الجمعة، 7 ديسمبر، 2012

جوه البيوت... الحلقة 11

الحلقة 11
تانى يوم الصبح...مراد راح لسامى السايبر
سامى اول ما شاف مراد
"مرااااد!!!"
وقام من على مكتبه...وسلم عليه باشتياق
"حمدالله ع السلامة... ايه المفاجئة الحلوة دى"
وبحزن رد عليه مراد بعد ما رجع مراد على مكتبه
وهو بيقعد قصاده
"لا حلوة ولا حاجة...انا اترحلت"
"يا خبر... حصل ازاى ده"
"ولا حاجة ...راجع عادى هوب الباب خبط هوب البوليس بقى فوق دماغى ف كلمة ونص لقيت نفسى فى المطار"
"معلش يا صاحبى... كل شئ نصيب"
"الحمدلله انى سديت دينك وفلوس امى هرجعالها...وبكده ابقى زى ماروحت زى ماجيت"
"الحمدلله انك رجعت بالسلامة... ده انت وقعت قلبنا اسبوع ياراجل"
"هه.. وابويا مستناش عليه للصبح قبل ما ينغص عليا عيشتى بكلامه"
"هو طبعه ولا هيشتريه"
"عارف...بس انا فيا اللى مكفينى"
"روق يا راجل بكرة ربنا يفرجها"
"يارب"

نور بتقدم الشاى لفوقية...حطته قدامها وقعدت وجودى ف حجرها
رقية قاعدة على بعيد على الكمبيوتر

فوقية"خلصتى الاوراق كلها يانور"
"اه ياماما...بكرة الصبح ان شاءالله هروح اقدم لها"
"مش هتبقى بعيدة عليكى المدرسة دى"
"مش مهم .. كده كده هوديها واجيبها...بس المدرسة دى تعليمها حلو وبيخرجوا منها على ابتدائى متأسسين كويس"
"اللى تشوفيه يا نور... وعقبال ما تروح الكلية"
"فى حياتك ياماما"
وخبط الباب... قامت نور تفتح
"اهلا يامريم... اتفضلى"
دخلت مريم تسلم
رقية وهى قاعدة مكانها...عوجت بؤها وقالت فى سرها
"الحشرية وصلت"

مايسة فى بيتها... اسماعيل معاها
"يالا يا مايسة ...اخلصى بقى"
"حاضر...كنت هنسى اخد بامبرز معايا"
"ولو نسيتى يعنى...ابقى اشترى مش معاكى فلوس"
"اسماعيل... انت بجد مش زعلان انى بروح عند ماما واقعد عندها"
"لا طبعا... مامتك صحتها تعبانة ووقفت جنبك كتير واجب عليكى تروحى لها وتبقى جنبها"
"ربنا يخليك يا اسماعيل... انا جاهزة"
اخد اسماعيل شنطة هدوم وشال طفل ومايسة شالت طفل تانى ونزلوا

وقف لها تاكسى وركبها... وهو بيحاسب التاكسى
"لما توصلى هناك ابقى خلى حد ينزلك يشيل معاكى العيال"
"حاضر"

اسماعيل بيخبط على باب انتصار
فتحت له... دخل بسرعة وهو بيبص حواليه
"اقفلى بسرعة قبل ما حد يطلع ولا ينزل"
دخل وقفلت انتصار الباب
"اتأخرت كده ليه"
قرب منها يحضنها
"كنت بوزعها"
فلتت من ايده
"هيهيهيهيهي... مستعجل على ايه"
"وحشتينى يا ستى وعايز اقعد معاكى"
"ما احنا هنقعد براحتنا"
قعد على الكنبة... وقعدت جنبه
"انتى متأكدة انه مسافر فعلا"
"اه متأكدة..انت خايف ولا ايه"
"يعنى...لاحسن ييجى فجأة ولا حاجة...مش كان عندى احسن"
"مش ببقى براحتى فى شقتك... وبعدين مالك خايف كده ليه...قلتلك مسافر ومش راجع الا بالليل"
"خلاص ياستى...يرجع بالليل ولا انشالله ما رجع"
قامت من ع الكنبة
"تشرب ايه"
شدها من ايدها...قعدت جنبه
"استنى اما اوريكى حاجة"
طلع تليفونه... وفتحه
"هيهيهيهيهيهي...يا قليل الادب"
"مش هتتفرجى طيب... دى الحاجات دى مبتطلعش لحد خالص"
"هتفرج طبعا... بس حتى مايسة مبتتفرجش"
"ليه السيرة دى طيب...لا طبعا مبتتفرجش... الحاجات دى مزاج ولو اتفرجت هتقل مزاجى وتعكنن عليا... انا يقفل عليا واتفرج براحتى من غير وجع دماغ"
"يخربيتك ده انت داهية"
"سكر وعسل والنبى"
"هيهيهيهيهيهيهيهي"

