الأربعاء، 3 أكتوبر، 2012

ابغض الحلال... الحلقة 30 والاخيرة

الحلقة 30 والاخيرة
سعاد ويحيي ونادية عند الدكتور
وبعد الكشف...
"هى كويسة ومفيش حاجة تمنع الحمل الا..."
وقل يحيي وقاطعه
"الا ايه... هو فيه مشكلة"
الدكتور"لا .. بس انها اخدت الحبوب لمدة طويلة هيأخر الحمل شوية يعنى مش معنى انها بطلتها تحمل على طول... يعنى بعد 6 شهور تبقى تيجى تكشف تانى لو مكنش حصل حمل"
وحست سعاد بقلق يحيي...فسألت الدكتور
"انما عامة يا دكتور معندهاش حاجة تقلق"
الدكتور"لا خالص... مسألة وقت بس"
خرجوا من عند الدكتور... وحس يحيي ان نادية ساكتة طول ماهما عند الدكتور وبعد ما خرجوا
مسك ايدها... وسألها
"لسه خايفة"
ردت وهى لسه سرحانة
"اوى"
سعاد"سيبيها لله يا نادية محدش بياخد اكتر من نصيبه"

فى المحكمة... نوال ويحيي وسمير قاعدين مستنيين الجلسة
جه رامى عليهم
"السلام عليكم"
رد يحيي وسمير ونوال دورت وشها بعيد عنه
رامى"عمى لو سمحت انا عايز اشوف ابنى... انا من يوم وفاة بابا مشفتوش ووحشنى اوى"
قامت نوال وقفت بعيد...حس سمير انها فوضته
سمير"ماشى يا رامى ...عايز تشوفه امتى وابقى اتفضل بس ده مالوش دعوة بالقضية اللى بيننا"
رامى"انا عارف... انا بس عايز اشوفه... ممكن النهاردة"
سمير"ممكن... تعالى الساعة 8 كده ان شاءالله"
رامى"متشكر اوى يا عمى"

فى بيت ام رامى بالليل...
رامى قاعد بيتعشا ومامته قاعدة جنبه
"هااا احكيلى بقى الواد عامل ايه"
"الحمدلله... تصدقى كان ماسك فيا زى ما يكون عارفنى...وانا مكنتش عايز اسيبه خالص"
"منها لله اللى اخدته مننا... ده انا هتجنن واشوفه"
"ماما... هو ينفع ارجع نوال"
"وانا مالى مش هى اللى رفعت قضية"
"ايوه بس الكلام ده حصل لانى مطلبتش منها انها ترجع ...مش انتى قلتيلى مجيبش سيرة رجوع علشان ميركبوناش"
"اه... مكنتش فاكراها هترفع قضية بجد"
"واهى رفعت والمحامى بتاعى بيقول اكيد هتكسبها... انا عايز ابنى ونوال كمان كويسة مش وحشة"
"مليش دعوة اعمل اللى انت عايزه"
وقامت ومشيت وسابته ... وقبل ما تدخل
"روح خليها تيجى هى والواد يملوا علينا البيت بدل ما احنا لوحدنا"

فى بيت سمير... سمير ونوال فى اوضتها
"رامى كلمنى وعايز يصالحك وترجعى له"
"قال كده بس"
"اه قال انه عايزك ترجعى انتى وصبرى تانى"
"ارجع على نفس العيشة القديمة مع مامته؟... انا ماصدقت خلصت"
"يعنى انتى موافقة ترجعيله بس المشكلة ف مامته"
وطت نوال وشها ف الارض وردت
"رامى كويس لو بعيد عن مامته وسيطرتها... وصعب عليا لما شاف صبرى وصبرى كمان كان ماسك فيه وانا حسيت انى هفرق بينهم ... بس برضه مش هقدر ارجع تانى"
"طيب انا عندى حل"
وردت بلهفة
"ايه"
"نقوله يجيب شقة بره"
"مستحيل يسيب مامته وخصوصا بعد باباه ما مات"
"يا ستى احنا نقول شرطنا وخلاص واللى ربنا رايده هيكون"
"ماشى يابابا اللى تشوفه"

فاتت شهور
سمير قال لرامى على الشرط... ولان رامى معندوش اى حل ولا جرأة رفض انه يجيب شقة بره... واستمرت القضية وكل ما يحب يشوف صبرى يشوفه

