الأربعاء، 6 مارس، 2013

بقينا عيلة... الحلقة 6

الحلقة 6
مديحة داخلة لشذى اوضتها وهى بتضحك
"شذى ...اسمعى احلى خبر"
"هو عاد فيه اخبار حلوة"
"عمتك الله يكرمها ويخليلها ولادها"
"مالها"
"راحت لعمك وخلته يشيل موضوع الجواز ده من دماغه وارجعى الكلية من بكرة"
شذى بعدم فرحة
"مش معقول...من امتى عمتى بتقدر عليه"
"قدرت... علشان احنا غلابة ربنا قدرها وقدرت عليه"
"ازاى"
سكتت مديحة شوية
"سكتى ليه ياماما...قدرت عليه ازاى"
"هو يسكت على التعليم والجواز واحنا نسكت على حقنا ف الميراث"
"حرام كده والله"
"هعمل ايه طيب اسيبك تتجوزى الصايع ده ومتكمليش تعليمك"
"والفلوس اللى بيجيبهالنا ماشية ولا هتقف"
"معرفش...خلينا بس فى اللى احنا فيه....خالد كلمك؟؟"
"لا من ساعتها مكلمنيش ولما بتصل بيه مبيردش عليا"
"وبعدين؟؟"
"مش عارفة...احنا برضه كل ما يقول هيتقدم نطلع له بحجج"
"قومى اتصلى بيه من تليفونى وهاتيه اكلمه"
"هتقوليله ايه"
"احنا داخلين ع الامتحانات...اول ما تخلصى امتحانات ييجوا يتقدموا"
"وعمى هيسكت؟"
"ما احنا خلاص عرفنا اخره ايه....هو خايف ناخد فلوسنا منه ...غير كده هيسكت"
"يعنى يا حريتنا يا فلوسنا"
"ايوه...يالا بقى اتصلى بخالد وهاتى اكلمه"
قامت شذى اتصلت بخالد من موبايل مامتها ...وناولتها التليفون
"الو...ازيك يا خالد...انا مامة شذى...اهلا بيك... شذى كانت بتتصل بيك علشان اكلمك بس انت مكنتش بترد... شغل..ربنا يعينك...المهم انا اتفقت مع شذى ان بعد الامتحانات تيجوا انت واهلك وتنورونا ...ويكون باباها ربعن ... ابقى اتكلم مع مامتك ...اكلمها؟؟انا اكلمها ليه؟؟ ربنا يسهل لما الامتحانات تخلص...خد شذى معاك اهى"
اخدت شذى الموبايل من مامتها وهى فرحانة
بس مديحة مكنتش فرحانة وقامت خرجت من الاوضة
"انا نازلة اشوف اختك خلصت الواجب ولا لسه"
                      ********************

مديحة قاعدة وجنبها ضحى بتكتب الواجب
نزلت شذى بعد ما خلصت المكالمة
"مالك ياماما"
"مفيش ...اتكلمتوا؟؟"
"اه الحمدلله اتصالحنا"
"مبسوطة؟"
"اوى"
"يارب يسعدك ياحبيبتى"
"قوليلى مالك شكلك اتغير وانتى بتكلمى خالد"
"بصى يا شذى ...انا علشانك وقفت قصاد عمك فى حكاية الجواز من مجدى واستحالة كنت هسيبك تتجوزيه... كل ده علشان تاخدى اللى بتحبيه"
"هااا"
"انما كل حاجة وليها اصول...والحب مش معناه اننا نتعدى الاصول دى"
"مش فاهمة"
"خالد اللى فاكراه هيفرح لما قلت له انه ييجى بعد الامتحانات لقيته بيقولى ابقى كلمى ماما قوليلها... انا مش هرخصك واروح انا اكلم مامته... هى اللى لازم تتصل وتحدد معاد معايا"
"بس ياماما انا شايفاها عادى يعنى مش مهم مين اللى يتصل"
"لا مهم...ومهم اوى كمان...مش هكلمها اقولها هتيجى تخططبى بنتى امتى...عيب...اللى عايز ييجى اهلا وسهلا اللى مش عايز براحته"
خلصت مديحة كلامها ومسكت كراسة ضحى
"انتى حمارة... مش تبصى كويس مينفعش نطرح 8 من 6 استلفى من اللى جنبها... عيدى المسألة تانى"
حست شذى ان مامتها متضايقة من كلام خالد
واتحولت فرحتها بانها اتصالحت مع خالد لخوف من العند اللى ممكن يحصل على حاجة تافهه...مين يتصل بالتانى الاول
                    ********************

