الأحد، 31 مارس 2013

بقينا عيلة... الحلقة 25

الحلقة 25
كريم بعد مافتح الباب علشان ينزل
حس ان ممكن تكون شذى تعبانة مثلا
رجع تانى وقرر انه يطمن عليها قبل ماينزل

كريم رايح ناحية الاوضة... وقف قدام الباب لسه هيخبط
نفس اللحظة اللى شذى بتفتح فيها باب الاوضة

شذى اتخضت...شقهت ...رجعت شدت ايشارب من على طرف السرير ولبسته

كريم لف وشه بعيد لما شافها رجعت تلبس ايشارب...لما شافها واقفة ع الباب وبتلف الايشارب
"مش معقول كل ماتشوفينى تتخضى كده"
"مش انت نزلت؟"
"انا منزلتش"
"انا سمعت صوت الباب"
"ماانا رجعت اطمن عليكى الاول...مش عوايدك تنامى لمتأخر فقلقت"
ردت وهى خارجة من الاوضة وبتقفل الباب على ضحى
"هدخل الحمام وارجع احضر لك الفطار"

راحت شذى ع الحمام
وطلع كريم يستناها فى الانتريه
                        ******************

شذى رايحة المطبخ
"شذى"
ردت من غير ماتقف ولا تلتفت له
"مش هأخرك...حالا هتلاقى الفطار"
قام وراها دخل المطبخ
"انا مرجعتش علشان عايز آكل...انا رجعت علشان اطمن عليكى بس"
ردت وهى بتتجنب النظر ليه... وبتفتح التلاجة تطلع الاكل
"انا كويسة الحمدلله"
رد بانكسار
"طيب الحمدلله... انا نازل"
خرج من المطبخ... فتح الباب ونزل وشذى بتتابعه بعينيها
                          ****************

كريم قاعد مع دعاء وحماه وحماته ع الغدا
كريم ساكت وهما بيتكلموا... بيشارك بكلمات بسيطة

خلصوا الغدا...راحوا قعدوا كلهم مع بعض فى الصالون
جت الشغالة قدمت لهم شاى

حماه"اخبار بابا ايه ياكريم"
كريم"الحمدلله...عمل العملية واحتمال ييجى خلال كام يوم ان شاءالله"
حماته"ييجى بالسلامة...وان شاءالله هنبقى نيجى نزوره"
كريم"تنوروا"
كريم خلص الشاى... وقام
"معلش هستأذن انا لازم ارجع الصيدلية"
حماته وحماه بيبصوا لبعض
حماه"معلش دقايق بس هنتكلم شوية"
كريم"خير"
حماه"دلوقتى ياكريم انا مش شايف حاجة تعطلكم انكم تبتدوا تعملوا الديكورات وتتجوزوا...كان فيه معاد مع مهندس الديكور وانت رفضت ...ليه؟"
كريم"لان دعاء كانت بتقول انكم جايبينه علشان شقتها..وانا مش عايز اتجوز ف شقة مراتى"
بص لدعاء اللى حس فيها بشماتة انتصار رأيها عليه
حماه"بس ده ميعيبكش ف حاجة"
كريم"معلش ياعمى...مش حابب اتجوز غير ف شقتى"
دعاء"بس دى بعيدة اوى عن هنا"
كريم"معاكى عربية وقت ماتحبى تيجى هتيجى"
حماته"انت محبكها اوى ياكريم"
حماه"خلاص ياولاد.. ميجراش حاجة يادعاء اتجوزوا هناك... كده تبقى مرتاح ياكريم؟"
رد كريم وهو بيكذب"اه"
دعاء بتقلب شفايفها وتكشر ...مامتها بتغمز لها تعدى الموقف
حماه"طب كده يبقى اتفقنا...الديكورات هدية جوازكم منى...تروحوا بكرة تاخدوا مهندس الديكور وتشوفوا هيخلص ف وقت قد ايه وتحددوا الجواز"
كريم"ليه الاستعجال"
بصوا له كلهم باستغراب... اتحرج كريم
ردت حماته"وليه التأجيل"
سكت كريم...سألته دعاء تانى
"ليه التأجيل ياكريم... فيه مشكلة ولا حاجة؟"
"لا مفيش مشكلة... بس مستنى لما اطمن على بابا"
حماه"مش باباك عمل العملية وبقى كويس... وكام يوم وهيرجع بالسلامة... فيه ايه تانى"
رد كريم باستسلام
"مفيش حاجة"
                        *****************

