الثلاثاء، 18 ديسمبر 2012

جوه البيوت... الحلقة 19

الحلقة 19
ركبوا كلهم مع بعض
نور جنب مراد ومعاها جودى
ووراهم سامى واروى وولوجى
مراد بيفتح مواضيع عامة وبيسأل نور عن الحفلة واروى باتكلم وتحكى معاهم
سامى سرحان وكل تفكيره
"هى دى رقية اللى بقالى شهور بكلمها...ايه الموقف الزبالة ده... هى بتضحك على مين فينا....بتضحك علينا احنا الاتنين...طيب انا مش مهم انا كمان بضحك عليها..وقال مفهمانى انها بنت ..وبتكلمنى وهى متفقة مع مراد على الجواز... ياعينى عليك ياصاحبى... اتخدعت وياعالم بتضحك على مين كمان...مش يمكن ليها جوز وبتقرطسه هو كمان... ايه دى...افضحها قدامهم...بس كده هبقى بفضح نفسى قدام اروى... اقول لمراد واوريله كل كلامها معايا... اهددها هى واقولها تبعد عننا ... مش عارف"
انتبه سامى من تفكيره واروى بتقوله
"سامى...يالا قاعد ليه"
بص سامى حواليه...شاف انهم واقفين تحت البيت
نزل سامى وهو مش قادر يبص ف وش نور
نزلت اروى وسلمت على نور ... ومشى مراد علشان  يوصلها
                        *****************
سامى واروى طالعين على السلم
"مالك ياسامى...من ساعة ماخلصنا الحفلة وانت شكلك متضايق"
"مفيش حاجة ياحبيبتى"
"ليه انا مش عارفاك...مالك فى ايه"
وصلوا عند الباب...سامى بيفتح الباب
"مفيش... صدعت بس علشان صحيت بدرى...انا نازل افتح السايبر وانتى ادخلى علشان مامتك قاعدة لوحدها من ساعة مانزلنا"
"تعالى طيب خدلك اى مسكن"
"مش مهم دلوقتى ابقى كويس"
"طيب ياحبيبى...هكلمك كمان شوية اطمن عليك"
"ماشى...يالا صوت ياسين بيعيط روحى شوفيه"
دخلت اروى وقفلت الباب ونزل سامى

نور بعد ما رجعت وقبل ماتدخل اكدت على جودى
"حبيبتى زى ما احنا متفقين ...اوعى تقولى حاجة عن عمو مراد لعمتو وماما فوقية"
"حاضر"
دخلت نور وجودى البيت... واول ما دخلت راحت لفوقية تطمن عليها
"ازيك ياماما...عاملة ايه النهاردة"
"الحمدلله يابنتى...عملتوا ايه"
"جودى كانت مبسوطة وسط اصحابها والحفلة كانت جميلة"
"الحمدلله"
"خدتى الدوا بتاعك"
"لسه"
"هروح اجيبلك كوباية مياه تاخدى الدوا"
"ربنا يكرمك يانور يا بنتى ويسترك ومايحرمك من صحتك"
"ربنا يخليكى ياماما"
وسمعوا صوت رقية داخلة البيت...وجاية على الاوضة

مايسة فى المطبخ بتطبخ... سمعت صوت موبايلها
راحت تشوف ..واطمنت وهى معدية ان ولادها بيلعبوا
فتحت الموبايل...شافت رسالة من رقم غريب
"انتى صعبانة عليا اوى جوزك ...خلى بالك من جوزك"
مايسة مش متوقعة انها تجيلها رسالة كده
ومين اللى بعتها...رقمها مع القرايب والمعارف بس
اكيد واحدة من معارفها عايزة تنصحها
اتصلت مايسة بالرقم اللى بعتلها الرسالة
لقيته مقفول... بصت للرقم كتير لحد ما حفظته
وقعدت تدور فى كل الارقام المتسجلة عندها
"ايه الغباء ده...ماهو لو متسجل عندى كان ظهر بالاسم مش بالرقم"
فضلت قاعدة مكانها تفكر
"اخلى بالى يعنى ايه؟؟؟ يعنى شكوكى كانت ف محلها... والمعاملة الحلوة دى ايه؟؟ يكون بيعاملنى كويس علشان يغطى على اللى بيعمله"
وشمت ريحة شياط وهى قاعدة مكانها
دخلت المطبخ تجرى...كانت الحلة اللى على البوتاجاز اتحرقت
طفت البوتاجاز... ورجعت تانى تقرا الرسالة...وتعيط

