الأحد، 9 ديسمبر 2012

جوه البيوت... الحلقة 13

الحلقة 13
مايسة قاعدة فى الانتريه..ماسكة كيس المخدة ودموعها فى عينيها
الباب بيتفتح واسماعيل يدخل
"انتى جيتى؟"
مايسة بتبص له ومبتردش
"ايه مالك قاعدة كده العيال فين"
"ناموا...ايه ده"
رفعت كيس المخدة بتوريهوله
"ايه؟؟ماله ده"
"شم"
حدفته على وشه
هجم عليها وشدها من دراعها
"انتى اتجننتى يا بت انتى...بتحدفى الزفت ده ف وشى"
خلصت نفسها منه وهى بتعيط
"شمه وانت تعرف"
مسكه وشمه... فهم قصدها...وبسرعة رد عليها
"شميت...ماله"
"مش عارف ...ده برفان نفاذ...برفان اول مرة اشمه"
"ولنفرض...ايه بقى"
"يعنى ست دخلت بيتى وانا مش موجودة...بتخونى يا اسماعيل...ليه قصرت معاك ف ايه"
"خيانة... استهدى بالله كده واعقلى وبلاش تسمعى كلام الشيطان"
"الشيطان يبقى انت ...ايه البرود اللى انت فيه ده...انا بغلى وانت بارد كده"
"اللهم طولك ياروح"
وصرخت مايسة ف وشه
"بتخونى يا اسماعيل... بتنيم واحدة على سريرى"
"اخرسى يا بت الجيران هيسمعوكى"
"خليهم يسمعوا علشان يعرفوا انك راجل ناقص وواطى"
وفجأة... نزلت ايد اسماعيل على خدها... وقعت من قوة ايده وصدمتها فى رد فعله

قضت مايسة طول الليل صاحية فى اوضة ولادها
واول ما النهار طلع...اتصلت بمامتها وحكت لها وهى بتعيط
وقبل ما تقفل
"ابعتيلى مراد ياخدنى... انا مش عايزة اقعد هنا بعد ما خاننى وضربنى"
"ضربك...الهى ينشك ف ايده...انا هجيلك انا وابوكى...مراد نزل من بدرى... انا لازم اوقفه عند حده...هو عندك"
"ايوه ...لسه نايم"
"نامت عليه حيطة... هنجيلك على طول"
"متتأخروش عليا"
قفلت مع هند... وقعدت مكانها بتراقب الساعة مستنية
                      ******************
بعد اقل من ساعة...سمعت الباب بيخبط
فرحت انهم جم قبل ما اسماعيل ينزل...عايزاهم ياخدوا لها حقها
راحت فتحت لهم...وبعد ما سلمت عليهم
صادق"امك قالتلى انه ضربك...صحيح؟؟"
مايسة وهى بتعيط"ايوه يا بابا"
هند وهى بتاخدها فى حضنها
"متزعليش ... ليكى اهل ياخدولك حقك"
صادق"اسكتى انتى متولعيهاش... ضربك ليه اكيد فيه سبب"
وظهر اسماعيل قدامهم فجأة
"قولى لابوكى ضربتك ليه...قوليله انك بتشتمى جوزك"
بص لها صادق
"ايه؟؟ تشتم جوزها"
اسماعيل"لا مؤاخذة مرحبتش بيكم... قومى اعملى فطار يا مايسة وبعدين نتكلم"
هند"لمين احنا فطرنا الحمدلله"
صادق"اعملى فطار لجوزك وبعدين نتكلم"
مايسة بتزعق"مش عاملة... وهو خلاص مش جوزى...مش بيخوننى خليه بقى يطلقنى"
صادق"اخررررسى يابت...طلاق ايه انتى اتجنيتى"
مايسة"بيخونى وضربنى يابابا"
هند وهى بتغمزلها تسكت
"ربنا ما يجيب طلاق... بس برضه مينفعش اللى بيحصل ده يااسماعيل"
اسماعيل"خلصتوا كلكم كلام...اتكلم انا بقى"
مايسة"انت لسه عندك حاجة تقولها"
اسماعيل"ايوه... بنتكم مجنونة وبيحصل لها تهيؤات ودى مش اول مرة"
هند"مجنونة ... كفى الله الشر بنتنا ست العاقلين"
صادق ساكت وبيسمع اسماعيل وهو بيكمل
"انا مش عارف خيانة ايه...هى الخيانة دى معناها ايه؟ اسألوها كده شافتنى مع حد ولا شافت حد فى البيت"
بصوا لها وقبل ما يسألوها ردت
"وانا بغير كيس المخدة شميت برفان حريمى نفاذ"
اسماعيل بيضحك
"اهو... شمت... الكلب هول الهانم هتتهمنى علشان شمت... يا ناس دى قبل كده صحتنى الفجر وتقولى فيه ست ف الاوضة...قلتلها فتشيها...وطبعا ولا لقت حد ولا سبت"
نظرات هند وصادق كانت اتهام ليها وهما بيبصوا لها
"والله يومها سمعت صوت واحدة ست"
اسماعيل"تااااااااانى؟؟"
صادق"لموا الدور بقى مالكوش الا بعض علشان ولادكم"
اسماعيل"انا بشتكيلك من بنتك... فيه بنت متربية تشتم جوزها"
هند"بنتنا متربية يااسماعيل"
اسماعيل"مقولتش حاجة ياحاجة... بس اللى تشتم جوزها تبقى محتاجة ايه"
وقام صادق بعصبية عايز يضربها
"محتاجة تتربى من اول وجديد"
دخلت مايسة ف حضن مامتها تحتمى فيها
هند"جرى ايه...انت فاكرها عيلة صغيرة"
اسماعيل"خلاص ياحاج...خلاص...انا هسامحها المرة دى هعتبر اعصابها تعبانة وغلطت وهعديها..بس قسما بالله لو اتعادت سوا شتمتنى ولا شكت فيا... ماهعديها"
صادق"حقك يابنى....قومى صالحى جوزك وبوسى دماغه"
مايسة بتبص لمامتها تستنجد بيها
"راضيه يا حبيبتى...ربنا يهدى سركم يارب"
مايسة مكانها بتعيط من القهر
اسماعيل"خلاص سيبوها براحتها...انا قلت اللى عندى...ومعلش هقوم علشان الحق اروح المحل"

