السبت، 12 يناير، 2013

الحب على كفة ميزان... الحلقة 6

الحلقة 6
علا بتفتح الباب لحسام
"اتصلت بيك ف البيت طنط قال انك نزلت من بدرى ..كنت فين ياحسام"
وطلع بوكيه ورد من ورا ضهره
"كنت بجيبلك ده "
"الله... تسلم ايدك"
اخدت علا بوكيه الورد وهى فرحانة
دخل حسام وقفلت الباب وراه
"انا النهاردة يا علا الفرحة مش سيعانى"
"خير فرحنى معاك... والعميد كان عايزك ليه"
"رشحنى لبعثة ف امريكا ... تخيلى يا علا ناس كتير بتحلم بفرصة زى دى واكبر واقدم منى وتجيلى انا"
سكتت علا بعد ما اتفاجئت
"هو اى نعم علشان كان مشرف على رسالتى بس هو كمان عارف قد ايه انا مجتهد وممكن اشرفه ف ترشيح زى ده "
"وانت قلت له ايه"
"هى دى عايزة قوالة ولا ممكن افكر اصلا...انا وافقت"
"ازاى توافق قبل ماتقولى"
واتغير حسام لما شاف تكشيرة علا واللى تبين عدم فرحتها
"انتى عايزانى استأذناك الاول"
"مش تستأذنى بس تاخد رأيي على الاقل"
"اعتبرينى باخد رأيك... ايه اللى اتغير"
"كلامك فيه استهانة برأيي... انا مش موافقة على السفر يا حسام"
"نعم... ازاى يعنى مش موافقة"
"انا مقدرش اسيب مصر"
"ليه"
"اولا علشان ماما مالهاش غيرى ثانيا علشان طموحى اللى عايزة احققه"
"مامتك ممكن بعد مانروح تيجى تعيش معانا ولو ع الشغل اشتغلى هناك"
"يعنى بعد ما اشتغلت هنا وبقي ليا علاقاتى اسيب كل ده واروح ابدأ من جديد"
"لا ازاى ...نفضل هنا وانتى تتقدمى وافضل انا محلك سر"
"انت خايف بقى انى اتفوق عليك"
وقف الكلام بينهم لحظات وحسام بيبص لها
حست علا انها غلطت ...راح حسام ع الباب وهى وراه
"استنى يا حسام احنا مخلصناش كلامنا"
"السفر على اول 9 وانا مش هتنازل عن الفرصة دى .. مستنى ردك"
نزل حسام وفضلت علا واقفة مرتبكة مش عارفة تفكر

فى نفس يوم اخر امتحان...وبعد ما خلصوا
داليا وعلا قاعدين مع بعض فى البيت بعد ما رجعت داليا معاها
"انتى لسه برضه مفكرتيش ياعلا"
"مفكرتش علشان مفيش مجال للتفكير يا داليا...انا مش عايزة اسافر"
"ليه بس مش قالك ممكن مامتك تعيش معاكم"
"اولا انا مش حابة فكرة السفر ثانيا مقدرش اسيب حلمى اللى بجتهد علشان تحقيقه لمجرد ان حسام جاله فرصة كويسة"
"مش قالك تشتغلى هناك"
"اشتغل هناك!! شايفاها سهلة...هما بيحبوا العرب ولا المسلمين لما هيشغلونى هناك...وابدأ من اول وجديد"
"وهتعملى ايه مع حسام"
"حسام مستناش يسمعنى ونفكر مع بعض فى حلول وسط..حسام قرر القرار وكأنى مليش وجود ولا رأى ولا شخصية...ده كمان بيتكلم بلسانى اننا هنسافر ونروح ولما عترضت سابنى ومشى وبقاله يومين مش بيكلمنى"
"مش كنتم هتنزلوا تجيبوا العفش بعد الامتحانات"
"وانا مش ممكن هكلمه وكأن مفيش حاجة حصلت ويبقى انا موافقة على كلامه وقراره"
تدخل مامة علا عليهم
"احمد جه بره ياداليا وعايزكم"
داليا"يبقى جاى ياخدنى"
قامت داليا بسرعة...ووراها علا وخرجوا لاحمد
                          ****************
احمد وعلا وداليا قاعدين مع بعض
احمد"فيه مسابقة يا علا التليفزيون عاملها... وجاى اقولك انى هقدم فيها"
علا"مسابقة ايه"
احمد"مطلوب مذيعين ومعدين ومخرجين برامج"
علا"والصحافة؟؟"
احمد"نقدم فى المسابقة ولو جت نسيب الصحافة لو مجتش خلينا"
علا"لا انا بحب الصحافة اكتر مش عايزة اقدم فى المسابقة دى"
احمد"وانتى يا داليا"
داليا"لا ياعم انا هستناك تخلص اللى وراك ونتجوز واقعد ف البيت"
احمد"براحتك...اخر كلام ياعلا اقدم انا"
علا"اه قدم انت"
احمد"طيب يالا يا دودو ...وانتى يا علا متنسيش عندنا معاد بكرة فى المجلة"
علا"حاضر مش ناسية"

