الأربعاء، 2 يناير 2013

جوه البيوت... الحلقة 30 والاخيرة

الحلقة 30 والاخيرة
نور نايمة فى اوضة جودى وهى بتعيط
وبتستعيد الموقف اللى حصل
لما سألت مراد باستغراب
"انت بتشك فيا !!!!!!!!!!"
سكوت مراد كان تأكيد لشكه فيها
عيطت نور وهى خارجة من الاوضة...وفات اكتر من ساعة وهى ف السرير جنب جودى بتعيط
جودى بتكح وصحيت من النوم
"عايزة اشرب"
قامت نور تجيب كوباية مياه لجودى...ورجعت
شافت مراد جنب جودى بيكلمها
"لسه تعبانة؟؟"
"اه يا بابا زورى بيوجعنى"
باسها من راسها وهو بيطبطب عليها
"ربنا يشفيكى ان شاءالله"
تجاهلت نور وجوده...لاحظ عينيها واثار الدموع عليها
ناولت نور جودى كوباية المياه
قام مراد من جنب جودى وقعدت نور مكانه
مراد واقف متردد...ونور نفسها تكلمه ومش قادرة بعد شكه فيها
"لما جودى تنام تعالى عايزك"
"خير"
"لازم نتكلم"
قالها وخرج من الاوضة
                           ***************
نور داخلة اوضتها بتتسحب..خايفة يكون مراد نايم فتصحيه
شافته صاحى
"منمتش"
"مستنيكى"
"انا مصدومة فيك يا مراد... اخر حاجة كنت ممكن افكر فيها انك تشك فيا"
"وانا اخر حاجة كنت اتوقعها ان اكتشف انك على علاقة بسامى"
"اييييييه؟؟ سامى؟؟؟ سامى صاحبك؟؟ وعلاقة ايه اللى هتبقى بينى وبينه...انت ازاى اصلا خيالك يصورلك حاجة زى كده... انا؟؟"
"صورتك عنده ع الكمبيوتر بتعمل ايه"
"صورة ايه؟؟ مش حضر كتب كتابنا يمكن صورنا مع بعض"
"صورتك انتى ...صورة ليكى لوحدك عنده"
"يبقى تسأله هو متسألنيش انا؟ وانا كمان عايزة اعرف ايه اللى مخلى صورتى عنده"
"يعنى انتى متعرفيش عنها حاجة"
"لا معرفش... مش مصدقنى؟؟"
سكت مراد... حست نور بالاهانة من سكوته... خرجت من الاوضة وسابته

تانى يوم رقية بتنضف البيت... وبتطلع فرش من اللى كانت حاطاه فى الجهاز بتاعها لجوازها ... وبتفرش الاوضة
راحت لفوقية اوضتها
"ماما...قومى كده شوفى الاوضة...لو كان فيه وقت كنت غيرت الستاير ...انا هنزل اجيب مشايات جديدة للاوضة "
"هو كمان مش هيجيب حتى دبلة؟"
واتفاجئت رقية بكلام مامتها فى ناحية تانية خالص
"انا بكلمك على الاوضة وانتى بتكلمينى على الدبلة...اكيد هيجيب"
"مش باين"
"ليه كده ياماما... مستخسرة فيا افرح"
"يا بنتى انا خايفة عليكى... انا لما اموت مش هيبقى لك حد خالص لا اب ولا اخ... والجوازة دى مش مريحانى"
"متخافيش ياماما... ربنا يديكى الصحة ويخليكى ليا"
"ما تراجعى نفسك"
"ياماما انتى ليه مش حاسة بيا...انا ماصدقت انى هتجوز...انتى لو تشوفى نظرة زمايلى ليا وكلامهم وطريقتهم...لما تكون واحدة هتتجوز يقعدوا يتوشوشوا وميتكلموش قدامى خايفين لاحسدها... والمتجوزة تيجى تقولى ده انتى ف نعمة وتحكى لى مشاكلها علشان مبصلهاش وطبعا لما تكون مبسوطة ومفيش مشاكل متتكلمش معايا ولا تحكى حاجة... واللى تخلف تحكى للمتجوزين ومخلفين عن ابنها ولا بنتها ومتوجهليش كلام وكأنى ماليش اى صفة ولما مرة اتدخلت فى كلامهم عادى قالت لى وانتى تعرفى منين تعب العيال ووجع قلبهم... ده غير البنات الصغيرين اللى بيقولوا لى يا ابلة ..بقى معاهم عيل واتنين...سيبينى اتجوز وانا ونصيبى طلع كويس طلع وحش ابقى جربت زى غيرى"
"ربنا يجعل نصيبك احسن من غيرك"

