الخميس، 29 نوفمبر 2012

جوه البيوت... الحلقة 7

الحلقة 7
رقية قاعدة مع نور
"ما تكلمى مريم تشوفي قالها ايه"
نور خايفة تتصل
"استنى يمكن موصلوش"
"ليه؟؟ اكيد روحوا...حتى لو لسه فى الطريق كلميها يالا"
وملقتش نور حجة...فاتصلت بمريم
"الو..ازيك يا مريم...روحتى"
"ايوه يانور... الراجل هيتجنن عليكى"
وبرقت نور عينيها من المفاجئة
رقية قدامها بتبص لها
"بتقولك ايه؟؟ عملتى كده ليه؟؟"
نور"ايوه يا مريم...بتقولى ايه؟؟هو قال ايه"
مريم"بقولك عجبتيه انتى وعايز يجيبلك.."
نور"خلاص يا مريم ماشى...سلمى على هانى والعيال"
مريم"مش تردى عليا الاول"
نور"ماشى يا مريم... مع السلامة"
قفلت نور علشان تخلص من الورطة اللى هى فيها
رقية قدامها وسألتها وهى بتدمع
"ايه؟؟؟معجبتوش صح؟؟"
نور حست ان مفيش مفر من انها تقول نص الحقيقة اللى يخصها بس
"كل شئ نصيب يا رقية... ان شاءالله ربنا رايدلك الاحسن"
"انا كنت حاسة... مش اول واحد ييجى ومعجبوش"
دخلت رقية الاوضة ...راحت نور وراها
وقفت رقية على باب الاوضة
"فى ايه... عايزة انام"
"متزعليش يارقية ده ...."
"خلااااااص يا نور...تصبحى على خير"
وقفلت باب الاوضة
دخلت نور اوضتها...واول حاجة عملتها اتصلت بمريم

مريم اول ما قفلت مع نور
بصت لهانى
"هههه شفت...اختك وافقت"
"وافقت؟؟مش ممكن"
"والله قالتلى ماشى ماشى...شكلها مش عايزة تفتح كلام قدامهم"
"لا برضه مش مصدق"
"ابقى اسألها يا اخويا...انا طالعة بسرعة ألحق جمال وهو عند غادة قبل ما يمشى"
وطلعت مريم بسرعة لغادة
                     ********************
مريم دخلت عند غادة
"كويس انى لحقتك يا استاذ جمال علشان ابشرك"
جمال بفرحة"خير؟؟"
غادة"مش معقول تكونى لحقتى تجيبى رد"
مريم بفخر
"جبت الرد وحياتك"
جمال"ها...وافقت؟؟"
مريم"كلمتنى وسألتنى عن رأيك فى رقية.. فقلتلها انك عايزها هى لقيتها بتقولى ماشى ماشى نتكلم بعدين مع السلامة"
غادة"معقول؟"
جمال"طيب عايز اقابلها واتكلم معاها ...يعنى النهاردة ميتحسبش"
ورن موبايل مريم
"اهى ...نور بتكلمنى"

وردت مريم على الموبايل
"ايوه يا نور"
"انتى ايه اللى قلتيهولى ده"
"قلتلك اللى حصل... انا حتى عندهم اهو علشان ابشرهم بموافقتك"
"موافقة مين يا مريم...انتى اتجننتى"
مريم بتبص حواليها...وهى حاسة بالمأزق
"مش انتى اللى قلتى"
"انا قلتلك موافقة؟"
"مش قلتى ماشى وهنتكلم بعدين"
"بقفل معاكى يا ذكية علشان رقية كانت واقفة قصادى... انما انا رأيي متغيرش"
ولفت مريم وشها بعيد عنهم... وسألتها
"يعنى ايه... اتصرف ازاى"
"اتصرفى زى ما تتصرفى انا مالى... انتى اتسرعتى وجريتى تقوليلهم حاجة محصلتش ليه"
"فكرى"
"مش هفكر... انا مكلماكى أأكد عليكى اوعى الكلام الفارغ ده يوصل لرقية ولا مامتها.... انا مش ناقصة مشاكل انا بقولك اهو..مع السلامة"
قفلت نور معاها قبل ما تستنى رد
مريم لفت وشها ناحيتهم تانى... بتحاول تبتسم ببلاهة
جمال وغادة فهموا محتوى المكالمة
غادة"هاااا...فيه جديد"
قامت مريم...
"الوقت اتأخر... معلش يا جماعة انا فهمت غلط...تصبحوا على خير"

