الأربعاء، 3 أبريل 2013

بقينا عيلة... الحلقة 27

الحلقة 27
شذى نازلة مع شيماء بعد المحاضرة
فتحت شنطتها تعدل صوت رنين الموبايل
"كريم اتصل بيا"
"وبعدين"
"كتير اوى"
"ما تتصلى بيه تشوفى عايز ايه"
"لو فيه حاجة مهمة كانت ماما كلمتنى...الاحسن متصلش"

نزلوا قعدوا مع بعض ف الكافتيريا
"يا شذى انتى ليه مش عايزة تعرفى حتى عايزك ف ايه"
"وهيفيد بايه...افرضى كلمنى كويس زى ماكان بيعمل...اتعلق بيه اكتر وهو مش ف دماغه"
"عندك حق...طب وخالد"
"انا مبقتش احب خالد... كل ما افتكر مواقف كتير كان بيعملها معايا اقول انا ازاى كنت ساكتة ومستحملة ومفوقتش من بدرى"
"يعنى مش هترجعى لخالد"
"بجد مش عارفة...حاجة جوايا رافضاه... وحاجة تانية بتقولى ابعدى خالص عنهم ..كريم وخطيبته ومصر كلها واجى اعيش هنا... وبكده لا هشوف كريم تانى ولا هيشوفنى ومع الوقت هتأقلم مع خالد وحياتى وخلاص"
"وافرضى مقدرتيش تتأقلمى...هتعملى ايه"
"مش عارفة يا شيماء...بجد مش عارفة..انا محتارة اوى"
"فكرى كويس يا شذى... اوعى تتسرعى وترجعى تندمى"
"سيبك منى...ارد على زياد اقوله ايه"
"مش عارفة يا شذى"
"والله يا شيماء زياد طيب ومؤدب ودمه خفيف.. جربى اقعدى معاه واتكلموا يمكن تُعجبى بيه"
"اصل يعنى من اول مرة شافنى كده عجبته..معقول؟"
"اهو ده اللى حصل...ها قلتى ايه"
سكتت تفكر...ردت
"ماشى.. تليفونات وكلام وحاجات من دى لأ... خليه ييجى هنا ونتكلم بس لو قبول يتقدم ..انا اصلا رافضة الارتباط والكلام والمقابلات ...انا مش عايزة وجع قلب"
"هو عايز يتقدم بس لما تتكلموا مع بعض الاول...انتوا مشفتوش بعض الا مرة واحدة"
"ماشى...ولو حد شافنى هقول قريبك مليش دعوة"
"ماشى يا ستى...يا عينى ده هيفرح اوى"
"ما تتصلى بيه تقوليله"
ضحكت شذى على اهتمام شيماء اللى بتنكره
"رقمه مش عندى... لما اروح هتصل بيه م البيت"
                         ****************

كريم راجع من الصيدلية ع الغدا... شذى لسه مرجعتش
اتغدا وهو بيستناها على امل تيجى وهو ف البيت
استنى ...ولما جه وقت نزوله...كان قلقان وبيفكر يسأل عليها

راح ع الباب...كانت مديحة وضحى قاعدين ع السفرة بيذاكروا
"طنط هى شذى لسه مرجعتش؟"
"اه لسه"
"اتأخرت؟"
"لأ.. زمانها جاية"
"يعنى اتصلتى بيها؟"
مديحة تسيب الكتاب من ايدها وتلتفت لكريم
"انت عايزها ف حاجة"
"لا ..بس بطمن يعنى علشان السفر والطريق "
"ربنا يستر يا كريم... اهى هانت اخر سنة وتخلص ونرتاح"
"ان شاءالله.... مش عايزين حاجة"
"لا شكرا...مع السلامة"
ينزل كريم ع السلم وهو بيدعى انه يقابل شذى صدفة وهى راجعة وساعتها اكيد هتكلمه... مش هتتجاهله زى ما بتتجاهل اتصاله
                            *****************

شذى بتفتح الباب بالمفتاح... تدخل وتقعد
مديحة"حمدالله ع السلامة...اتأخرتى ليه"
"الله يسلمك...مشيت من الجامعة متأخر"
"اسخن لك"
"لا مش جعانة اكلت مع شيماء"
سكتت مترددة وكملت
"حد هنا؟"
"ابراهيم نايم وكريم ف الصيدلية"
"هقوم اغير هدومى... اه صحيح معاكى رقم زياد"
"الموبايل؟"
"اه"
"لا معايا رقم البيت...عايزاه ليه؟"
"هغير واجى احكيلك"
                       *****************
كريم داخل البيت بعد ما رجع م الصيدلية
الساعة 11 بالليل... البيت كله هادى والنور مطفى
راح ناحية اوضته... بص على اوضة البنات
النور مطفى...دخل اوضته

قاعد ف اوضته متضايق...عينيه جت على الدبلة ف ايده ..قلعها
بيقاوم انه يتصل بشذى... مسك الموبايل واتصل بيها
سمع صوت رنة الموبايل واصل لاوضته... سكت الصوت والجرس لسه بيرن فى الاتصال

شذى نايمة صاحية...وكل شوية تبص ف الساعة
لما سمعت صوت الباب... وصوت خطوات كريم
اطمنت انه رجع البيت... غمضت عينيها تحاول تنام
سمعت موبايلها بيرن... قفلت صوت الرنين العالى

كريم لما سمع الصوت اختفى والاتصال متقطعش
فهم انها عملت الاتصال صامت... اتأكد انها صاحية

