الأربعاء، 12 ديسمبر، 2012

جوه البيوت... الحلقة 15

الحلقة 15
وقفت تبص له مش عارفة تعمل ايه ...بتفكر
"ارد عليه ؟؟ ممكن يقول عليا ست مش كويسة...ولا امشى واسيبه من غير مااعرف عايز يقول ايه؟؟"
مشيت من غير ماترد عليه...سمعته بينادى عليها
"لو سمحتى... ثوانى"
والتفتت له
"نعم"
"ممكن اتكلم معاكى شوية"
"خير فيه حاجة تخص المدرسة"
"لأ"
"يبقى ميصحش حضرتك توقف مامة زميلة بنتك كده فى الشارع ومفيش حاجة مهمة"
"بنتى...بنتى مين...لوجى"
"ايوه...مش هى بنتك"
رد مراد وهو بيصحح لها فكرتها وف نفس الوقت فرحان انه بيكلمها وقت اطول شوية
"لأ..انا لا متجوز ولا مخلف...لوجى بنت صاحبى وانا بوصلها بس"
نور بتحارب تعبيرات وشها انها متبينش فرحتها انه مش متجوز
زودت تعابير وشها حدة ...قبل ما تكشفها
"طيب"
ولفت وكملت طريقها عادى وهى بتكتم ضحكتها
ومراد واقف مكانه...محرج وف نفس الوقت مقدر موقفها

آيه اول مارجعت من المدرسة... شافت مامتها واقفة مع النقاشين
واخواتها بيلعبوا ع السلم... دخلت اوضتها بسرعة وقبل ماتغير هدومها فتحت الكمبيوتر
واتفاجئت لما شافت ان وليد قبل الاد... وكمان قاعد اون لاين
اترددت تبدأ معاه كلام ولا تستنى شوية
قبل ما تقرر شافته بدأ
"هاى"
نطت من ع الكرسى وهى فرحانة... مسكت قلبها وقعدت تانى
"هاى"
"ازيك"
"الحمدلله"
"انتى انتى ولا انتى واحدة تانية"
"مين دى؟؟"
"انتى انهى آيه"
"هو فى ايات كتير ولا ايه"
"ندى عندها اصحاب كتير اسمهم آيه...انتى مين فيهم"
"انا اللى باخد درس عندكم ف البيت"
"كنت حاسس ...اصل القلوب عند بعضها"
"قصدك ايه"
"يعنى ...انا كمان عايز اضيفك علشان نتعرف"
"مااحنا نعرف بعض"
"لا انا قصدى نتعرف اكتر ... اصل بصراحة انا معجب بيكى من اول ماشفتك"
"بجد"
"اه طبعا"
ورن موبايل آيه...ولما شافت انها روان
"مش وقتك خالص"
ومردتش...واتكرر الاتصال
"وليد معلش ثوانى هرد على الموبايل "
"مين"
"دى صاحبتى"
"صاحبتك مين؟"
"دى روان"
"طيب خلصى معاها بسرعة علشان نكمل كلامنا"
"حاضر"
الموبايل كان بيرن كتير...ردت آيه
"الو.. ايه ياروان فى ايه"
"انتى قاعدة ع الفيس"
"ايوه"
"بتكلمى حد"
"ايه ياروان مالك ...حاشرة نفسك كده ليه"
"انتى ضيفتى وليد ليه"
"وانتى ايه اللى مضايقك يعنى"
"مش انتى عارفة انى معجبة بيه وعايزة اكلمه"
"بس هو لو كان عايز يكلمك كان كلمك...هو كلمنى انا"
"بقى كده"
"ايوه... وبطلى تفتكرى ان كل الناس شايفاكى انتى"
"انا يا آيه ولا انتى اللى بتقلدينى ف كل حاجة"
"وهقلدك ليه ...اوعى تكونى فاكرة نفسك احلى...وبعدين ريحى نفسك وليد امبارح لما وقف يتكلم معانا كان علشانى مش علشانك"
"ماشى يا آيه... متكلمنيش تانى"
"احسن"
وقفلوا مع بعض ...ورجعت آيه تكلم وليد
"انت لسه هنا"
"اه مستنيكى...كنتى بتتكلمى كل ده ف ايه"
"الست روان هانم بتراقبنى وبتقولى ضيفتك ليه...مش عارفة هى مالها ومالى"
"وهى مالها"
"معرفش اتغاظت ليه...احنا خلاص مبقيناش صحاب"
"معلش كلها يومين وتتصالحوا"
"مش عايزة اتصالح معاها...دى حشرية وغلسة"
"هنفضل نتكلم عن روان ولا نتكلم عن نفسنا شوية"
"نقول ايه"
"اااايييه... نقول انى معجب بيكى من اول ماشفتك"
"ماانت قلتلى من شوية"
"طيب وانتى"
"مش باين يعنى"
"لا"
"انا بتكسف"
"ماشى ياستى... هاتى رقم موبايلك علشان ابقى اكلمك اى وقت...انا مبقعدش كتير ع الفيس"
"بس يعنى"
"بس ايه...مش عايزة تديهولى"
"لا عادى... سجله"
وكتبت له رقمها...واتصل بيها كلمها علشان تسجل الرقم وقفلوا

