الثلاثاء، 11 ديسمبر 2012

جوه البيوت... الحلقة 14

الحلقة 14
وبعت لها سامى
"ايه الجمال ده يا رقية...زى القمر"
"وافرض مكنتش حلوة كده كنت هتقول ايه"
"انا حبيتك يعنى طلعتى حلوة طلعتى وحشة عاجبانى"
ونادت فوقية على رقية
"انا هقفل معاك شوية وراجعة"
"ماشى مستنيكى"
قامت رقية قعدت مع مامتها
"عايزة حاجة ياماما"
"لا انا بس عايزة اقعد معاكى شوية... انتى طول اليوم قاعدة ع الكمبيوتر ده"
"هو ده اللى بيسلينى ياماما..فيها ايه"
"مفيهاش حاجة"
"مش نور قاعدة معاكى طول الوقت...هى فين صحيح"
"نزلت تجيب حاجات من تحت وجودى شبطت فيها"
"طيب ...عايزة حاجة"
"انتى مستعجلة اوى كده ليه...مش عايزة تقعدى معايا 5 دقايق"
"يوووووو فى ايه ياماما...انتى مستكترة عليا الحاجة اللى بتفرحنى"
"لا يا بنتى...قومى براحتك ربنا يفرح قلبك"
قامت رقية... فتحت الاكونت...ملقيتش سامى
اتضايقت وقفلت ودخلت اوضتها وهى متغاظة ان مامتها نادت عليها لحد ما سامى قفل
                             ****************
رقية فى اوضتها طول الوقت بتفكر فى سامى سمعت منه كلام حلو عمرها ما سمعته... حست معاه بمشاعر عمرها ما حسيتها... بتحلم باليوم اللى يقولها انه عايز يتقدملها... وكانت بتقنع نفسها انه لو حبها الاول يبقى هيقبلها بأى حال... كل كلامه بيأكد انه بيحبها..هى كمان حبته من كل قلبها... بقالها اكتر من شهر تعرفه وبتكلمه اكتر ما بتكلم اللى عايشين معاها ف البيت... بتفكر تقوله الحقيقة ولا لأ...وياترى هيكون ايه رد فعله... وقررت انها مش لازم تقوله على الاقل دلوقتى

آيه قاعدة تبص على الكمبيوتر... وفتحت الفيس
ودورت على اكونت ندى ملقيتوش... اتصلت بيها تسألها على اسم الاكونت علشان تضيفها... قالتلها ندى على الاسم وبعد ماقفلوا...دورت آيه ...لقيت الاكونت ...بعتتلها اد...وقبلته ندى فى نفس الوقت واتكلموا... وسألتها عن حاجات فى الدرس وقعدوا يتكلموا شوية...وقالت ندى انها هتقفل علشان وراها درس تانى
بعد ما قامت ندى... قعدت آيه تدور فى اكونت ندى على اكونت وليد... فرحت لما لقيته بسهولة من اكونت ندى...بعتتله اد... واستنت انه يقبل... فضلت مستنية... الوقت بيجرى وهى وراها مذاكرة قبل ماتنام... بعد ساعتين قاعدة مستنية...قفلت وقامت وهى محبطة وبتحاول تقنع نفسها انه يمكن مكنش قاعد ولا فاتح الفيس