مراد بيخبط على سامى... وبيرن الجرس
حس ان مفيش حد فى البيت... وهو نازل ع السلم
سمع الباب اتفتح وسامى بينادى عليه بصوت ضعيف
"مراد"
"افتكرت محدش هنا"
"مفيش حد غيرى وانا تعبان"
مراد صعب عليه سامى وف نفس الوقت احساسه بالخيانة مسيطر عليه...طلع مراد السلم اللى نزله... وسامى بيكمل
"تعالى...بتصل بيك من امبارح خايف تتصرف تصرف تندم عليه قبل ما تفهم"
دخل مراد وسامى بيمشى ببطء...قعدوا الاتنين
"يعنى انت عارف ان اللى حصل ممكن تطير فيه رقاب"
"نور مظلومة وانا هفهمك على كل حاجة"
"وانت عرفت منين"
"من اروى...بس اروى ليها حق ف رد فعلها انما انا مفيش بينى وبين مراتك اى حاجة غير انها مراتك وبس...يعنى مرات اخويا"
"وصورتها وسط صور البنات اللى تعرفهم معناها ايه"
                              **************
مراد وسامى فى السايبر... والباب نص مقفول
"دى المحادثات اللى بينى وبين رقية اللى كنت عارف شكلها انها نور... يوم حفلة المدرسة شفتها...اتغاظت ..لانى كنت عارف انت بتحبها قد ايه وافتكرت انها بتضحك عليك...زى ماانت شايف ف نفس اليوم واجهتها بالحقيقة... لقيتها مش عارفة حاجة انا افتكرتها بتستعبط...وده اليوم اللى حصل فيه الخناقة بينهم ونور كلمتك وقالت انها هتسيب البيت"
"ايه اللخبطة دى"
"انا كمان اتلخبطت... وبقيت محتار اللى بتكلمنى دى نور ولا رقية ولا الاتنين واحد... بس اتأكدت... ادى الاكونت بتاع رقية لحد قريب كان شغال يعنى نور كانت فى بيتك ورقية الاكونت اللى بتكلمنى منه مفتوح وشغال...وده اتأكدت منه يوم قراية فاتحتكم فى الوقت اللى كنتم بتقروا الفاتحة فيه رقية كانت قاعدة ع النت"
"يعنى مواجهتك ليها اللى خلت رقية تعرف اللى بينى وبين نور"
"ايوه.. وهى اللى بعتتلى صورة نور على انها صورتها"
"يعنى نور مكذبتش عليا لما بتقولى متعرفش صورتها عندك ليه"
"اكيد متعرفش..هتعرف منين"
مراد ارتاح لما اتأكد من براءة نور وسامى
"واروى هتعمل معاها ايه"
"بتصل بيها مبتردش عليا...مستنى اشد حيلى شوية واروح لها"
"طيب قوم اطلعك البيت ترتاح"

نور فى البيت... خلصت الغدا وأكلت جودى واديتها الدوا
سمعت صوت مراد داخل البيت... ودخل عليهم على طول
تجاهلته نور... قرب منها وباسها ...بصت له باستغراب
"وحشتينى...ايه بلاش"
"سبحان مغير الاحوال"
"بس مكنتش فاكر انك بتعرفى تزعلى منى"
"وانا مكنتش فاكرة انك تشك فيا"
حط ايده على بؤها
"شششش سوء تفاهم وخلص خلاص... مش هنتكلم فيه تانى"
"لما افهم"
"هفهمك كل حاجة... بس نتغدا الاول ممكن"

نور قاعدة مع مريم
"يخربيتك يا رقية كانت هتخرب عليكى"
"شفتى ؟؟ دى اكيد مش طبيعية"
"نفسى اروح امسك ف زمارة رقبتها"
"انا كمان قلت لازم اروح اعرف مامتها اللى بتعمله ده ...مراد قال لى بلاش ومش عايزين مشاكل معاهم علشان القضية"
"بس الصور اللى عندها...ممكن تعمل بيهم اى حاجة"
سكتت نور بتفكر
"اه صحيح...طيب وبعدين"
"مش لازم نسكت لها ...هى الصور دى ينفع تاخديها"
"ممكن تتمسح"
"خلاص احنا نروح لهم ونمسح اى صور ليكى هناك"
"مقدرش اروح الا لما اقول لمراد"
"طيب...قوليله النهاردة وانا هقول لهانى..حتى اخوكى وجوزك يروحوا معانا"

مايسة بتلبس وسمعت الباب بيخبط...راحت تفتح
اسماعيل داخل وشايل علب حلويات
جت هند تستقبله
"اهلا يا اسماعيل اتفضل"
"ازيك يا حاجة"
هند"الحمدلله... ليه بس شايل ومِحمل كده... مش لسه باعت لحمة وفراخ امبارح"
"دى حاجة بسيطة... علشان ناكل من ايديكى يا ست الكل"
هند"تسلم يااسماعيل...ادخل اقعد"
اسماعيل لمايسة"جاهزة؟؟"
مايسة"اه خلاص"
هند"انزلى يا مايسة بسرعة قبل العيال ما يشوفوكى ويشبطوا فيكى"
اسماعيل"والله ياحاجة كنت عايزك تيجى تتفرجى معانا"
هند"يا بنى ربنا يسهلكم اموركم وتلاقوا الشقة اللى تبقى قدم السعد عليكم...واختاروا الجار قبل الدار"
ارتبك اسماعيل من كلام هند وتلميحها
"ان شاءالله...يالا يا مايسة"