نسمة خلصت امتحانات سنة تانية ونجحت فيها رغم كل الظروف اللى مرت بيها

يحيي ونادية عايشين حياتهم بسعادة يحيي ف انتظار خبر حملها وهى قلقانة وبتحاول تنسى خوفها بحبها ليحيي

البنات علاقتهم بسعاد طبيعية زى اى ام وبناتها...بعيدا عن سمير
وعلاقتهم بسمير طبيعية ومتأثرتش بوجود سعاد ف حياتهم

فى بيت سمير... مديحة قاعدة مع سمير ومتوترة ومترددة
"مالك يا مديحة...شكلك عايزة تقولى حاجة"
"اه...عايزة اقول حاجة وخايفة تزعلوا"
"من امتى انا بزعل منك"
"والله يا سمير وشى منك ف الارض"
"ما تقولى قلقتينى"
"بلال"
"ماله"
"عايز يخطب وانا قلتله مش هروح معاه الا لو انت وافقت"
ورد عليها بانكسار
"وانا معقول هقول لأ... ربنا يتمم له بخير"
"هتيجى معايا ؟؟"
"بصى زى ماانتى اهتميتى بمشاعر ابنك انا كمان لازم احترم مشاعر بنتى... مش ممكن اروح اخطب لطليقها..ولا ايه"
وردت مديحة بكسوف
"معاك حق... انا مش عايزة نسمة تزعل"
"ربنا مايجيب زعل ... بكرة ربنا يكرمها هى كمان وكل شئ نصيب"
"بص يا سمير... انا طول عمرى بعتبر بناتك بناتى... علشان كده بلال هيسافر فرع الشركة ف السعودية بعد ما يخطب والسنة الجاية يبقى ياخد مراته معاه يعنى هيبقوا بعيد"
"بعيد ولا قريب يا مديحة متفرقش ف حاجة... ربنا يكرمهم ويعوض نسمة خير"
"ان شاءالله...هطلع انا مش عايز حاجة"
"لا شكرا"
مشيت مديحة ونادى سمير على نسمة وحكى لها كلام عمتها
"ساكتة ليه"
"ابدا عادى"
"زعلتى... معلش يا حبيبتى ربنا يعوضك خير"
"ابدا يا بابا... انا الحمدلله ف الشهور اللى فاتت قدرت افهم ان اى حاجة وحشة بتحصلنا بتقوينا... انا مريت بتجربة صعبة واكبر من سنى بس فهمتنى حاجات كتير... فهمتنى انى بعد كده احكم عقلى ف كل حاجة واول حاجة قررتها انى مش هفكر ف اى ارتباط خالص الا لما اخلص واشتغل وبلال ربنا يوفقه مع اللى اختارها وانا اخترت طريقى خلاص... طريق العقل"
حضنها سمير وهو فرحان بكلامها
"ربنا يكملك بعقلك يا حبيبتى"

فى بيت ام رامى
رامى قاعد مع اخواته واجوازهم
اخته"بص بقى يارامى بدل انت مش قادر تقول لماما احنا هنقولها...احنا جايين النهاردة علشان كده"
رامى"انا عارف انها هترفض"
الاخت"احنا هنقنعها"
جت ام رامى من الحمام... وقعدت
"منورين يا ولاد... ياه كل يوم البيت فاضى عليا"
الاخت الكبيرة" ماهو علشان البيت كبير عليكى يا ماما حاسة انك لوحدك"
الاخت الصغيرة"صح يا ماما... وعلشان كمان سلوى اللى فوق دى اكيد بتضايقك"
ام رامى"اه والله...ده انا لما اخوكم بينزل بقفل عليا بالمفتاح"
الاخت الكبيرة"علشان كده يا ماما احنا اتفقنا اننا نبيع البيت ونقسم وكل واحد ياخد حقه"
ام رامى"نبيع البيت؟؟!!"
الاخت الصغيرة"اه وتشوفيلك شقة على قدك وتبقى بعيد عن سلوى واخوها"
الاخت الكبيرة"وعلشان رامى كمان يا ماما...حرام يتحرم من ابنه ومراته هو كمان يجيب شقة ويقعد فيها مع مراته وابنه"
ام رامى"ازاى اخرج من البيت اللى اتجوزت فيه وعشت حياتى كلها فيه"
الاخت الكبيرة"ماهو البيت والارض يجيبوا مبلغ كبير وبصراحة بقى احنا محتاجين الفلوس دى"
ام رامى"محتاجينها ف ايه"
الاخت الصغيرة"مش هو ميراثنا يا ماما...محتاجينه او لأ ده حقنا"
ام رامى"حقكوا ايه ما سلوى وابنها هياخدوا جزء كبير اكتر منكم"
محمود جوز الاخت الكبيرة"يا حماتى الارض بمبلغ كبير اوى وتكفى الكل... قولى انتى اه بس"
وبصت ام رامى لرامى
"وانت كمان عايز تقسم"
رامى"انتى عارفة ياماما انى عايز ابنى... وكلامهم صح احنا ناخد حقنا ونشوفلك شقة واشوفلى شقة وارجع نوال وابنى"
كلهم ف نفس الوقت
"وافقى ياماما... محتاجين الفلوس ياماما... كلنا متفقين ياماما"

