السبت، 27 أبريل، 2013

ليست عذراء... الحلقة 11


الحلقة 11
ف اوضة المستشفى
نسرين على السرير قاعدة وممدوح جنبها
مايا قاعدة على السرير التانى ...وايمان على طرف السرير والمولود ف حجرها
دخلت الممرضة
"نتيجة التحاليل طلعت يا مدام... واضح انك هتشرفينا قريب"
ايمان بعدم فهم
"خير؟"
الممرضة"خير ... الاغماء كان من الحمل...مبروك"

نسرين وايمان ومايا اتصدموا من اللى سمعوه
بيتبادلوا نظرات الصدمة... نزلت دموع صامتة من عيون مايا

ممدوح بيبص لهم باستغراب
"ايه ياجماعة... مالكم المفروض تفرحوا... حاجة زى دى هتخلى المياه ترجع لمجاريها بين فارس ومايا...مبروك يامايا"
مايا بتحاول ترد مبتقدرش
محدش فيهم عارف يتكلم ف وجود ممدوح
مايا مسحت دموعها وهى بتفكر
"هتصرف ازاى"
                      ********************

حياة قاعدة مع مامتها ...
"هو انتى معنتيش هتنزلى تقعدى معايا طول ما مايا هنا ولا ايه"
"متزعليش منى ياماما ... انا بقيت مش مسحتملة اشوفها بعد اللى حصل"
"متظليمهاش يا حياة...دى بنت اخوكى وانتى مربياها وعارفة انها متعملش الغلط"
"واللى حصل ده ايه"
"اللى حصل ده كان بسببى"
"بسببك ازاى يعنى"
"الشيخ النيلة ربنا ينتقم منه مطرح ماراها...الهى ما يورد على جنة"
"شيخ مين؟؟ مش فاهمة"
"فاكرة بعد ما امها ماتت كانت بتعيط على طول ازاى وبعدين خفنا تكون محسودة ولا معمول لها عمل وروحنا للزفت يشوفها وقال هيعملها جلسات"
"ايوه ايوه افتكرت"
"منه لله قالى لازم الجلسة تبقى لوحدها وبعد ما خرجت نيمها وعمل اللى عمله والبت فضلت ساكتة كل ده وخافت تتكلم"
حياة وهى مش مستوعبة الكلام من صدمتها
"يعنى ايه... البت مظلومة"
"مظلومة يا حياة... وصممت فارس ميعرفش بعد اللى عمله فيها"
"يا عينى عليكى يا حبيبتى...ظلمناكى كلنا... بس اعمل ايه...ما انا لو قلت لتوفيق وفارس مش هيصدقوا"
"متقوليش حاجة ...هى مش عايزاهم يعرفوا حاجة وحلفتنا على كده"
"انا موقفى بقى صعب اوى...هى صعبانة عليا وابنى صعبان عليا وكلامى مش هيغير حاجة"
"اللى فيه الخير يقدمه ربنا...خليكى ساكتة وخلاص"
                      *********************

ايمان داخلة الاوضة اللى فيها مايا ف بيت نسرين
"انتى لسه منمتيش"
"لسه...بفكر ف اللى بيحصلى ده ومش عارفة اعمل ايه"
"مفيهاش عمايل يا مايا... لازم فارس يعرف كل حاجة"
"لا"
"لا ايه... انتى قلتى لا ع الموضوع التانى ووافقناكى... انما دى حاجة متستخباش يا مايا... دى كلها كام شهر وهتتعرف...يمكن لما يعرف ينسى اللى فات وترجعوا لبعض"
"رجوع مش راجعة له يا عمتى... بعد اللى حصل منه مش عايزاه تانى ابدا وقلت قبل كده"
"واللى ف بطنك؟"
"معرفش"
"اوعى تفكرى تنزليه ده حتى.."
مايا تقاطعها بسرعة
"لالالا... نزول لا طبعا... انا طول عمرى لوحدى وده اللى هيكون ونسى وسندى ف الدنيا... اقولك سر ياعمتى"
"قولى يا حبيبتى"
مايا وهى مبتسمة وبتمسك بطنها
"لما عرفت انى حامل... اتصدمت ف الاول شوية بس فرحت بعد كده...بعيدا عن فارس خالص وايا كان رد فعله...اللى ف بطنى ابنى وربنا عوضنى بيه عن كل الى شفته ف حياتى... مستنياه ييجى من دلوقتى"
"ربنا يكملك على خير يا حبيبتى... انا مقلتش لماما وعايزاكى تفرحيها"
"لما نرجع نبقى نقولها...احنا هنرجع امتى"
"بعد السبوع بيومين كده تكون نسرين شدت حيلها شوية بس"
"انا هتصل ببابا اقول له"
                          ******************