مراد وقف بالتاكسى ... ونزلوا هانى ومريم ونور
طلعوا كلهم على السلم...ولما وصلوا قدام الشقة
شافوا الباب مفتوح وزحمة
مريم"فى ايه؟؟تكون الست ماتت"
هانى"ماتت ايه مش شايفة الناس لابسين ملون"
نور"يمكن رقية بتتخطب"
مريم"تصدقى بقى لو بتتخطب يبقى حظك فى رجليكى يانور"
نور"ليه"
وانتبهوا كلهم لمريم
"لو رقية بتتخطب هدديها بحكاية كلامها مع صاحب مراد علشان تخلى امها تتنازل عن القضية"
سكتت نور وهى بتبص لمراد وهانى
مراد"هى فكرة...بس بلاش تنفذيها علشان حرام...بلاش فضايح"
هانى"مفيش قدامك الا كده يانور...علشان نخلص من موضوع القضية ده خالص"
دخلوا البيت كلهم... رقية كانت قاعدة جنب ناجى
فوقية لما شافتهم قامت وهى تعبانة
"نور!!!فين جودى حصل لها حاجة؟؟"
نور"لا متخافيش...جودى بخير"
فوقية"انتى جاية تباركى لاختك رقية...فيكى الخير...اهلا وسهلا اتفضلوا"
رقية شافتهم استغربت ... قلقت
نور قربت من رقية"مبروك"
مريم قربت من رقية"مبروك... تعالى عايزينك ف كلمتين"

مايسة بترتب هدومها فى شنطة ومامتها قاعدة جنبها
"كنتى مالية عليا البيت انتى والعيال"
"الله يخليكى يا ماما...بس بابا مكنش مرتاح"
"هو ابوكى كده لا بيرتاح ولا بيريح"
"معلش ...هنستحمله هنعمل ايه"
"ربنا يسعدك يا بنتى... ابقى خلى بالك من جوزك اهو طلع شاريكى وعمل اللى انتى عايزاه وجاب شقة احلى من الاولانية"
"والله يا ماما بقى كأنه واحد تانى... بس يارب يستمر"
"ان شاءالله...هو اتقرص من اللى حصله وعلشان كده فاق لنفسه"
"الحمدلله... انا ليا عندك طلب"
"خير"
"اتعرفوا على مرات مراد خلى شمل عيلتنا يتلم بلاش يبقى كل واحد فى وادى كده"
"مش مستريحة لها"
"جربى تشوفيها ...لو محبيتيهاش خلاص"
"طيب"
"لما اخلص فرش الشقة هعزمكم واعزمهم ونتجمع كلنا...وعليكى بقى تخلى بابا يوافق"
"ان شاءالله"

نور ومراد داخلين البيت وجودى معاهم
"انا مش مصدقة نفسى يا مراد...خلاص جودى هتبقى معانا على طول"
"الحمدلله...رب ضارة نافعة"
"فعلا... يعنى اللى عملته رقية وكان هيسبب لنا مشكلة هو نفسه اللى رجع لى جودى"
"علشان انتى نيتك خير"
"بس زى ما اتفقت معاهم هبقى اودى لهم جودى"
"طبعا... اى وقت عايزين يشوفوها تاخديها توديها او ابقى اوديها واجيبها"
"ربنا يخليك ليا يا حبيبى"
"ويخليكى ليا يا حبيبتى"

رقية بتدى لفوقية الدوا
"جوزك فين"
"لسه مجاش"
"هو بقاله يومين فين؟؟انتوا متخانقين؟؟ده انتم مبقالكوش شهر متجوزين"
"مفيش خناق ولا حاجة"
"اومال بايت بره يومين ليه"
عيطت رقية... استغربت فوقية
"فى ايه يا بنتى"
مسحت رقية دموعها بسرعة
"مفيش متشغليش بالك"
"يابنتى ريحى قلبى فى ايه"
"مفيش اتصالح هو ومراته الاولانية"
"يا مصيبتى"
"ولا مصيبة ولاحاجة"
"ازاى يعنى ولا مصيبة ولا حاجة"
"الشرع محلل له 4 وهو قال هيعدل بيننا"
"انا قلت م الاول مش مرتاحة للجوازة دى"
"النصيب يا ماما"

اروى بتفتح الباب...شافت سامى قدامها
"نعم"
"وحشتينى"
"نعم يعنى"
"ادينى فرصة اثبت لك انى اتغيرت ومش هعمل كده تانى"
"ولو اديتك فرصة مين ينسينى الوهم اللى كنت عايشة فيه"
"اللى بيحب بيسامح"
"اللى بيحب ميخونش"
"مخونتكيش والله ما خنتك...ده كلام وبس"
"الخيانة متتجزأش... كله عندى واحد..طلقنى يا سامى"
"مقدرش اطلقك..انا بحبك"
"وانا مبقتش احبك ولا احترمك...مع السلامة"
وقفلت الباب ودخلت...ونزل سامى وهو مكسور

