السبت، 19 يناير، 2013

الحب على كفة ميزان... الحلقة 11

الحلقة 11
علا بعد ما خلصت الحلقة
خرجت من الاستوديو وقابلها احمد
"عاملة ايه دلوقتى"
"الحمدلله احسن... انا اسفة يااحمد علشان اخدت داليا منكم ومروحتوش العين السخنة زى ما كنتم متفقين"
"ايه يابنتى الكلام ده...عيب"
وجه واحد من العمال
"يا استاذة فيه تليفون علشانك"
استغربت علا
"من مين"
العامل"مش عارف...فيه حد عايزك فى الكنترول"
احمد"الاتصال جاى على رقم البرنامج... تردى ولا تحبى اشوف مين"
ورن موبايل علا..بصت شافت انه وحيد
"ده وحيد... طيب رد انت لحد ما اشوف وحيد جه ولا لسه... لو الاتصال مهم قوليلى"
راحوا على الكنترول وعلا بترد على وحيد
"الو.. ايوه خلصت...نازلة اهو... سلام"

وصلوا الكنترول...رد احمد على التليفون وعلا واقفة وراه
"الو.. مين يافندم"
علا بتشاور لاحمد بمعنى مين؟؟
احمد هز راسه بمعنى مش مهم
"هى خلصت ونزلت...احسن الحمدلله...مع السلامة"
قفل احمد وبص لها
"ايوه يا سيدى بقى ليك معجبين بيتابعوا الاخبار"
"مين بجد يا احمد"
"واحد بيقول انه من متابعى البرنامج وعرف انك تعبانة وكنتى فى المستشفى وعايز يطمن على صحتك"
"وده عرف منين ده"
"يا علا انتى بقيتى من المشاهير دلوقتى يعنى هتلاقى ناس يعرفوكى وانتى متعرفيهومش...متاخديش فى بالك"
"طيب انا نازلة"
"اوصلك يا علا ولا هتقدرى تسوقى"
"لا انا مش معايا العربية...انا معزومة على العشا..مع وحيد"
"واضح ان فيه تطورات انا لسه معرفهاش"
"داليا هتحكى لك اكيد... يالا اشوفك بكرة"

عصام وصل الكافيه وكان حسام بيتكلم فى الموبايل
قرب منه سمعه وهو بيقول
"سمعت انها تعبانة وكنت عايز اطمن عليها... مينفعش اكلمها؟؟ شكرا"
قفل حسام وعصام بيبص له
"انت كنت بتكلم مين"
"كنت بسأل على علا"
"تسأل عليها!!! ما انا بطمنك"
"كنت عايز اكلمها"
"تكلمها يا حسام"
"ايوه"
"ليه وتقول لها ايه"
"كنت هسمع صوتها بس ومش هقول حاجة"
"ما انت بتشوفها وتسمع صوتها كل يوم... افرض كانت عرفت صوتك كنت هتنكر نفسك"
"مش عارف بقى ياعصام"
"لا ...لازم تعرف انك كده بتلعب بالنار... كلامك مع علا هيصحى مشاعركم القديمة والله اعلم ممكن يحصل ايه"
"ولا حاجة...مش هيحصل حاجة"
"انت من ساعة ماشفتها وانت زى المجذوب اللى ندهته النداهه"
"انا معملتش حاجة اكتر من انى بشوفها زى ملايين الناس"
"طيب خلى بالك...متزودش عن كده"
"معاك حق... انا لو شفتها او كلمتها وجها لوجه مش عارف ممكن احساسى يودينى فين"

