الثلاثاء، 29 يناير 2013

الحب على كفة ميزان... الحلقة 17

الحلقة 17
قامت علا تفتح الباب.........
"حسااااااااااااام!!!!"
"اتصلت بيكى كتير النهاردة تليفونك مقفول... ومقدرتش ابعد عنك اكتر من كده"
بصت علا لهدوم البيت اللى هى لابساها... وبصت لوقفتهم مع بعض
"هتسيبينى واقف كتير ع الباب"
"انا عايشة لوحدى يا حسام...مينفعش.."
قاطعها حسام وهو بيدخل جوه البيت وبيقفل الباب وراه
"ينفع... انتى هتبقى مراتى وانا عايز اقعد اتكلم معاكى"
وقفت علا مكانها ساكتة...متفاجئة...مصدومة
حسام داخل وبيبص حواليه
"البيت اتغير كتير عن اخر مرة جيت فيها"
علا واقفة مكانها
"مالك ياعلا...مش معقول تكونى خايفة منى"
"اتفضل يا حسام فى الصالون...هغير هدومى واجى"
"مفيش داعى...انا مش غريب ياعلا ولا انتى لابسة حاجة تتكسفى منها"
قعدوا مع بعض... علا قاعدة بعيد عنه
"وحشتينى ياعلا"
"لو وحشتك صحيح مكنتش قعدت كل ده متكلمنيش"
"كنت بفكر فى كلامك"
"لو كنت بتحبنى مكنتش فكرت"
"لو...انتى عندك شك انى بحبك"
"تفكيرك اننا نتجوز هو اللى شككنى فى الحب ده"
قام حسام يقعد جنبها...قامت وقفت بعيد
"معقول انتى خايفة منى بجد؟؟"
"وجودنا مع بعض كده مش مريحنى"
"ليه ياعلا... انا مش صغير ومش ممكن اضرك...انا جاى نتفق مع بعض على كل حاجة"
قعدت علا وفرحتها بدأت تغلب توترها
"انا يا ستى بتقدم لك لتانى مرة فى حياتى...موافقة تتجوزينى"
ضحكت علا بفرحة
"طبعا ياحسام"
"وطلباتك اوامر"
"انا ماليش اى طلبات ومش عايزة حاجة"
"لا طبعا انتى عروسة وحقك تتشرطى"
"والله ما عايزة غير وجودك جنبى بقية حياتى"
وارتبك حسام من كلمة علا
"علا... انا لازم اكون صريح معاكى... احنا لازم نتجوز فى السر"
وبصت له علا باستغراب...وهو كمل
"مش هقدر اواجه مروة وماما بجوازنا وف نفس الوقت مش قادر استغنى عنك...السر ده هيبقى من ناحيتى انا بس انما انتى هتقولى لجيرانك واصحابك القريبين بس...انما انا مش هينفع اقول لحد...اوعى تقولى لأ ...انا عارف ان من حقك ان اعدل بينكم ...ومن حقك انى اقعد معاكى بس مش هينفع...هبقى اجيلك ونبقى كل فترة نسافر مع بعض كام يوم نبقى مع بعض وبس انما حياتنا مش هتبقى زى اى زوجين عاديين...ارجوكى متقوليش لأ"
علا مقدرتش تتكلم خالص...كانت بتسمعه وبس
"علا... ساكتة ليه...اعتبر السكوت علامة الرضا صح؟"
"انا ساكتة علشان بفكر...من 14سنة كنا هنتجوز قدام الدنيا كلها وكان هيتعمل لنا احلى واكبر فرح وكنا هنقضى السنين اللى فاتت دى مع بعض....يوصل بينا الحال اننا نتجوز فى السر ونشوف بعض حسب الظروف ونسافر علشان نهرب من اللى حوالينا"
"ظروفنا كده ياعلا... مش احسن مانفضل بعاد عن بعض طول العمر... انا هقبل بظروفك وانتى اقبلى بظروفى علشان حبنا"
"ظروفى ايه اللى هتقبل بيها...انا معنديش حاجة تمنع جوازنا"
