الأحد، 17 مارس 2013

بقينا عيلة... الحلقة 14

الحلقة 14
فى بيت ماجدة... البيت زحمة من ضيقه
ماجدة وجوزها وولادها... مديحة وولادها
ابراهيم وجليلة وزياد
كلهم فى انتظار المأذون
وكريم

ابراهيم يميل على زياد
"اتصل بيه كده تانى"
بيرد زياد وهو بيجرب بالموبايل
"والله كلمته كتير الموبايل مقفول"

رن جرس الباب...جه المأذون
وقعد...وبدأ فى اجراءاته
                     ********************

ماجدة فى المطبخ هى وشذى
"يالا يا شذى ...اطلعى بالصينية دى ورايا... علشان نقدم للمأذون قبل ما يمشى"
رن جرس الباب...قالت شذى
"مين لسه مجاش؟"
"اكيد كريم... روحى افتحى وارجعيلى"

شذى بتفتح الباب...وقفت مذهولة

"خالد!!"
خالد قدام الباب بيبص جوه البيت
"ايه؟؟ مكنتيش عايزانى آجى"

مديحة وهى قاعدة جنب ابراهيم...شايفة الباب على بُعد
شافت خالد... اللى اتفاجئت بيه
قامت من جنب ابراهيم وراحت لهم
مديحة"اهلا يا خالد اتفضل"
خالد وهو بيدخل
"انتوا عندكم ضيوف؟؟"
شذى بتحدى
"كتب كتاب ماما"
سكت خالد...متفاجئ ومش مصدق
فهمت مديحة سكوته... وانه جه صدفة لان شذى كانت قافلة تليفونها
مديحة"ادخل ياخالد...اتفضل"
                      ********************

خالد وشذى فى البلكونة
الاتنين ساندين ع السور
شذى بتبص لبعيد متجاهلة خالد
"انتى كمان ليكى عين تقلبى وشك كده"
"جيت ليه ياخالد"
"جيت ليه؟؟ دى كلمة تقوليها وانا اللى مقدرتش افضل معرفش عنك حاجة كده وجيت علشان وحشتينى"
"بصت له بطرف عنيها ورجعت بصت بره تانى
"والكلام اللى قلته على ماما انت ومامتك"
خالد وهو بيبص جوه على مديحة وابراهيم
"مش خلاص اتجوزت يا شذى...هى حرة"
"كان لزومهم ايه بقى الكلمتين اللى بجد زعلونى منك"
"انا جيت لحد عندك وزى ما ماما قالت بالظبط معاها حق"
"قالت ايه"
"انى لو جيت لك هتتفرعنى عليا"
"انا؟؟ ليه كده ياخالد...ليه كل حاجة مامتك تتدخل فيها"
"ماما بتتدخل ف حاجة...حرام عليكى هى علشان بتكلمك يبقى بتتدخل"
دخلت عليهم مديحة
"ايه... مالكم"
خالد"يرضيكى يا طنط شذى قافلة تليفونها ولا بتسأل ولا بتتكلم ولما اجيلها لحد عندها مبوزة ف وشى"
مديحة"ليه كده يا شذى"
شذى ساكتة مش قادرة تقول الكلام اللى قاله خالد ومامته
مديحة"احنا لازم ننزل يا خالد"
خالد"انا كمان لازم امشى علشان مرجعش طنطا متأخر"
مديحة"انا هدخل اخد شنطة الهدوم ...وانتوا خلصوا وحصلونى تحت... كان بودى اقولك تعالى معانا ياخالد بس لما تكون عايز تيجى لشذى ابقى تعالى لها هنا وانا هبقى اجى معاها"
خالد"مفيش مشكلة...لما اكون جاى نبقى نتقابل بره انا وشذى احسن"
مديحة"ماشى"
دخلت مديحة واضطرت شذى انها تسكت وتلم الموضوع
"ها.. لسه زعلانة"
"لا خلاص....بس ياريت مامتك متتدخلش بينا تانى وخصوصا متتكلمش عن ماما بالطريقة دى تانى"
"خلاص بقى ... انتم هتعيشوا عنده.. ليه مش هتقعدوا هنا"
"لازم نكون مع ماما"
"هو مطلق ولا متجوزش ولا ايه"
"مراته ماتت وعنده ولد"
خالد وهو بيبص جوه
"فين هو؟"
"مجاش"
"عنده كام سنة؟"
"معرفش ...هو صيدلى زى باباه وخاطب"
"يعنى شاب كبير مش عيل صغير"
"ايوه"
"وازاى هتعيشوا هناك... ازاى اسمحلك انك تعيشى مع واحد غريب"
"ايه ياخالد انا هعيش معاه لوحدى"
"لوحدك ولا مش لوحدك...ازاى مامتك متفكرش ف حاجة زى كده.. ده ميصحش ابدا...مامتك فكرت ف نفسها بس"
"تانى يا خالد... انت متعرفش حاجة عن ظروفنا علشان تتكلم كده"
"مالها ظروفكم يا شذى"