مايسة واسماعيل فى شقتهم الجديدة
قاعدين بيتعشوا
"هما اهلك جايين امتى"
"كمان يومين"
"طيب ايه رأيك نشوف لك حد يساعدك فى البيت علشان تبقى متفرغة لى وللعيال"
"بجد؟؟"
"اه طبعا..انا عايز اريحك"
"ربنا يخليك...بس اسمع مش عايزة شغالة تقعد معانا وعينك تزوغ عليها"
"ههههه لا متخافيش ...اختاريها براحتك"
"انا عايزة واحدة تيجى الصبح وتمشى المغرب..كفاية عليها كده"
"عيونى ليكى...هدورلك"
"تسلم عيونك"

فى بيت مايسة...بعد الغدا...كلهم قاعدين
اسماعيل ومايسة بيرحبوا بيهم
صادق قاعد ساكت مش لاقى عيب يطلعه ف نور
نور"هتنورونا امتى... تتغدوا معانا الاسبوع الجاى"
هند وصادق بيبصوا لبعض
هند"ان شاءالله يا نور"
نور"هتنورونا والله... حضرتك يا بابا تحب اعملك ايه"
صادق استغرب
نور"لو تسمح لى يعنى اقولك يا بابا"
صادق"وماله"
نور"تحب اعملك ايه على الغدا"
صادق"اى حاجة يا بنتى"
مراد حس بنور وهى بتتودد من مامته وباباه
وهو قاعد جنبها قرب منها وف ودنها
"شكرا"

رقية مع ناجى فى اوضتها
"ايه يا ناجى ...هو ده العدل اللى قلت عليه"
"ايه مش بجيلك اهو"
"من ساعة ما اتصالحت مع مراتك وانت بتجيلى زيارات وخلاص... ايه الفرق اللى حسيته بعد الجواز من قبله"
"ظروفى كده"
"ظروفك انك تجيلى زيارات وعيشتك كلها مع مراتك الاولانية"
"ايوه...هو ده اللى ظروفى تسمح بيه"
"هى ده العدل..ده انت حتى مبتصرفش عليا كل فلوسك عليهم"
"هى معاها عيال ومبتشتغلش يعنى البيت محتاج مصاريف انما انتى مش محتاجة"
"انا عايزاك تعدل بيننا زى ماقلت"
"بصى يا بنت الناس...هى دى ظروفى يا تقبلى بيها يا زى ما دخلنا بالمعروف نخرج بالمعروف"

مشاهد صامتة
مايسة عند الكوافير... بتغير لون شعرها وقَصته
وبتتسوق فى مول وتشترى لبس كتير للبيت وللنوم
                     **************
فى بيت مراد ونور... هند وصادق قاعدين
ونور بتقدم لهم كيك وشاى
ونظرات الرضا من هند وصادق لنور
                  ***************
سامى قاعد فى السايبر ايده على خده
بيدخل مُحضر ويديله اعلان قضية خلع
                 ****************
مايسة فى اوضة نومها... فاتحة قناة التت
وبتحاول تقلد الرقاصة وتعمل زيها
شافت الرقاصة بترقص بعصاية...احتارت
خرجت من الاوضة ورجعت بإيد المقشة تقلدها
وهى بتقلدها وتدور العصاية فى الهوا
فى اللحظة اللى دخل فيها اسماعيل وخبطته ايد المقشة
شافها.. وفهم انها بتتعلم... مسك مكان الخبطة وهو بيضحك
                       ***************
نور ومراد قاعدين فى معمل تحاليل
يقوموا يستلموا النتيجة
وحركة شفايف الممرضة بتقول
"مبروك"
                        *************
هانى داخل البيت...بينادى على آيه
تيجى آيه ومريم يجروا
يحضن هانى آيه وهو بيديلها "شهادة النجاح"
                        ***************
سامى فى المحكمة... خارج من القاعة
اروى خارجة مع المحامى بتاعها
سامى بيقرب منها يكلمها... بتبعد عنه وتمشى عكس طريقه
                     ****************
رقية بتتقلب فى سريرها بالليل لوحدها
بتمسك دبلتها وتدورها فى صباعها وتبص لها
بتقوم تغير كيس المخدة المبلول من كتر دموعها

                   النهاااااااااااااااااااااااااية

 انتظروا القصة القادمة يوم السبت ان شاءالله
"الحب على كفة ميزان"

هناك 75 تعليقًا:

  1. رووووووووووووووووووووووووووعة

    بجد تسلم أيدك يا دوندون

    ردحذف
  2. جاااااااااااااااااااامدة و نهاية جميلة اووووى
    تسلم ايدك يا دينا

    ردحذف
  3. جااااااااااااااااااااامدة

    ردحذف
  4. روووووووووووووووووووووووووووووووعه ياااااااااااااادينااااااااااااااا

    ردحذف
  5. قصه جميله جدا. تسلمي

    ردحذف
  6. حلووووووووووووووة جداا النهايه
    مع انى زعلانه ع سامى واروى... ورقيه برضو صعبت عليا
    بس تسلم ايدك يا دينا.

