الأربعاء، 5 ديسمبر 2012

جوه البيوت... الحلقة 10

الحلقة 10
تانى يوم..مراحتش رقية الشغل
قامت تدور فى هدومها على احلى طقم عندها...مش اسود
واختارت الوان غامقة شوية... واهتمت بشكلها
واستعدت لمقابلة كامل
اتصل بيها الساعة 2 وعرفها انه وصل
وصفتله المكان اللى هيتقابلوا فيه...وخرجت من اوضتها

فوقية"انتى لابسة ونازلة؟؟"
رقية"ايوه"
نور قاعدة بتسرح جودى... سامعة ومش بتتدخل فى الكلام
فوقية"رايحة فين دلوقتى"
رقية"رايحة اتفرج شوية على المحلات..اللبس الصيفى نزل وعايزة اشترى حاجة للصيف"
فوقية"دلوقتى ...عز الضهر"
رقية"اه... مش عايزة انزل بالليل...عايزة حاجة اجيبها وانا جاية"
فوقية"لا... متتأخريش"

مايسة فى بيتها العصر... قاعدة على الارض وسط ولادها والالعاب بتلاعبهم
رن جرس الباب...قامت تفتح
"اهلا يا انتصار ...اتفضلى"
دخلت انتصار...قعدت على كنبة الانتريه...وحطت مفتاحها وموبايلها على الترابيزة اللى قدامها
"ازيك يا مايسة عاملة ايه"
"الحمدلله"
"ايه بتعملى ايه"
"مفيش قاعدة مع الولاد شوية"
"شربتى القهوة ولا لسه"
"لا والله ...مش عارفة اسيبهم"
"طيب هقوم اعملها ونشرب مع بعض"
"متتعبيش نفسك .... خليكى وانا اعملها"
"خليكى مع العيال"
وقامت انتصار دخلت المطبخ
بتحط الكنكة على النار بعد ما حطت السكر والبن

مايسة قاعدة مع الولاد بتلعب معاهم بكورة صغيرة

موبايل انتصار بيرن وهو على الترابيزة... بإسم اسماعيل
صوت عبدا الحليم"انا لك على طول"
انتبهت انتصار على النغمة المخصصة لاسماعيل
وقعت الكنكة منها على البوتاجاز وهى بتجرى تلحق التليفون

مايسة اول ماسمعت صوت موبايل انتصار
قامت علشان توديهولها
مايسة بتمد ايدها تمسك التليفون
شدته انتصار اللى كانت وصلت للموبايل قبل مايسة ماتمسكه
"ده اخويا... اما اروح الحق القهوة...الو"

رقية قاعدة مع كامل فى مطعم... بيخلصوا الغدا
رقية مستنية اى كلام يفتحه كامل غير الكلام العادى
"هتبات هنا"
"لا راجع اسكندرية تانى"
"مش هتقعد ليه كام يوم عند سمية"
"لا ... محدش يعرف انى هنا"
سكتت رقية مستنية يتكلم
"انا خلصت ...هقوم اغسل ايدى"
"ماشى...هدفع الحساب لحد ماتخلصى"
                   *****************
فى الحمام... واقفة قدام المرايا
بتمسح دموعها وبتفكر
"هو متكلمش ليه فى الارتباط زى ما كنت فاكرة؟؟ هو هيمشى على اساس ايه؟؟ المفروض انى اعمل ايه دلوقتى؟؟اسأله ولا لأ؟؟ اسأله عادى مفيهاش حاجة...مش هو اللى كان بدأ بالكلام...انا مضربتوش على ايده... ماهو مش معقول يعلقنى ويسيبنى كده...انا لازم اسأله"
خرجت من الحمام... كان واقف على باب المطعم
راحت ناحيته..خرجوا مع بعض

ماشيين فى الشارع جنب بعض لحد ما يوصلوا للشارع الرئيسى
رقية بتحاول تشجع نفسها انها تسأله...مقدرتش
"تعالى اوقفلك تاكسى"
سكتت رقية لانها مكنتش قادرة تنطق من الحزن واليأس
شاور لتاكسى... وقف... ركبت... حاسب التاكسى
"ابقى كلمنى طمنى عليك"
"ان شاءالله"

فى بيت سامى ... سامى بيلبس
اروى قايمة من النوم
"ايه اللى صحاكى... خليكى انتى تعبانة"
"اليومين دول تعبانة اوى يا سامى"
"معلش ياحبيبتى... كله علشان خاطر النونو"
"كنت عايزة اقولك على حاجة مهمة"
"خير ياحبيبتى"
"عايزاك تقدم للوجى فى المدرسة"
"المدرسة مرة واحدة"
"كى جى يعنى هو انا قلت اولى ابتدائى"
"حاضر ياحبيبتى"
"انا عايزاك تقدم لها فى المدرسة اللى بتشتغل فيها حنان صاحبتى"
"طيب... شوفي الاوراق المطلوبة كلها وابقى اروح اى يوم اقدملها"

