الجمعة، 8 مارس، 2013

بقينا عيلة... الحلقة 8

الحلقة 8
شذى جريت ترد على الموبايل اللى كانت ناسياه ف الاوضة
"الو"
"كل ده علشان تردى"
"معلش ياخالد والله ماكنت سامعة...انت بتتصل من زمان"
"طبعا من زمان انا كنت مش هتصل بيكى تانى"
"معلش يا خالد انا اسفة"
"على ايه ولا ايه ...انتى كسفتينى قدام ماما واختى وجوزها"
"انا؟؟ ليه؟؟"
"مشفتيش عمك كان قاعد ازاى ولابس ايه؟"
وحست شذى بالاهانة والاحراج
مش عارفة ترد تقوله ايه؟
حست بدموعها نازلة من عينيها
"انا هفضل اكلم نفسى... انتى مبترديش عليا ليه"
"مش عارفة ارد اقولك ايه...انت عمال تقولى عمى عمى...انا هقدر اعمل ايه يا خالد؟"
"وبعدين ايه حكاية يسأل عليا دى"
"خالد انت بتحاسبنى على حاجة ماليش دعوة بيها ليه؟؟ انا مش مسئولة عن كلامه ولا انا اقدر اقوله قول ايه ومتقولش ايه"
"طيب خلاص خلاص... انا بس عايز اعرفك انى اتقابلت مقابلة وحشة انا واهلى"
"انا اسفة حقك عليا"
"ماشى... لما البيه يبقى يسأل ابقى خلي حد من عندك يتصل بماما يرد عليها...هى جت لحد عندكم ولازم تقدروها وتحترموها"
"حاضر... بس ممكن متزعلش منى ولا تزعلنى"
"ربنا يسهل... انتى بس خلى اهلك ميبقوش مستفزين كده"
"حاضر"
                       ********************

كريم قاعد على كرسى قريب من الباب
الريسيبشن مقسوم جزئين للعزاء
الداخلى كله ستات...واللى ناحية الباب كله رجالة

كريم قاعد ساكت مبيتحركش
اللى يسلم عليه ويعزيه يرد عليه ويقعد تانى نفس القعدة

دعاء عينيها عليه طول اليوم... مش عارفة تكلمه من زحمة الناس
وقفت دعاء فى الطرقة المؤدية للمطبخ
"بسسسس...كريم"
كريم مش اخد باله... خبط زياد على كتفه
"كلم دعاء"
بص لها ...شافها بتشاورله
قام راح لها
"نعم؟"
"تعالى اما اقولك"
اخدته ودخلت المطبخ...
"اقعد يا كريم"
قعد كريم على الكرسى اللى شاورت له عليه
فتحت كيس سندويتشات مقفول
"انتى بتعملى ايه"
"انت مكلتش م الصبح يا كريم"
"اقفلى اقفلى ...مش جعان"
قام كريم خارج من المطبخ
"استنى يا كريم...كلنا زعلانين بس لازم...."
"خلاااااااص يا دعاء... مش عايز"
وخرج من المطبخ ورجع قعد تانى على نفس الكرسى جنب الباب
بيسمع القران وسرحان فى لا شئ

رجعت دعاء قعدت وسط عزا الستات جنب جليلة
"مش راضى ياكل يا طنط"
"سيبيه براحته... ياقلبى من ساعة ما عرف وهو زى اللى تايه ...اللى ما نزل دمعة واحدة"
                    *******************

دعاء ومامتها وباباها بيسلموا على ابراهيم وجليلة
دعاء بتسلم على كريم
"كريم شد حيلك"
"على الله...شكرا يا دعاء"
"علشان خاطرى بلاش الحزن ده...انا قلبى بيتقطع علشانك"
"ربنا يسهل"
نزلوا دعاء ومامتها وباباها
دخل كريم اوضته وهو بيغير هدومه دخله زياد
"هات لى اى حاجة من عندك انام فيها"
"عادى يا زياد انا كويس...روح انت"
"مش عايزنى ابات عندك ولا ايه يا ابن خالى"
"انت تنور... صدقنى انا كويس...ربنا يرحمها هى تعبت كتير وده امر ربنا"
"ونعم بالله... ربنا يرحمها... هبات معاك برضه"
دخلت عليهم جليلة
"غيروا هدومكم عملت العشا"
زياد"هنغير ونيجى"
كريم"انا هنام يا عمتى معلش مش قادر"
جليلة"تعدمنى ما تنام الا لما تاكل.. ده انت من ساعة الخبر امبارح مدوقتش لقمة... مش كويس عليك يا بنى"
كريم"خلاص ياعمتى حاضر"
دخل عليهم ابراهيم
"ايه ياكريم...عامل ايه"
كريم"الحمدلله يابابا... متقلقوش يا جماعة انا مؤمن بالله"
ابراهيم"ربنا يرحمها...اتعذبت كتير"
                      *********************