آيه ماسكة الكتب ورايحة الدرس
اتصل بيها وليد
"الو... ايوه ياوليد... انا رايحة الدرس... انا خايفة... انا عمرى ماعملت كده... تزعل ليه بس... افرض حد شافنى... طيب خلاص... فين.. ماشى ماشى...مع السلامة"
                       *****************
آيه واقفة ف شارع هادى بتبص حواليها
شافت وليد جاى ناحيتها
"كنت هزعل لو مكنتيش جيتى"
"انا خايفة ياوليد...الشارع ده ساكت كده ليه"
"مش خايفة حد يشوفك عايزانى اقابلك فين"
"انا اول مرة انزل م البيت على انى رايحة الدرس ومروحش"
"ماانا عايز اتكلم معاكى واشوفك... تعالى نتمشى لحد كافيه قريب"
مشيت آيه ووليد جنبها... بيسألها
"عاملة ايه ف المذاكرة"
"اهو .. الحمدلله...الامتحانات الاسبوع الجاى"
"وانا هبدأ بعد يومين"
"بتذاكر امتى"
"اى وقت"
وهما ماشيين بيتكلموا... وليد ماشى قريب منها...حط ايده على كتفها
بعدت آيه بسرعة من المفاجئة
"مالك...بعدتى كده ليه"
"ايه اللى عملته ده"
"انا معملتش حاجة غريبة... عايز نبقى قريبين من بعض"
"مااحنا ماشيين جنب بعض اهو... بلاش كده"
"وبلاش ليه...يبقى انتى مش بتحبينى"
"لا والله بحبك"
"اللى بيحب حد بيثق فيه ويسمع كلامه...لو مش بتثقى فيا يبقى خلاص كل واحد فينا يروح لحاله"
"فيه حد بيحب حد يقوله كده"
"وفيه واحدة بتحب واحد تحرجه كده"
"انا مأحرجتكش... بس عيب"
"مينفعش تقوليلى عيب ومش عيب..انا اللى اقول ايه اللى ينفع وايه لأ... انا مش من الرجالة اللى حبيبتى هى اللى تمشينى"
"انا اسفة ياوليد...مقصدش كل ده"
"يبقى تخلى بالك من كلامك معايا ومتقوليليش لأ على حاجة... محدش هيخاف عليكى قدى ولازم تثقى فيا"
"حاضر...واثقة فيك طبعا"
مشيوا الاتنين وهو حاطط ايده على كتفها ومقربها منه اوى

سامى طول اليوم مفتحش الاكونت اللى بيكلم منه رقية
متضايق ومش عارف يتصرف ازاى
يقول لمراد الاول ولا يواجهها هى الاول
وبالليل فتح الاكونت وقال اللى هيظهر قدامه الاول هو اللى هيقوله
اول ما فتح شاف رسالة من رقية
"انت فين النهاردة...وحشتنى...انا نازلة مع ماما للدكتور ولما ارجع هفتح... ياريت تكون موجود"
وقف قدام الرسالة وهو مستغرف قدرة نور على الكذب

نور ورقية وفوقية راجعين من عند الدكتور
دخلوا فوقية اوضتها
غيرت رقية هدومها بسرعة وراحت قعدت ع الكمبيوتر
نور قبل ماتغير هدومها
"عايزة حاجة منى ياماما علشان هنيم جودى"
"لا يابنتى... تفتكرى ممكن اخف بعد العملية"
"اه طبعا ان شاءالله...الدكتور قال بعد العملية هيتابع معاكى العلاج وهتبقى زى الفل ان شاءالله"
"هفضل الاسبوع ده لحد العملية وانا قلقانة"
"متقلقيش... سيبيها على الله وكله خير"
"يارب"

