الأربعاء، 21 نوفمبر، 2012

جوه البيوت... الحلقة 1

الحلقة 1
عزاء سيدات فى بيت ضياء
نور قاعدة بتعيط... وجنبها مريم بتقولها بصوت واطى
"شدى حيلك يانور علشان بنتك... لا اله الا الله... الجدع كده راح فى شربة مياه"
ست من الموجودات
"ده انا لسه شايفاه امبارح طالع زى الفل"
مريم بتمصمص شايفها
"ميعظمش على اللى خلقه... راح الشغل من هنا واتصلوا قالوا تعبان...جرينا ياختى فى ساعتها كان السر الالهى طلع"
ست تانية
"ربنا يصبر امه"
مريم"ومراته كمان اللى هتموت نفسها عليه دى... يا حبيبتى يانور كان راجل ولا كل الرجالة"
نور بتقطع كلامهم
"فين جودى"
مريم"متخافيش مع آيه والعيال فى البيت"
نور"انا عايزاها"
مريم"هانى هيغديهم ويجيبها متقلقيش"
قامت مريم... دخلت اوضة
نايمة فيها فوقية
"ايه يارقية... لسه مصحيتش"
رقية بتعيط" الحمدلله انها نامت... دى من الصبح وعمالة تنادى على ضياء...ياحبيبى ياخويا...راح كده خلاص مننا"
وتبدأ رقية فى نوبة عياط
"استهدى بالله يارقية... اهدى مامتك هتسمع"
"ياعينى على مراته وبنته اللى لسه ملحقش يفرح بيها"
"ربنا يبارك لكم فيها... واهو كويس انه ساب ذكرى"
"يا قلبى يا اخويا...يا حبيبى ياخويا"
"فيه ناس زمايلك جم فى العزا بره من شوية "
"طيب انا جاية اهو"

هانى فى بيته...
"يالا يا آيه...كل ده بتعملى ايه"
آيه جاية بجودى ف ايدها
"كنت بغسل لجودى ايدها... ينفع اجى معاك يابابا"
"لأ علشان تخلى بالك من اخواتك... متفتحيش لحد وخلى اخواتك يعملوا الواجب وانتى متروحيش دروس النهاردة"
"حاضر...انتوا هتتأخروا عند عمتو"
"مش عارف...يعنى بس العزاء يخلص والناس تمشى واجى انا ومامتك"
"ماشى يابابا...مع السلامة"
"لو فيه اى حاجة كلمينى"
"حاضر"

فى بيت مراد... مراد نايم
بيصحى على صوت مامته بتصحيه
"مراد...مراد"
"ايوه "
"مش هتروح الشغل"
"لأ"
"ليه مالك"
"مفيش"
"طيب اصحيك امتى"
"متصحينيش"
"هتفضل نايم على طول"
"ياريت"
تنفخ الام وتخرج من الاوضة وهى
"دلوقتى ينكد علينا"
                     *****************
خرجت هند من اوضة مراد... دخلت المطبخ
صوت صادق
"ياااا هند.. الفطار"
"حاضر"
حضرت هند الفطار وقعدت تفطر
"هو نزل؟"
"لا مش رايح الشغل النهاردة"
"طبعا ... هو نافع فى شغل ...خليه نايم ماهو فيه اللى بيصرف وهو شحط كده"
"يمكن تعبان ياصادق ولا حاجة"
ويزعق صادق
"دلعييييه... ماكنا بنشتغل شغلانة واتنين... دلع فاضى"
ترد هند وهى بتغير الكلام اللى حفظته
"انا شوية وهروح لمايسة وارجع بالليل"
"عملتى اكل"
"لا معملتش"
"لو عايزة تروحى اعملى غدا ...مش تروحى تخدمى جوز بنتك وتسيبى جوزك"
"حاضر"
"وهى عاملة ايه"
"تعبانة... العيال جننوها ..الله يكون ف عونها التوأم صعب"
"وانتى هتفضلى رايحة جاية كده"
"هعمل ايه ماانا مينفعش اسيبها"
"طيب... وقولى لابنك اللى نايم ده يبقى يدفع فاتورة الكهربا علشان معييش ادفع"
"حاضر"
                         *****************
هند ف اوضة مراد
"يامراد...يامراد"
"نعم ياماما"
"قوم يابنى الساعة بقت 12"
قام مراد من السرير
"انا جهزتلكم الغدا ...ابقى اتغدا انت وابوك"
"رايحة لمايسة؟"
"ايوه...انا حطيتلك الكعب بتاع وصل الكهربا ع الجزامة ابقى ادفعه"
"ادفعه منين بس"
"منين ازاى...مش انت بتشتغل وهتقبض مرتب"
"حاضر ياماما هدفعه...هو بكام"
"80 جنيه"
ورد مراد من غير نفس
"حاضر هدفعه كمان كام يوم"