كريم داخل البيت... ضحى قاعدة ع الكمبيوتر
التليفزيون مفتوح... بيدور بعنيه على شذى
مش ف المطبخ...مش قاعدة مع ضحى...خرج البلكونة..مش فيها

قعد مع ضحى وسألها
"هى شذى فين"
"فى الاوضة...بتقولك عملت لك سندوتشات للعشا هتلاقيهم ف المطبخ"
حس انها بتتجنبه تماما...فكر وسأل نفسه...ليه؟
وليه متضايق من تجاهلها ليه
وليه متضايق ومقبوض كده من قرب الجواز رغم ان كل حاجة ماشية كويس
قعد ساكت شوية... بيفكر

قام يدخل اوضته... وصل عند باب اوضة البنات
سامع صوت التليفزيون مفتوح... والنور... خبط

فتحت شذى الباب...واقفة ساكتة مستنياه يتكلم
"انتى متأكدة انك كويسة"
"ايوه الحمدلله"
"بس انا حاسس انك متغيرة...مالك؟"
"مفيش حاجة... انت عايز حاجة؟"
"لا انا كنت بطمن عليكى واقولك ان بابا جاى بعد بكرة ان شاءالله وفيه دكتور هيتابعه هنا"
"ييجوا بالسلامة ان شاءالله"
"شذى انتى زعلانة منى"
شذى بتحاول تبتسم عكس احساسها
"لا طبعا...ربنا مايجيب زعل"
"طيب قاعدة لوحدك ليه؟"
"مفيش ... حابة اقعد لوحدى بس"
"ماشى براحتك"
"عن اذنك"
"اتفضلى"
وقفلت الباب وهو واقف مش فاهم ايه اللى حصل بينهم ورجعت المعاملة جافة تانى

شذى بعد ماقفلت الباب...دخلت قعدت على سريرها
"كده احسن... المعاملة ف اضيق الحدود احسن من انى اقرب منه"
                     *****************

فى اوضة ابراهيم... ابراهيم على السرير
جليلة وماجدة قاعدين على كراسى جنب السرير
مديحة قاعدة عند اخر السرير وضحى قاعدة ف حضنها
كريم وزياد واقفين ومديحة بتطمنهم على ان العملية نجحت

كريم بيميل على زياد
"ماتيجى نقعد بره...الاوضة زحمة هنا اوى"
يخرجوا الاتنين من الاوضة

شذى داخلة بصينية تقديم... بتقدم حاجة ساقعة
مديحة"قدمى يا شذى لزياد وكريم"
شذى"هما فين...مشفتهمش"
مديحة"تلاقيهم ف البلكونة"
                         **************

