الاثنين، 1 أكتوبر، 2012

ابغض الحلال... الحلقة 29

الحلقة 29
نوال بتفتح الباب
"نسمة.. تعالى يا حبيبتى ادخلى"
دخلت نسمة على اوضتهم على طول
دخلت وراها نوال... وسمع صوتهم سمير وقام دخل لهم
سمير"فى ايه؟؟"
نوال"انتى ايه اللى نزلك دلوقتى؟؟حصل حاجة"
نسمة"بلال طلقنى"
نوال صرخت
"ايييييييييييييييييه"
سمير بيزعق"يعنى ايه طلقك.... ازاى طلقك كده وليه وفين عمتك"
نسمة"عمتى نايمة وخلاص انا طلبت الطلاق وهو طلقنى وخلاص"
سمير"ايه خلاص... شفتى يانوال... هو ده اللى كنت بقوله عيال ومعندهمش تحمل للمسئولية"
نوال"مش معقول كده يا نسمة انتو مكملتوش شهر...ايه السبب اللى يخليكوا تتطلقوا"
نسمة"اتسرعنا فعلا واحنا مننفعش لبعض... وكفاية متضغطوش عليا الله يخليكم سيبونى كفاية اللى انا فيه"
رن جرس الباب
سمير"اهو تلاقيه نزل يصالحك... مش عايز نشوفية دماغ وتقومى مع جوزك"
نسمة مستغربة ان بلال ينزل يصالحها
"معدش ينفع يا بابا خلاص اتطلقنا"
سمير"وهما اللى اتطلقوا مبيرجعوش لبعض يعنى"
راح سمير بيفتح الباب وهو ماشى للباب بيقول
"بس والله ما انا ساكت له على موقف زى ده... اتهبل ده ولا ايه"
بيفتح الباب... شاف نادية قدامه... ومعاها شنطتها
"فيه ايه انتى كمان"
دخلت اترمت ف حضنه وبتعيط
"فيه ايه يانادية... انتوا ايه اللى حصلكم كلكم"
جت نوال من الاوضة... واول ما شافتها
"نادية!!!!!!!!"
مسحت نادية دموعها... يحيي هيطلقنى يا بابا ...مبقاش عايزنى خلاص"
سمير"لأ مش ممكن... انا مش مصدق اللى بسمعه واللى بيحصل النهاردة..انا هيجرالى حاجة"
نوال"بعد الشر يابابا... دلوقتى نفهم اللى حصل...ايه اللى حصل يانادية...تعالى طيب غيرى هدومك الاول وبعدين احكيلنا"
جت نسمة على صوتهم
"نادية!!!!!!!"
"نسمة!!!!!!"
ضرب سمير كف على كف ودخل اوضته
"غيروا هدومكم وناموا والصباح رباح"

تانى يوم الصبح...ف بيت سمير
مديحة قاعدة وسمير وال3 بنات
مديحة"طيب يا نسمة قوليلى انا فيه ايه...بلال مش عايز يقول حاجة وبيقول كل شئ نصيب"
نسمة"صح يا عمتو كل شئ نصيب... احنا مش عايزين بعض"
سمير"ده اسمه كلام.... مش قلتلك يا مديحة عيال ومعندهمش تحمل مسئولية"
مديحة"انا تعبت بهاتى بقالى ساعة هنا وفوق ساعتين لما خلاص مش عارفة اوصل لحاجة"
نسمة"متتعبيش نفسك ياعمتو... احنا خلاص كده"
مديحة"يابنتى ازاى بس... ونادية كمان حكايتها ايه"
نادية"يحيي عايزنى اخلف يااما يطلقنى"
مديحة"ازاى يطلقك كده مش لما تشوفوا السبب ايه مش يمكن هو السبب"
خبط الباب... قامت نسمة تفتح
"اهلا ياماما...تعالى اتفضلى"
ولمحت سعاد سمير قاعد جوه وبصوت واطى
"مقلتليش ليهان باباكى قاعد انا كنت فاكراه ف الشغل"
نسمة بعد ما افتكرت
"انا اسفة يا ماما انا اتفاجئت بيه منزلش وكان المفروض اقولك انه هنا"