مراد دخل عند سامى السايبر بالليل
"تعالى ياعم... اروى مأكدة عليا اقولك تسأل على مستوى لوجى"
"مستوى لوجى هههههه الله يرحم"
"اسألها وخلاص ماهى فاكرة بنتها فى ثانوية عامة مش كى جى 1"
"حاضر من عينيا"
"عامل ايه فى الشغل... مرتاح"
"الحمدلله... اهو الامور ماشية تمام... بس حصلت معايا حاجة مكنتش تخطر لى على بال"
"ايه؟؟"
"بحب"
"هههههه اخيراااا... الف مبروك"
رد مراد بحزن"مبروك على ايه...ده حب من غير امل"
وغنى سامى"والحب من غير امل اسمى معانى الغرام"
"انت بتتريق وبتغنيلى"
وبجدية سأله سامى"احكيلى طيب من غير امل ليه"
بحزن "متجوزة"
رد سامى بخضة"ياخبر اسود...لأ كله الا كده"
"انت اللى بتنصحنى"
"انا بكلم بنات آه...انما مبكلمش متجوزين... انت كده هتودى نفسك ف داهية وكمان ازاى هى تقبل على نفسها كده"
"انت دماغك راحت فين...بقولك بحبها حب من غير امل يعنى لاعمرى كلمتها ولا كلمتنى ولا حتى اعرف اسمها ايه"
"ودى شفتها فين دى"
"فى المدرسة...بنتها مع لوجى ف الفصل"
"فكك من الموضوع ده علشان هيجيبلك مشاكل... لو على الحب الايام دى بكلم واحدة قمر 14 ..تعالى اوريهالك"
وفتح سامى الصور... وقبل ما يجيب صورة نور
قام مراد"مش بإيدى يا صاحبى...اهو حظى كده حتى يوم ما احب تطلع متجوزة...انا هطلع بقى علشان بقوم بدرى"
"براحتك يا صاحبى"

آيه وهى بتذاكر...اتصلت بيها روان
"ايوه ياروان... كنت هنام... وليد مين... معرفش بقى اذا بيحبك ولا لأ... انا اعرف منين... لالالالا اوعى تسأليه ولا تكلميه... علشان ميقولش عليكى قليلة الادب... معرفش يقصد ايه.. انا كنت بنام ياروان...بكرة نتكلم...تصبحى على خير"
قفلت معاها وهى بتفكر
"معقول يكون بيحبها هى؟؟ ان شاءالله هسبق انا واكلمه علشان اعرف هو كان يقصد مين بالظبط... لو عرفت انى ضفته هقولها ندى هى اللى بعتتلى ترشيحه كصديق... بس انا كده بخطفه منها؟؟ لالا طبعا بخطفه هو ايه لاخطيبها ولا جوزها ولا حتى قالها انه بيحبها... اممم اعمل ايه...اسأل مين؟؟ مفيش قدامى غير ماما بس هقولها ايه؟؟ اقولها اى حاجة وخلاص"
وقامت آيه راحت لمامتها فى اوضتها...كانت ممددة على السرير
"آآآآآه ياااااااانى.... اتهديت يا آيه"
"انتى اللى طلعتى فى حكاية التوضيب ده فجأة ياماما ...كنتى استنى فى الاجازة وكنت ساعدتك"
"لا ياختى حلاوتها ف حموتها كده"
"بقولك ايه ياماما...عايزة اسألك على حاجة"
"طيب بس بسرعة يا آيه...دماغى هتموتنى ياختى"
"سلامتك ياماما...بصى لو فيه حاجة عجبانى وانا عارفة انها عاجبة واحدة صاحبتى...المفروض اعمل ايه"
"تجرى وتسبقى وتجيبى الحاجة اللى انتى عايزاها قبل ماحد ياخدها"
"وصاحبتى"
"احنا مالنا...مسبقتش هى ليه"
"يعنى عادى"
"اه عادى...بس قوليلى ايه الحاجة اللى عجباكى... انا معييش فلوس خالص اشتريلك حاجة ...فلوس الجمعية كلها هتتصرف على التوضيب"
"لا ياماما متخافيش...انا كنت بتكلم عادى"
"طيب..سيبينى انام بقى اخواتك اتعشوا وناموا...اتعشى ونامى"
"حاضر"

