الأربعاء، 9 يناير 2013

الحب على كفة ميزان... الحلقة 4

الحلقة 4
علا داخلة البيت... اول مادخلت كان مامتها بتستناها
"كنتى فين ياعلا"
"كنت فى الكلية"
"بس"
"لا قابلت حسام بعدها"
"مش هينفع كل يوم تأخير كده"
"فى ايه بس ياماما"
"فيه انك يا ف شغل يا مع حسام وكده كتير... هو مش ناوى يتقدم"
"اكيد هيتقدم طبعا"
"ومستنى ايه؟؟"
"انا اللى كنت بقوله بعد الدكتوراه"
"واخدها...فين هو بقى متقدمش ليه"
"مالك ياماما...اتغيرتى ليه كده... ما انتى عارفة كل حاجة"
"كنتوا بتتكلموا فى التليفون ...بتقابليه كل اسبوع ولا اتنين انما من يوم الدراسة ما بدات وانتى كل يوم معاه ومينفعش كده"
"الدراسة مبقالهاش 3 ايام"
"عايزانى استنى السنة كلها وانتوا رايحين جايين مع بعض... ايه اللى معطله انه يتقدم لك ... ظروفه كويسة ومركزه محترم يبقى لسه ايه"
"مفيش حاجة"
"لو مش هتقوليله انتى هقوله انا...يا يتقدم رسمى يا مفيش خروج الا بعد الخطوبة"
"خلاص ياماما...هقوله"

مروة بترد على التليفون
"الو... مين معايا... اهلا وسهلا بحضرتك يا طنط... كويسة الحمدلله... ماما... موجودة...ثوانى...ماماااااااااا "
وجت منيرة تشوف مين...همست لها مروة
"ام شادى"
"مش قلتلك"
"ده وقته...ردى الاول"
                           *************
قفلت منيرة التليفون... وبصت لمروة
"مش قلتلك"
"قالتلك ايه"
"قالت لى اخد رأيك وارد عليهم علشان ييجوا يتقدمولك"
"ايه ياماما هو انا اعرفه منين علشان امه تتقدملى من مجرد مقابلة صدفة فى الشارع بينك وبينهم حتى انا مكنتش فيها علشان نقول يمكن عجبته ولا حاجة"
"ماهى قالت لى ان شادى كان معجب بيكى من وهو معاكى ف الدرس وطبعا ساعتها متكلمش لانكم كنتم صغيرين... فاتت الايام وكنتى دايما على باله لحد ماقابلتهم صدفة"
"ياسلااااااااام"
"يا سلام ايه...هو النصيب بيبقى غريب كده... ارد عليهم اقولهم ايه"
"اصلا شادى دمه تقيل على قلبى من زمان...قوليلها اى حاجة ...اقولك قوليلها مخطوبة"
"لا طبعا مقولش مخطوبة ... وانا كنت بقولها تشرفونا وتنورونا واهلا بيكم...انتى عايزة تطلعينى كدابة"
"طيب اخر الكلام مش عايزة شادى...اتصرفى وقولي اللى تقوليه"
دخلت مروة وسابتها...ومنيرة اتنرفزت
"مااااشى يا مروة... ضيعى من ايدك عريس فى عريس كده اما نشوف هتاخدى ايه ف الاخر"

علا قاعدة فى اوضتها...على المكتب بتكتب
يرن تليفونها
"الو... ازيك يا احمد...موضوع ايه؟؟ اه فاضية .. طيب هقوم ألبس ونروح مع بعض... هعدى على داليا ونتقابل هناك ..مش هنلحق نخلصه النهاردة... طيب نلحق العدد الجاى ان شاءالله... مع السلامة"
                         ****************
علا داخلة على مامتها الليفنج
"ماما انا نازلة"
"احنا لحقنا...ده احنا مفيش ساعتين لسه متكلمين على نزولك مع حسام"
"انا مش نازلة مع حسام...انا نازلة مع احمد وداليا نعمل موضوع للمجلة"
"هتتأخرى"
"لا مش مستعجلين...هنخلص اللى تقدر عليه النهاردة ونكمل بكرة"
"طيب... ربنا يوفقك يارب"
قربت علا من مامتها...باستها
"ربنا يخليكى ويخليلى دعواتك"
رجعت علا تانى
"كنت هنسى اتصل بحسام اقوله انى نازلة...بدل ما يقلق عليا"