علا قاعدة على سريرها...بتفكر فى حسام اللى مكلمهاش من اخر يوم جالها فيه... دخلت عليها مامتها
"ايه ياعلا بتعملى ايه"
"ولا حاجة"
"كلميه بدل انتى زعلانة كده"
"لو كلمته يعنى موافقة على السفر"
"سافرى معاه يا بنتى لو عايزة ومتشيليش همى"
"مش هينفع اسيبك لوحدك واسيب كل حادة حلمت بيها"
"طيب فكروا ف حل يرضيكم انتم الاتنين...يعنى مثلا تشوفى البعثة دى كام سنة يسافر وييجى وتروحى له "
"قصدك نتجوز وهو يسافر وانا افضل هنا ونروح لبعض فى الاجازات"
"يعنى نبقى مسكنا العصاية من النص"
"فكرة...هتصل بيه واقولهاله"
وقبل ماتقوم علا من مكانها...رن جرس الباب
                        *******************
علا بتفتح الباب...اتفاجئت بحسام...ابتسمت بفرحة
"حسام...تعالى اتفضل وحشتنى اوى"
دخل حسام وهو مبيردش عليها
قفلت الباب ووقفت وراه
"اقعد يا حسام"
"لا معلش علشان مستعجل...انا جيت اخد قرارك الاخير"
"انا عندى حل وسط...احنا نتجوز وانت تسافر وانا افضل هنا و.."
"لا ...انا عايز اتجوز واستقر مش اتشحطط وابقى ف حتة ومراتى ف حتة"
"هتسافرى معايا ولا لا"
وحست علا بالعند ف كلامه...ردت بكل تحدى
"لأ"
"ده كان متوقع منك... انانية ياعلا مبتفكريش غير ف نفسك"
"انا يا حسام انانية... انا فكرت فى اللى يرضينا احنا الاتنين رغم انى مش عايزة ابعد عنك بس برضه مش هقدر اسافر"
"انتى مش عايزة تسافرى علشان احلامك ...انتى بتجرى ورا وهم ياعلا... الشغل والطموح عمره ما بيحقق سعادة السعادة فى الاسرة والاستقرار"
"لما السعادة فى الاسرة والاستقرار مش عايز ليه تقعد هنا ونستقر"
"علشان انا الفرصة جت لى ومينفعش اسيبها"
"انت اللى انانى يا حسام وبتفكر ف مصلحتك لوحدك"
"بصى ياعلا علشان منتكلمش كتير...هتسافرى معايا وتبطلى نغمة فيلم انا حرة واحلامى وشغلى ولا هتخليكى تجرى ورا خيالك ده"
واستفزها كلامه وتقليله منها
"مش مسافرة وهقعد احقق احلامى ومش هتجوز راجل انانى"
"انتى اللى اختارتى يا علا... هتخسرى"
دخلت مامتها اللى كانت سايباهم يحلوا مشكلتهم بنفسهم لما حست ان الكلام راح فى اتجاه تانى
الام"صلوا ع النبى يا ولاد"
جريت علا على اوضتها
حسام"هى اللى اختارت...لو كانت بتحبنى كانت وافقت تروح معايا اخر الدنيا"
الام"يا حسام كل واحد فيكم يتنازل شوية علشان التانى"
جت علا ومعاها علبة الشبكة
"اتفضل يا حسام... شبكتك"
حسام كان متوقع ان الشدة هتخلى علا تتخلى عن رأيها فى عدم السفر وانها اكيد هتوافق...مكنش متخيل انها ممكن تسيبه
دقايق استوعب فيها حسام اللى حصل...اخد الشبكة ونزل
ومامة علا بتتكلم معاه وهو مش سامعها ولا مركز معاها

