الاثنين، 28 يناير 2013

الحب على كفة ميزان... الحلقة 16

الحلقة 16
قامت علا... وهى على الباب قابلت عصام داخل
"علا!!"
"اهلا يا عصام ازيك وازى ليلى"
عصام وهو شايف حسام قاعد ففهم انهم اتقابلوا
"الحمدلله"
"ابقى سلم عليها...سلام"
مشيت علا بسرعة...ودخل عصام لحسام

قعد عصام مع حسام
"حمدالله ع السلامة"
"الله يسلمك"
"اتقابلتوا امتى؟؟ وازاى؟؟ صدفة ولا روحت لها ؟؟ وايه اللى حصل خلاها تاخد ف وشها كده...مش معقول متخانقين انتوا ملحقتوش....انت ساكت ليه ماترد عليا"
"مستنيك تخلص كل الاسئلة علشان احكيلك"
"خلصت...احكى"

داليا رايحة على باب بيتها...بتفتح
"علا...اهلا ياحبيبتى ..تعالى"
"ازيك ياداليا"
دخلت علا وقعدت ...قعدت داليا جنبها وسألتها بقلق
"مالك"
"عملت زى ما انتى قلتيلى"
"على ايه؟انتى جاية منين"
"كنت مع حسام"
عوجت داليا بؤها بعدم رضا
"وبعدين؟؟"
"تخيلى بقوله نتجوز بيفكر"
"شئ متوقع"
"متوقع!!!ازاى؟؟"
"ياحبيبتى ده راجل متجوز من 14سنة ومعاه 3 عيال يعنى حتى لو مكنش بيحب مراته ف الاول بقى بينهم دلوقتى حاجات اهم واعمق بكتير من الحب...بينهم عِشرة واطفال ومتنسيش انها كمان بنت خالته يعنى صعب اوى انه يسيبها بسهولة"
"يعنى بيضحك عليا... بيكذب لما بيقول انه لسه بيحبنى"
"الله اعلم باللى ف قلبه...بس فيه رجالة كده عايزين الزوجة اللى تحافظ على البيت وتربى العيال وعايزين الحبيبة اللى يعيش معاها مشاعره من غير مسئولية...ولما ييجى وقت المسئولية يتهرب"
"لا ياداليا...حسام مش كده... انا متأكدة انه بيحبنى"
"لما هو بيحبك سابك ليه زمان"
بصت لها علا بدموع بتلمع فى عينيها
"انا اسفة ياعلا... والله ماعايزة اضايقك بس مقدرش اجاريكى وانا مش مقتنعة وشايفة انك غلطانة"
"مش قادرة اصدق ان حسام يكون كده...اكيد انتى ظالماه...او مش فاهماه...انتى مش فاهمة حسام..حسام بيحبنى انا متأكدة"
"طيب ياعلا...انا مش فاهمة ومش عارفة وحسام بيحبك... هتفضلوا تحبوا بعض كده من غير جواز؟؟وهقولك تانى نفس الكلام اللى قلتهولك قبل كده ...مينفعش هو يبقى عايش حياته وانتى موقفة حياتك عليه"
"علشان كده قلت له نتجوز... لو عايزنى يبقى يتجوزنى"
"ومراته"
"انا مالى بمراته"
"هى هترضى بكده ولا يتجوزك من وراها"
"مش مشكلتى...زمان لما سابنى واتجوزها هى مفكرتش فيا يبقى عايزانى ليه افكر فيها دلوقتى"
"الكلام سابق لاوانه...لما تشوفى هو هيعمل ايه...وأيا كان اللى هيحصل مش عايزاكى تزعلى"
وفتح احمد الباب ودخل
"علا...انتى هنا بنت حلال"
داليا"حمدالله ع السلامة ياحبيبى"
علا"ازيك يااحمد"
قعد احمد
"الله يسلمكم... ايه ياعلا مبترديش على التليفون ليه"
علا"تليفونى... ماله؟؟"
فتحت علا شنطتها تشوف الموبايل
"يوووو نسيته سايلنت"
قامت داليا"هقوم احضرلكم العشا"
علا"انا هنزل علشان عندى شغل الصبح"
داليا"والله ابدا لما تتعشى معانا"
احمد"لا متمشيش عايزك"
علا وداليا"خير؟؟"
وقعدت داليا تانى
احمد"طبعا انتى عارفة ان فيه قناتين عرضوا عليا شغل"
علا"اه عارفة"
احمد"القناة اللى اتفقت معاهم ...عايزينك"
علا"عايزيننى؟"
داليا"الله ...شوفوا ربنا كبير عوضكم ازاى"
علا ساكتة
احمد"ايه ياعلا مالك ساكتة ليه"
علا"مش عارفة يااحمد"
داليا"مترددة ليه؟؟"
احمد"تعالى قابلى مدير القناة واتكلمى معاه...عجبك الكلام كان بها معجبكيش خلاص براحتك"
داليا"صح يا علا...كلام احمد مظبوط...قابلى الراجل وبعدين قررى"
علا"طيب"
احمد"نتقابل بكرة نروح له"
داليا"اقوم انا بقى احضر العشا"