عدت الايام
رقية مكتئبة وقاعدة لوحدها على طول من بعد ما ترجع من الشغل
حاولت نور تتكلم معاها... بس رقية مش بتديها فرصة
وكل ما تكلمها تتعصب عليها

مريم خافت تقول حاجة علشان ميحصلش مشاكل بين نور واهل جوزها فتضطر ترجع عندهم

رقية احساسها انها غير مرغوبة خلاها حتى فى الشغل تقتصر علاقاتها مع الناس وبقت فى اضيق الحدود

وخلال اوقات الفراغ فى الشغل... بدات تتصفح النت
وعملت اكونتات على مواقع جديدة
وفى فترة بسيطة حست ان النت بيخفف عنها كتير
وفكرت انها تقدم على نت للبيت

رجعت البيت وبعد ما اتغدوا
"نور... طلعى الكمبيوتر من اوضتك حطيه بره"
"ليه يا رقية؟؟"
"هقدم على نت وعايزة استعمله...فيه مشكلة عندك؟"
"لا براحتك"
"مش كان اخويا اللى جايبة لينا كلنا ولا انتى عايزة تفضلى قافلة عليه"
"وانا قلتلك حاجة... قومى معايا نشيله ونحطه ف المكان اللى يعجبك"
"متهيألى الطرف اللى عند البلكونة ده كويس علشان الكهربا وعلشان لما اجيب الراوتر والسلك"
"اللى يريحك ..حاضر"

مراد فى الفرن اللى بيشتغل فيه
نادى صاحب الفرن عليهم كلهم
"كل واحد قبل ما يمشى... يعدى عليا ياخد حسابه"
سأل واحد من الموجودين
"ليه يا معلم؟؟"
رد صاحب الفرن بصوت حزين
"هبيع الفرن وصاحبه مش هيشغله على طول"
مشى صاحب الفرن وساب كل الموجودين بيضربوا كف على كف على حالهم
مراد"فجأة كده هيبيع الفرن... طب احنا نعمل ايه"
ورد راجل كبير من اللى بيشتغلوا
"يامراد يا بنى احمد ربنا انت لا وراك بيت ولا عيال فى مدارس ...احنا اللى ف رقبتنا كوم لحم هنعمل ايه"
سكت مراد وهو بيقول لنفسه
"ورايا ابويا اللى مش بيسكت لما يشوفنى قاعد من غير شغل"

مايسة فى اوضتها... واقفة قدام المراية بتسرح شعرها
وولادها على السرير بيعيطوا
"يا ولاد حرام عليكم...افصلوا بقى تعبتونى"
مسكت قلم كحل وهى بتحط فى عينيها
رن جرس الباب... بصت فى الساعة
"يوووووو...اهو جه ودلوقتى يفضل يقولى مش حاطة زفت ليه...مش لابسة مش عارف ايه ليه...ياربى هو انا لحقت"
خرجت من الاوضة
"ايه اللى جابه بدرى... وكمان بيخبط ليه"
راحت فتحت الباب واتفاجئت بست متعرفهاش

مراد وهو بياخد حسابه من صاحب الفرن
وقف يسلم على زمايله قبل ما يمشى
وهو ماشى... وقفه شاب من اللى كانوا معاه
"مراد استنى انت هتركب منين"
"من على اول الشارع"
"طيب انا جاى معاك"
واتكلموا وهما ماشيين
"هتعمل ايه يا شريف"
"ولا حاجة انا كده كده كنت هسيب الشغل"
"ليه لقيت شغل تانى"
"لأ مسافر...تيجى؟؟"
"مسافر فين؟"
"ايطاليا"
"غير شرعى"
"مقداميش غيره"
"وافرض لا قدر الله حصل حاجة"
"هيحصل ايه؟؟هموت؟؟ بذمتك انت حاسس انك عايش؟؟"
ومعرفش يرد...سكت
كمل شريف
"عايش عيشة حلوة؟؟هتتجوز امتى؟؟ بتلبس اللى نفسك فيه؟؟ نفسك مبتتكسرش وانت بتشتغل فران ومعاك بكالوريوس...انا جربت كل ده وخلاص مبقتش مستحمل...اهو يا اموت يا اسافر اتبهدل بس اعمل قرشين ولا اشوفلى خواجاية اتجوزها واعيش فى بلد نضيفة ...تتعب تلاقى مش هنا تتعب وتاخد على دماغك"
"معاك حق"
"وبعدين هو السفر ده حد لاقيه...ده انا دوبت لحد ما لقيت واحد هيسفرنى ب10 الاف بس"
"هما ال10 الاف قليلين"
"يابنى دول بياخدوا 20 و30... بس ده عاملها شغل ومساعدة للشباب ف نفس الوقت"
"هتروح له امتى؟"
"انا رايح له دلوقتى... لو عايز تعالى معايا كلمه"
"تمام... جاى معاك"
                        ******************
مراد قاعد مع سامى فى السايبر
"لا يا صاحبى مش موافقك على اللى هتعمله ده"
"خلاص يا سامى انا قررت انى مفيش قدامى الا كده...هتساعدنى ولا ايه"
"رقبتى ...بس انا خايف عليك"
"العمر واحد والرب واحد"
"مش قادر اقولك روح"
"متخافش ياسامى سيبها على الله...ما انت عارف انا شقيان ازاى وواضح انى هفضل كده على طول"
"والفلوس هتجيبها منين"
واتردد مراد ...وقال بكسوف
"سلفهوملى... ووالله العظيم حتى لو مُت هقول لامى واختى ان الفلوس دى دين ولازم تتسدد ..يعنى متخافش على فلوسك هترجعلك هترجعلك"
"بعد الشر عليك يا جدع متقولش كده"
"هتديهوملى"
"انا اقدر اتصرف ف 5 بس "
"ماشى قربنا لنص المسافة...وانا احاول اتصرف باى طريقة فى الباقى"

