتش بالها
"ياترى هو قاصد ولا دى صدفة"
قعدوا مع بعض... اميرة بتحاول تجنب انها تبص له
انجى اكتر واحدة بتتكلم ف القعدة
محمد مش بيوجه لها كلام غير بسيط والاغلب انه بيرد
اميرة ساكتة ومش بتتكلم غير بترد على انجى
طلبوا العشا واول ما خلصوا
اميرة"انا هقوم يا جيجى علشان متأخرش"
محمد"هتقومى لوحدك ازاى.. انتى اكيد جاية مع انجى ومينفعش تاخدى تاكسى"
انجى"ايوه طبعا متروحش لوحدها... انا هوصلك"
محمد"تحبوا اوصلكم انا ...سيبى عربيتك يا انجى واوصلكم"
اميرة"متتعبوش نفسكم يا جماعة انا هاخد تاكسى عادى وروحوا انتوا"
محمد"لا طبعا ميصحش"
انجى"روح انتى ياحبيبى وانا هوصلها واروح ع البيت"
وافقها محمد...دفع الحساب ووصلهم لحد العربية
ركبت اميرة جنب انجى... ومحمد بيبص على اميرة والعربية ماشية
لما مشيوا...ساب عربيته مركونة ... وقف تاكسى
"ورا العربية دى لو سمحت"
مشى محمد بالتاكسى ورا عربية انجى
لما وقفت عربية انجى قدام الفيلا
نزلت اميرة... ومشيت انجى بعد ما شاورت لها
لما اتأكد محمد ان انجى مشيت ...نزل من التاكسى
كانت اميرة لسه بتدخل من باب الفيلا
"اميييييييييرة"
التفتت اميرة... شافت محمد جاى ناحيتها
"استنى عايز اتكلم معاكى"
بلا ارادة خرجت اميرة تانى من الفيلا... ومشيت مع سور الفيلا بعيد عن الباب بعد ما اتأكدت ان انجى مشيت
الشارع هادى... منطقة كلها فيلات... وقفوا بعيد عن باب الفيلا
"انا افتكرتك اتجوزتى... انا محبيتش انجى"
"انا متجوزتش لانى مقدرتش انساك... وسواء حبيت انجى او لأ النتيجة واحدة"
"لا مش واحدة... انا بحبك انتى"
"مينفعش يا محمد... احنا مش هنعاند النصيب"
"انا عرفت كل حاجة من انجى... انتى راجعة مخصوص علشانى...صح؟؟"
"بس ملقيتكش... لقيتك خطبت اعز صاحبة ليا"
"متلومينيش يا اميرة"
وبدأت تختنق بدموعها
"والله ما بلومك على خطوبتك لانجى... انا بلوم الظروف اللى فرقتنا من سنين ...بلوم نفسى انى استسلمت... بلومك انك سيبتنى وقتها واحتارت كرامتك وبعدت عنى... احنا الظروف كانت ومازالت اقوى مننا"
"انا بحبك انتى يا اميرة... والله ما حبيت غيرك"
اميرة وهى بتعيط
"عارفة ... بس انجى متستاهلش مننا كده... مينفعش يامحمد اصدمها الصدمة دى"
"خليكى انتى بعيد وانا هقولها"
"اوعى تقولها حاجة... مش انا اللى اخطف خطيب صاحبتى"
"انتى حبيبتى من الاول"
"بس انت خطيبها هى"
"انا هقولها"
"لو قولت لها حاجة مش هخسرها يا محمد وهتبقى خسرتنا احنا الاتنين"
"يعنى هنفضل نتعذب كده؟"
"لا... انا هنسحب من حياتكم بس بالتدريج ... اعتبرنا متقابلناش"
كانت بتعيط وهى بتقوله الكلام اللى وصلتله بعقلها
التفتت علشان تمشى وترجع الفيلا
مسكها محمد من دراعها...لفها ناحيته
"انا بحبك يا اميرة"
ضمها ليه...حضنها وهى بتعيط
حست بحبها الكبير وهى بتحضنه...شوق السنين اتجمع ف اللحظة دى
"انا كمان بحبك اوى"
دخلت عربية الشارع ...ومع نور العربية
فاقت اميرة من استسلامها ليه
بعدت عنه بسرعة
"زى ما اتفقنا يا محمد... لو قلت حاجة لانجى هتخسرنا احنا الاتنين"
جريت وسابته ودخلت الفيلا وهى مقتنعة تماما باللى اختارته


هناك 40 تعليقًا:

  1. و الله العظيم حرااااااااااااام بجد مينفعش ابدا كده يا استاذة دينا بعد التشويق ده لازم حلقتين تلاته ورا بعض :)

    ردحذف
  2. روعة جدا الله يكون فى عونهم كلهم

    ردحذف
  3. Waw !!! 7elwa awiii <3

    ردحذف
  4. يالهوى يا دينا جااااااااااااااااااامدة

    ردحذف
  5. لا بقه انا جسمى كله اشعر من الزعل والحب ده انا تعبت بقه مش كل يوم اعيط بس جامدة جامدة

    ردحذف
  6. جاااااااااااااااااااااااااامده جدا وشوقتينا اكتر يا دندونة

    ردحذف
  7. To7faaaaaaaaaa !!! Amira sa7 gdan !! Enjie f3lan mtsthlsh 7aga we7sha wi mtsthlsh mn m7md kda abadann !! Bs brdu s3ban 3alaya amira wi m7md gdan !! Rbna ykun fi 3onhom kolohom

    ردحذف
  8. تحفه تحفه تحفه تسلم ايدك يادندون

    ردحذف
  9. الله\\ احلى حلقه شفتها فى حياتى ايه الجمال ده انا بحب محمد ده اوىىىىىىىىىىىى ايه العسل ده واميره دى سكره والحلقة تحفه- الله الله يادودو ايه الحلاوة دى ولا \اكنى بعلق على ماتش\ هههههههههههه

    ردحذف
  10. بجد حلقة رووووووووووووووووووووووووووووووعة تسلم ايديكى

    ردحذف
  11. جامده اقوى الحلقه دى ... انتى ممتازه يا دينا ... هند

    ردحذف
  12. 7lwa awiiiiiiiiiiiiii ya dondon bs shakl engy rag3t ;)

    ردحذف
  13. بجد روعه تسلم ايدك

    ردحذف
  14. قلبي وجعني عليهم اوي و الله :(

    ردحذف
  15. مستنيه اعرف نهاية القصة دي هيبقا ايه ؟؟؟!

