السبت، 30 مارس 2013

بقينا عيلة... الحلقة 24

الحلقة 24
كريم وشذى واقفين ع الباب بيسلموا على ماجدة وجليلة
زياد بعد ما سلم على كريم...بيسلم على شذى
كريم بيراقب نظراتهم لبعض

نزلوا ... وقفل كريم الباب وراهم
دخل قعد وهو سرحان فى كلام زياد
"كريم احضر العشا دلوقتى ولا كمان شوية"
"لا مليش نفس...اتعشوا انتوا"

مسك ريموت التليفزيون...فتحه
قعد يقلب ف القنوات بملل
شذى قاعدة مستغربة معاملته الجافة ليها تانى بعد ماكان بيعاملها كويس

"كريم"
"ها"
"عمو ابراهيم عمل العملية؟"
"لسه..كان فيه عملية قبله طولت وزمانه ف العمليات"
"علشان كده انت زعلان"
"ومين قالك انى زعلان"
قفل التليفزيون وقام وسابها قاعدة وخرج قعد ف البلكونة

قعدت شذى مكانها مستغربة...وقالت ف نفسها
"ده اللى كنت متوقعاه..انه يرجع يعاملنى زى الاول"
ضحى"شذى انا جعانة"
شذى"انا مليش نفس اتعشا وكريم مش هيتعشا... اعملك سندويتشات"
ضحى"ماشى..بسرعة عايزة انام"
                        ******************

شذى بعد ما اتعشت ضحى ودخلت تنام
دخلت المطبخ عملت سندويتشات لكريم

دخلت البلكونة بالطبق... حطته على الترابيزة
"ده العشا بتاعك...لو عايز حاجة ابقى نادى عليا انا صاحية ف الاوضة"
"انتى سبتى خطيبك ليه"
استغربت شذى السؤال المفاجئ لانه بدون مناسبة
"انا حكيت لك انه اتغير بعد الخطوبة او يمكن انا اللى مكنتش شايفة كويس"
"بس كده"
"هو مش سبب مقنع؟"
"واقفة ليه..اقعدى"
قعدت شذى وهى مازالت مستغربة التقلبات اللى ف معاملة كريم
"انتى فيه حد تانى اتقدملك بعد خطيبك"
"انا لحقت..لا مفيش"
"مش عايزة تقوليلى؟"
"مفيش حاجة تتقال"
"وزياد؟"
"ماله؟"
"انا شفته دخلك المطبخ وقعدتوا تتكلموا كتير"
"ايه علاقة زياد بكلامك عن خطيبى"
سكت كريم لحظات متردد...بعدها حسم قراره
"صارحينى بالحقيقة... فيه حاجة بينك وبين زياد"
"لا مفيش"
وقامت شذى متضايقة من اتهامه ليها انها على علاقة بزياد
قام كريم وراها
"زعلتى ليه؟"
اتكلمت بعصبية
"علشان معنى كلامك انى سايبة خالد علشان زياد...يعنى كنت مخطوبة لواحد وفكرت ف واحد تانى...وانا مش كده"
"بس انا سمعته وهو بيقولك انتى مش حاسة بيه وانتى قلتيله انك حاسة بيه "
"انت سمعتنا؟"
"ايوه"
"بس زياد مكنش يقصدنى انا بكلامه ده"
"اومال كان يقصد مين؟"
"واحدة صاحبتى"
"وهو يعرف صاحبتك منين"
"كريم... انت بتسألنى كل الاسئلة دى ليه...مكنش المفروض انى اقولك لانها حاجة متخصناش"
"تليفونك فين؟"
"ليه؟"
"هاتيه بس"
"انا قافلاه"
"ماانا عارف..هاتى التليفون"
"مش معقول تكون هتفتش فيه... مش هسمح لك بكده...انت زودتها اوى على فكرة"
سابته شذى وهى داخلة اوضتها
"انا عايزُه علشان احطلك الخط اللى جبتهولك...مش قصدى ازعلك"

وقفت شذى بعد ما حست بالندم انها اتسرعت ف فهمها
التفتت له
"بتقول ايه؟"
"بقولك عايز التليفون علشان احط لك الخط اللى جبتهولك..وبقولك متزعليش منى"
"ثوانى اجيب التليفون"