سمير لمح تردد سعاد فى الدخول...مال على نوال
"خليها تدخل متسيبوهاش ع الباب كده"

قامت نوال
"تعالى ياماما اتفضلى"
دخلت سعاد وسلمت على مديحة والبنات وقعدت
سعاد"ايه يانادية اللى حصل... انتوا حصلكم ايه كلكم ياستار يارب"
مديحة"شفتى يحيي اللى كنا بنقول عليه كويس عايز يطلقها علشان الخلفة من غير ما يكشف"
نوال"ياعمتو يحيي مش غلطان... نادية اللى كانت بتاخد حبوب منع الحمل من وراه"
سعاد ومديحة بيبصوا لنادية والاتنين ف وقت واحد
"ليه"
وعيطت نادية
"علشان مش عايزة اخلف"
سعاد"وهو فيه واحدة مش عايزة تخلف الا لو كان فيه سبب"
ورن موبايل سمير فى الاوضة...وقام يرد
نادية"انا خايفة اخلف ومعرفش اربى ابنى"
مديحة"ومتعرفيش ليه"
نادية"خايفة اموت ولا يحصلى حاجة ف الولادة وحتى لو محصليش حاجة وانا كنت كويسة لو انا ويحيي اتطلقنا لاى سبب ابنى يتربى محروم من حد فينا"
سعاد"استغفر الله العظيم... يا بنتى ماانا خلفت 4 مرات ومحصليش حاجة"
نادية"بس اتربينا محرومين منك.. وصبرى كمان هيتربى محروم من باباه... ولو كانت نسمة حامل كان ابنها هيتربى مفارق ..يبقى اجيب عيال اعذبهم ليه"
سكتت سعاد... بصت لمديحة
مديحة"وليه مبصتيش لكل اللى عايشين حياتهم عادى... مهما كان فيه ناس بيتطلقوا فيه ناس اكتر بيعيشوا حياتهم مستقرة... انتى نفسك مشكلتك ايه مع يحيي غير الاطفال...يعنى لو مكنتيش مانعة الخلفة مكنش حصل مشكلة... مشكلة اختك كانت ف حماتها ودى كنا ملاحظينها من قبل الجواز ... باباكى ومامتك اللى حصل بينهم ده برضه نصيب... ومامتك عاشت مع جوزها كويسة وانا عشت مع جوزى كويسين"
سكتت نادية... نوال ونسمة ساكتين
سعاد"كلام عمتك صح يا نادية...متخربيش بيتك بايدك ويحيي كويس مش وحش"
جه سمير من الاوضة
"يحيي كان ع التليفون"
والتفتت نادية وبكل امل سألته
"قالك ايه"
سمير"بيقولى ان جلسة نوال بكرة واننا لازم نروح المحكمة الصبح"
نادية"مسألش عليا"
سمير وهو بيقعد وبيتجنب نظراتها
"لأ"
وطت نادية وشها ف الارض بخيبة امل
مديحة"ولا انت اتكلمت معاه"
سمير"سألته وقلتله عايزين نحل المشكلة اللى بينكم قالى خلاص كل حاجة انتهت ونادية هى اللى اختارت"
قامت نادية جريت على الاوضة وهى بتعيط ... مش مصدقة ان كل اللى بينها وبين يحيي انتهى بجد

