الخميس، 24 يناير 2013

الحب على كفة ميزان... الحلقة 14

الحلقة 14
علا وحسام قاعدين مع بعض على ترابيزة فى قاعة الحفل
كل واحد فيهم قاعد على كرسى قصاد التانى وبينهم الترابيزة
صوت الموسيقى عالى قرب حسام الكرسى اللى قاعد عليه وبقى جنب علا وقريب منها
"كده احسن علشان اعرف اسمعك وتسمعينى"
ابتسمت له علا ...وهى من جواها فرحانة بوجودهم مع بعض
"عارفة ياعلا...متهيألى السنة دى افضل سنة ف حياتى"
"اشمعنى"
"لاننا بنستقبلها مع بعض"
"احنا لسه اول دقايق فيها...محدش عارف هيحصل ايه"
"تقصدى ايه"
"مقصدش حاجة...بس زمان مكنش ييجى على بالنا اننا هنبعد عن بعض...ومن ايام بس مكنش ييجى على بالى اننا ممكن نتقابل تانى"
"معتقدش انى ممكن اقدر ابعد عنك تانى"
وقرب منهم واحد يسلم على علا
وقامت علا تسلم عليه ورجعت قعدت مكانها تانى
"مين ده"
"ده صحفى معرفة"
"تعرفيه اوى يعنى"
"يعنى...ليه"
"اصل قعد يسلم عليكى وفضل ماسك ايدك شوية"
"ماسك ايدى فين...انا سلمت عليه عادى"
"لا مش عادى ياعلا...ايدك فضلت ف ايده شوية... وسمعته بيقولك زى القمر"
"قال كده فعلا بس مجاملة عادية يعنى وحكاية ايدى دى انا مش هسيب اى حد يمسك ايدى عادى واسكت ...انا سلمت عليه بس"
"ابقى خلى بالك من الحاجات دى"
"حسام...مش ملاحظ يعنى انك بتتكلم فى حاجات تافهه وبسيطة ومينفعش انك تحاسبنى عليها اصلا"
"والغزل ومسكة الايد بقت حاجات تافهه وبسيطة"
"غزل!!! ياحسام احنا مش ف ايام الجاهلية ولا عاد حد بيكتب شعر غزل...دى كلمة عادية وبتتقال كتير فى كل المناسبات ومن اى حد لاى حد انت بس اللى مكبر الموضوع"
"انا مش مكبر الموضوع انا بحبك"
سكتت علا... مش عارفة ترد عليه
مش قادرة تقول انها لسه بتحبه
ولا قادرة ترفض الحب ده
وقطع تفكيرها وكلامهم صوت مُقدمة الحفل
والبدء فى تكريم الشخصيات المدعوة للتكريم

مروة نايمة فى اوضتها...وحست بإيد بتخنقها
حاولت تصرخ ...صوتها مطلعش
شافت حسام واقف وشايفها ومش بيتحرك
بتحاول تصرخ...سمعت صرخة مكتومة

فتحت عينيها ...قامت قعدت على السرير...مسكت رقبتها
"اعوذبالله من الشيطان الرجيم...خير يارب"
قامت خرجت من الاوضة...راحت تطمن على ولادها كل واحد فى اوضته... وفتحت باب اوضة حورية تطمن عليها
"مروة؟؟"
"ايوه ياخالتى...نامى انا كنت بطمن عليكى"
"الساعة كام"
"4ونص"
"تعالى"
دخلت مروة وفتحت النور وقعدت جنب حورية
"مالك ايه اللى صحاكى دلوقتى"
"كابوس...كابوس صعب اوى صحانى من عز النوم"
"كابوس ايه كفى الله الشر"
"خلاص بقى مش عايزة افتكره...انتى ايه اللى صحاكى"
"سمعت صوت حد بره فقلقت"
"متخافيش دى انا كنت بطمن على سيف ومعاذ ورحمة"
"ربنا يكفيكى شر الشيطان"
"يارب... عايزة حاجة اعملهالك"
"لا يا بنتى ربنا يرضيكى ويراضيكى.. انا هقوم استنى الفجر"

