الخميس، 1 نوفمبر، 2012

لسه بحب... الحلقة 19

الحلقة 19
فاتت الايام واميرة بتتجنب تشوف محمد رغم الحاح انجى انها تخرج معاهم
محمد بيخترع الحجج انه يقول لانجى تعزم اميرة معاهم
انجى ف الشغل مع محمد وبعد الشغل مع اميرة

يوم السبت ... اللى هتستلم فيه اميرة الشغل
محمد راح بدرى وقعد يستناها
لما وصلت شافها رايحة على مكتب انجى
راح لهم
محمد"صباح الخير... ازيك يااميرة"
اميرة بترد وهى بتتجنب تبص له
"الحمدلله"
محمد"عندى ليكى مفاجأة يا انجى"
انجى بفرحة"ايه"
محمد"اترقيتى"
انجى بتبص له باستغراب
"اترقيت ازاى؟؟"
محمد"انا عارف من يوم الخميس ... انتى هتطلعى مكتب ممدوح بيه واميرة هتستلم مكانك ... بس لما تعلميها الشغل الاول يوم ولا اتنين واطلعى استلمى فوق"
اميرة بصت باستغراب لمحمد... بصت لانجى
انجى"غريبة يعنى... وهو ممدوح بيه مكتبه محتاج حد"
محمد"مش عارف ... بس انا قلتله انك لما جيتى كان المفروض يشوف لك مكان احسن من هنا ومن ساعتها ومفيش كلام ولا حاجة فلما عرفت ان واحدة من فوق مشيت قلتله وفكرته بوعده"
انجى"بس ليه كده يامحمد... انا كنت مبسوطة هنا"
محمد بزعل وهو خارج من المكتب
"خلاص انتى حرة... خليكى وانا لما ييجى هطلع اقوله انك مش عايزة الترقية دى"
مشى محمد...انجى بتبص لاميرة واميرة حاطة وشها ف الارض
انجى"هروح اشوف ماله"

محمد قعد على مكتبه وهو بيرزع ف الكرسى
دخلت وراه انجى
"ايه ياحبيبى مالك"
"خلاص يا انجى... انا عايزلك الاحسن وانتى بتحرجينى"
"بالراحة بس انت بقيت بتتنرفز بسرعة كده ليه"
"انتى عصبتينى...يعنى لما تبقى ف سكرتارية رئيس مجلس ادارة الخشاب جروب ولا تبقى ف الحسابات"
"انا ميهمنيش غير انى ابقى جنبك"
"انجى احنا هنا ف شغل ومينفعش الخلط ده"
"مالك يا محمد"
وخاف محمد ان انجى تحس بحاجة... خوفه على زعل اميرة اكتر من خوفه من انجى
"مفيش يا انجى... انتى عايزة تتطلعى السكرتارية ولا لأ"
"هروح علشان انت اتكلمت خلاص"
"لو مش عايزة انتى حرة"
"لا عادى مفيش مشكلة"
"طيب يالا وعلمى اميرة الشغل علشان تطلعى تستلمى فوق"
"حاضر"

خلال اليوم محمد مراحش مكتب انجى خالص هى اللى كل شوية تجيله
مع معاد انتهاء الشغل...نزلوا ال3 مع بعض
راحوا عند عربياتهم
انجى"ايمى خدى عربيتى روحى بيها وانا هروح مع محمد"
محمد كانه بينفى تهمة
"تروحى معايا فين"
انجى"مش هتيجى تسلم على بابا وتحدد معاه معاد الخطوبة"
محمد"دلوقتى واحنا لسه خارجين من الشغل؟؟"
انجى"ايوه نتغدا وبعدين نروح له"
اميرة"هاتى المفتاح يا جيجى"
محمد"لالا انا مش رايح ف حتة النهاردة...روحوا انتوا مع بعض"
انجى"ليه وراك ايه"
محمد"مفيش حاجة...تعبان وعايز اروح انام"
وسألته اميرة بقلق
"تعبان مالك؟"
رد بكل اهتمام علشان يطمنها
"مرهق بس ومحتاج انام"
انجى بان عليها انها اتضايقت من محمد
"يالا يا ايمى"