"من غير ماتزعلى فكرة الاختلاط والشغل ومظهرك ده اللى مش عايزة تغيريه مضايقنى اوى بس عارف انى مش هقدر اقولك اقعدى من الجورنال علشان مقدر ان ده شغلك ونجاحك...علشان خاطرى قدرى ظروفى ومتطلبيش منى اللى فوق طاقتى"
علا ساكتة مش عارفة تفكر... عقلها بيقولها لازم تاخد حقها فى حبها وتطلب الجواز قدام الناس كلها
وقلبها بيقولها توافق وتعوض حرمان السنين بعيد عن الناس
حسام شاف سكوتها...حس بحيرتها
قرب منها...قامت وقفت... وقف قصادها ...مسك ايديها... قربها منه... خدها فى حضنه
علا ضربات قلبها سريعة.. ياما حلمت بنفسها ف حضن حسام ولاول مرة حلمها بيتحقق فى الواقع
حست برغبة فى الاستسلام ليه...حست بتلاقى الشفايف
بعدت عنه بسرعة وهى بتنتفض من القلق والخوف من الاستسلام
"امشى دلوقتى يا حسام لو سمحت"
"بتطردينى؟؟"
"لا مش قصدى... انا خايفة"
"منى؟؟"
"لأ... من ضعفى قدامك"
راحت وقفت على باب الصالون... راح حسام ناحية الباب
"علا انا بحبك... متحطيش عوائق مالهاش لازمة بيننا"
"حاضر..موافقة"
وسألها حسام للتأكيد علشان مش مصدق
"موافقة !!!على ايه بالظبط؟؟"
"موافقة على الجواز"
"بجد يا علا"
هزت علا راسها والدموع فى عينيها
"انتى زعلانة علشان هنتجوز"
"زعلانة علشان ظروفنا فرضت علينا نتجوز بالطريقة دى...نفس المكان ده من 14سنة وقفنا هنا وكان عليا الاختيار بين السفر او انى افضل هنا...اخترت انى افضل وسيبتنى... اتعذبت كتير بعدها ومش عايز اكرر العذاب ده تانى"
"طول ما احنا مع بعض ياعلا خلاص مفيش عذاب تانى... جهزى نفسك نكتب الكتاب ونسافر اى مكان نقعد اسبوع بعيد عن كل الناس"
"مش هينفع نسافر ياحسام"
"تانى مش هينفع تسافرى؟؟"
"انا عندى برنامج جديد هبدأه كمان 3 ايام"
"برنامج؟؟؟ برنامج ايه ياعلا وليه مقلتليش"
"برنامج جديد وعلى قناة تانية غير اللى كنت فيها...اما ليه مقلتلكش فانا بقولك اهو"
"مش مهم البرنامج يا علا وكفاية شغل الصحافة"
"ليه"
"هتتعبى وكمان هنشوف بعض امتى لما تبقى بالنهار فى الجورنال وبالليل فى التليفزيون"
"اولا الشغل مبيتعبنيش ثانيا اكيد هنلاقى وقت نشوف فيه بعض...ما انت هيبقى وراك شغلك وبيتك ومراتك وولادك ومع ذلك شايف اننا هنلاقى وقت نشوف بعض"
"اااااه... من اولها هتمسكى لى مراتى وولادى ذلة"
"لا مش كده....بس ده شغلى وانت عارف انا بحب شغلى قد ايه...وبعدين انت مش لسه من شوية كنت بتقول راضيين بظروف بعض"
"طيب ياعلا... انا مش عارف مين اللى بيبقى ضعيف قصاد التانى...انتى اللى بقولك حاضر وطيب على كل حاجة حتى لو عكس اللى انا عايزة وبقبل وارضى"
"حبنا هو اللى بيخلى كل واحد فينا يتنازل للتانى...وعن طيب خاطر"
"يعنى مش هنعرف نسافر فى حتة بعد كتب الكتاب"
"انت ممكن تقول انك مسافر وتيجى تقعد معايا هنا وانا اخد اجازة من الجورنال ويبقى على قد معاد البرنامج بس مش اكتر وارجعلك على طول"
"خلاص يا علا اتفقنا... اول حلقة امتى"
"يوم السبت... والجمعة بيكون اجازة"
"يبقى الخميس الجاى كتب الكتاب ...بعد 10 ايام..اتفقنا"
"اتفقنا يا حسام"