علا بتصحى من النوم.. وقبل ما تقوم من السرير اخدت الموبايل واتصلت بداليا
"الو...صباح الخير يادودو... صباح او مساء يا ستى براحتك انا لسه صاحية حالا... الحفلة...امبارح كان اجمل يوم ف حياتى كلها... طبعا صوتى لازم يكون فرحان ...انا مبسوطة اووووى ...قررت انى كفاية عليا اوى الحزن اللى فات..قررت اسعد نفسى واتبسط ومعكننش على نفسى خالص...اممم السبب اللى خلانى اقرر القرار ده...هقولك لما ارجع... لا مش راجعة النهاردة زى ما كنت ناوية... هقعد كام يوم كمان اتفسح...انا كويسة والله بقولك مبسوطة تقوليلى قلقانة... متقلقيش خالص... هكلمك تانى طبعا واعرفك جاية امتى...واحمد ومنه اخبارهم ايه؟؟ سلمى عليهم...مع السلامة"
قامت علا بفرحة ونشاط... فتحت الدولاب علشان تختار هتلبس ايه؟

حسام خارج من قاعة المؤتمرات فى الاوتيل
اتصل بعلا
"الو... ازيك ياعلا... انا خلصت انتى جاهزة؟؟ هطلع اغير هدومى وانزل... نتقابل تحت...ربع ساعة بالكتير... مع السلامة"
قفل معاها واتصل بمروة
"الو...ازيك يامروة... وماما والولاد ازيهم... معلش مشغول ومش هعرف اتصل بيكى كل شوية... اطمنى انا كويس... هكلمك بالليل بعد ما اخلص... ايه يامروة هكون مشغول فى ايه يعنى... ايوه طول النهار وبقابل ناس مش كل شوية هكلمكم ... مش متنرفز ولا حاجة انا بس بقولك هبقى اكلمكم انا...مع السلامة...محمد رسول الله"

علا واقفة فى الريسيبشن تستنى حسام
شافته جاى ناحيتها... ابتسمت له وابتسم لها
"ازيك"
"الحمدلله... صحيت بدرى ازاى بعد سهرة امبارح"
"صحيت الساعة 9"
"ولحقت تنام ده احنا خلصنا الساعة 4"
"ولو مكنتش هنام خالص...كفاية اننا مع بعض"
"هنروح فين"
"هنتغدا فى مطعم اتموسفير فى برج خليفة... هناك هتشوفى دبى كلها من الدور 122"
"وااااااااو"
"لسه لما تشوفى المكان بنفسك...يالا"
ومد ايده ياخد ايد علا...بصت علا لايده الممدودة...واترددت لحظات...واستسلمت لحنينها للمسة ايديهم ...وحطت ايديها فى ايديه