نور من اول الدراسة وهى كل يوم بتفكر فى مراد
مش قادرة تنسى نظراته ليها...قدامها طول الوقت
"مش ممكن طول الوقت بفكر فى راجل متجوز ومخلف... حتى لو هو كمان مشدود لى زى ما انا مشدودة ليه مش ممكن اسيب نفسى للتفكير فيه...مهما حصل مش هخرب بيت حد"
كل تفكيرها ان مراد ابو لوجى... ولما جه معاد المدرسة
قامت تلبس...بعد ما لبست وقفت قدام المراية تبص لنفسها
مدت ايديها على الميك اب ... وبدأت تحط لمسات خفيفة
خلصت...بصت لنفسها...عجبها شكلها...وافتكرت نظرات مراد... فرحت

راحت نور المدرسة...من اول مادخلت وهى بتدور على مراد بعينيها... مش لاقياه
دخلت اخدت جودى وهى بتدور على لوجى علشان تطمن مراد جه ومشى ولا لسه هييجى
ملقيتهاش.. اتضايقت ... ان مراد جه ومشى... وانها كمان مشافتوش الصبح... اخدت جودى وهى فى طريقها لباب المدرسة
"عملتى ايه ياحبيبتى النهاردة"
"اخدت نجمة وجود"
"برافو عليكى... ولوجى صاحبتك اخدت نجمة زيك"
"لأ... لوجى مجتش النهاردة"
عرفت نور انها مش هتشوف مراد... احبطت
خرجت من المدرسة ومعاها جودى... وهى ماشية فى طريقها
لمحت تاكسى واقف... بصت... شافت مراد
حست قلبها بيرقص... بتحاول تدارى ابتسامتها اللى اترسمت لوحدها... لمحت مراد بيبتسم لها... مشيت بسرعة من غير ما تبص عليه

انتصار رايحة المحل عند اسماعيل وسلم عليها بارتباك
"اهلا وسهلا"
"اهلا وسهلا؟؟ ايه المقابلة دى"
"مقابلة ايه...برحب بيكى"
"انت فين بقالك 3 ايام مش بتتصل ولا بترد عليا"
"مايسة عرفت"
"عرفت ايه؟؟عرفت اننا مع بعض"
"لا هى عرفت ان فيه ست دخلت الشقة بس متعرفش مين"
"وانت عملت ايه"
"بلفتها وبلفت اهلها وطلعتها غلطانة"
"ماانت حلو اهو...مالك ياراجل بتخاف منها ولا ايه"
"مش خوف بس لو جوزك عرف هتبقى فضيحة"
"هيهيهيهيهي ولا يقدر ... مش كفاية مستحملاه بفقره... ده اتجوزنى بشنطة هدومه"
"ياولية حرام عليكى...الراجل متمرمط طول اليوم فى شغلانتين"
"ولا ييجى حاجة جنب مصاريفى"
"هههه ياواثق انت"
"ايوه كده ارجع اسماعيل اللى يعجبنى"
"تحت امرك ياباشا... بس خلينا اليومين دول نهدى اللعب شوية علشان مش عايزين فضايح"
"بشووووقك...لما اوحشك كلمنى"
"انتى وحشانى على طول"
"هىهىهىهي "
"ااااااه من ضحكتك اللى مجننانى"
وقامت انتصار
"انا ماشية"
"مش عايزة حاجة"
"كلك نظر"
"من قبل الجميل ما يؤمر طلباته تُجاب"
وطلع فلوس من جيبه...
"خلى دول معاكى "
خدتهم انتصار
"تسلملى هىهىهىههىهى"

