الخميس، 24 يناير 2013

الحب على كفة ميزان... الحلقة 15

الحلقة 15
علا وحسام وهما خارجين...علا بتبص قدامها
اتفاجئت بوحيد مع احمد وداليا
"مين ده ياعلا"
"ده زميلى ياحسام... وكان متقدم لى"
سكت حسام وهو متضايق
كانوا بيقربوا...واتقابلوا كلهم مع بعض
علا وحسام... واحمد وداليا ووحيد

داليا حضنت علا وهى بتسلم عليها
وحيد بيسلم على علا"حمدالله على السلامة"
فى نفس الوقت احمد بيسلم على حسام
"ازيك يا دكتور ياحسام"
"الحمدلله ازيك يا احمد"
داليا بتسلم على حسام
"حمدالله ع السلامة"
حسام"الله يسلمك ياداليا"
وحيد بيسلم على حسام وهو بيبص لعلا بتساؤل
علا"دكتور حسام... معرفة قديمة من ايام الجامعة"
وحيد"اهلا وسهلا يادكتور تشرفنا"
حسام"اهلا بيك...فرصة سعيدة"

الجو كله توتر لكل الموجودين ماعدا وحيد
لانه الوحيد اللى اخد الامر بظاهرُه من غير ما يعرف باطنُه

وحيد اخد ايد علا وسبق بخطوات... سحبت علا ايدها
"وحشتينى قلت اعملك مفاجأة"
علا بترد بابتسامة تدارى بيها ارتباكها...وبتخطف نظرات لحسام اللى وراها وماشى جنب احمد وداليا لبعيد
"هتركبى معايا اوصلك البيت"
"لا معلش..هركب مع احمد علشان داليا هتروح معايا"
"طيب هشوفك امتى ... هتقدرى بالليل"
"لا خلينى النهاردة فى البيت ارتاح...بكرة اشوفك فى الجورنال"
"طيب براحتك ياعلا...بس عندى كلام كتير لازم نتكلم فيه"
"ان شاءالله"
واتباطئت علا لحد ما بقت جنب داليا... ووحيد ماشى جنب احمد

خرجوا بره المطار...
حسام"فرصة سعيدة ياجماعة... مع السلامة"
احمد"استنى يادكتور اوصلك لو محدش جالك"
حسام"لا معلش هاخد تاكسى"
احمد"لا يادكتور ميصحش...اتفضل معانا"
علا بتبص لحسام مستنية رده
حسام"لا معلش... متشكر اوى يااحمد...علا انتى مين هيوصلك"
ردت علا بسرعة"احمد"
وحيد"طيب استأذن انا ياجماعة... هكلمك ياعلا...سلام"
مشى وحيد... وبعده حسام ركب تاكسى
وراحت علا وداليا على عربية احمد
                           *******************
داليا جنب احمد فى العربية...وعلا قاعدة وراهم
داليا"ايه لم الشامى ع المغربى؟؟"
علا"النصيب"
داليا"نصيب؟؟نصيب ايه ياعلا...وازاى متحكيليش"
احمد بيبص لعلا فى المراية... ولداليا اللى جنبه ونظرات عدم الرضا على وشه
علا "هحكيلك ياداليا"
داليا"احكى...انا سامعة اهو"
احمد"اصبرى يا داليا لما تبقوا مع بعض"
داليا"ليه...هى علا هتتكسف منك ولا انت غريب عنها"
علا"مقصدكش يااحمد وانت عارف"
احمد"عارف... بس شكلك مترددة انك تحكى وطالما مترددة تبقى عارفة اننا هنلومك...انا مش عارف ايه اللى حصل بالظبط علشان ترجعوا مع بعض بس واضح ان المياه رجعت لمجاريها"
داليا"مياه ايه اللى ترجع دى.... ازاى يعنى"
ورن موبايل علا...ردت
"الو... ايوه ياحسام احنا فى الطريق اهو"
داليا بتبص لاحمد وكأنها بتشهده على غلط علا...احمد
"مقلناش حاجة...هو انا لحقت... هروح ع البيت...لا مش خارجة... هبقى اكلمك..حاضر مش هتكلم... مع السلامة"
داليا"انتى بقيتى سلبية كده ليه...انتى علا ولا واحدة تانية"
علا"سلبية ليه يا داليا"
داليا"بتردى عليه بخضوع كده ليه"
علا"حاضر المرة الجاية هشتمه لما يكلمنى"
احمد"دالياااااا...علا مش صغيرة ولو طلبت نصيحتنا هننصحها غير كده هى حرة واحنا مش اوصيا عليها"
داليا"حاضر يا احمد هسكت"
علا"هو انا ليا غيركم يااحمد...انا بس مش عايزة داليا تحكم عليا قبل ما احكى...هنروح واحكي لك كل حاجة بالتفصيل"

