الثلاثاء، 22 يناير 2013

الحب على كفة ميزان... الحلقة 13

الحلقة 13
حسام ماشى فى الاوتيل رايح ناحية المطعم
لمح علا بتكلم موظف الاستقبال وخارجة
مكنش مصدق انها هى

مشى بسرعة ناحيتها
هى ماشية ووشها ناحية الباب الرئيسى
حسام وراها مش متأكد انها هى

بينهم حوالى مترين...قرر حسام انه يتأكد
"علاااااااا"

علا ماشية ناحية الباب...سمعت اسمها
من صوت عمرها مانسيته ولا ممكن تنساه
حست بقلبها بيخفق وهو بتلتفت ببطء
وتتقابل وجها لوجه مع حسام بعد اكتر من 13سنة فراق

علا وجها لوجه مع حسام
اتقدم حسام ناحيتها وهى واقفة مكانها
مد ايده يسلم عليها
"ازيك ياعلا"
مدت ايديها تسلم عليه وهى ساكتة من المفاجأة
حست برعشة فى ايديها... وهى مش متأكدة اذا كانت رعشة ايديها لوحدها ولا رعشة ايديهم هما الاتنين
"عاملة ايه"
علا سحبت ايديها من ايده وبتحاول تجمع نفسها علشان تقدر ترد عليه
"ازيك يا دكتور حسام"
"دكتور!!"
"فرصة سعيدة انى شفتك...بعد اذنك"
استغرب حسام من رد فعلها
"استنى ياعلا"
"نعم"
"هى دى المقابلة بعد كل السنين دى"
"والمفروض انى اقابلك ازاى"
"على الاقل تردى السلام ...انتى هنا ليه؟"
"وانت هنا ليه؟"
"مش هينفع نتكلم كده فى الطريق...تعالى نقعد نشرب حاجة"
"لا معلش مالوش لازمة"
"ارجوكى ياعلا... نقعد مع بعض شوية"
سكتت علا وهى ف صراع بين قلبها اللى بيقولها تستسلم وتقعد معاه
وعقلها اللى بيقولها ترفض
"علا... للدرجة دى مش طايقة تقعدى معايا حتى لو ربع ساعة... ربع ساعة بس"
ردت علا وهى بتحاول تقاوم احساسها
"بلاش يا حسام"
"علشان خاطرى... عايز اتكلم معاكى"
                 *******************
حسام بيبعد الكرسى لعلا تقعد... لف وقعد قصادها
شاور للجرسون... علا ساكتة
"تشربى ايه"
"شاى"
"2 شاى لو سمحت"
مشى الجرسون... وعلا بتبص لبعيد علشان تتجنب انها تبص لحسام
"ايدك عاملة ايه"
وبكل استغراب ردت علا
"ايدى؟؟"
"اه...فكيتى الجبس امتى"
"وانت عرفت منين انى كنت متجبسة"
"منك"
"حساااام... انا مش فاهمة حاجة... عرفت منى ازاى واحنا اول مرة نشوف بعض دلوقتى"
"انتى اول مرة تشوفينى دلوقتى...انما انا كنت الفترة اللى فاتت دى قريب منك اوى... انا حاولت اكتر من مرة اكلمك بس كنت بتراجع ف اخر لحظة"
"وياريتك ما كلمتنى النهاردة كمان"
"ليه ياعلا"
واضطرت علا انها تفكره بأن كل واحد فيهم بقى له حياته وهو بقى له اسرة
"عامل ايه ف حياتك... مبسوط؟؟ خلفت ولا لأ"
"عايش...خلفت ومعايا سيف ومعاذ ورحمة"
"ماشاءالله ....ربنا يخليهوملك"
"وانتى ياعلا...ليه متجوزتيش"
خافت ترد...خافت تقول له انها مقدرتش تنساه
"مكنتش عايزة حاجة تعطلنى عن احلامى... علشان اثبت لاى حد كان فاكرنى بجرى ورا وهم انى اقدر احقق احلامى"
"انا عارف انى المقصود بالكلام ده... انا كنت غلطان...انا غلطت فى حقك وحق نفسى"
جه الجرسون...قدم لهم الشاى ومشى
"حسام... لو سمحت مفيش داعى نتكلم فى اللى فات...مش هيفيدنا بحاجة"
"طول السنين اللى فاتت كنت بسمع الاطلال... كنت دايما بعيد الكوبليه اللى بيقول ربما تجمعنا اقدارنا ذات يوم بعدما عز اللقاء... كنت بفكر هل ممكن تجمعنا الاقدار فى يوم من الايام... لقيت ان القدر جمعنا اكتر من مرة اولهم لما شفتك فى التليفزيون اول يوم ليكى فى البرنامج...ومن ساعتها وانا قريب منك ...ودايما بيبعدنا القدر عن بعض خطوة...انما النهاردة... وعلى غير المتوقع...اتجمعنا ياعلا ...القدر والنصيب جمعنا تانى"
"فاذا انكر خل خله وتلاقينا لقاء الغرباء ومضى كل الى غايته لا تقل شئنا فإن الحظ شاء"
"بس احنا مش غرباء يا علا... احنا بيننا حاجات كتير مينفعش ننساها وتخلينا اقرب الناس لبعض"
"لازم ننساها...عارف ليه؟؟ علشان انت نسيت وهجرت وبقى ليك اسرة...كنت بتعاقبنى على انى بحلم... نسيت يوم ما جيت لك الكلية وصدمتنى بأنك هتتجوز"
"بترديهالى وبتصدينى"
حست علا انها على شفا الانهيار...والاعتراف انها لسه بتحبه
قامت فجأة
"انا لازم امشى"
"مقلتليش انتى هنا ليه"
"فى حفلة النهاردة وهيتم فيها تكريمى"
"مبروك...تستاهلى النجاح"
"الله يبارك فيك... وياترى انت هنا لوحدك ولا مع مراتك وولادك...معتقدش انهم يكونوا معاك وانت تقعد معايا كده"
"انا هنا بحضر مؤتمر"
"بالتوفيق...مع السلامة"
وجريت علا قبل ما حسام يسلم عليها او يمسك فيها تقعد