ماجدة دخلت لهم بالموبايل
"كلمى مامتك يا شذى"
اخدت شذى الموبايل
"ايوه ياماما...لا انا نازلة اهو...مع السلامة"
قفلت شذى الموبايل واخدته ماجدة
"ماما بتستعجلنى"
"مفيش فايدة برضه"
"كلها كام شهر وهسيب بيتهم خالص وهنبقى مع بعض"
"ومامتك مستنتش ليه"
"بص ياخالد... ماما وقفت قصاد عمى وسابت بيتنا وورثنا علشان احنا نتجوز ومحدش يتحكم فينا...زى ماهى حطت مصلحتى قبل كل حاجة انا عمرى ما هاجى عليها واظلمها"
"تظلميها ف ايه"
"مش لازم تعرف تفاصيل مالهاش لازمة... يالا لازم ننزل"
"انا هحاول ننجز ونخلص الشقة علشان متفضليش ف بيت غريب كتير"
                          *****************

زياد وجليلة قاعدين فى بيتهم
"هو كريم مقالكش حاجة"
"لا والله يا ماما...حتى معرفش ايه قفلة التليفون دى"
"انا قلقانة ليكون هيعمل مشكلة ولا حاجة...معكش نمرة دعاء"
"لا مش معايا"
"ربنا يستر وميحصلش مشاكل"
"مفتكرش كريم يعمل مشاكل...هو زعلان بس"
"ربنا يستر"
                   *********************

ابراهيم بيفتح باب الشقة... مديحة بتدخل هى والبنات
ضحى ماسكة ف ايد شذى
ضحى"الله ...ايه البيت الحلو ده...ده بيت جميل اوى"
ابراهيم بيضحك لها
"عجبك البيت يا ضحى..ده هيبقى بيتكم"
مديحة"تعالوا يا بنات اوريكم اوضتكم...عن اذنك يا ابراهيم"
دخلت مديحة ومعاها بناتها...

دخلوا الاوضة ...اوضة جديدة
دخلوا البنات فرحانين بالاوضة
شذى"الله يا ماما الاوضة حلوة فعلا"
مديحة"الحمدلله انها عجبتكم"
قعدت على طرف سرير... وكملت كلامها
"اقعدوا عايزة اتكلم معاكم"
قعدوا البنات على السرير اللى قصادها
"بصوا ...انتوا عارفين ان ابراهيم عنده ابن... احنا لسه منعرفوش وشكله كده بدل مجاش انه مش موافق او مش عايز ابوه يتجوز"
شذى"وهنعمل ايه يعنى"
مديحة"احنا ف حالنا ....لحد ما نشوف معاملته لينا ازاى"
شذى"سامعة يا ضحى"
ضحى"حاضر"
مديحة"وحاجة تانية كمان... اللى تدخل الحمام تقفل على نفسها...وانتوا هنا ف اوضتكم تقفلوا على نفسكم... مهما يكن فيه راجل غريب ف البيت ولازم تخلوا بالكم من نفسكم"
صوت ابراهيم"مدييييييييحة"
مديحة"يالا غيروا هدومكم وخليكم ف اوضتكم"
                        *******************

دعاء وكريم فى العربية
"ميرسى ياكيمو ع السهرة الحلوة"
"العفو...يالا اطلعى علشان اتأخرنا اوى الساعة بقت واحدة وربع"
"طب متنساش تفتح تليفونك علشان لو عايزة اكلمك"
"بكرة بقى يا دعاء"
"هتيجى تتغدا معانا بكرة"
"مش عارف...ولا اقولك طيب"
"باى ياحبيبى تصبح على خير"
"وانتى من اهله"
                      ******************

