الأربعاء، 19 ديسمبر 2012

جوه البيوت... الحلقة 20

الحلقة 20
مايسة من ساعة الرسالة اللى جت لها وهى مش عارفة تركز
لا قدرت تعمل غدا تانى مكان اللى اتحرق
ولا قدرت تتصل باسماعيل زى مااحيانا بتتصل بيه
كل تفكيرها هتتصرف ازاى مع اسماعيل لما ييجى
"اواجهه؟؟ اسأله؟؟ احكيله على الرسالة؟؟ انا اصلا مصدقة ولا مش مصدقة...انا ماصدقت خلصت من شكوكى اللى مكنش عليها اى دليل...اعمل ايه ؟؟اطنش كأنها موصلتش... هقدر؟؟"

بعد نور مانزلت... فضلوا نور وفوقية مكانهم فى اوضة نور
المفاجأة صدمتهم لدرجة انهم مش عارفين يتكلموا
قامت فوقية من ع الكرسى
"انا داخلة ارتاح ف السرير مش قادرة"
واتكلمت رقية بعصبية
"شفتى ياماما... مقدرتش تنكر... دى اللى كانت عاملة فيها طيبة وبريئة طلعت ساهية ووراها الف داهية"
ردت فوقية ودموعها فى عينيها
"هى مش هتعمل حاجة غلط...هى هتتجوز"
"تتجوز... عادى كده تتجوز... هنسيبها تتجوز"
فوقية وصلت لسريرها ورقية وراها بتتكلم
"هنمنعها تتجوز يارقية.. هعمل ايه...واسكتى علشان اللى فيا مكفينى"
"اسكت؟؟ دايما بتدافعى عنها حتى ضياء كان بيدافع عنها...كانها هى اللى بنتك وانا اللى غريبة"
"مشفتش منها اللى يخلينى مدافعش عنها... اوعى تكونى ان مشيها من البيت وخبر جوازها ده سهل عليا... بس مقدرش اعمل حاجة"
"لا تقدرى"
"على ايه"
"نقولها اننا هناخد منها جودى لو اتجوزت"
"هو انتى عرفتى منين"
"معروف ان اللى تتجوز يبقى حق اهل جوزها ياخدوا الطفل"
"لا انا قصدى عرفتى منين انها هتتجوز"
"مفيش حاجة بتستخبى...خلينا ف موضوعنا... موافقة لو اتجوزت نرفع قضية حضانة"
"هى اللى كانت بتخدمنى يا رقية انا مش هقدر انى اراعى جودى"
"ماانا معاكى اهو ...واهى جودى هتبقى ف وسطنا ومعانا...ويمكن تخاف ومتتجوزش"
"معرفش... لما ابقى اعمل العملية ولما نبقى نشوف هتتجوز بصحيح ولا لأ"

مريم  قاعدة مع نور
مريم"العقربة رقية دى مفيش من وراها خير ابدا"
نور"كله كوم وانها تشتمنى يامريم ده كوم تانى"
مريم"بس تسلم ايدك والنبى انا لو كنت معاكى كنت قلعت الجزمة وحطيتها ف بؤها"
نور"اللى صعبان عليا الست الكبيرة الغلبانة دى...مين هياخد باله منها دى عندها عملية كبيرة "
مريم"ياهبلة بطلى عبط... انتى متبهدلة هناك وشايلة همها"
جه هانى من الشغل واول مادخل
مريم"تعالى ياهانى...شوف المنيلة على عينها بتقول ايه"
هانى"ماانتى حكيتيلى ف التليفون يامريم... متزعليش يانور انتى كده كده كنتى عايزة تمشى من هناك"
مريم"اختك العبيطة شايلة هم حماتها"
نور"عمرها مازعلتنى يامريم وهى دلوقتى مريضة...ربنا يشفيها يارب"
مريم"بصى بقى انتى لازم تتخطبى لمراد وتتجوزوا بسرعة علشان المخفية متتكلمش عليكى وتسوء سمعتك"
نور"نتخطب آه انما لسه شوية على الجواز...مراد لسه بيقول ياهادى"
هانى"صح...خليه ييجى ويجيب اهله ويتقدم لك فى اقرب وقت علشان متلحقش تتكلم عليكى"
مريم"وانتى هتجيبى عفشك امتى"
نور"عفشى؟"
مريم"آه طبعا عفشك... بس المشكلة ان مفيش مكان هنا يتحط فيه ... نشوف اى حد م الجيران نحط عنده الحاجة"
نور"هروح ازاى اخد عفش من بيتهم"
مريم"انتى هتجننينى يانور...يابت بطلى الهبل اللى انتى فيه ده... انتى مش ليكى قايمة مكتوب فيها الاوضة بتاعتك والصالون والمطبخ وكل حاجتك"
نور"اه...والله مااعرف هى فين"
هانى"انا عاينها معايا"
مريم"طيب اهو... ده انتى تاخدى حاجتك من نن عينيهم ...وخصوصا المخفية رقية دى"
نور"لالالا مقدرش اعمل كده"
مريم"اسكتى انتى...انا اروح انا وهانى نجيبلك حاجتك ملكيش دعوة انتى...بس خلى عريسك ييجى يتقدم وينجز كده وتتجوزوا بسرعة"
هانى"ظبطى لهم نومة يامريم لحد مانرتب نفسنا ونشوف هنعمل ايه"