طلعت على اوضتها على عكس ماكانت مرتبة انها تخرج
دخلت بسرعة وقفلت على نفسها
قعدت مضطربة التفكير...وهى فرحانة
"ياااااااه ...كنت واحشنى اوى يا حسام... مكنش ينفع اقولك انى مقدرتش اتجوز علشان بحبك...مكنش ينفع اقولك انى فرحت اوى لما شفتك... مكنش ينفع اسيب نفسى لاحساسى من غير ما افكر"
رن الموبايل... بصت
"الو... الحمدلله ياوحيد... انا كويسة... مفيش حاجة مصدعة بس شوية... لا بجد مفيش حاجة... مش عارفة هبقى اعرفك راجعة امتى...مع السلامة"
قفلت مع وحيد بسرعة... علشان ترجع تفكر فى حسام تانى
"انا ايه اللى خلانى اتسرعت ومشيت...كنت قعدت معاه شوية... هيحصل ايه لو قعدت معاه...اعرف اخباره واطمن عليه...صوته وحشنى وكلامه وحشنى وكل حاجة معاه وحشتنى... ايه ياعلا...ايه الهبل اللى بتقوليه ده...انتى كنتى صح واتصرفتى صح... خليكى زى ما انتى... لا كده كتير...تعبت اعمل ايه ياربى... اسيب نفسى لاحساسى واللى يحصل يحصل...ولا احكم عقلى وابعد عنه"
ورن تليفون الاوضة...ردت
"الو...ايوه... اهلا استاذ عبدالعزيز... حاضر نازلة حالا"

مروة بتشيل صينية الغدا من اوضة حورية
"اجيبلك حاجة يا خالتى"
"لا شكرا... هو حسام متصلش"
"لأ"
"انتوا متصالحتوش قبل ما يسافر"
"انا صالحته... بس حسام متغير"
وسكتت حورية وهى بتقول فى سرها
"ايوه متغير"
وكملت بصوت عالى
"طيب كلميه اطمنى عليه"
"حاضر"

حسام من بعد ما سابته علا ومشيت وهو قاعد
متحركش من مكانه وهو بيفكر
"للدرجة دى علا بقت بتكرهنى...مش مستحملة تقعد معايا شوية"
حس بخنقة...فكر يطلع اوضته...
"هطلع اعمل ايه... احاول اكلمها تانى"

