الخميس، 17 يناير 2013

الحب على كفة ميزان... الحلقة 10

الحلقة 10
حسام قاعد بعد الكشف مع مروة
الدكتور"تمام الحالة مستقرة ...وطبعا مفيش داعى للاجهاد ولا للانفعال وتستمر على الدوا بتاعك...لو فيه اى حاجة تليفوناتى كلها هنا"
مروة"والاشعة اللى عملناها دلوقتى ورسم القلب كانوا ليه"
الدكتور"مفيش اطمئنان مش اكتر"
حسام بيقوم"متشكر يادكتور"
الدكتور"العفو...تشرفنا يادكتور"
وخرجوا حسام ومروة من اوضة الكشف
                     *****************
حسام ومروة رايحين يركبوا العربية
واحمد بيركن عربيته فى المستشفى
احمد وهو فى العربية شاف حسام وهو بيركب عربيته
حقق فيه كويس...حسام بيتحرك بالعربية وعدى من جنب احمد
احمد جوه عربيته اتأكد ان ده حسام واكيد اللى معاه مراته
خرج حسام بعربيته من المستشفى
ركن احمد ونزل من العربية ودخل المستشفى

ليلى بتجهز السفرة
"عصااااااام الساعة كام"
عصام جالها
"3ونص"
سابت ليلى اللى ف ايدها وراحت تدور على الموبايل وهى بتكلم نفسها
"علا اتأخرت اوى...معقول تكون مش جاية"
عصام قعد فى البلكونة... جت ليلى وهى ماسكة الموبايل
"مبتردش"
"جربى تانى يمكن مش سامعة"
"الو...انتى فين ياعلا...داليا..ازيك يا داليا ..هى علا عندك؟؟ امتى ده؟؟كده محدش يقولى...هى فين؟؟ طيب انا جاية لكم... مع السلامة"
"فى ايه ياليلى"
"علا تعبت امبارح بالليل وفى المستشفى من امبارح"
"مستشفى؟؟ليه مالها"
"انا داخلة ألبس ...هتوصلنى ولا قاعد"
"مش هنتغدا"
"هو الاكل هيطير...الاكل عندك وانا هروح اشوف الغلبانة الوحدانية دى يمكن محتاجة حاجة"
"هى ف مستشفى ايه"
"مستشفى فؤاد صابر"
وسكت عصام من المفاجأة...وفكر بعد ما دخلت ليلى تلبس
"حسام ومعاه مراته فى المستشفى...لو اتقابلوا ال3 مع بعض ممكن يحصل ايه"
وبص حواليه اتأكد ان ليلى دخلت الاوضة ومش هتسمعه
واتصل بحسام
"الو...حسام ازيك ..انت فى المستشفى؟ مراتك لسه معاك؟؟..حصل حاجة؟؟قابلت حد طيب؟؟ لما ترجع البيت وتبقى لوحدك كلمنى..سلام"

احمد بعد ما وصل عند علا واطمن عليها
شاور لداليا بره الاوضة...خرجت له
"حد جالكم؟؟"
"اه فيه من اصحاب علا اللى بيعرف انها فى المستشفى بييجى بس مش كتير يعنى"
"عارفة شفت مين خارج من المستشفى"
"مين"
"حسام"
"حسام!!...حسام..."
"اه ...حسام كامل وكانت معاه مراته"
"ايه الصدفة الغريبة دى...الحمدلله ان علا مشفتهومش كانت هتتعب اكتر"
"هتقوليلها انى شفته"
"مش عارفة...ايه رأيك"
"لما تبقى تخف ابقى عرفيها... انا شايفُه ماشى مع مراته وماسكة ف ايده يعنى هو عايش حياته عادى وهى لسه حابسة نفسها ف ذكريات"
"طبيعى يا احمد انه يكون عايش حياته عادى... اومال طول السنين دى يعنى هيكون لسه فاكرها"
"طيب ادخلى لها انتى وانا هروح اشوف الدكتور"

