السبت، 23 مارس 2013

بقينا عيلة... الحلقة 19

الحلقة 19
كريم داخل البيت... ماسك ضحى ف ايده وبيسندها
ضحى ماشية معاه بتنعس
"ضحى... ادخلى نامى...شكلهم ناموا"
دخلت ضحى تجرى على اوضتها

شذى وهى ف البلكونة سمعت صوت الباب
كانت هتدخل...ورجعت ف كلامها
فكرت تستنى لما كريم يدخل اوضته علشان ميتقابلوش

كريم قبل مايدخل رن تليفونه...وشاف انها دعاء
رد وهو قاعد فى الانتريه...اقرب مكان للبلكونة
"الو...نعم"
"وصلت"
"اه وصلت"
"ممكن اعرف فيه ايه؟"
"انتى بتستعبطى يادعاء... انتى مش عارفة فيه ايه؟؟ ما انا قلتلك الف مرة ف ايه"
"بص بقى ياكريم.... انت اوفر كده ف كل حاجة... عروسة وفرحانة ماتسيبنى افرح"
"تانى هتقولى افرح... هو اللى يفرح يعمل اللى عملتيه انا بقيت مكسوف من بابا وعيلتى واصحابى... مش قادر الاقى مبرر للى عملتيه ده"
"خلاص بقى اللى حصل حصل"
"يعنى كمان بتقاوحى ومش معترفة انك غلطتى"
"غلطت ولا مغلطتش هنعيد الفرح تانى"
"طريقة استهتارك دى بتستفزنى...وبعدين تعالى هنا فهمينى لما زياد قال للدى جى يشغل اغانى هادية ... ايه اللى حصل وقمتى تانى ترقصى ازاى"
"عادى يعنى...ماهو انت مش هتمشى رأيك وخلاص..انت بعت ابن عمتك وانا بعت بابا"
"ده تحدى بقى"
"مش تحدى بس انت اللى بدأت"
"والله العظيم ماعارف اقولك على ايه ولا ايه... حتى باباكى بيشجعك مش كفاية موقف الشبكة اللى احرجتونى بيه"
"دى فيها ايه كمان...بابا وجاب لى هدية ...اعترض بقى"
"وليه تفاجئينى وليه مع الشبكة يجيبلك طقم شكله اغلى من اللى انا جايبه"
"انت غيران علشان بابا جابلى هدية اغلى من هديتك وبتطلعها فى الفستان والرقص"
وبمنتهى الضيق والغيظ والنرفزة
"انتى غبية اوى يادعاء...معندكيش اى تمييز"
"وانت نكدى اوى ياكريم... زهقتنى"
"وعلى ايه لاازهقك ولا تزهقينى...سلام"
وقفل قبل ماسمع ردها...

شذى فى البلكونة... اتحبست بالمكالمة اللى بدأت ومقدرتش تطلع
وفكرت انها تستنى لما كريم يخلص المكالمة ويدخل ينام تبقى تروح اوضتها

كريم بعد ماقفل مع دعاء...كان مستغربها اوى
"انا ايه اللى عملته ف نفسى ده...كان مالى ومال الخطوبة والجواز والكلام ده...هى مالها اتقلبت كده ليه"
حس بخنقة... راح يفتح البلكونة يقف فيها شوية

فتح البلكونة فجأة
قامت شذى متفاجئة من وجوده

لحظات الاتنين واقفين فيها متفاجئين بوجود بعض
"انتى بتعملى ايه هنا؟"
"انا قاعدة هنا من بدرى"
"يعنى سمعتينى وانا بتكلم"
"انا مقصدتش اسمعك"
"متهيألى عيب اوى انك تقعدى مستخبية ف الضلمة وتسمحى لنفسك انك تسمعى مكالمتى مع خطيبتى"

شذى مش ملاحقة على الاتهامات اللى بيوجهالها كل مايشوفها
جت تتكلم...اتخنق صوتها جواها... جريت وسابته وهى بتعيط
                       ****************