نور وهى بتودى جودى المدرسة... بتتلفت حواليها يمكن تقابل مراد... شافت ان لسه لوجى مجتش وقالت يمكن مش جاية النهاردة او هتتأخر كالعادة...مشيت نور
بعد ما مشيت جه مراد بلوجى... وشاف جودى
"يالا اقعدى يا لوجى جنب جودى صاحبتك"
بعد ما قعدت...قبل ما يمشى سأل جودى
"مين جابك النهاردة يا جودى"
"ماما"
"هو بابا فى الشغل"
ردت ببراءة
"بابا عند ربنا مش بشوفه"
طبطب عليها مراد
احساس بين الفرحة والشفقة على جودى
خرج من المدرسة وهو هيطير من الفرحة ان نور ارملة مش زوجة

مايسة بتحط الفطار على السفرة... اسماعيل خلص لبس وبيقعد يفطر...قعدت معاه مايسة
"خدى يامايسة"
حط قدامها فلوس
"ايه ده"
"500 جنيه"
"ليه"
"مش عايزة بلاش"
"انا بسأل بس بتوع ايه دول"
"اشترى هدوم للعيال علشان داخلين على شتا"
"حاضر"
"هتروحى امتى"
"مش عارفة لما اتفق مع ماما ومراد علشان مش هعرف اروح اشترى بالعيال لوحدى ومراد يبقى يودينى ويجيبنى"
"ياستى لو عايزة تقعدى عند مامتك كام يوم...براحتك"
"لأ مش عايزة اقعد عندها"
"ليه... فيه حد يقول مش عايز يروح لامه"
"انت عايزنى اسيب البيت ليه...عايز تخرجنى منه وخلاص"
وخبط ايده على الترابيزة وقعت كوباية الشاى وقام وقف واخد الفلوس حطها فى جيب القميص
"انتى بتفكرى ازاى... انتى بتحبى تنرفزينى وخلاص"
"وانت ايه اللى ينرفزك...انا بسألك"
"وانا غلطان انى بقولك تروحى لامك...انا هعمل زى الرجالة اللى بتحرم نسوانها من اهلهم... انتى مينفعش معاكى الا الجزمة"
"اتكلم كويس يا اسماعيل انا مغلطتش فيك"
"علمينى يا بت...حتة عيلة زيك هتيجى تقولى اتكلم ازاى"
"انت اتعصبت ليه دلوقتى...انا بقولك مش عايزة ابات بره البيت"
"هترجعى تانى للهبل اللى ف دماغك"
"ومين قال ان فى دماغى حاجة....انا مش عايزة اسيبك لوحدك"
وفكرت مايسة ان اسلوب الرد مش بيجيب نتيجة معاه
قررت انها تستعمل كيد النسا اللى سمعت عنه كتير... عمرها ما جربته...بس زى ما سمعت انه فطرة طبيعية... وقالت لنفسها
"اجرب...هخسر ايه يعنى"
قربت من اسماعيل وهو واقف... قربت منه وحضنته
"هو انا غلطانة علشان مش عايزة ابعد عنك"
بص لها باستغراب
"من امتى ده"
"من دلوقتى"
اسماعيل مش مصدق ان مايسة هى اللى بتتكلم معاه دى
"مالك؟؟ مش عايز تحضنى"
حضنها اسماعيل
"مستغرب بس"
"ليه"
"الرقة والدلع ده كنتى حارمانى منهم ليه"
"عبيطة... لسه عايزنى اروح عند ماما"
"والله لو هتفضلى كده..يبقى ولا تروحى لمامتك ولا تبعدى عنى خالص"
بعدت عنه وهى بتبوسه ف خده
"يالا كمل فطار علشان متتأخرش على المحل"
"متهيألى الفطار مش هيطير ولا المحل كمان"
وضحكت مايسة
"يعنى ايه"
"تعالى اقولك"
ضحكت مايسة وهى بتاخد الفلوس تانى من جيبه
"عايزهم فى حاجة"