علا فى الجورنال...خارجة من مكتبها
قابلت وحيد داخل
"وحيد ازيك"
"الحمدلله ياعلا انتى عاملة ايه"
"الحمدلله... انت جيت من السفر ولا مسافرتش"
"لا لسه مسافرتش...هسافر كمان كام يوم"
"طيب انا عايزة اقعد معاك...عايزة اكلمك فى موضوع مهم"
"معلش ياعلا انا مستعجل اوى دلوقتى...اشوفك بالليل"
"لا بالليل عندى اول حلقة من البرنامج الجديد"
"مبروك"
"الله يبارك فيك... اتصلت بيك امبارح على فكرة"
"اه ياعلا معلش كنت مع تامر عند الدكتور وخلصنا متأخر ومعرفتش اكلمك"
"طيب هشوفك امتى ...لازم نتكلم"
"انا اليومين دول ملبوخ فى حكاية العملية والتحضير للسفر...وبتابع مع الدكتور هنا والمستشفى ف المانيا...معلش استحملينى الفترة دى"
"ولا يهمك يا وحيد...المهم ابنك يبقى كويس وعينيه تبقى كويسة ان شاءالله"
"يارب ياعلا...خلى بالك من نفسك"

علا وداليا فى بيت علا...علا بتكمل الميك اب بتاعها
"يعنى لسه مقلتيش لوحيد انك مش هترتبطى بيه"
"اعمل ايه..حاولت اقوله بس هو مكنش فاضى"
"وافرضى سافر ومعرفتيش تقوليله"
"ماهو الكلام ده لا ينفع اقولهوله ف تليفون ولا باستعجال...لازم اقوله بطريقة متجرحوش"
"وهتقوليله انك هتتجوزى حسام"
"لأ"
"ليه"
"مش هقول لحد خالص غيرك انتى واحمد وليلى وعصام وجيرانى بس ...انما فى الشغل محدش هيعرف"
"فكرتى كويس ياعلا"
"لأ"
"لأ مفكرتيش؟"
"ايوه مفكرتش ... كل اللى فكرته الحرمان اللى عيشته طول السنين اللى فاتت...عايزة اعيش مع اللى بحبه شوية حتى لو كام ساعة فى اليوم بس اهو نبقى مع بعض وخلاص"
داليا ساكتة ...علا خلصت
"انا كده خلصت"
"طيب يالا هنزل معاكى وهبقى اكلمك بعد الحلقة"

فى الاستوديو...وبعد الحلقة ما خلصت
علا واحمد بيسلموا على الضيوف
علا"فرصة سعيدة يادكتور"
احمد"شكرا يادكتور انك نورتنا"
مشى الضيف... علا واحمد واقفين
"حلوة الحلقة ياعلا... بداية مبشرة"
"ياخسارة اننا متكلمناش عن السياسة النهاردة"
"يا ستى هى السياسة هتسيبنا...بس خلى موضوعاتنا منوعة علشان نكسب اكبر قدر من الجمهور"
"ان شاءالله...يالا همشى انا واشوفك بكرة"

علا داخلة مطعم هادى...دورت بعينيها لحد ماشافت حسام
راحت ناحيته
"اتأخرت عليك ياحبيبى"
"انتى يعنى هتقطعى نفسك"
قعدت علا
"فى ايه ياحسام...هى دى مبروك بتاعتك"
ورن موبايل علا...ردت
"الو...الله يبارك فيك...شفت الحلقة..ايه رأيك... ربنا يخليك ياوحيد... لا لسه مروحتش... مسافر امتى...تروح وترجع بالسلامة... مع السلامة"
"ده اللى جالك المطار"
"اه"
"وبتتكلمى معاه كده ليه...ايه الحنية دى كلها"
"بيكلمنى يقولى مبروك...اللى انت مقلتهاش"
"والله ياعلا ماعارف اقولك ايه ولا ايه من كتر اللى بتعمليه... واحد كان عايز يخطبك وبيكلمك وانتى بتكلميه بكل رقة وحنية"
"وايه تانى ياحسام"
"الموضوع الزفت اللى كنتى بتتكلمى فيه فى البرنامج....قاعدة تتكلمى مع راجل فى كلام ميصحش يكون بين راجل وست اغراب"
وضحكت علا بسخرية
"انت طبعا بتهزر صح؟؟"
"اهزر ايه...انا قاعد محروق دمى وانتى بتقولى اهزر"
"كلام ايه اللى قلته ميصحش...الموضوع كان عن الخيانة الزوجية وده دكتور نفسى وكان بيشرح ايه اسباب الخيانة...ايه اللى اتقال بقى ميصحش"
"كلام عن العلاقة بين الزوجين ياعلا...قاعدة تتكلمى فى الكلام ده مع راجل وبيسمعك ملايين"
"والله انا متكلمتش معاه فى حاجة خاصة...كل الكلام كان علمى"
"بلا علمى بلا ادبى بقى.... السياسة كانت ارحم"
وقامت علا
"طيب ياحسام...الله يبارك فيك وان شاءالله الحلقات الجاية تعجبك اكتر...سلام"
قام وشدها من ايديها
"رايحة فين"
"ماشية...ايه اللى يقعدنى قدام الناظر فى المدرسة"
"بتتريقى عليا"
"لا ...برحم نفسى من وجع الدماغ ...عايزة امشى"
"متمشيش... انتى كمان بتتقمصى"
وقعدت علا
"بص ياحسام... مبحبش حد يتدخل فى شغلى خالص ده اولا ...تانى حاجة لو مش واثق فيا متتجوزنيش..ثالثا علاقتى بزمايلى مش هتتغير وكل اللى يربطنى بالناس علاقة احترام مش اكتر...وانا همشى دلوقتى ومتوقفنيش لو سمحت ... لو هتقدر تستحمل شخصيتى وشغلى على معادنا يوم الخميس...مش هتقدر تستحمل يبقى كأننا متقابلناش... وابقى عرفنى ردك...بعد اذنك"
ومشيت علا وسابت حسام قاعد مكانه