آيه وروان نازلين من عند ندى وقفوا قدام البيت
وليد واقف فى المحل
روان"ماتيجى نسلم عليه"
"لالا اتكسف"
"مش شايفة يبص لنا...والواد مز اوى"
"بس يا بت مز ايه"
"بذمتك مش عسل...يا لاااااهوى على العسل...اه ياقلبى"
"كل ده"
"اااااه... نفسى اكلمه "
"يالا بقى ياروان هيقول علينا ايه"
"يقول ايه يعنى...يمكن يحس انى معجبة وييجى يكلمنى"
وقرب منهم وليد
"آيه...قلبى هيقف وليد جاى علينا"
"يخربيتك ليكون سمعك"
"ازيك يا آيه ..ازيك ياروان"
ردوا عليه"الحمدلله"
"مالكم واقفين كده ليه"
روان"لا ابدا كنا بس بنتكلم شوية"
وليد"بلاش تقفوا كده فى الشارع...ياتطلعوا يا تمشوا"
آيه"لا هنمشى"
وليد"اوعوا تزعلوا انا خايف عليكم"
روان بفرحة"صح...باى"
مشيوا...وهما ماشيين
"شفتى ... يبقى بيحبنى وبيغير عليا"
"عرفتى منين"
"مش شايفاه حمش ازاى وبيقول نمشى وبلاش نقف... يارب يقولهالى يارب"
اتضايقت آيه... حست بالغيرة
"انا هركب تاكسى وامشى"
"طيب استنى نركب مع بعض"
"لأ انا رايحة اشترى حاجة الاول"
"حاجة ايه"
ومردتش عليها
"تاااااااااااااااكسى"
وقف لها تاكسى
"استنى يا بنتى مالك"
"اتأخرت...اشوفك بكرة فى المدرسة"
ركبت آيه التاكسى بسرعة...وهى فى الطريق بتاكل ضوافرها
"اشمعنى هى يعنى يهتم بيها وانا لأ... هى مش احلى منى... يا بختها بتحب وهو هيحبها واكيد هيخطبها...محظوظة مهندس وامور وابوه مرتاح... بس مين قال انه بيحبها...يمكن بيحبنى انا... اه ممكن أنا ليه لأ؟؟"
طول الطريق وهى بتفكر... وقررت انها هتحكى لمامتها وتسألها هو ممكن يكون بيحب روان فعلا
                       ******************
لما طلعت البيت....كان الباب مفتوح
دخلت شافت الانتريه مش موجود... وفيه جرادل بوية
"ايه ياماما العفش فين"
"مكومة الحاجة فى اوضة اخواتك علشان هنبيَض بكرة"
"فجأة كده"
"غيرى هدومك وتعالى ساعدينى"
"ورايا مذاكرة وكنت عايزة اتكلم معاكى"
"لا مش فاضية خالص...لما نخلص البيت ويتوضب ونفرش نبقى نتكلم"
وباحباط"طيب"
"بقولك ايه... انا حطيت حاجات فى اوضتك"
"ماشى"
دخلت آيه اوضتها... شافت الكمبيوتر عندها
"مامااااا... الكمبيوتر هيشتغل هنا"
صوت مريم"آآآآآآآآه... مظبطة لك الكهربا وكل حاجة لو عايزاه"
بصت آيه للكمبيوتر بفرحة ... وقفلت الباب وراحت قعدت عليه