نور رايحة المدرسة بتفكر فى مراد وضميرها بيأنبها كالعادة انها بتفكر فى واحد متجوز واكيد نظراته ليها متعبرش عن اى حاجة
ومع ذلك مبتقدرش تمنع نفسها انها تفكر فيه وبتفرح لما بتشوفه
فرحت لما شافته فى التاكسى...كان لوحده ففهمت انه جاب لوجى وماشى... فرحت انها لحقت تشوفه قبل مايمشى
دخلت جودى المدرسة... وقعدت مع لوجى زى كل يوم
خرجت نور من المدرسة...شافت مراد لسه موجود
استغربت... وتبادلوا نظرات سريعة كعادتهم...ومشيت نور فى طريقها وهى بتسأل نفسها
"هو لسه واقف ليه"
شافت التاكسى ماشى جنبها...وقف على بعد خطوات منها
شافته بينزل من التاكسى... ارتبكت...سرعت خطواتها
شافته بيقف قصادها فجأة...ضربات قلبها بتتسارع
شلل فى التفكير...تعمل ايه لو كلمها...قبل ما تفكر
"ثوانى يامدام... ممكن كلمة"
وقفت تبص له مش عارفة تعمل ايه ...بتفكر
"ارد عليه ؟؟ ممكن يقول عليا ست مش كويسة...ولا امشى واسيبه من غير مااعرف عايز يقول ايه؟؟"

هناك 19 تعليقًا:

  1. تماااام كدةحلوة اوي نهاية الحلقة تسلم ايدك


    mrmr mady

    ردحذف
  2. l2aaaaaaaaaaaaaaa 3ayza kamaan 7l2aa msh hynf3 kdaaa :D :D

    ردحذف
  3. دايما بتقفليها كده عند حتة روعة :(

    ردحذف
  4. على طول يادينا تسيبنا كده متشوقيييييييييين

    ردحذف
  5. حلوووووووه بس قصيره :D
    soma

    ردحذف
  6. Hahah 7lwaa =D

    ردحذف
  7. تحففففففففففففة بجد

    ردحذف
  8. حلوة اووووووووووووووووى اصلا كل قصصك جميلة و مش بعرف اقوم من قدامها الا اما اقرا كل القصص اللى فاتتنى و مش بعرف اذاكر خالص و عندى امتحانات ينفع كده يعنى ؟ هههههههههههههههههههههههه
    asmaa

    ردحذف
  9. حلوة بس قصيرة قووووووووووى

    ردحذف
  10. حلو جدااااااااااااااااااا قفلة مشوقة اوى وعجبنى تصرف مايسة مع اسماعيل بس خايفة من المجهول الى مستنى نور بعد الى المجنونة رقية عملته بصراحة ملقتش وصف ليها غير كده تسلم ايداكى يا دودو
    dentist aya

    ردحذف
  11. بجد حلقة جامدة والقصة دية من احسن القصص بتاعتك
    mourad

    ردحذف
  12. حلوه مووووووووووووووت ويارب يعرف ان رقيه كدابه

    ردحذف
  13. ما شاء الله القصة والحلقات كلها جميلة جدا مش بعرف اقوم الا لما اقرا القصص ال فاتتني كلها بعد بالساعات قدام الكمبيوتر ومطنشة المذاكرة لو منجحتش انا بحملك المسؤلية :) اللهم اني بلغت اللهم فاشهد هههههههههههه

    ردحذف
  14. جامده جدااااااااااااااااااااا

    ردحذف
  15. حلووووووووووووووووة بقى

    ردحذف
  16. لا جاااااااااااااامدة الصراحة بجد انتى رهيبة
    تسلم ايدك يا دينااا

    amira slama

    ردحذف
  17. Gamilla Awiii Bs Y Reet L TkmlAa F Asr3 W2t plz :D

    ردحذف
  18. روووووووووووووعة اوى

    ردحذف
  19. برافو عليكى يامايسه

    ردحذف

قول رأيك بلاش تقرا وتقفل من سكات...ارائكم تهمنى