    ردحذف
  7. طيب رقيه كده اتطلفت ولا ايه ؟

    ردحذف
  8. حلوة اوى ونهايتها مرضية جدا

    ردحذف
  9. الله عليك يا نور
    نهاية جميلة
    بس أروي المفروض تسامح سامي . دا هو الي انا كنت هقوم بدورة لو اتعمل مسلسل ههههههههه
    رااااااااااائعة

    ردحذف
  10. حلوه جدااااااااااااااااااااااااااا

    ردحذف
  11. رقية صعبت عليا اوي وسامي كمان بس علشان نور فرحت

    ردحذف
  12. انا زعلت اووى على اروى وسامى بس قصه خطيره وعجبانى مايسه اووى بس بصراحه يادندونه قصه جميييييييييييله
    هدير علوان

    ردحذف
  13. جاااااااامده اوى يادودى بس بجد سامى صعبان عليا اوووووووووووووووى هو اه خاين بس اروى قست عليه اووووووووووووى

    ردحذف
  14. لاااااااااااااااااااااا سامي وأروى حرااااااااااااااااااام

    ردحذف
  15. جامد اوي اوي اوي واكتر واحد صعب عليا سامي لان احنا طبعنا بنغلط عادي ومفروض تسامحه .. واكتر حاجة عجبتني قناه التت :D
    تسلم ايديك
    وانا عايزة قصة رعب كفاية رومنسي :D

    ردحذف
  16. بصراحة يا دينا هى حلوة بس محستش بالنهاية زى اى قصة تانية قراتهالك كانت محتاجة تكون اطول من كده لانك كنت بتنهى اكتر من قصة مش عارفة انا بقولك رايى بصراحة بس الحلقة الاخيرة مش زى مانا كنت متوقعاها بس اشكرك جدااااااااااااااااااااااااا على المجهود بجد انتى رائعة

    ردحذف
  17. جااااااامدة جداااااا جداااااااا .. زعلت على سامى و اروى بس فعلا دى النهاية الصح لان مش الكل بيعرف يساامح اللى غلط فى حقه .. بجد تسلم ايدك يا دودو

    ردحذف
  18. حلوه بس رأيي ان مراد مغلطش الغلطه اللي تخلي أروى ما تسامحوش عليها دا شات عادي مع بنات مش غلطه كبيره يعني

    ردحذف
    الردود
    1. انا عايزة بس حضرتك تجاوبنى على سؤال .. ياترى لو كانت هى اللى بتعمل شات مع رجاله واخد بالك من رجااااله دى وبتكلمهم من خط تانى كنت هتقولو بردو يسامحها ودا شات عادى مع شباب مش غلطة كبيرة يعنى ؟؟ ولا ردك كان هيبقى اى؟؟ حقيقى حابة اعرف

      حذف
  19. رووووووووووووووووووعة جدا
    نهاية واقعية لكل الابطال كل اخد جزاءه وده المفروض بجدجميلة اوى :) :) :)

    ردحذف
  20. تحففففففففففففففففففه اوى بجد تسلم ايدك

    ردحذف
  21. جمييييييلة اووووي يا دينا و نهاية جميلة لكل الاطراف ....اكتر موقف جسمي اشعر فيه و عنيا دمعت مشهد نور و هي بتتكلم مع صادق عجبني اووي اوي بصراحة ............. فرحت اووي اني قدرت اقرب من تفكيرك ههههههه اينعم هو سنة صغيرة خالص بس زي مااتوقعت امبارح انك هتخلي رقية تصعب علينا و بالفعل علي اد قوتها في الحلقات اللي فاتت علي اد ما صعبت عليا اوووي النهاردة انكسارها .........سامي و اسماعيل برغم انهم الاتنين خاينين و خيانة اسماعيل كانت اكبر بكتير من سامي الا ان سامي يستاهل اللي حصله لان مراته ماكنتش مقصرة معاه لكن مايسة كانت مقصرة جااااامد مع اسماعيل و اسماعيل سهل جداا تغيره للاحسن لكن اللي زي مراد لا ..............و بعد اللك بتاعي ده كله مش لاقيه كلام اوصفك بيه انتني بجد هايلة و مبدعة .......و بانتظار القصة الجاية


    اكييييييد عارفاني انا ميييييييييين

    ر.ع

    ردحذف
  22. حلوة اوى

    ردحذف
  23. بجد قصة جميلة و النهاية عادلة تحياتي

    ردحذف
  24. الله على الجمال تسلم ايدك يا دينا يا حبيبتى يارب ويخليكى لينا ايه الجمال ده انا كنت تعبانه قبل الحلقه دلوقتى خلاص بقيت مبسوطه اووووى بس بصراحه يعنى كان نفسى سامى يرجع اروى دا بيحبها اوى وعلشان بنته يعنى وفى انتظار القصه الجديده يا قمرررر