رقية فتحت...شافت سامى اون لاين
"ازيك ياسمسم...فينك طول اليوم"
"موجود...انتى كنتى فين النهاردة"
"موجودة وفتحت ملقيتكش ولسه راجعة من عند الدكتور ..ماما هتعمل عملية الاسبوع الجاى"
"مامتك؟؟"
"ايوه"
"مروحتيش ف حتة تانية النهاردة"
"لا مروحتش"
"بس انا شفتك"
واتخضت رقية
"شفتنى؟؟ فين وازاى؟"
"ماتيجى نتكلم بصراحة وعلى بلاطة كده"
"على ايه مش فاهمة"
"انتى عايزة ايه من مراد يانور"
"نور!!"
"ايوه مستغربة انى عرفت اسمك الحقيقى صح... بتعشمى مراد انكم هتتجوزوا وهو عايش ف الحلم ده وانتى كدابة.. ولو انتى بتحبيه صحيح بتكلمينى وتكذبى عليا ليه ... انا عرفت عنك كل حاجة انتى نور وعندك بنت اسمها جودى...اوعى تنكرى علشان انا شفتك"
سامى بيتكلم وهو متأكد انها مش هتعرفه...لا اسمه الحقيقى على الاكونت ولا صورته
رقية بدأت تفهم انه بيتكلم عن نور وعايزة تكسب اكتر قدر من المعلومات
"شفتنى فين"
"مش مهم شفتك فين...المهم انك لازم تنهى علاقتك بمراد ومتضحكيش عليه قبل ما اقوله على كل حاجة...ده مصدقك وناوى يتجوزك فعلا"
ولما سمعت رقية سيرة جواز... قامت بسرعة تجرى على نور
دخلت عليها اوضتها وهى بتصرخ
"كنتى مع مراد فين النهاردة"
وقامت نور من ع السرير متفاجئة من سؤال رقية
"مراد...مراد مين"
"مراد اللى انتى ماشية معاه ياهانم...فاكرانا مش داريانين بسمعتك اللى بقت زى الزفت"
"احترمى نفسك يا رقية"
"انا محترمة غصب عنك...على الاقل مش دايرة ف الشوارع مع رجالة"
وبصت نور لجودى اللى بتبص عليهم...وفوقية اللى قامت من سريرها...وبكل دفاع عن نفسها
"اخرسى قطع لسانك اللى يجيب سيرتى"
فوقية"ايه الكلام ده يارقية"
رقية"اسأليها...خليها تنكر انها ماشية مع واحد اسمه مراد وبتقابله ومعشماه بالجواز ومين عارف ايه تانى كمان"
نور"اخرسى يا رقية ومتتكلميش عنى كده...انتى مش لسه هتعرفينى النهاردة ياماما"
فوقية"يعنى الكلام ده محصلش"
سكتت نور تفكر فى الرد
رقية"شفتى...مش قادرة تنكر... احنا كنا مخدوعين فيكى وانتى طلعتى ******"
نور لما سمعت الشتيمة اللى ليها ...مقدرتش تسكت
ضربت رقية بالقلم...وهجمت عليها رقية ترد الضرب
صرخت فوقية بضعف المرض
"هى وصلت بينكم لكده...شتيمة وضرب...بس انتى وهى"
رقية مبسكتش...زقتها نور بعيد عنها
"ايوه انا هتجوز ... ومكنتش عايزة اسيبك وانتى تعبانة ياماما...بس بدل وصلت للاهانة وقلة الادب...انا مش قاعدة لحظة واحدة"
واتصلت بمراد قدامهم
"الو... ايوه يامراد... تعالى خدنى انا وجودى دلوقتى ودينى عند هانى... وقريب اوى نتجوز...ربع ساعة هكون جاهزة ومستنياك تحت"
فوقية ورقية واقفين مش مصدقين اللى بتعمله نور
قامت لبست ولبست جودى وهما لسه واقفين مبيتحركوش
وحطت هدومهم المهمة ف شنطة واخدتها واخدت جودى وخرجت من الاوضة وهما موجودين بس كانت فوقية تعبت وقعدت على كرسى