تانى يوم...الضهر ف المكتب
دخلت انجى على محمد
"مى اتصلت بيا وبتقولى ممدوح بيه عايزنى اطلع استلم النهاردة"
"طيب"
"انا عرفت اميرة حاجات كتير ولو احتاجت حاجة خليك معاها"
"متقلقيش"
"نمت كويس امبارح"
"اه الحمدلله"
"بابا سأل عليك"
"هبقى اقولك اروح اسلم عليه امتى"
"والخطوبة؟؟"
"استنى عليا شوية يا انجى"
"استنى !!!"
"اه ...شوية "
"بابا قاعد شهر بس"
"بس انا مش جاهز لشبكة دلوقتى"
"انت مقلتش كده...بس حتى لو مش جاهز ماما وبابا مش هيدققوا ف ماديات"
"يعنى مجبلكيش شبكة... انا مرضهاش"
"ماشى يا محمد... براحتك"
قامت انجى... وطلعت تستلم شغلها الجديد
قعد محمد شوية... وقام راح لاميرة
                      *****************
دخل محمد مكتب اميرة... وقفل الباب
"بتقفل الباب ليه"
"علشان اتكلم معاكى"
"محمد افتح الباب ومفيش كلام بيننا يتقال"
مسمعش كلامها وراح قعد على الكرسى قدامها
قامت من مكانها راحت تفتح الباب
شدها من ايدها قعدها قدامه...قعدت
"مش هينفع كده... انا مش قادر اكدب على انجى"
"تكدب عليها ليه... انت خطبتها بارادتك ولازم تكمل معاها"
"مين قال لازم... احنا لا هنكون اول ولا اخر 2 يسيبوا بعض"
"لو انا مش بينكم مكنش ليا دعوة...تكملوا مع بعض او لأ... انما انا مينفعش اسرق فرحتها...مقدرش يامحمد"
"يعنى نتعذب كلنا... انا مبحبهاش"
"لو مكنتش ظهرت ف حياتك كنت هتعمل ايه؟؟"
سكت محمد... كملت اميرة
"كنت هتتجوزها ومع الوقت تحبها...متخلينيش اكره نفسى انى جيت فرقتكم"
"انتى حاسة باللى بتقوليه... مصدقة يعنى اننا بعد ما اتقابلنا هقدر اكمل مع انجى وانتى تبعدى... بتضحكى على نفسك يا اميرة ... لاانتى هتقدرى ولا انا هقدر"
اتفتح باب المكتب فجأة... انجى ع الباب
بصت لهم وهما قاعدين قصاد بعض على الكراسى اللى قدام المكتب
"تعالى يا جيجى... محمد كان لسه بيكلمنى عنك"
وباستغراب وتساؤل
"عنى؟؟"
محمد اتضايق ان اميرة بتبرر لانجى ... او بتدبسه اكتر
"انا رايح مكتبى"
عدى من جنب انجى من غير ما يكلمها
اميرة حست انها ف موقف صعب مش عارفة تتكلم ولا تقول ايه
"هو ماله"
اميرة بتحاول تفكر ف مبرر انه يكون موجود معاها ف المكتب وقافل الباب
"مفيش يا جيجى... هو كان حاسس انه نقلك وانك متضايقة فبيتكلم معايا ويسألنى ان كنتى صحيح متضايقة ولا لأ"
"محمد متغير اوى اليومين دول معرفش ليه"
اميرة بتضحك علشان تخفف التوتر اللى فيه
"هيكون ليه يعنى...يمكن علشان اخدتك منه شوية"
"كنت هنسى انا نازلة لكم ليه... بابا عامل حفلة بكرة بالليل ... اعملى حسابك تيجى معايا"
"بلاش يا جيجى... روحى انتى ومحمد اكيد باباكى عايز يقعد معاه"
"يا بنتى الحفلة دى لاصحابه ومعارفه... يعنى مش عائلية بس... وماما جاية معايا... وانتى هتيجى اكيد... هنروح للكوافير بكرة مع بعض ونروح ع الحفلة ...اتفقنا"
"والشغل... خلينى انا علشان انام بدرى"
"ما كلنا عندنا اشغال... هنخلص الشغل ونروح نغير ونطلع ع الكوافير... انا رايحة اقول لمحمد"
خرجت انجى من مكتب اميرة قبل ما اميرة تعترض