مايسة قاعدة بتفكر ... وجه اسماعيل
"سلامو عليكم"
"وعليكم السلام"
دخل اسماعيل يغير هدومه... وممايسة قاعدة مكانها
سمعته بينادى عليها...دخلت له
"قاعدة بره ليه"
"ابدا عادى"
"سخنى الاكل"
"مطبختش النهاردة"
"ليه"
"تعبانة"
"سلامتك...عندك ايه"
"دايخة وعندى هبوط"
"حامل ولا ايه"
"لا مش حامل...بس يمكن ضغطى واطى شوية"
"تروحى للدكتور؟"
"لا مفيش داعى"
"مالك يامايسة... صوتك مش طبيعى"
"تعبانة يااسماعيل... انا هروح ابص على العيال واجى انام...اعملك حاجة قبل ماانام"
"لا خلاص هشوف هتعشى انا اى حاجة موجودة وخلاص"
خرجت من الاوضة... وهو بيفكر
"ياترى مالها...تعبانة صحيح ولا زعلانة من حاجة"
راح وراها اوضة الاطفال
"مايسة...حد جه النهاردة"
"حد مين"
"اى حد... حد من اهلك..من الجيران "
"لا بتسأل ليه"
"ابدا ...انا قلت يمكن حد جه ولا حاجة علشان كده ملحقتيش تطبخى"
"لا محدش جه"
خرج من الاوضة وهو بيقول لنفسه
"الحمدلله ...يبقى انتصار بعيد عن الموضوع"

هانى ف سريره... دخلت مريم الاوضة...قام اتعدل
"وضبتى لهم نومة"
"اه متقلقش"
"متشكرين ياستى"
"على ايه"
"اللى يشوفك النهاردة وانتى واقفة اسد علشان مريم ميشوفكيش يوم موت ضياء وانتى خايفة انها تيجى تقعد عندنا"
وضحكت مريم
"فيه فرق كبير"
"نورينى يا ستى"
"نور مش جاية تقعد على طول...دى فترة بسيطة وهتتجوز وتروح بيتها وعلشان كده انا مستعدة اروح اجيبلها عفشها من عش الدبورة رقية ...قولى ليه"
"ليه"
"علشان يبقى كل حاجة جاهزة انهم يتجوزوا بسرعة...ولما ييجى يقابلك انت كمان متعقدش الدنيا قصاده يعنى لو قالك هتجوزها بكرة قوله وماله"
"وده ينفع؟؟ مش الجواز له اصول"
"اصول ياحبيبى لما تبقى بنت بنوت..انما اختك ارملة ومخلفة يعنى مينفعش تتشرط...انت تجوزها وخلاص"
"لما ابقى اسأل عليه"
"ولا تسأل ولا هباب...مش هى موافقة عليه يبقى خلاص ربنا يهنى سعيد بسعيدة"
"اللى فيه الخير يقدمه ربنا"

سامى قاعد يفكر ... نور ورقية واحد ولا اتنين
شافها اون لاين...بعتلها
"رقية انتى فين...قمتى ليه فجأة"
مردتش وبعد شوية عملتله بلوك
"تبقى هى نور"