فى السايبر بتاع سامى
مراد داخل... وقعد قصاد سامى
"ايه ده انت مروحتش الشغل"
"مروحتش وعامل نايم من الصبح مستنيك تفتح"
"مروحتش ليه"
"علشان سبت الشغل"
"سبته ليه؟؟"
"هو مش انا اللى سبته..هو اللى سابنى"
"يابنى انت مبتركزش فى شغلانة"
"طيب احكم انت بحق ربنا... رضيت بشغلانة ف الارض واقف عامل على ماكنة ف مصنع ولا قلت شهادتى ولا بكالوريوسى... الاقى واحد ابن... جاى يهزر معايا بالشتيمة بالام...قلت له مبحبش كده واحترم نفسك بدل ما ارد عليك بجد لقيته ساق فيها وقعد يشتم بالام"
"هههههه وانت عملت ايه... ميعرفوش انك بتتجنن من اللى يشتم بالام"
"بص يا سامى... اهزر واضحك ماشى انما بالادب انما يشتم امى ... كل اللى عملته انى خليت بؤه ومناخيره يجيبوا دم"
"ضربته؟؟"
"كنت عايزنى اسكت له وهو بيقل ادبه على امى"
"محبكها اوى...هو يعرف امك"
"يعرفها ولا ميعرفهاش يجيب سيرتها ليه"
"سيبك من امك... ابوك بقى عمل ايه لما عرف انك سبت الشغل"
"ميعرفش طبعا "
"ودى حاجة تستخبى"
"انا قلت اعدى عليك قبل ما ابدأ الرحلة الشاقة اللى اتعودت عليها ...عندى امل الاقى شغل بسرعة بدل ما ابويا يفضل يسمم بدنى بكلامه"
قام مراد...
"يالا ...هعدى عليك وانا راجع"
وهو خارج قابل اروى داخلة ومعاها لوجى
"مراد...ازيك عامل ايه"
"الحمدلله يا اروى...اهلا اهلا حبيبتى"
وشال لوجى ف حضنه... وسلم عليها
دخلت اروى لسامى
"كده نزلت ونسيت تسيبلى فلوس اجيب للوجى طقم لعيد ميلادها"
"حبيبتى معلش والله نسيت"
مراد ساب لوجى...
"يالا سلام يا سامى...هعدى عليك بالليل"