حسام وعصام فى الكافيه
"كل ده حصل الكام يوم اللى فاتوا"
"اسعد ايام عشتها من سنين"
"وبعدين؟"
"وبعدين ايه"
"هتعمل ايه...علا رمت الكورة ف ملعبك...شوط بقى بس اوعى تشوط شوطة تهدم بيها بيتك"
"انا مش راجل ندل علشان اهدم بيتى"
"يعنى هتبعد عن علا"
"مقدرش"
"اومال هتعمل ايه"
"انا حكيت لك علشان تشورنى مش تقطمنى"
"والله يا حسام يااخويا اللى بيغلط الغلطة دى مرة صعب اوى يكررها...انت اخويا وواجب عليا النصيحة"
"بتهرج يا عصام ومش وقته خالص"
"انا بتكلم جد...هو حد يقدر على ست واحدة لما يقدر على اتنين...يارااااجل دول يتفات لهم بلاد... وخد بالك بقى لو اتجوزت علا هتقولك اعدِل..ولو مراتك عرفت هتولع فيك...واشرب ياعم وجع القلب"
"صعبة اوى الحكاية دى...انا مش قد المشاكل دى كلها"
"يبقى تاخدها من قاصرها كده وتشترى دماغك"
"هحاول... مش عايز افتح على نفسى باب مشاكل ميتسدش"

حسام فى مكتبه فى البيت...قاعد فاتح نور الاباجورة والانوار كلها مطفية... ساند ضهره لورا وسرحان فى هدوء تام

تدخل عليه مروة
"حسام انت هنا"
"عايزة حاجة"
فتحت النور
"انت قاعد كده ليه"
"اطفى النور يامروة وسيبينى لو سمحتى"
"اسيبك؟؟ اسيبك ليه؟؟ انت عارف احنا الساعة كام"
واتكلم بعصبية
"ماتطلع زى ماتطلع انتى عايزة ايه"
"عايزة اعرف مالك...ايه اللى مشقلب حالك كده ياحسام"
"مفيش حاجة...عايز ابقى لوحدى وبس"
"وانا مش ماشية من هنا غير لما اعرف فى ايه"
"سيبينى يا مروة انا مش طايق نفسى"
وخافت مروة من عصبيته
"حاضر ياحسام... انا هطلع واسيبك بس افتكر انك مش طبيعى بقالك فترة واقسم بالله ان لو طلع اللى ف دماغى صح هتشوف واحدة تانية متعرفهاش"
خرجت مروة من المكتب...قام حسام وراها يزعق
"بتهددينى يا مروة... وايه اللى فى دماغك ان شاءالله... ما تعرفينى"
مروة مبتردش عليه وطلعت وهو لسه واقف بيزعق

علا قاعدة على السرير...شافت الشمس بتشرق
قامت من السرير... جابت اللاب توب...قعدت تتصفح فيه بملل
مسكت الموبايل...تشوف اخر مرة اتصل بيها حسام
وتقلب فى الاتصالات الصادرة والواردة بينهم وتشوف مواعيدها
وتفتكر ايامهم فى دبى
"معقول يا حسام تخيب ظنى فيك...معقول داليا يكون كلامها صح وتكون عايز كل حاجة ومش مهم انا عايزة ايه؟؟"
قامت لما وصلت الساعة 7
دخلت المطبخ عملت قهوة... وفتحت التليفزيون تقلب فيه بملل اشد
وسرحت تانى فى حسام واخر لقاء بينهم
"وحشتنى يا حسام... بس مش هضعف تانى... والقرار قرارك"

