الأربعاء، 20 مارس 2013

بقينا عيلة... الحلقة 18

الحلقة 18
"هو اهل خطيب شذى من طنطا صح؟"
"اه"
"وكليتها هناك وشقته هناك؟؟"
"اه"
"انا شايف ان الافضل تكتبوا الكتاب قبل الدراسة... يعنى علشان لما تروح هناك نبقى مطمنين"
"بس انا بثق في شذى...انا مربياها كويس"
"مقلتش حاجة... بس كده أأمن ونبقى مطمنين عليها اكتر"
"بالعكس... لما تروح جامعتها هناك وهى مكتوب كتابها يعنى مراته انا اقلق عليها اكتر... انما وهى مخطوبة هتبقى فيه حدود"
"خلاص انتى حرة"
"زعلت؟"
"لا... بس بخاف على البنات...هى دلوقتى قاعدة ف البيت مبتروحش ولا بتيجى وفين وفين لما بييجى القاهرة ويخرجوا شوية... انما لما الدراسة هتبدأ هتبقى كل يوم هناك وانتى عارفة طيش الشباب"
"بس عارفة اخلاق بنتى اكتر"
"خلاص براحتك يا مديحة انتى حرة ف بنتك"
                     ******************

على الفطار... التوتر بين الموجودين واضح
مديحة وابراهيم كل واحد فيهم بيفكر فى الحوار اللى دار بينهم
مديحة اتضايقت لانه شكك ف اخلاق شذى
ابراهيم اتضايق ان مديحة مسمعتش كلامه وكتبت الكتاب علشان يرتاح من اى مشاكل ممكن تحصل

كريم وشذى محرجين من بعد الحوار اللى كان شبه صريح عن علاقتهم ببعض قبل الفطار
كريم محرج من انها سمعت كلامه مع دعاء عليها فبيتجنب مواجهتها ولو بالنظر ليها
شذى احساسها بالاهانة مخليها مش قادرة ترفع راسها وبتعد الايام اللى باقية لحد ما تعدى وتمشى من البيت خالص

ضحى حاسة بجو التوتر العام ومش فاهمة حاجة
كل ما تكلم حد يرد عليها بكلام بسيط فتسكت
                     *****************

التوتر بين مديحة وابراهيم راح لوحده مع التعامل اليومى
ومحدش فيهم فتح الموضوع تانى

شذى وكريم مفيش اى كلام بينهم وبيتجنبوا بعض
ضحى وكريم علاقتهم الاخوية بتقوى كل يوم عن اللى قبله
شذى وخالد علاقتهم عادية مجرد تليفونات يومية فى المواعيد اللى بيكون خالد فاضى فيها
                ******************

يوم الخطوبة

كريم خارج من اوضته...لابس بدلة الفرح
مديحة وجليلة اول ما شافوه زغرطوا
كريم ضحك
"حلوة البدلة"
حضنته جليلة وهى بتباركله
"انت اللى محلى البدلة يا حبيبى ربنا يسعدك يارب"
بص لمديحة
"عمتى لازم تجاملنى طبعا"
بصت له مديحة بفرحة وهى كمان بتحضنه وتباركله
"الف مبروك ياكريم...عمتك قالت الحقيقة مكذبتش"
رن موبايل كريم...رد
"ايه يابنى...نازل اهو...سلام"
"ده زياد...يالا متتأخروش"
جليلة"متقلقش... ابراهيم يخلص لبس وهننزل نروح نجيب البنات من الكوافير ونروح ع القاعة...هنسبقك متخافش"
كريم"عمتى متنسيش الشبكة"
مديحة"متقلقش ياكريم انا فاكراها"
                       *****************

شذى لابسة فستان سواريه ولفة طرحتها مناسبة للفستان
ضحى لابسة فستان ابيض وعاملة شعرها
دخلوا القاعة مع ابراهيم وجليلة ومديحة