فى بيت سمير... نوال ونسمة فى الاوضة... دخلت عليهم نادية
"ازززززززززيكم يا حلوين"
سلموا عليها الاتنين
نسمة"ايه ده مسمعتش الباب"
نادية"بابا شافنا واحنا طالعين ففتح لنا قبل ما نخبط"
نوال"ازيك يا نادية وازى يحيي"
نادية"الحمدلله...على فكرة يحيي خلص اجراءات التنازل عن القضية خلاص"
نسمة"واحنا اتهدينا فى العزال ... ياختى كنتى تعالى ساعدينا شوية"
ومسكت نادية بطنها
"للاسف مش هينفع غير اجى ضيفة من غير ما امد ايدى ف حاجة"
وبصوا نوال ونسمة لبعض
نوال"هو حصل"
نادية بتهز راسها
"لسه جايين من عند الدكتور حالا وقلت اجى اقولكم"
نسمة"تلاقى يحيي مزقطط"
نادية"يحيي كان هيلم علينا الناس لماعرف"
نوال"بذمتك مش فرحانة"
نادية"عارفين فكرة ان فيه حد بيتكون جواكى دى لوحدها عاملة احساس كده مش عارفة اوصفه"
نوال"ربنا يكملك على خير يارب"
نسمة"يارب تجيبى بنوتة شبهى"
وسمعوا جرس الباب... والباب بيتفتح ويتقفل
نوال"مين جه دلوقتى"
نسمة"مش عارفة هروح اشوف"
خرجت نسمة من الاوضة
نادية"هتروحى شقتك الجديدة امتى"
نوال"يومين كده ان شاءالله"
نادية"وحماتك هتعملى معاها ايه"
نوال"مليش دعوة بيها الا ف اضيق الحدود يدوب زيارات لصلة الرحم وخلاص.. بعد ما باعوا البيت اشتروا لها شقة قريبة من بنتها واحنا شقتنا بعيد الحمدلله"
نادية"انتى هترجعى لرامى ليه...علشان صبرى بس ولا حبيتيه"
نوال"اللى بينى وبين رامى بقى مودة وعشرة وابننا..يعنى الحب بكل معانيه"
نادية"لالالالا ده احنا بقينا فلاسفة بقى"
نوال بتضحك"ولا فلسفة ولا حاجة"
نادية"صوت عمتك بره... هروح هقولها ع الحمل"
نوال"وانا هاجى اسلم عليها"
                 ***********************
لما خرجت نسمة تشوف مين جه
لقيت مديحة وبلال
سلمت عليهم وقعدت
بلال"انا جاى اسلم عليكم علشان مسافر الفجر"
سمير"بالسلامة يا بلال ربنا يوفقك"
بلال"ممكن كلمتين يا نسمة"
بصت نسمة لسمير
سمير"قومى كلمى ابن عمتك"
دخلوا الاتنين البلكونة
"نسمة... انا عارف ان الفترة الاخيرة كنت وحش اوى معاكى... بس والله انا مش وحش... احنا الاتنين كنا ضحية غلطة ودفعنا تمنها"
"فات اوان الكلام ده يا بلال خلاص.. ربنا يوفقك مع ليلى انت بتحبها وهى بتحبك وخلاص اتخطبتوا ربنا يسعدكم"
"انا بس مش عايزك تكونى زعلانة منى وتسامحينى من قلبى... والله العظيم انا بحكبم انتى ونادية ونوال اوى ومقدرش اخسركم"
"وانت كمان يا بلال غالى علينا اوى واخواتى بيحبوك"
"كرهتينى"
"لأ... بس مبقتش احبك نفس الحب اللى كنت بحبهولك... بقيت ابن عمتى وبس"
"سامحينى من قلبك"
"مسامحاك من قلبى... انت برضه سترتنى ومحدش عرف حاجة عن اللى حصل وده يشفع لك عندى"
ومد ايده يسلم عليها
"اشوف وشك بخير"
"ترجع بالسلامة"
وبص جوه البيت شاف نادية ونوال قاعدين بسلموا على مديحة
"هدخل اسلم عليهم قبل ما امشى وابقى سلمى على طنط سعاد كتير هى واسلام"
ردت وهى بتسحب ايديها من ايديه
"ان شاءالله... ابقى طمنا عليك"