علا واحمد قاعدين فى مكتب مدير القناة
المدير"كده اتفقنا يا استاذة... هنبتدى نعمل البرومو ونبدأ الحلقات الاسبوع الجاى"
احمد"لينا حرية اختيار الموضوع؟"
المدير"طبعا...احنا اتكلمنا قبل كده فى الموضوع ده...بس هنعمل بند ف العقد ان الاعداد هو المسئول عن كلمة فى الحلقة"
علا"واحمد يتحمل المسئولية لوحده ليه...انا ممكن اقول حاجة بره الاسكريبت وانا اتحمل مسئوليتها"
المدير"خلاص احنا هنكتب فى العقد ان القناة مش مسئولة عن الاراء اللى جوه الحلقة سواء من المعد او المذيعة او الضيوف"
علا واحمد"ماشى... تمام"
المدير وهو بيضرب الجرس للسكرتيرة
"نمضى العقد؟"
علا"اوك"
احمد"تمام"

داليا فى البيت ... بتحط لاحمد كوباية شاى على ترابيزة صغيرة قدامه
"شفت علا النهاردة"
"لأ"
"ولا كلمتها"
"لأ...ليه"
"اصلها متكلمتش من الصبح وبتصل بيها تليفونها مقفول والبيت جرس ومحدش بيرد"
"اتصلى بيها فى الجورنال"
"اه صحيح ...انا ازاى كنت ناسية"
ومشيت داليا
"رايحة فين"
"اتصل بيها اطمن واصحى منه واجى نتغدا كلنا مع بعض"
                      *****************
منه واحمد قاعدين بيتفرجوا على التليفزيون
تيجى داليا بسرعة وبفزع
"ألحقنى يا احمد...علا مراحتش الجورنال النهاردة من غير ماتقول وبيتصلوا بيها متردش"
احمد وهو بيقوم بسرعة"لتكون تعبت تانى"

احمد بيرن الجرس على باب علا
داليا بتفتح شنطتها
"احنا لسه هنقف نخبط...انا هفتح بالمفتاح اللى معايا"
فتحت داليا بالمفتاح...النور مفتوح
احمد واقف ع الباب...داليا دخلت وهى بتنادى
"علاااا...انتى هنا... ادخل يا احمد انا خايفة"
احمد بيدخل بخطوات مترددة
"طيب ادخلى شوفيها مش هينفع ادخل عليها فجأة كده"
علا"ادخل يا احمد...تعالى يا داليا"
كانت علا خارجة من اوضتها وبتكلمهم وهى فى الطرقة
احمد قفل الباب ودخل...وداليا سبقته على علا
"حرام عليكى ياعلا...كنت هموت من القلق"
احمد"ايه ياعلا...كده تخضينا عليكى"
دخلوا كلهم قعدوا فى الليفنج
داليا"مالك؟؟"
علا"تعبانة شوية"
احمد"تعبانة ومبتقوليش ليه؟؟قومى البسى ونروح للدكتور"
علا"لا مش تعبانة جسديا...مش عايزة انفصل عن العالم كله وابقى لوحدى"
احمد بص لداليا وفهم قصد علا
"ااااااه... طيب انا هسيبكم مع بعض...دودو ابقى كلمينى لما تخلصى"
داليا"حاضر"
احمد لعلا"وانتى ياعلا... عمرى ماشفتك ضعيفة ولا مهزومة... ارجعى علا اللى اعرفها"
ابتسمت له علا لانها ملقتش رد ترد بيه...مشى احمد
وسمعوا صوت الباب بيتفتح ويتقفل
"قوليلى بقى ايه اللى حصل"
"بقالى 4ايام من يوم ماقابلت حسام وهو مكلمنيش"
"وده يخليكى تعتزلى الناس والشغل كده...انتى هتعيدى زعلك عليه من اول وجديد"
"هو اللى قرب منى وادانى الامل...انا كنت خلاص اتعودت اعيش حياتى من غيره"
"ماهو مش بمزاجه...يدخل حياتك ويخرج منها على كيفه... انتى المفروض تكونى كده عرفتيه على حقيقته وفهمتى ان لما قلتى ياجواز اختفى... هو عايز كل حاجة من غير ما يخسر حاجة"
علا ساكتة...معندهاش كلام تدافع بيه عن حسام
"سيبك من حسام وسيرته... مبترديش على تليفون البيت ليه وقافلة الموبايل..طيب كنتى طمنينى قبل العزلة دى"
"اصل وحيد فضل يتصل بيا كتير وبصراحة معرفتش ارد اقوله ايه"
"تقومى تسيبيه كده ...حرام عليكى"
"انا مشوشة التفكير ياداليا...لا عارفة اتكلم ولا افكر وخايفة اجرح وحيد وهو ميستاهلش منى كده"
"لا طبعا ميستاهلش منك غير انك تحطيه فى عنيكى...اسمعى كلامى ياعلا...اعتبرى حسام مظهرش وكملى حياتك عادى مع وحيد"
"ازاى اكمل مع وحيد وانا لسه قلبى وعقلى مع حسام"
"حسااام...تانى حسام"
"سيبينى ياداليا والنبى انا مش حِمل تأنيب... لو كان بايدى انساه كنت نسيته من زمان... قلبى مش بإيدى"