حسام لما رجع ... دخل مكتبه واتصل بعصام
"الو...ازيك يا عصام"
"انا تمام ... طمنى يا حسام انت رجعت البيت"
"اه ياعصام فى ايه"
"قابلت حد فى المستشفى"
"حد مين...لا مقابلتش حد...هو فيه ايه متقول على طول"
"طيب الحمدلله ان ربنا ستر...علا فى المستشفى من امبارح"
"ايييه...مالها؟"
"معرفش انا لسه عارف ساعة ماكلمتك ...ليلى راحت لها ولما ترجع هعرف منها التفاصيل واقولك"
"طيب طمنى يا عصام اول ماتعرف حاجة"
ودخلت مروة على حسام
"يالا ياحسام الغدا جاهز"
ارتبك حسام من دخولها المفاجئ
حست مروة بارتباكه...قربت منه وقعدت قصاده
رد حسام وهو بيبص لها
"ماشى يا عصام هستنى منك تليفون...سلام"
قفل معاه ..ومروة بتبص لها بشك وهو بيبص لها بتحدى
"ايه يامروة مش الاكل جاهز...قعدتى هنا ليه"
"مستنياك تخلص مكالمة"
"خلصت خلاص"
"هو عصام مش لسه مكلمك واحنا جايين...فى ايه تانى"
"مش شرط يكون فيه سبب علشان صاحبى يكلمنى"
"مش لازم سبب بس يعنى عايزك فى ايه علشان يكلمك تانى"
"انا اللى اتصلت بيه يا مروة...فيه اسئلة تانية؟؟"
"اتصلت بيه ليه؟"
"يالا علشان الاكل هيبرد ويبقى مالوش طعم"

حسام بيلبس... بالليل
"انت بقيت بتنزل كل يوم"
"ايه المشكلة"
"مش عوايدك يعنى"
"مش عوايدى هناك..انما هنا هنزل كل يوم"
"رايح فين"
"اقابل عصام...وقبل ما تكملى ايوه كل يوم"
"انتوا بتتقابلوا فين"
"فى كافيه"
"لوحدكم"
"لا بنجيب ستات"
"انت بتتريق عليا يا حسام"
"دلوقتى بتريق...لو زودتيها عن كده يا مروة مش هيحصل خير"
"انت بتهددنى...هتعملىا ايه يا حسام"
"اعتبريها زى ماتعتبريها"
وسابها ونزل
                      ****************
حسام فى عربيته... بيتصل بعصام
"ايوه يا عصام...ايه الاخبار... مجتش لحد دلوقتى ليه؟؟ طيب مكلمتهاش؟؟ انا قاعد قلقان عايز اعرف مالها واطمن عليها...خايف من ليلى ...خلاص انا هتصرف...ولو سألتك كأنك مقلتليش حاجة... هبقى اقولك هعمل ايه...سلام...هكلمك هكلمك تانى...سلام"
راح حسام عند محل ورد... اشترى بوكيه
                 ******************
حسام داخل المستشفى...راح على موظف الاستقبال
"لو سمحت غرفة الاستاذة علا صالح الاقيها فين"
"ثوانى يا فندم"
وبعد لحظات كان الموظف بيشوف البيانات قدامه
"خرجت من نص ساعة تقريبا"
"خرجت!!شكرا"

داليا بتفتح باب شقة علا وبتدخل قبلها
ليلى ماسكة علا فى ايدها وداخلين وراها
داليا"نورتى بيتك ياعلا"
ليلى"تدخلى على اوضتك ولا عايزة تقعدى فين"
علا"اه هدخل اوضتى"
دخلوا كلهم اوضة علا... قعدوها على السرير
علا بتبص لهم
"انا مش عارفة اقولكم ايه...انا لو ليا اخوات مكنوش عملوا معايا كده"
داليا"مش هرد عليكى"
ليلى"والله معاكى حق يا داليا...احنا مش اخواتك ولا ايه ياعلا"
علا عيونها بتلمع من الدموع
"ربنا يخليكم ليا"
ليلى"ربنا يشفيكى يارب...بقولك ايه انتى ترتاحى زى الدكتور ماقال ومفيش شغل لحد ما صحتك تبقى كويسة"
علا"مينفعش يا ليلى... ربنا يسهل واقدر انزل بكرة ان شاءالله"
داليا"لا بقى ياعلا ... مش للدرجة دى يعنى"
علا"متقلقوش لو لقيت نفسى تعبانة مش هنزل"
ليلى"انا هقوم ياعلا وهكلمك اطمن عليكى... وهعدى عليكى بكرة تانى..مش عايزة حاجة"
علا"شكرا يا ليلى"
داليا"متقلقيش يا ليلى انا بايتة معاها"