مريم فى البيت... قاعدة مع آيه بتقطف ملوخية
"ماماااا... هو انا حلوة"
"طبعا يا بت انتى زى القمر"
"طيب مين احلى.. انا ولا روان"
وسمعت مريم صوت حد طالع ع السلم
قامت بسرعة...بصت من العين
حطت ودنها ع الباب
"مين ياماما"
شاورت لها مريم انها تسكت...لحظات ورجعت
"دى ام اسلام طالعة هى وجوزها وبيتكلموا"
"بيتكلموا علينا؟؟"
"لأ ...بس يا خسارة مسمعتش صوتهم كان واطى اوى"
"طيب مش مهم... المهم بقى قوليلى انا احلى ولا روان"
"انتى طبعا... ليه"
"اصل..."
وقامت مريم مرة واحد تجرى على البلكونة
مسكت قماشة ومسحت سور البلكونة ببطء
وبعد شوية رجعت تكمل قطف الملوخية
"جريتى كده ليه ياماما"
"اصل سمعت مروان بينادى على مامته وهو نازل من شوية...كنت بشوف بيناولها ايه"
"طيب"
"هااا كملى"
"لا خلاص... كملى بقى الملوخية انا هقعد ع النت شوية"

صادق قاعد بيتكلم فى التليفون
مراد فى اوضته والباب مفتوح
"خلاص يا حسنى والله لو عرفت الاقى حد هقولك... انت عايز وردية واحدة ولا اتنين... ماشى ... اه صحابى ف القهوة كتير واكيد هلاقى.. بكرة هطقس كده واكلمك... طبعا مش اى حد لازم يكون ثقة... تمام...مع السلامة"
خلص صادق كلامه... والتفت لهند
"حسنى اشترى تاكسى جديد وعايزنى اشوف له سواق"
"وانت تعرف سواقين"
"اهو هسأله صحابى ع القهوة واللى يعرف حد يقوله"
"وانت مالك افرض واحد طلع حرامى ولا نيلة"
"هو قصدنى اشوف له حد... المفروض هو بقى ياخد اللى يضمن له حقه"
مراد سمع حوارهم...خرج من اوضته
"ومتقوليش ليه انا يابابا"
"انت؟؟"
"اه...مش اشتغلت مندوب مبيعات قبل كده ومعايا رخصة تالتة"
ورد صادق وهو بيشوح بايده ويدور وشه
"اخاف منك"
لف له مراد فى مواجهته
"تخاف منى ؟؟؟ ليه حرامى؟؟"
هند"يا ساتر عليك راجل وعلى الدبش اللى بتحدفه من بؤك"
صادق"اسكتى ياولية انتى"
هند"اسكت ليه انت تمد لبره وابنك لأ.. ما تكلمهوله"
مراد"وتخاف منى انا يابابا ليه؟؟ فهمنى"
صادق"انت مبتقعدش ف شغل ومش بتاع شغل وهو عايز حد يشتغل ع التاكسى طول اليوم...هتقدر"
مراد"انا مش بتاع شغل... والله العظيم انا بشتغل ومهما بيحصل بفضل مستحمل وكل اللى شغل اللى فات كانت بتحصل ظروف... مش ذنبى انا خالص"
هند"اتصل بيه...اعمل حاجة عدلة بقى"
صادق"سكت امك دى بدل ما اولع فيها"
مراد "بتهزر معاك يابابا... هتكلمه؟؟"
صادق"امرى لله"
ومسك صادق التليفون واتصل بصاحبه
"الو... ايوه ياحسنى...حظك بقى انى لقيتلك سواق ...مراد ابنى...بس بقولك ايه...عامله زيه زى الغريب مش علشان ابنى يبقى له معاملة خاصة... اه معاه رخصة ...مش عارف...خد كلمه واتفقوا هتعملوا ايه"
وناول مراد التليفون ... يتكلم مع حسنى
"سلامو عليكو ياحاج حسنى"

