السبت، 5 يناير 2013

الحب على كفة ميزان... الحلقة 1

الحلقة 1
علا قاعدة على المكتب فى اوضتها... وراها النتيجة
الجمعة 19سبتمبر 1997
وساعة الحائط 1 صباحا
يرن تليفون البيت... تقوم علا تجرى من اوضتها
تمر بطرقة طويلة فيها فيها اوضتين مقفولين والليفنج
لحد الصالون اللى بعيد ...بعد ما وصلت للتليفون ردت بسرعة
"الو... ازيك انت... تليفون اوضتى معرفش ماله مرنش ليه فجيت ارد من الصالون... كويسة الحمدلله وانت عامل ايه؟؟..كنت بكتب شغل بكرة... اه بكرة طبعا رايحة الجامعة ده اول يوم... هحضر اول محاضرة بس... المهم احكيلى يومك كان عامل ازاى..."
وتدخل مامتها عليها
"بسم اللى الرحمن الرحيم...انتى هنا ياعلا"
"اه ياماما"
"انا سمعت صوت حد بيتكلم اتخضيت"
"انا كنت برد على التليفون"
"طيب انا داخلة اكمل نوم تصبحى على خير...وسلمى لى عليه"
علا ضحكت
"الله يسلمك"
خرجت مامتها من الصالون ورجعت اوضتها

مروة قامت من النوم ...بصت فى المنبه اللى جنبها 7ونص ...قامت تجرى على المطبخ
شافت مامتها فى المطبخ
"صباح الخير ياماما"
"صباح النور...ايه صاحية بدرى يعنى"
"اول سنة وانا فاضية ولا ورايا جامعة ولا حاجة قمت اتفرج على جو المدارس والناس صاحية بدرى اشمت فيهم شوية وارجع انام تانى"
"طيب افطرى معايا وبعدين نامى"
"حاضر... انتى بتحضرى ف ايه من بدرى كده"
"هعمل بط فقلت اقوم ابدأ من بدرى"
"الله... جوعتينى من دلوقتى"
"تاكليه بالهنا ياحبيبتى"
"ماما...حسام بيحب البط متخليهم ييجوا يتغدوا معانا"
"حساااام...آآآآآه"
"ايه ياماما...حسااااااام آآآآآه... فى ايه"
"ولا حاجة"
"هتصل بيه اقوله"
"ومستعجلة على ايه انا هتصل بيهم كمان شوية"
مستنتش رد وجريت تتصل بيه

حسام خارج من الحمام سمع التليفون بيرن
"الو...ازيك يا مروة"
"ازيك ياحسام...صحيت مش كده"
"اه ...ماانتى عارفة عندى جامعة النهاردة"
"مبروك"
"على ايه"
"مش دى اول سنة تدريس بعد الدكتوراه"
"اه الله يبارك فيكى يامروة"
"هنستناكم النهاردة انت وخالتى"
"تستنونا فين؟؟ هو احنا خارجين وانا معرفش"
"لا ...تعالوا اتغدوا عندنا النهاردة...ماما عاملة بط"
"بط..امممممم"
"هتيجى"
"مش عارف"
"لا هتيجى ...ماشى"
"مش عارف يامروة بجد...كلمى ماما واتفقى معاها...ثوانى انادى عليها"
"هزعل منك لو مجتش"
"اتفقى مع ماما...يالا بقى علشان ألحق البس وانزل ...ياماماااااااااااااااااا تعالى كلمى مروة"

حسام بيدخل قاعة المحاضرات
"صباح الخير"
قال تحية الصباح وبدأ يفتح شنطته ويطلع ادواته...وهو بيدور بعينيه بين الموجودين... بيدور ويبص فى ورقه ويرجع يدور تانى