حسام قاعد فى عربيته...بوكيه الورد جنبه
عينه على بيت علا...قاعد متردد
"اطلع؟؟ ... بس هقولها ايه بعد السنين دى كلها... وهيبقى شكلى ايه لو طلعت ولقيت عندها حد يعرفنى ...بس انا عايز اطمن عليها... اطلع واقولها انى عايز اطمن عليها...هيحصل ايه؟؟ اكيد مش هتطردنى ... انا هعمل ايه غير انى ازور مريض...ايوه انا مش بعمل حاجة غلط دى مجرد زيارة مريض"
رن موبايله...رد
"الو...ايوه يامروة...فى ايه؟؟ماما... طيب اتصلى بالدكتور وانا جاى حالا....سلام"

داليا بتشيل صينية العشا من على السرير من قدام علا
"يالا بقى علشان تنامى"
"مش جايلى نوم"
"طيب هودى الصينية المطبخ واجى انيمك واحكيلك حدوتة"
ضحكت علا... راحت داليا المطبخ ورجعت
"يالا اتاخرى كده شوية خدينى جنبك"
مددت داليا جنب علا
"احكيلك حدوتة امنا الغولة ولا التعلب المكار"
عيطت علا... سابت دموعها تنزل براحتها اللى حابساها طول اليوم
اخدتها داليا ف حضنها
"مالك يا لولو... بتعيطى ليه"
"اول مرة احس انى غلطت ف حق نفسى...انا كنت هموت ومحدش يحس بيا"
"بعد الشر عليكى يا حبيبتى متقوليش كده"
"الوحدة كل يوم بتتعبنى اوى يا داليا... ولما تعبت خفت.. انا بقيت مش عارفة انا غلطانة انى متجوزتش ولا انا صح علشان مش عايزة اتجوز والاقى نفسى بفكر فى حسام"
"حسام حسام حسام... حسام عايش ومتهنى وانتى موقفة حياتك على ذكريات"
"انا مش مستنية منه حب...انا عارفة انه اكيد نسينى"
"احمد شافه النهاردة"
"شافه.... شافه فين؟؟ وقاله ايه؟؟سأل عليا؟؟"
"احمد اللى شافه وهو ماشفوش..كان خارج من المستشفى ومعاه مراته وايديهم ف ايدين بعض... عيشى حياتك ياعلا ومتعلقيش نفسك بأنقاض حب ... اتجوزى وألحقى خلفى الايام بتجرى واحنا بنكبر... وزى ما شفتى فى الجورنال والتليفزيون عايزينك ترجعى بسرعة علشان شغلهم يمشى مش مهم عندهم مصلحتك ولا صحتك... بكرة لما تكبرى هتحتاجى اسرتك جنبك مش شغلك اللى بيعتمد على صحتك...فكرى لو لاقدر الله مبقتيش قادرة تشتغلى يومك هيعدى ازاى ولا هتعملى ايه لوحدك"
علا سكتت بتفكر فى كلام داليا
"لو شايفة انى بتكلم غلط قوليلى"
"للاسف كل كلامك صح"
"يبقى جربى تسيبى قلبك للحب... جربى افتحى قلبك يا علا متسيبيهوش مقفول على اطلال"
"وافرضى معرفتش"
"لو معرفتيش تحبى... اختارى بعقلك زوج مناسب من اللى بيتقدمولك وعيشى معاه بكل اخلاص وود والحب هييجى بالعشرة"
"هحاول... اكيد هحاول يا داليا"
ورن موبايل علا...مسكته داليا
"ده وحيد... شفتى ابن الحلال جه ع السيرة... خدى رد عليه"
ردت علا عليه
"الو... الحمدلله يا وحيد.. انا احسن الحمدلله...شكرا على سؤالك"
داليا بتشاور لها انها تلمح له
"متشكرة اوى والله لو احتجت حاجة هقولك... مع السلامة"
"ايه ياعلا"
"ايه انتى"
"مش تقوليله اى حاجة"
"اقول ايه بس...مجتش مناسبة..لما يكون فيه مناسبة كلام هبقى اتكلم"

