السبت، 13 أبريل 2013

ليست عذراء... الحلقة 1

الحلقة 1
صوت جرس الباب بيرن
مايا بتفتح عينيها على الصوت... بتقوم من ع السرير... سامعة صوت باباها وجدتها بره... بتقوم تقف قدام المراية... تبص بحزن على جمالها وملامحها الاوروبية عيونها الزرقا وبشرتها البيضا وشعرها الاشقر... بتقرب من المراية وبتلاحظ الهالات السودا تحت عينيها وبتلمسها
باب الاوضة بيخبط... بيتفتح الباب
"العروسة صحيت ولا لسه"
بتقرب منها نسرين "حامل فى الشهور الاخيرة" وبتسلم عليها
بتفرح مايا لما تشوفها...فرحة مكسورة... بيحضنوا بعض
"حمدالله ع السلامة يانسرين...كده متجيش من بدرى"
"معلش يامايا.. ممدوح معرفش ياخد اجازة الا يومين بس"
"يعنى مش هتقعدى معايا شوية"
"معاكى فين يابنتى... ده انتى كلها كام ساعة وفارس هياخدك على عش الحب وطير ياحماااام"
نسرين بتضحك وهى بتغنى... مايا بتحاول تبتسم ... متقدرش ...تلاحظها نسرين
"مالك يامايا"
"متضايقة... خايفة... مش عارفة"
"معلش مش هتخافى اكتر منى..ده انا يوم الفرح كنت مرعوبة بس بدل بتحبى عريسك وهو بيحبك متخافيش من اى حاجة"
مايا بتسكت مبتردش... بتبص لها نسرين
"ايه ده يامايا...وشك باي عليه الاجهاد...انتى مش نايمة كويس؟"
"بقالى بتاع اسبوع مبنمش... لو عرفت انام ساعتين يبقى من الله"
بيرن موبايل مايا ع السرير... بتمسكه نسرين...وترد
"الو... لا مش حبيبتك ...جيت من ساعة بس... وانت كمان واحشنى يافارس... الف مبروك ربنا يتمم بخير...خلى بالك من مايا انا بقولك اهو...انا عند نينة تحت...اه طبعا هطلع اسلم على خالتى... ممدوح وصلنى وخرج شوية...مايا معاك اهى"
بتناول مايا التليفون... مايا بتاخده
"انا يدوب سلمت على ماما ونزلت لك... هطلع اسلم على خالتى علشان متزعلش..لما تخلصى وتفطرى وتفوقى رنى عليا انزلك"
"هتيجى معايا الكوافير مش كده...متسيبينيش يا نسرين النهاردة بالذات"
"حاضر ياحبيبتى...جاية معاكى طبعا"
اخدت مايا التليفون...وخرجت نسرين من الاوضة
"الو"
"صباح الخير ياحبيبتى"
"صباح النور"
"انا رايح الشقة اودى أكل...عايزانى اخد حاجة وانا رايح"
"لا...فارس انا عايزة اتكلم معاك"
"خير؟"
"موضوع مهم...ينفع تنزلى نتكلم"
"طيب حاضر... هلبس وانزلك"
                      ******************

فارس قفل مع مايا وكمل لبسه...خرج من الاوضة
راح لباباه اللى كان قاعد يقرا الجورنال
"صباح الخير يابابا"
"صباح النور يا عريس...مبروك يابنى"
جت حياة من المطبخ
"الاكل اللى هتشتريه يا فارس اوعى تسيبه بره التلاجة... الجبن ع الرف واللحوم ف الفريزر"
فارس"حاضر ياماما"
توفيق بيطلع فلوس من جيب الجلابية
"خد يافارس"
فارس"شكرا يابابا ...معايا الحمدلله"
توفيق"ما انا عارف ربنا يزيدك...بس دى هدية جوازك"
حياة"خد من ابوك يا فارس... ربنا يسعدكم يابنى"
توفيق"اعمليلى كوباية شاى ياحياة"
حياة"حاضر"
توفيق بيميل على فارس
"عايز اقولك كلمتين مهمين"
"اتفضل يابابا"
"انا عارف انك بتحب عروستك... بس اوعى الحب ده يخليك ضعيف قصادها... اوعى تسمح لها انها تمشى كلمتها عليك ولا تتدلع بجمالها ... لازم تدبح لها القطة من اول يوم... اول يوم ده اللى هيريحك العمر كله او يتعبك العمر كله... ياهتكون انت الراجل ياهتكون هى الراجل... وانت راجل من ضهر راجل ولا ايه؟"
"طبعا يا بابا ...بس مايا عارفاى كويس وعارفة طبعى وهى هادية ... انا متاكد انها هتكون زوجة مطيعة"
"ربنا يسعدكم يابنى"
دخلت حياة بالشاى...ف نفس اللحظة اللى رن فيها جرس الباب
فارس بيقوم يفتح
"دى اكيد نسرين...كانت عند نينة تحت وقالت هتطلع لنا"
بيفتح الباب لنسرين...بتسلم عليه
"ازيك ياعريس... ازيك ياخالتى...ازيك يا عمو"
                  *********************