كريم بيفتح باب الشقة... الباب متفتحش معاه
جرب تانى...حس ان الباب مقفول من جوه
وقف لحظات...يفكر يضرب الجرس ولا يمشى
وهو بيفكر سمع صوت الترباس بيتفتح
"تعالى"
قالها ابراهيم وهو مكشر ف وشه
"انا اسف ...صحيتك؟"
دخل ابراهيم اوضة كريم...وكريم مشى وراه مستغرب طريقة باباه

لما وصل الاوضة...قلق من طريقة باباه
وقال لنفسه"لحقت تقلبه عليا"

"اقفل الباب ياكريم"
قفل كريم الباب"نعم يابابا"
"فيه ايه؟"
"مفيش حاجة"
"كنت فين...من امتى بتسهر بره كده...ومش كنت قايل انك جاى كتب الكتاب"
"كنت خارج مع دعاء وروحنا سينما"
"يعنى كنت مع دعاء لحد دلوقتى؟؟ هو كده يصح"
"استأذنت... ولو تأخيرى ضايقك انا اسف بس حبيت اجى متأخر علشان مضايقكوش"
فهم ابراهيم ان كريم قصد ميحضرش
"ماشى ياكريم...بس على الاقل كنت تتعرف ع الناس اللى عايشين معاك ف بيت واحد"
"الايام جاية كتير...زى ما قلت هنعيش ف بيت واحد يعنى هنتعرف اكيد"
"بكرة هنفطر كلنا مع بعض...متنزلش بدرى ونبقى ننزل على صلاة الجمعة مع بعض"
"ماشى"
"تصبح على خير"
                          **********************

شذى خارجة من الحمام... شافت مامتها خارجة من اوضتها
"صباح الخير ياماما"
"صباح النور ياحبيبتى...صحيتى امتى"
"لسه صاحية من شوية"
"اختك فين"
"نايمة"
"عايزاكى تساعدينى نعمل الفطار وبعد ما ينزلوا نبقى نعمل البيت...البيت مش عاجبنى خالص عايزين نعمله بايدينا"
"حاضر يا ماما..متقلقيش هيبقى زى الفل النهاردة"
                    **********************

كريم صحا من النوم...سامع صوت الدش
قاعد فى اوضته محرج يقوم ...سمع صوت باب الحمام اتفتح واللى فيه خرج
بيفكر يطلع ولا يفضل مستنى
الباب خبط عليه...واتفتح
"كريم صحيت"
"اه"
"طب يالا علشان الفطار اتحضر"
"حاضر"

السفرة عليها الفطار
ابراهيم على راس السفرة... يمينه مديحة جنبها شذى جنبها ضحى

جه كريم يقعد
ابراهيم"كريم ابنى... مديحة شذى ضحى"

كريم مكنش هيبص لهم...لما باباه عرفهم على بعض
اضطر يبص لهم ويحييهم بهزة راسه

شذى اول ما شافت كريم...وشافته بيبص لها

هما الاتنين ف نفس اللحظة
               فلاش باك
شذى بتحاول تخلص دراعها من مجدى...معرفتش
شدها مجدى ناحية العربية وبيزق كريم بايده التانية
كريم"انت هتخطف البنت م الشارع"
شذى بتعيط بخوف وتقول لمجدى"سيبنى... ملكش دعوة بيا"
حاول كريم يخلصها من ايده... طلع مجدى بسرعة مطواة من جيبه
ضرب بيها كريم ف جنبه
كريم مسك مكان الدم... بيبص لشذى
شذى بتصرخ
"عملت ايه يا مجدى ...قتلت الراجل"
كريم بيقع ع الارض
مجدى"اركبى بسرعة هنروح ف داهية"
ركبت شذى مع مجدى بسرعة
كريم بيبص عليهم وهما بيركبوا العربية
شاف ناس كتير اتجمعوا حواليه..وسامع اصوات
"اسعاااااف... حد يلحق الراجل بيموت"
وكانت اخر حاجة تشوفها عيون كريم