شذى بتبص حواليها... قاعة الفرح وشياكة ورقة كل حاجة فيها تشد العين وتُشعر بالراحة
قعدوا على ترابيزة قريبة من الكوشة والبيست
                  ********************

كريم وزياد بعد ما خلصوا الكوافير بتاعهم
راحوا ياخدوا دعاء من الكوافير

كريم واقف مستنيها...وزياد جنبه
سمع زغاريط... وشاف دعاء

اول ما عينه جت على دعاء...بعد ما كان مبتسم قفل بؤه تانى
بص لزياد وزياد بص له
والاتنين قالوا ف نفس الوقت
"مين دى"
قربت دعاء ووراها صحابها
"كيمو مالك واقف كده ليه...ايه رأيك"
زياد سبقهم ع العربية
"ايه ده يادعاء... ايه الفستان ده"
"ماله؟؟ مش عاجبك"
"ده مش ممكن يكون فستان ده قميص نوم"
"ايه الغلاسة دى...هزارك بايخ على فكرة"
"هزار ايه... انتى مش مكسوفة وانتى لابسة كده... انتى فيكى ايه متغطى..ضهرك وصدرك ودراعاتك... والله انا مكسوف ابصلك وانا بكلمك"
"ايه ياكريم مش عروسة وده فرحى"
"هى العروسة لازم تقلع؟ ايه علاقة الفرحة بالفضيحة"
"انا مش فاهمة انت متفاجئ كده ليه... هو انا قلتلك هتحجب مثلا ولا البس بكم"
"انتى اه مش محجبة بس لبسك معقول مش كده ابدا"
"هنفضل واقفين ف الشارع كده...صاحباتى ف عربياتهم مستنيينا يالا وبعدين نبقى نتكلم ف الموضوع ده"
                      ******************

وصلوا كريم ودعاء القاعة...
ابراهيم اول ما شافهم
"ايه اللى دعاء عاملاه ف نفسها كده...ايه الفضايح دى"
بصت مديحة وجليلة لبعض... شذى بصت علي دعاء
اتحرجت من منظرها... بصت على كريم شافته وهو مكشر
ضحى جريت على كريم ومشيت جنبه لحد الكوشة

جه زياد سلم عليهم وقعد معاهم
ابراهيم"هو كريم سكت لها ع المنظر ده"
زياد"كريم اتفاجئ ياخالى وشايفه فضل يتكلم معاها شكلهم شدوا مع بعض"
ابراهيم"هى اتهبلت ولا ايه"
زياد"وشدوا كمان وهما بيتصوروا"
جليلة"ليه؟"
زياد"كانت عمالة تضحك وتهزر مع المصور وبتقول صاحبها من ع الفيس"
جليلة ومديحة بصوا لبعض وضحكوا ضحك مكتوم
شذى قاعدة بتسمع لا بتشارك ف الكلام ولا بتبص عليهم

اثناء الرقص السلو... بصت شذى عليهم
شافت كريم وهو ساكت ومكشر ودعاء بتكلمه شكلها بتراضيه

قام ابراهيم يقعد مع اصحابه
وقامت جليلة تعرف مديحة على قرايبهم اللى متعرفهمش
وبدأ الدى جى ف الاغانى العالية
زياد وهو جنب شذى مال عليها
"عقبالك"
"قريب ان شاءالله عقبالك انت"
"يارب... ايه رأيك ف العروسة"
"حلوة ربنا يسعدهم"
التفت زياد على الصوت العالى
"اوباااا ولعت"
بصت شذى على البيست
شافت دعاء بترقص هى واصحابها وكريم قاعد لوحده ع الكوشة
دورت وشها تانى وبصت قدامها
"شذى انتى زعلانة منى؟"
"انا؟لا ليه"
"اصلك قاعدة كده يعنى مش فاكة"
قالت وهى بتهزر
"افك ازاى اقوم ارقص مثلا"
"الله الله بقينا بنرد اهو"
"ما انا ليا زمايل واصحاب مش مقفلة"
"احم احم...قلبك اسود"
ضحكت
"لا والله مش سواد قلب ولا حاجة... انت بس كنت بتخضنى بهزارك.. واحنا مكناش نعرف بعض اوى"
"ودلوقتى ممكن اهزر عادى من غير ما تتخضى"
"هههههه اه بقينا قرايب بقى وكده"
"ماشى ياقريبتى...اقولك سر"
"قول"
"انتى احلى من دعاء 100 مرة"
"الله يكرمك"
"مش بجاملك ..ولا بعاكسك برضه علشان متقفشيش"
"احلى ايه بس ده انا الفلاحة اللى جاية من ورا الجاموسة واقل منها ف كل حاجة"
قالتها شذى بمرارة وهى بتفتكر كلامهم يوم العزومة
قبل ما يرد زياد عليها...قاطعتهم ضحى وهى بتخبط على كتفه
"كريم عايزك"