شذى داخلة البلكونة...بتحط الصينية على الترابيزة الصغيرة
"اتفضلوا"
كريم"شكرا"
زياد"سيبك من ده...عملتى ايه"
شذى"ف ايه"
زياد"مش قلتلك مش حاسة بيا"
شذى"الدراسة هتبدأ بكرة... وانا هروح الجامعة وهشوفها هناك واعرف اتكلم معاها"
زياد"والموبايلات دى بتعمل ايه"
شذى"دايما بيكون جنبها حد ومش بعرف اتكلم معاها... اصبر كلها يوم ولا اتنين"
كريم"انتى هتروحى الاسبوع ده"
شذى من غير ماتبص له"اه"
كريم"مش اتفقنا هتستنى شوية"
شذى"كنت فاكرة ماما هتتأخر اكتر من كده"
كريم"استنى شوية مش لازم مع بداية الدراسة كده"
زياد"ايه ياعم...انت قطاع ارزاق ليه...روحى يابنتى شوفى دراستك وشوفى لى موضوع شيماء الله يخليكى...الواحد عايز يستقر ويعقل بقى"
كريم"متستعجلش يا زياد... بلاش تتسرع فى الارتباط... ادى نفسك وقت تفكر"
زياد"ايوه يااخويا ..ماهو اللى ايده ف الميه مش زى اللى ايده ف النار...انت حبيت وخطبت ومش حاسس باللى زى حالاتى"
اتضايقت شذى... وقامت
زياد"رايحة فين...هتعملى ايه"
شذى"هروح بعد بكرة ان شاءالله... عايزنى اقولها ايه بالظبط؟"
                           *****************

كريم وابراهيم ومديحة وشذى وضحى قاعدين ع الغدا
ابراهيم"عملتى ايه ف المدرسة الجديدة يا ضحى"
ضحى"الحمدلله...حلوة اوى"
كريم"بابا ...دعاء واهلها جايين يزوروا حضرتك النهاردة"
ابراهيم"اهلا بيهم"
مديحة"ينوروا... يا الف مرحب"
شذى مجرد ما سمعت سيرة دعاء
افتكرت يوم العزومة وهى بتقول عليها فلاحة
اتضايقت...وسكتت
كريم بص لشذى... شافها سرحانة ... بعد نظره عنها وكمل اكل
                   ********************

مديحة مع شذى فى المطبخ
"بصى يا شذى انا هدخل بصينية الجاتوه وانتى ورايا بصينية الحاجة الساقعة"
"حاضر...هحط الصينية وامشى... هروح اقعد ف البلكونة لو عايزة حاجة ابقى نادى عليا"
"طيب"
مشيت مديحة بالصينية...ووراها شذى
دخلوا الاوضة...وهما بيتكلموا
ابراهيم"والله مفاجئة حلوة"
دعاء لما شافت شذى اتكلمت بطريقة غيظ
"احنا خلاص مجرد ما المهندس يقولنا هيخلص امتى بعدها على طول نحجز القاعة ونتجوز..صح يا كيمو"
ارتبك كريم من طريقتها...اتحرج من انها تدلعه ف وجود اهله واهلها...واول ما عينيه اترفعت جت ف عين شذى
شذى من ارتباكها اتهزت بالصينية
اخدها منها كريم بسرعة.... وانسحبت شذى
                        ****************

شذى قاعدة ف البلكونة... حاسة انها مخنوقة
بتفكر... هى ليه متضايقة كده
"كريم هيتجوز... ما يتجوز..مش هو خاطب وطبيعى انه يتجوز...ايه اللى مضايقنى بقى... احساسى دى غلط... انا اتعلقت بيه كده ليه زى المراهقة اللى بتتعلق بواحد من كلمة حلوة... اكيد علشان خارجة من تجربة فاشلة ...فوقى يا شذى انتى كده بتحبى من طرف واحد...وده عذاب مش حب"

سمعت الضيوف خارجين... حست ان وجودها لوحدها ممكن يثير الشك... ابتسمت باصطناع وطلعت تسلم على الناس
مديحة واقفة ...ابو دعاء ومامتها سلموا على شذى ومديحة وخرجوا ومديحة خرجت وراهم توصلهم لحد السلم كنوع من الترحاب الشديد

دعاء كانت واقفة ملاصقة لكريم ومتأخرين شوية بعيد عن الباب ...وقبل ماتسلم
شاورت لشذى
"بسس..انتى يا ...اسمها ايه؟؟ هاتيلى الموبايل لنسيته جوه"
كريم رد بسرعة من احراجه
"هجيبهولك انا"
بصت شذى لكريم بعتاب والدموع بتلمع ف عينيها
وقبل مادموعها تنزل... دخلت اوضتها بسرعة