راحت علا الصالون... واتصلت بحسام
"الو...حسام انا نازلة رايحة مع داليا واحمد نعمل موضوع للمجلة.. والله مكنتش اعرف لما كنت معاك ده لسه احمد مكلمنى... مش هتأخر وبالليل هتصل بيك علشان عايزاك فى موضوع مهم... مع السلامة"

حسام فى اوضته بيتكلم مع علا
"يا حبيبتى ما انا من السنة اللى فاتت وبقولك اتقدملك وانتى قلتيلى بعد الدكتوراه"
"مش كنت عايزة اشجعك وتاخدها بسرعة"
"وخلاص اخدتها... هتكلم مع ماما بكرة ان شاءالله علشان نامت دلوقتى واحدد اليوم اللى هنيجى نطلب ايدك من مامتك ونحدد الخطوبة وكتب الكتاب كمان لو عايزة...ولا اقولك ما تيجى نتجوز على طول"
"هههههه ايه يا حسام كل ده ...مش اوى كده يعنى"
"بتكلم بجد يا علا... ما تيجى نتجوز على طول"
"ازاى يعنى"
"يعنى يوم ما اجيلكم نقرا فاتحة واجيبلك شبكة... بس ونستعد بقى للجواز"
"وهو انت لسه جبت الشقة"
"نتجوز مع ماما لحد ما اشوف شقة كويسة ونوضبها وننقل فيها"
"لا يا حسام...احنا متفقناش على كده"
"هو ايه اللى متفقناش على كده...انتى مش عايزة نتجوز"
"عايزة طبعا...بس كل حاجة ف وقتها"
"ازاى يعنى"
"يعنى نتخطب... اخلص السنة اللى فاضلالى ونكون شفنا شقة بعدها نتجوز"
"انتى ليه دايما عايزة تمشى كلامك وانا بسكت لك"
"امشى كلامى ف ايه...انا قلت حاجة غلط"
"مش غلط وصح..بس..."
"بس ايه يا حسام... لازم اسمع كلامك علشان الراجل"
"هو ده عيب"
"اسمع كلامك فى الصح انما مش علشان راجل تبقى معصوم من الخطأ"
"يعنى انا كلامى غلط"
"فى الموضوع اللى بنتكلم فيه ده غلط...مش معقول يعنى فجأة كده نتجوز ومع مامتك وقبل ما اخلص دراستى...ليه كل ده"
"علشان بحبك"
"ما انا كمان بحبك... بس الحب ميخليناش نلغى عقلنا"
"ماشى يا علا براحتك... زى ما اتفقنا هكلم ماما بكرة واقولك هنجيلكم امتى"

منيرة لابسة هدوم الخروج ..داخلة على مروة اوضتها ..لقيتها بتعيط
اول مروة ما شافتها مسحت دموعها بسرعة
"يا بنتى يا حبيبتى عاملة ف نفسك كده ليه بس"
"مفيش حاجة ياماما"
راحت منيرة قعدت جنبها على السرير
"كل واحد بياخد نصيبه... انا مش هقولك قومى تعالى معايا... وف نفس الوقت مقدرش اروح مع اختى الوحيدة وهى بتخطب لابنها"
"عادى ياماما... انا مش زعلانة"
"والدموع دى ايه"
"سيبينى اعيط واكيد هرتاح"
"مش قادرة اقولك قومى تعالى معايا"
"لا مش عايزة اروح"
"بس اكيد هتقابلكم مواقف تشوفيه وهو معاه خطيبته"
"عارفة"
مسحت مروة دموعها اللى نزلت تانى
"خلاص بقى ياماما ...قومى روحى لخالتى علشان متتأخريش عليها... وابقى قوليلهم انى كنت جاية معاكى بس تعبت فجأة"
"عايزاكى اقوى من كده يامروة"
"متخافيش... انتى كان معاكى حق وحسام مش حاسس بيا خالص"