الشغالة بتفتح الباب لحسام
شافته رحمة..جريت عليه
"بابااااااااااااااااااا"
اتعلقت فى رقبته وشالها واخدها ف حضنه
"وحشتنى يابابا"
"انتى كمان وحشتينى اكتر"
جت مروة تجرى عليه بكل شوق
"حسام...حمدالله ع السلامة ياحبيبى وحشتنى"
سلموا على بعض... نزلوا سيف ومعاذ يجروا على حسام
اخدهم حسام فى حضنه بكل شوق ولهفة وحب وحنان
"وحشتونى اوى يا ولاد... اووووى"
                   ******************
حسام فى اوضة مامته...قاعد جنبها على السرير
"عاملة ايه ياماما"
"الحمدلله ياحبيبى...حمدالله على سلامتك"
"الله يسلمك...احكيلى صحتك عاملة ايه"
"كويسة الحمدلله...مروة ربنا يكرمها يارب مبتسيبنيش"
مروة واقفة ورا حسام
"ربنا يخليكى لينا ياخالتى ويديكى الصحة يارب"
حورية"قوم يا حسام ارتاح من السفر وبعدين ابقى تعالى اقعد معايا"
حسام"حاضر ياماما"
خرج حسام من عند مامته وراح اوضته
ومروة وراه... بتساعده وهو يقلع الجاكيت
"وحشتنى يا حسام وكنت بتكلمنى قليل اوى"
"معلش ماانتى عارفة انى كنت مشغول"
"احكيلى عملت ايه"
"كله كويس الحمدلله... حصل حاجة وانا مش موجود"
"لا مفيش حاجة... كلنا بخير الحمدلله"
"بصى الشنطة دى كلها حاجات لسيف ومعاذ ورحمة... وهتلاقى حاجتك فى شنطة لوحدها"
"اهم حاجة انك رجعتلى بالسلامة"

علا فى اوضتها واقفة قدام الدولاب
داليا قاعدة على السرير وفاتحة الشنطة وبتناول لعلا الهدوم
"ايه الفستان الموف ده... جبتيه من هناك"
ردت علا وهى بتاخده تعلقه ف الدولاب
"حسام اللى جابهولى"
"اصرخ ولا ألطم ولا اعمل ايه"
قعدت علا على السرير جنب داليا
"بحبه ياداليا...متلومنيش انى لسه بحبه..غصب عنى"
"وهو؟"
ردت بفرحة
"بيحبنى يادودو...طول السنين اللى فاتت دى وهو بيفكر فيا ولسه بيحبنى... انا مش ندمانة على السنين اللى استنيته فيها...كأنى كنت حاسة اننا هنتقابل"
"وبعدين...بعد ما اتقابلتوا"
"وبعدين ايه"
"فكرتى ف..."
"مفكرتش ف اى حاجة... انا فكرت كتير قبل كده والتفكير جابلى ايه غير العذاب... ولما سلمت نفسى لاحساسى ملقتش غير السعادة... انا عشت 4ايام من احلى ايام حياتى"
"سعادة مؤقتة"
"حتى لو مؤقتة...مش من حقى افرح شوية...مش من حقى احس بالحب اللى اتحرمت منه"
"ومراته؟؟؟"
"انا معملتش حاجة لمراته...انا مخدتوش منها ...ولو رجعنا بالزمن هتلاقى انها هى اللى اخدته منى مش انا"
"خلف؟"
"ايوه...ولدين وبنت"
"وانتى هتبقى ايه ف حياته يا علا"
وبعد سكوت علا فى التفكير
"انا...انا حبيبته"
"واللى بتحب راجل متجوز بتبقى.... مش عايزة اضايقك ياعلا"
"بتبقى ايه ياداليا"
"بتبقى عشيقة"
قالتها داليا وقامت خرجت من الاوضة خالص
راحت المطبخ ... جت علا وراها
"انا محصلش بينى وبينه اى حاجة غلط"
"علاقتكم كلها غلط"
قعدت علا على الكرسى بتاع ترابيزة المطبخ
عيطت وهى بتتكلم
"يعنى المفروض انى افضل احبه من غير امل ويوم ما الاقيه والاقى حبه تبقى علاقتنا غلط ومحكوم عليها بالاعدام"
حست بيها داليا...صعبت عليها...حضنتها
"خلاص ياعلا...انا هسكت مش هتكلم"
"غصب عنى يا داليا... حاولت اقوم احساسى بيه...والله العظيم حاولت...مقدرتش لقيت نفسى بعد ما صديته بروح له تانى برجليا"
"خلاص ياعلا...خلاص متعيطيش"
وبعد ما سكتت داليا...رجعت كملت كلامها
"طيب وحيد هتعملى ايه معاه"
"انا اكيد يعنى هقوله اننا مينفعش نرتبط ببعض.. بس مستنية حجة معقولة لانى مش عايزة اجرحه وهو معمليش اى حاجة وحشة"
"اخر حاجة هقولهالك ياعلا علشان متتضايقيش منى"
"انا متضايقش منك ياداليا...قولى اللى انتى عايزاه"
"لو بتحبوا بعض لسه زى زمان... اتجوزوا"
"نتجوز!!انتى اللى بتقولى كده وانا عارفة رأيك فى الجواز التانى"
"ايوه... انا اللى كنت بقول الراجل اللى يتجوز اتنين يبقى عينه فارغة وانانى وانا اللى كنت بقول اللى تاخد واحد متجوز تبقى خطافة رجالة.. بس فى حالتكم دى تتجوزوا ارحم ماتفضل علاقتكم ببعض كده ...غلط"