حسام بيروح الجامعة كل يوم ويرجع يقفل على نفسه اوضته ويمسك علبة الشبكة والدبلة بتاعة علا... وبعد اسبوع
"معقول ياعلا ...اهون عليكى للدرجة دى... بس مش هبقى ضعيف قصادك تانى...لازم تندمى على اللى عملتيه"
قام من اوضته راح لمامته
"ماما كنت عايز اتكلم معاكى ف حاجة ومش عارف انا صح ولا غلط"
"ايه يا حسام"
"انا عايز اخطب واتجوز قبل ما اسافر"
"تخطب مين"
"شوفيلى انتى المهم واحدة تكون بنت حلال ومؤدبة وعايزة تستقر"
"لحقت تنسى علا"
"منسيتهاش بس هنساها اكيد...علشان كده عايز اخطب قبل مااسافر ونسافر انا والعروسة مع بعض...ايه رأيك"
"اخاف تتسرع...هى علا متناسبكش فعلا بس اوعى تاخد واحدة تانية تظلمها"
"متخافيش... انا عارف ربنا كويس ومش ممكن اظلم اى واحدة... هتعرفى تشوفيلى عروسة"
"العروسة موجودة وبتتمناك من سنين"
"مين دى"
"مروة"

علا من يوم ما فسخت الخطوبة مع حسام وهى حاسة ان روحها اتاخدت منها...ولما تفكر تحس ان مكنش قدامها اختيار تانى
ترجع تفتكر حبهم ومكالماتهم ...يوحشها وتبقى نفسها تكلمه
فات على فسخ الخطوبة حوالى 3 اسابيع
قامت من السرير بعد ليلة طويلة مؤرقة
بصت فى النتيجة1\7
"يعنى كنا هنتجوز كمان اسبوع يا حسام... للدرجة دى هُنت عليك... انت حتى مرضيتش تسمع اقتراحى اللى بنقرب فيه المسافات... اعمل ايه يارب...نفسى اشوفه اوى"
فكرت... وقامت دخلت الحمام...ورجعت لبست احلى ماعندها...ووقفت قدام المراية تغير فى شكلها لحد ما حست انها راضية عن شكلها
دخلت لها مامتها
"انتى نازلة رايحة المجلة ياعلا"
"لا ياماما رايحة اشوف النتيجة نزلت ولا لا"

راحت علا الجامعة وهى متعمدة انها تقابل حسام بحجة النتيجة
كرامتها تمنعها انها تروح له مخصوص انما ميمنعش انها تقابله صدفة وهى بتشوف النتيجة
راحت سألت على النتيجة...وعرفت ان النتيجة لسه مظهرتش
فكرت ايه الحجة اللى ممكن تخليها تروح عند مكتبُه
فكرت انها تطلع ولو قابلها تقول انها كانت رايحة المكتبة
طلعت... وقلبها بيدق وهى بترسم ف خيالها شكل اللقاء اللى هيكون بينهم... اكيد بعد الفترة دى كل واحد فيهم هيكون مشتاق للتانى وينسوا كل حاجة
شافت مكتبه مقفول... بصت فى ساعتها
"هو اتأخر النهاردة ولا يكون مش جاى...ايه الحظ ده ياربى"
طلعت المكتبة... قعدت شوية ونزلت شافت المكتب مقفول
سلمت امرها لله ونزلت
وهى على السلم...شافته قدامها طالع
الاتنين وقفوا قصاد بعض
كل واحد فيهم متردد
"ازيك ياحسام"
"اهلا ياعلا...جاية الجامعة ليه خير"
"كنت بسأل ع النتيجة وكمان لقيت عندى كتاب كنت مستعيراه من المكتبة ونسيت ارجعه"
"آه... طيب... لو عايزة اى خدمة من الكلية قبل ما اسافر انا تحت امرك"
"انت مسافر خلاص"
"ايوه"
"ممكن نتكلم مع بعض يا حسام...نتكلم ونفتح قلبنا لبعض من غير القسوة اللى بتكلمنى بيها دى"
"انتى نهيتى اى كلام ممكن يكون بينا ياعلا"
"نفتح كلام تانى"
"معدش ينفع خلاص"
"ليه"
وفتح شنطته...وطلع كارت
"ياريت تقدرى تشرفينى انتى وطنط...احنا برضه عشرة"
مسكت الكارت وهى خايفة تصدق اللى فهمته
دموعها اللى حاولت تحوشها نزلت غصب عنها
وهى بتفتح الكارت وتشوف اسمه واسم مروة
فى نفس المكان والمعاد اللى كان هيبقى فيه فرحهم
وقع منها الكارت وهى نازلة تجرى ع السلم

