الأحد، 25 نوفمبر 2012

جوه البيوت... الحلقة 4

الحلقة 4
غادة"شكلك عندك عروسة"
مريم بابتسامة اللى وصلت للى هى عايزاه
"عندى"
غادة"مين؟؟"
مريم"نور...عمتى اخت جوزى ما انتى عارفاها"
غادة"اللى جوزها لسه ميت الاسبوع اللى فات... تتجوز ازاى مش ليها عِدة؟؟؟!!!!!"
مريم"اه طبعا ليها عِدة... بس هو انا قلت هيتجوزوا بكرة... مش لسه هيشوفوا بعض ويتعرفوا على بعض وبعدين اذا حصل نصيب يبقى يجهزوا لحد العدة ما تخلص"
بصت غادة لجمال اخوها... نظرات سؤال
جمال"وهى هتوافق وجوزها لسه ميت"
مريم"اخوها يقنعها...متقلقش انت بس قول اه"
جمال"طيب ماشى اشوفها"

فى بيت مايسة... مايسة قاعدة مع هند
وكل واحدة ماسكة طفل بيعيط من ولاد مايسة
"بقاله يومين داخل طالع مكشر فى وشى يا ماما ومش بيكلمنى"
"كفى الله الشر ليه بس"
"مش عارفة...انا حكيت لك اللى حصل كله"
"وانتى يامايسة يعنى فيه واحدة تقول لجوزها كده"
"وانا مش سألت عن اللى سمعته بس"
"عموما انا هستنى لما ييجى واتكلم معاه...ربنا يهديه"
                       ******************
اسماعيل بيفتح الباب بالمفتاح
مايسة وهند فى اوضة الاطفال
دخل اسماعيل... بص عليهم فى الاوضة
"سلامو عليكو"
وعدى دخل اوضته قبل ما يردوا
غمزت هند لمايسة
"قومى شوفى جوزك"
قامت مايسة دخلت اوضته
"حمدالله ع السلامة"
بيرد بنفس العبوس
"الله يسلمك"
مايسة بابتسامة ومحاولة فتح كلام
"عملت ايه النهاردة"
"زى كل يوم"
"اسخن لك الاكل"
"طيب"
خرجت مايسة من اوضتها... وراحت لمامتها
"هحضر لاسماعيل الاكل واجيلك"
"لأ ملكيش دعوة بيا...روحى انتى اقعدى معاه"
"بيكلمنى بقرف مش عارفة ليه"
"لما يخلص هتكلم معاه"
                         *******************
مايسة بتشيل الاكل من ع السفرة
"ماما عايزة تتكلم معاك"
"خير"
"معرفش"
"طيب"
نادت مايسة على مامتها
"ماماااااااا"
جت هند...وقعدت معاهم
هند"ازيك يا اسماعيل...عامل ايه"
اسماعيل"الحمدلله...ازيك ياحاجة...والحاج ومراد عاملين ايه"
هند"كويسين الحمدلله"
لحظات صمت
هند"هو انت زعلان من مايسة ف حاجة"
وبص اسماعيل لمايسة
"هى قالتلك ايه"
هند"حاسة كده ان فيه حاجة"
مايسة قاعدة ساكتة خالص ومش بتتكلم
وبدأ اسماعيل كلامه
"صلى ع النبى يا حاجة"
هند"عليه افضل سلام وصلاة"
اسماعيل"اسألى بنتك كده... انا مقصر معاها ف حاجة"
ردت مايسة بسرعة
"ابدا... انا مقلتش حاجة من دى"
اسماعيل"طيب انتى ليه بقى مقصرة معايا"
مايسة"انا مقصرة ف حاجة؟؟ والله ابدا"
اسماعيل"لأ مقصرة... انا مش متجوز علشان من يوم ما حملتى مش هقول لما ولدتى وانتى كل شوية تعبانة ...لأ مش قادرة ...لأ عايزة انام"
مايسة"وهو انا مش تعبانة بجد"
اسماعيل"خلاص يعنى انتى مش قادرة تدينى حقى الشرعى يبقى من حقى اتجوز "
وكانت صدمة للاتنين... مايسة وهند
وصرخت مايسة
"انت بتقول ايه... ازاى تقول كده"
هند"جواز؟؟ ليه يعنى"
اسماعيل"يا حاجة بنتك مش فاهمة ولا مكنشة ان ليا حقوق... برجع عايز الاقى ست فى البيت مش دادة للعيال"
هند"وخلفتهم ليه؟"
اسماعيل"يعنى كل ست تخلف تسيب جوزها كده"
مايسة بتعيط
"انت مش حاسس باللى انا فيه... انت طول النهار بره وبترجع بالليل عايزنى اكون مستنياك ومزاجى رايق وانا لا بنام بالليل ولا بالنهار...انا طول اليوم شايلة ده شوية وشايلة دى شوية... انا مبقتش مستحملة خلاص...وكمان تيجى تكلمنى وحش"
اسماعيل"وكمان جايالى تقولى عندى ست فى الاوضة...بصى يا حاجة لازم بنتكم تعقل شوية يا اما مالهاش عيش معايا"
هند"لأ بقى انت كده زودتها اوى... احنا عمالين نراضى ونحايل فيك وانت مش مقدر ان الحمل والولادة والتوأم اللى ف ايدها يتعبوها...وكمان بتهددها...لأ هى مش رِمية عليك وبيت ابوها يساعها هى وولادها"
اسماعيل"انا مبتهددش"
هند"وانا مش بهدد...قومى يا بت لمى هدومك وهدوم عيالك وعلى بيت ابوكى"