اميرة وانجى... راحوا الحفلة
دخلت انجى على الريسيبشن وكان باباها قاعد مع واحد صاحبه
"مساء الخير"
"اهلا اهلا بالقمرات... ازيك يا جيجى ...ازيك ياايمى"
اميرة" ازيك يا انكل ...حمدالله ع السلامة"
عبدالله"الله يسلمك... اتغيرتى كتير عن اخر مرة شفتك فيها لما جيتى امريكا"
اميرة بتضحك"الايام بتغيرنا"
عبدالله" للاحلى طبعا...ربنا يحميكى"
انجى"احم احم...نحن هنا"
عبدالله"حبيبة بابا مش محتاجة كلام طبعا"
انجى"ميرسى يا حبيبى"
عبدالله"مامتك جاية ولا لأ"
انجى"كلمتها وقالت شوية وجاية... ومحمد كمان زمانه جاى"
                          *******************
جنينة الفيلا مليانة ناس
وترابيزات واضواء وdj
انجى واقفة جنب محمد طول الوقت
محمد عينه وقلبه مع اميرة اللى بتحاول تكون بعيدة شوية
نجوى تعرف ناس من المعازيم...بترحب بيهم
عبدالله بيستقبل ضيوفه وبيقعد معاهم
بعد البوفيه ...جت نجوى عند انجى...مالت عليها
"انجى تعالى معايا"
"مالك ياماما"
"باباكى عايزنا انا وانتى فوق"
"ليه"
"مش عارفة...تعالى لما نشوف"
بصت انجى لمحمد
"محمد ...هروح اشوف بابا واجيلك"
"خدى راحتك انا شفت ناس معرفة هسلم عليهم"
"بجد ...مين"
"معرفة عادية يعنى...روحى انتى"
مشيت انجى وراحت مع نجوى
محمد دور بعينيه بسرعة على اميرة... شافها واقفة مع واحدة ف سنها... لما اتأكد ان انجى دخلت الفيلا...راح لاميرة ونادى عليها
استأذنت اميرة من اللى كانت واقفة معاها
"ما صدقت انجى سابتنى علشان اجيلك واقولك وحشتينى"
حست اميرة بفرحة ف قلبها... تناستها بسرعة
"محمد... ارجوك متحرجنيش اكتر من كده"
"احرجك ليه"
"انجى امبارح سألتنى كنت بنتكلم ف ايه... بقيت مش عارفة اقولها ايه اخترعت اى كلام وخلاص"
"بذمتك مش بوحشك زى ما بتوحشينى"
"محمممد.... قلبى مش مستحمل"
"سلامة قلبك يا حبيبتى"
بصت اميرة حواليها
"انا هروح اقف اقعد ...بلاش نفضل واقفين كده مع بعض"
شدها من ايدها وقفها... بصت اميرة على ايده... ساب ايدها
"بيتنا القديم وحشنى اوى...عارفة ليه"
"ليه"
"علشان سهراتنا الحلوة بتاعة كل يوم... فاكرة الكحة لما طنط خيرية كانت فاكرانى تعبان"
ضحكت اميرة وهى بتفتكر احلى ايام
"وفاكر لما دخلت البلكونة بتتنطط برجل واحدة"
ضحك محمد وضحكت اميرة
"اعمل ايه... مجرد ما سمعت صوتك قمت اجرى الحقك... اتخبطت"
اميرة بتضحك من قلبها
"ياااه يا اميرة... بحب ضحكتك...وبحبك اووووى"
قالها محمد... وسرحت اميرة مع كلمته وهما الاتنين بيبصوا لبعض