مراد لما جاله اتصال نور... كان لسه داخل السايبر عند سامى
سامى شافه وهو بيرد
"طيب يا نور ...انا جايلك حالا"
قام سامى بسرعة
"فى ايه يا مراد"
"مش عارف بس نور بتقولى اروح اخدها من بيت حماتها واوديها عند بيت اخوها...وبتقول هنتجوز قريب"
مشى مراد علشان يلحق نور...ووقف سامى
"انا مبقيتش فاهم حاجة"

بعد ساعة...رجع مراد عند سامى...واستقبله سامى علشان يفهم منه
"ايه يامراد ...ايه اللى حصل"
"نور اتفاجئت بعمة جودى داخل عليها وبتتخانق معاها وبتقولها تعرفى واحد اسمه مراد ولقيتها عارفة كل حاجة...واللى نور هتتجنن منه بتقول عرفت منين"
وبدأ سامى يفهم...وبيحاول يتأكد
"وهى عمتها عرفت منين"
"مش عارف...نور قالتلى انهم كانوا راجعين من عند الدكتور راحت عمتها قعدت ع الكمبيوتر ودخلت نور تنيم جودى بعد ما اطمنت على الست التعبانة ...اتفاجئت بيها بتدخل عليها وتزعق لها وتشتم ونور ردت عليها واتخانقوا وسابت لهم البيت"
"مش ده اللى كنتم عايزينه انها تسيب البيت"
"اه الحمد لله... اتفقنا انى هكلم امى وابويا علشان نروح نطلب ايدها...انا طالع علشان افاتحهم فى موضوعى"
مشى مراد وسامى بيكلم نفسه
"هى صادقة واخت جوزها اللى بتكلمنى ولا هى حويطة اوى وعملت الفيلم ده علشان تبرأ نفسها لو مراد عرف حاجة"

دخل مراد البيت وهو فرحان علشان المشكلة اتحلت والطريق بقى مفتوح قدامه انه يتقدم لنور
شاف مامته وباباه قاعدين... فقرر انه يكلم مامته الاول علشان عارف ردود باباه
بعد ماسلم عليهم ودخل اوضته... نادى على مامته
"احضر لك الاكل يامراد"
"لا ...تعالى ياماما عايزك"
قعد على طرف السرير وهى جانبه
"خير"
"ماما انا عايز اخطب"
سكتت لحظات
"مالك ساكتة ليه"
"اصل الخطوبة والجواز مصاريف وانت لسه معملتش حاجة خالص"
"احنا بس هنقرا فاتحة بدبلتين وبعدين ابقى اشوف شقة ايجار معقولة وربنا يسهل خلال سنة بالكتير اكون حوشت حق اوضة وانتريه على القد كده ونتجوز"
"الكلام سهل بس مين اللى هتوافق او اهلها يوافقوا على كده ولا شبكة ولا فرح ولا شقة مِلك ولا عفش بكذا"
"موجودة ياماما وموافقة"
قرب صادق من الاوضة وكان سامع
"مودجودة وموافقة يبقى الحكاية فيها إنة"
مراد"مفيش إنة ولا حاجة... احنا حبينا بعض واتكلمت معاها وهى وافقت...واكيد اخوها مش هيعارض"
هند"وامها وابوها؟"
مراد"متوفيين"
هند"آآآه ...تلاقى اخوها متجوز ومراته مبهدلاها"
مراد"هو اخوها متجوز بس لسه رايحة تقعد عندهم النهاردة بس"
هند"وقبل النهاردة كانت فين"
مراد"هى كانت قاعدة عند اهل بنتها"
صادق وهند باستغراب
"بنتها!!"
مراد حس انه اتلخبط فى ترتيب الكلام
"اقصد يعنى اهل جوزها"
وردوا بنفس الاستغراب واشد
"جوزها!!!"
مراد"انا هفهمكم...هى ارملة من سنتين تقريبا ومعاها بنت صغيرة و.."
هند"متكملش متكلمش.... علشان كده راضية بيك وانت محيلتكش حاجة... ماصدقت لافت عليك وضحكت عليك بكلمتين"
مراد"لا ياماما ...لما هتشوفيها هتعرفى انها ..."
هند"ولا اشوفها ولا تشوفنى ولا تتجوز واحدة خَرج بيت...انت اتجنيت ف عقلك ...انت مدخلتش دنيا وعايز تتجوز واحدة بعيلة"
خرجت من الاوضة ومراد وراها
مراد"ياماما اسمعينى بس"
صادق بعد ما رجع قعد قدام التليفزيون تانى
"تسمع ايه وتهبب ايه...هو انت كده غبى فى كل حاجة عمرك ما بتعرف تفكر صح ابدا"