كريم داخل لمامته اوضتها
"ماما مالك"
"ايه اللى قيمك من السرير"
"انا بقيت كويس الحمدلله...انتى كنتى بتكلمى حد"
"اه ..دعاء اتصلت ورديت عليها ...كنت فاكراك نايم"
"مسمعتش التليفون... بس غريبة انها تتكلم على تليفون البيت"
"هى بتقولى انها متصلة تسأل عليا...فيها الخير والله"
"شكلها حبتك"
"وانا كمان حبيتها اوى...ربنا يسعدكم يارب"
"يعنى عجبتك"
"اه...شكلها بنت ناس وبتحبك ودى اهم حاجة"
"طيب هنروح لهم امتى"
"اول ما تبقى كويس"
"طب انا بقيت كويس خلاص"
وضحكت سلوى
"خلاص ...ايه رأيك نروح لهم الجمعة الجاية"
"لسه اسبووووع"
"للدرجة دى مستعجل"
"اصل يعنى..."
"يدوب يا كريم علشان تكون صحتك بقت كويسة"
"ان شاءالله...هروح اقولها"
"طيب وابقى هات تليفون باباها علشان باباك يتصل بيه يقوله على المعاد"
وطا كريم يبوس مامته...مسك مكان الجرح اللى ألمه ومبينش علشان ميقلقش مامته
                        ********************

مديحة داخلة على شذى اوضتها
"بتذاكرى"
"ايوه"
"عايزة حاجة اعملهالك"
"لا شكرا ربنا يخليكى"
"لسه كام مادة"
"هانت مادة بكرة ومادة كمان"
"طيب ربنا ينجحك...تصبحى على خير"
خرجت مديحة من الاوضة...بصت على ضحى شافتها نايمة
دخلت اوضتها... فتحت الدرج
"مبقاش فاضل الا 100 جنيه... وصبحى مطنش خالص... اعمل ايه؟؟اروح اكلمه...هبقى كأنى بشحت منه... اوسط حسنية؟؟ هبقى بتقل عليها كفاية اللى عملته... ابيع حتة دهب... طب ولما يخلص اعمل ايه؟؟ اطلب منه مفيهاش حاجة...بس لو وقفلى ف خطوبة البت هتصرف ازاى...انا ابيع غويشة ونعدى الظروف دى ويبقى ربنا يحلها بعد كده"
                        ********************

كريم وباباه ومامته
قاعدين فى بيت دعاء مع باباها ومامتها
جمال"اهلا وسهلا اتشرفنا بيكم ياجماعة والله"
ابراهيم"الشرف لينا .. ندخل ف المفيد ونقول الكلام الرسمى التقليدى...احنا بنطلب ايد كريمتكم دعاء لابننا كريم"
ضحكوا كلهم على الطريقة التقليدية لطلب ايد دعاء
اللى كان بيضحكهم فرحتهم كلهم ببعض اكتر من مضمون الكلام
جمال"كريم ابننا ودعاء بنتكم وعلى بركة الله"
ابراهيم"نقرا الفاتحة"
وقروا كلهم الفاتحة ونظرات الحب والفرحة متبادلة بين دعاء
سلوى"كريم...قدم هديتك لعروستك"
وطلع كريم من جيب الجاكيت علبة صغيرة فيها خاتم
ومدت دعاء ايدها لكريم
"لبسهولى"
لبسها كريم الخاتم
ابراهيم"احنا تحت امركم يا استاذ جمال فى كل طلباتكم...الشبكة اللى تحددوها وشقة كريم موجودة واى حاجة هيعوزوها انا تحت امرهم"
جمال"احنا كمان جايبين لدعاء شقة زى اختها... وهما احرار فى اللى يختاروه...يحبوا يقعدوا ف شقة كريم ف شقة دعاء يبيعوا الاتنين ويجيبوا واحدة اكبر اللى هما عايزينه"
دعاء"احنا هنبقى نتفق على حياتنا مع بعض يابابا"
جمال"براحتكم"
سلوى"المهم نفرح بيهم قريب انا هعملهم الخطوبة هدية منى"
دعاء"ميرسى يا طنط"
سلوى" ابقوا انزلوا دوروا على القاعة اللى تعجبكم والوقت اللى يناسبكم واحجزوا ...خلونا نفرح"
                    ********************