فؤاد قاعد مع مامته ع الفطار... تخرج لهم مايا وتقعد معاهم
"صباح الخير يابابا...صباح الخير يا نينة"
بيردوا عليها التحية
الجدة"انتى نمتى امتى... ده انتى كتى صاحية ساعة الفجر"
مايا"نمت من شوية كده"
فؤاد"ليه كده السهر ده"
مايا"غصب عنى مبيجيليش نوم"
الجدة"طب كلى لقمة علشان انتى طول اليوم هتبقى ف الكوافير"
مايا"حاضر"
بيرن جرس الباب...بتقوم مايا تجرى
"ده اكيد فارس"

بتفتح الباب... فارس بيدخل
"صباح الخير يا نينة...صباح الخير يا خالى"
فؤاد"اهلا يافارس...تعالى كنت عايزك"
مايا بتشد فارس قبل ما يدخل
"انا عايزة اتكلم معاك"
فارس"هشوف خالى الاول واقعد معاكى"
فؤاد "فطرت يافارس"
فارس"اه الحمدلله"
يقوم فؤاد من ع الفطار
"طب تعالى ف الصالون هنتكلم شوية "

دخل فؤاد الصالون وراح فارس وراه
مايا رايحة وراهم...نادت عليها جدتها
"تعالى يا مايا افطرى"
"لا شبعانة يا نينة...شكرا"
جرس الباب بيرن...بتروح مايا تفتح
"صباح الخير يا مايا"
"صباح النور ياعمتو"
"نسرين نزلت ولا لسه عند حياة"
"اكيد عند عمتو حياة"

دخلت ايمان لمامتها المطبخ..ووراها مايا
ايمان"صباح الخير ياماما"
الجدة"صباح النور...جيتى ف وقتك"
ايمان"متقلقيش انا قلتلك هاجى اطبخ معاكى اكل العروسة... قوليلى يا عروسة اعملك ايه جنب الفراخ"
مايا وهى بتخرج م المطبخ
"اى حاجة"
                       *****************

فارس مع فؤاد
فؤاد"انت عارف يافارس ان انت ابنى وان مامتك وباباك ربوا مايا اكتر ما انا ربيتها"
فارس"طبعا ياخالى"
فؤاد"وانت لما خطبتها وهى وافقت انا متكلمتش ف اى حاجة"
فارس"حصل"
فؤاد"بس النهاردة كتب الكتاب ولازم هيكون فيه اجراءات نتكلم فيها ومش هنتكلم فيه قدام الناس"
فارس"تقصد يعنى المؤخر وكده...اللى تؤمر بيه"
فؤاد"هنعمل قايمة زى ما عملنا لنسرين ونكتب فيها اللى ف الشقة ومؤخر 50 الف جنيه"
فارس"حاضر ياخالى... اى اوامر تانية"
فؤاد"خلى بالك من مايا... انت هتبقى كل حاجة ليها"
فارس"مايا ف عنيا"
رن موبايل فارس...رد
"الو... ايوه يا احمد...حاضر انا نازل اهو"
كمل كلامه وهو خارج وكانت مايا مستنياه قريب من الباب
"رايح فين"
"احمد صاحبى مستنيى تحت...ورايا مشاوير كتير اوى يامايا"
"عايزة اتكلم معاك"
"بالليل ياحبيبتى... هنبقى مع بعض وهنتكلم براحتنا...انتى نازلة امتى"
"الساعة 1"
بص فارس ف الساعة
"نسرين رايحة معاكى"
"اه نسرين وعمتو ايمان...هى مامتك مش جاية معانا ليه"
"بابا قالها تروح ع القاعة احسن...يالا سلام"
نزل فارس ومايا واقفة ف مكانها سرحانة
                  **********************