بعد دقيقتين...سمع خبط ع الباب
علا"صباح الخير يادكتور...ممكن ادخل"
تردد حسام..يوافق على دخولها المحاضرة وممكن تتكرر من الطلاب ويفقد هيبته
ولا يرفض دخولها ويخسر وجودها قدامه طول المحاضرة
"اتفضلى...النهاردة بس مش هقول لحد متأخر لأ علشان اول يوم...انما بعد كده مفيش حد هيدخل ورايا"
علا ابتسمت بإحراج ودخلت قعدت وهى بتشاور لصحابها
                     *********************
فى نهاية المحاضرة
حسام بيقفل شنطته وبيخرج
الطلبة والطالبات بيخرجوا من القاعة
علا بتقوم بسرعة
احمد"استنى هنا رايحة فين"
علا"ثوانى وجاية"
احمد"ومعادنا"
فتحت علا شنطتها
"خد مفتاح العربية استنونى فيها"
داليا اخدت المفتاح
"يالا يااحمد"
احمد"ولو اتأخرتى؟؟"
علا"لو اتأخرت عن ربع ساعة سيبونى وامشوا"
احمد"ماشى...انتى حرة"
داليا"روحى انتى يا علا...خلاص بقى يا احمد"
جريت علا وسابتهم مكانهم

علا بتجرى ورا حسام...لحقته قبل ما ينزل السلم
"دكتور دكتور"
التفت لها حسام
"نعم"
علا مبتسمة"اسفة على التأخير"
"اتأخرتى ليه"
"راحت عليا نومة"
"ليه...نمتى امتى"
"الساعة 3ونص"
"ليه كده ياعلا انا مش قلتلك قومى نامى على طول"
"مش قمت اخلص الموضوع اللى كنت بكتبه"
كملوا كلامهم وهما نازلين مع بعض
"عندك محاضرات تانية النهاردة"
"عندى بس مش هحضر...انا جيت احضر محاضرتك بس ...ده اول يوم بعد الدكتوراة والصدفة ان اول محاضرة تبقى لرابعة"
"ماهو لولا زنك عليا مكنتش اخدتها بسرعة"
"ياحبيبى انا نفسى اشوفك انجح واحسن واحد فى الدنيا"
"وهو انا مش كده ولا ايه"
"كده ونص طبعا"
"مش هتحضرى ليه"
"رايحة المجلة"
"لوحدك"
"لا مع احمد وداليا"
"علا ..السنة دى لازم تركزى مينفعش التنطيط بتاعك ده"
"ده مش تنطيط يا حسام انت عارف انى بتدرب مش بلعب"
"يعنى تسيبى محاضراتك وتروحى المجلة ولا تفضلى سهرانة طول الليل تكملى مواضيع المجلة"
"معلش يا حسام همشى انا علشان احمد وداليا مستنيينى... هكلمك لما اروح"
"انا يمكن ارجع بالليل...معزومين عند خالتى النهاردة"
"خالتك؟"
"اه...مالك"
"لا ولا حاجة...روح اقعد مع مروة واتبسط"
"غيرانة؟؟"
كانوا بيتكلموا وهما واقفين بعد ما نزلوا
جريت علا
"باي يا حسام"

احمد وداليا فى العربية...احمد قادم الدركسيون وداليا جنبه
"اتأخرِت"
"يا ساتر عليك يااحمد ما تسيبها"
"الربع ساعة خلصت وهى ممكن تنسى نفسها معاه"
"اللى يسمعك يفتكرك غيران ولا حاجة"
بص لها احمد بتحذير
"هتستعبطى"
"اومال مالك فى ايه"
"ورانا معاد شغل ومكنش المفروض نيجى الجامعة الا لما نخلص معادنا الاول... انا همشى"
"اهى جت خلاص"
وشاورت على علا وهى جاية من بعيد
"مش عارفة هنلاحق على الشغل ولا الدراسة ولا نعمل ايه ولا ايه"
"انا مغصبتكيش ياداليا... مش كفاية بتتحركى بالعافية ف الشغل"
"اعمل ايه ...ما انا عايزة افضل معاك على طول"
وصلت علا عند العربية...نزل احمد وركب ورا
ركبت علا...واتحركوا كلهم