علا فى مطعم مع وحيد... قاعد بيبص لها
"ايه ياوحيد بتبص لى كده ليه"
"معجب"
وابتسمت بكسوف
"لا بتكلم جد...بص انا عارفة انك مستغرب انى قلتلك نتعشا مع بعض بس انا عايزة اتكلم معاك"
"هو مبدئيا انا مكنتش بهزر وانا بقول معجب بس ماشى نعديها ونتكلم... انا فعلا استغربت"
"ذكية انا برضه لقطتها"
"معنديش شك ف ذكائك"
"اتكلم معاك بصراحة ولا بمجاملة"
"قولى كل اللى عندك بمنتهى الصراحة ومن غير تجميل"
"انا اتسرعت لما رفضت طلبك فى الارتباط... انا فعلا محتاجة احب واتحب ..محتاجة حد يكون جنبى... محتاجة الامان والاستقرار"
"وانا موجود يا علا... وعرضت عليكى الجواز وبكرر عرضى تانى...لو موافقة نحدد معاد الجواز نستنى ايه"
"هى دى المشكلة...انى مش مستعدة للارتباط"
"مش فاهم"
"انا كنت قافلة على قلبى سنين طويلة...محتاجة وقت علشان افتحه للحب والحياة من جديد...مش عايزة ارتبط بسرعة وتحت تأثير احتياجى للارتباط ده من غير حب... فاهمنى يا وحيد"
"فاهم"
وجه الجرسون وحط العشا قدامهم...سكتوا لحد ما مشى
"يعنى افهم من كلامك يا علا انك لسه مش بتحبينى"
سكتت علا وكمل وحيد
"احنا اتفقنا نتكلم بصراحة من غير تجميل"
"لو متضايق او صرفت نظر عن فكرة الارتباط قول ياوحيد"
"لا بالعكس... انا معاكى... احنا نعتبر نفسنا فى فترة تعارف...ايه رأيك حلوة فترة تعارف دى"
"حلوة اوى...احنا فعلا محتاجين نتعرف على بعض اكتر من اننا زملاء"
"تمام... يالا الاكل هيبرد... اتفضلى"

حسام راجع العصر من الجامعة ودخل على مكتبه
حط الشنطة على المكتب وقبل ما يخرج دخلت عليه مروة
"حمدالله ع السلامة"
"الله يسلمك... سيف لسه تعبان"
"اه ونايم فى اوضته"
"بياخد الدوا ولا لأ"
"اه طبعا ماشية على مواعيد المضاد الحيوى اللى الدكتور كتبه"
"طمنينى...معاذ لسه متضايق علشان ساب اصحابه"
"لا خلاص بقى له اصحاب فى المدرسة الجديدة ورحمة وسيف كمان مبسوطين"
"طيب الحمدلله"
"هتعمل ايه يوم الخميس"
"هعمل ايه ف ايه"
"الخميس هيكون 15ديسمبر"
"ماله يعنى"
"اخص عليك يا حسام...عيد ميلاد رحمة"
"اااااه ...صحيح...طيب هجيبلها هدية حلوة ان شاءالله"
"لا انا عايزة اعملها عيد ميلاد وهنعمله فى الجنينة ان شاءالله واعزم صاحباتها وامهاتهم وكمان اصحاب معاذ وسيف"
"لازم الخميس يعنى...ماتعمليه الجمعة"
"عيد الميلاد الخميس ...اعمله الجمعة ليه"
"علشان الجمعة بقعد مبنزلش...بس عادى خلاص اعمليه الخميس براحتكم كده كده ماليش لازمة احضر هيبقى كله عيال صغيرة"
وبصت له مروة باستغراب
"ايه اللى بتقوله ده...مش دى رحمة حبيبة قلبك اللى بتقعد تقول محدش يزعلها ومحدش يكلمها...مش عايز تحضر عيد ميلادها"
"متكبريش الموضوع... ايه اللى يخلينى موجود وسط اطفال بس"
"علشان بنتك"
"طيب خليه الجمعة"
"هو انت لازم تنزل كل يوم يعنى...ايه الاهمية فى نزولك اليومى ده"
"ما انتى عارفة بخرج شوية مش هيحصل حاجة"
"ومش هيحصل حاجة لما تفوت يوم"
سكت حسام شوية يفكر
"ربنا يسهل... هطلع اغير هدومى واطمن على سيف"