حسام داخل اوضته... ومروة كانت قاعدة
لما شافته قامت تخرج من الاوضة
"رايحة فين"
"فى اى حتة... عند خالتى او ولادى علشان انت تبقى براحتك"
قرب منها واخد ايديها وقعدها جنبه
"بقيتى بتخاصمينى؟"
"انت اللى بقالك 4 ايام قاعد لوحدك خالص وقافل على نفسك وكل ما اقرب ناحيتك تتنرفز عليا... ادينى سايباك براحتك اما اشوف اخرتها"
مسك راسها وباسها
"معلش كنت متوتر شوية وعندى مشاكل فى الجامعة...انا اسف"
وطلع من جيبه علبة صغيرة وبيديها لمروة
"ايه ده؟"
"بصالحك"
فتحت العلبة شافت خاتم ...فرحت
"الله حلو اوى يا حسام"
"عجبك؟؟"
"الاهم من الخاتم انك متضايقنيش تانى"
"حاضر"
"وتقولى ايه اللى كان شاغلك"
"مشاكل فى الجامعة وخلاص اتحلت الحمدلله...مش هوجع دماغك بيها وانتى ايه اللى كان فى دماغك وقلقانة منه"
قامت مروة وهى بتقيس الخاتم
"خلاص بقى يا حسام"
"انا هنام شوية وصحينى الساعة 8 ممكن؟؟"
"عيونى يا حبيبى"

داليا قاعدة مع علا
"لولو مش عايزة حاجة احمد يجيبهالك وهو جاى ياخدنى"
"هتمشى بدرى كده"
"معلش منه عندها امتحان بكرة وعايزة ألحق اراجع لها وانا عندك من العصر"
"طيب يا داليا ربنا ينجحها يارب...سلمى لى عليها"
ويرن موبايل داليا
"احمد وصل تحت... هتروحى بكرة الشغل"
"مش عارفة"
"ارجعى شغلك وومتقفليش على نفسك..محدش يستاهل"
"هحاول"
سلموا على بعض...ونزلت داليا
دخلت علا الليفنج وقعدت تروق فيها وتشيل كوبايات واطباق استعملتها هى وداليا...دخلتهم المطبخ
غسلت الحاجة... وراحت قعدت فى المكتب
بدأت تشتغل شوية وتتصفح على النت وتشوف الاخبار
وسمعت جرس الباب بيرن...بصت الساعة كانت 9ونص
"مين هييجى دلوقتى...تكون داليا رجعت تانى؟؟"
قامت علا تفتح الباب.........
"حسااااااااااااام!!!!"
"اتصلت بيكى كتير النهاردة تليفونك مقفول... ومقدرتش ابعد عنك اكتر من كده"
بصت علا لهدوم البيت اللى هى لابساها... وبصت لوقفتهم مع بعض
"هتسيبينى واقف كتير ع الباب"
"انا عايشة لوحدى يا حسام...مينفعش.."
قاطعها حسام وهو بيدخل جوه البيت وبيقفل الباب وراه
"ينفع... انتى هتبقى مراتى وانا عايز اقعد اتكلم معاكى"


هناك 33 تعليقًا:

  1. اووووووووووبا اخييييرا يا حسام بس تيجي ازاي دي يا دينا
    ربنا يستر وميتجوزوش عرفي