مديحة رايحة تفتح الباب اللى بيخبط
"اهلا يا ابو مجدى..اتفضل"
"بعتيلى البت ليه خير؟"
"ادخل اقعد حسنية جوه"
دخل وقعد بعد ما سلم على اخته
صبحى"ايه اللمة دى...عاملين قعر مجلس"
حسنية"وانت لما تشوف اختك ومرات اخوك يبقى فيه قعر مجلس"
قعدت معاهم مديحة
صبحى"المهم يعنى خير؟؟"
مديحة"فيه ناس كلمونى عايزين ييجوا يخطبوا شذى"
صبحى"ناس مين؟؟ من بلدنا؟"
مديحة"لأ من طنطا"
صبحى"اااااه علشان كده كل شوية رايحة طنطا وجاية من طنطا"
مديحة"بنتى بتروح علشان دراستها مش حاجة تانية"
صبحى"لما ابقى اسأل عليهم"
حسنية"وانت هتسأل مين...انت علاقتك بالتجار وهو موظف ابن موظف يبقى هتسأل مين"
صبحى" موظف ابن موظف...شحات وجاى طمعان فيها"
مديحة"وهى حيلتها ايه يطمع فيها...انت ناوى تديها ورثها؟"
صبحى"ام الموضوع ده مش اتكلمنا فيه"
حسنية"انت بقالك شهر مبعتلهاش حاجة"
صبحى"انا مبعتلكيش تموين البيت؟؟"
مديحة"بعته"
صبحى"وهى الحاجات دى مش بفلوس"
مديحة"اقولهم ييجوا امتى"
حسنية"فيكى الخير يامديحة انك مكبرانا وحاطانا ف الصورة... خليهم ياختى ييجوا اى وقت ربنا يتمم بخير"
وبصت لصبحى مستنية رده
قام هو بيقول
"اللى فيه الخير ربنا يقدمه... ييجوا بس لو معجبنيش مش هوافق"
بصت مديحة وحسنية لبعض ..كان وصل للباب
"سلامو عليكو"
بعد ما خرج
"اعمل ايه يا مديحة... انا خايفة الناس ييجوا وهو يحرجهم"
"والله ما عارفة اقولك ايه"
"احنا بنستحمله علشان قدرنا انه يتحكم فينا... انما الناس الغرب مش هيستحملوه"
"متقدريش البلا قبل وقوعه...مش يمكن يزعق فيها نبى ويتهدى ويوافق"
"يارب... العيال بيحبوا بعض وانا مش عايزة اكسر بخاطر بنتى"
"ياختى ربنا مايجيب كسر خواطر... اسكتى يا مديحة خلينا نفرح ومنشيلش هم"
"مش مرتاحة لاخوكى والله يا حسنية...ربنا يستر"
                    ********************

دعاء وكريم مع بعض فى العربية
"كيمو... انا عايزة اشوف قاعة حلوة اوى"
"عايزة تشوفى ولا هى حلوة اوى"
"انا شفتها ع النت عجبتنى وعايزة اشوفها ع الطبيعة"
"حاضر يوم الجمعة ان شاءالله"
"جمعة ليه... نروح دلوقتى"
"الساعة داخلة على 6 يا دعاء واحنا من الصبح ف الشغل"
"فيها ايه؟؟ احنا هنقعد فيها...هنبص بصة بس"
"انتى دورى ع النت براحتك ويوم الجمعة نلف على كل القاعات اللى عجبتك"
"مش عايز نروح دلوقتى ليه"
"ماما بتفضل قاعدة طول اليوم لوحدها وانا بروح اطمن عليها واطمن على دواها ومش بتتغدا غير لما برجع... مقدرش اسيبها والف معاكى يا دعاء"
دعاء سكتت وفكرت شوية
"ماشى...انا عندى فكرة"
"ايه؟"
"اجى معاك نطمن على مامتك ونغديها وكل حاجة ...وننزل نشوف القاعة"
سكت كريم يفكر
"خلاص ماشى ... مش هتستأذنى مامتك او باباكى"
"اه هتصل بماما اقولها... عادى يعنى هما واثقين فيا"
                      **********************