فى بيت حسام
منيرة وحورية قاعدين مع بعض
"احنا هنروح الساعة كام يا حورية"
"يعنى على 8 كده"
"يوه... انا جيت بدرى اوى"
"وايه يعنى لما تيجى بدرى...اهو تقعدى معايا شوية لحد ما حسام ييجى"
"هو راح فين"
"عند الحلاق وزمانه جاى"
بيتفتح الباب بالمفتاح ويدخل حسام
"السلام عليكم... ازيك ياخالتى"
منيرة"ازيك يا حبيبى...مبروك يا عريس"
حسام"الله يبارك فيكى...عقبال مروة هى مجتش معاكى ليه"
منيرة"كانت جاية بس فجأة جالها مغص مقدرتش تنزل"
حسام"سلامتها الف سلامة"
حورية"يا بنى انت هتفضل كده طالع نازل مش هتتغدا"
حسام"الفرحة مشبعانى ياماما والله"
حورية"وده اسمه كلام...هقوم اسخن لك الاكل تتغدا بلاش ما تقع من طولك"
ورن التليفون...راح حسام يرد بسرعة
"دى اكيد علا"
رد على التليفون
"الو... ايوه انا"
اتغيرت ملامح حسام... منيرة وحورية بصوا له
حورية"مين؟؟"
حسام وهو بيتكلم فى التليفون
"الدوام لله... الجنازة امتى؟؟ فين... متشكر مع السلامة"
قفل حسام التليفون
منيرة وحورية ف نفس الوقت
"مين يا حسام اللى مات"
حسام"بابا"
منيرة"لا حول ولا قوة الا بالله...البقاءلله يا حسام"
حورية"انا لله وانا اليه راجعون.. كان قلبه حاسس ده مكملش اسبوع كان هنا وبيقول انه هيموت... الله يرحمه...مين اللى كلمك"
حسام"واحد مش فاكر اسمه بيقول انه ابن عمى"
حورية"عمك مين فيهم"
حسام"معرفش ياماما...انا هغير هدومى علشان ألحق الجنازة"
حورية"طيب متنساش تتصل بعلا تعتذر لها وتأجل المعاد"
حسام"واعتذر ليه ونأجل ليه"
وبصت منيرة وحورية لبعض مستغربين
حورية"ابوك مات وانت هتروح تخطب؟؟!!!"
حسام"اه...انا رايح اعزى زى اى حد غريب وراجع...لا هقف اخد عزاه ولا انا زعلان انه مات...ابويا مات من زمان مش النهاردة بس... الله يرحمه ويغفر له اللى عمله... هحضر الجنازة وارجع نروح لعلا"

فى الجامعة احمد وداليا قاعدين
"ولولو امبارح كانت زى القمر يا احمد... بس حصل حتة فصل ابن لذينة"
"ايه اللى حصل"
"ابو حسام مات امبارح"
"يا شيخة...جاله الخبر وهو عندهم ولا ايه"
"لا ... جه عادى وقروا الفاتحة ولبسوا الدبل وبعد ما روحت بكلم علا بالليل قامت قالت لى ان باباه مات العصر وهو جه مأجلش"
"غريب اوى...فيه حد يعمل كده...هى الدنيا هتطير"
"انا عارفة...استغربت زيك كده برضه وقلت لها ان مفيش حد يعمل كده... قامت قالت لى اعمل ايه بقى هو حر فسكتت انا طبعا"
"ربنا يخليك ليا يا بابا... ده شايل همى اكتر منى... ووعدنى ان شاءالله على اجازة نص السنة هيفاجئنا مفاجأة حلوة"
"ايه هى يا احمد...قول قول"
"هو اللى عنده المفاجئة مش انا"
"يعنى انت بفضولك الصحفى اللى عارفاه سكتت؟؟"
ضحك احمد
"يبقى انت عارف حاجة...والله لتقول"
"بصى انا عرفت من ماما مش منه"
"ايه بقى"
"انه عمل جمعية وهيقبضها ف شهر 1 على اجازة نص السنة ومنها هنجيب الشبكة ونعمل خطوبة كده فى البيت عندكم وخلاص"
"الله عليك يا حمايا يا حبيبى... اموت فيه الراجل السكر ده"
"انتى هتعاكسى ابويا قدامى ولا ايه"
"سورى يا حبيبى...من فرحتى"