دخلت شذى وهى حاسة بفرحة وبتستعيد نبرة صوت كريم وهو بيقولها
"متزعليش منى"
اخدت تليفونها وخرجت بسرعة م الاوضة
راحت لكريم لقيته فى البلكونة...راحت قعدت معاه
"اتفضل"
اخد التليفون... حط فيه الشريحة...فتحه وسجل رقمه
"سجلت لك رقمى واخدت الرقم"
"شكرا"
"على ايه... مكنش ينفع تفضلى من غير تليفون"
ابتسمت له ابتسامة شكر وقامت
"مقلتليش"
"ايه؟"
"زعلانة منى"
"لا"
"تعرفى انى كنت جاى بدرى علشان اخدكم وننزل نكمل حاجة ضحى"
"انا اتفاجئت بخالتو ماجدة وطنط جليلة"
"يالا مش مشكلة... ايه رأيك ننزل بكرة الضهر"
"اللى يعجبك"
"خلاص ع الساعة 1 كده تكونوا جاهزين... وبالمرة نتغدا بره"
هزت شذى راسها موافقة...ف نفس اللحظة اللى رن فيها موبايل كريم...رد بسرعة
"الو... ايه الاخبار طمنينى... الحمدلله"
شذى بتسأله
"ماما؟؟"
كريم هز راسه بالايجاب
"وهتيجوا امتى... تيجوا بالسلامة... كويسن الحمدلله..شذى معاكى"
                       ******************

كريم قاعد فى الصيدلية ...اتصل بزياد
"الو...ازيك يازياد...انا كويس الحمدلله...امبارح؟؟ مالى امبارح كنت كويس... بقولك ماتبقى تعدى عليا فى الصيدلية... لما تفضى طيب ابقى تعالى... مفيش بس من زمان مقعدناش مع بعض نتكلم انا وانت لوحدنا... ماشى اى وقت...مع السلامة"

قفل مع زياد... وبص ف الساعة...12ونص...اتصل بشذى
"الو... ايه لبستوا ولا لسه؟؟ طيب اجهزوا ..نص ساعة واكون عندكم"
قفل مع شذى واتصل بدعاء
"ازيك يادعاء...اخبار الشغل ايه..الحمدلله...بقولك خلصى الشغل وروحى على البيت... هتفضلى تيجى كل يوم كده...خلاص انتى حرة... مع السلامة"
                   *********************

كريم قاعد ف العربية...مستنى البنات ينزلوا
اول ماشافهم نزل من العربية...فتح الباب اللى ورا
"اركبى يادودو"
فتح الباب اللى قدام لشذى
"اتفضلى"
بعد ماركبوا البنات...ركب كريم
كريم وهو سايق
"قوليلى هى محتاجة ايه بالظبط"
شذى"قميصين رمادى وجزمة وشنطة للمدرسة ...ولوازم الكتابة كشاكيل واقلام وكده"
كريم"تمام"
                    *******************

كريم ماسك ايد ضحى وشذى ماسكاها من الناحية التانية
واقفين قدام محل احذية..ضحى اختارت... دخلوا المحل

شذى قاعدة جنب ضحى بتقيسها... كريم واقف بره

كريم بيبص عليهم...شافهم خلصوا وشذى رايحة للكاشير
دخل كريم وسأل الكاشير
"كام لو سمحت؟"
شذى"معايا.."
قاطعها كريم"هسس"
دفع كريم الفلوس وخرجوا من المحل... وهما ماشيين
كريم"مبروك عليكى يادودو"
ضحى"الله يبارك فيك"
شذى"كريم ليه حاسبت؟؟ انا معايا فلوس ماما سايبالى"
كريم"عيب نتكلم ف فلوس"
شذى"بس انت ذنبك ايه تجيب لها حاجة المدرسة"
كريم"هى ضحى مش اختى ولا ايه... وبعدين بابا سايبلى فلوس وقال اى حاجة تحتاجوها اجيبها... ممكن متتكلميش ف فلوس تانى علشان بتحرج بجد"
سكتت شذى وهما ماشيين يتفرجوا على المحلات
                    *******************

دعاء قاعدة مع كريم بتاكل ساندويتش
"اممم تحفة ياكيمو... مش عايز تاكل برضه؟"
"اتغديت والله مش قادر"
"روحت البيت؟"
"لا مروحتش... كان ورايا كام مشوار واكلت بره وجيت"
دعاء خلصت...بتمسح ايديها وبؤها بمنديل
"انا بكرة اجازة من الشغل...تعالى اتغدا معانا"
"اجليها يادعاء انا مشغول بالصيدلية"
"ما انت بتروح مشاوير وساعات بتروح البيت...جت عليا ووقفت"
"موقفتش ولا حاجة... بس خليها بعدين دماغى مش رايقة"
طلعت دعاء موبايلها من الشنطة من غير ماترد عليه
"الو... ايوه ياماما... كريم مش عايز ييجى يتغدا معانا بكرة... اتفضلى قوليله انتى يمكن يسمع كلامك"
ناولته الموبايل... اخده منها وهو متضايق من سياسة الامر الواقع
"الو..ازيك ياطنط... لا ابدا بس حضرتك عارفة انى ماسك الصيدلية هنا فمفيش وقت...خلاص حاضر... جاى ان شاءالله مع السلامة"
قفل معاها... بص لدعاء...شافها مبتسمة ابتسامة انتصار
"حركة بايخة جدا"
"هى ايه"
"بتحرجينى مع مامتك"
"مش بحرجك بس انت مسمعتش كلامى م الاول فقلت ادبسك"
ضحكت دعاء وكريم بيبص لها بغيظ
"دعاء...قومى روحى انتى دلوقتى"
"بتطردنى"
"لا بس مش كل يوم تيجى تقعدى معايا لحد بالليل ...منظرنا مش حلو الناس يقولوا ايه؟"
"طظ فيهم...اللى يقول يقول انا مبيهمنيش حد"
                   *******************