حسام فى المكتب... قفل الباب بالمفتاح... وفتح التليفزيون بصوت عالى...واتصل بعلا
"الو... ازيك ياعلا.. وحشتينى... انا اكلمك احسن بلاش انتى تكلمينى علشان ميحصلش مشاكل... هشوفك بكرة؟؟ لازم اشوفك... انتى هتخلصى شغل امتى...ازاى ملكيش مواعيد... خلاص نتفق على معاد احنا وتفضى نفسك فيه... طيب خلاص لما تخلصى... نخليها بالليل...الساعة 8 ماشى...فين؟؟ مع السلامة"

علا فى المكتب...دخل لها وحيد
"صباح الخير"
"صباح النور"
"عاملة ايه النهاردة"
"كويسة الحمدلله"
"كان مالك امبارح"
"مالى؟؟"
"معرفش...لما شفتك ف المطار حسيت ان فيه حاجة علشان كده بسألك"
"لا ابدا مفيش حاجة... انت عارف السفر بيخلى الواحد كده مش مظبوط"
"يمكن... المهم هنتعشا مع بعض النهاردة"
"لا مش هينفع النهاردة"
"ليه وراكى ايه"
"ورايا مشوار مهم"
"فين؟"
"هو تحقيق يا وحيد"
"لا مش تحقيق ولا حاجة انا بسألك عادى يعنى.. انتى  ليه اخدتيها كده"
"معلش انا اسفة...انا متوترة شوية بس"
"انا اليومين الجاى هسافر المانيا مع تامر علشان هيعمل عملية ف عينه"
"ان شاءالله خير وترجعوا بالسلامة"
"متهيألى لازم ناخد خطوة رسمية بقى لما ارجع"
"خطوة رسمية؟"
"اه... بقالنا 4شهور اهو ومتهيألى كفاية تكونى اخدتى قرار"
وقطع كلامهم الساعى لما دخل
"استاذ وحيد...الريس عايزك ف مكتبه"
"انا جاى له حالا... هنكمل كلامنا تانى ياعلا"
"طيب...احتمال بس اروح دلوقتى...لما ترجع من السفر هقولك قرارى النهائى"