مروة ومامتها فى المطبخ
"ماما هنعمل ايه حاجة حلوة"
"فيه فاكهه"
"لا انا عايزة اعمل اى حاجة حلوة... بس هى خالتو اتأخرت ليه؟؟"
"هروح اتصل بيها واشوفها نزلت ولا لأ"
                          ******************
مروة ومامتها وحسام ومامته على السفرة
حسام"تسلم ايدك يا خالتى"
مروة"خالتك بس وانا لأ"
حسام"مش هى اللى عاملة الاكل"
مروة"والله العظيم انا عاملة اكتر منها حتى اسألها"
حسام بضحك"صحيح ياخالتى"
منيرة"اه يا حسام صحيح...مروة صاحية من بدرى وهى اللى طابخة معايا...وهى اللى قالت مناكلش البط لوحدنا"
حورية"تسلم ايدك يا مروة أكلك زى العسل"
حسام"لا بجد تسلم ايدك... الحمدلله"
قام حسام... وقفت مروة
"ايه ده بقى...قايم ليه"
حسام "الحمدلله ...خلاص مش قادر...انا هغسل ايدى"
مروة ومامتها منيرة وحورية ام حسام بيلموا السفرة
اتكلمت حورية بصوت واطى
"اقوله؟"
منيرة"اه لازم تقوليله طبعا"
مروة"استنى يا خالتى شوية... هو جاى مزاجه حلو وخايفة يقلب"
منيرة"اه والله معاكى حق يامروة"
حورية"اعمل ايه ماهو لازم يعرف"
مروة"لما تروحى يا خالتى بينك وبينه كده اتكلمى معاه... سيبيه قاعد هنا من غير ما يتعكنن الله يخليكى"
سمعوا صوت حسام خارج من الحمام
منيرة"هسسس ...حسام جاى"

حسام وحورية داخلين البيت
الساعة بترن 9 فى الساعة
حسام داخل على اوضته
"حسام عايزاك"
"طيب ياماما هغير هدومى واجيلك"

دخل حسام اوضته وقبل ما يغير هدومه...اتصل بالتليفون
"الو... ازيك يا طنط... ممكن اكلم علا... مجتش؟؟ لحد دلوقتى؟؟ ولا رجعت اتغدت ونزلت؟؟ يعنى فين طول النهار؟؟ طيب لما تيجى خليها تتصل بيا على طول...اول ما تيجى ياطنط لو سمحتى.. مع السلامة"
قفل حسام التليفون
"كل ده ... من الصبح فين ياعلا؟"
                          *******************
حسام طلع من اوضته بعد ما غير هدومه
مامته قاعدة مستنياه
"تعالى يا حسام... عايزاك فى موضوع مهم"
"خير يا ماما"
"هقولك...بس اوعدنى متتنرفزش ولا تتضايق وتاخد كلامى كده بالراحة"
حسام بقلق
"ليه يا ماما؟؟؟ انتى هتقوليلى ايه؟"

هناك 45 تعليقًا:

  1. جاااااااااااااااااااااااامدة جداااااااااا بجد تسلم الايادى
    وبداية مبشرة بالخير الصراحة :)))
    تسلم ايدك وع تعبك ديمااا

    amira slama

    ردحذف
  2. حلوه و شكلها هتبقي جامده كالعاده يا دينا

    ردحذف
  3. الظاهر مامته عايزه تجوزه مروه ولا ايه .الله واعلم.بدايه تجنن وشكل الاحداث هتبقى كتير منتظرين يا دينا بقصصك الروعه

    ردحذف
  4. امممممممممممم ما شاء الله القصه باينه من بدايتها انها راااااائعه ..

    ردحذف
  5. جامدة يادندون وشيقة للغاية بجد تسلم ايديكى وده العادى منك طبعا

    ردحذف
  6. ااااااااه ليه كدا بسسسس عاوزة اعررررف عاوزة تقول ايييه :D
    مستنيااااكي بفارغ الصبر بداية مشوقة
    آلاء الهواري

    ردحذف
  7. حلوة اوووووووووووووى يادندونة
    وشكل مروة بتحبه اوى وهيدايق من تصرفات علا
    منتظرين الخبر
    dody salah

    ردحذف
  8. حلوة اوي اوي وشيقة جدا في انتظار الحلقه الجديدة

    ردحذف
  9. Taslm aydek

    ردحذف
  10. 7elwa awyyyy ßÊ 3'areba ank rag3ty blzamn wara shaklk 3amlalna mofag2a Чά dondon ,,, 3ala fekra Άŋά mn elsamteen ฬ awl mara aktb ßÊ 3lshan 3arft an awl 7al2a btnazelha btb2y 5ayfa fa 2olt atmnk :)

    ردحذف
  11. الله يخليكم على الكلام الحلو ده
    انا فعلا ف بداية كل قصة ببقى متوترة اوى
    متحرمش منكم ولا من متابعتكم :) :)