كريم راجع البيت ... اول ما فتح الباب ودخل
كانت شذى قاعدة بتتفرج على التليفزيون... ونايمة وهى قاعدة
قرب منها ببطء...وبصوت هامس
"شذى ...شذى"
قامت شذى وهو بتتاوب
"كريم...جيت امتى"
"لسه واصل...مالك؟"
"مفيش ...نعست وانا قاعدة"
"طيب قومى نامى"
"انت اتأخرت ليه...هقوم احضرلك العشا؟"
قامت شذى... رد عليها كريم بصوت واطى
"انا اتعشيت بره"
وقفت شذى لحظات مكانها...وتصنعت اللا مبالاة وهى بتسأل
"مع خطيبتك؟"
"ايوه... ومتعمليش حسابى ع الغدا بكرة"
قالها كريم وهو بيتجنب النظر ليها
سألته تتأكد
"معزوم هناك"
رد وهو داخل اوضته
"ايوه... تصبحى على خير"

دخل كريم اوضته... ودخلت شذى اوضتها

كريم فى اوضته...اول مادخل قعد على السرير
"انا ليه مكسوف اقول انى رايح لدعاء... ليه مش مبسوط وانا مع دعاء... ليه بتخنق طول ما انا مع دعاء ... عكس وجودى مع شذى... دعاء هى اللى خطيبتى... مينفعش اللى انا فيه ده... شذى وجودى معاها تعود بس...احتياج لاخت ...بحبها زى ما بحب ضحى وطنط مديحة... ايه اللخبطة اللى انا فيها دى"
                    

شذى فى اوضتها...قاعدة على السرير..وضحى نايمة جنبها
متضايقة... حاسة بغليان ودموع محبوسة
"انا متضايقة من ايه... يروح يتعشا ولا يتغدا عندها انا مالى... ان شالله حتى يبات هناك انا مضايقة نفسى ليه... معاملته معايا هى اللى ضايقتنى... بس هو معملش حاجة تضايقنى... انا احمد ربنا انه بقى بيكلمنى كويس وخلاص... مش عايزة منه اكتر من كده"
                      ******************

الصبح...كريم دخل يغسل وشه وخرج
مش سامع صوت ف المطبخ كالعادة
دخل يلبس وهو بيعمل صوت بالباب...وبالدولاب... وصوت لخطواته وهو ماشى

خلص لبس... بص على السفرة...فاضية
بص على المطبخ... مفيش حد
راح فتح الباب...

شذى صاحية... وسامعة صوت كريم وهو داخل وخارج من الحمام وبعد مالبس وخرج من اوضته
قررت انها تقلل اهتمامها بيه شوية... فكرت ليه... من غير ليه... زى ماهو بيعاملها هتعامله
زى ماكانت مستنياه ع العشا ومجاش واتفق على الغدا مع خطيبته...يبقى مش لازم تشيل هم فطاره ولا تبدأ بأى اهتمام غير اللى يطلبه منها

سمعت صوت الباب اتفتح واتقفل... قامت تخرج من الاوضة

كريم بعد مافتح الباب علشان ينزل
حس ان ممكن تكون شذى تعبانة مثلا
رجع تانى وقرر انه يطمن عليها قبل ماينزل

كريم رايح ناحية الاوضة... وقف قدام الباب لسه هيخبط
نفس اللحظة اللى شذى بتفتح فيها باب الاوضة


هناك 26 تعليقًا:

  1. بتهزرلاى بجد يا دينا. قفلتى الحلقة بدرى كده ليه؟ طيب ما احنا متوقعين ان الكلام كان على صحبت شذى و مافيش اى حدث جديد غير المشاعر اللى بيحسوها.
    كنتى مفروض تخلصى المشهد بتاع باب الاوضة و نعرف هايحصل ايه و زياد كان مفروض يروح ليه الصيدليه
    انتى عاملة زى المسلسلات العربى اللى بتفضل تطول تطول تطول فى الاحداث
    ماتزعليش من كلامى بس انتى بتقبلى النقد و انا لو مش بحب اقرا كتاباتك ماكنتش هافكر اعقب على الحلقة

