الأربعاء، 17 أكتوبر 2012

لسه بحب... الحلقة 9

الحلقة 9
بعد اسبوع... دخلت لها مامتها
"قومى علشان تتغدى"
"مش عايزة"
"طيب انتى حرة ... بس حضرى نفسك واجهزى"
"احضر نفسى لإيه؟؟"
"قدامنا 10 ايام وهنسافر"
"هتسافروا بسرعة كده"
"هنسافر كلنا يااميرة"
"كلنا؟؟"
"اه طبعا... انتى هتقعدى تعملى ايه"
"انا هقعد هنا زى ماانا"
"ليه ... علشان تعملى اللى على مزاجك "
وحست اميرة باهانة من مامتها
"انا ياماما تقوليلى كده"
حست منى بألم الكلمة...قعدت جنبها
"مقصدش حاجة وحشة... اقصد انك هنا هترجعى تكلمى محمد تانى وده موضوع اتقفل وخلاص وهيبقى تعب ليكى مش اكتر"
"اتقفل ليه بس ياماما"
"احنا هنعيده تانى يا اميرة... خلاص قلنا مينفعش وماما اتكلمت معاه وهو وعدها انه مش هيحاول يكلمك وان الموضوع انتهى"
عيطت اميرة لما عرفت ان الموضوع انتهى بالنسبة لمحمد
قامت منى
"خلاص يااميرة هتسحبى ورقك وتظبطى نفسك علشان انتى عارفة ان مش مضمون ننزل اجازة كل سنة"
خرجت منى من الاوضة وسابت اميرة وراها محبطة حزينة

محمد من يوم ما مشى من بيت اهل اميرة واحساسه بالاهانة مسيطر عليه... وكل ما يفكر ف حبه لاميرة ويحن انه يكلمها يفتكر كلام خيرية ان الموضوع منتهى وكل شئ نصيب
اللى زاد من همه وحزنه ان اجازة الصيف وقت فراغه كبير
بيروح المدرسة ساعتين تلاتة الصبح وباقى اليوم فى البيت لوحده او بيقعد على اى قهوة شوية يتفرج على وشوش الناس
ويفكر ياترى ده بيحب زيي... ده اتجوز اللى بيحبها... دى اهلها رفضوا اللى بتحبه
هواية متابعة وشوش الناس فى الشارع وتخيل حكاياتهم بقت تسليته
هى وقراية الجرايد كلها...الاخبار اللى تهمه واللى متهموش
وف يوم وهو بيقرا فى جريدة من الجرايد
شاف ف الاعلانات المبوبة...اعلان لمجموعة شركات بتطلب موظفين كتير ومؤهلات مختلفة بمرتبات كبيرة
ومن باب التجربة...شاف الشروط ولقاها تنطبق عليه
وبعد اسبوعين من زيارته لبيت اميرة
راح قدم فى الخشاب جروب
وهو خارج من مبنى المجموعة...رن موبايله

اميرة استسلمت لكلام مامتها...بعد ما حست ان محمد استسلم قبلها
بس حبها ليه مكنش بايدها انها تنساه
وقبل السفر ب3 ايام كانت بتسحب ورقها من الجامعة
وده كان اول يوم تنزل فيه من البيت من يوم زيارة محمد
نفسها تشوفه قبل ما تسافر... ماسكة الموبايل ومترددة تكلمه ولا لأ
وبعد تردد طويل...اتصلت بيه


محمد وهو خارج من الشركة شاف رقم اميرة...رد بسرعة
"الو... ازيك يااميرة"
"ازيك يامحمد... عامل ايه"
وكان هيقولها انه تعبان اوى ف البعد عنها... وافتكر اللى حصل كله...رد بسرعة
"كويس ...انتى عاملة ايه"
وردا على كلامه...قالت زى ماقال
"كويسة الحمدلله"
سكتت... وسكت
صمت تقيل عليهم هما الاتنين...قطعته اميرة
"انا بكلمك اسلم عليك قبل مااسافر"
"انتى مسافرة؟؟"
"ايوه كمان 3 ايام"
"وهترجعى امتى"
"الله اعلم"
"هينفع اشوفك قبل ماتسافرى"
وفرحت اميرة من طلب محمد انه يشوفها ردت بسرعة
"اه طبعا"
"انتى فين دلوقتى"
"انا عند الجامعة...اجيلك فين؟"
"لا متجيش انتى انا اللى هجيلك ...استنينى"
"حاضر"
قفلت معاه وهى فرحانة انها هتشوفه