مريم ماسكة فى ايد هانى وهما ماشيين فى الشارع بالليل بعد العزا
"الولية يا عينى هتموت على ابنها... الله يصبرها الضنا غالى"
"الله يكون فى عونهم كلهم... انا شايل هم نور"
"وتشيل همها ليه"
"مش اختى"
"اسمع يا هانى... احنا بيتنا على قدنا احنا وال3 عيال ولا انت حِمل مصاريف ولا انا حمل خدمة زيادة عليا"
"قصدك ايه"
"قصدى يعنى متديش لاختك وش لو قالت انها تسيب بيت جوزها"
"بس شقتنا هى ليها فيها برضه ولو حبت تسيب بيت حماتها مقدرش اقولها لأ"
"لأ قولها لأ... ولو مكسوف متشجعهاش لو قالتلك انها هتسيب بيت جوزها"
"انتى فاكرة انها هتقعد هناك... ضياء الله يرحمه كان بيخلى محدش يزعلها ومع ذلك اخته كانت بتضايقها كتير"
"الا صحيح فكرتنى بأخته...قال ايه قلبها بيتقطع على نور وبنتها كنت عايزة اقولها ده انتى بتغيرى وبتولعى منها وعلى طول سبب المشاكل"
"ومع ذلك عمر نور ما شالت منها"
"ما هى على قدها ف شكلها... واكبر من نور ب10 سنين انما نور جميلة وصغيرة واتجوزت وخلفت وكل ده ودى قاعدة كده...علشان كده كان لما اخوها يجيب لمراته حاجة تولع"
"اهو راح ولا عاد هيجيب لدى ولا دى"
"الله يرحمه...المهم زى ما قلتلك... مفيش مكان لنور تيجى عندنا اهل جوزها اولى بيها وببنتها"

فى بيت مايسة
هند بتلبس هدومها
"انا خلصتلك المطبخ وعملتلك اكل يومين يا مايسة... ابقى سخنى بس"
"هموت ياماما مش قادرة ...مبعرفش انام ساعة على بعض"
"معلش ياحبيبتى فترة وتعدى...وانا مبسيبكيش اهو"
"الله يخليكى ياماما ...انا مش عارفة لو كنت لوحدى بالعيلين كنت عملت ايه"
"ربنا كبير ...هنزل انا علشان ألحق اروح انا هنا م الصبح"
"ماتخليكى اتعشى معانا ... اسماعيل زمانه جاى"
"لا معلش... اروح اشوف ابوكى واخوكى... انتى عارفة انهم مبيتفقوش مع بعض"
"سلمى لى عليهم"
صوت الباب بيتفتح بالمفتاح... يدخل اسماعيل
اسماعيل"سلامو عليكو"
مايسة وهند"وعليكو السلام"
دخل اسماعيل اوضته...وراحت هند ع الباب
"يالا ادخلى شوفى جوزك... وخلى بالك م العيال"
"حاضر...مع السلامة"
قفلت مايسة الباب ورا مامتها ودخلت لاسماعيل
                 *******************
دخلت لاسماعيل كان يغير هدومه
اخدت الهدوم من ع السرير تعلقها ف الدولاب
"هى مامتك هنا من امتى"
"من الضهر"
"اتغدت معاكى يعنى"
"ايوه...احضرلك العشا"
"لأ...مش العيال نايمين"
"أيوه... فرصة ألحق انام شوية قبل مايصحوا"
"تنامى ايه بدل ما تقوليلى هقعد معاك شوية "
"ما انا معاك اهو"
وقبل ما تخلص كلامها...سمعت صوت حد من ولادها بيعيط
"العيال صحيوا"
"روووحى روووحى... ماهو من ساعة ما جم وانا مش عارف اتلم عليكى"
"اعمل ايه بس ده انا والله ما بلحق ارتاح"
قالتها وهى خارجة من الاوضة...
"ابقى خليكى نايمة فى اوضتهم زى كل يوم"
قفل الباب وراها... بالمفتاح

هناك 27 تعليقًا:

  1. الله عليكي

    ردحذف
  2. من اولها كده قفل بالمفتاح ههههههههههههه بس شكلها هتبقي روعه تسلم ايدك يا دندن

    ردحذف
  3. الله القصه دى حلوه وطويله اوى بس الاسامى كتيرررررررررررتسلم ايدك يا دندن

    ردحذف
  4. شكلها فيها احداث بس لسه الاسماء داخله كلها فى بعضها
    تسلمى يا دينا

    ردحذف
  5. ana tayha 5als ya dina bgd ...

