الثلاثاء، 26 فبراير 2013

بقينا عيلة... الحلقة 1

الحلقة 1
شذى فى الميكروباص...لابسة اسود حتى الايشارب اسود
بتتكلم فى التليفون
"ايوه يا شيماء...انا قربت ع الموقف انتى فين...طيب 5دقايق واكون وصلت"
حطت الموبايل ف الشنطة... وسرحت وهى بتبص من الشباك
شافت باباها ولحظة ما سمعت انه مات
وانهيارها هى ومامتها واختها الصغيرة ضحى
حست ان دموعها نزلت ف الوقت اللى الميكروباص وصل فيه الموقف
نزلت مع الناس اللى نزلوا... مشيت تدور على شيماء
شافوا بعض...سلموا على بعض
"شذى وحشتينى"
"وانتى كمان...عاملة ايه"
"انا كويسة انتى اللى عاملة ايه"
"عايشة"
"ياحبيبتى باباكى ارتاح المفروض تفكرى قد ايه كان بيتعذب وهو تعبان"
"بس كان وسطنا"
"راح عند الاحسن منكم ... هو ف مكان احسن من هنا بكتير"
"الحمدلله على كل حال"

مشيوا جنب بعض... سمعوا تباع ميكروباص
"الجامعة... الجامعة يا انسة"
"تعالى ياشذى الحمدلله ميكروباص رايح ع الجامعة على طول "
ركبوا الميكروباص واتحرك بيهم من موقف مركز السنطة لجامعة طنطا
                    *******************

شذى وشيماء خارجين من الجامعة
"خدى يا شذى هنا المحاضرات اللى فاتتك"
"شكرا"
"بصى بصى مين جه"
بصت شذى لمكان ما شاورت شيماء
ابتسمت شذى لخالد اللى قرب منها يسلم عليها
"ازيك يا شذى"
"الحمدلله...ايه المفاجئة دى"
شيماء"احم احم"
خالد"ازيك يا شيماء عاملة ايه"
شيماء"الحمدلله... طيب ايه استناكى ولا اروح؟"
شذى"لا استنى نروح مع بعض"
شيماء"ماشى هدخل اقعد مع اصحابى شوية ولما تخلصى رنى عليا"
خالد"تتردلك ف الافراح"
شيماء"ياااااارب ..اهو بقدم السبت علشان ربنا يكرم"

مشيت شيماء ودخلت الجامعة
ومشيت شذى مع خالد وقعدوا ف كافتيريا قريبة

"ايه عاملة ايه دلوقتى"
"الحمدلله...حاسة انها اصعب ايام حياتى"
"معلش كله بيعدى..ربنا يصبركم"
"يارب... انت عارف من ساعة بابا ما مات واحنا حاسين ان الفرحة راحت من البيت ومش راجعة تانى"
"متقوليش كده يا شذى ربنا يخلى لك ماما وضحى"
"اهى ضحى اللى صعبانة عليا اوى... طفلة عندها 9سنين بقت يتيمة"
"ارادة ربنا مش هنعترض"
"ونعم بالله...انا صدعتك انا اسفة"
"لو مكنتيش تصدعينى هتصدعى مين يعنى"
ضحكت شذى وسألته
"انت مش وراك شغل ايه اللى جابك"
"لما سألتك الصبح هتخلصى امتى عملت حسابى استأذن شوية واجى اشوفك وامشى"
"مش عايزة اعطلك على شغلك"
"ولا يهمك... انا بس عايز اعرف احنا ايه نظامنا دلوقتى"
"مش عارفة يا خالد... كل حاجة كده اتلخبطت"
"هو باباكى كان عرف ولا لا"
"لا ماما كانت هتقوله ولما تعب مقدرتش تفتح معاه الموضوع واتلبخنا بعياه والغيبوبة اللى دخلها لحد ما مات الله يرحمه"
"اصل انا ماما قالت للناس انها خلاص رايحة تخطب وقالت لاخوالى واعمامى علشان ييجوا معانا"
"هنأجل شوية ...مش هينفع يبقى بابا لسه ميت من اسبوعين واروح اقول لماما هنعمل ايه ونظامنا ايه ف الخطوبة"
"ماشى يا شذى... بس يعنى حاولى تتكلمى معاها اننا حتى نقرا فاتحة قريب والخطوبة بعدين"
"حاضر هقولها"
"يالا ...رنى على شيماء علشان اوصلكم للموقف واروح الشغل"
                     *******************