حسام وهو على سريره...جت مروة جنبه
"حسام"
"نعم"
"مالك"
"مفيش اتخضيت على ماما"
"الحمدلله بقت كويسة... غيبوبة سكر وعدت"
"الحمدلله"
قربت منه وسندت راسها على صدره
"انت زعلان منى"
"متضايق اوى"
"من ايه"
"طريقتك بقت اسئلة اسئلة وتحقيقات بطريقة مستفزة"
"بحبك يا حسام وبغير عليك"
"اللى فيه ده شك مش غيرة"
"ليه بتقول كده"
"علشان احنا بقالنا 13 سنة متجوزين واول مرة تقعدى تحققى معايا ف كل حاجة كده مين اتصل وليه ورايح فين"
"انا اسفة... بس غصب عنى"
حضنته بحب
"انا بحبك اوى يا حسام"
حضنها وهو بيطبطب عليها
"وانا بحبك... متضايقينيش تانى يا مروة"
"حاضر ياحبيبى"
"بقولك ايه بقى... قومى اطفى النور واقفلى الباب بالمفتاح اما اقولك كلمتين سر"

تانى يوم الصبح...نزل حسام ومروة بتوصله
"انا رايح الجامعة ..مش عايزة حاجة وانا جاى"
"شكرا ياحبيبى ترجع بالسلامة"
"خلى بالك الدراسة قربت شوفى الولاد ناقصهم ايه وكمليه"
"حاضر"
كانت ماشية جنبه ورايحين ناحية العربية...افتكر حسام الورد اللى ف العربية جنبه
التفت لمروة باسها من راسها"يالا يا حبيبتى ادخلى انتى بقى..سلام"

داليا فى المطبخ... دخلت لها علا
"صباح الخير يادودو"
"يا صباح الفل يا لولو... ايه اللى قيمك"
"خلاص بقى مكنتش شوية دوخة"
"دوخة دخلتك المستشفى والدكتور قال بلاش اجهاد"
"مينفعش اسيب الشغل"
"طيب بلاش الجورنال...خليها البرنامج بس الكام يوم دول"
"ماشى...ممكن انتى بقى تروحى لبيتك وبنتك علشان انا بوظتلكم اليوم اللى كنتوا هتسافروا فيه"
"هو السفر هيطير"
"انا هكلم منه واقولها متزعلش ... وليها فسحة عندى"
"ان شاءالله ...تبقى كويسة انتى بس وبعد كده نعمل اللى احنا عايزينه"
ورن موبايل علا... دخلت اوضتها تشوف مين
ردت وهى راجعة لداليا تانى وبتبص لها
"الو...ازيك يا وحيد... الحمدلله احسن... انا نازلة رايحة البرنامج بالليل...انت وراك حاجة النهاردة؟؟ يعنى لو كنت فاضى ممكن تيجى تاخدنى بعد البرنامج ونتعشا مع بعض... ههههه اه انا علا والله مستغرب ليه... لما اشوفك نتكلم...مع السلامة"
قفلت علا مع وحيد وداليا بتبص لها بفرحة
"مصدقش ودانه طبعا"
"ههههه لا مصدقش"
"وهتعملى ايه وتقوليله ايه؟"
"هقوله الحقيقة ومش هكذب عليه"
"ايه الحقيقة اللى هتقوليها ياعلا...هتجيبى سيرة حسام"
"لا... بس هقوله انى فكرت فى الارتباط وهدى لنفسى فرصة لاعادة التفكير تانى... يمكن يا داليا لما اقرب منه احس انى ممكن ارتبط بيه فعلا... وهحاول بجد"
"ربنا معاكى يا حبيبتى"

حسام قاعد فى الكافيه بيتفرج على البرنامج
وشاف رقم القناة ...سجله عنده على الموبايل
واول ما البرنامج ...خلص
اتصل بالقناة...وبعد اكتر من محاولة .. ردوا
"الو... لو سمحت ممكن رقم تليفون الاستاذة علا... طيب ممكن اكلمها ..لا مش علشان مشاركة فى البرنامج  ...انا عايز اكلمها شخصيا ... ماشى معاك.."