علا قاعدة فى صالون البيت... وراها السفرة عليها عشا وشموع
بتحس بإيد تيجى من وراها ...تغمى عينيها
تمسك الايد وهى قايمة
"حسام"
تلتفت لحسام
"اتأخرت عليكى"
"ايوه...كنت بستناك وجهزت العشا علشان نحتفل مع بعض"
"انا سبت كل الناس اللى معايا وجيت علشان ابقى معاكى...انا وانتى بس لوحدنا"
اخدها ف حضنه.... حضنته بشوق
غمضت عينيها وهى ف حضنه
وسمعت صوت عبد الحليم بيغنى
"اهواك... واتمنى لو انساك وانسى روحى وياك"
صوت عبدالحليم بيتكرر... الاغنية بتتعاد تانى وتالت وهى ف حضن حسام مغمضة

فتحت عينيها... بصت حواليها لقت نفسها لوحدها
والموبايل جنبها بيرن بصوت عبد الحليم واغنية اهواك

قامت تتعدل وهى بترد
"الو... صباح النور يااحمد...انت بتتصل من امتى...كنت نايمة... مهدودة طبعا امبارح كنت واقفة طول اليوم بغطى محاكمة اللى مايتسمى... حاضر مش هتأخر تانى... طيب يا احمد قلتلك مش هتأخر بس بقى... اجيب منه من النادى؟؟ وسيادتك متجيبهاش ليه؟؟ مش جاى ع الغدا؟؟ طيب خلاص براحتك... حاضر اى تعليمات تانية... بقولك ايه اللاب توب بتاعى شكله كده تعبان شوية اوديه لمين... قول العنوان كده... طيب هوديهوله...يالا سلام"
قامت علا من السرير... اوضتها اوضة جديدة غير اوضتها القديمة
بصت على صورة مامتها اللى على الحيط وعليها العلامة السودا
"الله يرحمك ياحبيبتى"
خرجت من اوضتها...عدت على الليفنج ودخلت اوضة مامتها القديمة اللى بقت مكتب
مكتبة كبيرة ومكتب شيك وترابيزة صغيرة عليها فاكس
اخدت اللاب توب من على المكتب وحطته فى شنطته
راحت المطبخ... وقفت تعمل قهوة
القهوة على النار... سرحت فى الحلم اللى كانت بتحلمه
غمضت عينيها وهى بتستعيد احساسها وهى ف حضن حسام
فضلت مغمضة لحد ما سمعت صوت النار والقهوة بتفور
قفلت البوتاجاز وحطت القهوة فى الحوض وهى بتقول
"يعنى اشمعنى انتى اللى هتطلعى عِدلة"
"كان لازم يااحمد تصحينى من الحلم الحلو ده"

هناك 27 تعليقًا:

  1. جااااااااااااااامده مووووووووووووت

    ردحذف
  2. السلام عليكم ممكن اعرف موعيد الحلقات
    واشكرك على المجهود الرائع ده

    ردحذف
    الردود
    1. وعليكم السلام ورحمة الله وبركاته
      الحلقات يوميا بالليل ماعدا الاثنين والجمعة اجازة
      يعنى الحلقات 5 ايام فى الاسبوع

      شكرا ليك ^_^

      حذف
  3. O.o انا مش فاااهم اى بتنجااان .. نزلى الحلقه التانيه بقا عشان اعرف داليا راااحت فيين :D

