السبت، 2 مارس 2013

بقينا عيلة... الحلقة 4

الحلقة 4
مجدى بيسوق العربية بسرعة
"انت ايه اللى عملته ده...انت قتلته"
"اخرسى خالص"
"اخرس ايه...هو عملك ايه علشان تقتله"
"هو ماله يتدخل بيننا"
"انت مالك ومالى اساسا ...طلعتلى منين"
"انتى مفيش فايدة فيكى ومبتسمعيش الكلام ليه"
"انت مالك بيا"
"انا خطيبك يا بت انتى وكلها ايام وهتبقى على ذمتى"
وزعقت شذى
"انت مجنون...انت بتخرف اكيد...ده مستحيل...اقف هنا نزلنى"
"مفيش نزول ..انتى هتروحى على بيتكم ومش هتطلعى منه غير على بيتنا"
"انا اتجوزك انت...ده انت قاتل انا هبلغ عنك"
طلع المطواة وقربها من وشها
"طب بلغى عنى كده وانا اخلى وشك الحلو ده شوارع رايح جاى"
رجعت شذى لورا بعيد عن المطواة اللى بيشوح بيها ف وشها
سكتت وهى مرعوبة منه ودموعها نازلة ف صمت وهى بتبص من الشباك
                    ***********************

ابراهيم قاعد فى الصيدلية
جاله اتصال على موبايله
"الو...ايوه انا والده...خير...مستشفى ايه؟؟ طب حصله ايه طمنى بس لو سمحت... طيب حالا...شكرا مع السلامة"
قام ابراهيم بسرعة من على مكتبه
"فى ايه يادكتور...دكتورة سلوى تعبانة؟؟"
رد ابراهيم وهو خارج واميرة ماشية وراه
"كريم فى مستشفى ف طنطا...لو الدكتورة اتصلت عليكى هنا اوعى تقوليلها حاجة...قوليلها انى روحت مشوار ومقلتلكيش حاجة...اوعى يااميرة تقوليلها"
"حاضر حاضر...الف سلامة عليه ...هو حصل له ايه"
ابراهيم بيركب العربية
"لسه مش عارف...خلى بالك م الصيدلية"
"متقلقش...ان شاء الله خير"
مشى ابراهيم بالعربية ودخلت اميرة الصيدلية
                      *******************

جليلة واقفة ف المطبخ بتسمع الراديو
يرن جرس الباب...تروح تفتح
"اهلا ياماجدة اتفضلى"
دخلت ماجدة جارتها فى الشقة اللى قصادها
"ازيك ياجليلة...انا نازلة السوق فقلت اعدى عليكى لو عايزة حاجة اجيبهالك"
"اه والنبى تجيبى لى معاكى 2كيلو بطاطس وشوفى اى نوع خضار يكون طازة هاتيلى كيلو"
"مش عايزة حاجة تانية"
"لا كفاية علشان متبقاش تقيل عليكى"
"لا قولى ما احمد جاى معايا"
"هو مراحش المدرسة"
"مدرسة ايه هما ف الثانوى بيهتموا بالمدرسة... الدروس اللى بياخدها مخلياه بيروح المدرسة بمزاجه"
"ربنا ينجحهولك يارب"
خرج زياد م الاوضة يجرى وهو لابس هدوم الخروج
جليلة"بسم الله الرحمن الرحيم...انت مش كنت نايم؟"
ماجدة"ازيك يازياد...مالك وشك مخطوف ليه"
زياد"ازيك ياطنط... خالو ابراهيم جاى ياخدنى ورايحين مشوار"
جليلة بقلق"مشوار ايه دلوقتى... سلوى جرالها حاجة"
زياد"لا كويسة...ومتتصليش بيها"
جليلة"استنى هنا فهمنى فيه ايه"
زياد بحزن وهو على الباب
"كريم"
تدب جليلة بايدها على صدرها
"كريم....  ماله؟؟"
زياد وهو بيفتح الباب
"مش عارف حادثة ولا ايه وهو ف طنطا...انا رايح مع خالو وانتى اوعى تقولى لطنط سلوى"
ماجدة قاعدة مش عارفة تقول ايه لانها مش فاهمة اللى حصل
جليلة"فهمنى يا زياد حادثة ايه؟؟مات يعنى؟؟"
زياد"والله ما اعرف تفاصيل...هبقى اكلمك اعرفك"
خرج زياد وقفل الباب وراه
"يا مصيبتى يا نى... يارب نجيه"
"كريم ده ابن اخوكى ؟"
"اه ياختى....لو جراله حاجة امه ممكن تموت فيها"
"بعد الشر...ان شاءالله ربنا ينجيه علشان امه وابوه وشبابه"
                  *****************