مريم وهانى طالعين ع السلم...عند نور
"والله ما انا عارف انا ازاى جيت معاكى وموافقك على اللى هتقوليه ده"
"وانا هقول حاجة عيب ولا حرام...ده جواز على سنة الله ورسوله"
"مش عيب ولا حرام...بس التوقيت مش مناسب خالص"
"بقولك ايه... اختك صغيرة ومسيرها تتجوز...الحق عليا يعنى انى عايزة اجوزها واطمن عليها"
"تطمنى عليها ولا تطمنى انها مش هتيجى تقعد عندنا"
"الاتنين"
"مش هى قالت هتفضل فى بيت حماتها...انتى قلقانة من ايه"
"وجودها عند حماتها مش دايم... انما لما تتجوز وتستقر هبقى مطمنة من ناحيتها"
وصلوا عند الباب...خبطوا...فتحت نور
استقبلتهم نور...دخلوا سلموا على فوقية ورقية وجودى
وبعد ما قعدوا
مريم"نور... اخوكى كان عايزك فى كلمتين على جنب"
احرجت نور... وبصت لفوقية اللى استغربت
نور"خير يا هانى... مفيش حد غريب"
هانى محرج مش عارف يبدأ الكلام منين
حاول يتكلم.... الكلام واقف ف زوره
نور"هااا يا هانى...مالك"
هانى"اصل مريم كانت عايزة تقولك على حاجة"
وبعد ما كانت مريم بتبتسم... قفلت بؤها من المفاجئة
"بتدبسنى يا هانى"
قالتها ف سرها...وبعدين قالت لنفسها
"اتكلم...اه...هو انا خايفة"
"بصى يا نور... بصراحة كده فيه عريس عايز يشوفك"
وصرخوا ال3...نور ورقية وفوقية
"عريييييييييييييييييييييييس!!!!!!!!!!!!!"

اروى قاعدة فى البيت...بعد ما نامت لوجى
قامت غيرت هدومها...لبست طقم نوم... وعملت ميك اب
وسرحت شعرها ... بصت لنفسها فى المراية باعجاب
راحت مددت على الكنبة قدام التليفزيون...كانت الساعة وراها 12 بالليل...ومسكت موبايلها
"الو... ازيك يا حبيبى"
"الحمد لله ياحبيبتى...عايزة حاجة"
"وحشتنى قلت اكلمك شوية"
"انتى وحشتينى اكتر...لوجى فين"
"نامت وانا زهقانة...مش هتيجى بدرى النهاردة"
"والله لو عايزانى اجى بدرى ..اجى"
"طبعا...انا لو عليا عايزاك جنبى على طول"
"وانا يا قلبى... مش عايز ابعد عنك ثانية واحدة"
"طيب هتيجى امتى"
"اممم علشان خاطرك هقفل بدرى النهاردة"
"بجد ولا هتقوللى كده وتيجى الصبح زى كل يوم"
"يا حبيبة قلبى مش التأخير ده غصب عنى"
"مليش دعوة ...انا عايزة يوم تسهر معايا بدل ما تسهر تحت"
"طب شجعينى وانا اطلع بدرى"
ردت بدلع وهى بتضحك
"انا مستنياك... وهحضرلك عشا رومانسى ...ولابسة طقم جديد اشتريته النهاردة الصبح وعايزاك تقولى رأيك فيه"
"نص ساعة اوزع الناس اللى هنا وهتلاقينى عندك"