حسنية وصبحى متقابلين ف الشارع
"فينك يا صبحى"
"موجود...ازيك وازى العيال"
"كويسين...عملت ايه ف موضوع شذى"
"عملت ايه ف ايه"
"سألت ع العريس"
"لأ"
"ليه...اومال هتسأل امتى"
"مش عارف اسأل مين...لو كان من بلدنا مكناش دوخنا"
"خلاص يا صبحى بدل مش عارف تسأل الناس بتسأل وعايزين يقروا الفاتحة"
"طيب... شوفى امتى وخلينا نخلص م الموال ده"
                       *********************

كريم ودعاء فى الشغل بعد ايام العزا
كريم على مكتبه ودعاء سألته
"خلصت؟"
"اه خلاص"
"طيب يالا علشان نروح مع بعض... ايه رايك نتغدا سوا"
"لا انا مروح"
"ليه"
"مفيش مليش نفس اخرج يا دعاء"
"انت هتفضل زعلان كده... احنا متقابلناش من بعد العزا الا النهاردة وعايزين نقضى اليوم مع بعض"
"الدنيا مش هتطير...خروج مش عايز اخرج...انا كفاية عليا الشغل ومروح"
"انا زعلانة منك"
"ليه"
"علشان مش عايز تخرج معايا"
"لو انتى اخدتيها كده براحتك"
لم كريم الحاجة اللى على مكتبه
"انا نازل هتيجى اوصلك ولا هتروحى لوحدك"
خرج كريم من مكتبه...جريت وراه دعاء
"خلاص يا كريم وصلنى معاك ومش مهم نخرج"
                    **********************

خالد ومامته واخته وجوزها
ومديحة وحسنية وجوزها وصبحى قاعدين
ام خالد"احنا جايين نتفق النهاردة على كل التفاصيل... نقرا الفاتحة ونجهز الشقة ويدخلوا"
صبحى"والله لما تجهزوا خدوها... اهى شنطة هدومها تتجهز ف يوم وليلة"
ام خالد"شنطة هدومها ايه؟؟ انتوا مش هتجهزوا"
صبحى"لا... مش انتوا عايزينها...خدوها"
مديحة وحسنية بيبصوا لبعض ومش عارفين يتكلموا
حسنية" ازاى يا ابو مجدى مش هتجهز بنت اخوك احسن جهاز"
صبحى"اخويا مسابش فلوس تكفى جهاز... والله لو هما شارينها هياخدوها... انما لو داخلين على انها وارثة فهما غلطانين"
ام خالد بتوجه كلامها لخالد
"شايف... عمال يبيع ويشترى فينا على ايه...ما انت اللى رخصتنا"
خالد"ياعمى ده اسمه كلام برضه"
صبحى"هو ده اللى عندى ...والجواز قسمة ونصيب"
ام خالد قايمة
"ده انت راجل قليل الذوق... انت جايبنا تهزأنا... بتتنك على ايه بلا خيبة...ده انت فاكر بنت اخوك املة...لولا الاهبل ده اللى عايزها مكنتش جيت ولا عبرتكم"
صبحى"مش هرد عليكى علشان انتى ولية"
ام خالد"ولولوا عليك ساعة وسكتوا...يالا "
وشخطت فى خالد وبنتها وجوزها وقاموا وراها
حسنية ومديحة واقفين مش عارفين ينطقوا
شذى وضحى شافوا خالد واهله وهما ماشيين
رجعت شذى اوضتها تعيط وضحى دخلت وراها