رقية طول اليوم بعد ما رجعت من المقابلة وهى قاعدة على الكمبيوتر مستنية كامل يفتح
فات 4 ساعات و5 و6 ومفتحش
قلقت...اتصلت بيه
"الهاتف اللذى طلبته قد يكون مغلقا.. من فضلك حاول الاتصال فى وقت لاحق"
ولحد بالليل كل ما تتصل بيه...مقفول

فى الايام التالية...اتصلت بيه مردش وطول الوقت فاتحة الفيس والميل... تشوفه يدخل بسيط جدا من غير ما يسأل عليها
كانت هختتجنن من الحيرة...ليه التغيير المفاجئ ده
واستجمعت شجاعتها...وبعتتله رسالة ع الفيس
"انا بتصل بيك ومبتردش... لو سمحت فهمنى فى ايه وانت حر فى قرارك..بس متسيبنيش مش فاهمة حاجة كده"
فضلت تستنى الرد... وبعد يومين جالها الرد
"انا لما شفتك حسيت الفرق بيننا كبير ازاى...انتى بنت ولسه فى التلاتينات يعنى من دور ولادى... معلش يا رقية كل شئ نصيب"
واتصدمت رقية بعد ما املها فى ارتباط راح

اسماعيل قاعد فى المحل... دخلت عليه انتصار
قام اول ما شافها
"اهلا اهلا... ايه القمر اللى هل علينا ده"
"هيهيهيهيهيهيهي ياراجل يا بكاش"
"انا برضه بكاش... اجيبلك مراية تبصى طيب"
وقعدت انتصار قدام مكتبه
"ايه كنتى فين"
"كنت عند الكوافير"
"يا سيدى يا سيدى... يا بخته"
"يغور يا شيخ...انا قرفت منه"
"سيبك من سيرته بقى... انتى وحشتينى"
"هىهىهىهى وحشتك...مش باين"
"اعمل ايه ...البت بقالى اسبوع بقولها روحى اقعدى يومين عند امك تقولى طيب ومتروحش"
"خلاص...براحتها"
"براحتها ايه...بقولك وحشتينى"
"تلاقيها مش قادرة على بعدك"
"انا معدتش شايف غيرك يا قمر"
"اما نشوف... همشى انا بقى... بقولك ايه معكش 200 جنيه كنت عايزة اشترى حاجات والفلوس اللى معايا مش هتكمل"
"عيونى يا قمر"
وطلع اسماعيل فلوس من الدرج...ومد ايده بالفلوس
مدت انتصار ايدها تاخد الفلوس... مسك اسماعيل ايدها
ضحكت له بدلع وهى بتاخد الفلوس

رقية من بعد رسالة كامل وهى عاشت متجنبة كل الناس
حتى مامتها... وقفلت الاكونت بتاعها واخدت اجازة من الشغل
وبعد شهر كانت فيه فى قمة الاحباط...بدأت تمارس حياتها المملة كنوع من تأدية الواجب...فى انها تروح الشغل او ترد على مامتها لما تكلمها... او ترد على نور
عملت لنفسها اكونت جديد على الفيس باسم مستعار ومن غير اى معلومات حقيقية عنها
حست بمتعة اكبر وهى بتتعرف على ناس جديدة وتقول معلومات غير معلوماتها...واسم غير اسمها
وسعت دايرة معارفها...اللى بعدت فيها عن كل اللى يعرفوها فى الحقيقة
*****************************************

بعد 3 شهور... "6شهور من سفر مراد"
مراد داخل الاوضة اللى ساكن فيها
دخل على سريره... ورمى نفسه على السرير بعد يوم شغل طويل
وسمع خبط على الباب... وفجأة الباب اتكسر وظهر البوليس

مايسة قاعدة مع مامتها فى البيت...
صادق"حطوا لنا العشا بقى"
هند"حاضر"
دخلت هند المطبخ ودخل وراها صادق
"هى مايسة بقت بتيجى كتير ليه"
"مش بتيجى بخيرها ولا ايه...جوزها بيبعت معاها مصروفها ومصروف عيالها"
"مش قصدى على كده"
"تقصد ايه"
"مش كان بيشتكى انها مش مهتمة بيه... انا خايف تكون بتيجى غصب عنه "
"لا متخافش... هو اللى بيقولها تيجى علشان شايف العيال مغلبينها"
"طيب طمنتينى"
وسمعوا جرس الباب

مايسة قامت تفتح الباب...صرخت
"مراااااااااااااااااد... مامااااااااا مراد يامامااااا"
خرجوا من المطبخ يجروا
شافوا مراد قصادهم ومايسة بتحضنه
جريت عليه هند
"ياحبيبى يا بنى...حمدالله على سلامتك"
اخدته فى حضنها... عيط مراد وهو فى حضن هند
"مالك يامراد...مالك يابنى"
"انا جيت مترحل يا ماما"
صادق وهو واقف مكانه
"حمدالله ع السلامة"
وراح مراد يسلم عليه... سلم عليه صادق
"هو انت لحقت؟؟"
"البوليس طب عليا فجأة ورحلونى"
"عادى.. ايه الفرق ماانت فاشل هنا هتنجح يعنى هناك"
وقف مراد مصدوم من كلام صادق... مسح دموعه
"معاك حق... انا فعلا فاشل فى كل حاجة احاول فيها"