فى المحكمة... يحيي استقبل سمير ونوال وقعدوا مع بعض يستنوا رقم الجلسة
"بصى يا نوال... لما القاضى يسألك عايزة الخلع ليه قوليله اسبابك كلها عادى انا مش هحفظك صيغة انتى اتكلمى واحكى علشان القاضى يصدقك"
نوال"حاضر...بعدها بقى يحكم"
يحيي"لا طبعا لسه وقت ممكن القضية تاخد سنة وزيادة"
نوال"يحيي انت مش هتكلم نادية"
يحيي"خلاص يا نوال... نادية جرحتنى وخدعتنى وانا استحملتها وصبرت عليها كتير... انا مستنى بس لما اظبط امورى واطلقها واديها كل حقوقها"
سمير"يا يحيي كل مشكلة وليها حل...انا لو مكنتش بعتبرك ابنى مكنتش اتكلمت معاك كده... انا مش عايز اخسرك"
يحيي"وانا يا عمى مكنتش اتمنى ان يحصل كده... بس خلاص كل شئ نصيب"

من بعيد ظهر رامى ومعاه محامى
لما شافته نوال... ارتبكت وبعدت وشها عنه
وقف رامى والمحامى بتاعه بعيد ... لحد ما اتنادى على رقم الجلسة بتاعتهم

فى بيت ام رامى بالليل فى اوضتها وهى ع السرير وهو قاعد على كرسى جنبها
"يعنى ايه يارامى حكم ...ماتقول وتفهمنى القاضى قال ايه بالكلام العادى كده"
"يعنى حد من اهلى يتكلم مع نوال وحد من اهلها يتكلم معايا ويحاولوا الاتنين يصلحوا بيننا ويرجعوا للقاضى يقولوله اتفقنا ولا لأ"
"ومين اللى هيعمل كده"
"انا قلت محمود جوز اختى وهى قالت باباها"
"طيب.... بقولك ايه يارامى المخفية مرات ابوك واخوها بيخوفونى وانا قاعدة لوحدى"
"بيخوفوكى ازاى يعنى"
"وهما طالعين ولا نازلين بيفضلوا يزعقوا جنب الباب واخوها ابو مطواة ده بيفضل يلقح بالكلام ... انا خايفة ليدخل عليا يخبطنى بحاجة"
"وهو هيعمل ليه كده هما ف حالهم واحنا ف حالنا"
"معرفش انا خايفة وخلاص ماتاخد اجازة وتقعد معايا"
"ازاى يا ماما ...مينفعش طبعا"

الايام بتعدى
بلال ونسمة وسمير راحوا للمأذون واتطلقوا رسمى بعد ماتنازلت نسمة عن كل حقوقها المادية
وكل ما مديحة وسمير يسألوهم ...يقولوا مفيش نصيب واحنا اتفقنا على كده ومحدش يسألنا
نسمة مش بتروح الكلية وبتاخد محاضراتها بالتليفون او بالنت من ايه صاحبتها
نسمة مكسوفة تروح الكلية والناس تعرف انها اتطلقت وهى عروسة وقررت انها تروح ع الامتحانات بس

نادية اخدت اجازة من المدرسة لانها مبقتش قادرة تركز ف حاجة
طول الليل دموعها على خدها وبتتقلب على السرير من غير نوم وكل تفكيرها ف يحيي وحبها وشوقها ليه

نوال اكتر واحدة نفسيتها مرتاحة فى البيت وان كانت ساعات يصعب عليها صبرى لما تبص له وتفكر لما يكبر ويسألها ليه اتطلقوا وتحكيله هيفهمها ولا هيلومها

سعاد بتكلمهم وبيكلموها كل يوم

مديحة وسمير اتفقوا ان فشل ولادهم مع بعض ميأثرش على علاقتهم واقتنعوا ان كل شئ نصيب وبطلوا يسألوا عن السبب

سمير اتصل برامى زى حكم الشرع والمحكمة واخد منه الرد اللى هيقوله ف الجلسة الجاية وهى ان رامى مش موافق على الخلع

محمود اتصل بنوال لنفس السبب وردها انها مصممة على الخلع

وف يوم ونادية قاعدة مع اخواتها
"اعمل ايه دلوقتى فى حاجات عايزاها من البيت"
نوال"جيبيها من البيت مش معاكى مفتاحك"
نادية"اه معايا بس مش عايزة اروح لاحسن يحيي يفتكرنى رايحة له"
نسمة"مش انتى عارفة مواعيده... روحى ف معاد ميكونش موجود فيه"
نادية بصت ف الساعة
"زمانه ف المكتب دلوقتى...تيجى معايا"
نسمة"ماشى.. هقوم ألبس"