قام زياد لكريم... حس بيه وهو قاعد متغاظ
"ايه ياكيمو مالك"
"ناديلى بتاع الدى جى ده"
"فى ايه بس"
"روح قوله يشغل اغانى هادية ...خليها تتهد وتقعد"
"حاضر بس روَق"
                      **********************

فى نهاية الفرح... كلهم نازلين
زياد"ماتيجوا يا شذى انتى وضحى معانا ف العربية"
بصت دعاء لزياد وهى بتقلب وشها
شافتها شذى
"لا شكرا انا هروح مع ماما"
كريم"تيجى يا دودو"
ضحى"ماما اروح معاهم"
مديحة"انتوا رايحين فين"
دعاء"هنتعشا وبعدين نروح...روحى انتى علشان متتأخريش"
كريم بحسم"لا مش هنتعشا...يالا ياضحى هنوصل دعاء ونروح... متخافيش ياطنط مش هنتأخر"
مديحة"طيب ... هتقدرى تسهرى اكتر من كده"
ضحى"اه"

راحوا ع العربية
ركبت ضحى جنب زياد
ولما ركبوا دعاء وكريم
"ايه اللى جابها دى...وليه مش هنتعشا مع بعض"
"اسكتى علشان لسه فيه كلام كتير لازم يتقال...بس مش وقته"
"بقولك ايه كفاية قاعد قالب وشك طول الفرح خليت كل الناس اخدوا بالهم"
"والله...وانتى مخدتيش بالك الا بعد ماعملتى كل اللى عايزاه"
"ماشى ياكريم ... هنتكلم لما نروح مش دلوقتى"

وصلها زياد عند بيتها... نزل معاها كريم
طلعت ورجع كريم...بص على ضحى
"نامت؟"
"اه ..العربية مرجحتها لحد مانامت... مالك ياكريم خلاص الليلة عدت متكبرش الموضوع"
"عدت ايه...بعد ما الناس اتفرجت علينا"
"الناس بتنسى"
"ده حتى بابا جه قالى خليها تقعد شوية وهى مفيش فايدة"
"هما البنات كده يسمعوا اغانى يشتغلوا لوحدهم كبر دماغك"
"ما شذى كانت قاعدة اهى مقامتش من مكانها... انا كنت متخيل العكس انى هلاقى شذى عاملة البدع علشان تلفت نظر الناس ليها"
"وهى تلفت نظر الناس ليها ليه"
"هى حرة مليش دعوة بيها...المهم انا شايفك طول الفرح قاعد تتكلم وتهزر معاها...كل ما اناديلك الاقيك مش معايا خالص"
"اه فعلا كنا بنتكلم كتير ...لاول مرة"
"عايز اقولك حاجة... خلى بالك من معاملتك معاها...متتغرش فيها شكلها غير حقيقتها"
"يعنى ايه غير حقيقتها...انت تعرف عنها حاجة وحشة"
"اه...هحكيلك شذى دى طلعت مين"
                     *******************