علا وحسام داخلين المطعم
علا بتبص حواليها باعجاب وانبهار بالمكان
"الله ياحسام...حلو اوى المكان ده"
"الاحلى اننا فيه مع بعض"
"يااااااه ياحسام...معقول السعادة اللى انا فيها دى"
"مبسوطة بجد"
"اوى"
وقعدوا على ترابيزة مطلة على النافورة الراقصة
"حاسس انك اتغيرتى من امبارح للنهاردة ياعلا...ايه السبب"
"تغيير للاحسن ولا الاسوأ"
"بالنسبة لى الاحسن طبعا...كنت حاسس انك حاطة حواجز بيننا وبتحسسينى اننا بعاد عن بعض... انما النهاردة حاسس اننا رجعنا قريبين لبعض زى زمان"
"علشان تعبت من الصراع اللى جوايا... انا اتحرمت منك كتير اوى ولما لقيتك هحرم نفسى من الحب الوحيد ف حياتى ليه...انا اتعذبت كتير وخلاص بقى كفاية عذاب لحد كده"
"يعنى لسه بتحبينى"
"لسه"
"انا طول السنين اللى فاتت دى وانا بقول لنفسى ياترى علا فاكرانى ياترى بتكرهنى...ولما عرفت انك لسه متجوزتيش فرحت... قلت لنفسى اكيد لسه بتحبنى زى ما بحبها"
"عندى سؤال طول السنين اللى فاتت دى كنت بسأله لنفسى والنهاردة عايزة اسألهولك"
"اسألى"
"مين فينا السبب فى اللى حصلنا ده"
"انا السبب ياعلا.... انا فى لحظة عِند ضيعت حياتى وحياتك واجمل سنين كان ممكن نعيشها مع بعض... انا اللى حبيت اخليكى تندمى بس الحقيقة ان انا اللى عشت ندمان طول الفترة اللى فاتت... انا هحكيلك على حاجة محكيتهاش لحد خالص ولا حتى امى... لما اتجوزت مروة من اول يوم وانا حسيت انى مش سعيد معاها...هى بتحاول تسعدنى بكل الطرق وانا مش معاها خالص...كل تفكيرى كان فيكى انتى...سافرنا وبعد شهرين قررت انى لازم اصلح الغلطة دى وخصوصا انها عارفة انى لما اتجوزتها مكنتش نسيتك...قررت انى اصارحها انى مش مبسوط معاها وانى مش قادر انساكى واننا ننطلق احسن لينا احنا الاتنين...رجعت من الجامعة وانا ناوى افتح معاها موضوع الطلاق...لقيتها مستنيانى وعلى وشها فرحة اكتر من يوم جوازنا...وقالت لى انها حامل...لحظتها تفكيرى كله اتشل وحساباتى اتلخبطت...سكتت ومعرفتش اتكلم... حملها فى الوقت ده خوفنى...خفت افاتحها فى قرار الطلاق اظلم طفل مالوش اى ذنب فى غلطتى... ذنبه ايه يعيش مع امه بس او ابوه بس...وهى كمان ذنبها ايه وهتبدأ حياتها تانى ازاى... عارفة عملت ايه ساعتها"
"ايه"
"اخدتها ف حضنى وقلت لها انى مبسوط بالخبر ده...وانا جوايا بتعذب... قلت كفاية عذابى انا لوحدى وهى والطفل اللى جاى ده مش لازم يتعذبوا بسببى... وقررت انى اعيش واكمل حياتى"
"وانا...مفكرتش فيا انا... هعيش حياتى ازاى"
"كنت دايما بصبر نفسى واقول هتنسانى...هتكرهنى وهتنسانى وتلاقى حد يحبها ويعوضها غيابى... كنت مصدق نفسى...بس لما شفتك تانى وعرفت انك لا اتجوزتى ولا حبيتى تانى ... مقدرتش اقاوم حبى ليكى اللى فضلت اقتل فيه طول السنين اللى فاتت"
"اكرهك!! وهو معقول اعرف اكرهك وانت الحب الوحيد فى حياتى...ده انا قلبى فتَح على حبك...مشاعرى اتولدت على ايديك...يبقى ازاى مهما حصل ممكن اكرهك ولا انساك"
"انا اسف على كل السنين اللى ضاعت واحنا بعاد عن بعض"
"متتأسفش يا حسام... انا كمان غلطت والغلطة مش غلطتك لوحدك... انا كنت كتير بلوم نفسى انى موافقتش انى اسافر معاك واننا نتجوز ...كنت ساعات بكره نجاحى اللى حرمنى منك... كنت بحمل نفسى المسئولية والتمس ليك الاعذار..ومازالت... انت مش غلطان لوحدك ومتحملش نفسك فوق طاقتها... انا اسفة على السنين اللى فاتت واحنا بعاد عن بعض...انا اسفة انى خليتك تعيش فى الظاهر عادية وسعيدة وانت جواك بتتعذب... انا اسفة"
"بحبك اوى ياعلا... بحبك متبعديش عنى تانى"
"انا كمان بحبك يا حسام...بحبك ومش هخلى حاجة تفرقنا"
"يبقى مترجعيش مصر قبلى...مش هقدر اقعد هنا من غيرك"
"ومين قال انى هرجع لوحدى... انا كنت هستناك تخلص المؤتمر ونرجع مع بعض"
"يبقى خلينا نقعد بعد المؤتمر كام يوم"
"لا مش هينفع...انا كان المفروض ارجع النهاردة...يعنى تخلص المؤتمر ونرجع على طول...اتفقنا"
"اتفقنا ياحبيبتى"