صوت ابراهيم
"مالك ياكريم... انت تعرف شذى قبل كده"
انتبه كريم انه كان بيبص لها
"لا معرفهاش"

اثناء الفطار...
شذى فرحت انها شافت كريم كويس ومحصلوش حاجة من ضربة المطواة... قررت انها هتعتذرله عن اللى حصل وتفهمه الموقف

كريم وهو بيفطر بيفكر
"ايه اللى بابا عمله ده... اخر حاجة كنت اتوقعها الاقيها هنا... لو كنت شفتها ف اى مكان مكنتش هسيبها الا لما ابلغ عنها... اعمل ايه اسكت ولا ابلغ عنها وهى هتجيب الواد اللى كان معاها؟؟"

ابراهيم"كريم انت سرحان مبتاكلش ليه... احنا من النهاردة بقينا عيلة واحدة...كريم شذى وضحى اخواتك وانتوا يابنات كريم يبقى اخوكم... وطبعا يامديحة مش هوصيكى على كريم...كريم ده اللى يفرحه يفرحنى واللى يزعله يزعلنى"
مديحة بود "اكيد... قولى ياكريم فيه حاجة معينة عايزها ع الغدا"
كريم"شكرا..انا معزوم ع الغدا النهاردة... الحمدلله"
وقام كريم من ع الفطار
ابراهيم"انت مكلتش حاجة"
كريم"الحمدلله اكلت... انا ف اوضتى يا بابا وقبل ماتنزل قولى"

هناك 19 تعليقًا:

  1. ياه يا دينا لسه هانتستنى الحلقة الجاية.
    انتى ليه بتضيعى جزء من الحلقة فى تكرينا بالحلقة اللى فاتت
    يا دينا احنا بنفضل نعيد فى الحلقات بنصبر نفسنا

    ردحذف
  2. جاااااااااااااااااااامده جداااااااا

    ردحذف
  3. اووبا بقي اوبا يا فنانه الحلقه جمده جداااااااااااااااااااااااااااااااااااااااا

    ردحذف
  4. حلوووووووووووووووووة اوى

    ردحذف
  5. جميله اوى بس هما كريم و شذى هيحبوا بعض و يتجوزوا صح؟

    ردحذف
  6. ايه الرخامة دي هههههههههههههههههههههه يا جدعاااااااااااااان هاكسر الشاشة عايز الحلقة الجديدة دلوقتي

    ردحذف
  7. سوري على كلمة رخامة دي بس بجد انتي رائعة :)

    ردحذف
  8. دينا حلقاااااااااااااتك بقت قصيرة اوووووووووووووووووووى

    جــــــوبــا

    ردحذف
  9. جاااااااااااااااااااااااااااامدة جدا الحلقه تسلمى يا قمر بس التشويق للحلقه بصراحه بيجنن الواحد

    ردحذف
  10. عاوزه الحلقه الجديده ماليش دعوه :((((((

    ردحذف
  11. حلوة جداااا وعايزة الحلقة الجديدة بسرعة بقي
    بس طولي الحلقات شويتين كتييير كدا
    تسلم ايديك يا جميل

    ردحذف
  12. mynf3sh keda ya dina e7na nstna kol da w fel a5er el 7ba doool :(

    ردحذف
  13. الأحداث والقصة جميلة قوي يا دينا

    ردحذف
  14. بجد انتى كاتبة عظيمة جدا ربنا يوفقك ومن نجاح الى نجاح ان شاء الله

    ردحذف
  15. رووووووووووووووووووعة تحقففففففففففففة بجد
    تسلم ايدك يا قمرى

    amira slama

    ردحذف
  16. تسلم ايداكى يا دودو كان عندى مشكلة فى الصفحة ومكنتش باعرف اكتب كومنتات بقالى كتييير على العموم القصة رائعة استمرييييييييى
    dentist aya

    ردحذف
  17. حلووووووووووة اووووووووووووووووي

    ردحذف
  18. رووووووووعه


    فاطمة

    ردحذف
  19. ااااااااه حرام علي يا دينا ااه مش عايزه اعلق عايزه اشوف اللي بعده عاطول بصراحه شكلها هتحلو يا حماده

    ردحذف

قول رأيك بلاش تقرا وتقفل من سكات...ارائكم تهمنى