رقية بتكلم سامى كالعادة ...وفجأة سألها
"اوصفيلى شكلك يا رقية"
"معرفش اوصف"
"طيب عايز اشوف صورتك"
"ليه"
"ما انا مش معقول اكون بحب واحدة معرفش شكلها"
"بتحبنى بجد"
"طبعا"
"وافرض معجبتكش"
"بحبك برضه...انا مش عايز اشوف صورتك علشان تعجبينى ولا لأ...انا عايزها علشان اعرف اتخيلك"
"بلاش"
"خلاص يا رقية...لو مش واثقة فيا انتى حرة...سلام"
"استنى انت هتقفل"
"معلش سيبينى ... انتى جرحتينى"
"انا اسفة"
"هتوريلى صورتك"
"ايوه ثوانى"
وفتحت رقية ملفات الصور علشان تختار صورة حلوة ليها تبعتهاله
كل ما تشوف صورة تخاف متعجبوش... وف وسط الصور كان فيه صور لنور... صورتها جنب صورة نور باينة اوى مين الاجمل والاصغر... فكرت لحظات...واختارت احلى صورة موجودة لنور... وبعتتها لسامى
"صورتى اهى"


هناك 21 تعليقًا:

  1. تجننننننننننننننن

    ردحذف
  2. يخربيييييييييييتك ازاى تعمل كده
    كده ممكن نور تعرف الحكاية دى عن طريق مراد بس شكلها لسه شوية مش دلوقتى
    مش معقول الدنيا صغيرة للدرجة دى يعنى


    ddy dody

    ردحذف
  3. غبية اوى رقية دى و بتصرفاتها دى عمرها ما حتتجوز بتتصرف كأنها عيلة صغيرة
    asmaa

    ردحذف
  4. اوباااااااااااااااااااا ديه احلوت اوى كده رقيه عملت كارثه ممكن سامى يورى الصوره لمراد

    ردحذف
    الردود
    1. ااااه و الله ...
      ده لو كده فعلا تبقى جاااااامدة اووووى :)))

      حذف
  5. ينهاااااااااااااااااااار اسووووووووووووووووووووووح بجد مش متخيلة الموقف ازاى
    بجد هيا ازاى تعمل كدة فيهاااا
    انا حاسة ان هتعجبو ويقول لمراد وبكدة يعرف مراد ان اللى بيشوفها هيا اللى صاحبو بيكلمها اوبا لو الاحداث دى صح هتبقى مصيبة بجد ربنا يستر والله
    حاسة مش هعرف استنى ليوم التلات :(

    amira slama

    ردحذف
  6. ايييييييييييييييييييييييييييه الحلاوة دي
    دي كده سخنت اوي
    انتي ملكيش حل يادودو والله

    ردحذف
  7. حلوه_حسيت اني عيشه القصه

    ردحذف
  8. نعم ايييييييييييييييه
    حراااااااااااااااام

    ردحذف
  9. كدا مراد هيشوف الصورة عندي سامي ويقول عنها انه ست مش كويسة ونور هي اللي هتتبهدل

    ردحذف
  10. أحسن رقيه دي مش طبيعيه ويكون اللي بتعمليه سبب أن نور تسيبهم وتبعد عنهم أكيد مش حاتعيش معاهم طول حياتها ورقيه مش مريحه

    ردحذف
  11. اوبس اوبس اوبس يخرب بيتها ازاي تعمل كدا

    mrmr mady

    ردحذف


  12. منها لله رقية دي ..................و اسماعيل و هيهيهيهيههيهيهيه دول عاوزين الحرق ......و هند و صادق مش غلطانين علي فكرة لانهم مالقيوش دليل واحد ع الزفت اسماعيل ده و طبيعي رد فعلهم علشان مايخربوش علي بنتهم ..............اما اللي صعبانين عليا نور و مراد بجد و نفسي يتجوزا في نهاية الحلقات بس العقربة روقية دي مش هتسيبها في حالها و خصوصا لما سامي هيعجب بالصورة ...............ربنا يستر من اللي جااااااااااي ززززززززززززز


    رحاب علي

    ردحذف
  13. الحلقة جميلة اوي مستنين اللي بعدها

    ردحذف
  14. لالالالا يا دينا انا عايزة مراد ونور يتجوزوا بققققققققققققققققى ممكن سامي يوري الصورة لمراد :(

    ردحذف
  15. يالهوييييييييييييييييى رقية دى مش طبيعية دى اكيد مريضة نفسيا وعجبانى اوى قصة حب نور و مراد القصة كل ما بتروح بتسخن وتحلو استمريييييييى يا دودو
    dentist aya








    ردحذف
  16. رووووووووووووووووعة اوى :)

    ردحذف
  17. رقية دي مريضة نفسياً وحيوانة بجد ازاي تعمل كدة !!!
    علي ما تظهر الحقيقة هتكون نور اتعذبت

    ردحذف
  18. غبية فعلا رقية دى

    ردحذف
  19. تحفة الحلقة والاحداث مشوقة

    ردحذف

قول رأيك بلاش تقرا وتقفل من سكات...ارائكم تهمنى