حياة بتحط صينية الشاى قدام توفيق وبتقعد
حياة"الشااااااى يا فارس"
جه فارس وقعد معاهم
توفيق"بقولك ايه يافارس... انا كلمت شكرى صاحبى هنبقى نروح نزورهم الاسبوع الجاى ...يناسبك يوم ايه علشان نروح لهم؟"
حياة بتبص لفارس ...مترددة تتكلم وتحكى لا تسكت...خوفها من توفيق خلاها تسكت
فارس"نزروهم ليه؟؟ مش شكرى ده صاحبك يا بابا"
توفيق"بنته الصغيرة حلوة ومؤدبة وانا كلمته اننا عايزين نخطبها"
فارس بنرفزة"ليه كده يابابا... انا قلت مش عايز لا اخطب ولا اتجوز"
حياة بتبص لهم بقلة حيلة ومش قادرة تقول رأى
توفيق"انا خلاص اتكلمت مع الراجل... انت عايز تصغرنى... شوف لما مشيت بدماغك ايه اللى حصل"
فارس"خلاص بقى يابابا مش كل شوية تفكرنى باللى حصل"
توفيق"لازم تتجوز واحدة احسن منها...انت هتفضل قاعد كده ولا تكون فاكر انك هترجع لبنت خالك"
فارس وهو داخل اوضته
"مش عايز اتجوز لا بنت شكرى وبنت خالى"
                         *******************

فى سبوع المولود... بعد كل الناس ما مشيوا
مامة ممدوح وخالته قاعدين... مع ايمان ونسرين ومايا وممدوح
ام ممدوح"عقبالك يا مايا ربنا يكملك على خير"
مايا"شكرا يا طنط"
مامة ممدوح"ربنا بيحبك اهو رزقك بالحمل علشان ترجعى لجوزك"
خالة ممدوح"ترجع لجوزها؟؟؟ هو فيه حد يسيب القمر ده"
ام ممدوح"دى عروسة يا حبة عينى والشيطان دخل ما بينهم اتطلقوا قبل ما يكملوا شهر"
حست ايمان ان الكلام ده ممكن يضايق مايا...فغيرت الموضوع
ايمان"قوليلى يا فاطمة صحتك اخبارها ايه"
خالة ممدوح"اهو الحمدلله على كل حال...رايحة اعمل عملية كمان اسبوعين ف مصر"
ايمان"جاية امتى...امانة عليكى تكلمينى علشان اجيلك"
ام ممدوح"انا جاية معاها ان شاءالله...والمفروض نروح قبل العملية بيومين"
ايمان"خلاص ... هستناكوا تيجوا تقعدوا عندى ...لحد ما تخف وتقوم بالسلامة"
ام ممدوح"ربنا يخليكى يا ايمان... مش عايزين نتعبك"
ايمان"تتعبونى ايه... ده انتوا هتونسونى"
                          **********************

ايمان ومايا داخلين بيسلموا على الجدة
الجدة"طمنونى نسرين عاملة ايه... ابنها حلو؟؟؟ شبه مين"
مايا"استنى يا نينة هوريهولك"
وطلعت مايا موبايلها..وجابت صورة المولود
مايا"اهو ...صورتهولك كام صورة علشان تشوفيه براحتك"
الجدة بتتفرج على الصور
"يا حبيبى...عسل وسكر ربنا يبارك فيه ويخليهولها"
ايمان"يارب يا ماما...خلاص كبرنا وبقيت جدة"
الجدة"يا ختى يا ايمان... ده اعز الولد ولد والولد"
ايمان وهى بتبص لمايا
"وفؤاد كمان هيبقى جد قريب...هو وحياة"
الجدة بتبص لمايا وايمان بعد فهم
"بتقولى ايه؟"
ايمان"مايا حامل ياماما"
الجدة"والنبى؟؟ يا الف بركة...ربنا يهديك يافارس ويهدى سركم يارب"
مايا "هو ليه كل الناس فاكرة ان الحمل ده هيرجعنى لفارس...مين قال اصلا انى عايزة ارجعله... ومش لازم يعرف كمان"
ايمان"تانى...مش قلنا دى حاجة متستخباش"
مايا وهى داخلة اوضتها بتعيط
"لو عرف هيفتكرنى بقول كده علشان عايزة استعطفه"
ايمان ومامتها قاعدين بعد مايا ما دخلت اوضتها
الجدة"وبعدين يا ايمان"
ايمان"مفيهاش بعدين... لو خبت دلوقتى هنعمل ايه لما بطنها تبان"
الجدة"انا حكيت لاختك اللى حصل"
ايمان"وبعدين"
الجدة"سكتت...خافت تحكى لهم....بقولك ايه... انا طالعة اقولهم واللى يحصل يحصل...انا شايفة فارس طالع من شوية وكلهم فوق"
                          *******************