هناك 65 تعليقًا:

  1. هى ليها جزء تانى يا دينا

    ردحذف
  2. حلوه اوى اوى اوى يا دندن وكويس انك سيبتيلنا فراغ ف اخر القصه عشان كل واحد يختار نهايتها بنفسوه كدا حلوه اوى اوى

    ردحذف
  3. انا حاسس ان القفلة ليها تكملة او ناقصة

    ردحذف
  4. حلوة اوى بس مش شايفه انها قصيره شويه ؟؟و كان نفســــــــــى اوى سعاد وسمير يرجعوا لبعضيهم كانت هتبقى احلى

    ردحذف
  5. أزال المؤلف هذا التعليق.

    ردحذف
    الردود
    1. لسة فى باقى ولا خلاص كدا

      حذف
  6. هيييييييييييييييييييييييييييه انا انبسط

    ردحذف
  7. 7lwaaaaaaaaa awiiii w nehaya wa9e3ia bravoooo

    sara from Morocco

    ردحذف
  8. لالالالا يا دينا النهاية مش حلوة اوى
    لا انا زعلاااااااااااااااانة اهئ اهئ اهئ
    مش حلوة النهاية دى خالص

    ردحذف
  9. جميلة اووووووووووى

    ردحذف
  10. حلوة يا دينا بس الصراحة مكنتش متوقعة كدة خاااالص
    ف حاجات متوقعاها حصلت وف لالالالالالالالاء
    بس بجد تسلم ايدك وع تعبك معانا وسهرك طول الايام

    amira slama

    ردحذف
  11. روووووووووووووووووعة تسلم الأيادي

    ردحذف
  12. ايه ده مش هترجع لبلال ويحبها

    ردحذف
    الردود
    1. انا كنت حاسس ان لازم تكون النهايه ان الدنيا تتلم يعنى بلال يرجعلها وسمير وسعاد يرجعوا بعض واسلام يعيش معاهم

      حذف
    2. كان نفسى اووووى يا نيرة وكان نفسى كمان سعاد وسمير يرجعو يلا حصل خير هيا بردو حلوة اووووووووى كدة تسلم ايدك يا دينا :)

      مريم

      حذف
  13. يا سلام .. ما أجمل النهايات الحلوه XD

    ردحذف
  14. الله الله الله الله الله الله الله الله بجد القصه كلها تحفى تعرفى كان نفسى اكتب ورا كل حلقه تعليق بس من كتر منا عاوزه اشوف الحلقه اللى بعديها ببقى مش قدره انتظر بس بجد روعه روعه روعه ربنا يكرمك يارب ويوفققك ويجعلك احسن كاتبه فى العالم

    ردحذف
  15. اة دة يا دينا مينفعش اكيد لها جزء تانى

    ردحذف
  16. ايه ده يادينا انا مش متعوده منك على النهايه دى ياااااااارب يكون فى جزء تانى

    ردحذف
  17. اده هى كدا خلصت انا مش حاسه بنهايتها خالص

    ردحذف
  18. جميله اوى كنت عاوزه نسمه و بلال يرجعه لبعض

    ردحذف
  19. خسارة خلصت صعبانه عليا نسمه اوى :(
    بس بجد يا دندون تجنن القصة وكل قصصك ربنا يوفقك يا قمر