نور من بعد ما رجعت وهى بتفكر ياترى اتصرفت صح ولا غلط
ومراد بيفكر هو اتسرع ولا كان معاه حق

نور فرحانة انه مش متجوز..ومش عارفة لما تشوفه وهى بتاخد جودى هتعمل ايه؟؟
مراد مكسوف من نور ...لما يشوفها هيكلمها ولا لأ

جه معاد المدرسة... نور رايحة وعندها امل ان مراد يكلمها تانى وفكرت انه لو كلمها تسمعه... بس تعرف عايز يقولها ايه

مراد راح المدرسة وهو مقرر انه مش هيكلم نور علشان متفتكرش انه بيعاكسها زى ماقالت

اتقابلوا عند المدرسة... كل واحد فيهم اتجنب يبص للتانى
نور اخدت جودى...ومراد اخد لوجى...وكل واحد فيهم مشى ف طريق

اسماعيل قاعد فى المحل...دخلت عليه انتصار
"مساء الخير"
وسلم عليها بفتور
"مساء النور...اتفضلى"
واتكلمت زى ماهى متعودة معاه...
"انا زعلانة منك...كده ولا بتسأل ولا مهتم"
"معلش ظروف"
"ظروف ايه"
"مايسة مبتخرجش من البيت وياريت نقلل مقابلاتنا علشان ميوصلهاش حاجة...المرة اللى فاتت ربنا ستر"
"مكنتش اعرف انك بتخاف منها كده"
وبص لها بصة خلتها كملت
"مكنتش كده يااسماعيل"
"مش عيب ان الواحد يحافظ على بيته... وانا كده كده مش هوصل الامور بينى وبين مايسة لخراب البيت "
"الله الله... من امتى الكلام الحلو ده على مايسة"
"هى مش ملاك وف نفس الوقت مش شيطان...وانا بحب عيالى وخايف عليهم"
"وبقيت بتكرهنى دلوقتى..اخص عليك"
"انتى كمان مش خايفة ان اى كلام يوصل لجوزك"
"اخاف ليه... يروح كلب ييجى سبع...وانا بفكر اتطلق منه علشان نبقى مع بعض على طول"
"مع بعض على طول ازاى"
"نتجوز"
"مين قال انى ممكن اتجوز تانى"
"المشكلة تتجوز تانى ولا تتجوزنى انا"
سكت اسماعيل... وقامت انتصار
"بخاطرك بقى... بس انا اللى بسيب مش بتساب"
مشيت انتصار واسماعيل قاعد يفكر
"تقصد ايه دى... يالا اللى عندها تعمله...قال نتجوز قال.. ودى حد يتجوزها"

نور تانى يوم وهى بتصحى جودى... قررت انها هتبدأ اى كلام مع مراد...
"على الاقل اعرف اسمه... شكله محترم ...انا كنت سخيفة اوى"
"يالا ياجوجو...يالا ياحبيبتى"
بتلمس جودى... حست بسخونية
"ياااه ياجودى... انتى سخنة اوى"
"زورى بيوجعنى ياماما"
"هشوفلك خافض للحرارة وتنامى وان شاءالله تبقى كويسة"
                     ***************
نفس اليوم العصر... الحرارة زادت على جودى
نور قاعدة جنبها على السرير وفوقية من الجنب التانى ورقية واقفة
فوقية"لازم نشوف لها دكتور"
رقية"هاتى رقم الدكتور يا نور لما اتصل بيه"
نور"لا مش مهم... كمان ساعتين يفتح واخدها واروح"
رقية"يعنى احنا خايفين عليها وانتى لأ"
نور"انا لأ... ازاى مش بنتى"
رقية"اسمع كلامك اصدقك اشوف امورك استعجب...مش عايزة نجيب دكتور للبنت ليه"
نور"الدكتور هياخد كتير وانا عارفة ان لسه ماما مقبضتش ولا انا قبضت المعاش"
رقية"حد طلب منك فلوس...انتى مالك... ماانتى قاعدة اكلة شاربة نايمة حد بيقولك ادفعى حاجة"
فوقية"رررقيييييييية"
نور"الله يسامحك...بس ماما هى اللى طلبت انى اقعد"
فوقية"انتى ف بيتك وبيت بنتك يا نور"
نور"وانا اللى غريبة دلوقتى"
فوقية"انتوا الاتنين ولادى...هتسيبوا البت اللى ملهلبة نار دى وتتخانقوا"
رقية"انا هتصل بالدكتور... مش علشانك يا نور علشان بنت اخويا"
خرجت رقية من الاوضة... نور بتحاول تمسك نفسها ومتعيطش
مسكت ايد جودى تجسها... عيطت
فوقية تجاهلت السبب الحقيقى لعياط نور
"متخافيش يانور... هتبقى كويسة...هى اول مرة تعيا"