شذى بعد ما غيرت هدومها...بتبص ف الموبايل
"يااااه 18 ميسد كول من خالد"
خرجت البلكونة وقفلت وراها...علشان تتكلم براحتها
واتصلت بخالد
"ازيك ياخالد"
"ازيك ياخالد.... لسه فاكرة تتصلى "
"اسفة والله ما سمعته خالص ما انت عارف انى كنت ف فرح"
"انتى تروحى فرح وانا افضل مرزوع هنا اكل ف نفسى"
"ليه بس... بقولك والله ما سمعته"
"لما مسمعتيهوش مكنتيش بتبصى فيه ليه تشوفينى اتصلت ولا لا"
"معلش انا اسفة... بلاش نكد بقى وخلينى احكيلك على الفرح شوية"
"ااااه انتى جاية فايقة ورايقة وانا ورايا شغل الصبح"
"خلاص ياخالد نام انت وبكرة نتكلم"
"طب احكى عايزة تقولى ايه"
"الفرح كان حلو اوى وقعدت اتخيل فرحنا... هو احنا هنعمل فرحنا فين"
"فرح !! انتى هتروحى تبصى للناس وتيجى على دماغى"
"ليه بتقول كده...انا عايزة افرح معاك"
"فرحتنا ف بيتنا مش ف الفرح"
"اوعى تقولى مش هنعمل فرح"
"اعمل فرح ولا اكمل توضيب الشقة انتى فاكرانى بطبع فلوس"
"مش ملاحظ انك عمال تهاجمنى وانا مقلتش حاجة غلط"
"مش بهاجمك...انا بس عايز افكرك واقولك عيشى عيشة اهلك مش قعدتك ف مصر هتيجى على دماغى"
"انا غلطانة انى بتكلم معاك على اللى جوايا"
"اه غلطانة... صحتينى علشان تنكدى عليا ياريتك ماكنتى اتصلتى"
"ماشى ياخالد انا اسفة انى اتصلت...مع السلامة"
"مع السلامة"
قفلت معاه... وحست انها مخنوقة وان مفيش حد خالص دلوقتى ممكن تتكلم معاه ولا تحكيله
كانت قاعدة على كرسى من الكراسى... مقامتش من مكانها
لان دموعها والهم اللى على قلبها ...خلاها اتقل من انها تقوم
                     ********************

زياد بيركن قدام البيت...وضحى لسه نايمة
زياد"على فكرة خالد ده خطيبها...واللى عرفته من ماما ان لها ابن عم صايع كان عايز يتجوزها بالعافية علشان كده حصلت مشاكل وجم على هنا واتخطبت لخطيبها ده... ما انت عارف طنط ماجدة صاحبة ماما اوى وحكت لها وهى اللى حكت لى... اكيد اللى ضربك ده ابن عمها"
"ولنفرض انه ابن عمها...تهرب بالطريقة دى وانا كنت بدافع عنها"
"منعرفش يا كريم هى فكرت ف ايه ساعتها... بس حرام تظلمها البت دى مؤدبة وغلبانة غير ما انت فاكر"
"يمكن... خد بقى انت العربية وابقى جيبها بكرة"
"وشغلك"
"لا انا اجازة... ضحى...ضحى قومى"
صحيت ضحى بتبص حواليها
"يالا يا دودو وصلنا البيت"
نزلت ومسكت ف ايد كريم وهى بين النوم واليقظة
مشى زياد بالعربية وطلع كريم وضحى البيت


هناك 32 تعليقًا:

  1. تحفة بجد حضرتك مبدعة المفروض ينزلوا لك كتب مسلسلات يعنى لانك بجد مبدعة

    ردحذف
  2. حلوه يا دودو

    ردحذف
  3. حلوووووووووووووووه اوووووي ومستنيه
    الحلقه التانيه علي نار ونفسي
    كريم يفكر في الفرق بين شذي ودعاء
    ويندم انو فكر وحش في شذي متخيله لما يطلع ويلاقي
    شذي بتعيط يقعد ويتكلم معاها الحلقه صغيره
    اووووووووووي بجد عايزين احداث اكتر :(