    ردحذف
  20. انا مش حاسة انها حلقة اخيرة خالص
    حاجات متوقعة حصلت وحاجات ولاسف بلال مش حب نسمة ولا سمير وسعاد رجعوا لبعض
    ياريت يكون ليهاجزء ثانى
    dody salah

    ردحذف
  21. لا انا مش مقتنعه خالص بالنهايه هى ليه صغيره كدا
    nada

    ردحذف
  22. حلوة بس مابلت ريقي كان لازم بلال يتبهدل وما ياخد اللي بيحبها

    ردحذف
  23. المفوض كانت ليلي تسيب بلال و تديهومله و يعرف انه خسر نسمه و يندم عليها

    ردحذف
  24. لالالالالا مش عاجبانى خالص بلييز يبقى فى جزء تانى

    ردحذف
  25. لا نهاية حلوة ومنطقيه كدا

    ردحذف
  26. تسلم ايدك يا دينا بس حاسه انها ناقصه قصه يوميات حماه عمالتيلها جزء تانى وكانت تحفه انا متابعه كل قصصك ومش بفتح النت الا علشانها ربنا يزيدك موهبه ....امل

    ردحذف
  27. من فضلك يا دينا لو مفيش جزء تانى ممكن تقوليلنا اسم القصه الجديده وهتنزل امتى....امل

    ردحذف
  28. جامدة يا دينا بس كان المفروض انتهت بشكل احلى شوية

    ردحذف
  29. كان نفسى نسمة كمان تتجوز

    ردحذف
  30. هتنزلى قصة جديدة امتى بقى؟

    ردحذف
  31. جمييييييييييييييييييييلة يا دندن تسلم ايديك ياقمرايه


    مونه

    ردحذف
  32. تسلم ايدك بجد الحلقة حلوة بس كنت اتمنى ان بلال & نسمة يرجعوا لبعض

    ردحذف
  33. نهايه منطقيه يعنى ناديه رجعت لجوزها وحملت ونوال برضه لكن نسمه تستهال لانها غلطت وعملت حاجه من الكبائر عند ربنا فا كده احسن ^_^ نهايه حلوه ومتعملهاش جزء تانى عشان حتبقى بيخه كده النهايه تماموز اوووي

    ردحذف
  34. ديناااا انا بجد مش عارفة اقولك ايه فعلا روووووووعة
    TU2aa

    ردحذف
  35. رووووووووووووووووعة

    ردحذف
  36. النهايه دى مش حلو ابدا

    ردحذف
  37. جميلة بس كنت عايزه اسالك ان كانت القصة دى من خيالك ولا حصلت حقيقى لانى حسيت من النهاية ان لسه فيه حاجات تانيه الدنيا مخبياهلهم زى الى حصل فى يوميات حماه وكمان حاسة ان بلال مااتعذبش زى ما نسمة اتعذبت وده الى محسسنى انها لسه ماخلصتش
    اية

    ردحذف
  38. شكرا جزيلا لكل اللى تابع القصة واهتم بكتابة كومنت وقال رأيه لان ارائكم بتهمنى جدا
    وده ردى ده على اكتر سؤال بيجيلى من اخر حلقة هنا وعلى البيدج وعلى الاكونت وف مسدجات وعلى اسك
    ليه عملتى النهاية كده وعايزين جزء تانى؟؟
    1- النهاية شبه مفتوحة ومش لازم كل قصة تنتهى بجواز الابطال او برجوعهم لبعض
    2- بلال ليه متعاقبش ...لأ هو اتعاقب على غلطة عملها ومكنش ف وعيه واتعاقب انه اتجوز واحدة مبيحبهاش
    3- نسمة نهايتها حزينة... لا مش حزينة هى غلطت واتعاقبت واتعلمت من غلطها وهتبدأ حياة جديدة
    4- ام رامى مش لازم عقابها يكون موت او شلل زى ماكلكم كنتوا عايزين...عقابها بقى ف وحدتها وكسرة نفسها ومحدش بقى تحت سيطرتها
    5- رامى مخدش موقف ليه... لانه شخصية ضعيفة واكتر حاجة قدر يعملها انه ينفصل عن امه
    6- يحيي ونادية الحب اللى بينهم كان اقوى من اى مشاكل ودول نهايتهم تقليدية طبيعية
    7- سمير وسعاد ليه مرجعوش لبعض... لان سعاد عاشت مع اسامة حياة مستقرة سعيدة وسنين كتير اكتر من اللى عاشتهم مع سمير وكانوا كلهم نكد ...وسمير اتعود انه يعيش مع بناته بس ومكنش بيعامل سعاد الا ف الضرورة ...يبقى هيرجعوا لبعض ازاى؟؟
    8- نوال رجعت لرامى لانها مشفتش منه هو حاجة وحشة وكمان علشان ابنها يتربى مع اب وام مش زى ماهى اتربت
    9- حكاية جزء تانى دى انا مش شايفة لها ضرورة ولا عندى ليها احداث تمشى مع غرض القصة يبقى حاليا مفيش مجال لجزء تانى ولو لقيت اى وقت انه ينفع لها جزء تانى هبقى اقولكم اكيد