علا وحسام قاعدين عندها فى البيت
"اتأخرت ليه ياحسام... مستنياك من بدرى"
"كنت بجيبلك الحاجات دى"
وشاور على شنطة داخل بيها
فتحتها علا بفرحة... واستغربت بعد ما فتحتها
"ايه ده يا حسام؟"
"دى كام طرحة عجبونى وقلت اجيبهوملك"
"بس انت عارف انى مش محجبة...ولا عايز توصلى رسالة"
"رسالة ليه وانا يعنى مقدرش اقولهالك"
سكتت علا بعد ملامحها ما اتغيرت
"ايه يا علا مالك؟؟وشك اتقلب ليه لما جبتلك الطرح دى...فيها ايه لما تتحجبى يعنى"
"مفيهاش حاجة يا حسام لما اكون عايزة اتحجب مش لما تفرضه عليا"
"انا مفرضتوش عليكى...انا بطلبه منك"
"ليه"
"علشان عايزك احسن من كده"
"وانا كده مالى"
"انا عايزك محجبة فيها ايه دى... وبعدين هو ده مش فرض ولا حاجة غلط بطلبها منك"
"انا مقلتش حاجة بس عايزة لما ألبسه ألبسه باقتناع واكون من جوايا عايزة ألبسه وعايزة ارضى ربنا بيه مش ارضيك انت"
"ارضى ربنا وارضينى مش هيجرى حاجة"
"مش بالطريقة دى يا حسام...انا محبش حد يفرض عليا حاجة"
"انا مش حد انا خطيبك"
"ولو برضه... واشمعنى النهاردة...احنا قربنا على شهرين مخطوبين ومجبتليش سيرة الحجاب ايه اللى خلاك تفتحه فجأة"
"شهرين ولا يومين...هتفرق فى ايه"
"انت خطبتنى مش محجبة ومش هتحجب غير برغبتى انا...مش علشان اتخطبت او اتجوزت"
"يعنى مش عايزة تتحجبى"
"مش عايزة يتفرض عليا انما ممكن اقتنع واتحجب اى وقت"
"ماشى يا علا...براحتك اوى...سلام"
وقام حسام مشى وعلا مستغربة

علا وداليا خارجين من المحاضرة مع بعض
"هو احمد مجاش ليه ياداليا"
"مش عارفة والله ده قال انه جاى يحضر"
"يمكن راحت عليه نومة ولا حاجة"
"مش عارفة...هروح اتصل بيه من اى حتة اطمن عليه واشوف نزل ولا منزلش... انتى مش هتروحى لحسام"
"لا... مكلمنيش امبارح وزعلان علشان موافقتوش على طول"
"يا حبيبتى فيها ايه يعنى لما تتحجبى زيي كده"
"والله المشكلة مش انى اتحجب ولا لأ... انا مش عايزاه يتفرض عليا"
"دماغك ناشفة"
"ولا ناشفة ولا حاجة...تعالى تعالى نطلع ندور على تليفون نسأل على احمد"
وشافوا احمد جاى عليهم وهو متوتر
داليا"انت اتأخرت ليه"
احمد"انتوا متعرفوش اللى حصل... الارهابيين هجموا على السياح النهاردة فى الدير البحرى وقتلوا اكتر من 50 واحد"
علا"معقول؟؟ حصل امتى الكلام ده... وعرفت امتى"
احمد"وانا نازل عرفت من صباح الخير يامصر فروحت على المجلة وقلت انى عايز اروح اغطى الاحداث هناك فبعتوا معايا عربية ومصور...جيت اعرفكم قبل ما اسافر وراجع المجلة علشان نتحرك"
علا"انا عايزة اجى معاك"
داليا"تروحى فين يا مجنونة انتى بيقولك ارهابيين...وانت يااحمد بلاش تروح انت اصلا مش صحفى فى المجلة"
احمد"هروح يا داليا... يالا خلى بالك من نفسك"
علا"انا جاية معاك يا احمد"
وقابلوا حسام رايح محاضرة
حسام"انتى خارجة ليه دلوقتى"
علا"هروح المجلة ...حصل عملية ارهابية فى الاقصر وهروح مع احمد اغطيها"
حسام"الاقصر!!!عصام اتنقل الاقصر من شهرين"
علا"عصام مين"
احمد"انا همشى ياعلا علشان هتأخر"
علا"استنى جاية معاك... هروح ياحسام ولما ارجع هكلمك"
حسام وهو بيزعق"استنى هنا تروحى فين"
الطلبة بدأوا يتلفتوا على الصوت
علا"حسام وطى صوتك"
حسام"اوطى صوتى ايه... انتى مش رايحة ف حتة "
وبص لاحمد"وانت عايز تروح روح انت مش لازم تاخدها كل مصيبة رايح فيها"
احمد وداليا بصوا لبعض...قبل احمد ما يرد
شدته داليا"يالا يا احمد بس عايزاك"
علا بتعيط"انت ازاى تعاملنى كده"
حسام"مش وقت كلام خالص ياعلا...انا مش عارف صاحبى حصل له ايه وانتى كمان عايزة تروحى وياعالم هيحصل ايه تانى...روحى دلوقتى يا تطلعى محاضراتك ومش عايز اسمع اى كلام غير لما اطمن على عصام...ربنا يستر"