    ♥ YaSsO ♥

    ردحذف
    الردود
    1. ايون انا معاها جداااااااااا

      حذف
  4. نزلى حلقه كمان يا دينا

    ردحذف
  5. حرام بقى مكملتيش ليه يادودو

    ردحذف
  6. حلوة اوى :)

    بس لسه هستنى يومين :(((((((((

    ردحذف
  7. واااااااااااااااااااااااو

    ردحذف
  8. عظمة على عظمة على عظمة :)))))

    ردحذف
  9. أنا أول كومنت ^_^ تحفة يا ديدي ما فيش كلام

    ردحذف
  10. اخيرا يا دينا الحمدلله سمعتى كلام القراء شكرا جدل على تنزيل الحلقات زى زمان و الاحداث اطول

    ردحذف
  11. روووووووووعه جدا كان نفسى تكون اطول شويه يا ريت تنزلى حلقه كمان وتسلم ايديك يا فنانه

    ردحذف
  12. حلوة اوى كل حلقاتك بتعجبنى اوى انا بستنا لغاية متنازللى الحلقة الجديدةبفارغ الصبر وبنتى كمان










    ردحذف
  13. حلوة اوي يا دودو بجد بجد تسلم ايدك قمه الابداع بس ياريت الحلقه تكون طويله شويه بللللللللللللللللليز

    ابتهال

    ردحذف
  14. اقسم بالله اول مرة اقرالك حاجة يا دينا بس بجد نو كومنت :D

    ردحذف
  15. تسلم اديكى يامبدعه

    ردحذف
  16. الحلقه تحفه يا دينا ...... تسلم ايديكي . مبدعه كالعاده

    ردحذف
  17. السؤال الى بيطرح نفسو هوا بعد اليوميات دى ما تخلص هتنزلى يوميات تانيه عشان نتابعها باردو ولا ايه بئــــــا

    دعاء :)

    ردحذف
  18. تححححححححححححححححححححححححححفة جداااااااااا انا مش عارفة ازاي هستني ليوم السبت بقاااااااااااااا :(

    ردحذف
  19. انااول مرة اكتب فيها كومنت بس كل اليوميات مفيش كلام هقدر اقوله عشان يوصفلك اعجابى باليوميات الي بتكتيبيها وانا اسفا ان انا طولت فى الكلام

    ردحذف
  20. فين حلقه انهارده؟؟
    و الحلفات فصيره اوى كده ليه :(

    ردحذف
  21. جمييييلة اوى يا دينا امتة الحلقة التانية بقي

    ردحذف
  22. تحفة جدا بس انا وصلت لل 18 ومش عارفة اجيب الباقى

    ردحذف
  23. لا طولييها شويه بقى عشان خاطري وخلي في أحداث كتيير ، اتأخرتي أوي كمان :( يلا يا دوندون متشوقيناش اكتر من كده

    ردحذف
  24. فين الحلقه الجديده ؟
    مفيش امبارح ولا انهارده ؟؟؟؟
    حرااااااااااام
    كلنا بنطلب تطولى الحلقه شويه ... ونزلى الحلقه الجديده بقى :( :(

    ردحذف
  25. yalla b2a feen el 7l2a el gdeda dh ana mstnyaha 3la naaaar

    ردحذف
  26. keda kteeeer aweeee.feen el 7l2aaat ? yla ya dina nzleha bsr3a w ya reeeet 2 3wdena ba2a :D

    ردحذف
  27. feeeeeeen b2a a7na al sabt aho

    doaa

    ردحذف
  28. انا كل مرة بتشد انى اقرا الحلقة اللى بعدها اكتر من الاول

    ردحذف
  29. و انا كمان اانا شكلى كش هنام :D

    ردحذف
  30. انا من سات ما بدات اقرا ونا مش عارفه اقف ميه ميه يا دينا

    ردحذف

قول رأيك بلاش تقرا وتقفل من سكات...ارائكم تهمنى