دعاء وكريم بيتفرجوا على القاعة ومعاهم المدير واقف لبعيد لحد ما يخلصوا
"ايه رايك يا كيمو"
"شيك اوى"
"مش قلتلك"
دعاء نادت على المدير
"لو سمحت"
جه يكلمها
"اؤمرى يا انسة"
"القاعة حلوة بس لو انا عايزة اعمل تعديل ف الكوشة ممكن؟"
المدير"ممكن"
دعاء"وبالنسبة للفيديو والدى جى بيبقى تبع القاعة ولا احنا اللى بنجيبه"
المدير"كل التفاصيل دى بتكون بالاتفاق معاكم...الفيديو الزفة البوفيه مثلا كل دى حاجات لنتكلم فيها لو انتوا عايزين تجيبوها مفيش مانع عايزين احنا نجيب كل حاجة برضه مفيش مانع"
دعاء"لا احنا عايزين القاعة بس وهنجيب كل حاجة"
المدير"تحت امرك"
دعاء"طيب ممكن تقولى الايام اللى فاضية امتى وامتى"
كريم كان بيبص لها وساكت...مستنيها تدى له فرصة يتكلم
ولما شافها ماشية ورا المدير علشان يشوف اجندة الحجز
مشى وراهم... ولما وصل للسلم
"انا نازل...لما تخلصى خالص ابقى تعاليلى ف العربية"

هناك 17 تعليقًا:

  1. روعععععععععععه يا دينا بجد متشوقه للجاي مع كريم ودعاء شكلها متسلطه

    ردحذف
  2. ana mish merta7a ldo3a2 dy mn el2wl w khaled kaman shaklo ma3ndosh sha5sya w yasmeen 7assa n karim w shaza haytgwzo

    ردحذف
  3. قصصك جميله فعلا انا قريتها كلها واكتر قصه عجبتنى ابغض الحلال لانها واقعيه جدا وبتحصل كتير.. اما القصه الجديده دى حلقة النهارده بتبين ان دعاء مش هتبقى لايقه خالص على كريم هتبقى ماديه وبتحب تفرض شخصيتها وجرئتها زياده قوى غير طبع كريم خالص

    ردحذف
    الردود
    1. فعلا ابغض الحلال كانت جميله 😊☺

      حذف
  4. اعتقد ان شذي هتسيب خالد وكريم هيسيب دعاء وشذي وكريم لبعض

    ردحذف
  5. رووووووووووووووووووووووووووووووووعة

    ردحذف
  6. دعاء متحكمه اوي و شكل مامه خالد هتبوظ الدنيا مع شذي

    ردحذف
  7. لا بجد حلوووووووووووووووووه اوي البت دي انا مخنوقه منها لله في لله كده حاسه ان كريم وشذي هيتقبلو ويحبو بعض والبت دي وراها حاجه شكلها صايعه كده xDD

    ردحذف
  8. حلوه جداااااااااااااااااااااا

    ردحذف
  9. تحفة ماشاء الله عليكي

    ردحذف
  10. جميلة اووووووووووووووي

    ردحذف
  11. جامده جدا

    ردحذف
  12. دعاء جريئه وفظيعه وشكلها هتلغى كريم اصلا اساسا :D

    ردحذف
  13. جامدة بس دعااا عااا منها :D

    ردحذف
  14. حلووووووه

    ردحذف
  15. والله كريم دا عسل . بس معرفش ليه حاسه ان دعاء مش ممسكاه زمام الامور دي حاجه بضايق الرجاله اوي

    ردحذف

قول رأيك بلاش تقرا وتقفل من سكات...ارائكم تهمنى