علا فى الاستوديو...قبل البرنامج ما يبدأ
بتتكلم فى الموبايل
"شوية وهقفله علشان الحلقة هتبدأ... هروح على طول بعد ما اخلص... ولادك؟؟ اه ماشى اتعرف عليهم...انا كنت ناوية اقضي الجمعة ف البيت بس مش مهم... خلاص عدى عليا بكرة ونقضى اليوم مع بعض ان شاءالله...مع السلامة"
قفلت الموبايل... احمد كان قريب منها...لما شافها خلصت
"وحيد؟؟"
"اه"
"ايه الاخبار"
"عايز يعرفنى على ولاده ...يوم الجمعة بيخرجوا معاه فقال نتغدا كلنا مع بعض علشان نتعرف يعنى"
"طيب كويس... خطوة اتأخرت ياعلا"
"كل شئ بأوان"
صوت المخرج
"يالا يا جماعة...دقايق ونطلع ع الهوا...جاهزين"

حسام داخل المكتب وهو بيبص فى الساعة 9
قفل الباب بالمفتاح...فتح التليفزيون وصوت ال dj   بأغانى عيد الميلاد واصل للمكتب
دور على القناة...مش موجودة...اتصل بعصام
"الو...ايوه ياعصام...بقولك ايه عايز تردد القناة بتاعة علا... متخافش هى اطمنت ومش هتدور...هبقى امسحها لما اخلص...اخلص بس هاتها بسرعة...ايوه...ايوه...ماشى...سلام"
وجاب القناة ولما شاف علا..ابتسم وقعد يتفرج

احمد قايم من النوم...خرج من اوضته
دخل على داليا وهى قاعدة فى المطبخ وماسكة الموبايل
"ايه يادودو قاعدة ف المطبخ كده ليه"
"علا مبتردش على التليفون يا احمد"
"متقلقيش مش قالت لك انها معزومة مع وحيد وولاده"
"اه قالت ... بس مش عارفة قلقانة كده ليه... اصل متصلتش بيا النهاردة خالص"
كررت داليا الاتصال... واحمد شرب مياه وبيخرج من المطبخ سمع داليا صرخت
"اييييه ياعلا مبترديش ليه؟؟؟ ايه صوت الدوشة اللى عندك دى... ايه؟؟بتقولى فين؟؟"
احمد"فى ايه"
داليا"وانتى مالك... ماتخليكى ف نفسك شوية وسيبك من وجع القلب ده...يا ستى الشغل ده للرجالة"
احمد"فى ايه يا داليا"
داليا"علا بتقول فيه اشتباكات عند مجلس الوزراء وهى هناك"
اخد احمد التليفون من داليا
"الو... انتى فين ياعلا... انا معرفش حاجة انا نزلت صليت الجمعة تحت البيت وطلعت تانى كملت نوم... انا جاى لك هبقى اكلمك لما اوصل عندك... خلى بالك من نفسك...سلام"
قفل احمد ودخل يلبس...دخلت داليا وراه
"لأ بقى...انتم عايزين تموتونى انتوا الاتنين"
احمد بيكمل لبس ومش بيرد عليها
"هى مالها وانت مالك.... كل مرة بتروحوا المظاهرات الزفت دى ببقى هموت"
رد احمد بهزار"نداء الواجب"
"هو مفيش غيركم للواجب ده...ارحمونى بقى...مش كفاية ايام الثورة وانتم قاعدين لى هناك...حرام عليكم...وحياة منه ماتنزل"
احمد كان خلص لبس...رايح عند الباب وداليا ماشية وراه
"طيب روح هات علا وتعالوا... متتأخروش علشان خاطرى"
احمد وهو واقف على الباب
"دودو حبيبتى... كل مرة بتقولى نفس الكلام وكل مرة بروح اشوف شغلى برضه... متقلقيش انتى بس"
"لا قلقانة وبقلق وهفضل اقلق علشان بخاف يا احمد"
"متخافيش...يالا هبقى اكلمك...سلام"

داليا ومنه داخلين يجروا فى المستشفى
داليا بتتكلم فى الموبايل
"الو... فى الدور الكام... طيب انا وصلت المستشفى اهو...داخلة الاسانسير...مع السلامة"