    ردحذف
  2. احييييييييييييييييييييه ربنا يستر o_O

    ردحذف
  3. حسام ........ وااااااااااااااااااااطى

    ردحذف
  4. تسلم ایدک یادینا قصه جمیله
    لولو

    ردحذف
  5. حلو اووووووووووووووى

    ردحذف
  6. اذ فجأه كده حتبقي مراتي !!!!؟ وبيجيب خاتم لمروة ليه ؟؟ انا قلت قبل كده الراجل مش بيجيب هدايا غاليه كده الا اذا كان عامل عمله سوووووده هههههههههههه شوقتيني يا دندونه لما نشوف حسان ناوي علي ايييييييييييييه

    Asmaa Tarek

    ردحذف
  7. gamdaaaaaaaaaaaaaaaaaaaaaaaaaaaaaaaa

    ردحذف
  8. حسام دة زباااااااااااااالة ومروة غبية يا رب نهايتهم سوووودة علشان كدة ظلم

    ردحذف
  9. la2aaaaa la2 bgd 7aram :( msh el mafrood ytgawezo, ana shayfaha ananeya menhom el 2 :( ya3eeni 3aleeki ya Marwa
    bas el 7ala2a to7fa msa... merci ya Dondon xxx

    ردحذف
  10. جميله اوي

    ردحذف
  11. اووووووووووووووووبااااااااااااااااااااااااااااا
    كده حرررام مروه هاتتظلم

    ردحذف
  12. اكيييييييييييد بتحلم كالعادة
    ماهى كل شوية تحلم ان حسام بيجيلها

    ردحذف
  13. جااامدة جدا يا ترا هيتجوزو ولا لا

    ردحذف
  14. جامدة يا دودو

    بس بجد بجد انا مـسـتـغـلـســة علا وحسام اووووووووووووى مش عارفة ليه xD xD xd

    ردحذف
  15. دينا لا حرام تجرحى مروة





    رودى

    ردحذف
  16. هييييييييييييييييييييييييييييييه :D حلوة بقى يارب يتجوزوا :( عشات حسام ف الاول كان من غير باباه وكمان مايتجوزش اللي بيحبها :( حرام

    ردحذف
  17. حررررررررام كده يادينا تظلمى مروة

    ردحذف
  18. هي كده كده مظلمتش مروه ... مروه اللي ظلمت نفسها من الاول لما حبت واحد مبيحبهاش و قالها كده كانت هي اللي انانيه من البدايه كمان .... حسام غلط و كمان علا غلط بس الغلط للي عارف المشكله كلها على بعضها ومشي فيها وهي مروه

    ردحذف
  19. كده بيظلم مروه ذنبها ايه و هي واثقه فيه و علا معذوره هي محبتش غيره و مش قادره تنساه بس ايا كان المفروض متقبلش

    ردحذف
  20. ^_^ حلوة أوي النهاية
    يا ترى إيه إلي هيحصل بعد كدا متشوقة اعرف
    هيتجوزها فعلاً و لا لأ
    هيقول لمروة و لا من وراها و علا هترضى بكده و لا لأ
    حلوة و متبقيش تتأخري علينا في تنزيل الحلقات

    ردحذف
  21. ياريـــــــــــــــت متتاخريـــــــش فى تنزيل الحلقة ياديـــــنــــــا
    وجميلة اووووووووووى النهايــــــــــــــــــــة
    (◕ ◡ ◕)(◕ ◡ ◕)(◕ ◡ ◕)(◕ ◡ ◕)

    ردحذف
  22. جمييييييييله وجااااااااااامده يا دندن

    ردحذف
  23. بجد بجد تحفه يادينا بس كدا شوقتينى اكتر ميروميدو


    ردحذف
  24. مش مطمنة لحسام خاااااااالص

    ردحذف
  25. متظلميهاش عشان انا كمان اسمى مروه

    ردحذف
  26. مش عارفه ليه مش مطمنه
    جامده يا دودو
    م.أ

    ردحذف
  27. انا بكره حسام دا انانى اوى
    ندى

    ردحذف
  28. جميييييييييييييييييلة اوى :)

    ردحذف
  29. طب و مروة طب و و رحمة لا بس علا غلبانة الله يخربيت البعثة اللي جاتله دي

    ردحذف
  30. قصة حلوة جدا والحمد لله انى لقيتها هنا علشان اقرها كلها مؤة واحدة

    ردحذف

قول رأيك بلاش تقرا وتقفل من سكات...ارائكم تهمنى