الجدة بتخبط على باب حياة...حياة بتفتح لها
"اهلا ياماما ...اتفضلى"
"ازيك ياحياة.. فارس صاحى ولا نايم"
"لسه متغدى ودخل يريح شوية"
الجدة"يافااااااااااااااااارس"
حياة"خير ياماما"
جه توفيق على صوتها
"اهلا يا حاجة اتفضلى"
خرج لها فارس
"ازيك يانينة"
قعدت "الله يسلمك... مايا حامل يا فارس وانا جيت اعرفك علشان مينفعش نخبى عليك"
توفيق بزعيق"ايه ايه ايه... حامل ازاى يعنى"
الجدة وهى بتبص له بحدة
"واحدة وواحد اتجوزوا وهى حملت... هيبقى ازاى"
توفيق"هو حصل حاجة بينهم علشان تحمل؟"
الجدة"ايه يافارس... حصل حاجة بينكم ولا محصلش"
فارس واقف من ساعة ما سمع الخبر ساكت ومصدوم
لما اتسأل معرفش يرد
توفيق"روحى اسأليها الحمل ده منين...ولا تسأليها ليه انا نازل لها اشوف هتفضل مستغفلانا لامتى؟"
واندفع توفيق ناحية الباب...ووراه حياة
"استنى يا توفيق... استهدى بالله"
ووراه فارس والجدة"
                      ******************

مايا ف اوضتها بتطلع هدومها من الشنطة تحطها ف الدولاب
سمعت صوت توفيق بيصرخ
"ماياااااااااااااااااااااااا"
واصوات ايمان وحياة
ايمان"فى ايه"
حياة"اهدا يا توفيق"

خرجت مايا من الاوضة
اول ما شافها
"ايه اللى بيقولوه ده"
مايا بتبص لجدتها وايمان باستغراب مش عارفة انهم قالوا
ايمان"ايه ياتوفيق...بنقول مايا حامل"
توفيق"من مين ان شاءالله"
وصرخت فيه مايا
"من مين يعنى ايه... انا استحملت منكم كتير اوى... حامل من فارس"
توفيق"ازاى ومحصلش بينكم حاجة"
مايا"اسأله"
توفيق بيبص لفارس اللى واقف ساكت تماما
فارس"مرة واحدة بس...بس مش معقول يكون حصل حمل... قولى الحقيقة يا مايا...الحمل ده من مين؟؟"
مايا بتصرخ"منك... بس هيبقى ابنى لوحدى يافارس...اوعى تفتكر بالحمل ده انى عايزاك ولا عايزة ارجعلك"
توفيق"واحنا مش مصدقين انه من ابننا... احنا نعرف منين طول الفترة اللى فاتت دى بتعملى ايه... مين يصدق ان انتى يطلع منك كل ده"
ايمان"كفاية بقى ظلم ف البت... فارس... مايا اغتصبت من سنتين ومقدرتش تقول ولا تتكلم وانت نفسك مديتهاش فرصة تسمع"
مايا بتصرخ"بس ياعمتى... بس بقى كفاية حرام عليكم"
راحت جدتها اخدتها ف حضنها
"حرام تظلموها انت وابوك... انت عارف كويس اوى يا توفيق انها لاكانت بتخرج ولا بتروح ف اى حتة لوحدها... ومن ساعة ما اتخطبت لفارس مكنتش بتروح ف حتة من غيره"
مايا وهى ف حضن جدتها وبتمسح دموعها
"انا حامل ف ابنى... ومش هياخد منك غير اسمك وبس"
توفيق"ولا اسمه حتى"
مايا بتحدى"بينى وبينك ال DNA  يابشمهندس"