مديحة رايحة تفتح الباب اللى بيرزع
اول ما فتحت لقيت مجدى بيزق شذى جوه البيت
"جرى ايه يامجدى انت بتزقها كده ليه"
مجدى"ابويا مقالكيش انها متطلعش الا باذنى"
شذى بتعيط
"قلت لك مستحيل اخليك تتحكم فيا"
مجدى بيهجم يضربها بالقلم
"اخرسى يا بت"
مديحة بتمسك ايده وبتقف بينهم
"انت اتجننت انت عايز تضربها"
مجدى"يمين بالله لو شفتك بره البيت لاتاويكى"
شذى"ما انت مجرم وتعملها"
وكملت وهى بتعيط بخوف
"ده لسه قاتل واحد ياماما قبل مانيجى"
اترعبت مديحة من اللى سمعته
مجدى"انا مش قلتلك تخرسى... لو جبتى سيرة الموضوع ده تانى هتحصليه"
مديحة بتحاول تحتوى الموقف علشان تفهم
"روح يامجدى شوف شغلك...وانتى اطلعى فوق"
غمزت لشذى انها تطلع من غير ماترد
طلعت شذى ووقفت مديحة لمجدى
"روح يامجدى ومتتعرضلهاش تانى...انا وابوك هنبقى نتكلم مع بعض ف دراستها"
"ماشى يا مرات عمى...بس عقليها وفهميها انى ماليش عزيز يوم ما تفتح بؤها هطير رقبتها"
خرج مجدى وقفلت مديحة الباب وراه
"روح داهية لا ترجعك انت وابوك"
طلعت تجرى بسرعة لشذى تفهم منها
                   **********************

مديحة قاعدة جنب شذى وشذى بتعيط
"يعنى الشاب ده حصل له ايه"
"معرفش... انا خفت لما شفته اتضرب... خفت البوليس ييجى وياخدنى معاهم... انا مش عارفة زفت الطين ده طلعلى منين... ولما قلت له هبلغ عنه هددنى"
"تبلغى عن مين ده مجرم...ملكيش دعوة ربنا يستر والشاب ده ميموتش ولا يكون حد شافه ويبلغ عنه انما انتى ملكيش دعوة خالص بالموضوع ده احنا مش قدهم"
"ربنا يستر انا خايفة اوى حاسة ان انا السبب...هو نزل يدافع عنى"
"ربنا يسترها معاه وينجيه"
"قوليلى ايه كلام مجدى ده ...ده بيقولى ان عمى كلمك ف خطوبة وجواز وتخاريف كده"
"مش تخاريف"
"نعم...يعنى كلامه ده بجد"
"اه...عمك عايزك لمجدى ومستنى الاربعين"
ولطمت شذى على وشها وهى بتصرخ
"يااااااااااخرابى ياخراااااااااابى ... عايزانى اتجوز مجدى الصايع ده ...مستحيل ...ده انا اموت نفسى ولا انى اتجوزه يوم واحد"
"استغفر الله العظيم"
"انتى سكتى له ازاى... ازاى لما قالك كده سمعتيه وخلتيه يكمل كلامه...واقول ايه لخالد اللى مستنى معاد... يا حبيبى يا بابا وجودك كان حايش عننا بلاوى"
"الله يرحمه...مكنتش اعرف اننا هنبقى ملطشة من بعده"
"يعنى ايه...موافقة؟؟"
"لا طبعا بس مش عارفة اتصرف ازاى... عمك مفترى ومحدش بيقدر عليه وانا مش هقدر اقف ف وشه وانا لوحدى"
"المهم انى متجوزش الزفت ده"
"ان شاءالله مش هتتجوزى غير اللى انتى عايزاه... بس خليكى اليومين دول بلاش كلية لحد مانشوف هنعمل ايه"
                          *****************