    ردحذف
  12. لسة مش عارف أقول رأي دي البداية
    المهم مستني الحلقات الأخري لأبداء الرأي الفني والنقد البناء ههههههههه

    ردحذف
  13. شكلها كده شيقة اوي بس و النبي يا دينا طولي الحلقة شوية و بالتوفيق مقدما :)))))) ياسمين

    ردحذف
  14. حلوه جدااااااااااااااااااااااااااااااااااااااااااااااااااااااااااااااااااااااااا

    ردحذف
  15. جامدة يا دندن بالتوفيييييييييييق

    ردحذف
  16. جاااامده بجد

    ردحذف
  17. حلوه يا دندن

    ردحذف
  18. الحلقه الجايه امتى ان شاء الله

    ردحذف
  19. البدايه جامدة اووي يا دودي تسلم ايدك يا قمرايا

    ردحذف
  20. اهو لسه البداية بنتعرف على الاشخاص ان شاء الله تطلع قصة حلوة

    ردحذف
  21. hya mamto gylha 3ares wla eh xPxDD

    bs gamda ya dondon ;)

    hend

    ردحذف
  22. شكلها قصه حلوه كده و فيها احداث يامه اوى انا متوقع كده





    GaFaaR

    ردحذف
  23. الله يسامحك يا دينا انا كنت مبطله اقرا قصص عشان حالة الفضول اللي بتجيلي بعد كل حلقه دي بس غصب عني قصتك دي جت قدامي وقريتها والحاله رجعتلي تاني اعمل ايه انا دلوقتي ؟؟؟
    بس بجد مبدعه داااااااااائما وتسلم افكارك يا دندن

    ASMAA TAREK

    ردحذف
  24. 7elwaaaaaaaaaaaaaaaaaaaaaaaaaaaaaaaaaaaa aweee y Dina bs lel2sf h7awel atab3ha 3shan l exams bs akeed msh h2dr

    ردحذف
  25. atab3ha b3deen *

    ردحذف
  26. بداية مبشره كالعاده يا دودو

    ردحذف
  27. يلا بينا

    ردحذف
  28. shklha by2ol enha gamda w tb3n de mesh haga gdeda :D
    7lwa awe el 7l2a bgd keep going dina :):)

    ردحذف
  29. جاااااااااااااااامده اوى ايوة كده الحلقات السخنه من الاول

    ردحذف
  30. اسم البطل وقربته صدموني انهارده :(
    وكنت خايفه لتطلع قربته هي اللي بيحبها فعلا وقتها هحس انك بتجسدي واقع قدامي بقاله سنين ربنا يستر شكلي هديكي القصه بعدين تنشريها لانها من حكايات العجيبه فعلا بكل ما فيها :(

    ردحذف
  31. جميلة اوي يا دينا
    يمنى

    ردحذف
  32. كالعادة راااااااااائعة بحق ... الميزة فيها ان الواحد مجمع الاسامى من الاول :) :)

    ردحذف
  33. حلوة اوي
    علي فكره انا لسه شايفة البيدج من قريب و دخلت علي المدونة قريت كل قصصك وكلهم احلي من بعض

    ردحذف
  34. جمييييييييييييييله انا مستنيه الحلقه الثانيه

    ردحذف
  35. حلوه اووووووووووووى يا دندنتى مستنيه الحلقه التانيه بفارغ الصبر

    ردحذف
  36. وينتا بتنزلي كل حلقة ؟

    ردحذف
  37. جميلة وعجبتني وتسلمي

    ردحذف
  38. بصى بسقفلك اهو دلوقتى وبرررافووو عليكي بجد انتى مبدعة برافو يادندن وقصصك علطول هايلة واوعى تخافى او تتوترى من حاجة لانك كاتبة هااايلة

    ردحذف
  39. كالعاده طبعااااااااااااااااااااا
    واااااااااااااااااااااااو .. مفيش كلاااااااام
    sama

    ردحذف
  40. حلوه جداا ومشوقه جدا

    ردحذف
  41. 7lwa gden w moslya w mshw2a w fkrtha lzeza

    ردحذف
  42. كثيييييييييييييييييييييييييييييييييير حلوووووو

    ردحذف

قول رأيك بلاش تقرا وتقفل من سكات...ارائكم تهمنى