شاف علا داخلة المطعم... واتقدم منها واحد وسلم عليها وقعدوا مع بعض
حسام بيبص لها بين كل لحظة والتانية... نظرات اتهام

علا لما نزلت تقابل عبد العزيز من المؤسسة المنظمة للحفلة
اول عينيها ما دورت كانت بتشوف حسام لسه موجود ولا مشى
شافته قاعد مكانه...بعدت عينيها عنه
كانت بتحاول تركز فى كلام عبد العزيز وهو قاعد معاها
عينيها غصب عنها بتروح لحسام...تتقابل نظراتهم وتبعد
خلصت علا مقابلتها... وقام عبد العزيز مشى
فضلت علا مكانها... والحنين لحسام مسيطر عليها

قامت...وبخطوات مترددة راحت ناحيته
"انت ايه اللى خلاك تظهر ف حياتى تانى"
"القدر"
وقعدت علا معاه
"القدر!!...القدر جمعنا النهاردة وقبل كده كنت بتعرف اخبارى ليه"
"علشان بحبك"
مفاجئة... كلمته وبالبساطة دى كانت مفاجئة
ارتبكت علا... مش معقول يكون حسام لسه بيحبها
فرحت... اكيد مش بيكذب عليها ..وهيكذب ليه
"مكنتش فاكر ان السنين هتغيرك كده"
"السنين تغيرنى...انا؟؟؟ انا زى ما انا...من يوم ماسبتنى وانا زى ما انا حياتى كلها وقفت وقلبى اتقفل... انا لا اتجوزت ولا عملت عيلة ولا عشت حياتى... انا اللى كل يوم بالليل برجع مبلاقيش حتى حد يقولى حمدالله ع السلامة...انا لما بقلق بالليل مبلاقيش حد يقولى مالك... انا لما عييت كان ممكن اموت ومحدش يحس بيا... انا حياتى كلها بقت ذكريات...عايشة على ذكريات... انما انت نسيت واتجوزت وسافرت وخلفت وراجع تانى تقولى بحبك"
"ومين قال انى نسيت...انا منسيتكيش خالص...ولا يوم"
سكتت علا وعلى وشها علامات عدم التصديق
"انتى اللى عايشة حياتك ياعلا مش انا...اشتغلتى ونجحتى وحققتى اللى انتى عايزاه... ومش كده وبس انتى كمان نسيتى حاجات كتير من مبادئ زمان...كل شوية اشوفك مع راجل... هنا وهناك"
وردت بكل عصبية
"انت هتغلط يا حسام....مش معنى انى قعدت واتكلمت معاك يبقى تتهمنى ف شرفى واخلاقى...وانت اكتر واحد عارف انا ازاى"
قامت علا تمشى...وقفها حسام
"انا اسف... متمشيش"
انكسار... صوت حسام كله انكسار
حزن... عينيه مليانة حزن
ومستحيل علا تغلط فى قراية مشاعر حسام
قعدت تانى باستسلام... وشفقة على انكساره
"مالك ياحسام"
بص فى الساعة
"مفيش... محتاج اتكلم معاكى كتير... تستنينى اطلع الاوضة وانزلك حالا"
"طيب... بس فيه حاجة يعنى...هتطلع ليه"
"فيه دوا لازم اخده من ساعتين... وحاسس انى تعبان شوية"
"تعبان مالك؟؟"
"مفيش ...هطلع وانزلك"
قام حسام... مسك قلبه وقعد تانى
"حسام انت تعبان...اشوفلك دكتور"
"لالا مفيش داعى...هاخد الدوا ابقى كويس"
"طيب اطلع اجيبهولك"
"مش عايز اتعبك"
"لا مفيش تعب...اوضتك فين ..رقم كام؟"