    وف الاخر طبيعى انكم تعجبوا بقصة وقصة لأ... بس اى قصة بتكون وجهه نظر الكاتب ودى وجهه نظرى اللى قدمتها ف القصة دى
    وانتظروااااااا "لسه بحب" يوم السبت ان شاءالله

    ردحذف
    الردود
    1. بصي هيا القصه حلوه لكن الالفاظ فيها اتعدت الحدود معلش انا اسفه ولكن ده رايي

      حذف
  39. هستنى قصتك الجديدة اكيد
    اسمها جميل اوى

    ردحذف
  40. فى احتمال وجود جزء تانى؟؟؟؟؟؟؟؟؟؟

    ردحذف
  41. جميلة والله يا استاذة بس هو ده العادى بتاعك اللى بقيت اتاكد منه كل لما اقرالك حاجة

    ردحذف
  42. القصة جميلة جدا بس الصراحة النهاية مش حلوة

    ردحذف
  43. معجبتنيش النهايه خالص بصراحة ,, بس عادى انت فنانةوممكن تتعرضي انك متلقيش نهايه حلوه :)

    ردحذف
  44. انا توقعت اسلام يتجوز نسمه وسمير وسعاد يرجعوا لبعض
    حاسه النهايه ناقصه جمع شمل العيله

    ردحذف
  45. اقصد بلال ونسمه

    ردحذف
  46. gamela awiiiiiiiiiiiiiiiiiii bs kan nefcy fe 7l2a twd7 7yat mslan nadya w y7ya b3d el 5lfa... rami w nwal b3ed 3n 7matha w 7yat nesma tt2fl mslan enha bt7b 7d =)

    ردحذف
  47. حلووووووووووه تسلم ايدك بجد انتي رائعه جزن وربنا يوفقك

    ردحذف
  48. حلوه جدا جدا جدا بجد بجد دي اكتر قصه تعبتني من الانفعالات والمشاعر الصادقه جدا اللي فيها
    بجد ربنا يوفقك دايما يا رب

    ردحذف
  49. قصة اكثر من رائعة يا دينا

    ردحذف
  50. ♥بجد روووووووووووووووووعه وتحفه يعنى ♥

    ردحذف
  51. الصراحه قصه روعه وتسلم ايدك عليها بجد كتاباتك بتشدني لدرجه اني خلصت القصه وانا قاعد ال 30 حلقه ومانمتش غير لما خلصتها تسلم ايدك ومستنين منك كل جديد بس ليا بعض الاراء احب انك تسمعيها يمكن تفيد
    1-حكايه ان النهايه مفتوحه ديه في الشعب المصري مش متعود عليها هو دايما اتعود من سنين على البطل مع البطله فده شبيء طبيعي ان الناس ماتفهمش ده لسه بس كان يفضل النهايه السعيده لان الانسان اللي بيقرا القصه بيتخيل انه بيعيش جواها لدرجه انها بتاخد حيذ في تفكيره لمده كام يوم عقبال ما ينساها فالنهايه الحزينه مؤثره نفسيا شويه

    2- بالنسبه لبلال هو ما اتعاقبش لانه للاسف بمنتهى السهوله اتجوز وطلق وهو راجل واحنا في مجتمع شرقي لا يشوب الرجل فيه شبيء بلال هنا بمثابه مغتصب الضحيه ومجبر انه يتجوزها عشان بنت خاله فقط وده مش عقاب لنه هيكمل حياته انما نسمه هي الضحيه للاسف بالنسبه لمجتمعنا يعتبر حياتها شبه انتهت الا لو عن طريق الصدفه وده ما يمنعش انها غلطانه