    ردحذف
    الردود
    1. كلامك مظبووط جدا

      حذف
    2. القصة تحفة بجد و تشد و فيهاالرومانسية البريئة الجميلة بس عيبها الوحيد أنها طولت أوي زي المسلسلات التركي جميلة و قصتها تشد بس بتطول او يمكن علشان احنا معجبين أوي بقصة الحب دي عايزين نشوف تطور سريع في العلاقة و مش صابرين على العموم أنا متأكدة أن النهاية هتكون جميلة و مرضية

      حذف
    3. ع فكره الحلقه حلووه جدا و مش كنا متوقعين انها ع صاحبتها خاالص !!!! و حضرتك مش هتقوليلها تقفلها ازاى !!

      حذف
  2. جامدة بس بقى هموت واعرف النهايه

    ردحذف
  3. بجد حلوه اوووى تسلم ايدك وانا مبسوطه انى اول كومنت

    ردحذف
  4. حلوه يا دينا بس قصيره

    ردحذف
  5. أنا أول مرة أكون أول كومنت بس حلقة جميييييييييييلة والحكاية دخلت ف الجد

    ردحذف
  6. زى العاده جميييييييييله تسلم ايديك يا دودو

    ردحذف
  7. جميلة جدا بس حسا ان الاحداث بطيئة اوى

    ردحذف
  8. جميله قووووووووووووو ي

    ردحذف
  9. جامده اووووووووى الحلقة :) استمررررررى <3

    ردحذف
  10. ياريتك كنتى كملتى شويه كمان يا دينا عموما تسلم ايديك على الحاجات الحلوه دى على الاقل بتخرجنا من اللى احنا فيه وبتبعدنا شويه عن الواقع

    ردحذف
  11. 7elwa ya dodo bes ana a3saby ebtd2 tet3b mn kotr entzar shofy 7l b2a 7ram kda :D :D

    ردحذف
  12. الحلقه جميله بس مفيهاش اى جديد وقصيره احنا عايزين نستمتع اكتر والاحداث تبقى اسرع من كده
    متزعليش من راى بس انا بستناها بفارغ الصبر وعايزة اعرف اللى هيحصل بين شذى وكريم ودعاء
    ياريت تسرعى الاحداث وزياد كان المفروض يروح لكريم الصيدليه ليه مرحش فى الحله دى كانت
    جددت الموضوع مع اننا عارفين الحديث اللى هيدور ما بينهم بس بجد تسلم دماغك وايدك اللى بتكتب

    ردحذف
  13. دينا انا طلو اليوم تقريبا بفكر فى شذى و كريم بليييييييييييييز الحلقة الجاية بسرعه و بلاش اليومين الاجازة دول

    ردحذف
  14. القصه حلوه وانا بحب قصصك كلها بجد ماشاء الله بس عندى تعليق انا حاسه ان فيه حاجه غلط بالقصه يعنى كان نفسى يكون المشاعر بينهم انقى من كده
    يعنى بحسهم بيتعاملوا مع بعض اكنهم متجوزين ازاى اصلا يعيشوا سوا كده ببيت واحد ويتعاملوا مع بعض عادى خالص كده
    ومعلش طولت عليكى

    ردحذف
  15. حلوة اوى

    ردحذف
  16. ايواااااااااااااااااااااااا بقى جميلة جدااااااا جداااااااااا يارب يتجوزوا

    ردحذف
  17. تسلم ايديك يا دندونة على الحلقة الجميلة دى جميلة جداااااااااااااااااااااااااا.....
    حلوى اوى الرمانسية دى بجد تسلمى بس هة مكنش فى احاث كتيرم
    بس ان شاء الله القلب بدا يحب اهو اتطوروا ميررررررسى
    من ايمى الا معجبة كتير بدندونة..........

    ردحذف
  18. بُصـي انا مش مع أنك تسرعـي ف النهايـه لأنـي حآآبـه القصـه دي أوووي ، بـس طولـي الأحداث شـويه، ومتتأخرييش عليينـا ونبـي، تسلم إيدكـ يا دودو

    ردحذف
  19. روووووعة بجد
    يلا كمليها بسرعة ياقمر

    ردحذف
  20. القصة تجنن فعلا
    ارجوكي كمليها بسرعة ^_^ ````

    ردحذف
  21. روووووووووووووووووووعة بجد يا ديناااا
    تسلم ايدك فعلا
    والقصة روووووووعة وتحفة وكل حاجة
    انتى جباااارة وبجد انا ادمنت قصصك خلاص :))))

    amira slama

    ردحذف
  22. حلوة اوى
    دعاء غبية اوى

    ردحذف

قول رأيك بلاش تقرا وتقفل من سكات...ارائكم تهمنى