مراد كل يوم بيقف يستنى نور ...مش بتيجى
بيسأل لوجى عن جودى...بتقوله مش بتيجى
بيفكر...معقول علشان حاول يكلمها... بطلت تيجى المدرسة
بعد 4 ايام... وهو بيدخل لوجى الفصل...اتفاجئ بنور
غصب عنه مقدرش يتجاهلها
"صباح الخير"
ردت عليه نور بابتسامة تشجيع
"صباح النور"
"هى جودى مكنتش بتيجى ليه"
"كانت تعبانة والدكتور قالها لازم ترتاح ف البيت"
"الف سلامة عليها"
بصوا حواليهم...الفصل والاطفال والمدرسة
اتحرجوا الاتنين... من غير كلام خرجوا من المدرسة

على باب المدرسة... كل واحد فيهم عايز يبدأ كلام مع التانى
واتكلموا ف نفس الوقت
"انا اسف... انا اسفة"
ضحكوا ...وسبق مراد
"انا بجد اسف...مكنتش بعاكس والله"
"وانا اسفة...ردى كان بايخ "
"لا ابدا...انا كنت خايف اوى تكونى مبتجيش بسببى"
وابتسمت"لا مش للدرجة دى"
"ممكن اوصلك"
"توصلنى؟؟"
"بالتاكسى... ده تاكسى عادى يعنى"
وترددت لحظات"ماشى"
فتح لها باب التاكسى وهى بتركب
"انا لسه معرفتش اسمك..انا مراد"
"نور"
ابتسم لها وهو بيقفل الباب ...وبيلف يركب جنبها
مشى بالعربية...
"انا مش مصدق انى بكلمك... وانك قاعدة جنبى...عندى كلام كتير عايز اقولهولك ومش عارف ابدأ منين"
نور ساكتة وبتقول فى سرها
"وانا كمان نفسى اتكلم معاك كتير اوى"
"بصى انا هحكيلك كل حاجة واى حاجة زى ما ييجى على بالى"
"اتفقنا"
وحكى مراد عن حياته باختصار وهو بيلف بالتاكسى ...حكى عن اسرته وعن شغله اللى مش بدراسته وعن سفره وعن احلى صدفة لما شافها فى المدرسة
"انا رغيت كتير... نروح نفطر ... ارجوكى متقوليش لأ"
"بس هتأخر كده"
"على مين؟؟؟انتى عايشة مع مين"
وسكتت لحظات"مع حماتى واخت جوزى"
اول ماقالت اخت جوزى...وافتكرت رقية ومشاكلها معاها...عيطت
مراد اول ما شاف دموعها
"ليه...ليه الدموع دى...انا اسف انى جبت سيرة والد جودى...انا فعلا اسف"
"لا ابدا... انا بس مخنوقة اوى... انا عايشة معاهم علشان جودى...بس تعبت من معاملة اخت جوزى ليا"
"ممكن تقولى عمة جودى... بلاش تقولى اخت جوزى...انتى مش متجوزة...انتى دلوقتى حرة"
هزت نور راسها... وبدأت تحكى كتير عن حياتها...عن مشاكل رقية معاها...عن اخوها...عن ظروف جوازها
"انتى اتجوزتيه ازاى...عن حب"
"لا .. تقليدى... ماما كانت بتروح للدكتور وقبلتنا حماتى...عجبتها ... وبما انى اخويا كان متجوز فى البيت فانا كنت عايزة اتجوز وابعد لانى مكنتش مرتاحة بسبب مراته ومعاملتها انها صاحبة البيت... ماما توفت بعد ما اتخطبت بشهرين... بعدها ب3شهور اتجوزنا... وعشنا مع بعض 4سنين وتوفى"
"كان مريض؟"
"ابدا...اتوفى فجأة"
"الله يرحمه...يمكن ربنا عمل كده علشان نتقابل ونبدأ حياتنا مع بعض"
سكتت نور... معقول هى بتتكلم كده مع مراد من اول مرة تقابله فيها...معقول بيقولها انهم يكملوا حياتهم مع بعض من اول مرة كده
"مراد...احنا بقالنا اكتر من ساعتين مع بعض... مش هينفع اتأخر اكتر من كده"
"حاضر اللى يريحك...قوليلى ساكنة فين"
"ودينى بيت اخويا علشان تبقى حجة للتأخير"
ووصفت له نور بيت هانى...وهما ماشيين..فتح مراد الراديو
ولما سمع كلمات الاغنية وركز فيها