هناك 23 تعليقًا:

  1. لالالالا قلبي وجعني أووي

    ربنا يستر

    ردحذف
    الردود
    1. واللة

      حذف
    2. قلبك وجعك بجد ياعينى صعبتى عليا

      حذف
  2. woooow :* tgann

    ردحذف
  3. جامده مووووووووووووووووت

    ردحذف
  4. ليه بس كدة يا صدوق لالالا مطلعتش صدوق خالص هههه عاوزين تشويق اكتاااااار :) ^_^


    mrmr mady

    ردحذف
  5. لا لا لا الحلقة جاااااااااااااااااااااااااااااااااااااااااااامدة اوى

    ردحذف
  6. صعبان عليا اوي بجد :-(
    Nancy

    ردحذف
  7. حرامـــــــــــ بجدـــــــــ:(

    ردحذف
  8. اوووووووووووووف بجد كدا كتير ابوه دا رخم اخر حاجه دينا بجد انتى تحفه انا بستنى الحلقه بفارغ صبر
    tota

    ردحذف
  9. gamdaaaaaaaaaaaaaaaaaaaaaaaaaaaaaa










    youmy

    ردحذف
  10. صادق هو اللي هايساعد مراد

    ردحذف
  11. حلوووووووووووووووووووووووووووة اووووووووووووووى
    والحقيقة طويلة اوى النهارضا ... عايزين من دة ع طوووووول
    تسلم الايادى يا قمر

    amira slama

    ردحذف
  12. ربنا يستتتتتتتتر بس الحلقه رهييييييييييبه تحفه بجد تسلم ايدك يا دندن

    ردحذف
  13. رووووووووووووووعه جدا جدا تسلم ايدك يا دندن انتى بتنزلى الحلقه لساعه كام ارجو الرد

    ردحذف
  14. اولا القصص كلها مشاء الله روعة انا قرأت المدوتة كلها ومش قادرة اقولك كل قصصك مشوقة وجميلة وسرد احداثها ممتع اد ايه انا وصلت لجوه البيوت وكنت مخليها اخر حاجة بس خلاص خلصت كله ومش عارفة هستنى ازاى كل يوم على ما تحطى الحلقة الجديدة بجد يادينا تسلم الايادى وبالتوفيق ان شاء الله ومتتاخريش عليا ى حلقة بكرة انتى عارفة بقيت مدمنة لقصصك

    سمسمة

    ردحذف
  15. هو يا ربى مفيش ابدا اتنين حبوا بعض واتجوزو عادى لازم تبقى فيه مصايب

    ردحذف
  16. بجد كتاباتك يا دينا حلوه اوووووووووووووووووووووووووووووووووووووى انا قرأت البيت القديم النهارده وكمان قرات القصه دى وعايزه اعرف بقيت الحلقات اووووووووووووووى بجد تحفـــــــــــــــــــــــــــــــــــــــه بس استعجلى فى الحلقه 22 بلييييييييييييييييييز

    ردحذف
  17. بجد رووووووووووعة اوى وتسلم ايدك

    ردحذف
  18. ابو شكلك يا صادق بئا الراجل ده غيظنىاوى هو والزفته رقيه والحقيره انتصار والحيوان سامى

    ردحذف
  19. بتنكدي ليه يادندن

    ردحذف
  20. بصراحه انا بقرألك كتييييييييير. اوي واول مره اكتب كومنت
    وقرأتلك حاجات كتيره ودايما كتباتك جميله
    :] ربنا يوفقك

    ردحذف

قول رأيك بلاش تقرا وتقفل من سكات...ارائكم تهمنى