نسمة ونادية اول ما الاسانسير وقف
بيخرجوا منه...لقوا يحيي قدامهم كان هيركب ونازل
يحيي ونادية بيبصوا لبعض من غير ما يتكلموا
نظرات حب\\ شوق\\ عتاب \\ لوم
نسمة شافتهم حست بالحب الكبير اللى بينهم
قاطعتهم
"ازيك يا يحيي"
يحيي"ازيك يا نسمة عاملة ايه... ازيك يا نادية"
ردت نادية وهى خارجة من الاسانسير ورايحة ناحية باب الشقة
"كويسة"
ردها احبط يحيي... سأل نسمة
"جايين البيت ليه ... فيه حاجة"
نسمة"اه نادية كانت عايزة هدوم"
يحيي"براحتكم... مش عايزة حاجة"
نسمة"بصراحة عايزة اسألك على حاجة ف قضية نوال... فاضى بس 5 دقايق"
يحيي"اه... تعالى"
دخلوا البيت ورا نادية اللى سابتهم ودخلت اوضتها تاخد الهدوم
"ايه يا ستى عايزة تسألى على ايه"
 وقربت منه نسمة وبصوت واطى ميوصلش للاوضة اللى فيها نادية
"عايزة اقولك ان حرام الحب اللى بينك وبين نادية ده يضيع"
"اختك مبتحبنيش يا نسمة ولا بتحب حد"
"مين قال كده... نادية بتموت فيك وطول الليل مبتنامش وبتقلب ف صورك ورسايلك ع الموبايل ودموعها على خدها... نادية قاعدة من المدرسة والدروس ومبتخرجش م البيت بس هى بتكابر علشان مبتحبش حد يشوفها ضعيفة"
"لو كانت بتحبنى كانت تبقى عايزة تخلف منى"
"نادية خايفة من الحمل والولادة على نفسها وعلى البيبى...خايفة يجرالها حاجة او بعد كده تطلقوا وعيالكم تتربى زينا"
"مقلتليش حاجة زى كده"
"قلتلك نادية مبتحبش حد يشوفها ضعيفة... طمنها يا يحيي لو لسه بحبها"
"طبعا بحبها"
"ادخلها واتكلموا مع بعض... انا هرجع البيت... ويارب تتصالحوا"
                         *******************
دخل يحيي الاوضة وهو بيتسحب
شاف نادية واقفة ضهرها للباب ووشها للدولاب
ماسكة هدومه وبتحضنها ودموعها نازلة
قرب منها ...وقف وراها وقرب من ودنها
"وحشتينى"
وقعت الهدوم من ايديها وبعدت عنه
"انت هنا... انت مش كنت نازل"
لفت وقفلت الشنطة اللى كانت حطت فيها كل الهدوم اللى كانت عايزاها
مسك ايدها بعدها عن الشنطة ومسح دموعها
"بقولك وحشتينى"
وانفجرت فيه وهى بتعيط
"مش انت اللى قلتلى يا اخلف يا نتطلق... مش انت اللى قلت لبابا اننا خلاص هنتطلق ومسألتش عليا... انت مبتحبنيش"
"والله بحبك... بحبك ومحبيتش حد غيرك وعايز اخلف منك انتى عايز ارتبط بيكى اكتر عايز اسرة كبيرة عايز نربى ولادنا مع بعض لحد ما نجوزهم ويخلفوا ونبقى انا وانتى عواجيز وقاعدين نناكف ف بعض... بحبك يا نادية وبكره عِندك"
"وانا بحبك يا يحيي ... انت اول واخر حب ف حياتى بس مبحبش حد يستغلنى... انت استغليت حبى ليك وبتجبرنى اخلف بالعافية"
"مش عايزة تخلفى ليه"
"لو مُت زى اميرة انت هتفرح بالبيبى صح"
"ماهى نوال وغيرها وغيرها خلفوا... اميرة عمرها كان كده...لو خايفة ممكن نروح لاحسن دكتور ولو قال ان الحمل فيه اى خطورة عليكى انا اللى هقولك اوعى تحملى ومش عايز عيال"
"ولو اتطلقنا ...هربى عيالى لوحدى او تاخدهم انت وتحرمنى منهم"
"ومين قال انى هقدر اسيبك... انا طول الفترة اللى فاتت دى بتحجج بحكاية المؤخر انما انا مش قادر اطلقك... كان عندى امل اننا نرجع ومكنتش عايز اقطع اخر امل بيننا... انا كنت بتعذب فى بعدك واللى عذبنى اكتر انى حسيت انى مش فارق معاكى ولا سألتى"
"انا اللى كنت بموت كل دقيقة وانا عارفة اننا خلاص مش هنشوف بعض تانى"
"انا مقدرش استغنى عنك... انا بحبك اوى يا نادية"
ضمها ليه... سندت راسها على قلبه
"ولا انا اقدر يا يحيي... انا كمان بحبك اوى"
رجعها لورا... وبص لها ف عينيها
"يبقى توعدينى نروح للدكتور ونشوف حكاية الاطفال دى وانا اوعدك انى عمرى ما هبعد عنك انتى وولادنا"
"ولادنا؟؟"
"ان شاءالله... طول ما احنا مع بعض يبقى هنقدر على اى مشكلة ونحلها مع بعض... قومى غيرى هدومك وانا مش نازل المكتب علشان وحشتينى اوووى وعايز اشبع منك"
ردت نادية بابتسامة وفرحتها مالية وشها وقلبها
"طيب هطلع اقول لنسمة واتصل ببابا"
"ههههههه نسمة مين انتى لسه فاكرة...نسمة زمانها قربت من البيت دلوقتى... قومى انتى ظبطى نفسك كده وانا هتصل بباباكى واقوله اننا اتصالحنا وهنسافرالصبح نعمل شهر عسل جديد"