مع كلمات الاغنية... بيبص لها وهو حاسس انه بيحضنها بعينيه وقلبه... هى بتبص قدامها... وهو بين كل نظرة للطريق نظرة تانية لنور
ولما وصلت كلمات الاغنية عند
إيدك خليها في إيدى أنا طفل كبير
وبحس إن أنا وإنتى لوحدينا والكون بستان
مد ايده مسك ايد نور... استغربت
"ممكن من النهاردة ايدينا تفضل فى ايد بعض ... ونبقى سند بعض قدام اى حاجة تواجهنا... ومنبعدش عن بعض ابدا"
هزت راسها بابتسامة... وردد هو مع الاغنية
مش عارف ليه متونس بيكى وكأنك من دمى
على راحتى معاكى وكأنك أمى مش عارف ليه

هناك 34 تعليقًا:

  1. الحلقة جميلة اوى ...بس مش عارفة حاساها اوفر شوية مع نور ومراد
    مش معقول اول ما يتكلمو وف اول مرة يبدأو كدا او هو ميفكرش ف حياته وكل المشاكل اللى حواليه وينسى بالاسلوب دا

    ف انتظار الجديدة :)

    ردحذف
  2. يالهووووووووووووووووووووووووووووووووووى ايوه بقى
    مبدعه يا دندونتى

    ردحذف
  3. جاااااااااااااامد مووت الحلقه والاغنيه روووووعه
    تسلم ايدك بجد
    سومه

    ردحذف
  4. روعه روعه روعه روعه روعه
    بس وحيات ولادك يا دندون طولى الحلقه شويه
    (دنيتى الاهلى )
    بحببببببببببببببك بحببببببببببببك بحببببببببببك
    والنعمه يا اخوتشى

    ردحذف
  5. تحفه تحفه تسلم ايدك يا مبدعه

    ردحذف
  6. حلوه بجد

    ردحذف
  7. فظيــــــــــــــــعه الحلقه النهارده مع اني مستغربه الاتنين نور ومراد تفكيرهم اتغير ع طول بس اهو بقى الحب بيعمل معجزاااااات :)

    batot

    ردحذف
  8. الله الله على الحب بس ربنا يستر وميشوفش الصوره اللى عند سامى والدنيا تتلغبط بس جميله لما بقرأ مراد ونور مع بعض بكون فرحانه اوى

    ردحذف
  9. يالهووووووووووووووووووووووووى على الجمال ايوة بقى كدا ابتدت تحلو انتى برنسيسة يا دندونة والله

    ردحذف
  10. Aiwa ba2a ba2aaaaa :D

    ردحذف
  11. عـــــــــــــــارفة ..........مش الاغنية لا انتي يا دينا ,,مبدعة ,, كلمة قليل جدا عليكي الحلقة تحفة و الاغية مع المشهد وااااااااااااااو مش ممكن تسلم ايدك بجد بس انا خايفة منك بعد كام حلقة حب و هيام و غرام لنور و مراد تفاجئينا بحتة بايخة اووي ان سامي هيظهر صورة نور لمراد .............الله يحرقك يارقية بس سيبك انتي احلي مافي الحلقة ان انتصار معملتش هيهيهيهيهيهيهيهيهي ...............ههههههه