مايا قاعدة عند الكوافير... خلصت كل حاجة
كل اللى داخل او خارج ينبهر بجمالها
والمثير للانتباه... ان كل اللى يشوفها يقول
"عروسة اجنبية محجبة"
حتى الكوافيرة نفسها لولا انها اتكلمت معاها وعارفاها كانت شكت انها اجنبية
مايا ملاحظة نظرات الاعجاب ف عيون كل الناس
بس اللى شاغلها الحزن اللى جواها وانها مش قادرة تفرح
بتقرب منها نسرين
"ايه يا مايا... شكلك زى اللى بتتجوز غصب عنها"
مايا بتحاول تبتسم...بتكمل نسرين كلامها
"اضحكى ومتفكريش كتير... هتطلعى مكشرة ف الفيديو"

تدخل لهم ايمان
"يالا يا مايا...فارس وصل"
                   **********************

مايا قاعدة على الكوشة... اثناء كتب الكتاب
فارس قاعد مع فؤاد مع المأذون
صوت كتب الكتاب فى الميكرفون بيملا القاعة
كل كلمة بتتقال بتسمعها مايا بتجرح قلبها
خلص كتب الكتاب...سمعت الزغاريط
نزلت منها دمعة غصب عنها
لمحتها ايمان وهى بتمسح دموعها هى كمان
نظرات ايمان ومايا اتلاقت بدموعهم
كل واحدة فيهم اتجاهلت ان التانية شافتها
ومسحت دموعها وحاولت تبتسم
                   ********************

فارس ومايا داخلين شقتهم...ومعاهم حياة وتوفيق
وايمان وفؤاد وجدتهم
دخلت الجدة مع مايا اوضتها
"مبروك يا مايا... انا وباباكى هنجيلك الضهر نطمن عليكى... ابوكى عاش بره صحيح بس لسه دماغه وتفكيره ماشية على عاداتنا القديمة ... وزى ما حصل مع بنت عمتك لازم يحصل معاكى"
طلعت لها منديل ابيض
"خدى ده... وبكرة هنيجى ناخده علشان ابوكى وحماكى يشوفوه"
قامت الجدة خرجت من الاوضة

سلمت على فارس وباسته
"مبروك ياحبيبى...خلى بالك منها"
توفيق بيسلم عليه وبيوشوشه
"زى ما قلتلك... لازم تبقى راجل من اول يوم ومتنخش ...يالا شد حيلك وهنيجى بكرة نطمن عليكم"
خرجوا كلهم وقفل فارس الباب وراهم ودخل اوضته
                     ********************

فارس داخل الاوضة لمايا...قعد جنبها على طرف السرير
"مبروك يا حبيبتى"
قرب منها يبوسها...بعدت عنه بحركة مفاجئة
"مالك"
"مفيش متوترة شوية بس"
قامت مايا وقفت قدام المراية وهى بتفك الطرحة
قرب منها فارس وحضنها...بعدت
"فارس عايزة اتكلم معاك شوية"
"هنتكلم وهنقول كل حاجة بس بعدين"
وافتكر فارس كلام باباه واتنرفز عليها
"فى ايه...كل ما اقرب منك هتبعدى وتقولى تكلم...هو الكلام هيطير"
مايا بخوف
"بتزعق ليه... متخوفنيش منك"
حس بيها خافت فعلا
"متزعليش يا مايا... بس محبكتش كلام دلوقتى... متخافيش"
حضنها فارس بحب وحنان... واستسلمت ليه بهدوء
                      *******************