كريم... بيركن عربيته قدام شركة الادوية اللى بيشتغل فيها
نزل من العربية...ودخل الشركة
واتفاجئ قدامه بزميلته اللى كانت معاه ف الجامعة
"دعاء...ازيك"
"ازيك ياكريم عامل ايه"
"الحمدلله...ايه انتى هنا بتعملى ايه"
"كنت مقدمة على شغل هنا واتقبلت فكنت بقدم اوراقى"
"مبروك ...هنبقى زملاء تانى اهو"
"انت بتشتغل هنا؟"
"اه بقالى سنة تقريبا"
"انت مش باباك عنده صيدلية مشتغلتش معاه ليه"
"الشغل لوحدى احسن"
"اوك ياكريم...انا مبسوطة انى شفتك تانى"
"ربنا يخليكى...لو عايزة اى حاجة ابقى قوليلى...سلام"
"لو عايزة حاجة هقولك ازاى"
"هتقوليلى عادى"
"ايوه عادى ازاى يعنى "
"يعنى هكلمك ازاى ياكريم"
"هنا او ع التليفون"
وبنفاد صبر
"ماشى ياكريم باى باى ..انا لما اكون عايزاك ف حاجة هبقى اشوفك هنا لانى معييش تليفونك"
مشيت دعاء... وكريم دخل الشركة
                        ***************
كريم داخل البيت ... البيت هادى
مشى يتسحب لحد اوضة مامته
فتح الباب بشويش... بص عليها
شافها نايمة... قفل الباب
"كريييم"
دخل لها وقعد جنبها على السرير
"مكنتش عايز اصحيكى"
"انا كنت مستنياك"
"عاملة ايه النهاردة"
"الحمدلله"
"اتغديتى؟"
"لا مستنياك... انا طبخت النهاردة"
"ليه كده ياماما... انتى لما بتقفى بتتعبى"
"انت وباباك مستحملينى وانا على طول تعبانة...حبيت افرحكم"
"صحتك بالدنيا ياماما...هو بابا جاى ع الغدا؟"
"لا هييجى بالليل"
"هروح اغير هدومى واسخن الاكل وناكل سوا"
"طيب ياحبيبى"
                     ******************
كريم بيشيل الترابيزة اللى كان حاططها جنب السرير علشان يتغدوا عليها
"كملى يا كريم وبعدين"
"معرفش ياماما لما قلت لها كده قالت لى باى باى ومشيت"
وضحكت مامته
"انت مفهمتش انها بتقولك هات رقم تليفونك"
"انا بعد ماهى مشيت حسيت ان فيه حاجة ..ايه هى مخدتش بالى انها رقم التليفون"
"البنات تحب اللى يفهمها من غير ما تتكلم"
"وانا بقرا الفنجان ياماما...خلاص بقى هى حرة"
"حلوة؟"
"اشمعنى"
"بسأل يعنى"
"اه حلوة"
"تعرفها كويس"
"كانت زميلتى 5 سنين الكلية واعرفها عادى زى باقى الناس"
"انت مش هتفرحنى بيك قبل ما اموت"
"بعد الشر عليكى ياماما... انتى مش فرحانة بيا ولا ايه"
"عايزة اطمن عليك...تخطب وتتجوز "
"ربنا يسهل لما الاقى بنت الحلال"
رن جرس الباب قام كريم يفتح
"اهلا...اتفضلى ياعمتى"
"ازيك ياكريم...وازى ماما؟"
"الحمدلله...ادخلى لها... ف اوضتها"
دخلت جليلة ووراها كريم
"هو زياد فين ياعمتى...امبارح قالى هييجى"
"شوية كده وجاى"
                     *********************

مديحة فى اوضتها وبتدور ف الدولاب
تدخل لها شذى
"ماما كنت عايزة اقولك..."
وقطعت كلامها لما شافت مامتها بتدور
"بتدورى على ايه؟؟"
قعدت مديحة على السرير
"عمالة ادور يمكن الاقى فلوس كنت حاطاها هنا ولا هنا"
"انتى مش عارفة بتحطى الفلوس فين"
"لا عارفة...بس بقول يمكن كنت حاطة فلوس ف حتة تانية وناسية"
"اكيد الفلوس هتحطيها ف نفس المكان مش هترميها ف اى حتة"
"اعمل ايه بس ياربى"
"فى ايه؟؟"
"المصروف خلص ومش باقى غير 50 جنيه...مش عارفة اتصرف ازاى"
"زى ماكان بابا الله يرحمه بيتصرف"
"عمك صبحى كان بيدينا مصروف شهرى وباقى الحساب كان مع ابوكى الله يرحمه مكنتش اعرف بيتحاسبوا ازاى"
"خلاص..اتكلمى معاه"
"صح...لازم اعرف حساباتهم كانت ازاى علشان اعرف راسى من رجلى...انتوا محتاجين مصاريف... يا ضحاااااااااا"