    ردحذف
  4. ممممممممممم
    روووووعة بجد

    ردحذف
  5. لااااااااااااااا علا و احمد مينفعش داليا كانت بتحبه

    ردحذف
  6. حلوة اوي اوي بجد

    ردحذف
  7. حلوه اوي يا دودوووووووووو
    بس انا مش مستوعبع اللغبطه دي كلها
    احمد وعلا ازاي؟؟
    وفين داليا

    ردحذف
  8. dodo ya gamd

    ردحذف
  9. حلوه جدااااااااااااااا
    بس حسام باعها بسهوله وماحاولش انه يقرب من وجهة نظروا ونظرها

    ردحذف
  10. 7lwa awee bgd bs 7ussam da anani w mesh byfkr f haga t2rbhom l b3d
    w kda howa elli e5tar
    bgd 7lwa awee keep going dodo :)

    ردحذف
  11. جاااااااااااااامده اوى :) :) :)

    ردحذف
  12. حلوه اوي يا تري ايه هيحصل تاني

    توتا

    ردحذف
  13. حلوه اووووووووى الحلقه دى ومستنيه الحلقه التانيه بفارغ الصبر
    بس كويس ان حسام وعلا سابو بعض عشان مش مناسبين لبعض خالص وكل واحد فيهم غلطان هو عايز ف جو الرجوله المفرطه عليها ومخدش رايها ف السفر وهما اتنين هيتجوزوا ويبقولها استاذنك اه طبعا لازم يستاذنها عشان دى مش حياته لوحده بس عجبنى رجولته لما مرضاش يجرح مروه وزى ما قال لمامته انه مش هيظلمها وهى مفكرتش ترجعله الا بعد 3 اسابيع وعلا فعلا عايشه ف جوانا حره زى ماهوا بيقول وبتعيش ف الدور وهى شخصيتها ضعيفه بس انا من اول حلقه وانا شايفه فعلا ان علا لايقه على احمد عشان ظروف شغلهم واحده وحسام وداليا لايقين على بعض هى بتحب تقعد ف البيت وهو عايز يعيش ف جو سى سيد بس اموت واعرف داليا راحت فيييييييين لو ماتت هزعل اوى :(
    بجد قصه تحفه اووووووووووووى يا دودو :*

    ردحذف
  14. روووووووووووووووعة بجد تسلم الايادى يا قمرى

    amira slama

    ردحذف
  15. متشكرة جداااااااااااااا على الكومنتات والمتابعة

    وكل استفساراتكم اللى تخص اخر الحلقة هتبان فى الاحداث الجاية ان شاءالله

    ردحذف
  16. تغير مثيير في الاحداث كنت حاسه ان حاجه غريبه هتحصل بس شوقتيني اكل القصه حلو اوي

    ردحذف
  17. هو كدا وصلوا لسنه كام ؟

    ردحذف
  18. تسلم ايدك بجد

    ردحذف
  19. جميلة جدااا

    منى

    ردحذف
  20. انا قرأت الحلقة 3 مرات بجد روعة اوى

    ردحذف
  21. انا قرأت الحلقة 3 مرات بجد روعة اوى

    ردحذف
  22. هوا ممكن يكون احمد تاني مش احمد حبيب داليا واكيد اللي ما يتسمي ده مبارك صح يا دودو؟

    ردحذف
  23. تسلم أيدك بجد والله تحفه أنا اول مره ع فكره اقرأ الحلقه ديه واعرف ان فيه مدونه جميله أووووووووووي كده زي ديه

    ردحذف
  24. أنا لما شفتك قلبي طار من لهفتي
    وجريت عليك وشوقي سابق خطوتي
    جبت السنين في شريط حزين متجمعه
    وقفتلي فجأة وعيني خايفه مدمعه
    ولقيت أيديك في شنطتك ومطلعه .....
    دعوة فرح
    دعوة فرح وفيها أسمك جنب أسمه
    بردت أيديا وضاع حلمي اللي راسمه
    الدهشة والخوف والألم سكنو ملامحي
    مابقيتش عارف ألاقي صوتي وألم جرحي
    معقول ميعاد الفرح يتبدل ألم
    معقول سنين الحب يطويها الندم

    ردحذف
  25. بجد يعنى حرام علا تسيب حسام بقى عشان الهبل بتاعها دوت

    ردحذف

قول رأيك بلاش تقرا وتقفل من سكات...ارائكم تهمنى