ابراهيم وزياد بيجروا على سلم المستشفى
بيسألوا الدكتور
ابراهيم"لو سمحت يادكتور انا والد كريم ابراهيم...تحت قالولى انه هنا"
الدكتور"متقلقش يا استاذ الجرح سطحى ...هو بس نزف كتير وخيطنا الجرح وممكن يروح كمان شوية لما يخلص التحقيق"
زياد وابراهيم"الحمدلله...هو فين"
الدكتور"اخر اوضة يمين"

راحوا بسرعة على الاوضة
شافوا كريم نايم وجنبه ملفوف وهدومه غرقانة دم
ابراهيم وزياد
"ايه اللى حصل ياكريم...مين عمل فيك كده"
ف نفس الوقت اللى دخل فيه امين شرطة
"عايزين اقوالك لو سمحت"
سحب امين الشرطة كرسى وقعد...وفتح دفتر
"ايه اللى حصل"
كريم بصوت متقطع من الالم "انا كنت ماشى بالعربية وفجأة كسرت عليا عربية ربع نقل فانا بصيت عليه ف المراية لقيته بيشد بنت عايز يخطفها"
وسكت كريم مش قادر يكمل
امين الشرطة
"وبعدين"
كريم بيستجمع قواه
"نزلت ألحق البنت...لسه بتكلم معاه لقيته طلع مطواة ف ثوانى وجرحنى بيها"
امين الشرطة"تعرف رقم العربية"
كريم"لا ملحقتش... بس اللى اعرفه انى غلطان"
ابراهيم وزياد بيبصوا لبعض
ابراهيم"غلطان ليه؟"
كريم"لان البنت تعرفه واكيد هما الاتنين من بيئة واحدة وانا دافعت عنها وشفتها بتجرى تركب معاه"
امين الشرطة بيقفل الدفتر وخارج من الاوضة
"لو وصلنا لاى حاجة هنبقى نبلغك"
زياد"حمدالله على سلامتك ياكيمو"
ابراهيم"عربيتك فين"
كريم"الله يسلمك يازياد... ف الشارع يابابا"
ابراهيم"زياد...واحنا ماشيين هنوصلك للعربية تبقى تجيبها ورانا"
زياد"حاضر...هتصل بماما اطمنها"
كريم"فين موبايلى يا بابا"
ابراهيم"مش عارف...انا الاتصال اللى جالى مكنش من تليفونك"
وطلع ابراهيم تليفونه واتصل بتليفون كريم
"التليفون مقفول"
زياد"يبقى اتسرق ...ربنا يستر ونلاقى العربية"
ابراهيم"اى حاجة مش مهم ...المهم ان كريم بخير"
                         *********************

شذى قاعدة ف سريرها... خايفة
خايفة يكون فيه حد مات بسببها
خايفة انها تتجوز مجدى
خايفة على حبها لخالد
خايفة متكملش تعليمها
وف وسط خوفها ده كله اتصل بيها خالد
ردت بسرعة ولهفة واحساس بانه هيخرجها من اللى هى فيه
"الو...ازيك ياخالد"
"ازيك انتى يا ست هانم"
"مالك ياخالد بتكلمنى كده ليه"
"انا عايز اعرف انتى معووجة عليا اليومين دول ليه"
"انا؟؟ انا عملت ايه"
"اتصال انا اللى بتصل... بقولك تحددى معاد تطنشى... انتى مبتسمعيش عن البنات اللى بيتحايلوا على اللى معاهم انه يتقدم...اقوم انا اللى اتحايل عليكى"
"الموضوع مش كده ياخالد"
"اومال ازاى"
"اصل فيه مشاكل بين ماما وعمى علشان كده مش عارفة تفاتحه ف الخطوبة ده غير ان بابا معداش عليه وقت علشان نفتح موضوع زى ده"
"لا بقى انا مش مقتنع بكل الحجج الهبلة اللى بتقوليها دى...لو انتى مخبية حاجة قولى علشان انا صبرى بدأ ينفد"
"حاجة ايه اللى مخبياها"
"معرفش... لما تكونى عندك جديد ابقى كلمينى ...سلام"
وقفل معاها قبل ماترد عليه
                       *******************