هناك 29 تعليقًا:

  1. جميل اوى الحب اللى بين يحيى ونادية بس معكره نشفان دماغها وعنادها ورائع منه صبره الجميل عليها
    بس برضو منوهتيش عن رأى الشرع فى اللى عملته نادية فيما يخص الخلفة لان كدا ممكن بنات كتير يقرأوا ويفكروا ان دا حق ليهم انهم يقرروا يخلفوا ولا لا
    ارجو التوضيح وشكرا ليكى على ابداعك الرائع

    ردحذف
  2. روووووووووووووووووووووووووعه

    ردحذف
  3. gaaaaaaaaaaaaaaaaaaaaaaaaaaaaamed

    ردحذف
  4. ههههههههههههههههههههههههههههههههههههههههههههه
    تحفه جدااااااااااااااااااااااااااااااااااااااااااااااااااااااااااااااااااااااااااااااااااااا

    ردحذف
  5. ايه يا دينا الحلقه صغيرة خاااااااااااااااااااااااالص
    بس بجد تسلم ايدك تحفه
    بس بالله عليكى يا دينا لو باقى حلقه او اتنين
    بلاش اجازة بكره
    ووخدى 3 ايام بعد ما تخلصيها
    ايه رائيك

    ردحذف
  6. انا عايزة اتجوز يحيى بقاااااااااااااااا جاااااااامد جاااااااااامد بجد وراااااجل اوى وحياة ربنا وسمير ونسمة صعبانين علية اوووووى

    ردحذف
  7. جامده وطويله المره دي

    ردحذف
  8. جامده وطويله المره دي

    ردحذف
  9. رووووووووووووووووووووووووووووووووووووووووووعة احلي حاجة شوية الرومانسية اللي في الأخر دول بجد ادتيني احساس نفسي احسه اووووووووووووي يمكن عشان غاب عني