    ردحذف
  16. حرررررررررررررررررررررررررررررررررام انا قريتها وانا بعيط حرام الحب ده يضيع

    ردحذف
  17. قلبببببببببببببببببببببببببببببببببي وجعني يالهووووووووووووووووووي


    وانا كمان بحبه اوووووووووووووووي حبيبي اللي افترقنا عن بعض بسبب الظروووووووووووووف

    ردحذف
  18. يا خراشىىىىىىىىىى بجد مش لاقيه كلام اوصف بيه لحظات الرومانسية والعذاب دى بس ساعات التضحية بتكون صعبة اوى لكن الاختيار بيكون اصعب
    اية

    ردحذف
  19. minf3sh yb2o bi7mooo 3shn ana s3bana 3lya amira we s3bana 3lya engie we s3ban 3lya m7med we s3ban 3lya nfsyy :P l2 bgddd kteeer kdaa momkn 23rf ht5ls emtaaa mthi2lyyy nzlelna kam 7l2aa we nhya mara w7daa 3shn 5alas bgddd hmoooooooooooooooot we 23rff b2aaaaa(esraa hamam)

    ردحذف
  20. لا طبعا هى كده مش بضحى لصحبتها هى كده بتخدع صحبتها وبضيع منها حبها تانى
    انا مش موافقة اميرة خالص وصعبان عليا انجى اووووووووووووووى

    ردحذف
  21. حراااااااااااااااااااااااااااااام بجد كدة كتيييييييييييييييييير اوى اوى والله
    انا تعبت بجد ومش قادرة امسك نفسى من العياط بجد
    اصعب حاجة ف الدنيا ربنا ما يوريها لاحد يارب
    تسلم ايدك يا رب يا دودو وتعيطينا ديماا :)))

    amira slama

    ردحذف
  22. gamdaaaaaaaaaaaaaaaaaaaaaaaaaaaaaaa bgad bs 7aram kda elmfroud amura tb2a ma3 m7amed l2enhom by7bo b3d mn elawel bgad 7aram

    ردحذف
  23. الله عليكى يا دينا الحلقة راااااائعة تجنن
    اميرة كان متوقع رد فعلها ده لأنها مش هتخسر صاحبتها الدور بقى على محمد لما نشوف هيبقى ايه تصرفه
    شكله كده مش هيقدر يبعد تانى عنها بعد ما قابلها
    وحاسة ان جيجي هى اللى هترجعهم تانى لبعض لما محمد يقولها شوقتينى اكترررررررر
    وميرسى اوووووووى متوصية بينا النهارده الحلقة طويلة تسلمى يا قمر


    ddy dody

    ردحذف
  24. يالهوووووى انا قلبى وجعنى بجد حرررررام بقى

    ردحذف
  25. قووووووووووووووية قوي لحلقة ديه بجد والله انا تعبت ومش قادرة اتوقع حاجة زي ديه ف الواقع حرام بجدددددددد

    دودو

    ردحذف
  26. gamela awiii ... bsana msh 3ayza abky kol youm

    ردحذف
  27. بجد حلقة رومانسية وكلها مشاعر واحساس ومنتظرة منك نهاية عقلانية زى عادتك فى كل القصص
    سمورة

    ردحذف
  28. ااااااااااااااااااه يا قلبي

    ردحذف
  29. انا حاسه ان انجى عاقله وهتتقبل الموضوع خصوصا انها عارفه ان محمد بيموت فى اميره

    ردحذف
  30. واأااوووووووووووووووو حلقه روووووووووووووووووووعه جدا

    ردحذف
  31. بجججججججججد تحفة ياجمل ديناا القصة تجنن الله يخليكى متتاخريش فيالحلقة اللى بعد
    يها

    ردحذف
  32. جااااااااااااامدة يا دينا وترى بقى هتكتبى قصة ايه المرة دى

    ردحذف
  33. مشششش هو فية نهاية

    ردحذف
  34. ah ya 2lby :'((((((((((((

    ردحذف
  35. رواية تافهة جدا

    ردحذف
  36. يارب هو النصيب كدة بس لازم يرجعوا لبعض
    لازم انجى تعرف الحقيقة

    ردحذف
  37. لا كده ظلم كبير لازم يرجعو لبعض مش بعد كل العذاب ده وبعد كل السنين دى يفضلو بردو فى صراع

    ردحذف
  38. رجعتينى لأيام الحب الأول . يا خسارة هو اللى ما عرفش يتمسك بالحب و استسلم لرفض أهله لى . افتكرت سنوات الألم بعدها و الامل فى انه يرجع .

    ردحذف
  39. رجعتينى لأيام الحب الأول . يا خسارة هو اللى ما عرفش يتمسك بالحب و استسلم لرفض أهله لى . افتكرت سنوات الألم بعدها و الامل فى انه يرجع .

    ردحذف

قول رأيك بلاش تقرا وتقفل من سكات...ارائكم تهمنى