علا داخلة اوضة حسام...وبتفتكر كلامه
"فيه شنطتين...الشنطة الصغيرة اللى ع السرير افتحيها ..هتلاقى فيها كتب واوراق وجيب الشنطة فيه كيس صغير فيه علب ادوية هاتى العلبة البيضا"
لما اخدت الدوا من الشنطة... لمست الكتب بايديها
وفتحت كشكول سلك وسط الكتب... كل المكتوب فيه بخط إيد حسام
قلبت فى الكشكول وهى بتبتسم ...حضنت الكشكول
وافتكرت حسام اللى تعبان ومستنيها...رجعت كل حاجة مكانها واخدت الدوا ونزلت

حسام بيشرب المياه بعد ما اخد الدوا
"بالشفا ان شاءالله"
"شكرا...تعبتك معايا"
"لا متقولش كده... هو ده دوا لايه"
"للقلب"
"القلب...الف سلامة عليك"
"الله يسلمك...قلبى مستحملش البعد عنك ياعلا ومن كتر حبى فيكى قلبى تِعب"
"سلامتك"
"الله يسلمك... مين اللى كنتى قاعدة معاه من شوية"
"اتهام ؟؟"
"لا اطمئنان"
"ده واحد من منظمى حفلة الليلة"
"ومين اللى كان بيوصلك يوم ماطلعتى ع الهوا وفجرتى قنبلة الفيديوهات"
"ده انا متراقبة بقى"
"مش مراقبة... انا كنت جاى اشوفك واكلمك...مش قلتلك كنت دايما قريب منك بخطوة...طمنينى مين ده"
"ده زميلى و... و...كنا هنتخطب قريب"
ورن موبايل حسام... ورد
"الو... الحمدلله...اه وصلت... معلش نسيت...لا مفيش حاجة انا كويس الحمدلله...الو حبيبتى ازيك... انتى كمان وحشتينى"
واتضايقت علا وحست بالغيرة...وحس بيها حسام فوضح كلامه
"ايه يارحمة اجيبلك ايه وانا جاى...حاضر ياحبيبتى... سلمى على اخواتك...لا خلاص كلمت ماما...باى يا حبيبتى"
قفل حسام
"نسيت اطمنهم انى وصلت... لما شفتك نسيت كل حاجة"
"حسام انا لازم اقوم...الوقت بيسرقنا وانا عندى تكريم بالليل ولازم استعد"
"ملحقناش ياعلا...انا لسه عندى كلام كتير عايز اقولهولك"
"لو قعدنا نتكلم مش هيكفينا العمر كله"
"يبقى لازم نكمل كلامنا...واشوفك تانى"
واستسلمت علا لاحساسها بعد انهيار كل مقاومتها
"لازم اشوفك تانى"
"ينفع احضر معاكى الحفلة النهاردة"
ردت علا بفرحة
"اكيد"
"لما تجهزى كلمينى... سجلى الرقم عندك"

علا فى اوضتها...بتبص لنفسها فى المراية
لابسة فستان سواريه احمر طويل من غير اكمام
وشعرها مفرود لورا ... واخدت شال حطته على كتفها
واتصلت بحسام
                      *****************
علا خارجة من اوضتها
ماشية لاخر الطرقة علشان تقابل حسام
حسام واقف ولابس بدلة سودا
اول ما شافها ...اتفاجئ
قربت ناحيته مبتسمة... اتلفت حواليه وسألها
"انتى لابسة كده ليه"
"سواريه"
"ايه ده ياعلا...سواريه ايه وزفت ايه...ازاى تلبسى عريان كده"
"على فكرة انت ملكش اى حق تقولى ألبس ايه وازاى... ومش اول ولا اخر مرة ألبس كده"
"علشان خاطرى بلاش تنزلى كده"
"ايه اللى بتقوله ده...مينفعش طبعا"
"مش هستحمل حد يبص لك وابقى ماشى جنبك وانتى كده"
"بص ياحسام...هو ده الفستان اللى معايا ومش هحضر الحفلة بلبس عادى"
"الحفلة لسه قدامها وقت... حالا اجيبلك احلى واشيك فستان ويكون محترم عن ده شوية"
"لالا مش هينفع خالص...هنتأخر على الحفلة"
"لو وقفنا نتكلم كده هنتأخر...يالا"