فارس بيفتح نور الاباجورة وهو قاعد على السرير
بيبص لمايا... مايا بتبعد عينيها عنه... وبتقوم من تحت الغطا
فارس بيشيل الغطا من عليه يرميه على الارض
مايا بتلبس الروب... فارس بيبص على الملاية البيضا المفروشة ع السرير
قام...مايا جاية تخرج م الاوضة...شدها من دراعها
"ايه ده؟؟؟ ازاى يعنى"
مايا وهى  بتترعش وبتحاول تلاقى مبرر
"بتحصل"
"بتحصل ازاى... هو انا اهبل هتضحكى عليا"
عيطت مايا بخوف وقعدت على السرير وهى مرعوبة
"انت مش بتحبنى... افهمنى"
وبكل غضب وثورة...ضربها بالقلم
"افهم ايه.... افهم انك ضحكتى عليا... كنتى بتمثلى علينا الادب والاخلاق وانتى صايعة وماشية على حل شعرك"
مايا بتعيط
"متقولش عليا كده...انت عارفنى كويس"
"انا ليا اللى عرفته النهاردة"
مسكها من دراعها وهو بيهزها بقوة
"مين اللى عمل كده... قولى ... وامتى ؟؟ وليه ضحكتى عليا"
"سامحنى واسترنى يا فارس ... انا مهونش عليك تفضحنى مش كده؟"
"استر ايه؟؟؟ واللى جايين بكرة دول اقولهم ايه"
مايا بتحاول تستعطفه
"ارجوك يا فارس... استرنى ده انا مراتك حبيبتك"
ولما قالت كده...كأنها غاظته اكتر
هجم عليها وفضل يضرب فيها
"عملتى فينا كده ليه... فيا وف ابوكى وف كل اللى وثقوا فيكى"

هناك 87 تعليقًا:

  1. تححححححفة بجد يا دينا و شكلها كده جاااامدة جداااااااا

    ردحذف
  2. شكلها هيبقى حلوو اووى مستنيه الباقى
    بس ياترا ماايا هيحصل معاها ايييييه :(

    ردحذف
  3. شكلها جااااااااااااااااااااااااااامدة بقى

    ده احنا شعب يموت ف الفضايح xD xD xD

    aYa

    ردحذف
  4. أزال المؤلف هذا التعليق.

    ردحذف
  5. حلوة اوووووووووووووووووووووى تسلم ايدك
    همس

    ردحذف
  6. شكلها جميله جدا يا دينا بجد انت متميزه داااايما مستنيا الحلقه التانيه بفارغ الصبر

    ردحذف
  7. ياااااااااااه شكلك حكايتك حكايا يا مايا حنتابع ونشوف السبب فى كدا

    ردحذف
  8. اووووف صعبة اوى يا دينا بس حاسة انها هتبقى جامدة

    ردحذف
  9. بدايه مشوقه فعلا

    ردحذف
  10. قصة مشوقة اوووى بجد تحفة يا دينا ♥ ♥

    ردحذف
  11. ايه طيب الى هيحصل :O

    ردحذف
  12. بداية شديدة وقوية أوووووووووي
    مستنيه البااااااااااااااقي أكييييييييييد

    ردحذف
  13. انا مش فاهمه حاجه بقي :/
    وهو عرف منين ان ممكن يكون حد اغتصبها هو اتسرع بالحكم
    هوووووفت .. متاخريش الحلقه التانيه علينا عايزين نعرف هيعمل ايه

    ردحذف
  14. جاااااااااااااامده ومشوقه من اول يوم
    ودا العادي :)
    sss

    ردحذف
  15. شكلها هتبقة تحفة يا دينا تسلم ايدك

    ردحذف
  16. من اسمها اصلا باين انها شديدة و الحلقة مشوقة ...وعجبنى جدا افكارك وكتاباتك حسيت انك فعلا بتتكلمى عن حياة المجتمع اللى بنعيشه ..ربنا يوفقك يا دندون

    ردحذف
  17. ايه الاكشن من اول يوم كده
    هههههههههههههههه

    ردحذف
  18. البدايه روووووعه اووووووي
    مستنيه الباقي
    موجا

    ردحذف
  19. شكلها قصة جااااااامدة جدا ومن اول حلقة شكلها مشوقة اوووي

    ردحذف
  20. هو ازاى يضربها كدا ؟
    مش فاهمه حاجه
    هى عملت ايه سمع كلام باباه و دبحلها القطه
    متخلف
    بس القصه جميله اوووى بجد و انا بحبك اووى يا دودى :)