كريم بيبص لدعاء وهو بيبرق لها
"انتى ايه اللى عملتيه ده"
دعاء بلامبالاة
"عملت ايه"
"انتى بتحرجيها ليه"
"وايه اللى يحرج ف كده...طلبت منها الموبايل"
"انتى متعمدة تتكلمى باسلوب وحش"
"متكبرش الموضوع اوى كده... ايش فهمها بالاسلوب الحلو والوحش...يالا ياحبيبى هات الموبايل علشان ماما وبابا ميفضلوش يستنونى تحت كتير"

دخلت مديحة من بره.... سكت كريم
دخل جاب لها الموبايل ورجع...اخدته منه
"باى ياكيمو"
خرجت دعاء بسرعة... وقفل كريم وراها الباب

جت ضحى تجرى بموبايل مديحة
"ماما تليفونك بيرن"
بصت مديحة فى التليفون
"ده خالد...ناديلى اختك بسرعة"
راحت ضحى
"شذذذذذذى كلمى ماما"
كريم قعد متصنع اللامبالاة..وهو بيتابع باهتمام
جت شذى واتجنبت النظر لكريم
"خالد بيتصل بيا"
"مترديش"
سكت الاتصال...واتكرر
"بيتصل تانى"
"خلاص ردى"
ردت مديحة... وكريم متابع باهتمام متخفى كل كلمة
"الو..ازيك ياخالد...الحمدلله كويسة... اه معلش كنت مسافرة وتليفونى كان مقفول... عايز شذى"
بصت لشذى... وكريم بص لشذى... شذى بتشاور لمديحة انها مش عايزة تتكلم...ارتاح كريم
"بص يا ابنى كل شئ نصيب... هى مش عايزة تتكلم... اقولها ايه؟ هاا....هاا... حاضر هقولها وارد عليك...مع السلامة"

قفلت مديحة وكان ترقب كريم اكتر من شذى لمعرفة المكالمة
شذى"عايز ايه ده؟"
مديحة"بصى يا شذى... الراجل شاريكى... اسمعيه وفكرى وبعدين قولى قرارك"
شذى"انا قررت خلاص"
مديحة"بس اسمعى قال ايه"
شذى"قال ايه؟"

هناك 34 تعليقًا:

  1. يووووووووووووووووووووووووووه لسه القفله دي بس كنت عاوزه اعرف قالها ايه :)

    بس بجد حلقه جامده بصرف النظر عن تجنب شذي لكريم وكدا مع انو حسن معاملته معاها بس جميله والبت دعاء دي غيظاني الهي اشووفها محروووقه باه =D

    ردحذف
  2. تحففففففففففففففففففففففففففففففة

    ردحذف
  3. إية الحاجات الي هتتفتح تاني دي
    كل يوم الواحد يشتاق لمعرفة الأحداث أكتر من الأول
    الله عليك يا دينا

    ردحذف
  4. جميييييييييييييييييييلة

    و دعاء دى عايزة تتعلق رخمممة بجد

    ردحذف
  5. بجد حلقه حلوه اوى وتطور الاحداث حلو تسلم ايدك بجد

    ردحذف
  6. دعااااااااااااء عاوزة اولع فيكى بجاااااااااااااز ؟؟؟؟؟؟؟؟ ............................. انتى حقيـــــــــــــرة
    الحلقة تحفة البت دعاء دى استفذتنى

    ردحذف
  7. قال اييييييييييييييه ؟؟

    ردحذف
  8. حلقة روعة....تسلمي
    سرعي بالتانية بقى.^_^

    ردحذف
  9. يادينا قصصك حلوة و لسه هانستنى ليوم التلات؟؟؟؟؟؟؟
    حرام حرام حرام حرام بجد