داليا ماشية فى المستشفى بعد ما خرجت من الاسانسير
بتقرا المكتوب على الاوض...لحد ما شافت احمد واقف
دخلت بسرعة على احمد...ومنه جريت حضنته
"احمد انت كويس"
احمد"الحمدلله"
داليا"علا فين"
احمد "بتعمل اشعة"
داليا"حصل لها ايه"
احمد"مفيش بسيطة ياداليا متقلقيش...احنا احسن من غيرنا كتير"
خرجت علا من الاشعة...جريت عليها داليا تحضنها
علا ماسكة دراعها الشمال بايديها اليمين
"علا حبيبتى ايه اللى حصل"
علا"متخافيش وقعت بس واحنا بنجرى"
الدكتور"اتفضى يامدام هنا لحد ما احضر الجبس"
احمد"جبس؟؟"
الدكتور"شرخ بسيط بس هنعمل جبس 21يوم وهتبقى تمام"
داليا"مش قلتلكم بلاش تروحوا...شفتوا اللى حصل"
علا"ايه يعنى دراعى اتكسر وهتجبس... اسألى احمد الناس كانوا بيقعوا جنبنا ازاى وفيه اللى بيتلحق وفيه اللى مبيتلحقش"
داليا"يعنى مفيش فايدة"
علا"انا رايحة تانى طبعا...وانت حر يا احمد لو مش عايز تيجى بلاش"
احمد"من امتى بخاف ياعلا"

فى الاستوديو يوم السبت...علا قاعدة ف مكانها
احمد بيحط لها المايك علشان مش عارفة تركبه بدراعها المتجبس
وشوشته وهو قريب منها
"كل حاجة تمام"
"تمام متقلقيش"
"والمخرج؟؟"
"هيتفاجئ"
صوت المخرج
"يالااااا ياجماعة...دقايق ونطلع ع الهوا"

حسام قاعد فى الكافيه مع عصام
"هههه يعنى مقدرتش تستحمل يوم متشوفهاش...ده ايه الحب ده"
"من غير تريقة ياعصام... مروة صممت احضر عيد الميلاد وريحتها وحضرت"
"يعنى كنت بجسمك معاهم وعقلك وقلبك مع علا"
"حاجة زى كده"
"وخلى بالك..اوعى تكون سايب وراك دليل...هو طبعا مفيش جريمة كاملة بس يعنى الحذر واجب"
"ههههه مسحت القناة طبعا...ششش البرنامج هيبدأ"

وظهرت علا على الشاشة... ودراعها متجبس ووشها فيه كدمة
حسام"مالها علا؟؟"
عصام وهو بيبص على الشاشة"معرفش"
سكتوا علشان يسمعوا علا

"اعزائى المشاهدين...اهلا بيكم فى حلقة جديدة من برنامج كل ليلة... حلقة النهاردة هتكون دسمة شوية نظرا للاحداث اللى حصلت من امبارح للنهاردة... طبعا كلكم عارفين ان احداث مجلس الوزراء زى ما بيان المجلس العسكرى طلع...هى احداث اتسبب فيها المعتصمين وانهم احتكوا بالامن وطبيعى الامن لازم يدافع عن نفسه وعن تأمين الاماكن الحيوية زى مجلس الوزرا ومجلس الشعب... انا واحمد زميلى معد البرنامج...كنا متواجدين من امبارح والنهاردة لحد قبل مانيجى...وجايبين فيديوهات هتثبت مين الجانى ومين المجنى عليه...اسيبكم مع الفيديوهات"
ونزلت على الشاشة فيديوهات فيها الامن هو اللى بيضرب فى المتظاهرين...سقوط مصابين... القنابل اللى بتترمى على الثوار... سحل وتعرية "

فى الكافيه...كان كل الموجودين بيتابعوا باهتمام

رئيس القناة وهو بيتفرج...جاله تليفون
"الو... اهلا يا فندم...تحت امرك يا افندم...حالا..مع السلامة"

علا على الشاشة بعد عرض الفيديوهات
"طبعا الصورة تغنى عن اى كلام او تعليق ممكن اقوله... اصابتى دى كانت امبارح فى الاحداث وانا كشاهدة عيان قبل ما اكون صحفية بحمل المجلس العسكرى والمشير مسئولية اللى بيحصل من قتل وسحل وتعرية...الثورة مستمرة لحد حق كل شهيد ما يرجع... ويسقط حكم العسكر"