مراد قافل عليه اوضته بيحاول ينام ..مفيش فايدة
بيتقلب يمين وشمال على السرير... متضايق
"يعنى ايه... لا بقى مش هيمنعونى انى اتجوز اللى بحبها علشان تفكير متخلف... انا مش مستنى منهم حاجة... وقرارى مش هرجع فيه"
                  ******************
الصبح وهو نازل...شاف مامته
"صباح الخير ياماما"
"صباح النور"
"ماما ايه رأيك نخرج انا وانتى واقابلك بنور وتتعرفى عليها وبعدين قولى رأيك"
"ولا نور ولا ضلمة انا لا عايزة اتعرف على حد ولا اشوف حد"
"ليه بس"
"اهو كده"
"بس انا بحبها ومش هتجوز غيرها"
"يبقى ان شالله عنك مااتجوزت"
"واضح انك نسيتى انى عندى 30 سنة واللى قدى مخلفين عيل واتنين"
"اشوفلك واحدة تناسبك وتكون بنت بنوت"
"ياستى انا اللى هتجوز ومش فارق معايا الكلام ده"
"انا يفرق معايا"
"فى ايه"
"انت عايز الناس تتكلم علينا ... يابنى ياحبيبى دى تلاقيها بتضحك عليك"
"هتضحك عليا ليه...حيلتى ايه تكون طمعانة فيه"
"راجل ملو هدومك... ياحبيبى انت مش فاهم تلاقيها عايزة تتجوز علشان اسباب الله اعلم ايه هيا"
"مش علشان بتحبنى يعنى"
"لا"
"عرفتى منين"
"يوووو يامراد... ماتسمع الكلام ..جواز من واحدة متجوزة قبلك لأ"
بص مراد فى الساعة ...شاف انه هيتأخر والكلام مع مامته مش هيخلص... فنزل

نور ومراد مع بعض... قاعدين على الكورنيش بياكلوا سندويتشات
"حلوة الحرية...اول مرة تقعدى معايا براحتك"
"كنت ببقى عايزة ارجع بسرعة علشان محدش ياخد باله"
"عسى ان تكرهوا شيئا وهو خير لكم... يعنى خناقتك مع عمة لوجى جت بفايدة وقربتنا اكتر"
"الحمدلله... وهانى بيقولك حدد معاد تيجى انت واهلك تطلبونى"
وسكت مراد... مش عارف يرد
"مالك يامراد؟؟"
"مفيش"
"وشك اتغير...قولى فى ايه"
"مفيش صدقينى"
"مش مصدقاك... انت عايز تأجل؟؟"
"لا طبعا انا عايز اروح لاخوكى دلوقتى قبل كمان شوية"
"اومال ايه اللى حصل"
"بصى انا بقول اجى انا الاول اقابل اخوكى وبعدين اهلى"
"ماشى... بس انا حاسة ان فيه حاجة تانية"
"مفيش يا نور... وحتى لو فيه احنا مش اتفقنا اننا هنواجه اى مشكلة مع بعض"
"ايوه طبعا...بس ابقى عارفة ايه المشكلة"
سكت مراد...بصت له نور
"اهلك رافضيننى؟؟"
بص لها مراد
"ليه بتقولى كده"
وضحكت نور بوجع
"علشان انا عارفة تفكير مجتمعنا اللى مش هيتغير... عارف يامراد اكيد مامتك هى اللى رافضانى...اصل احنا كده الست هى اللى بتيجى على الست اكتر من الراجل مع انها لو فكرت ان الموت والحياة ده بتاع ربنا وانى مليش ذنب ان جوزى مات يمكن كانت رحبت بيا مش رفضتنى من غير ماتشوفنى"
نور بتحاول تمسك دموعها قبل ماتنزل...حس بيها مراد
"بقولك ايه..ماتتصلى باخوكى وتقوليله عايز اقابله النهاردة"
ابتسمت بفرحة
"ولا هتقوليلى لازم اهلك ييجوا معاك"
"هو بصراحة لازم... بس بما اننا كل حاجة ماشية معانا بالعكس والظروف كلها ضدنا واحنا قررنا نتحدى كل حاجة من اول يوم... فمش لازم حد ييجى معاك وانت كفاية عندى"
"انا بحبك اوى يانور... مكنتش اتخيل انى ممكن احب كده"
اتكسفت نور
"انا هتصل بهانى وانتى بتوصلنى وكفاية قعدة علشان تلحق تشتغل"