دخلت مايا اوضتها ...والجدة وايمان واقفين
ايمان"ايه يافارس...مالك ساكت كده؟؟ انت لسه بتشك فيها"
فارس"انا مبقتش فاهم حاجة يا خالتى... اغتصاب ايه ومن مين وازاى وامتى"
                           *******************

فارس ف اوضته... واقف شوية ويقعد شوية
محتار ومش قادر ياخد قرار
دخلت له حياة
"ايه فارس... مالك"
"كل اللى سمعته النهاردة مبرجلنى...مخلينى مش قادر استوعب كل اللى حصل ده"
"مايا مظلومة يا فارس... اتسرعنا ف الحكم عليها"
"يعنى ممكن يكون الحمل ده منى صحيح؟"
"ليه لأ؟"
"من يوم واحد جواز؟...مش مقتنع"
"هو ايه البتاع الانجليزى اللى قالت لك عليه"
"قصدك  DNA ؟"
"انا عارفة..باين "
"ده تحليل يتعمل يأكد اذا كان ابنى ولا لأ"
"بدل هى واثقة اوى كده...تبقى هى صح"
دخل عليهم توفيق
"مالكم بتتوشوشوا على ايه"
حياة"ولا حاجة بنتكلم... الواد اكيد ابن فارس يا توفيق"
توفيق"حتى لو ابنه هنعمل ايه يعنى"
فارس بمشاعر مختلفة ...حنين لحلمه القديم ف انه يكمل حياته مع مايا ويكونوا اسرة
"ابنى"
توفيق"بقولك ايه... انت ايش دراك ان كلامهم حقيقى ومبيداروش عليها"
فارس"احنا مخطوبين سنة وقبلها 6 شهور رجعت فيهم من السفر كانت مايا قدامى ومبتخرجش الا معايا او مع نينة او خالتى"
توفيق"لما تبقى تخلف نبقى نشوف التحليل هيقول ايه.... وف كل الاحوال انا قلت لشكرى خلاص اننا رايحين لهم يوم الجمعة"
فارس"بس يابابا"
توفيق"اييييه.... هتصغرنى وتطلعنى عيل قدام الراجل ولا ايه؟"
فارس"لا العفو يا بابا...مقدرش اصغرك"




هناك 63 تعليقًا:

  1. الحلقه جامده جدا
    لو طولت توفيق ده هخنقه وفارس حاسه انه ملوش شخصيه قدم والده
    بجد مايا مظلومه كتير

    ردحذف
    الردود
    1. معاكى حق توفيق دة شخصية قذرة

      حذف
  2. الحلقه رووووعه روعه وطوويييييله ربنا يهديك يا فارس ويخدك يا توفيق يا بومه انت

    ردحذف
  3. اوووووووو حلقه جامده يا دودو ويارب مايا تقوم بالسلامه والكل يتأكد انه ابن فارس ومستنين الحلقه الجايه بس بجد تسلم ايديك

    ردحذف
  4. يخربيت كده كان يتساب على عماه هو و باباه متخلفين و رجعيين

    ردحذف
  5. توفيــــــــــــــــــــــق ده عايز الحرق

    مينفعش تموتيه يا دينا ونرتاح منه بقا :D

    بس حلوه حلقة النهارده دى كشفت كل حاجه

    بس صغيره بقا :(

    ردحذف
  6. عارفة بقى لو مايا رجعت لفارس ده
    تبقى تستحق الحرق =___=

    ردحذف
  7. بجد هى معاها حق ايه ده فارس سلبى اوووى وشخصيته ضعيفه جدااا انا معاها انها موش ترجعله تااانى موش يستاهلهـآآ

    ردحذف
  8. توفيق بجد مقرف اووووووووووي >_<

    ردحذف
  9. حلو اوي يا دندن وقطعتي كل التفكير اللي حصل من الحلقه اللي فاتت والحمدلله انهم عرفوا :)

    ردحذف
  10. الله الله على الحلقة الرائعة يادينا
    ربنا يسلم ايدك وقلمك ياقمر

    ردحذف
  11. شكرااااااااااااااااا

    ردحذف
  12. حلقة جميلة جميلة جميلة جميلة بجد
    توفيق ده آآآآآآآآآآآآآآآآآآآآآآآآآآآآه منه آآآآآآآآآآآه هموت و امسكه اضربه
    و مايا با حبيبتى ظالمنها معاهم بس اكيد ربنا هيظهر الحق