حسام وعلا رايحين القاعة مع بعض
علا لابسة فستان تانى بكُم
"على فكرة بقى ده احلى واشيك 100 مرة"
"انا مش عارفة ازاى سمعت كلامك"
"زى ماكنت بسمع كلامك زمان ولا نسيتى"
"منسيتش ودى مشكلتى"
"انتى اول مرة تيجى دبى"
"اه ...اول مرة انت جيت قبل كده"
"اه كتير...بصى بما انها اول مرة...بكرة ان شاءالله هخلص الساعة 3 تقريبا...هتستنينى ونخرج اوريكى احلى منظر ممكن تشوفيه ف حياتك...اتفقنا"
"لما نبقى نخلص النهاردة نبقى نفكر ف بكرة"
ووصلوا على باب القاعة...ودخلوا مع بعض

هناك 44 تعليقًا:

  1. معنديش اى كلمة غير آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه

    ردحذف
  2. طيب و ايه زنب الغلبانة اللى قاعدة فى البيت ب 3 عيال :((( حرام عليه حسام اللى بيعمله ده و الله

    ردحذف
    الردود
    1. ذنبها انها سمحت انها تتجوز راجل قلبه مش ليها

      حذف
    2. هى كانت عارفة انو مبيحبها اتجوزتوا لية

      حذف
  3. تحففففففففففففففففففففة يا دينا ماشاء الله يارب يتجوزوا بقى يارب <3 لو متجوزوش بقى يا دينااااااااا مش مكمله قصصك بقا هه :(

    ردحذف
  4. gmilaaaaaaaaaaaaaaaaaaaaaaaaaaaaaaaaaaaaa awee

    alaa

    ردحذف
  5. حسام ده بيستهبل اخر حاجه مستفزني اوي سواء هو اولا علا
    حرام عليهم يظلموا ناس معاهم بالشكل ده
    بس الحلقه جامده ;)
    batot

    ردحذف
  6. واوووووووووووووووووو تحفة بس ده ظلم لمروة

    ردحذف
  7. يا سيدي يا سيدي علي اللقاء الجبار بي الاحبه تجنن الحلقه بجد

    ردحذف
  8. أأأأأأأأأأأأأأأأأأأأه يا قلبى وجعنى اوى على علا

    ردحذف
  9. يعني هموت و افهم ايه الغلاسه الي حسام فيها دي ،، استفزني اوي في حتت الفستان ،، كان ممكن يطلع موقف رومنسي اما اتقابله ،، لأ بس انتي فنانه لفتيها و خلتيها فالاخر تتلع عسوله برده :)
    #ياسمين

    ردحذف
  10. حلوه اوي بس مش عارفه مين غلطان

    ردحذف
  11. حلقه قصيره جدا

    ردحذف
  12. تحففففففففففففففففففففففففة وراااااااااااااااااااااائعة بحجد تسلم ايد يا دينااااا
    الحلقة كانت جميلة ومن تقدم الى تقدم يا ررب

    amira slama

    ردحذف
  13. حراااااااااااااااااام مروه هى المظلومه فى كل ده وحسام هى الغلطان فيهم

    ردحذف
  14. حراااااااااااااااااااااااام مروة كدا هيحصل فيها ايه

    ردحذف
  15. Tslm 2edk y dena :)

    ردحذف
  16. مينفعش حد يكون ملام غير حسام ف الاول كان اناني مع علا ودلوقتي مع مروه والعيال واللي هيشيل الذنب هي علا

    ردحذف
  17. اه يا قلبى :) بجد قلبى وجعنى عليهم والموقف بتاعهم صعب اوى :/
    .
    .
    .
    مها

    ردحذف
  18. gamyla
    bs 7osam keda bygr7 el atnen mrato we 3ola
    wlazm yab3d we yfakr fe 3ialo we mrato 3lshan lo 3ml 3'er keda yab2a hoa anany

    ردحذف
  19. تحفه اوى يا دندونه تسلم ايدك بس اللى عمله حشام غلط مينفعش هو متجوز وعﻻ مكنش ينفع تستسلم
    dody

    ردحذف
  20. أأنا دمعت :'(

    ردحذف
  21. انكسار .. صوت حسام كله انكسار
    حزن .. عينيه مليانة حزن
    ومستحيل علا تغلط فى قراية مشاعر حسام