فى نفس اليوم بالليل...مراد قاعد مه هانى ومريم ونور
مراد"بعد ما حكيت لك على كل ظروفى انا بتمنى انك توافق على طلبى من غير ماتحط شرط اهلى ووجودهم...زى ماقلتلك انا محدش بيدينى حاجة ومع الوقت هقنعهم بس سواء اقتنعوا او لأ انا متمسك بنور"
هانى"لو الظروف مختلفة يامراد مكنتش وافقت بس ياريت تحاول تقنعهم ...اتمنى انهم يشرفونا ونتعرف عليهم ويبقوا يحضروا كتب الكتاب ان شاءالله"
مريم"متمسكش ف حاجات صغيرة يا هانى...احنا لازم نقرا الفاتحة"
مراد"لا ... انا عايز نلبس الدبل مع قراية الفاتحة ومجبنهاش"
مريم"ياسيدى...نقرا الفاتحة دلوقتى وتروحوا تجيبوا الدبل بكرة وتلبسوها"
بص مراد لنور...
مراد"ياريت...نقرا الفاتحة"

مراد داخل البيت بالليل... كانت مامته قاعدة
"كنت فين يامراد"
"اول مرة تسألينى ياماما"
"علشان شكلك باين عليه...جيت استحميت وحلقت ولبست واتشيكت وغبت شوية وراجع بؤك مفتوح م الودن دى للودن دى"
"كنت عند اهل نور"
وصرخت هند
"كنت بتخطب يا مرااااااااد... من ورانا... خلاص اهلك ماتوا"
قام صادق من النوم على صوتها
"فى ايه"
هند"ابنك معملناش اعتبار وراح خطب الزفتة بتاعته"
صادق بيزعق"اما انت ابن ستين كلب عبيط وبريالة... اتضحك عليك... بتصغرنا يا حتة عيل وبتروح تخطب من ورانا"
مراد"انا قلتلكم وانتوا اللى مرضيتوش حتى تشوفوها ولا تسألوا عليها"
صادق"انت بترد عليا يا ابن الجزمة"
وهجم يضربه بالقلم...هند بتحوش بينهم وهى متغاظة من صادق
"هو مش ابن جزمة هو ابن كلب"
مسك مراد ايد صادق...وزعق لهم
"انتم بتعاملونى كده ليييييه.... هو انا بشحت منكم ... عملت ايه علشان تعاملونى كده..وانت هتضربنى فاكرنى صغير"
ومسك صادق ف مراد من هدومه
"مش صغير... طب يالا يالا من هنا...روح عند الهانم بتاعتك وبيتى ده متدخلوش تانى...مش انت كبرت ومش محتاج لنا ...غور"
فتح الباب وهو بيزقه بره... هند بتمسك ف مراد
"لا ياصادق مش كده...تعالى يامراد"
مراد بص لصادق وهو بره وصادق جوه
"ده العادى بتاعك... اكتر يوم انا فرحت فيه لازم تنكد عليا"
شد صادق هند جوه الشقة ورزع الباب
نزل مراد وهو مكسور وسامع هند وصادق بيزعقوا ويشتموا بعض وكل واحد بيتهم التانى انه السبب

هناك 29 تعليقًا:

  1. ده الدنيا اتطربقت على الاااااااخر

    ردحذف
  2. اه ...قاتله جدااااااااااااااااا

    ردحذف
  3. الهي تتشل يا صادق نكدت علينا كلنا منك لله ههههههههه

    ردحذف
  4. " هو مش ابن جزمــة ،، هوا ابن كلــــب "

    لآء اصيلة اصيلة يا ام مرااااااد ،،، يخربيت كدا

    دينااااااااااااااا ،،،،، انا تعبت انزليلنا بحلقتين الواحد بقي مدمن

    ردحذف
  5. وعلى رأي المثل قلت للهم انا رايح اتفسح االي ورااااك هو مكسححح :-( ياعيني عليك يامراد

    nancy

    ردحذف
  6. رهيييييييييييييييييبة بجد تسلم الايادى روووووووووووووووعة انا منتظرة الحلقة الجديدة بفارغ الصبر

    ردحذف
  7. tu7fa bgd goo om :)

    ردحذف
  8. حلوه جدااا
    بس مراد هايروح لسامى وهايقولوا على كل حاجه ولا لا ربنا يستر
    وياريت رقيه تتكشف بقى