    3-موضوع ام رامي حكايه حلوه الوحده اللي كسرت نفسها وخصوصا ضرتها

    4-بالنسبه لرامي انه ياخد موقف ده كان لازم حتى لو بالتغير كنت بقترح هنا دخول موقف او موقفين يقدرو يغيروه خصوصا انه ابوت عمل حادثه بسبب تصرفات امه الصيبيانيه وكمان مراته وبيته اتفشكل كل ده كفيل انه يتغير وياخد قرار كمان المشكله انه ابن امه بالمنظر ده صعب فجاه كدا يعيش لوحده من غيرها وكمان القاريئ هيقول ازاي لانه ابن امه يعني ماهلوش قرار فهيبقى بقى بتاع مراته وشخصيته ضعيفه مع اولاده فكان لازمله موقف مهما ان يكن


    5- موضوع سمير وسعاد كان هيطغى على القصه فرحه لكثير من القراء خصوصا لو كانت سعاد دخلت حياه سمير من تاني بعد ما استشعر سمير كل الفتره اللي فاتت انه ما قدرش يخلي البنات ينسو امهم وكمان اكتشف انه محتجلها دلوقتي اكبر من اي وقت لانهم بنات وما تفهمهش غير امهم ولما حصلت المشاكل كلها في يوم كان لازم ست قريبه منهم اكتر من عمتهم تحل المشكله عشان كدا كان ديه فرصه حلوه اوي ان سعاد ترجع وتصلح بيتها وكمان يلاقي ابنها من اسامه ابت يربي ويحسسه انه ابنه

    6-رجوع نوال لرامي رجوع منطقي لا يشوبه الكلام في اي شيء
    اما حكايه جزء تاني يمكن ماتكونش ليها لازمه اوي بس لو حصل يمكن بقى انهم عاشو حياه ونسمه تتجوز وتخلف زي اخواتها وتبتدي هنا توريث الافكار اللي اتعلموها في حياتهم لاولادهم ده من وجهه نظري اقصى حد ممكن نحطه لو فكرناان ليها جزء تالت وشكرا لاستماعك الاراء وفي انتظار كل جديد

    ردحذف
  52. بصراحه كل اللى فى القصة عرفوا يرجعوا حياتهم و سعادتهم مرة تانى و محدش طلع من الموضوع ده كله خسران غير نسمة ياعينى اتخدعت فى اللى حبته و اتجرحت و بقت مطلقه يعنى هى الوحيده اللى خسرت كتيرررررررر

    ردحذف
  53. صحيح نسيت اقول حاجه ان كان ممكن القصه تنتهي برجوع بلال لنسمه لابسط الاسباب وهي ان خطيبته اكيد مش هتبقى طايقه الحياه بالمنظر ده مع واحد كان متجوز ومطلق وغير كدا اهله مش هيوافقه خصوصا بعد اثبات انه مطلق بعد جوزاه باقل من شهر وده لوحده سبب يا اما يطلعه في بنت خاله وده حد ذاته عيب في اهله ويا اما يطلع فيه هو وده برده عيب فيه وفي كلا الحالتين المفروض ما تصلحش الجوازه بكده كان يقدر بلال يرضى بقسمته وقدره وان الخيره فيما اختاره الله

    ردحذف
  54. هي جميله بس فيها تعديات للحدود شويه معلش انا بقول رايي بصراحه

    ردحذف
  55. حلوة جدا..مع انى عيطت كتير

    ردحذف
  56. بجد روعه وكل قصصك جميله زيك كل يوم اقرا قصه واتنين ومش بشبع ربنا يوفقك يارب ودايما يكون فيه جديد

    ردحذف
  57. كنت متوقعة نهاية غير كدة خااالص

    ردحذف
  58. رائع يا دينا جميل

    ردحذف
  59. جميله كالعاده ومنطقيه جدا و واقعيه ربنا يوفقك يا دينا ودائما إلى الامام

    ردحذف
  60. جميلة اوى يا دينا وخاصة انها انتهت نهاية سعيدة وواقعية

    ردحذف
  61. بصي انا عارف ان القصة منشورة من زمان بس انا قرأتها ولقيت انها جميلة جدا وأتمني انك تردي
    عليا ومن نجاح الي نجاح

    ردحذف

قول رأيك بلاش تقرا وتقفل من سكات...ارائكم تهمنى