انجى كانت جاية...سمعت اخر كلمة
"بحبك اوى"
هما الاتنين كانوا بيبصوا لبعض...ومش حاسين بأى حاجة حواليهم
حتى انجى محسوش بيها.... انسحبت انجى بسرعة قبل ما يشوفوها

انجى فى اوضة فوق...ومعاها نجوى...منهارة من العياط
"مش مصدقة يا ماما... اميرة ومحمد بيخونونى... لحق يحبها ف الكام يوم دول... علشان كده اول ما جت وهو اتغير معايا... معقول ياماما ... اميرة تخوننى وتاخد منى حبيبى"
نجوى بتحاول تهديها
"مش معقول يا انجى...اكيد فيه حاجة غلط"
"مفيش غلط...سمعته بودانى وشفتهم بعينيا... كذا موقف ومكنتش فاهمة ايه اللى بيحصل... علشان كده صمم انه ينقلنى بعيد ويقربها هى"
"اسأليه واعرفى ليه اتغير معاكى كده"
"لأ ياماما... زى ماهى خانتنى وعايزة تاخده منى... انا بقى مش هستسلم واسيبهولها كده"
"هتعملى ايه"
انجى وهى بتعيط
"مش عارفة... بس مش معقول خطيبى اللى بحبه وبيحبنى اسيبه يروح منى علشان واحدة لسه شايفها من اسبوع"

هناك 26 تعليقًا:

  1. واو! بجد راااااااااااااااائعة
    مستنية الحلقة الاخيرة

    ردحذف
  2. كملى بليييييييييييييييز

    ردحذف
  3. انجى دى غبية اوى ماتقعد تربط الاحداث

    ردحذف
  4. تحفه اوووووووووووووووووي
    بجد تسلم ايدك

    ردحذف
  5. الحلقة الاخيرة هتنزل امتى ؟؟؟؟؟؟؟؟؟؟؟؟؟؟؟؟

    ردحذف
  6. gamdaaaaaaaaaaaaaaaaaaaaaaaaaaaaaa
    beboo

    ردحذف
  7. اوباااااااااااااااا بجد حاجة فظيعة وموقف لا يتحسد علية الصراحة
    تسلم ايدك يا دودو

    amira slama

    ردحذف
  8. فى ثوانى نسيت الصداقة كدة حاجة مش مصدقاها شوية بس القصة حلوة جدااااااااااا

    ردحذف
  9. بجد القصة رائعة جدا
    واسلوبك في الكتابة جميييييييييييل
    بس الحلقة الاخيرة هتنزل امتى

    ردحذف
  10. ياااااااا ربى هى انجى غبية للدرجة دى كان المفروض تفهم من اول مرة شافوا بعض فيها اكيد بان عليهم لكن دى لحد دلوقتى بتقول انهم بيخونوها
    بجد هتبقى شخصية حقيرة لو فرقت بينهم بس اكيد محمد هيفهمها لما يحس انه مش قادر يكمل معاها
    بس مش عارفة ليه حاسة ان الاحداث اللى جاية كتيرة شوية على اخر حلقة
    متهيألي هتبقى حلقة طويلة او تكون على حلقتين زى قصة كان حلم
    سواء كده او كده مستنيين بفاااااااااارغ الصبر


    ddy dody

    ردحذف
  11. أيوه بقى ع غيرة البنات بقى هوا دا . استمري

    ردحذف
  12. ايه ده دا الموقف اتقلب خاااااااااااالص بس انجى غلطانةلانها ماكنتش حيادية فى حكمها وغلطت اميرة بس مع ان اميرة كانت مستعدة تضحى بحبها عشان متخسرش صديقة عمرها
    اية