احمد قاعد على اللاب توب فى البيت...داليا جايبة له قهوة
"اتفضل ياحبيبى"
"تسلم ايدك"
"بتشتغل...مش هعطلك"
"ياحبيبتى عطلينى ولا يهمك...مالك عايزة تقولى حاجة"
"اه... فكرت فى العرضين اللى قدامك"
"لسه بفكر ...انتى ايه رأيك"
"انا عايزاك تبعد عن السياسة خالص يا احمد...كلها وجع قلب وبتبقى مشغول 24 ساعة...ده انت وانت نايم بتحلم بالشغل"
"يعنى بعد السنين دى كلها وجاية تقوليلى اسيب السياسة وف الوقت ده بالذات"
"ماتعمل برامج خفيفة كده...فن..رياضة... حاجات لذيذة"
"موافق... بس مترجعيش تقوليلى بتكلم اللمثلة دى ليه ولا الرقاصة دى ليه...ده هيبقى شغل"
"احم...انا بقول شغل السياسة لذيذ برضه مش وحش"
"ههههههه شفتى بقى انا بعمل اللى يريحك من غير ما تطلبيه ازاى"
"ربنا يخليك ليا ياحبيبى"
"ويخليكى ليا ياحبيبتى...صحيح مقلتليش علا أجلت رجوعها ليه"
"مش عارفة... بس صوتها كان طاير كده وهى بتقولى انها هتستنى شوية"
"كويس...من زمان مشفنهاش فرحانة...يمكن التكريم ده جه ف وقته"

علا وحسام ماشيين فى مول...بيتفرجوا
بيدخلوا محل لبس بنات ...ينقوا مع بعض هدوم لرحمة
ويروحوا محل ألعاب اطفال ويجيب هدايا لرحمة ومعاذ
وعلا تشترى حاجات لمنه
"حسام...انا لسه مجبتش حاجة لاحمد وداليا"
"عايزين ننام بدرى علشان معاد الطيارة"
"طيب نجيب الهدايا ونروح الاوتيل على طول"
"ماشى... بس بسرعة وحددى انتى عايزة ايه علشان انا تعبت من اللف"
"تعبت مالك....انت اخدت دوا النهاردة ولا لأ"
"اخدت ياحبيبتى متقلقيش...انا رجليا وجعتنى وزهقت بس"
"امممم طيب تعالى نشوف هنا فى المحل ده"
دخلوا محل ادوات تجميل
اختارت علا لداليا مجموعة مكياجات وكريمات وبرفانات
وهى بتدفع حسابهم
"لو سمحت عايز زى الحاجات دى بالظبط بس لوحدها"
قالها حسام بسرعة وكأن علا مش هتاخد بالها
سمعته علا وفهمت انه بيشترى هدايا لمروة
اتضايقت... بصت عليه شافته بيبعد عينيه عنها
وافتكرت ان مش من حقها تسأله ليه بتجيب لها
حست انها لو فتحت معاه كلام من النوع ده هتتضايق اكتر
تجاهلت اللى حصل...وحسام تجاهله
واخدوا حاجتهم ومشيوا من المحل