هناك 18 تعليقًا:

  1. جناااااااااااااااااان بجد الحلقه جامده وعلا دى دماغ صعيدى
    tota

    ردحذف
  2. حلوه اوي و حسام ده بدا يبقي رخم بس بردو علا مزوداها

    ردحذف
  3. هو قلب ليه فجأه كده ؟؟

    ردحذف
  4. Gamila aweeeeee... الاء

    ردحذف
  5. جميلة جداااااااااااااا بسرعه بقى عايزين الحلقه الخامسة

    ردحذف
  6. تححححححححححححححححححححححححححفه يادينا تسم ايدك

    mohamed shalaby

    ردحذف
  7. علا دى عايزة اللى يربيها و يعلمها الأدب هى فاكره نفسها ليها مطلق الحرية تعمل اللى هى عايزاه ؟ !!!

    ردحذف
  8. شكلهم مش هيكملو

    ردحذف
  9. حلوه اوى الحلقه يا دينا تسلم ايدك يارب ومتشوقه ﻷحلقه اللى بعدهأ بصراحه حسام قلبه قاسي اوى وعﻻ غلطأنه انها وفقت عليه ﻻن اللى ملوش خير ف اهله ملوش خير ف حد بس بجد تحفه تسلمى
    dody

    ردحذف
  10. حلوه جداااااااااااااااااااا
    بس تصرف حسام ده غلط خااااااااااالص ده برضوا فى الاول والاخر ابوه

    ردحذف
  11. Msh mwf2a ely by2olo Ola mzwdaha hya l7ad dilw2ty m3'ltetsh fe ay 7aga houwa 3arfha w 7abha w5atbha kidaa msh 3shan 5tbha yb2a yt7akm feha lazm y7trm sh5sytaha wetb2a kol-7aga bel-nqash w yatqn3ny yaqn3k msh houwa kida we5alaas ! :D:D ,, Dondon mstnyaaaaa ely gaya b2aa enty Hayla (Y)

    ردحذف
  12. اولا احب احييكى يا دودو على اسلوبك الجميل فى الكتابة ثانيا انا حاسة ان فيه حاجة مش مظبوطة بين علا وحسام هتخلى علاقتهم صعب تستمر
    dentist aya

    ردحذف
  13. جميييييييييييييييييلة اوى :) :) :)

    ردحذف
  14. حلقه جميييييييييييييله

    ردحذف
  15. ايمتا الحلقة الجاي

    ردحذف
  16. رووووووووووووووووووووعة بجد تسلم الايادى

    amira slama

    ردحذف
  17. وينتصر الحب علي ذكريات الماضي والامه لدي حسام
    هناك قلباً ينتظره الفرح ولو مؤقتاً لارتباطها القريب بحسام ... وقلباً آخر يتألم في صمت لإحساسه بفقدان الحبيب وإن كان من طرف واحد ...
    قلوباً أخري تنعم بالحب الدافئ وينتظرها الفرح عن قريب ...
    ولكن هناك شئ آخر يقلقني وهو الرجل المسيطر داخل حسام فنمط شخصيته لا يتوافق مع نمط شخصية علا والتي تبني نفسها وحلمها ومن الصعب فرض الرأي عليها وإن كان من حبيبها فهي شخصيه تحتاج للنقاش والاقناع وهو ما يفتقر إليه حسام ... وربما يوماً ما يكون اختلاف أنماط الشخصيه هو سبباً للخلاف الكبير بينهما ...

    حلقه جميله يا دينا وأتمني لكي مزيد من الإبداع :)

    ردحذف

قول رأيك بلاش تقرا وتقفل من سكات...ارائكم تهمنى