اميرة قاعدة ف العربية... شافت محمد من بعيد بيدور عليها
راحت قريب منه ووقفت قدامه
"محمد...تعالى"
"لا ...اركنى وانزلى نقعد فى اى حتة قريبة"
استغربت انه رفض يركب معاها...استسلمت لان مكنش فيه وقت للتفكير ولا التفسير
ركنت ونزلت من العربية
مشيوا جنب بعض ساكتين... وعند مطعم
"تعالى نقعد هنا"
دخل وهى معاه
قعدوا قصاد بعض...هى بتبص له وهو بيبص بعيد عنها
"وحشتنى"
بص لها... بصة طويلة
"وانتى كمان وحشتينى اوى"
"ياااااه يامحمد...كل ده علشان تقولى وانتى كمان...للدرجة دى بعدنا عن بعض"
"ايوه بعدنا عن بعض يااميرة ودى الحقيقة"
"يعنى خلاص مبقتش تحبنى"
صوتها المخنوق ودموعها المكتومة...وجعت قلب محمد الموجوع وبيحاول يدارى وجعه
"معقول هنسى حبك بالسهولة دى"
"طب ليه استسلمت بالسهولة دى"
"هه ... استسلمت؟؟؟ انتى مش سمعتى كل اللى باباكى قاله... انا كنت ساكت ساكت بس مقدرتش اتحمل الاهانة"
"انت حتى محاولتش تانى ...انا كل يوم بتكلم معاهم بس لوحدى"
"والنتيجة ايه... فيه نتيجة علشان تقوليلى احاول تانى"
سكتت اميرة وحطت وشها ف الارض
"اوعى تكونى فاكرة اللى انا فيه ده سهل... بالعكس انتى كنتى كل املى ف الدنيا وخلاص مبقتيش موجودة... هتسافرى وهتبعدى عنى وهتسيبينى لوحدى اتعذب"
"لوحدك تتعذب...وانا يعنى هبقى فرحانة"
"انتى هتنسينى يا اميرة... هتغيرى المكان وتبقى وسط عيلتك ربنا يخليهوملك ومع الوقت هيجيلك عريس مناسب ليكى"
"انا..لا يمكن..."
"اسمعينى ومتقاطعينيش... انا بقولك الحقيقة واللى هيحصل ...هتنسينى مع الوقت انما انا مش عارف هكمل حياتى ازاى... الايام اللى فاتت كانت كلها عذاب...عايش فراغ قاتلنى كل لحظة بفتكرك والاقى ان ال4 سنين اللى فاتوا دول كانوا وهم"
اميرة بتعيط وهى شايفة دموعه اللى حابسها ف عينه علشان يحافظ على صورته وكرامته قدامها... بس هى حاسة بيه
"متقولش وهم... انا بحبك"
"حبنا مكنش وهم...انما الحياة اللى رسمناها والامل اللى كنا حاطينه طلع وهم..كلها اوهام يااميرة وادينا فوقنا منها"
"يعنى مفيش حل خلاص... هتسيبنى"
"انا مسيبتكيش ولاخر وقت انا متمسك بيكى... انا اترفضت واتجرحت ولو كان لسه فيه امل كنت جيت على كرامتى وحاولت تانى ...انما اى محاولة هتبقى اهدار لكرامتى اكتر واكتر"
"يا خسارة "
بص لها وهى بتعيط... دور وشه بعيد عنها وهو بيقول لنفسه
"هتسافرى وتاخدى روحى معاكى"
الاتنين ساكتين... محدش فيهم قادر ينهى المقابلة
لحد ما رن تليفون اميرة... بصت ف  الموبايل
"دى ماما"
"اكيد هتقولك اتأخرتى ليه... ردى عليها ويالا يااميرة"
ردت اميرة ف الوقت اللى محمد بيدفع فيه الحساب ورجع لها
مد ايده يسلم عليها... سلمت عليه
"اشوف وشك بخير"
"فيه امل نتقابل تانى يامحمد"
"مسير الحى يتلاقى...واكيد لما هتيجى اجازة عند طنط خيرية هشوفك حتى لو من بعيد"
"ان شاءالله... تعالى اوصلك"
"لا شكرا... طريقنا مبقاش واحد... مع السلامة"