علا وصلت الكافيه اللى هتقابل فيه حسام
شافته مستنيها...راحت سلمت عليه وقعدت معاه
"ازيك ياحسام"
"ازيك ياعلا... اتأخرتى ليه"
"الطريق زحمة"
"اصل انتى وحشتينى اوى"
"لما بوحشك بتقدر تتصل بيا انما انت لما وحشتنى مقدرتش اتصل بيك"
"ما انتى عارفة الظروف"
"يعنى بتراعى مشاعر مراتك"
"عايزة توصلى لايه ياعلا"
"عايزة اوصل انك بتراعى مشاعرها وانا لأ"
"انا مش عايز مشاكل معاها"
"اااه... طيب انت مش عايز مشاكل معاها...وعايز تبقوا عايشين مبسوطين...تمام حقكم...انا بقى فين وايه بالنسبة لك"
"انتى حبيبتى ياعلا"
"اممم...حبيبتك... حبيبة فى السر... متربطنيش بيك اى علاقة رسمية...ماليش اى حق ف انى اشوفك وقت ما احب او اكلمك وقت ما توحشنى... لا اسفة جداااا يا حسام مش انا اللى تقبل تعيش كده"
وقرب منهم شاب
"مساء الخير"
ردوا عليه وهما مش عارفين مين ده
"مساء النور"
"انا حبيت بس احيي حضرتك على برنامجك ... ياريت كل الناس زى حضرتك"
علا"شكرا.. ربنا يخليك"
"ممكن بس صورة مع حضرتك"
علا"مفيش مانع"
حسام"لا معلش بلاش صور لو سمحت"
الشاب" انا اسف لازعاجكم...بعد اذنك يا مدام"
مشى الشاب واستغربت علا
"ايه ده ياحسام... ليه احرجته كده"
"وهو ليه يدخل يقاطعنا كده وقال ايه عايز صورة"
"حسام...لازم تفهم ان ليا جمهور لازم اعامله بذوق"
"وانتى قاعدة مع راجل ياعلا"
"رجعنا تانى لنغمة راجل وست... مفيش فايدة"
"ماهو انا هو انا متغيرتش...لسه بحبك وبغير عليكى... وبصراحة مش عاجبنى لا طريقة لبسك ولا شعرك المكشوف ده"
واتضايقت علا من كلامه
"مش مهم تعجبك... لانها عاجبانى "
"ورأيي مالوش اعتبار عندك"
"بأى حق"
"حق حبى ليكى"
"بص يا حسام... انا عايزة اعترفلك انى غلطانة اوى...وبجد انا اسفة جداااا"
"غلطانة ف ايه"
"غلطانة ف حق نفسى لما مفكرتش فى علاقتنا... وغلطانة لما سبت قلبى يحركنى... لازم اعتذر لنفسى علشان قللت منها اوى"
وقامت علا تمشى
"استنى ياعلا...متمشيش"
"نعم"
"انا اسف....انا غيرتى عليكى خلتنى مش عايز حد يشوفك ولا يكلمك"
"انا غيرتى عليك حاطاها جوه قلبى وساكتة وانا عارفة انك هتمشى وتروح تنام ف حضن مراتك"
"خلاص... انتى حرة..اقعدى بقى"
قعدت علا
"حسام..لازم نحكم عقلنا شوية بقى... مش هينفع علاقتنا دى ...انا كده مش هحترم نفسى"
"ايه اللى يريحك"
"نتجوز"
"نتجوز"
"ده تساؤل ولا تعجب"
"تفكير"
"فكر براحتك ولما توصل لقرار ابقى عرفنى"
قامت علا... وهى على الباب قابلت عصام داخل
"علا!!"
"اهلا يا عصام ازيك وازى ليلى"
عصام وهو شايف حسام قاعد ففهم انهم اتقابلوا
"الحمدلله"
"ابقى سلم عليها...سلام"
مشيت علا بسرعة...ودخل عصام لحسام

هناك 24 تعليقًا:

  1. رووووووووووووووعه صاحبه اول كومنت فى انتظار الحلقه الجايه يا دودو
    توتا

    ردحذف
  2. جامدة جدا

    ردحذف
  3. كل كتاباتك رائعة

    ردحذف
  4. يا تري ناوى علي ايييييييييييييييييييييييييييييييييييييييييه يا حسااااااااااام !!!؟؟؟
    ASMAA TAREK

    ردحذف
  5. الحلقة صغيرة اوووووى بس حلوة يا دودو

    بس بصراحة انا لا طايقة حسام ولا علا لان الاتنين بيعملوا حاجة غلط وهو بيخون مروة و ده حرام لما هو مش قد جوازه من مروة كان اتجوزها ليه سد خانة وخلاص ومش عامل حساب لمشاعرها

    اول مرة مش ابقى متعاطفة مع ابطال قصتك يا دودو :)