هناك 26 تعليقًا:

  1. حلوووووووووه جدا والاحداث بتزيد اثاره بس قصيره حاولى تطولى الحلقه شويه

    ردحذف
  2. بجد انتصار ديه واحده زباله ديه هاتقلب اسماعيل الاهبل ف فلوسه يعينى عليكى يامايسه
    ومراد صعبان عليه اوى مالوش حظ
    ورقيه صعبانه عليه كمان بختها قليل
    ومنها لله انتصار خطافه الرجاله

    ردحذف
  3. حلوه جدااااااااااااااااااااااااااااااااااااا

    ردحذف
  4. تحفه الحلـقـه دى :D بس قصيره اوووى وياااريت تحاولى تنزلى حلقتين ف اليوم :)

    ردحذف
  5. صادق ده غريب الاطوار يعنى ابنه يعمل ايه اكتر من كده مش بدل ميطبط عليه ويحمد ربنا انه جه بالسلامة يا ساااااااااتر
    واسماعيل ده زبالة ونهيته زبالة زيه وهو انتصار الزبالة بردوا ههههههههه
    تسلم ايدك يا دينا القصة حلوة اووووووى واحداث كل عيله مشوقة جدااااااااا

    ردحذف
  6. ديناااا الحلقة قصيرة اوووووووووي طوليها شوية بلييييييز

    ريموووو

    ردحذف
  7. الحلقه خطيره وشكل انتصار ديييييي حكايه من حكايات البلاوي

    ردحذف
  8. ربنا ياخدك يا صادق هو فيه اب كده

    ردحذف
  9. صادق ده عايز الحرق و الله العظيم يخرب بيته

    ردحذف
  10. تسلم ايداكى يا دودو مراد صعبان عليا اوى وحاسة انه هيصاب بحالة اكتئاب فظيعة بسبب كلام باباه


    dentist aya

    ردحذف
  11. حلوه اويييييييييييييييييييييييي

    ردحذف
  12. ياااا ساتر ايه صادق ده بنى آدم معقد نفسيا
    بجد الحلقة فيها حزن كتير اووووووى كده اوفر يا دينا الله يخليكى حسّنى الاوضاع شوية


    ddy dody

    ردحذف
  13. غيظانى اوي انتصار اويييي وصادق كمان مش بيحس ان ابنه تعبان ومايسة مظلومة اوييي من اسماعيل اخبار مريم وهانى وايه ايه

    ردحذف
  14. انا همووووووووت من اللى بيعمله صادق واسماعيل وربنا مع مراد ويصبر رقيه بس انا مش متصوره بنت وحشه اوى كده

    ردحذف
    الردود
    1. فعلا والله مش متصورة راجل كبير كدة وميرضاش بيها

      حذف
  15. ايه علاقة الاحداث الجاارية بالحلقة الجديدة؟؟
    جنا

    ردحذف
  16. أزال المؤلف هذا التعليق.

    ردحذف
  17. رووووووووووعة بجد والله
    وانتصار دى عايزة الحرق والله
    تسلم ايدك

    amira slama

    ردحذف
  18. رووووووووووووعة بجد والله

    ردحذف
  19. رووووووووووووووووووووووووووووووووعة

    ردحذف
  20. اشوووووووووف فيك يومم يا صادق انا بحب مرااد اووووووووى يارب يفرح بئا

    ردحذف
  21. ايه ام البرود اللى فيه صادق زفت ده بدل ما يقول كلمة عدلة للولد رايح يقوله ايه
    اشووووووووووووف فيييييييييييك يووووووووووووووووم يا صادق
    ولا الزفتة التانية اللى اسمها انتصار الهى تولعى بجاز انتى والجزمة اللى معاكى اللى اسمه اسماعيل ده عشان تبقى هىهىىهىههىهىهىهىهىهىهى براحتك
    اشوف فيكو يوم ده انتو حرقتو دم الواحد

    ردحذف
  22. رقية ومراد صعبانين عليااوى
    القصة حلوة موووووووووووت
    كالعادة يا دندن

    ردحذف
  23. رووووووووعة مراد صعبان عليا وكمان رقية

    ردحذف
  24. ولهي صادق دع راجل كلب وابن زي مراد ده خسارفيه ورقيه دي بت هبله وراميه نفسها

    ردحذف
  25. هو دا اللى يستاهله جوز مايسه فعلا .. كانت معاه البنت الصغيره الكويسه
    مراد تعب و اتوقعله حاجه حلوه
    رقيه ممم مش عارفه
    ولاااااااااء

    ردحذف

قول رأيك بلاش تقرا وتقفل من سكات...ارائكم تهمنى