سافرت اميرة... وعاشت ايام صعبة ف بعدها عن محمد
وخصوصا ان مبقاش بينهم حتى الكلام
بعد فترة بسيطة اشتغلت فى شركة كبيرة
وعلاقتها بانجى كانت مقتصرة على مكالمات او مسدجات لانشغال كل واحدة فيهم بعد ما اشتغلت انجى فى امريكا

محمد بعد شهرين من تقديمه فى الخشاب جروب
اتصلوا بيه وحددوا معاه انترفيو...واتقبل واستلم الشغل
وبعدها قدم على دراسات فى المحاسبة جنب الشغل
علشان ميبقاش عنده وقت فراغ خالص لمحاولة نسيان اميرة
ولان الشركة كانت بعيدة جدا عن البيت... باع الشقة واخد شقة ايجار جديد قريبة من الشركة واشترى عربية تسهل له انتقالاته
وكان قرار بيع الشقة اللى مش عايز يعترف بيه انه مبقاش قادر يهرب من ذكرياته فيها
كل جزء جوه الشقة بيفكره بمامته
البلكونة والسلم والشارع وكل حتة بتفكره بأميرة
كان بيقنع نفسه انه اقوى من الظروف... وبيحاول يكون اقوى فعلا

فاتت سنتين
اميرة استأذنت باباها ومامتها انها تروح اسبوعين امريكا لانجى
منها تغيير جو... ومنها تشوف انجى اللى مشافتهاش بقالها سنين
وافقوا... بشرط
انها تفكر جديا ف العريس اللى متقدم لها
وسافرت اميرة وقعدت مع انجى... اتفسحوا كتير وعملوا شوبنج كتير وقبل ماترجع اميرة الكويت بيومين
"ها يا ايمى...قررتى ايه ف موضوع العريس ده"
"عارفة يا جيجى مش قادرة انسى محمد ابدا...مع انى من اخر مرة شفته فيها معرفش عنه حاجة...كام مرة سألت خوخة عليه بس الاقيها تقولى بتسألى ليه فبسكت خالص... لو كان بس مدينى امل كنت استنيته"
"وهو هيديكى امل ازاى وانتى باباكى ومامتك رافضين خالص"
"معاكى حق"
"العريس الجديد بقى هما رأيهم ايه فيه"
"هههه طايرين من الفرحة طبعا...دبلوماسى ابن دبلوماسى مستوى عالى اعلى مننا كمان ...وسيم جدا وحواليه بنات كتير يتمنوا منه نظرة وهو بقاله 6 شهور بيكلم بابا ومامته بتكلم ماما"
"واضح من كلامك انك بتشاورى عقلك"
"منكرش انه مبهر والزن اللى عليا كمان مخلينى افكر"
"خلاص ياايمى... مبروك"
سكتت اميرة وهى مش عارفة هى فرحانة ولا لأ
"انتوا مش هتنزلوا مصر اجازة قريب"
"مش عارفة... انتوا راجعين امتى"
"هنرجع الشهر الجاى ...اخيراااا هنرجع مصر نهائى"
وغنت اميرة وهى بتضحك
"سلموووووووولى على مصر سلمووووووولى... سلمولى ع الحبايب وابعتولى
امانه لما تفوتوا من جنب الحسين تجيبوا لي شويه من اللولي اللي على الصفين خان الخليلي على يمينكم هداياه واحشاني تبقوا تجيبوا لي توت عنخ المنقوش في صواني
سلموا لي على الكباري والسما والبدر طالع .. والهوا ساعة العصاري سلموا لي على الحبايب .. اللي فاكر واللي ناسي وان لقيتوا حد غايب .. ابعتوا له مية تماسي رشوا دموعي وضحكتي .. واجمل سلامي على كل حته شاركتني اسعد ايامي "
وكررت كذا مرة ورا بعض ببطء
" سلموا لي على الحبايب .. اللي فاكر واللي ناسي وان لقيتوا حد غايب .. ابعتوا له مية تماسي رشوا دموعي وضحكتي .. واجمل سلامي على كل حته شاركتني اسعد ايامي"
عيطت وهى بتقولها وهى بتفتكر محمد وسهراتهم مع بعض
ومقابلاتهم... عند مدرسته وعند جامعتها
حضنتها انجى وهى متأثرة بدموعها وحنينها لمصر ولمحمد