    ردحذف
  21. قصصك جريئه زيادة عن اللزوم اووى

    راعى ان فى بنات بريئه متعرفش الكلام دا و بتقرالك و الفيس ما اكترة من اطفال

    و اولهم اخر تعليق اتكتب واضح انها مش فاهمه حاجه

    قصصك حلوة و كمان اسلوبك انا مش بقلل منك بس فى حاجات مينفعش تتكتب

    ردحذف
  22. رووووووووووووووووووووعة بجد يا ديناا تسلم ايدك
    والقصة هتحلوى ان شاء الله بعد كدة

    amira slama

    ردحذف
  23. شوقتينى اعرف جامدة بجد

    ردحذف
  24. جاااااااااااااااااااااااااااااااااااامدة اووووووي بجد

    ردحذف
  25. حلوة جداااااااااااااااااا زي العاده ومستنيه بكره على نار الحلقه التانيه

    ردحذف
  26. شكلها من اول حلقه روووووووعه

    ردحذف
  27. تحفة يادينا مستنين بقية الحلقات

    ردحذف
  28. to7faaaa mstnya at7f men kda <3 <3

    ردحذف
  29. من اول حلقة كدا اتشدينا شكلها هتبقا حلوه بالتوفيق يا دينا

    ردحذف
  30. جميلة بس جريئة شوية

    ردحذف
  31. بصى
    بجد جاااااااامدة

    ردحذف
  32. شكلها حلوة اوي يا دندن بس ياريت باقي الحلقات متبقاش نظام فلاش باك

    hadil gasser

    ردحذف
  33. motshawekaaa gedaaaan akmlhaaa... to7ffaaaa <3

    ردحذف
  34. اوووووووووووووووبا شكلها كده حلوة وبدايتها مشوقة

    ردحذف
  35. الحلقه رووعه وحاسه كده فى الاخر ان مايا هتطلع مظلومه فى الاخر مش عارفه بس دا احساسى

    ردحذف
  36. bgd to07faaaaaaaaa

    ردحذف
  37. يا جماعة الأستاذه مبتقولش للبنات إعملو كده الأستاذه بتحكى ودى توعيه للبنات فيه بنات كتير قوى الحب بيخنها بتكون عايزه تعمل لحبيبها أى حاجة المهم ترضيه بس هو فعلاً لو بيحبها هيحافظ عليها وعمر القصص دى ما هتكون أكتر من الأفلام إل بتتعرض على التلفزيون 24 ساعة والكل بيشاهدها بنات وشباب كبار وصغار وبعدين منحكمش من أول القصه مع إن بدايتها روووووووووووووووعة جداً وتسلم إيدك يا أستاذه وياريت البنات تتعلم بجد من القصة دى ربنا يحفظ كل بنات المسلمين يارب

    ردحذف
  38. رووووووووووووووووووووووووعة تسلم إيدك بس مينفعش تنزلى الحلقة الجديدة دلوقتى ههههههههههههههه تسلم إيدك وربنا يوفقق يارب

    ردحذف
  39. ياوجع قلبي لحد بكره

    ردحذف
  40. روووووووووووووووووووووعه من بدايتها بجد تسلم ايدك يا دندن

    ردحذف
  41. محتاجين فعﻻ توعية من النوع دا في مجتمعنا بس ﻻزم تتعرضي لموضوع غشاء البكارة اللي مش حقيقي و الحاجات دي عشان البنات مبقتش كويسة و بقت تفكر في الموضوع دا

    ردحذف
  42. واااااااااااااااااااااااو

    ردحذف
  43. حلوة البداية يا دينا
    بس معقولة لحد النهارده لسه فى ناس بتفكر بالغباء ده و المنديل و الدم و الكلام ده
    مش عارفة ليه حاسة ان مايا هتطلع مظلومة و مكنش بمزاجها

    ردحذف
  44. قاسية اوووووووووى بس حلوة

    ردحذف
  45. احيييييييييييييييييييييييييييييييييه هاااار اسود ايه العالم المتخلفة دي وهو ايه حمار ماشي على كلام ابوه بس تجنن بجد تحففففففففففة