مراد فى اوضته...بين اليقظة والنوم
سمع صوت عياط اطفال...ركز فى الصوت
سمع صوت باباه ومايسة...بص فى الساعة...12 بالليل
طلع من اوضته...شاف مايسة وولادها مع مامته
سلم عليها وباسها...كانت عينيها باينة انها معيطة
صادق"ايه اللى جايبك كده؟؟"
مراد"مالك يا مايسة؟؟"
هند"الراجل اللى مأمنينه على بنتنا بيهددها انه يتجوز عليها"
صادق"ليه ايه اللى حصل"
مراد"يتجوز عليها ليه؟؟؟ ازاى اصلا يفكر فى كده"
صادق"مهما يقول مكنتش تسيب له البيت"
مراد"ازاى يا بابا ...يعنى يهددها بالجواز وتقعد له"
صادق"هو انا كل ما اقول حاجة تعارضنى... ايوم مكنش المفروض تسيب له البيت"
مايسة"والله لو اتجوز عليا ما اقعد على ذمته دقيقة "
مراد"طبعا معاكى حق"
صادق"معاها حق ايه...انت عايز تخرب بيت اختك"
مراد"اومال تسكت له"
صادق"الشرع محلل له 4"
هند"نعم يا سى صادق.. هو الشرع  حافظين فيه آيه وسايبين القران كله"
صادق"اكيد حصل حاجة...ايه اللى حصل علشان يوصلوا لكده"
هند"مش حاسس ان البت ف ايدها عيلين صغيرين ومش بيفكر غير ف نفسه بس"
صادق"يبقى توعى بنتك وتفهميها مش تخربى عليها"
هند"ما انا كنت براضيه وبتكلم معاه لقيت كلامه يغيظ"
مراد"يا بابا زى ماهى تعبانة فى تربية الولاد لازم هو كمان يحس بيها ولو يقدر يشاركها يشاركها"
صادق"والنبى نقطنى بسكاتك...راجل ايه اللى يشارك ...ما يرضعهم كمان"
مراد"انا مقلتش كده...بس يحس بيها"
مايسة"والله يا مراد طول النهار فى شغله ويرجع ما يسألنى حتى عاملة ايه ولا فرحانة ولا زعلانة...الاقيه يرجع ويدخل يقفل على نفسه ولما اكلمه يكلمنى وهو مبوز ف وشى"
طبطب عليها مراد
"متزعليش يا حبيبتى"
صادق"كل دى حاجات تافهه وتتحل...بكرة الصبح ترجعى بيتك"
هند"لأ ... مش هترجع الا لما هو اللى ييجى يحق لها نفسه"
صادق"معنديش بنات تغضب يا هند"
هند"وانا محدش يذل بنتى... يا هقعد انا وهى يا هنسيبلك البيت احنا الاتنين"



هناك 31 تعليقًا:

  1. اووووه ده باين العملية هتسخن :))) روووعة يا دينا كالعادة ... الحمد لله بدأنا نجمع الشخصيات :)

    ردحذف
  2. حلوه جداااااااااااااااااااااا

    ردحذف
  3. تحففففففففففففففة

    ردحذف
  4. gamda aweeeee l qessa d shklha htb2a 7elwaaaaaaaaaaa estmry ya dunnii :))

    ردحذف
  5. رووووووعه

    ردحذف
  6. لا جامدة بجد والله
    هتحلوى اوى ع فكرة تسلم ايدك

    amira slama

    ردحذف
  7. جميله اوى بس موقف هند مش عاجبنى بتولع الدنيا

    ردحذف
  8. de shakl el7kaya d5let fe el8ame2 aweeeeee
    gamda a dondon k el3ada

    ردحذف
  9. حلوةالحلقة

    ردحذف
  10. تسلم الايادى يا دندن روعة بجد ومستنين الجديد

    ردحذف
  11. وااااااو شكل الجو كده هيبقي نار متشوقه للحلقه الجايه

    ردحذف
  12. ايوووووووه كده احب انا الشخصيات القوية دى
    حلوة اوى الحلقة النهارده يا دينا بس انا هموت واعرف هى القصة بتتكلم عن حياة عيلتين ولا فيه علاقة هتبقى بينهم بعدين ؟؟
    ياريت تردى عليا


    ddy dody

    ردحذف
  13. الله عليكى يا هند

    ردحذف
  14. لا بقى انا عايزه الباقى

    ردحذف
  15. روووووووووووووعه

    ردحذف
  16. جميله اوي بس صادق ده رخم اوي

    ردحذف
  17. جميله أوى يا دينا انا بحبك جدا فى القصص الاجتماعيه بحس انك مُبدعه فيها ..ربنا يوفقك
    عندى احساس ان مريم دى شبه ميسر كدا :D