مديحة بتزعق لصبحى
"هى ابوها مسابش اللى يجهزها.... حرام عليك يا شيخ... ده انت آكل مال اليتامى ياظالم"
صبحى"اخرسى يا ولية متخلينيش امد ايدى عليكى"
حسنية"هى حصلت...انت زودتها اوى يا صبحى"
صبحى وهو بيمسك اخته من دراعها
"ملكيش دعوة انتى كمان"
قام جوزها اللى كان لسه موجود ومش عايز يتدخل
"انت كده زودتها اوى...هتمد ايدك على مراتى"
صبحى"بقولكم ايييييييه... انتوا كلكم متعرفوش تعيشوا من غير اللى ببعتهولكم من شغلى وشغل ابنى"
جوز حسنية"فلوسك مبتصرفش على بيتى يا ابو مجدى"
صبحى"خليك انت على جنب والنبى...انا مبكلمش اغراب انا بتكلم على ورث ابويا"
مديحة"خلاص قسم الورث وكل واحد يشوف حاله"
حسنية"ايوووه قسم الورث"
صبحى لحسنية"انتى عارفة ان مفيش قسمة للحريم"
حسنية"ده حرام"
صبحى"ده سلونا اللى طلعنا عليه من زمان ومش هيتغير"
مديحة"انا عايزة حقى وحق بناتى"
صبحى"طب تعالى بقى... انتى ساكنة هنا بقالك 20 سنة وده بيت ابويا اللى ليا فيه نصيب... احسبى بقى لو كنتى بتدفعى لى ايجار كل المدة دى كان يبقى كام... والوكالة الصغيرة اللى ف السنطة دى تعملها كام هتطلعى مديونة...وملكيش عندى لا تموين بيت ولا مصروف شهرى"
مديحة"منك لله يا اكل مال اليتامى...ربنا ينتقم منك"
صبحى "انتى بتدعى عليا ف وشى... طب قسما بالله لو ما فضيتى لى البيت ف خلال اسبوع لاكون رامى لك عفشك ف الشارع وقافل البيت بالضبة والمفتاح...وابقى اشتكينى ف المحكمة"
خرج صبحى من البيت وهو بيسب ويلعن فى مديحة

قام جوز حسنية
"انا هقوم وراه ... لاحسن يخرجك م البيت بجد"
حسنية"روح وراه... ربنا ينتقم منك يا صبحى... متزعليش يامديحة"
مديحة قاعدة منهارة من العياط
"دى اخرتها...اتطرد من بيتى ويتاكل حق بناتى... اعيش فين وازاى"
حسنية بتطبطب عليها
"والله ما عارفة اقولك ايه يا مديحة... اللى هقولهولك ده على عينى بس احسن لك تاخدى بناتك وتبعدى عن صبحى وتحكماته... كده كده مش هيصرف عليكم.. يبقى متقعديش تحت رحمة اللى مفيش ف قلبه رحمة"
سكتت مديحة تفكر
"حسبى الله ونعم الوكيل فيه... معاكى حق..انا مليش قعاد هنا"
                    **********************

كريم قاعد فى اوضته... فاتح كتاب وجواه صورة مامته
دموعه نازلة وهو بيبص لها
"وحشتينى اوى ياماما... مش عارف حياتى هتبقى ازاى من غيرك... انا مكنتش بعرف احكى اى حاجة لحد غيرك... مش حاسس بأى طعم للدنيا ولا ليا نفس افرح ةلا اعيش وانتى بعيدة عنى ...اللى مصبرنى انك ارتاحتى من عذاب المرض... ربنا يرحمك"
يبوس الصورة...ويسمع صوت الباب
يقفل الكتاب ع الصورة...يمسح دموعه بسرعة ويتأكد ان مفيش اى اثر لدموعه اللى مبتنزلش غير كل ما يقفل عليه اوضته
خرج لابراهيم
"بابا"
"انت هنا ياكريم"
"اه"
"انا لقيت نور البيت كله مطفى افتكرتك مجتش"
"انا منزلتش من بعد ما جيت م الشغل"
"مجيتش قعدت معايا ف الصيدلية ليه"
"كنت مصدع فحبيت اقعد ف البيت"
"هغير هدومى ونتعشا مع بعض"
"انا اتعشيت يابابا وداخل انام...مش عايز حاجة"
"شكرا"
دخل ابراهيم المطبخ يحط شاى ع النار قبل ما يغير هدومه
بص حواليه
"المطبخ زى ما انا سبته قبل ما انزل"
                  ********************

مديحة على السرير... واخدة بناتها ف حضنها كل واحدة ف جنب
ضحى"وهنسيب بيتنا ونروح فين"
مديحة"هنروح بيت اهلى"
شذى"مش البيت قاعدة فيه خالتو ماجدة"
مديحة"اه"
ضحى"هنعيش معاهم؟"
مديحة"اه"
شذى"ماما انتى عارفة البيت هناك يدوب على قدهم...هنعيش فين"
مديحة"مش احسن ما نقعد ف الشارع يا شذى"
شذى"طيب قوليلها من دلوقتى ياماما...على الاقل تعمل حسابها وتعرف احنا رايحين امتى ...وهنعمل ايه ف العفش بتاعنا ...ما احنا مش هنطب عليها كده"
مديحة"الوقت متأخر...الصباح رباح"
                       *******************