هناك 21 تعليقًا:

  1. جميله اوووووووووووووووى ويارب ترفض العريس وترجع لمحمد

    ردحذف
  2. تحفه وطبعا لما انجي هتنزل مصر هتعرف محمد و هتحبه

    ردحذف
  3. تحففففففففه

    ردحذف
  4. آخر حتة دى اللى قصرت فيا من قبل مااقرأ جملتك وانتى بتقولى عيطت وانا عيط عشان عارفة ان مقطع الاغنية دى هيأثر فيها .........القصة جميلة يا دينا مستنية الحلقة الجاية من دلوقتى :):

    نورى

    ردحذف
  5. يلهووووووووووى على العياط يا جودعااااااااااان انا عياط كتيرررررررر اوى

    دنيتى الاهلى

    ردحذف
  6. حلوة اووووووووووووووووووي

    انا عيطت في الحتة بتاعت فراقها هيا ومحمد

    فكرتني بفراقي بأعز أنسان علي قلبي

    وجعتيني اوووووووووووووووي يا دينا في الحلقة دي

    ردحذف
  7. هو الواضح من تسلسل الاحداث ان جيجي شكلها كده هتتعرف على محمد من غير ما تعرف انه هو حبيب اميرة وهيبقى بينهم قصة حب بس ايه بقى اللى هيحصل ؟؟؟؟؟؟
    هنشوف
    شكرا يا قمر على الحلقة الجميلة دى

    ddy dody

    ردحذف
  8. حلوهم مووووووووووووووووووووووووت

    ردحذف
  9. صعبة قوووووووي بجد ..

    ردحذف
  10. ياربى على وجع القلب وربنا جسمى قشعر ومش قادره من العياط يارب متجعلش نهاية كل حب كده ابدآ تسلم ايدك يادينا على الحلقه الجميله اللى صحت مواجع كتير جوانا

    ردحذف
  11. حلوة بص قصيرة اوى

    ردحذف
  12. رووووووووووووووووووعة بجد يا دينا انتىفظيعة والله
    واكيد هيا لما تنزل مصر هتتعرف ع محمد وتحبو :(


    amira alama

    ردحذف
  13. حلوه اوى الحلقه بجد ايه الجمال ده

    ردحذف
  14. مش عارف انا حاسه ليه ان جيجى هتحب محمد من غير ما تعرف ان ده محمد بتاع اميره ومحمد هيميل حبه لجيجى وهيخطبها ولما اميره تنزل مصر تحضر الخطوبه هتتفاجى بانه محمد ومش هتقول لجيجى ومع الوقت هتعرف جيجى وهتتنازل وتفسخ الخطوبه زى-زكرى ساره-وطبعا محمد حالته الماديه هتبقى كويسه ويتقدم لاميره واهلها يقبلوه

    ردحذف
  15. حلوة اوى اوى اوى
    بجد جميلة

    ردحذف
  16. دنا حرام عليكى انتى بتحكى قصتى تقريبا بجد خلتينى اعيط وافتكر الايام دى تانى

    ردحذف
  17. كده تعيطينى وانا عندى امتحان ومحتاجه ان يبقى مودى حلو بججد تحفففففففففففففه وجيتى على الجرح يا داندوشا

    ردحذف
  18. انا اعتقد بما ان انجي راجعة مصر
    فهي ممكن تشوف محمد وتحبه
    لانها ما تعرفوش قبل كده
    بس لوحبيته انا هزعل اوي

    ردحذف
  19. انا حاسه ان انجى ومحمد هيتقابلوا ويحصل حب :(

    ردحذف
  20. رووووووووووووووووووعه بجد

    ردحذف
  21. اه العياط ده احنا ناقصين حزن ارحمونا بقى انا مقرتلكيش حاجة عدلة غير تحت سقف واحد بس:-)

    ردحذف

قول رأيك بلاش تقرا وتقفل من سكات...ارائكم تهمنى