حسام فى اوضته... بيقفل الشنط
اتصل بمروة
"الو...ازيك يامروة"
"ازيك ياحسام انت عامل ايه...وحشتنى اوى"
"انا الحمدلله كويس...انتوا عاملين ايه"
"كلنا بخير مش ناقصنا غير وجودك معانا"
"انا جاى بكرة شاءالله"
"امتى بالظبط...علشان اجيلك المطار"
"لالا متجيش..انا هاجى على البيت"
"مجيش ليه ياحسام... انت وحشتنى"
"وانتى كمان...بس خليكى فى البيت مع ماما والولاد وانا هاجى...متتعبيش نفسك انتى... انا يمكن اتأخر ولا حاجة ومينفعش تفضلى قاعدة فى المطار تستنى كل ده"
"حاضر ياحبيبى...هستناك من دلوقتى...ترجعلنا بالسلامة"
"الله يسلمك"
قفل مع مروة واتصل بعلا
"ازيك ياعلا"
"الحمدلله...انت منمتش لسه"
"لا لسه كنت بقفل الشنط...انتى خلصتى"
"اه خلاص"
"طيب ماتيجى ننزل نقعد مع بعض شوية"
"مش اتفقنا هننام بدرى"
"اتفقنا ونغير الاتفاق...ننزل؟؟"
"طيب ماشى...ربع ساعة وهتلاقينى تحت"

علا وحسام فى الطيارة مع بعض
حسام مسك ايديها
"اوعى تنشغلى عنى...هنتكلم ونشوف بعض كل يوم"
"مقدرش انشغل عنك ابدا يا حسام"
"انا مش عارف ازاى بعد ماكنت بشوفك طول الوقت هيبقى كل واحد فينا ف حتة"
"ليس كل ما يتمناه المرء يدركه"
"بس برضه مش هنبعد عن بعض..صح"
"طبعا"

احمد وداليا وصلوا المطار
"الحمدلله يا احمد وصلنا فى المعاد ..كنت هنتأخر"
"مش قلتلك لسه فيه وقت"
"احمممد...مش ده وحيد"
وجه عليهم وحيد وسلم عليهم
وحيد"لسه موصلتش مش كده"
احمد"اه ...على وصول ان شاءالله"
وحيد"انا عرفت منها المعاد ومقلتلهاش انى جاى...حبيت اعملها مفاجأة"
داليا"اكيد هتفرح اوى لما تشوفك...اصل احنا كده نحب المفاجآت"

وقفوا يستنوا علا هما ال3

بعد نص ساعة...ظهرت علا... وجنبها حسام
داليا واحمد بصوا لبعض
وهما الاتنين فى نفس الوقت
"حسااااام!!!!"
استغرب وحيد من رد فعلهم
"مين ده؟؟تعرفوه"
معرفوش يردوا عليه واكتفوا بابتسامة باهتة
                      *************
علا وحسام وهما خارجين...علا بتبص قدامها
اتفاجئت بوحيد مع احمد وداليا
"مين ده ياعلا"
"ده زميلى ياحسام... وكان متقدم لى"
سكت حسام وهو متضايق
كانوا بيقربوا...واتقابلوا كلهم مع بعض
علا وحسام... واحمد وداليا ووحيد

هناك 25 تعليقًا:

  1. اووووووووووووووووووووووووووووووووووو جامده بقى

    ردحذف
  2. حلوه أوى الحلقه يا دينا بس حسام ده أنانى أوى وبجد مصدومه إن علا رجعتلو. ندى

    ردحذف
  3. جميييييييييييلة اووى ... انا عايزة انا كمان شنطة هدايا وبرفان ومكياج وكريم زى اللى اشترووة هههههههههه

    ردحذف
  4. انا عايزاها تنزل كلها مرة واحدة بجد عجباني اوييييييييييي مش بقدر استنى لحد بكرة و تسلم ايدك

    ردحذف
  5. ايوووووووووووووووه بقا اوعى جامد جدا اوعي تتاخري علينا بالحلقه اللي جايه مزيد من التقدم

    ردحذف
  6. حـــــــــــــــــــلوه أوووووووي بس انا نفسى بردو مروه متتظلمش حرام ونفسى بردو علا ترجع لحسام ياريت تشوفى حل وسط :)