    ردحذف
  25. جميله جدا :)

    ردحذف
  26. نهااايه روووعه ,, بس صعب عليااا ساامى اوووى كان نفسى اروى تسامحه :( ,, ورقيه كمان صعبت عليااا اوووى ,, "الحب على كفه ميزاان " شكلها هتبقى حزينه بس هتابعهاا اكيييييد

    ردحذف
  27. رووووووووووووووووووووووعة بجد بجد انتى ابدعتى بصراحة والحلقة جااامدة جدااا
    وانتى ديمااا متألقة ف كل حاجة بجد
    تسلم ايدك
    ونهايات غير متوقعة بجد
    ومش لاقية كلام يليق بيكى والله انتى كاتبة جبارة ومحرفنة اوى :))))

    amira slama

    ردحذف
  28. تحفة يا دينا :)
    كنت متابعة معاكى من الأول وكنت بستناها كل يوم

    استمرى

    ردحذف
  29. to7faaaaaaaaa gden ana 2awl mra ab3tlk 3la fkra w kont bstana el7al2a bfar3‘ elsabr w 2ret elmdawna kolaha bgd anti katba ra23a wmstnya el2sa elgdeda mn dlwa2ti w aked htb2a 7elwa tb3n k2adtk

    moha

    ردحذف
  30. جامدة موووووووووووووووووووووووووووووووووووووت بجد يادينا قصصك رائعة بل اكثر من رائعة انتى فنانة بجد

    ردحذف
  31. القصة جميلة اوووى .. والنهايات حلوة ما عدا نهاية رقية
    بجد كنت اتمنى النهاية تكون غير كدا
    هى متستحقش حاجة وحشة تحصلها .. اينعم هى قاسية شوية بس مش كدا
    علا العموم ف انتظار الجديدة وبالتوفيق يارب

    ردحذف
  32. اوووووووووووووووووووووووا بجد بجد بجد بجد رووووووووووعه
    وكونت متوقعه منك كدة بس بجد ابهرتينى يا دندونتى يا عثل والله القصه تجننننننننننننننننن
    احلى نهائيه فى الدنيا تسلمى بجد
    وفى انتظار القصه الجديده على احر من الجمر
    *دنيتى الاهلى *

    ردحذف
  33. ممتازه جدا

    ردحذف
  34. حلوة اوووووي بجد ربنا يوفقك ومن نجاح لنجاااح ان شاء الله
    انا اول مرة اكتب كومنت بس قريت قصصك كلها ربنا يباركلك :)

    ردحذف
  35. حلوة جدا طبعا كالعادة يا دينا وشخصية مريم بالظبط شبة شخصية ميسر فى مسلسل فاطمة ههههههههه فظيعة بس القصة حلوة جدا

    ردحذف
  36. أزال المؤلف هذا التعليق.

    ردحذف
  37. وما من كاتب إلا سيفنى ****ويبقى الدهر ما كتبت يداه
    فلا تكتب بكفك غير شيء****يسرك في القيامة أن تراه

    ردحذف
  38. انا بجد مش عارفه اقول اييه ولا اييه غير اني لسه عارفه المدونه بتاعتك قريب ومش بعمل حاجه غير اني بقرا القصص اللي فيها
    بجد اسلوبك فريــد من نوعه
    موهبه بجد مشفتش زيها
    تسلم ايدك ومنتظره منك كل جديد
    ربنا يوفقك

    ردحذف
  39. حلوة اوووووووووووووووووووووى كالعادة يعنى يا أ/ دينا

    بس زعلت اوى ع سامى و اروى :(

    ردحذف
  40. شخصية مراد نفس طباعي
    بس جامدة اوي انتي كل قصصك جميلة
    برافوووووووو

    ردحذف
  41. القصة حلوة اوي يا دينا
    هي الاحداث كانت بطيئة الاول لكن انتي قدرتي تقلبي كل الاحداث
    ما شاء الله عليكي و دايما ممتعانا بقصصك الجامدة :)

    ردحذف
  42. عثل يادنيا تسلميلي ياحبي

    ردحذف
  43. القصة جميلة بس النهايات محزنة بس واقعية وقوية

    ردحذف
  44. انا هقنع نفسى ان اروى هترجع لسامى بس لما يتربي بس بجد روايه حلوه اووووى

    ردحذف
  45. ليه اروى وسامى يطلقوا بعد قصه الحب الى كانت بينهم :(

    ردحذف
  46. حلوة جدا تسلم ايدك

    ردحذف
  47. بجد طريقتك ف الكتابة عجباااااااانى جداااااااااااااااا

    ردحذف
  48. جميله جدا تسلمى يا قمرايه ربنا يوفقك ويزيدك

    ردحذف
  49. هى حلوه بس نهايتها فيها ظلم يعنى مثلا رقيه هى مش شريره علشان نهايتها تبقى كده هى بس اعصابها تعبانه علشان نفسها تكون زى بقيت البنات