اروى على السرير... وجنبها البيبى
"انا نازل يا حبيبتى مش عايزة حاجة"
"لوجى فين"
"مع مامتك فى المطبخ"
"الدراسة هتبدأ كمان يومين يا سامى ... مين هيودى لوجى ويجيبها"
"انا مقدرش اصحا بدرى انا بقفل السايبر الفجر"
"وانا مش هقدر اخد ياسين وانزل اوديها واجيبها"
"باص المدرسة منفعش ليه"
"قالوا لى اكتفى خلاص باللى اشتركوا"
"طيب ربنا يسهل...هشوف حل"

سامى قاعد فى السايبر... فاتح الفيس وبيكتب فى بيدجات
شاف اكونت بإسم "رقة النسيم" عمل له لايك على كومنت
دخل الاكونت بتاعها... شاف معلومات عامة
بعت اد ... قبلته
فرح سامى بالصديقة الجديدة... وبدأ معاها الكلام
"هاى...ممكن نتعرف"

رقية قاعدة على النت ... بتكتب فى بيدج
شافت كومنت عجبها عملت عليه لايك
بعدها جالها اد من الاكونت اللى بإسم سمسم المصرى
قبلته... وكتب لها فى الشات
"هاى ممكن نتعرف"
"ممكن"
"انا سمير وانتى"
"انا رقية"
"بتدرسى؟؟"
"لا مخلصة وقاعدة فى البيت وانت"
"انا بشتغل فى شركة دعاية واعلان وعندى 25سنة..وانتى كام سنة"
"24"

سامى فرحان بالتعارف الجديد... وقف تاكسى قدام السايبر
سامى بيبص على التاكسى اللى سد عليه الشارع
بيقوم علشان يقوله ميركنش...شاف مراد نازل منه
"ايه ده...مبروك"
"شغلتى الجديدة يا سيدى"
"ع البركة... بس كده من غير ماتقول"
"ده الموضوع كله حصل فى لحظة امبارح"
"حلو التاكسى"
"اتفضل"
"قسط؟؟"
"انت فاكرنى اشتريته...ياريت...انا شغال عليه"
"يالا اهو احسن من قعدة البيت"
"الحمدلله"
"طب بقولك ايه انت جيتلى من السما"
"خير"
"البت لوجى هتروح المدرسة بعد بكرة ... اعملها ابونيه معاك"
"لوجى دى حبيبتى"
"يعنى تمام"
"تمام...افوت عليها الساعة كام ومدرسة ايه؟؟"

نور الصبح...بتلبس جودى
"ورينى القمر كده...ماشاءالله ربنا يحميكى يا حبيبتى...روحى فرجى تيتة على لبس المدرسة لحد ما اكمل لبسى"
"حاضر"
خرجت جودى... وبصت نور لصورة ضياء
"الله يرحمك...سنة ونص فاتوا وكل يوم انا ف عذاب من غيرك"
مسحت دمعة نزلت غصب عنها وهى سامعة جودى بتنادى عليها
كملت لبسها بسرعة... وخرجت

فى المدرسة
نور واقفة وجودى فى ايديها
مراد واقف ولوجى فى ايديه
وقفت مدرسة الفصل
"لو سمحتوا يا جماعة... احنا هننادى على الاسماء اسم اسم وناخد بيانات اولياء الامور... اللى ناديه اسم ابنه يدخله الفصل بنفسه"

وبدأت تنادى على الاسماء
مراد عينيه على نور... اتشد لها اول ماعينيه جت عليها
لما شاف بنتها فى ايديها...لام نفسه على نظرته العابرة ليها...بعد وشه عنها
نور لمحت مراد بيبص عليها... استغربت...دورت وشها بسرعة
مراد بدون شعور عينيه بتروح لنور... وكل ما يبعد عينيه عنها يرجع يبص لها تانى...لحد ما شافها بتبص له هى كمان لحظة وتبعد وشها عنه
نظرات سريعة خاطفة...انتهت بسماع نور
"جودى ضياء...جودى ضياء هنا؟؟"
دخلت نور الفصل...قعدت لوجى مكانها...سلمت عليها وخرجت
وهى خارجة لمحت مراد بيبص عليها
ارتبكت...سرعت خطواتها وخرجت من المدرسة وقلبها بيدق