جت ضحى على صوت مامتها
"نعم"
"روحى كده بيت عمك وقوليله انى عايزاه"
"عمى زمانه دلوقتى لسه مرجعش...ومراته غلسة مبتحبناش"
"روحى قوليلها انى عايزاه وتعالى"
"حاضر"
                        ********************
كريم ف الشركة الصبح...استدعاه مديره
"صباح الخير يادكتور"
"صباح النور ياكريم...انت دفعة دعاء رزق"
"اه"
"يعنى تعرفها"
"اعرفها"
"طب كويس... هتنزل معاك من النهاردة تدربها...اتوصى بيها وعلمها كويس علشان باباها صديق عزيز عليا"
"حاضر يادكتور"
"هبعتهالك على مكتبك لما تيجى...اتفضل"
                   *******************
ف نهاية اليوم... دعاء مع كريم
"شكرا ياكريم"
"العفو..بس على ايه"
"انك بتعلمنى الشغل بجد..اصل اشتغلت ف شركة قبل كده واللى كانوا معايا كان كل واحد بيخاف يعلم غيره"
"انا مش زيهم"
"ما انا عارفة"
"عارفة ايه؟"
"انك مش زى اى حد"
"عرفتى منين يعنى"
"انت ذكى وشاطر ف شغلك ياكريم بس ف حاجات تانية كتير مش ذكى خالص"
حس كريم انها عايزة تقول حاجة مش فاهمها
"عارفة ماما امبارح قالت لى ايه؟"
"قالت لك ايه"
"قالت لى البنات بتحب اللى يفهمها"
"وايه اللى خلاها تقولك كده"
"ابدا كنت بحكى لها عنك فقالت لى كده"
دعاء بفرحة"انت حكيتلها عنى..قلت لها ايه"
"عادى ...انا بحكى لها كل حاجة بتحصل معايا"
"اااااه طيب"
"دعاء ممكن اقولك على حاجة"
"اتفضل"
"مبحبش فى اللى يتعامل معايا انه يكون عايز يقول حاجة وميقولهاش... انا مبعرفش ادور ف خبايا الناس ... اللى عايزة تقوليه قوليهولى على طول انما بلاش فجأة الاقيكى اتغيرتى كده"
"ماشى"
كريم بيركن قدام الشركة...وقبل ماتنزل دعاء سألته
"انت مش خاطب صح؟؟"
                     ********************
مديحة ماشية فى البلد... قابلت حسنية ف الطريق
"مديحة...رايحة فين"
"رايحة بيت اخوكى"
"ليه فى حاجة"
"امبارح بعتله ضحى انى عايزاه مجاش ...بتصل بيه مبيردش عليا"
"انتى عايزاه ف ايه"
"عايزة فلوس يا حسنية...من يوم ماهر مامات وصبحى مطنش خالص ومتكلمش معايا ف اى حاجة"
حسنية ساكتة
"انتى متعرفيش كانوا بيتحاسبوا ازاى"
"مديحة...مش عايزاكى تتعشمى اوى ف صبحى"
"يعنى ايه؟"
"يعنى صبحى حاطط ايده على الوكالة بكل حساباتها ومحدش يعرف دخلياته ولا بيقول لحد الحقيقة"
"وماهر كان ساكت"
"الله يرحمه مكنش عايز الفلوس تدخل بيننا...ياما قلت له نقف انا وهو ونطالب صبحى بانه يقسم وكل واحد ياخد حقه كان بيقولى منخسرش اخونا علشان الفلوس"
"بس انا معنديش اى مصدر دخل غير الوكالة...انا وبناتى لينا حق مبنشحتش"
"اتكلمى معاه وشوفى هيقولك ايه...بس نصيحة متعانديهوش ف حاجة علشان ميعاندش معاكى ف الفلوس"


هناك 37 تعليقًا:

  1. جامده مووووووووووووووووووووووووووووووووووووت

    ردحذف
  2. حلوة يادينا كالعادة :)
    شكلها قصة جاامدة

    ردحذف
  3. شكلها حلوة
    بداية مبشرة
    وبالتوووووفيق

    ردحذف
  4. بجد جميله جدا تحسي انك شيفاها مش بتقراءيها

    ردحذف
    الردود
    1. حقيقى فعلا بصراحه كل القصص للى بقرأها نفس الحال تحس انك حد من ابطال الروايه وعايش وسطهم

      حذف

  5. واضح انها قصه جميله بس ياريت تحاولى تطولى الحلقه شويه ولا انتى بتقفلى على الاحداث عشان التشويق وكدا

    ردحذف
  6. جامده كيييييييييييييييييييك يادندونه

    ردحذف
  7. شكلها حلوه واكيد مش هتطلع وحشه عشان انتى يا دينا بجد بتكتبى قصص حلوه اوى

    ردحذف
  8. جمييييييييييييييييييييييييلة

    ردحذف
  9. 4klha gamelaaaaaaaaaaaaaaa yaret nhytha ts3ed

    ردحذف
  10. بداية موفقة يا دينا
    وان شاء الله تطلع قصة حلوة

    ردحذف
  11. 7elwa awe ya dodo w shklha htb2a gamda

    ردحذف
  12. حلللللللللللللللللللللللللللللللللللوة

    ردحذف
  13. حلوة اوووووووووووووووي

    ردحذف
  14. جميلة ياقمر كعادتك

    ادعوكِ لزيارة مدونتي المتواضعة
    وذكر رأيك في ( في دار المسنين )
    آخر كتاباتي حالة عشتها للأسف
    وتأثرت بها ولم أستطع نسيانها فقررت أن أكتبها
    علي هذا الرابط
    http://asmaafathy.blogspot.com/


    تحيــــــــــاتي
    كانت هنا ورحلت
    Asmaa Fathy

    ردحذف
  15. ابنتي العزيزة دينا ..انا باتابع قصصك من اول مذكرات حماة وياريتك تروحي هناك حاتلاقيني معلقة عندك تقريباً كل يوم ..ويسعدني اكون معاكي في القصة دي حلقة بحلقة وواضح انها جامدة وحلوة كالعادة ..تحياتي وشكري ومدونتي في انتظار زيارتك "اتمشى بين ضلوعي "http://etmashabaindolo3y.blogspot.comواتمنى ان تعجبك مواضيعها هي ومدونتي القلب الأخضراني..

    ردحذف
  16. روووووووووووووووووووووووعة بجد يا دينااا
    وبداااية حلووووووووووووة اوى اوى
    تسلم ايدك يا قمرى

    amira slama

    ردحذف
  17. جامده جدا بس
    ليه كريم شخصيته عبيط مش فاهم حاجه
    و الي محزني ضحى يعني عليها اتيتمت بدري

    ردحذف
  18. ايوا أخيرا هتابع معاكى قصة من أولها يا دينا
    دايما كنت بقرأ قصص انتى مخلصاها بحب جو التشويق وانى استنى الحلقة كدا

    يالا متتأخريش علينا فالحلقة الجاية

    ردحذف
  19. جمييييييله موت
    تسلم ايدك
    موجا

    ردحذف
  20. جميله اوى تسلم ايدك

    ردحذف
  21. حلووووووووووووووه بسنزلى الحلقات التانية بسرعة

    ردحذف
  22. جمييييييييييبلة جداااا

    ردحذف
  23. الله عليكي بجد
    صورك جميله اوي

    ردحذف
  24. انتى عسل قمرررراية كدة ... وبحبك اوى وببقي عايزة اعمل زيك ومبعرفشههههههههههههههههه..ربنا يسلم ايدك ياقمر

    ردحذف
  25. حلوه جدا

    ردحذف
  26. حلوة جدا بالتوفيق دائما دينا .. ودائما متابعة لأعمالك

    ردحذف
  27. حلوه جدا انتي بجد قصصك تجنن واكتر قصه عجبتني اقوى حب بجد فصه تحفه وكل قصصك جميله جدا ...... ربناريوفقك

    ردحذف
  28. اخييييييييييييييييييييييرا اجا اسمى ف حاجه هههههههههه
    شيـــــــــــماء

    ردحذف
  29. حلوووووووووه

    ردحذف
  30. حـلـوة اوى اوى :)

    ردحذف
  31. حلووووه بداية موفقة

    فاطمة

    ردحذف

قول رأيك بلاش تقرا وتقفل من سكات...ارائكم تهمنى