جه تليفون للمخرج وهو بيتابع علا
"الو...حاضر يافندم حالا"
احمد"فى ايه"
المخرج"انت وعلا موقوفين عن العمل ومحولين للتحقيق... ولازم اقطع عليها الهوا حالا"

حسام وهو قاعد مش مصدق جرأة علا...الارسال اتقطع
"ايه اللى حصل..عطل فنى ده ولا ايه"
"عطل ايه ياحسام... قطعوا عليها الارسال طبعا"
"ليه"
"انت مسمعتش قالت ايه وعملت ايه...حذرتها كتير قبل كده ومفيش فايدة"
"قبل كده؟؟"
"اه ياعم... لسانها وايديها طوال... بتكتب فى السياسة من ايام مبارك وكانت بتعارض بشدة وبتنزل مظاهرات"
"مين علا؟؟"
"ايوه علا"
"تفتكر ممكن يحصل ايه"
"امممم الله اعلم...ربنا يستر"

احمد وعلا بعد قطع الارسال
انقسم الموجودين ناس بتهنيهم باللى عملوه
وناس بتتهمهم باشعال الفتنة
خرجوا احمد وعلا من القناة
احمد بيركب عربيته وعلا بتركب جنبه
"ارتاحتى"
"اه...اووووى... بس انا حاسة انى اتسببت ف مشكلة ليك"
"ياستى...هى اول مرة يعنى...متعودين"

حسام قاعد فى عربيته...بيبص فى الساعة .. 11
وواقف قدام بيت علا... مستنيها
شاف عربية بتقف وعلا نازلة منها
دقق مين اللى بيوصلها...شاف واحد ميعرفوش
شاف علا بتشاور له وهو بيشاور لها
علا داخلة العمارة...سمعها رجعت وهى بتنادى
"وحييييد... كنت هنسى اقولك"

هناك 16 تعليقًا:

  1. جامدة اوى اوى الحلقة بجد يا دودو
    تسلم ايدك يا قمر

    amira slama

    ردحذف
  2. حلوه اوي اوي يا دودو

    ردحذف
  3. Gmdaaa Bssssss

    ردحذف
  4. جاااااااامدة طحن ايه الروعة دي قصصك كلها روووووووووووووعة

    ردحذف
  5. حلوه جدااااااااااااااااااااا

    ردحذف
  6. جميييلة أوي يا دينا تسلم اديكي

    ردحذف
  7. حلللللللللوة جداا الحلقة :)
    مستنيين الباقي

    ردحذف
  8. روووووووووووووووووووووووعه يا دودو tota

    ردحذف
  9. الحلقة جميلة يا دودو واحلى حاجة فى الحلقة بصراحة انها طويلة تسلمي
    بس مش عارفة ليه مش مرتاحة للى جاي


    ddy dody

    ردحذف
  10. الحلقه حلوه اوي يا دندن تسلم ايدك

    ردحذف
  11. جميييييييييييييييييييييلة جدا جدا جدا رجعتينا لايام المظاهرات وحكم العسكر
    ربنا يرحم الشهداء وتسلم ايدك يا دينا :) :) :)

    ردحذف
  12. تسلم ايداكى يا دودو بصراحة ابتديت اقتنع ان احسن حاجة ان حسام وعلا مايتقبلوش وكل واحد يعيش حياته عادى وينسى الى فات لان التقليب فى الماضى هيضيع الحاضر
    dentist aya

    ردحذف
  13. مممممممممممم
    جميييييل جداااااااااا
    قرأت الي فاتني لاني مشغولة بشغلي شوية كتير بس طبعا مقدرش اني مشوفش الي فاتني
    مستنية الباقي ^-^

    ردحذف
  14. الله عليكى الحلقه جاااااااااااامده

    ردحذف
  15. بجد جامده جداااااااااااااا

    ردحذف
  16. روعه جميله جدا انا كنت متابعه القصه ع الفيس ف واحد كان بينزلها بس لما عرفت الموقع مش هتابعها غير من هنا :)) ..

    ردحذف

قول رأيك بلاش تقرا وتقفل من سكات...ارائكم تهمنى