جليلة واقفة على باب شقتها مع ماجدة جارتها
"وبعدين لما قعد يزعق للواد قلتله لأ بقى كفاية كده مش هيبقى انت والثانوية العامة عليه... ياقلبى ده اتمقت من المذاكرة والدروس"
"وهو كان بيزعق له ليه"
"اصل احمد عايز يشترك ف نادى.. وبينى وبينك اشتراكه غالى شوية ..قام ابوه شاط فيه وقاله ده انا ما صدقت خلصت من الفلوس الدروس تطلع لى باشتراك النادى"
"الله يكون ف عونه...ده لسه محمد هيحصل اخوه السنة الجاية"
"اه والله ياجليلة...الراجل شقيان وانا عارفة بس هعمل ايه بقى"
ورن التليفون ف بيت ماجدة
"طب ادخلى انتى ياماجدة ... ابقى تعالى اقعدى معايا بالليل شوية"
وسمعت ماجدة صوت احمد ابنها
"مامااااااا... تعالى كلمى خالتو مديحة"

هناك 18 تعليقًا:

  1. واااو الحلقة جااامدة يا دينا الاحداث بتتطور والقصة بقيت تحفة تسلم ايديك
    كنت حاسة انهم هيسبوا بيتهم ويمشوا وكدا اكيييد هتقابل كريم
    والزفت دا عمها عايز يتولع فيه دا مستفز جدااا ومش ليه علافة برجولة اصلا
    منتظره جديدك اكيد رائع كالعاادة

    ردحذف
  2. من هنا السر مديحة هتجوز ابراهيم وشذى هتحب كريم ويتجوزو ويفهم موقف هروبها يوم الحادثة وهتحتويه زى والدته وفعلا بقينا عيلة

    ردحذف
  3. انا حاسه انا شذى هتحب كريم
    وكريم هيسيب خطيبته
    وهيجوز شذى
    وابو كريم هيجوز ام شذى برضو
    بس ف الاخر
    وتسلمى يا دندن بجد

    نــــــــــــــــور

    ردحذف
  4. انا مع الرأيين دول

    ردحذف
  5. حلوه اووووووووووووووي
    طوليها يا دودو شويه وكمان خلي عدد الحلقات قصير

    ردحذف
  6. حلووووووووووووه اوي بجد
    احسن حاجه انهم مشيو من بيت الراجل المتخلف
    ده وبكده شذا وكريم يتقابلو وهي
    تشكره علي اللي عملو قبل كده وتطمن عليه ويحبو بعض بــــــجـــــد
    كريم محبش دعااء الا ان اول مره بنت تعجب بيه وتهتم فيه
    ودعاء هتحاول تنتقم بقي وابو كريم وام شذي يتجوزو وكرييم وشذا يتجوزو
    ويعيشو في تبات ونبات ويخليفولنا صبيان وبناات xDDD xDDD

    ♥ YaSsO ♥

    ردحذف
  7. حلوة اوي بس الحلقة صغيرة اوي يا ريت تطوليها شوية

    ردحذف
  8. وااااااااو واااااااااااو وااااااااااااااااااو الحلقه جمييييييييييييييييييييييييله جداجدا جدا

    ردحذف
  9. حلقـــــــــــــــــــــــــــة جامده جداااااااااااا يا دينا
    والاحداث بتتطور بسرعه اوى
    وربنــــــــا يستر على شذى انا خايف على حياتها بعدين :/
    وكريم كمان حاسس ان ممكن تحصله حاجة
    تسلم ايدك يا دينا بس ياريت تردى عليا هى الحلقه بتنزل امتى ؟؟!!!

    جــــــــــــوبــا

    ردحذف
  10. الحلقة جامدة اوى انا اصلا مكنتش متابعة بس امبارح قريت الحلقات كلها بجد روعة
    انا فكرت فى ان كريم هيحب شذى واتأكدت من حلقة النهاردة بس بجد يسلموااااااااااااااا :(

    ردحذف
  11. حللللللللللللللللللوة

    ردحذف
  12. ده راااااجل اوفر اووووي اعوزو بالله
    كويس انهم هيمشو ويسبوه
    جميله اوي الحلقه واحداثها حلوه اوي تسلم ايديك




    موجا

    ردحذف
  13. حلووة اوووي وربنا يستر

    ردحذف
  14. الحلقه خطييييييييره بجد

    ردحذف
  15. الدنيا دي صغيره بجد شكل كريم هيحب شذي

    ردحذف
  16. حلوووووووووووه يا ترى كريم لما يشوف شذى هيعمل ايه


    فاطمة

    ردحذف

قول رأيك بلاش تقرا وتقفل من سكات...ارائكم تهمنى