خالد قاعد ومامته جنبه
بيحط الموبايل على ترابيزة قدامه
"راجل يا خالد...هى هتبيع وتشترى فيك على ايه...بنات ايه دى اللى بتتأمر"
"ما انا مسكتش ياماما...قلت لها كل اللى قلتيلى عليه"
"جدع... البت دى مش مظبوطة ووراها حاجة مخبياها...بابا تعبان لأ بابا مات لأ مش عارف ايه...سيبك منها وانا اجوزك واحدة نعرف اصلها وفصلها مش دى اللى منعرفلهاش حاجة"
"بس دى اللى انا بحبها"
"حب ايه...وهو ده حب اللى يذل"
"انا خلاص مش هكلمها تانى غير لما هى تتكلم...ياتحدد معاد مع اهلها ونشوف..يا بناقص من وجع القلب ده"
                      ******************

مديحة قاعدة بتفكر... قامت فتحت الدولاب وطلعت عبايتها وطرحتها تلبسهم
دخلت عليها شذى
"رايحة فين"
"لعمتك"
"خالد لسه قافل معايا وفاكرنى بطلع حجج علشان ميجيش"
"كل حاجة هتبقى كويسة ان شاءالله"
"انتى مطمنة ازاى كده"
"مش مطمنة يا شذى انا مخنوقة ومفيش غير عمتك اللى هروح افضفض معاها شوية يمكن الاقى عندها حل...ناولينى دبوس للطرحة م الدرج"
فتحت شذى الدرج تدور على دبوس
لقيت فلوس ...مسكت اوراق الخمسينات والميات
"ايه الفلوس دى ياماما؟؟ جبتيها منين"

                 



هناك 21 تعليقًا:

  1. ربنا ياخدك يا مجدى انت و ابوك و امك

    aYa

    ردحذف
  2. حلوه جدااااااااااااااااااااااااااااااا
    شكل خالد هايسيبها وهاتحب كريم

    ردحذف
  3. gamda aweee y dodo kepp going :):)

    ردحذف
  4. مينفعش الحلقة الجاية فجأة كده وبدون اى مقدمات مجدى ده واهله يختفوا

    ردحذف
  5. حسبي الله ونعم الوكيل دمي اتحرق

    روعة يا دودو

    ردحذف
  6. اى يا دينا دة مجدى دة واحد زبالة صحيح ياريت يتخفى من الحلقات هههههههههه

    ردحذف
  7. خربيتك يا مجدي انت وامك وابوك البت هتموت بسببك يا زفت انت

    ردحذف
  8. انا دمي اتحرق مجدي وابوه دمهم تقييييييييييل على قلبي ومش عارفه استمتع بالقصه بسببهم

    ردحذف
  9. حلللللللللللللللللللوة

    ردحذف
  10. جميييييييييييله يا ريت نخلص من مجدى الزفت ده وخالد ماله كده ماشى ورا مامته ربنا يستر بجد تسلم ايديك

    ردحذف
  11. بجد قصه جميل كل مده مبتشدني

    ردحذف
  12. خالد شكله هيبيع شذي :(

    ردحذف
  13. الحلقه تجنن والقصه حلوه اوى وعندى احساس ان شذى ههتجوز كرريم معرفش ازاى بقى
    مايسه

    ردحذف
  14. جميلة

    بس نفسي تحصل مصيبة لمجدى وابوه وامه

    ومش يكملوا معاكى ههههههههههههه

    ردحذف
  15. جامدة اوى بس يارب تبقى نهايتها حلوة مش وحشة عشان بجد الظلم وحش ااااااوى :(

    ردحذف
  16. تسللللللللللللم ايدك يا ديناااا
    حلووووووووة اوى بجد

    amira slama

    ردحذف
  17. تسلم ايدك بجد والقصه رائعه
    بس عارفه فيها شويه من مسلسل على مر الزمان بس مش كلها
    بس دا مش يقلل من انها رائعه ربنا يحفظك

    ردحذف
  18. بجد القصة حلو9و9و9و9و9و9و9ه او9وو9و9ي تسلم ايدك

    ردحذف
  19. ربنا ياخد كل اللي ف القصع دي بمافيهم خالد ومامته بس ربا يخلي كرين وعلتع وشذا ومامتهاو اختها بس يارب كريم وشذا يتجوزوا يارب

    ردحذف
  20. ربنا يا خد مجدى والا جابوو مجد الصايح القزر ايه الناس دة بس الحلقة حلووه

    فاطمة

    ردحذف
  21. كريم ده جدع اوي ...يارب يرزقني بواحد زيو����

    ردحذف

قول رأيك بلاش تقرا وتقفل من سكات...ارائكم تهمنى