    ردحذف
  9. الدنيا اتلغبطت خاااااااااااااااالص ؟؟؟؟
    ربنا يستر بقى

    ردحذف
  10. ربنا ياخد كل واحد زى صادق الرخم ده

    ردحذف
  11. بصراحة يا دينا الحلقة المرة ده جــــــامدة اوووووووى

    وبصراحة قدرتى توصلى شئ من الفكاهة اللى بتبقى عند المصريين واللى بتظهر بدون قصد فى الخناقات والمشادات :) ,, ابدعــــــتى يا دينا

    ردحذف
  12. هههههههههههههههههههههه

    ام مراد طلعت اصيلة اوووووووووووووووي

    ههههههههه

    بس ليه النكد اللي ف الأخر دهوووووووووووووووووووون

    ردحذف
  13. ليه النكد ده خربيتك اصابر انت ورقيه الحربايه دي انا هعيط اهئئئئئئئئئئئئئئئئئئئئئ

    ردحذف
    الردود
    1. صادق مش صابر هههههههه الحلقه برجلتنى

      حذف
  14. بصراحة القصة تحفة بس خلينا نفرح شوية وخلي صادق ده يغير من تصرفاته ويارب سامي ميقلش لمراد دلوقتي

    ردحذف
  15. تحففففففففففففففففففففففففففففففففة بجد تسلم ايديكى يا قمر
    وربنا يستر ع الباقى بجد وتعدى ع خير

    ردحذف
  16. صادق ده غبى اوى
    انا حاسة ان مراد هينزل يروح لسامى و سامى هيقوله على حكاية رقية

    ردحذف
  17. بجد ماشاء الله عليكى وعايزة اقوليك ان مراد وعائلته كلها شخصيات حقيقية فى حياتى ومع بعض الاختلاف فى الصفات ولكنها شخصيات حقيقية بما فيهم مايسة والتوائم وجوزها اللى نهايته حتبقه منيلة ان شاء الله كانك بجد بتوصفى حيات الاشخاص الحقيقن دول فى حياتى وشكرا ليكى على كل شىء وقصصك فى قمة الروعة بجد يارب تبقى فى تقدم دائم وتمتعينا بالقصص الرائعة بتاعتك وسلمت يداكى يارب

    ردحذف
  18. تسلم ايديكى الحلقة تحففففففففة كالعادة متألقة يا دينا :)

    ردحذف
  19. يااا لهوتى الدنيا باظت على الاخر بس بجد حلقه تجنن
    tota

    ردحذف
  20. بصراحة احلى حاجة فى الحلقة "هو مش ابن جزمة ده ابن كلب" مابلاش حجج يا ام مراد انتى مش طايقة جوزك اصلا واستغليتى الفرصة عشان تشتمى جوزك الغتت ده كم انتى عظيمة ايتها المراة المصرية!!!!!!!
    dentist aya

    ردحذف
  21. بجد حلقة جاااااااااامده اوى
    وانا لو فى مكان مراد مكنتش هعمل الا كده
    بجد تسلم ايدك :) :) :)

    ردحذف
  22. اصيلة يا ام مراد ^_^

    ردحذف
  23. يعنى هند سيبه المشكله الاساسيه وتقول لصادق ده مش ابن جزمه ده ابن كلب ههههههههههههه
    بس تسلم ايدك يادينا

    ردحذف
  24. ولســه لما سامي يقول لمراد ع موضوع نور :3 , ده باينـها هتحلو ع الاخـر :D

    ردحذف
  25. هههههههههههههههه عجبني اوي حوار هو مش ابن جزمه هو ابن كلب هما بيتعزموا علي ايه ولهي مراد ده ارجل واحد في القصه دي

    ردحذف
  26. الله يخربيتك يا صادق

    ردحذف
  27. انت عندك مهاره جمده بس عندك اخطاء املاءيه يعني في الول قلتي نور وفوقيه وهو رقيه ب سالحلقه جامده وبزات هو مش ابن زمه هو ابن كلب اغبيه اوي الي بيشتمو نفسهم اوي يعني الاب بيشتم ابن يا ابن الكلب يعنى بيقول عفى نفسه كلب

    ردحذف

قول رأيك بلاش تقرا وتقفل من سكات...ارائكم تهمنى