    وااااااااااااااو انتى ازاى كده ماشاء الله ماشاء الله جميلة اوووووووووى

    ردحذف
  22. جمييييييييييييييييييييييييييييييييييييييييييييييييييييييييييييييييييييييييييييييييييييييييييييييييلة اوى :) :) :)

    ردحذف
  23. حلوة جدا جدا انتى ممتازة بس ياريت طولى احداث الحلقة شوية لانها قصيرة جدا جدا.. وبجد القصة حلوة اوى

    ردحذف
  24. انا لسه شايفة لقصة دلوقتى وقراتها كلها بس بصراحة جميلة
    تعليقى بقى على القصة ان حسام هو الى غلطان من الاول
    رجل شرقى انانى زى كل الرجالة شايف ان النجاح والطموح ليه
    هو وبس والست عليها تقول اه وبس وتمشى ورا جوزها
    تفكير معتاد دايما من كل الرجالة
    علا ومروة هما نتيجة غلطته مروة اكيد هتبقى الزوجة المخدوعه
    وعلا هتعيش تبكى على الاطلال محدش يعطيها الحق بانها تكون الزوجة
    التانية والزوجة الاولى عمرها ما هتوافق على كده وهى كمان مقصرتش
    فى حق زوجها"
    احب اقولك ان حسام ده رجل انانى وبس عايز كل حاجة
    وبحكم عواطف المراة واحساسه دايما بالحاجة للحب والحنان
    علا هتستلم للحب ومش هتقدر تقاوم الحب ابدا
    ويبقى فى النهاية الضحايا هما ومروة وولادها
    وفى النهاية احب اقولك انك انسانه ممتازة وفنانة وموهوبة بجد
    وقصتك فى غاية الروعه

    ردحذف
    الردود
    1. أحب أحييكى على الى قولتيه كل الى قولتيه مظبوط وبيحصل بالنسبه للرجاله عايزه كل حاجه ليها والى هيتظلم مروه وأكيد علا بس هيا كمان غلطانه علشان أستسلمت لقلبها ونسيت انوا متجوز وعندوا عيال

      حذف
  25. أنا النهاردة أول مرة اقرأ القصة دي قرأتها من أولها كلها
    القصة روووووعة

    ردحذف
  26. القصة روغة تسلم إيدك
    أنا متشوقة اعرف إيه إلي هيحصل الحلقة الجاية

    ردحذف
  27. ايه الجمااااااااااااااااال ده؟؟؟؟؟؟؟؟

    ردحذف
  28. بصراحة انا مضايقة اوووى من رد فعل علا المفروض كانت رفضتة

    ردحذف
  29. لالالالالا مروة هي اللي ظلمت نفسها من لاول لما كانت عارفة انه بيحب علا جدا وانه كان لسة سايبها وعارف انه مابيحبهاش هي اللي غلطانة مافيش غلط لا على حسام ولا علا

    ردحذف
  30. جميييييييييييييييييييييييييييييله

    ردحذف
  31. حراااااااااااااااااااااااااااااااااااااااااااااااااااااااااااااااااااام ايه ذنب مراته الاتنين معندهمش دم ازاي يعملوا كدة

    ردحذف
  32. مش عارفة أقول إيه هما صعبانين عليا حسام و علا و مروة وولادها :(

    ردحذف
  33. متوقعه انه هيموت :(

    ردحذف
  34. وربنا بيستهبلووووووووووووو :@ :@ ومرووووة يعنى ......ثم مينفعش يكملو مع بعض لانه برضه هيفضل ضدها وهى دماغها غير دماغه

    ردحذف
  35. انا قاعده متغاااااظه ان هيا سمعت كلامو وغيرت الفستان






    enas

    ردحذف
  36. الله بجد بجد

    ردحذف
  37. المسلسل رهيب بس ذمب مروة ايه هو اللي غلطان حسام مكنش ينفع يتسرع كدا :(

    ردحذف
  38. اااااااااااه بجد انا قلبى واجعنى من الحلقه دى بجد رووووووووعه

    ردحذف
  39. حسام ده إنسان أناني زباله

    ردحذف
  40. ولاده هايحسوا نفس اللى هو حسه لما باباه سابه زمان

    ردحذف

قول رأيك بلاش تقرا وتقفل من سكات...ارائكم تهمنى