    ردحذف
  6. جميلة اوى يا دندن
    بس انا حاسة ان اسماعيل او مراد واحد فيهم هيحب نور
    بيبو

    ردحذف
  7. اناتهت مالاسامي مش هعرف اكملها مش فهماها

    ردحذف
  8. الاسامى كتير وتايهة خالص

    ردحذف
  9. الاسامى كتيييييييير اوى الواحد متلخبط جدا و لا فاهم حاجة

    ردحذف
  10. جامده بجد

    ردحذف
  11. انا حاسة انى تايهة بجد والله الاسامى كتييييييييييييييييييير اوى اوى يعنى
    واللى حسبتو لقيتو انى ضعت ف الاسامى ربنا يسترهاا
    انتى جميلة والقصة حلوة اوى وياريت ميدخولش اسامى تانى علشان الاسلاك متدخولش ف بعضها

    amira slama

    ردحذف
  12. الاسامي كتير والواحد بيتوه بينهم
    بس كبداية للقصة كويسة

    ردحذف
  13. طبعا قصصك جامده جدااااا يا دينا :) ... بس بصراحه يعنى مش بتشدنى اوى الاسامى اللى بتختاريها على الشخصيات .. مش لاقيه عليهم :/ .. بس باين عليها قصه جامممده :)

    ردحذف
  14. مبرووووووووووك القصة الجديدة بجد قصة حلوة اوى بدايتها مبشرة بصراحة متلغبطش فى الاسماء زى ما كنت فاكرة لان معظمها اسماء قرايبى و الظاهر انها هتبقى قصة مالهاش حل زى الى قبلها
    dentist aya

    ردحذف
  15. جميله جدا بس لازم يكون ارشيف صفحه للاسماء نقرأها فى الاول

    ردحذف
  16. تسلمى ياجميل بجد تستهالى اااااااااااااااالف كومنت

    ردحذف
  17. شكرا جزيلااااااا للمتابعة
    ودول شخصيات القصة علشان متتلخبطوش
    واكيد مع الاحداث هتعرفوهم كويس
    نور "جودى بنتها" ... رقية اخت جوزها...فوقية حماتها

    هانى اخو نور...مريم مراته...آيه بنته اكبيرة وفرح وفادى الصغيرين

    مراد... صادق باباه ...هند مامته

    سامى صديق مراد...اروى مراته...لوجى بنته

    مايسة اخت مراد...اسماعيل جوزها...باسم وبسنت ولادها

    مع شخصيات اخرى هتظهر مع الاحداث ان شاءالله

    ردحذف
  18. الاسامى كتيير مووووووت وانا توهت بس حلوه جدااااااااااااااااااااااا

    ردحذف
  19. جميله يا دندون تسلم ايدك ودماغك

    ردحذف
  20. القصه بيان حلو وكمان عائليه بس ايه الاسماء الكتيرة دى كلها

    ردحذف
  21. جمييييييييييييلة اوى

    ردحذف
  22. هما مين الناس الكتير دول المفروض نتعرف علي الشخصيات الأول مش كده


    ردحذف
  23. بداية موفقة يا دينا شكلها احداثها كتير وهتكون روعة

    ردحذف
  24. انا بتووووووووووووه فى الاسامى :(

    ردحذف
  25. الشخصيات كتييييييير اوي مش عرفه اجمعهم طول عمر القصص بيبقا النور متصلط علي ولد وبنت وخلاص لكن كه كتييييييير اوي

    ردحذف
  26. اه اللخبطة دى يا دينا انا مش عارفة اتلم على اسرة واحدة مش فاهمة حاجة والناس كتييييييييييير اوى حولى توضحى هه علشان يمين باعظيم ابدا متفرج على حاجتك تانى

    تحيات الشبح

    ردحذف

قول رأيك بلاش تقرا وتقفل من سكات...ارائكم تهمنى