علا فى بيتها...وداليا معاها... بيفرشوا الاوضة بفرش جديد
"مبروك ياعروسة..عايزة ازغرط لك يالولو بس عندى برد"
"ولا يهمك يادودو ...المهم الفرحة...متتخيليش انا فرحانة قد ايه خصوصا ان يوم ما اتخانقت مع حسام قبل ما ارجع البيت كان بيكلمنى يصالحنى...انا مبسوطة اوى...حاسة انى رجعت تانى بنت ال20"
"ربنا يسعدك يارب...انتى معادك عند الكوافير الساعة كام"
"6"
"والمأذون؟؟"
"9"
"طيب كويس...انا ألحق اعملكم عشا فاخر كده يليق بالعرسان واجى معاكى الكوافير...علشان بعد المأذون ما يمشى مش هلحق اعمل حاجة... هيبقى العروسة للعريس والجرى للمتاعيس يا لولووووو"
"هههههه بس يابت بتكسف"

مروة بتجهز لحسام شنطته...خرج من الحمام وبدأ يلبس
"مش عايزنى اجى اوصلك المطار برضه يا حسام"
"معلش ياحبيبتى...علشان ابقى متطمن عليكى ومترجعيش لوحدك"
"طيب خلى بالك من نفسك"
"ان شاءالله... انا سايب لك فلوس هنا لو احتاجتى...لو عايزة اكتر معاكى الفيزا"
"ماشى يا حبيبى...انا بالليل رايحة مع رحمة عيد ميلاد صاحبتها"
"خدى سيف معاكم علشان متبقوش لوحدكم"
"حاضر"
"انا هروح اسلم على ماما واجى اخد الشنطة وانزل اسلم على الولاد تحت"

فى بيت علا... المأذون قاعد بيحضر اوراقه
حسام قاعد وجنبه عصام واحمد
وعلا قاعدة جنبها ليلى وداليا
ونظرات حب متبادلة بين علا وحسام


مروة راجعة فى تاكسى مع رحمة وسيف من عيد الميلاد
التاكسى ماشى من تحت بيت علا... تلمح مروة عربية حسام
تلتفت وتحقق فى العربية...توقف التاكسى وتخليه يرجع لحد جنب العربية...تبص كويس على رقم العربية
سيف"مش دى عربية بابا"
متردش على سيف
ترجع بذاكرتها ليوم خطوبة علا وحسام...وتفتكر ان ده البيت اللى جيت تحضر فيه الشبكة... واللى مقدرتش انها متحضرهاش زى ما اتحججت ومحضرتش قراية الفاتحة
نزلت من التاكسى وهى خايفة من شكوكها
رحمة ف ايدها وسيف نزل وراها
طلبت من السواق انه يستناها... ودخلت العمارة