    ردحذف
  6. gmda gmda gmda gmda y dodo msa 3leki <3 <3 ......
    fze3a bgddddddddddd ^__^^

    ردحذف
  7. 7lwa awee y dodo
    keep going :):)

    ردحذف
  8. جامدة فحت جااااامدة موووت رووووعة قصصك بجد

    ردحذف
  9. حلووووووووووووه ... بس علا انااانيه فعلا حرام تهدم اسره بايدها .. وحتى لو هي بتحب حسام كل هالحب المفروض تكون عرفت وفهمت بعد كل الوقت ده انهم مش لبعض تفكيرهم مختلف .. هي منفتحه جدا وهو منغلق وعايش دور سي السيد .. لو تزوجو ح يتحكم وتدريجيا ح يلغيها شخصيتخا وكل حاجه كانت بتحلم بيها ح تتلغى ورا وهم اسمه الحب

    ردحذف
  10. جميييييييييييييييييلة جدا :) :) :)

    ردحذف
  11. el7al2a argogyyyyy <3 enty f3lan to7fffaa wstory bta3tk wahm <3

    ردحذف
  12. علا بتظلم نفسها جدا... هى مش شايفة اد ايه حسام انانى مدى لنفسه كل الحقوق فيها ده آه وده لا وتلبسى كذا وماتلبسيش كذا ويغير عليها بالشكل الاوفر ده باعتبار ان له حق فيها لانه بيحبها وهى بقي مالهاش اى حق خالص كده؟؟؟ ده متجوز وحتى مافكرش انه يتجوزها كانه عايز يقضيها وخلاص
    طماع وانانى وعايز كل حاجة لنفسه وبس... جوازه من مروة م الاول كان غلطة منه ومن مروة انها وافقت تتجوز واحد بيحب واحدة تانية
    بس دلوقتى مروة هتتظلم جامد جدا وحسام مش حاسس باى ذنب خالص كده؟؟ دى شايلة مامته على كفوف الراحة معندوش دممممممم
    حاجة تجنن...مش عارفة تتحل ازاى دى!!!!!
    حلها ان حسام يموت لان مروة وعلا الاتنين خسارة فيه D:

    ردحذف
  13. لا انا شايفه ان علا عندها حق في كل اللي عملته
    حسام هو الاناني جدااا
    ومروة مظلومه اووي بس هي اللي اختارت تكون كده
    منتظرين الباقي

    ردحذف
  14. يخرب بيت الحب
    ويخرب بيت الرجالة الي تعمل كدة تفكر ف نفسها وبس
    الشاطرة الي تاخد بالها ومتخليش حد يقلل من احترامها ولا كرمتها ولا احلامها

    ردحذف
  15. tooooooool 3omrk ktabatk gamda



    a7md

    ردحذف
  16. الحلقه رووووووووعه
    بس خايفه يبعدوا تانى علا اتعذبت كتير اينعم هو غلط بس حقها ترتاح
    م.أ

    ردحذف
  17. انا مش فاهمة اللي بيقول روعة وتحفة على ايه دة الاتنين بيستعبطوا دي خيانة وحرقة قلب

    ردحذف
  18. حلقة روعة بحبك اوى يادندن والله ومبفوتلكيش قصة غير لما اقرهاا

    غادة

    ردحذف
  19. فيييين الباقي؟
    حلقه حلوة موووت..
    علا اتظلمت كتير في حياتها وجاء الوقت اللي ترتاح فيه..
    مروة مرات حسام ثقيله وبايخه اوي علشان اتجوزت واحد هي عارفه انه ما بحبهاش

    ردحذف
  20. روووووووعه الرواعيع وبجد متضايقه من علا اووووووى ما وحيد كانت هتتبسط معاه وهتنسى الزفت حسام دوت ليييييييييه علطول كده رجعت

    ردحذف
  21. مش من حق علا ابدا انها تسأله عن مراته و زعلانة عشان بيخاف على مشاعرها؟؟؟ ايه الناس دى يا ربى؟؟
    بس الحلقة حلوة اوى اوى

    ردحذف
  22. مش من حق علا ابدا انها تتزفت تتسأله عن مـراته وزعلانه من ايه يعنى عشان بيخاف على مشاعرها !!

    ردحذف

قول رأيك بلاش تقرا وتقفل من سكات...ارائكم تهمنى