    ياترى ايه اللى هايحصل بقى؟

    ردحذف
  10. روووووووعه
    عاجبني اوي تسلسل الاحداث فيها

    موجا

    ردحذف
  11. دعاء ديه حخنقها رخمة ... بس الحلقة حلووووووووووووووة اوى تسلمى

    ردحذف
  12. رووووووووووووووووووووووووووعة بصراحة جامدة اوى الحلقة انهارضا
    وتسلم ايدك يا قلبى

    amira slama

    ردحذف
  13. قال ايييييييييه طب كملي المشهد حرام عليكي
    بس متهيألي مهما كان اللي هيقوله هي مش هترجع انا لو مكانها بصراحة هعمل كده
    متشووووووووووقة ♥


    ddy dody

    ردحذف
  14. يلهوووووووووى لحسن ترجع لخالد وهى فاكره انها بتحب من طرف واحد دينا جننتينا بقفلاتك اللى تحير

    ردحذف
  15. دعاء ديه مش بس رخمه دى مش محترمه ولا متربية وكمان الواحد مش بيغير غير من الأحسن منه علشان كده هى بتغير من شذى مووووت..... بس انا مستنيه أعرف رد شدى على عرض خالد أياً كان وإيه القنبلة اللى هتحصل علشان كريم يسيب دعاء؟؟؟؟؟

    ردحذف
  16. ليه القفله ديه
    هانستنى ليوم التلات
    حراااااااااااااااام ودعاء ديه بايخه مووووووووووووووووت

    ردحذف
  17. جمييييييييييله يا دودو ودعاء دى مستفزه تسلم ايديك يا جميييييييييييل

    ردحذف
  18. عاوزه اقتل دعاء بس مش مشكله .. انا عارفه ان كريم طيب وهيحب شذي ♥

    ردحذف
  19. لااااااااااااااااااااااااااااااااا الاحداث سخنت اووووووووووووووووووى

    ردحذف
  20. omg b2a y dodo wl3t el donia kda el bt do3aa de mesh htmot mota tab3ya abdn :D:D
    nice one keep going y dodo :):)

    ردحذف
  21. قال اييييييييييييييييييييه بقى

    ردحذف
  22. حللللللللللللللللللللللللللللوة جدا بس مش عايزة خالد لشذى ولا دعاء لكريم لان دعاء وخالد اللهي يتحرقوا مستفزين هما ابو وام دعاء

    ردحذف
  23. تحفة يا دينا بس لأ اوعى ترجعى خالد لشذى لا بجد حرام

    ردحذف
  24. حلوة اووووووووووووووووووووووى يا دودو بس هى قربت تخلص و لا اية
    علفكرة البت دعاء دى رخمة اووووووووووووى

    ردحذف
  25. الحلقه تحفه .... وانا لو من شذي كنت مسكت دعاء دي علقتها دي شخصيه مستفزه .

    ردحذف
  26. جــآآمـده بقى ،، عـآآوزه آعـرف النهـآآيه بسـْرعــه ! :/

    ردحذف
  27. لازم تقفلو علينا ساعة الحاجه المهمه هههههههههه بس حلوة حلوة تسلم ايدك

    ردحذف
  28. هي هتنزل يوم الاتنين ولا لا :)

    ردحذف
  29. الحقيقة يا دينا الحوار الى دار بين شذى ونفسها تقريبا هو نفس الحوار الى دار بينى وبين نفسى قبل كده انت بجد بتعرفى تعبرى عننا اوى تسلم ايداكى

    ردحذف
  30. emta el 7ala2a ya dina???????????? khalss ba2ana ba3d 12 belil
    e7na youm el talat delwatyyy

    ردحذف
  31. انتى رااااااااااااااائعه والحلقااات تحفه بجد :)))

    ردحذف
  32. قال اييييييييه المنيل ع عينه :D

    ردحذف

قول رأيك بلاش تقرا وتقفل من سكات...ارائكم تهمنى