هناك 20 تعليقًا:

  1. تحففففففففففففففة بجد وفيهامفاجئات كتير وبجد انا مستنية الحلقة ابجديدة بفارغ الصبر

    ردحذف
  2. قصيرة اوى

    ردحذف
  3. جامدة الله ينور
    yasmeen

    ردحذف
  4. هو الواضح من الحلقة دى ان رقية هتتعرف على سامى على النت
    ومتهيألى ده هيبقى رابط للتعارف بين نور ومراد عشان دول الاشخاص المحورية بالنسبة للعيلتين
    بس مش قادرة اعرف ازاى برضه


    ddy dody

    ردحذف
  5. dina 2oln el ksa zy el 3ada ra23a bs modo3 el hgr el 3'er shr3ea dy ana kont lsa ktba 3no ksa w kont 7ba a5od r2ek feha 3shan h2dmha ll mosb2a el skafya tb ozaret el trbya w el t3lem :) :)

    ردحذف
  6. وتتوالي المفاجات مع العسل دينا ورينا البلاوي اللي جايه بقي

    ردحذف
  7. لااايك كالعاااده .. بس ياريت تكبريلنا دور غاده ههههههههه نحب نقرا اسمي كل شويه :p

    ردحذف
  8. رائعه بس ياريت الحلقه تبقى مليانه شويه الا بتخلص بسرعه والواحد بيبقى متشوق لباقى الاحداث

    ردحذف
  9. هى الحقلة بتخلص بسررررررعة اوووى كده ليه :(

    ردحذف
  10. يارب مراد مايسفرش بجد الحلقة روعة

    ردحذف
  11. تحفة اوي والفاجآت كتيرة بس انا زعلانة عشان الحلقة قصيرة ده غير ان حضرتك واخدة الجمعة اجازة وانا تقريبا اصغر متابعة ليكي عندي 11 سنة

    ردحذف
  12. جميلة جداااااااا يا دودو تسلم ايداكى بس انا خايفة على مراد وحاسة ان النت هيكون سبب الربط بين العلتين
    dentist aya

    ردحذف
  13. اهلا يادينا
    انا عرفت المدونه بالصدفه من اربعه ايام واحب اقلك انى خلصت كل قصه كتبتيها علي المدونه
    اسلوبك راقي جداا جداا
    وكل قصه ليها طعم مختلف واحساس مختلف
    حسيت بالفرح والحزن والحب مع ابطال كل قصه كانى شيقاهم وعارفاهم وموجودين حاولينا
    بجد اسلوبك اكتر من رائع
    اتمنا ان اكون صديقه للمدونه واتمنالك كل تقدم وتفوق

    ردحذف
    الردود
    1. وانا كمان والله راءة كل الدونة السنتين فة اسبوع علشان كان عليا امنتحا نات
      سمانة

      حذف
  14. تسلم ايدك بجد بس يا ريت تظبطى مراد شوية مش فقر فى الحقيقة وفى القصة كدة كتير

    ردحذف
  15. kassssssssssssssssssssssssssssssssssssssssssssssssssela aoy

    ردحذف
  16. جميله ابتدت تحلو اكتر وتشوق اكتر

    ردحذف
  17. تحففففففففففففففففففففففة بجد تسلم الايادى يا قمر
    amira slama

    ردحذف

قول رأيك بلاش تقرا وتقفل من سكات...ارائكم تهمنى