    ردحذف
  50. nhytha 7elwa bs anaa 3yt 3ala samy w arwa el mfrood trg3lo bs b3d kteer :'( bs 7elwa aweee ^_^ m3lsh el comment mt25er :))
    Norhan

    ردحذف
  51. كل واحد اخد جزاته مفيش الا اروى اتظلمت ملهاش ذنب

    ردحذف
  52. بجد تحفه القصه دي ياربت لو تنزلى قصصك فكتاب :))

    ردحذف
  53. ياريت جزء تانى بأه :D

    ردحذف
  54. ياااااااه يا دينا انتى مبدعة بجد
    انا بموت فيكى وفى قصصك الجميلة
    الحاجة الوحيدة اللى مضايقانى ان مريم اسمها على اسمى
    يلا بقى اللى يعوضنى ان القصة تحححححححححححححححفة موووووت

    ردحذف
  55. جااااااااااااامدة القصة بس زعلت على سامي واروى :(

    ردحذف
  56. رووووووووووعة يا دينا

    ردحذف
  57. القصة كويسة وبتناقش مشاكل اجتماعية كتير

    لكن لفت نظري الفهم الخاطئ للدين اللي حضرتك مقدماه في صورة الشيخ ناجي

    اولا مين قال ان الشبكة بدعة ؟

    مفيش شيخ قال ان الشبكة بدعة

    فياريت مننقلش صورةخاطئة عن الملتزمين

    ولو حضرتك عندك دليل ان في شيخ جعلها بدعة اعرضيه عليا


    جزاك الله خيرا

    ردحذف
  58. بجد تحفه ملهاش حل انتى مبدعه يادينا انا من امبارح وانا بقراها وصممت اوصل لأخرها واول مافتحت عينى كملت قرايه ولسه حالا مخلصاها _ اكتر من رائعه دى لو مسلسل بيتعرض هيكسر الدنيا بقيمته بدل التفاهات ال زهقنا منها _ تسلم إيدك يادندون

    ردحذف
  59. السلام عليكم اخت دينا

    انا صاحبة الكومنت بتاع اعتراضي علي شخصية الشيخ ناجي.... وتعليقي ..اللي كان بيشكر في قصة حضرتك ...وعرض وجهة نظره باحترام ...ولم يقلل من شان حضرتك او شان كتاباتك

    وبشكرك جدا علي بوستك اللي علي الفيس وتريقتك علي وجهة نظري..وتسمحي للكثير بالغلط في احد قرائك ومهتمي بكتاباتك


    لكن للاسف انا خذت منك موقف

    والمفروض حضرتك تبقي واسعة الصدر ..وتسمعي لكل النقد البناء ..ادام هو لا يخطئ فيكي او في كتاباتك

    بالنسبة بقي لاختيار شخصية ملتحية بالاخص ..واظهرها بهذا الجشع المادي ...واستخدام الدين الخاطئ... فده الله اعلم بنيتك فيه ....وربنا يجازي كل واحد علي قد نيته

    فحضرتك بمستوي كتابتك اللي كان من وجهة نظري كويس وبيناقش مشاكل اجتماعية ..... بدل ما تعرضي عليا وجهة نظرك بكل احترام كما فعلت انا ...تذهبي كوبي بيست لكتابتي ...وتجعلي لكل من يريد ان يتكلم يتكلم

    فاعتقد حضرتك محتاجة تراجعي .....غرضك من كتابة القصص


    هل الغرض منه ....النقد البناء واني اوصل صورة صحيحة واكون واجهة مصلحة لمجتمعي

    ولا الغرض منه ...تصفيق حاد ممن هم حولي ..... ومهاجمة المعترضين علي بعض النقاط من قرائك؟

    وبرده اعتقد من الشجاعة انك تواجهيني هنا كما عرضت وجهة نظري هنا

    وليست في مكان اخر

    وعلي فكرة انا اول مرة الاقي اكونتك من صفحتك ...واول مرة ادخلة عشان ادور علي قصص جديدة اقرئها لحضرتك

    بس للاسف وجدت البوست ...وكان نفسي اول مرة ادخل بروفيلك يبقي الامر افضل من كدة

    علي العموم جزاك الله خيرا

    وياريت حضرتك توضحي فوق في المقدمة ....انك لا تقبلي راي يخالف راي حضرتك ...عشان محدش يزعجك.... ولا حضرتك ترتكبي ذنب الكلام عنه في غيبته :)


    شكرا ليكِ

    ردحذف
    الردود
    1. وعليكم السلام ورحمة الله وبركاته
      حابة اوضح حاجات مهمة... انا كتبت البوست فى الاكونت وعارفة بنسبة 90%ان صاحبته هتشوفه... لانى مش عارفة هتشوفى ردى هنا ولا لأ لان الحلقة قديمة وانا معرفش هترجعى تشوفى لها رد ولا لا