المأذون بيقول خطبة صغيرة قبل اجراءات العقد
جرس الباب رن...راحت داليا تفتح الباب
نظرات الكل متجمعة على الباب وعلى الضيف الغير منتظر
تفتح داليا الباب.... تظهر مروة وهى شايفة حسام وعلا قاعدين جنب المأذون
حسام يشوفها...وفى ايديها رحمة وجنبها سيف
يقوم بسرعة يقف... تتفاجئ علا..وتستنى تشوف رد فعله
تصرخ فيهم مروة
"خاااااين يا حسااااااام... كذااااااب... وانتى عايزة منه ايه بعد كل ده...سابك زمان بتجرى وراه ليه دلوقتى"
علا"حسام...رد عليها"
مروة"ولا يرد عليا ولا عايزة اسمع صوته... خليهولك"
ونزلت مروة تجرى ومعاها ولادها
علا بتبص لحسام مستنية اى رد فعل منه
حسام "انا هلحقها وارجعلك ياعلا...خليك يامولانا...كتب الكتاب هيتم...بس اطمن عليهم"
نزل حسام بسرعة قبل ما يسمع من اى من الموجودين رد
شاف مروة بتكرب التاكسى...اخد عربيته وراح وراها
                                *************
مروة داخلة الفيلا بتعيط...حسام دخل وراها
"استنى يامروة"
طلعت مورة على السلم
"مرووووووووووووووووة"
وردت عليه من فوق وهى كل كلامها بصراخ
"عايز منى ايه...مش رايح تتجوز...روح لها يا حسام...يا خسارة كل اللى عملته علشانك طول السنين اللى فاتت ووقوفى جنبك"
"ايه اللى عملتيه يامروة... انتى عايشة احسن عيشة وعمرى ما زعلتك ولا عمرك شيلتى هم"
"علشان مكنتش بشتكى ابقى كنت مبسوطة...سافرت وسبت امى علشانك...عشت فى بلد غريبة علشانك...لما حصلت حادثة برج التجارة كنت بتشتم فى الشارع ويتقالى ارهابية لمجرد انى محجبة ومكنتش بحكيلك علشانك... امى ماتت وانا بعيد عنها علشانك... كنت بحس بالغربة والوحدة ومتكلمش علشانك...بعد ده كله رايح تتجوز عليا...روح لها ياحسام انا مبقتش عايزاك... ياولاااااااااد يا سيييف يا معاذ يارحمة... ابوكم من النهاردة راح لواحدة تانية واحنا هنرجع بيت ابويا...من النهاردة مش عايزة اشوفك تانى ياحسام.... خلاص مبقاش يربطنا حاجة ...روح كرر اللى عمله ابوك زمان... وولادك شاهدين على اللى عملته فيا... انا هاخد ولادى ومش عايزينك...فاهم مش عايزينك...يالا يا ولاد"
حسام واقف فى نص الفيلا...وشايف ولاده وهما سامعين كل اللى بيتقال...شافهم وهما بيروحوا ورا مروة لما نادت عليهم
مامته نادت عليه من فوق
"انا همشى مع مروة علشان انا اكتر واحدة حاسة بيها.... عملت نفس اللى عمله ابوك زمان فيا... حسبى الله ونعم الوكيل فى الظالم"

وقف حسام فى نفس المكان مبيتحركش... وهو شايف مروة ومامته وولاده بقوا فى صف واحد ضده

حس الدنيا كلها بتلف بيه... وألم شديد فى صدره
مقدرش يتنفس..النفس بيروح واحدة واحدة... ووقع فى مكانه

هناك 34 تعليقًا:

  1. تحفه اوي الحلقه بجد تسلم ايديك يا سكر

    ردحذف
  2. جميلة وانا مع مرررررررررررررررررررررررروة

    ردحذف
  3. gazma 7ossam da

    ردحذف
  4. نهار مهبب ومطين دي حاجة متوقعة جدا

    ردحذف
  5. الحلقة جاااااااامدة جدا بس كنت مستني احداث اكتر من كده

    ردحذف
  6. تسلم ايدك الحلقه حلوه اوى بس يا رب ما يموت D:

    ردحذف
  7. اوباااااااااااااااااااااااااااا جامده مووووووووووووووووووووووووووووووووت

    ردحذف
  8. اوبااااااااااااا....اخص عليك يا حسام انت وعلا

    ردحذف
  9. rbna yostor :O

    ردحذف
  10. gmdaaaaaaaaaa awe y dina
    :D estmri

    ردحذف
  11. الحلقة تحفة كالعادة يا دينا و كنت هازعل اوي لو اتجوزوا لان ده تصرف اناني و ظلم كبير لمروة اللي فعلا مالهاش ذنب و انا بتوقع ان علا هتفوق و ترجع لوحيد و حسام هيندم و يتأسف لمروة

    ردحذف
  12. دينا بجد حرام مروة ملهاش ذنب وحساااااااااام غلطان واقولك مروة كمان غلطانة علشان بتتكلم قدام اولادها






    رودى

    ردحذف
  13. ياااااااااااااااااااااااااااااااااااااااااااااااااااااااه هو لسه فى الدنيا حلاااااااوة كده !!!! يا استاذة دينا قسما بالله حرام موهبتك دى متتعملش مسلسلات و افلام ...