هناك 23 تعليقًا:

  1. جمييييييييييييييييلة ااووووووى بجد مستنيه الحلقه بتاعت بعد بكرا بفارغ الصبر
    مااااسة

    ردحذف
  2. اللي عايز يقرى الحلقات من اولها يعمل ايه لان الحكايه شدتني اوي انتي كلامك رائع

    ردحذف
  3. تحففففففففففففففه يادينا بجد انتى قمه الابدااااااااااع ربنا يوفقك

    ردحذف
  4. اللى عاوز يقرا الحلقات اللى فاتت انزل تحت لاخر الصفحه هتلاقى رساله اقدم هتجبلك الحلقه اللى فاتت وهكذا ......

    ميمو .

    ردحذف
  5. حلوه اوي و نفسي اعرف ايه اللي هيحصل تسلم ايديكي

    ردحذف
  6. حلوه جداااااااااااااا يا دينا

    ردحذف
  7. لووووووووووووول جامده يا دينا
    انا عندى احساس ان علا وحسام هيرجعو لبعض وقلبهم هيتحسن و هيبقى لازم يعيشو سوا عشان يكملو حياتهم وفى الاخر ينفصلو ويموتو :P
    marwan kotp

    ردحذف
  8. جاااااااااامده

    ردحذف
  9. حلوة اوى يا دينا تسلم ايدك مستنيية باقى القصة بفارغ الصبر

    ردحذف
  10. nice awee y dodo tslm edk
    keep going :):)

    ردحذف
  11. اللي نفسهم ان حسام و علا يرجعوا لبعض .هل حاولو يشوفوا الحكايه من وجهه نظر مروه و هل من المنطقي و الانساني اننا نهدم اسره فيها زوجه محبه و اولاد صغيرين محتاجين الترابط الاسري عشان اسره متبنتش اصلا دي تبقى منتهى الانانيه

    ردحذف
    الردود
    1. الله ينور عليكي
      ناس همها الحب و العيش علي الاطلال والذكريات وطظ في الاستقرار وهدم بيت باللي فيه
      فعلا حرام
      مروة ملهاش ذنب

      حذف
  12. جميييييييييييييييلة اوى :) :) :)
    بس حسام مش من حقه انه يدخل فى حياتها تانى عشان هتتلغبط وهتتلغبط حياته هو كمان مكنش ينفع !!!!!

    ردحذف
  13. حلوة أووووووووووووووووووووووووووووي

    تسلم الأيادي

    بس بجد حسام اناني اووووووووووووووووووووي

    ما يبعد بقي عشان تعيش حياتها ما هو عايش مش معني انها لسه في قلبيه انه مش عايش لا ده

    عايش بأمارة الكلمة السر اللي قالها لمروة ههههههههههههههههههههه

    ردحذف
  14. حسام ده انانى اوى فعلا هو ماله و مال علا بقى . لو بيحبها مكنش سابها و اتجوز و جاى يفتكرها بعد 13 سنه . و ياريت يخليه فى مروه باين انها بتحبه اوى يعنى و هو كده هيحرب بيته بايده . و علا اتمنى ان حالها يمشى مع وحيد ........
    بس بجد حلقه تحفه تسلم ايديك

    ردحذف
  15. انا هموت واشوف الحلقه الجايه بجد تسلم ايديكى يا دودو

    ردحذف
  16. انا ف انتظاااااااااااااااااار المكالمة بقى :)

    ردحذف
  17. بس القصة شبه فيلم اغلى من حياتى كانت شادية برضو ماتجوزتش وفضلت مستنياه وهو كان اتجوز و خلف كده

    ردحذف
  18. عايزة اقول على اجه فى ناس كتير بتتجوز وتعيش اياتها بس اللى بتبه بيكون فى قلبها لد ما تموت اللى يحب عمره ما يكرة وده بيكون مغصوب عليه علشان فعلا الانسان قلبه مش بايده

    ردحذف
  19. بحس اني عاوزه اعيط :'(

    ردحذف
  20. حسام ده استغفر الله العظيم يعنى بدل ما يحاول ينساها و يفكر فى مراته و ولاده يقوم يكلمها
    قلبى عندك يا مروة :(

    ردحذف
  21. حسام انانى اووى عاوز يبقى مع مروه ويفكر فى علاء مايسيب علاء

    ردحذف

قول رأيك بلاش تقرا وتقفل من سكات...ارائكم تهمنى