تانى يوم مديحة وابراهيم وضحى بيفطروا
ابراهيم"فين شذى وكريم"
مديحة"نايمين"
جه كريم وهما بيفطروا قعد معاهم
كريم"صباح الخير"
ابراهيم"صباح النور....مبروك عليك ياعريس"
كريم باحراج"والله يابابا انا اتفاجئت بكل اللى حصل امبارح"
ابراهيم"دعاء زودتها اوى وانت ان معملتش وقفة م الاول يبقى عمرك ماهيكون لك كلمة عليها... احنا متعودناش على الجرأة دى ياكريم"
كريم"معاك حق يابابا... زودتها اوى فعلا"
مديحة وهى بتحاول تغير الموضوع
"ابراهيم...هخلص البيت وانزل اجيب شوية حاجات للبيت"
ابراهيم وهو قايم
"ابقى عدى عليا ف الصيدلية نروح بالعربية بدل ماتروحى لوحدك ونبقى نرجع مع بعض ع الغدا"
مديحة"حاضر"
قامت مديحة مع ابراهيم
كريم قاعد قدام الاكل ومبياكلش...ضحى خلصت وقامت
قام كريم من ع الاكل
                       ******************

مديحة وهى لابسة دخلت اوضة شذى
"شذى قومى...انتى ليه نايمة لحد دلوقتى"
"مفيش ياماما ...نمت متأخر بس"
"مال عينيكى انتى معيطة؟"
"شوية كده بس"
"شوية ايه؟؟مالك يا شذى"
"خالد ضايقنى شوية امبارح"
"ايه اللى حصل"
"كلام عادى وقَلب ...انتى نازلة"
"اه...كنت عايزاكى تقومى تكملى الاكل علشان ابراهيم هيرجع معايا ع الغدا...بس لو مش قادرة خليكى"
"لا هقوم اهو... روحى انتى"
                 ********************

شذى داخلة المطبخ...شافت كريم وضحى بيلعبوا ع الكمبيوتر
تجاهلتهم ودخلت المطبخ تكمل اللى مديحة بدأته قبل ما تنزل

رن موبايل شذى...سمعته ضحى وجابتهولها
"الو... شيمو وحشتينى اوى.. كويسة.. جاية بجد؟؟ اه طبعا لازم اشوفك... انا محتاجة اقعد اتكلم معاكى كتير..لا مش ف التليفون لازم نقعد مع بعض... هتيجى امتى؟ اكيد ماما مش هتقول لأ... لما توصلى عرفينى... متقلقيش هتبقى تعرفى...

كريم وهو قاعد مع ضحى
"دودو انا زهقت لعب...ماتتفرجى انتى على اى حاجة"
"طيب"
"هدخل اعمل كوباية شاى واقعد اقرا ف اوضتى شوية لو عايزانى ابقى تعاليلى"
"ماشى"

كريم داخل المطبخ... وشذى بتتكلم بصوت واطى وضهرها للباب
"لا مش جوز ماما...ابنه يا شيماء بيعاملنى معاملة صعبة اوى... كرهت حياتى بسببه.. اللى مصبرنى ان خالد بيخلص الشقة وكلها شهرين تلاتة وامشى من هنا خالص... لما ابقى اشوفك هحيلك... مع السلامة"

بِعد كريم عن المطبخ قبل ما شذى تشوفه
راح قعد وهو بيفكر ف كلام شذى
واترددت كلمة
"كرهت حياتى بسببه"
حس بالذنب ...وف نفس الوقت افتكر كلام زياد عنها

دخل كريم المطبخ... اتفاجئ بشذى انها قاعدة تعيط
لما شافته مسحت دموعها بسرعة
"فى ايه مالك"
"مفيش...عايز حاجة؟"
"اه كنت هعمل كوباية شاى"
"طب اتفضل انت وانا هعملهولك"
"لا شكرا...هعمله انا"
"براحتك"
شذى هتخرج من المطبخ
"لو بتعيطى بسبب كلامى امبارح بالليل... انا اسف"
"انا مكنتش قاصدة انى اتصنت عليك ولا اسمع كلامك مع خطيبتك... انا كنت قاعدة من قبل ما انت تيجى ولما رجعت وجتلك المكالمة اتكسفت اطلع ...انا عارفة انك مش هتقبل اعتذارى زى ما مقبلتوش قبل كده"
"انا يومها كنت بدافع عنك وانتى مقدرتيش ده"
"وانا يومها كنت خايفة"
"بس مشيتى معاه...انا كنت فاكره بيخطفك طلعتى تعرفيه"
"هو فعلا كان عايزنى اركب معاه بالعافية ... اللى عمله معاك ربكنى...وخوفنى ويومها كمان هددنى ... انا لحد دلوقتى مش عارفة اتصرفت صح ولا غلط بس مكنش عندى وقت للتفكير...انا خفت اوى ساعتها...انا افتكرتك لاقدر الله يعنى... ولما شفتك هنا حمدت ربنا انك كويس"
"الحمدلله"