    ردحذف
  10. حلووووووووة اووووووووى بجد يا دينا الحلقة
    تسلم ايديكى وعيونك بجد وسهرك دة كل يوم ما عدا طبعا الاتنين والجمعة :)
    بجد حلوة اوى ويارب تكمل ع خير يارب
    تسلم الايادى :)

    amira slama

    ردحذف
  11. حلوة اوى و احسن حاجة الحب ما بين نادية و يحيى :)

    ردحذف
  12. enty bt32deny 3la fekra ^^ msa 3liki bgd xDD .. GO oN ;) ...x

    ردحذف
  13. يااااااااااااه لو كل الحب يبقا كدا

    ردحذف
  14. ايه يا دودوالجمال ده الحلقه جامده اووووووووووووووى يا دينا

    ردحذف
  15. اوووووووووووووووووووووف جامده جدا جدا جدا

    ردحذف
  16. انا للاسف لسه متباعكي يمكن من 3حلقات بس عاجبني اسلوبك قوي والحلقة النهارده تحفه

    ردحذف
  17. انا للاسف لسه متباعكي يمكن من 3حلقات بس عاجبني اسلوبك قوي والحلقة النهارده تحفه

    ردحذف
  18. انا للاسف لسه متباعكي يمكن من 3حلقات بس عاجبني اسلوبك قوي والحلقة النهارده تحفه

    ردحذف
  19. جميييييييييييييييييييييلة اوى اوى اوى

    ردحذف
  20. حلوة اوييييييييييييييييييييي


    مونه

    ردحذف
  21. يسلموووووووووووووا رائعة وأكثر
    بس نفسي بلال يدفع الثمن مش بس نسمة
    وأكيد أهلهم راح يعرفوا
    طلاقهم كان مش مبرر ومستغربة ليش الأهل ما ضغطوا عليهم بمعرفة السبب
    لأنه كان بدري كتير ومافي سبب قدامهم

    ردحذف
  22. قولي لي بقي الحل

    قريت كل قصصك في شهر واحد لكي ان تتخيلي

    من روعة قلمك و اسلوبك السهل البسيط

    و مش هقدر خالص كده اني استني كل يوم حلقة

    لا و اجازة كمان لالالالالا يادندون

    تسلمي و يسلم قلمك

    اما بالنسبة لتوقعاتي

    ان سمير هيرجع لسعاد علشان يكفرعنذنبه بحلفانه للطلاق عمال علي بطال

    و بالنهاية بناته اللي دفعوا التمن

    نادية و يحي هيخلفوا

    و نسمة و بلال هيرجعوا لبعض بعد ماليلي تتخلي عنه و هيندم علي حب نسمة اللي ضيعه
    بس هي مش هترجع له لانه هانها

    ام نوال هترجع لرامي بعد ام رامي ( ربنا يولع فيها ) هي اللي تروح و تعتذر لها


    يار توقعاتي تصيب


    Rahoooooooooooooobaaaa

    ردحذف
  23. روووووووووووووعة يا دينا بجد مش لاقيه كلام اعبر بيه عن اعجابى بافكارك انا فرحت جدا برجوع نادية ليحيى ومستنيه الحلقة الاخيرة
    اية

    ردحذف
  24. دينا بجد انتى جامدة
    انا قريت كل قصصك ف اسبوع مش بقوم من ادام اللاب بسببك
    وبعدين بتقولى بتكتبى من وانتى عندك سبع سنين طيب فين كل ده
    عاوزة اقرا حاجات كتير
    بجد انتى ملكيش حل

    ردحذف
  25. هههههههههههههههههههههههههههههههههههههه ♥ ♥

    ردحذف
  26. نوال عبد السلام9 أغسطس، 2016 4:14 م

    انتي فعلا مبدعة انا بحب روياتك جدا واسلوبك في الكتابة رائع اتمنالك التوفيق

    ردحذف
  27. هو ممكن سمير وسعاد يرجعوا لبعض

    ردحذف

قول رأيك بلاش تقرا وتقفل من سكات...ارائكم تهمنى