    ردحذف
  18. جامدة جامدة جامدة بجد وخلااص حفت الاشخااااااااااص وبقت ممتعة جدا انا اصلا بحب القص الل فيهاا فروع كثير كدة تسلم ايدك يادندووونة

    (غادة)

    ردحذف
  19. السلام عليكم استاذة دينا انا فعلا من اشد معجبيكى بجد بجد لانانا دخلتالمدونه وحضرتك لسة فى الحلفة الاولى من جوة البيت انا بصراحة مفراتهاش علشان انا عندى فضول لو فراتها ومكملش ممكن وانا بفكر فيها بتخيل ان بفرا الفصة وبكملها باى كلام من اى فصة بس بصراحة كل فصصك حلة اوى اه مفلتلكيش وانتى لسة فى الحلفة الاولامن جوة البيت انا دخلت المدونة من كتر حبى للفصص ودخلت صدفة وانا بدور على تكملة فصة حكم الفلب فرات فصة ورا فصة لخيص ما خلصتهم وانتى خلصتى الحلفة4 من جوة البيت وفرات كتبك الاكترونية وبجد من اجمل الفصص الى فراتها هى تحت سفف واح والفصر الهادى دول من الكتب الاكترونية اما التنين مكانوش فصص علشان كدة مفراتهمش كلهم بفرا كل شوية شويةبس بصراحة فراتش يوميات حمادةاما البافى فراتة وانا بكتب لحضرتك فولت انا هفولك انى اكتر الفصص الى عجبتى فا لفيتهم كلهة ما عدا ريمة فتل هى حلوة بس مفرفة وفلت انا هكتب كل دول ففلت افول نوعية الفصص الى انا بحبه وامثلة عليها
    غريبة مثل تحت سفف واح وفدام عينى
    مخيفة الفصر الهادى الحب الملعون البيت الفديم
    الغزية زى ار
    الومانسية ودى منها كتير






















































    اه نسيت افولك
    سمانة
    دمياط

    ردحذف
    الردود
    1. معلش نسي افولك ان من كتر ما فصصك حلو اوى وانا مفتنعة ان الى انا بعملة مهوش غلط لان انا بؤ من ان الفراها هى العلم اساسا وعشان كدة انا منكتر ما بفرا كتير فرات مدونة حضرتك بسرعة وعلشان كدة جبت فى الترتيب التالت بعد ما كنت بجيب الاولبس علش هعوضة دة امتحان شهر بس انا مرتحتش الا لما خلصتها















      وشكرااااااااااااااااااااااااااااااااااا كتيييييرررررررررررررررررر اوى على الفصص الجميلة


      سمانة

      حذف
  20. هي مريم وهند دول ايه يا ساتر ع الستات دي لهم حق الرجاله كيرهونا ياختي هههههه

    ردحذف
  21. جاااااااااامده اوى

    ردحذف
  22. استمرى روعه

    ردحذف
  23. اخص عليكى يا دينا مش لاقية اسم تانى غير مريم للولية الغم دى
    دى واقفة فى زورى مش قادرة ابلعها وكمان اسمها على اسمى
    و التانى اللى اسمة صادق ده كمان عايز مايسة ترجع بيتها عشان تخف مصاريف من عليه مش عشان بيتها ولا حاجة
    بس هند جدعة اوى انها ردت عليه ولازم تفضل واقفة له كده برافو عليها
    وطبعا فى الختام انتى مبدعةةةةةةةةة حقيقية يا دندن

    ردحذف
  24. صادق ده زبالة حرق دمي
    سلمى

    ردحذف
  25. صادق ده مستفز زى توفيق اللى كان فى ليست عذرااء :(

    ردحذف
  26. هند دي زياطه وخلاص وصادق ده رامي بنته ومراد بجد ونعمه الاخ بس مش معنی كده ان مايسه مش غلطانه لانها اكيد فهما جوزه وايه اللي هيوصله لكده وكمان اسماعيل غلطان لازم يستحمل

    ردحذف

قول رأيك بلاش تقرا وتقفل من سكات...ارائكم تهمنى