    يلا مستنين جديدك :) :D

    ردحذف
  13. هوتوفيق ده ايه قلبه حجر ولامتخلف وبعدين فارس ده لازم يكون عنده شخصيه بقى ويحاول يرضى ماياعشان بجد اتبهدلت كتير ولازم يرجعلهاويقف ف وش ابوه الجاهل ده وميخطبش واحدة تانية

    ردحذف
  14. الله يخربيتك يا توفيق الكلب اتفووووووووووووووووووووووووووووووووووه
    بس جامدة اووووووووووي يا دودو

    ردحذف
  15. جااااااااااااااااااامده اووووووووووووى ... طول عمرك مبدعه يا دينا :* :* و حسبى الله و نعم الوكيل فيك يا توفيق >:o

    ردحذف
  16. الحلقة حلوة موووووووووووت بالجد انا اللي اسمو توفيق دا م بينزليش من زوري نفسي انزل فيه ضرب وي ترى فارس حيحنلها ولا لا نفسي اعرف

    ردحذف
  17. توفيق دة رخممممممممممممم موتيه يا دودى
    بجد الحلقة رووووووووووووووعة يافنانة ^^

    ردحذف
  18. بجد يا دينا الحلقة تحفة اويييييي
    بس توفيق ده بجد رخم جدا جدا جدا و كمان فارس ده بجد مش راجل خاااالص مش عارف ياخد قرار لوحده

    ردحذف
  19. جامده جدا يا دينا مستنيه جديد

    ردحذف
  20. a5eraaaaaaaaaaaaan 3rfo b2a :))

    ردحذف
  21. 7lwa awiiiiiiiiiii fars da zbala w m3ndooosh sh5syaaaaa Asln :((((

    ردحذف
  22. جميلة اوووووووى
    تسلم ايدك

    ردحذف
  23. فارس دة شخصيته ضعيفة وسلبي جدا

    ردحذف
  24. :( انا زعلانة ع مايا بقي ونفسي اقتل الزفتتتتتتتتتتتتتتتتتتتتتتتتتتتتتتتتتتتت توفيق دا


    yoka

    ردحذف
  25. توفيق ده ولعى فيه بجد

    ردحذف
  26. ماينفعش تقتليلنا توفيق و نخلص هههههه... حلقه هايله

    ردحذف
  27. بجد الحلقة جميلة جدا وكويس ان فارس عرف ان مايا مظلومة وتوفيق دة ربنا يهدية او يخدوا ونخلص منوة ونرتاح
    تسلم ايدك يا ديا وتابعى التقدم

    ردحذف
  28. ربنا ياخدك يا توفيق بجد ايه الراجل دة الحلقة تحفة يا دينا

    ردحذف
  29. توفيييق ده واحد حقييييييييييييييييييييييييييييييييييييييير :( حراام عليه بجد :"""""""""""""""""( يا رب فارس يبقى راجل و يروح يتكلم مع مايا و يرجعلها :(

    ردحذف
  30. توفيق ده خرووووووووف كبير اووووى o.O
    مستفز جداااااااااااااااااا
    بس موقف فارس مش عاجبنى ازاى مهوش عارف اخلاقها لدرجه انه يشك انه مش ابنه :(

    بس تسلم ايديكى ع الحلقة الجميله دى
    ابقي طوليها شويه بليييييز

    ردحذف
  31. الحلقه تحفه يااا دينا :‫))

    وبجد تسلم ايدك علي قصصك الرائعه

    ومستنين الحلقه الجديده بفارغ الصبر =‫))

    ردحذف
  32. توفيق ده بجد رخم أووى وفارس ده كمان ازاي ساكت كده بس بجد حلقه جامده جدا و القصة بدأت تحلو اوى هيا طبعا حلوة بجد احلوت اكتر واكتر

    ردحذف
  33. تسلم ايدك يا دينا الحلقة تحفة قصيرة شوية بس عوضتيها بالاحداث المشوقة بس بجد توفيق ده عايز جلستين كهربا وحقنة هوا هيبقى زى الفل و فارس ده ميستاهلش لقب راجل اصلا انا لو مكانها لو وقف على شعر راسه مارجعلوش يا ريتها تحب حد تانى يعوضها

    ردحذف
  34. تحفه تسلم ايدك

    ردحذف
  35. الحلقة تحفة يا دينا
    وبالنسبة للكائن ال اسمه توفيق ده قادر ربنا يسخطه قرد
    معلش احنا بنتكلم بأدب