    ردحذف
  13. جااااااااااامده اوووووووى يادودو يلا نزلى الحلقه اللى بعدها بقى نفسى اعرف هيحصل ايه هستنى يومين كتييييييير :(

    ردحذف
  14. موهووووووووووووووووبه

    ردحذف
  15. جاااااااااااااااامد حلو اووى الحلقة
    ربنا يستر وانجى وايمى ميخسروش بعض
    مستنينك :)


    MENNA

    ردحذف
  16. ana 3yzaa 7al2aa bokraa malish d3waaa we b3dinn ana kolhom s3bnin 3alyaaa ,bs ana s3bana 3lyaaa engie we amira mo7trma msh 3yza t3ml fi s7btha 7aga we m7md fhma 2no 7aram 3shn bi7b amiraa fa msh 3yz ysbhaa bs fi 2w2t b7soo watyy msh 3rfaa lihh b7s enoo elmfrod yfhm engieee l2no kda bil3b bihaa ya 7aramw e fi nfs elw2t bi7wl yzbt eltanya we ykn3haa msh 3rfa da 27sesyy

    ردحذف
  17. دينا سمحينى الحلقة من امبارح احداثها مفتعله جدا حساها فيلم عربى موت حركة التنقلات فى الشغل فكسانه موووووت والمتوقع من واحده خايفه على شعور صحبتها بجد متقبلش الشغل من الاساس او كانت تبقى اكثر وضوحا وتقول لا انا مش هسيب حبيبى وده ىكان ممكن يكون من حقها مش تدور على الميثاليه وبعدين تعمل غيرها وبعدين هى مش محتاجه الشغل اصلا وبامكانيتها هيجلها احسن منه بكتير وانجى ده هو الا وصلتله مش عارفة تربط الاحداث ببعض شوية ، اسفه مش مقتنعه بالاحداث بس هكمل .

    ردحذف
  18. رووووووووووووووووووووووعة يا دينا

    بالنسبة للكومنت اللي قبل مني اعتقد ان دينا بتنوع شوية في كتابتها اعتقد ان ده لو فيلم او مسلسل كنا هنتفرج وفرحانين بالفيلنج اللي فيه

    عامة انا شايفة الأحدث حلوة جدا نوع من الرومانسية اللي ممكن متكونش موجودة بنفس التفاصيل بس بتفرحنا شوية

    مقارنة بابغض الحلال وده كان رأي فيها مع اعتراض بعض الأشخاص أنها فيها نوع من واقع الحياة

    مش شرط ان الكتابات كلها تكون واقع وغالبا بيكون مؤلم

    واللي شيفاه وبحترم وبقدر دينا فيه تنويعها ف الكتابات

    رووووووووووووووووووعة يا دوندون

    ردحذف
  19. روعه جدا بجد تسلم ايدك

    ردحذف
  20. حلوة اوووووووووووي

    ردحذف
  21. بجد تسلم ايدك

    ردحذف
  22. هو فى كدا ف الدنيا 1!!!!!!!!!!!!!!!!!!!!!!!!!!!!!!!!
    رومانسية مش موجودة ف الواقع

    ردحذف
  23. OpS !!!! i

    ردحذف
  24. موقف صعب اوى
    قلبى لا يتحمل
    يارب الحلقة الاخيرة تكون نهايتها حلوة
    تسلم ايدك يادينا بجد تحفة

    ردحذف
  25. يوووه ايه ده صراع بينها وبين حبيبها وصراع بينها وبين صحابتها المقربه

    دينا طول القصه فى حاله انكسار وحزن على حالهم انا هقرا الحلقه الاخيره دلوقتى واتمنى بجد انها متنتهيش بشكل وحش وعلى فكره الحلقه كانت قصيره جدا جدا انهرده

    ردحذف

قول رأيك بلاش تقرا وتقفل من سكات...ارائكم تهمنى