    ردحذف
  46. حلوة كتير بس من الاخر مافهمت من لهجتكم ><" بس برافو عنجد ابداع

    ردحذف
  47. ربنا يستر على بنات المسلمين...وان شاء الله تكون فيها توعيه للبنات..بلاش نحكم على القصه من اولها ..وعلى فكره البنات الان بيعرفوا حاجات كتير من النت والمجلات والتى فى انا نفسى معرفهاااش بالتوفيق يارب ان شاء الله

    ردحذف
  48. رووووووووووووووووووووووووووووووووعه :)

    ردحذف
  49. حلقة مشوقة جداااااااااا بس هى جريئة شوية

    ردحذف
  50. جميلة جداااااااااااااااااااااااااااااااا يا دينا ربنا يوفقك ومستنية الباقي

    ردحذف
  51. حلوووووه اوووووووى

    ردحذف
  52. حلوه بس فين حلقه انهارده /:
    انا كده زعلانه منك :(

    ردحذف
  53. حلوة اوى الحلقه التانيه بسرعه بليززززز

    ردحذف
  54. جمييييييييييييييييييييييله اووووووووووووي بس ليه الحلقه اتاخرت اوي كده :(

    ردحذف
  55. shklha gamda y dodo tslm edk :)
    keep going :*

    ردحذف
  56. يالهوييييييييييي
    didi makki

    ردحذف
  57. ده ممتازاه وفوق الممتازه

    ردحذف
  58. حلوة اوووووووي

    ردحذف
  59. لطيفة جدا بس لو تسمحيلي انتي كتبتي ان لعروسة زي الاجانب بس لو كان ممكن التدقيق في الوصف يعني شعرها طويل ولا قصير عنيها واسعة ولا ضيقة ولونها ايه وكمان شفايفها ووصف الزوج كمان طويل قصير طويل رفيع انا بقرأ بعقلي وعاوزة ارسم الشخصيات علي وصفك وتخيلك ليها وكمان انا ملحقتش احفظ ايمان مين وعمتو مين والزحمة دي فلو كان ممكن تكتبي مامت فارس او حماتها واخت الاب وحماها وعمة مايا وكدة بس انا رأيي زي ما هو القصة تحفة وواضح ان اللي جاي احلي ربنا معاكي

    ردحذف
  60. حلوه اوي بس امتى باقيتها ؟؟ :)

    ردحذف
  61. bgd 7elwa awiiiiiii .. bs shaklha 7azena :) .. bs astmery bgd 7elw <3

    ردحذف
  62. جااااااااااااااااااااااااااااااااااامدة جدااااااااااااااااااااااااااااااااااااااااااااااااااااا

    ردحذف
  63. باين عليها حلوه اوي

    ردحذف
  64. جميله اوووووى

    ردحذف
  65. بدايه قويه

    ردحذف
  66. ما شاء الله فعلا هتون قصه مفيده وعظه

    ردحذف
  67. حلوه بس ازاى اجيب الحلقات بالترتيب

    ردحذف
  68. الروايه رائعه شكرا

    ردحذف
  69. دينا عماد انتى رواياتك بجد جميلة جدا جدا .. انا قرأت لكى (( ليست عذراء & تحت سقف واحد )) وانا حاليا فى رواية (( قدام عينيه )) ........... خالص امنيااااااااااااتى ♥

    ردحذف
  70. بجد تسلم أيديكي

    ردحذف
  71. وضعتي يدك في عش الدبابير ..لازالت هناك عقول متحجرة
    تربط بين شرف البنت وغشاء البكارة ..
    الشرف .. شرف الروح وليس شرف الجسد فقط

    ردحذف
  72. تسلم ايدك بجد عجبتني اوي

    ردحذف
  73. شكلها رواية جامدة بداية فوق الروعة وقوية يا مدام دينا هاشوف باقي الحلقات اكيد ♡♡♡

    ردحذف
  74. ياريت بعد اذنك تنزليها كلها لان كده بيحصل ملل ممكن الواحد يتوقع اي نهايه ومايكملهاش وكمان تباعد التفاصيل والانسجام والواحد بيبقي متضايق من حكاية الحلقات فبعد اذنك يعني نزليها كامله زي كل الروايات

    ردحذف

قول رأيك بلاش تقرا وتقفل من سكات...ارائكم تهمنى