      كتبت البوست هناك لانها حصلت اكتر من مرة ان فيه ناس متفهمش قصدى من اللى فى القصص وحبيت اشوف العيب عندى ولا عند المتلقى والسؤال كان غرضه ان لو فعلا مش بتفهم صح اغير طريقة عرضى وتكون اوضح
      وياريت ترجعى للبوست تانى وهتلاقينى كاتبة انى مش بقلل اطلاقا من صاحب الكومنت وانى عايزة افهم فعلا

      اما اللى اتكلموا فى الكومنتات فهما بيتكلموا عامة مش عليكى لوحدك لان فيها اتقادات بتتوجه لى بمجرد اسم القصة وبتكون تقريبا شتيمة وتجريح مش انتقاد
      وان كان على المواجهه تعالى قوليلى على الفيس علشان اقدر اكلمك وارد عليكى مباشرة وابقى عارفة انا بكلم مين مش هنا بامضاء مجهول وانا مش عارفة اذا كنتى انتى فعلا صاحبة الكومنت الاولانى او لأ

      اما عن نيتى فى الشخصية اللى بقدمها فدى فعلا يعلمها ربنا ...اللى عايز يتوقع انها خير هيشوفها خير واللى عايز يتوقع انها شر هيشوفها شر والحكم هو ربنا العالم

      اما عن الموقف اللى اخدتيه منى فعموما انا وضحت لك وجهه نظرى لو اقتنعتى بيها يبقى خير وبعتذر ان حصل سوء تفاهم
      اما لو مش مقتنعة فلكى كامل الحرية طبعا ونورتينى بمتابعتك

      بالنسبة للغيبة انا كتبت بوست عام متمنية ان صاحبته تشوفه مروحتش همست عليها من وراها وده لانى معرفش مين اللى بيكلمنى فكان كلامى موجه بصفة عامة

      وشكرا ليكى على كل حال

      حذف
  60. انا كلمت حضرتك هنا لاني انا بدات كلامي هنا ..مش علي الفيس

    غير اني مش فرند عند حضرتك اصلا ..فغير متاح التعليق لي وده اللي ظهر عندي من الموبايل

    وانا صاحبة الكومنت الاولاني ...ولو مكنش انا مكنش هيهمني ارد علي حضرتك

    ولو علي اكونتي علي الفيس

    Basma Hendawy

    Pharmacist لسهولة الوصول

    وبالنسبة اني بعلق بمجهول او غير معروف لاني مليش اكونت علي جوجل او اي حاجة من الموجودة في الاوبشن واول مرة اتعامل مع مدونة الكترونية


    ..علي العموم حصل خير
    وربنا يوفقك :)

    ردحذف
  61. تسيم ايدك كل قصصك تحفة وسامى دة يستاهل هو واللى زيو فاكرين الخيانة انواع الخيانة بالنظرة

    ردحذف
  62. رائعة كالعادة لكن مش كل اللى مربى لحيته وحش والدين مش فى حاجة بتقول اللى ناجى عمل ده ممكن عينة بتستغل الدنيا على مزاجها تسلم إيد حضرتكِ رائعة :)

    ردحذف
  63. ماشاء الله عليكي جمييلة جداا :) بالتوفيق بجد الرواية دي حسيت انها رائعة اكثر من اي رواية :) انا كل يوم بفتح واشوف كل القصص
    مع بعض لاني متأخرة :/ بالتوفييق مرة اخري :))

    ردحذف
  64. أزال المؤلف هذا التعليق.

    ردحذف
  65. جميله اووووووووووووووووووووي تسلم ايدك يا دينا

    ردحذف
  66. بصراحه جميله تسلم ايدك يا دينا

    ردحذف
  67. gamila awi ya dina bs kan nfsi arwa tsam7 sami bs bgd kesask to7faaa
    salma~

    ردحذف
  68. رووووووعة بجد يا دينا انا متبعاكى بقالى فترة حلوة كده بس اول مرة اكتب كومنت بس متبعاكى هنا و على الفيس بس انتى بجد متميزة

    ردحذف
  69. بصى يادينا انتى بجد حد موهوب اوووى .. احساسك بيوصل وبتقدرى تفصلى بين كل الشخصيات وطريقة السرد عندك جميلة اووى حتى اسلوبك مشوق جدا .. انا قرأت أغلب كتاباتك وبجد بتمنى لك النجاح اكتر واكتر ويارب اقدر انفذ اللى فبالى ويفيدك فعلا .. احسنتى روووووعة

    ردحذف
  70. بصى يادينا انتى بجد حد موهوب اوووى .. احساسك بيوصل وبتقدرى تفصلى بين كل الشخصيات وطريقة السرد عندك جميلة اووى حتى اسلوبك مشوق جدا .. انا قرأت أغلب كتاباتك وبجد بتمنى لك النجاح اكتر واكتر ويارب اقدر انفذ اللى فبالى ويفيدك فعلا .. احسنتى روووووعة

    ردحذف
  71. حلوة يا دودو يا عسل

    ردحذف

قول رأيك بلاش تقرا وتقفل من سكات...ارائكم تهمنى