رن موبايل شذى تانى... ردت
"الو... ايوه ياخالد"
وخرجت م المطبخ تكمل كلامها
                        ********************

دعاء بتقوم م النوم...شافت مامتها فى الاوضة
"ماما الساعة كام"
"2"
"يااااه انا محستش"
"من التعب يا حبيبتى انتى تعبتى اوى امبارح"
"ونمت متأخر كمان من كريم وعكننته"
"ليه ايه اللى حصل...ده بوزه كان شبرين طول الفرح"
"انا عارفة... شوية يقولى الفستان وشوية يقولى الرقص وشوية يقولى باباكى جابلط طقم غالى"
"ياسلاااام هو ماله"
"اهو بيدور على اى نكد وخلاص"
"وبعدين"
"ولا قبلين...قفل ف وشى...انا بقى هسيبه الكام يوم اللى اخدينهم اجازة دول مكلموش علشان يعرف قيمتى"
"ايه الجوازة اللى كلها نكد من اولها دى"
"خليه ينكد على نفسه...انا هقوم البس واروح النادى اقابل اصحابى واقضى اليوم هناك... فرصة وهو مقموص اشوف لى يومين حرية"
"انتى بتتكلمى كأنك فرحتى انكم متخاصمين"
"لا طبعا متضايقة اننا متخاصمين... بس هفرح نفسى"
"ياريتنا ماكنا عملنا خطوبة ولا زفت ...بدل مش فرحانة يبقى ايه لازمتها"
"لا بالعكس...انا فرحانة انى ارتبطت باللى حبيته من زمان وفرحانة اكتر ان كل اللى خططت له حصل... انى اشتغل معاه واقرب منه ويحبنى زى مابحبه...علشان كده هخليه يتطبع بطبعى واحدة واحدة مع الوقت"
"ربنا يهديهولك ياحبيبتى"
"يارب يامامتى... لو اتصل بيكى اعملى نفسك متعرفيش حاجة"
                     *******************

زياد نازل
"انا نازل ياماما مش عايزة حاجة"
"لا ياحبيبى ترجع بالسلامة... ربنا يرزقكويسعدك يارب
"ادعيلى ربنا يرزقنى ببنت الحلال"
"يارب ياحبيبى يرزقك ببنت الحلال...ايه عينك على حد؟"
"هو انا نفسى اتفتحت على الخطوبة...بس لسه"
راح وهو بيفتح الباب
"هعدى على كريم وبعدين اروح الشغل"
                      *********************

شذى بتفتح الباب
"ازيك يا شذى"
"اهلا يازياد...اتفضل"
دخل زياد
"ايه عاملين ايه"
شذى "الحمدلله"
دخل وسلم على مديحة...
"خالى وكريم مش هنا ولا ايه"
مديحة"ابراهيم نزل الصيدلية من شوية وكريم جوه...ادخله"

زياد دخل لكريم...وبعد ماسلموا على بعض
"مفتاح العربية اهو وركنتها تحت"
"انت واقف ليه ماتقعد شوية"
"لا مستعجل عندى شغل وهتأخر"
"طيب ماشى... لو فضيت ابقى تعالى نقعد مع بعض شوية"
رد ووهو خارج"ان شاءالله"

كريم ماشى مع زياد بيوصله لحد الباب
وصلوا عند الباب... شذى خرجت من المطبخ اللى قريب من الباب
"زياد استنى لما تشرب العصير اللى عملته"
زياد"معلش يا شذى والله متأخر ع الشغل... يبقى لى عندك كوباية عصير"
كريم بيبص لشذى وزياد وهما بيتكلموا مع بعض...وشذى بتضحك
"ماشى...بس انت الخسران"
"وعلى ايه...هاتى اما اشربه ع السريع"

كريم مستغرب الحميمية اللى ف كلامهم
ولاول مرة بيشوف شذى مبتسمة من مكشرة ولا معيطة

شذى رجعت بكوباية العصير ...بتقدمه لزياد
اخده منها زياد... وشربه بسرعة
كريم بيخطف نظرات ليها...شافها بتبص لزياد

خلص زياد العصير
"احلى كوباية عصير شربتها...تسلم ايدك"
شذى بفرحة"ربنا يخليك"