هناك 24 تعليقًا:

  1. tres bien y dody
    :* :*

    ردحذف
  2. جاااااااااااااااامده جدا حتسبينا متشوقين كده للحلقه الجايه يوم السبت كتير اوى كده مافيش حلقه تانيه

    ردحذف
  3. جاااااااااااااامده اوى

    ردحذف
  4. رووووووووووووووووووووووووعة اوووووى
    بس بليييييز متغبيش علينااا وطوليها شويتيتن تلاتة ^_^
    انا بفتح نت بس عشان حلقاتك

    ردحذف
  5. رااااااااااااائعة بجد بس سامى شكله كده هيظبط نور ورقية بس تفكيره غلط خااااالص بالنسبة للتسالى مع البنات ع الفيس

    ردحذف
  6. تحفه الحلقه بس قصيره بردووو :)

    ردحذف
  7. جامده جدا بس شكل مراد هايحب نور ولا ايه ؟ وشكل رقيه وسامى هما اللى بيتعرفو على بعض

    ردحذف
  8. تحفه اووووووووى يادينا الحلقه ليه بتبفى صغيره نفسى تتطول شويه ونفسى مريم دى تتهد واسماعيل ينضرب على وشه اخرته سوده ان شالله

    ردحذف
  9. حلوه مووووووووووووووووووووووووت

    ردحذف
  10. :( دى حلقة نونو اووووووووووووووووووى






    youmyy

    ردحذف
  11. حلوة بس في حاجات كتير بتقع منك زي مثلا كنتي قلتي قبل كدة ان رقية عملت اكونت بمعلومات غير حقيقية غير اسمها وغير سنها ... وهنا كاتبة انها قالت اسمها !! كدة في تناقض .. بس الحلقة جميلة مشوقة :-)
    Nancy

    ردحذف
  12. شكرا جزيلا ليكم جميعا

    بالنسبة لموضوع حاجات بتقع...الحتة دى موقعتش منى ولا حاجة وفاكراها
    الاكونت مش باسمها وباسم مستعار انما لما سألها قالت اسمها الاولانى عادى وباقى المعلومات غلط... التناقض فيها هى وفى تصرفاتها
    مش انا اللى نسيت

    ردحذف
  13. هههههههههههههههههه يخرب عقلها مريم دى موتتنى من الضحك
    بس بجد مكنتش اتخيل طريقة التعارف تكون كده برافو عليكى يا دينا والله الحلقة جميلة جداااا


    ddy dody

    ردحذف
  14. الموضووووووووووووع كبير كبير اوي عنى متشوقه للجاي

    ردحذف
  15. انت عبقرية يا دينا دى اقل كلمة ممكن اوصفك بيها لما ربطى بين العلتين بالطريقة الغيرمتوقعة دى منتظرة الحلقات الجاية بفارغ الصبر
    dentist aya

    ردحذف
  16. حلووووووووووووة أوووووووووي يا دينا

    ردحذف
  17. اهاا تمام اويي لا بس صح تصرفاتها متناقضة دي مريضة نفسية :-D جامدة بصراحة الحلقات ومستنية اعرف الجديد

    Nancy

    ردحذف
  18. روووووووووعة روععة بجد
    تسلم ايددك

    amira slama

    ردحذف
  19. أزال أحد مشرفي المدونة هذا التعليق.

    ردحذف
  20. مريم دي مسخرة مصيبة هو في كدة :)
    واسماعيل وانتصار ان شاء الله يولعوا بجار ^_^

    ردحذف
  21. مريم دى كرهتنى فى اسمى
    الهى تولع بجاز مع السفلة التانيين اسماعيل ومدام هىهىهىهىى بتاعته
    هيبقى يوم اسود عليهم لو وقعو فى ايدى

    ردحذف
  22. تحفة الاحداث شكلها هتبقى ممتعة اكتر واكتر

    ردحذف
  23. ممتعة بس قصيرة

    ا

    ردحذف

قول رأيك بلاش تقرا وتقفل من سكات...ارائكم تهمنى