    رحاب علي

    ردحذف
  12. عارفه

    كلمات بهاء جاهين

    الحان عمر خيرت

    توزيع عمر خيرت


    كلمات الاغنيه

    مش عارف ليه بتونس بيكي وكأنك من دمي


    على راحتي معاكي وكأنك أمي

    عارفة

    حاسس أني لأول مرة بشوفك

    وأني بشوفك من أول لحظة في عمري

    حاسس أني يمامة بتشرب في كفوفك

    وإنك شجرة وضله وميه ..بتجري

    مش عارف ليه

    مش عارف ليه

    متونس بيكي وكأنك من دمي

    على راحتي معاكي وكأنك أمي

    عارفة

    فرحة كبيرة وصوت مزيكا في قلبي

    وكأننا حبيبين إتقابلوا بعد فراق

    ليه فجأه بقيت مستني لوحدي

    ليه بتكلم وأحكيلك واشكيلك همي

    مش عارف ليه

    مش عارف ليه

    متونس بيكي وكأنك من دمي

    على راحتي معاكي وكأنك أمي

    مش عارف ليه

    وأنا وياكي بحس بدنيا فيها سلام وأمان

    وأن العالم مفيهوش ولا نقطة أحزان

    إيدك خليها في إيدي أنا طفل كبير

    وبحس أن انا وانتي لوحدينا والكون بستان


    رحاب علي

    ردحذف
  13. ديناااااااااااااا انتي فظيييييييييييييعة ،، رهيييييييييييييييييييييييبة
    بجد بجد ملكيش حــــــــــــــل والاغنية دي عملت عمايلهااااااااا ع الاخر

    ردحذف
  14. الحلقة بجد جميلة جدا ,,,,, تسلم إيدك

    ردحذف




  15. gamdaaaaaaaaaaaaaaaaaaaaaaaaaaaaaaaa






    youmy

    ردحذف
  16. الله حلوة قوي يادينا الحلقة جميله والاغنيه تحفه

    ردحذف
  17. تسلم ايدك يادندونه بجد تحفه

    ردحذف
  18. راااااااااااااااائعة بجد

    ردحذف
  19. رووووووووووووووووووووووووووووووعة بجددد انى هاااااااااايلة وجباااارة ف احساسك اوى بتوصلية ع طول لينااااا
    ديمااا الى الامام يارب

    amira slama

    ردحذف
  20. الله عليكى يا دينا الحلقة جميلة اوووووووووى مع انى متفقة مع الناس اللى بتقول فيها تطور سريع يعنى اخدوا على بعض بسرعة وبالذات مراد حتى لو بيحبوا بعض من قبل كده فى صمت بس مش من تانى مرة يكلموا بعض فيها يحصل كل ده
    بس رأيي ميخالفش برضه انى اقول الحلقة جميلة تسلمى


    ddy dody

    ردحذف
  21. يالهوي هو ده الكلام تسلم ايديكي
    مراد & نور <3

    ردحذف
  22. الحلقه جميله جدا والاغنيه تحفه وماشيه مع المشهد بس ربنا يستر من اللي جاي

    ردحذف
  23. الحلقة بلا شك تحفة بس مراد كان رخم شوية لما قالها نمسك ايد بعض مش عارفة حاسة انها بداية مش كويسة تسلم ايدك يا دينو



    mrmr mady

    ردحذف
  24. خيالى اوى لأن مفيش واحدة واحد يألها خلى ايدك فى ايدى و توافق كده عادى مش عارفإه بس حلوه اوىتسلمى

    ردحذف
  25. l 7al2a to7faaa ya deina :) .. mstnya l 7al2a ly gaya 3ala nar :)

    ردحذف
  26. 7lwaaaa awiiiii .... W rbna yustur mn L'gay <3

    ردحذف
  27. اغنية عارفة دى حبيبى اهداهالى اول اغنية اهدهالى .... و قالى احلى حتة ايدك خاليها فى ايدى انا طفل كبير

    ردحذف
  28. مراد ده حلو اووووووووووووووي يالهوي هو ممكن يكون في حد ويه كد واقعي بجد مش قصدي رومنسايات وكد بس مناول الحلقت وانا ملاحظة ان في قلبه رحمة خاصه موقف اخته لما جتلهم زعلانه وهو قال مترجعش وكد سو كيوت يامراد بجد
    وانتي راااااااااائعه يا دينا انا بقيت امسك القصه مسبهاش بفضل قرايه لغايه ما تخصل :)

    ردحذف
  29. بصراحة انا مش حساها مقنعة ازاى كانت حتموت على جوزها لمى مات ودلوقتى ماسكة ايد واحد والدنيا عندها بيس اوى كده

    ردحذف
  30. جميلة جدااااااااااااااا very romantic

    ردحذف
  31. ربنا يستر احسن سامى يورى الصورة لمراد منك لله يا رقية
    ااااااااااااه اخيييييييييييييييرا انتصار ماتحفتناش بال هىهىىهىهىهىهى بتاعتها دى
    الحلقة هايلة يا دينا

    ردحذف

قول رأيك بلاش تقرا وتقفل من سكات...ارائكم تهمنى