    ردحذف
  36. بجد كل الحلقات تحفه وربنا يعين مايا على الى هيا فيه :(

    ردحذف
  37. الحمدلله طلعت الجدة فتانة و حكتلهم كل حاجة هههههههههههههههههههههههههههههههههههههههههههههه
    تحفة جدااااااااااااااااااااااااااااااااااااااااااااااااااااااااااااا

    ردحذف
  38. هو توفيق ده ماينفعش يجيله شلل رعاش يادينا :D

    ردحذف
  39. بجد القصة تحفة ومبقدرش افوت منها حلقة وهتجنن واعرف اية اللى هيحصل

    ردحذف
  40. روووووووعةةةةةةة كالعادةةةة D:

    ردحذف
  41. تحففففففة بجد ومشوقة جدااااا :))

    ردحذف
  42. tbark allah 3alik dina

    ردحذف
  43. توفيق دا رجل ختت اوووي وفارس دا طلع عيل الاحسن ان مايا مترجعلوش راجل ايه اللي ابوه لسه بمشيه دا مينفعش اصلا

    ردحذف
  44. توفيق ده راجل اوفر وابنه نسخة مصغرة منه

    ردحذف
  45. لا ازاااااااي يا روح بابا اوعى تصغره
    يخربيت دي عيلة دماغها تعباااااااااانة


    ddy dody

    ردحذف
  46. فارس معندوش شخصية خالص الا قدام مايا وتوفيق ده مفتري بس كويس ان فارس عرف عشان يندم

    hadil gasser

    ردحذف
  47. نفسي فارس يرود شويه على ولدو بدل ما هو ساكت كده

    ردحذف
  48. دا توفيق دا ربنا ينتقم منه غير كده وكده فارس الي ماشي ور ا بابي ومامي يمين يمين وشمال شمال اقول عليه هو كمان
    الحلقه روعه يادينا مستين الجديده

    ردحذف
  49. ااوباااااااااااا الحلقة خطيييييييييييييييييييرة

    ردحذف
  50. الله ياخدك ياتوفيق انا كنت متاكدة انو هيقول كة وبجد يادينا انتى مبدعة وانا بحبك جدااااااااااااااااااااااا وقريت كل قصصك يلا كملى يامبدة دايما بان الله

    ردحذف
  51. بجد فارس قاهرني جداااااااااااااااا هلهوطة وملوش شخصية يعني صحيح الواحد لازم يحترم والده ويسمع كلامه بس مش هيك وتوفيق هاد راجل خنيييييييق انا لو مكانك اموته موتة بشعة او اديله مرض يعلمه الادب

    ردحذف
  52. الواد فارس دا لو مرجعش مايا انا مش هرحمه :P :P وبعدين ماله ماشي بكرم ابوه كدا ليه من اول ماتجوز مايا وهو ماشي على كلامه ؟؟ بس يلا انا حاسة انه كويس :) جاااااااااااااااااااااااااااااامده يا دينا حلوة اوي

    ردحذف
  53. جمييييييييييييييييييييييلة الحلقة النهااااااااااااااااااردة وربنا يهددددددددددك يا فؤاد يا ظاااااااااااااالم منك لله اخرتك سوووووووودة

    ردحذف
  54. توفيق دوت رخم ومعندوش قلب بجد

    ردحذف
  55. توفيق دا رخم اووووووى
    اقتليه يا دينا الله يكرم أصلك :D

    هانيا ..

    ردحذف
  56. نفسى اقتل توفيق دا
    مش عارفة ليه عندى احساس قوى انها كانت لسه بنت لما اتجوزت والزفت خضر دا ملمسهاش
    وكل دا هيتأكد وقت الولادة (ان الغشاء مطاطى مثلا)
    مش عارفه دا احساسى وكون ان دينا قالت ان اللغز مش هيتحل غير اخر حلقه دا بيأكدلى احساسى اكتر
    ادينا مستنييين

    ردحذف
  57. تسلم ايدك يا جميييييييييل

    ردحذف
  58. تحفة جدا فين الحلقة الجديدة هتنزل امتى بلييييييييييييييييز

    ردحذف
  59. حلوة قوي وابتديت اتعاطف مع فارس

    ردحذف
  60. بجد انتي فنانه بجد فنانه يا دينا
    وافكارك كلها بتقول انك فنانه بجد

    ردحذف
  61. نفسي امسك توفيق ده احطه في الرياشه بتاعت االفراخ

    ردحذف
  62. re5em awe tawfee2 dah :@

    ردحذف

قول رأيك بلاش تقرا وتقفل من سكات...ارائكم تهمنى