    ردحذف
  7. حلقه بجد حلوه اوووووووووووووووووي تسلم ايدكيا دينا ......... هي اه علا رجع بسهوله بس هو ده الحب الحقيقي اللي الواحد فيه بيبق ضعيف قداماللي بيحبه ومش بيقدر يقوله لا مهما ان كان جه عليه او ظلمه

    ردحذف
  8. تحححححححححححححححفة بجد يا دينااا .. تسلم ايدك بجد
    بس بجد الحلقة دى حسسيتنى بالظلم اوى بجد
    تسلم ايدك يا قمرى

    amira slama

    ردحذف
  9. يا بتاع القفلات ايه يا دودو الاثارة دى كلها احييكى على جمال اسلوبك تسلم ايداكى وكل عام وانتم بخير بمناسبة المولد النبوى الشريف اللهم صلى وسلم وبارك على سيدنا محمد وعلى آله و صحبه اجمعين
    dentist aya

    ردحذف
  10. والله انا مش عارفه الوم عليكي يا علا ولا افرحلك ,الوم عليكي عشان استسلمتي بالسهوله دي لواحد باعك في لحظه و لا افرحلك ان حب عمرك رجعلك وبعد انتظار طويييييييل بجد انا محتاره ولو كنت مكانك معرفش كنت حتصرف ازاي .
    مبدعه يا دندن وبجد بجد قدرتي تشديني للقراءه تاني اهنيكي وفي انتظاااااار المزيد

    ASMAA TAREK

    ردحذف
  11. الحلقه دى رومانسيه موووووووووووووووووووووووت انا بعشق الرومانسيه بس كنت حاسه وانا بقرأها ان ضميرى بيأنبنى عشان مروة

    ردحذف
  12. جااااااااااااااااامده اوى :) :) :)
    وحقا ليس كل ما يتمناه المرء يدركه

    ردحذف
  13. حلوة اوى الحلقة وتسلم ايدك ياجميل .. بس ياريت ما تتاخريش علينا فى الحلقة الجاية عشان خاطر حسام وعلا ههههههههههههههههههه بلاش خاطرنا وتسلم ايدك يااجميل ...غادة

    ردحذف
  14. رووووووووووووووووووووووووعة تسلم إيديك
    خلصت على مشهد مشوق
    مستنيين الحلقة الجاي على أحر من الجمر
    :)

    ردحذف
  15. جامدة جدااااااااااااا بس دينا عشان خاطري ماتقفليهاش على موت حسام او على انهم يسيبوا بعض هو وعلا :( زي ماقالوا شوفي حل وسط بينها وبين مروة عشان حسام بردو عاش مش مبسوط مع مراته ومن حقة انه يفرح وربنا يعوضه هو وعلا :) بعيدا عن الغلط الغبي اللي عمله قبل كدا انه سابها احم احم :) نحن نريد علا وحسام يكملوا مع بعض حبمهم من جديد :)

    ردحذف
  16. 7lwa awee
    nice y dodo keep going :):)

    ردحذف
  17. يوووووووووووووووووووووووه بقا بتقفلى الحلقه فى اكتر حته حلوه زحلانه منك انا

    ردحذف
  18. جميييييييييييييييييييله جداا يا ترى هيحصل ايه !!

    ردحذف
  19. ايه الاستهبال دة والله حراااااااااااااااااااام

    ردحذف
  20. حسام اللى بيعمله دوت يعتبر خيانه لمراته

    ردحذف
  21. ايه الندالة اللى حسام فيها دى؟ على فكرة هو ندل بطبعه يعنى هو بعد عن باباه اللى ديننا وصانا عليهم حتى لو كانوا كفرة مع ان باباه غلط
    و اتخلى عن علا بسهولة عشان كبرياء و عند حتى لما اتجوز مروة بيخونها و بيرجع للى اتخلى عنها اعوذ بالله من دى ناس
    و حتى علا ماشية معاه و هى عارفة ان المفروض مراته و ولاده يكونوا مكانها و ساكتة

    ردحذف
  22. يلاهووووووووووووووووووووى

    ردحذف

قول رأيك بلاش تقرا وتقفل من سكات...ارائكم تهمنى