زياد لكريم"ماشى ياكيمو...انا نازل"
رد كريم"مع السلامة"
قفل الباب وراه

شذى خرجت من المطبخ وراحت قعدت مع مديحة
كريم قبل ما يدخل اوضته...راح على المكتبة

قعد يدور ف وسط الكتب... حس انه متلخبط
"ضحااااا"
جت له ضحى تجرى
"نعم"
"انتى لعبتى ف المكتبة؟"
"لا والله مجتش جنبها... بس شفت شذى كانت بتنضفها"

هناك 26 تعليقًا:

  1. :))))))))))))))))))))

    ردحذف
  2. جميييييله يا دينا تسلم ايدك

    ردحذف
  3. حلو اوي يا دينا تسلم اديكي

    ردحذف
  4. جميله جدا في تقدم مستمر ان شاء الله

    ردحذف
  5. جميله يا دينا بس ياريت تنزلى حلقه كمان تعوضى اليومين اللى فاتوا :) :) :) ^_______^

    ردحذف
  6. gameeeeeeeeeeeeeeeeela awii ya dondon bss 3shan 5atrii nazelelna 7al2a tania 2ossayra awi de :(

    ردحذف
  7. مش حلوة ومفيهاش احداث نهائي ! وقصيرة جدا انا بجد ممكن اتشل لو فضلت بالقصر ده واعذريني لو كلامي ضايقك :')

    ردحذف
  8. طب حتة كمان دى قصيرة اووووى كلام دعاء و امها خلصوا الحلقة :((((((

    ردحذف
  9. وحشة جداً

    ردحذف
  10. القصة جميلة جداً

    ردحذف
  11. بجد قصيره جدا الحلقات والاحداث بتمر بملل شديد انا بقيت اقرا براحه خايفه ابص الاقيها خاصت مره واحده

    ردحذف
  12. ممكن تطولى ف الاحدااااث شوية

    ردحذف
  13. its beautiful like always .. I feel sorry for shatha .. she will be in trouble this time because she touched his books

    ردحذف
  14. رووووووووووووووووووووووووووعة بجد
    واحلوووت اوى اوى
    تسلم ايددك

    ردحذف
  15. ليه الحلقات قصيرة كده يا دينا؟ يعنى بعد مانخلص نفضل نسأل كل مرة ليه قصيرة؟ انتى عودتينا على كمية احداث معينة كل حلقة ليه المرة ده كل شوية نطلب بالحاح تطوليلها؟ و ليه مش بتردى على التعليقات؟ انتى طلبتى نكتب تعليقات المفروض تتواصلى معانا. أنا يوميا بدخل علشان اشوف ايه الجديد و شكلى هابتبدى ادخل مرة كل كام يوم علشان اقرا كذا حلقة ورا بعض لان الانتظار ده شئ سخيف

    ردحذف
    الردود
    1. انا حقيقى متفقه مع الراى ده جداااااااا

      حذف
  16. it is very short . u should make it longe .but anway it is specatular

    ردحذف
  17. حلوه اوى بس بجد قصيرررررررررررره اوى بحس انى مشبعتش من الاحداث كلها و بعدين بئالك يومين مش بتنزلى يعنى كنتى طوليتها شويه صغنين
    فى تقدم مستمر ان شاء الله


    دعــــــاء

    ردحذف
  18. ابتهال شندي24 مارس 2013 في 1:24 ص

    جميله يا دينا تسلم ايدك

    ردحذف
  19. الحلقة قصيرة اوى اوى اوى ليه القصة دى بالذات ممطوطة كده انا فعلا زهقت على قد ما باستناها بافكر استنى يومين تلاتة على ما تكون نزلت كام حلقة مادام مفيش احداث كده

    ردحذف
  20. الحلقه جميييييييييله اووووووووووى بس قصيره كتيييييييييييير

    ردحذف
  21. على فكرة الحلقات بقيت قصيرة جداً وبقيت بقرا براحة خائفة لتخلص منى وبقيت بحس بشلل من قرابتها وحشة جداً;(

    ردحذف
  22. الحلقة جميلة جدااااااا سا دينا بس قصيرة اوووى

    ردحذف
  23. حلوة
    بس انتى عليكى قفلات عجيبة

    ردحذف
  24. اده هو هيغير علي شذي قبل ما يحبها ،،بس برضو لسه عثل!!

    ردحذف

قول رأيك بلاش تقرا وتقفل من سكات...ارائكم تهمنى