    ردحذف
  14. to7faaaaaaaaaaaaaaaaaaaaaaaaaaaaaaaaaaaaaaaaaaaaaaaaaa

    ردحذف
  15. هو حسام هيودع ولا اييييييييييييييه

    ردحذف
  16. Howa leh kolo byshtm fe 7osaam !
    Ma3a en howa fhm mara abl l gwaz eno lsa by7b ola we hya wf2et ! Tt7ml
    We kaman 3ady lw etgwz l 2 feha a y3ny xP xD

    ردحذف
  17. صلللللللللللللللي :D لالالا الا حسام مايموتش لالالالالالالالالالالا :( يارب مايموت اهئ اهئ اهئ كنت عايزاهم يتجوزوا

    ردحذف
  18. جميلة اوووووووووووى يادينا تسلمى

    يــــــــــــــــا رب بكـــــــون خير الحلقة الجاية !!

    (◕ ◡ ◕)(◕ ◡ ◕)(◕ ◡ ◕)(◕ ◡ ◕)

    ردحذف
  19. يستاهلو هما الاتنين اللى هيجرالهم عششان محدش يقدر يقف قدام النصيب والقدر..كانو لازم يستسلموا للأمر الواقع انهم مينفعوش لبعض...حسام هيمووت

    ردحذف
  20. جميييييييييييييييله جدا جدا جدا يا ريت حسام يعرف قيمه مروه

    ردحذف
  21. marhaba ilhal9a raw3a ya dina tislam idik machailah 3alik ana bchouf inou marwa min awal kant bi ta3raf inou housam mabihibahach wi biyhib 3ola ohiya min awil marji3t kant khayfa min inou yt9abil ma3aha ya3ni inaha 3arfa inou ida t9ablou rah yhnou liba3d marwa kant min awil trifd zawaj min housam 3achan matit3arad liha maw9if
    AMIRAT MAGHREBE

    ردحذف
  22. سواء اتجوزها او متجوزهاش ممكن مروة متوافقش انها ترجع اصلا مع انه لو تعب جامد جايز تتنازل
    اينعم انا شايفه ان جوازهم غلط بس ده كان حق علا من زمان
    جميله جدا يا دودو
    م.أ

    ردحذف
  23. حسام هايتعب و ينقلوه المستشفى و علا مش هاتعرف و هاتفتكر انه سابها و كرامتها هاتوجعها خصوصا ان الناس كانت موجوده. هاتكلم وحيد و تكمل معاه و لما تعرف ان حسام كان عيان هاتكون ارتبطت بحسام.
    كافة الميزان هى حب حسام و علا و جواز حسام و مروة

    ياريت تنزلى كذا حلقه يا دينا لو سمحتى

    ردحذف
  24. حسام ده جزمة و ميستاهلش اللى عملته مروة عشانه

    ردحذف
  25. روووووووووووووووووووووووووووووووووووووعة جدا :) :) :)

    ردحذف
  26. اوباااا اصحى يا حسااااااااااااااااام

    ردحذف
  27. هو اختار زمان مفروض يتحمل مسئوليه احتياره

    ردحذف
  28. مروه صعبانه عليا وعلا صعبانه علياااااااااا اعمل ايه بس يا ربى :'(

    ردحذف
  29. احسسسسسسسسسسسسن يا كلب يا خاين يا زوباااااااااااااااااااااله ضربه فى قلبك

    ردحذف
  30. هو غلطان من الاول يتجوز مروه ليه

    ردحذف
  31. انا متوقعة انوها يموت من بدرى

    ردحذف
  32. فعلا كما تدين تدان زمان مرضيش يسامح ابوه ويوم ما قابله سمعه كلام واهانات وحسسه بالندم اكتر ومرضيش يسامحه وهو بيموت ودلوقتي عمل نفس اللي عمله وولاده هيروحوا مع مامتهم وربنا هيعرفه اللي عمله في ابوه وكمان زي ما اتوقعنا في الاول اللي مالوش خير في اهله ملوش خير في حد اهو قرر يتجوز من ورا مراته دا غير انه زمان قرر يسيب حبه علشان شغله وانانيته ودلوقتي راجع يصلح الغلط بغلط اكبر وهو اصلا كبر ومريض ومبقاش في عمره كتير :/ ،بس بجد تسلم ايدك فنانه بجد :*

    ردحذف

قول رأيك بلاش تقرا وتقفل من سكات...ارائكم تهمنى