كتب لها رسالة
"مبترديش عليا ليه؟؟ ليه متجنبانى كده؟؟ لو زعلانة منى ف حاجة قوليلى... لازم نتكلم يا شذى... هستناكى ف البلكونة"

شافت شذى الرسالة... احتارت
"اجمدى يا شذى... قربك منه مش هيتعب حد غيرك... يا ترى عايز ايه؟؟ مش مهم..المهم انك تفضلى على قرارك"

كريم بعد ما بعت الرسالة... طلع قعد ف البلكونة يستناها
                         ****************

"كريم....كريييييم"
كريم فتح عينيه...شاف مديحة
"ايه اللى مقعدك كده...نايم ف البلكونة!!"
بص كريم حواليه
"انا كنت قاعد سهران...شكلى نعست..احنا الساعة كام"
"3... قوم ياحبيبى كده تبرد الجو بدأ يبرد بالليل"
"تصبحى على خير"
                    ********************

كريم ف الصيدلية... بيكح
بيتصل بالتليفون
"سلامو عليكو...ازيك ياعمى... كنت عايز حضرتك ف موضوع كده... ياريت اقابلك... بره البيت افضل... اه فاضى ....طيب جاى لك حالا... مسافة السكة...مع السلامة"
قفل مع ابو دعاء... وهو بيفكر ف شذى
" تكون قررت ترجع لخالد علشان كده مبتكلمنيش... عايشين ف بيت واحد ومش عارف اشوفها ولا اكلمها... هانت... اخلص مشوارى واتكلم معاها واقولها كل حاجة"
                      ********************

كريم قاعد فى المصنع مع حماه
"انت من اول مشكلة بينكم جاى تقول نفسخ الخطوبة"
"مش اول مشكلة ولا كانت هتبقى اخر... انا ودعاء مش متفقين مع بعض خالص"
"سبحان الله اللى يشوفكم يقول بتموتوا ف بعض"
"انا اسف... انا زى ما خطبتها من حضرتك جيت برضه اعتذر لحضرتك"
"بعد كلامك ده مش هقولك لا والنبى فكر تانى...انا بنتى 1000 واحد يتمناها بس هى مراية الحب عميا"
حس كريم ان حماه بيتكلم من احساسه بالاهانة...اخد كريم الكلام بهدوء من غير رد... قام واستأذن
"ابقى عدى عليا بكرة خد شبكتك... كده كده دعاء مبتلبسهاش"
"هبقى اتصل بحضرتك قبل ما اجى...بعد اذنك"
خرج كريم وهو بيتنفس بحرية وفرحة انه اخيرا بقى حر ويقدر يصارح شذى بكل اللى جواه
فكر الاحسن يتصل بيها ولا يروح على البيت يستناها ويشوفها وهى راجعة من الكلية
                           ***************

كريم داخل البيت... ومديحة ف المطبخ
"سلامو عليكو"
"وعليكو السلام...اتأخرت عن كل يوم...اتغدينا من غيرك"
"معلش كان ورايا مشوار مهم اوى والحمدلله تم بنجاح"
"شكلك فرحان...خير"
"هقولكم بس بالليل...لما نكون كلنا مع بعض"
"احضرلك الغدا"
"بس مش عايز اتغدا لوحدى..هدخل انام شوية وابقى صحينى اتغدا مع شذى"
"ماشى... بقولك ياكريم باباك عنده معاد مع الدكتور ف المستشفى علشان هيعمل اشعة الساعة 9 الصبح"
"ناخده ونروح ان شاءالله"
                            *****************

شذى داخلة البيت... مديحة بتذاكر مع ضحى
"سلامو عليكو"
"وعليكم السلام.. ايه شيماء عملت ايه"
"مش النهاردة ياماما انتى نسيتى"
"اه صحيح قالك بكرة؟"
"اه... ماما انا جعانة اوى هغير هدومى وسخنيلى بسرعة الله يخليكى"
"حالا... قومى يا ضحى لمى كتبك وروحى صحى كريم"
استغربت شذى على وجوده فى المعاد ده
"هو كريم هنا"
"اه... نايم ومتغداش ...مستنيكى"
"طب متعمليش حسابى دلوقتى"
دخلت شذى اوضتها... ودخلت وراها مديحة وقفلت الباب
"فيه ايه؟"
"على ايه ياماما"
"انتى وكريم... شوية كويسين مع بعض وشوية مبتكلموش بعض...فى ايه؟"
"مفيش حاجة"
"من امتى بتخبى على امك"
عيطت شذى وهى بتقعد على السرير
"يا مصيبتى... عملك حاجة واحنا مسافرين؟"
شذى بتنكر بقوة
"لا والله يا ماما حرام...كريم مؤدب جدا ومشفتش منه حاجة وحشة"
مديحة بعد ما اطمنت
"طب فيه ايه"
"هحكيلك... يوم ما خطيبته واهلها كانت هنا"
                          *******************

مديحة بتلبس... وابراهيم لابس
"هو كريم لسه نايم من امبارح"
"امبارح دخلت له بالليل اصحيه... قالى محتاج انام شوية...ده لا اتغدا ولا اتعشا"
"انا هروح اشوف ماله... ده مبينامش كده"

ابراهيم بيقعد على طرف سرير كريم
"كريم... كريم"
"ايوه يابابا"
"مالك؟"
ابراهيم بيمسك ايد كريم يصحيه
"ايه ده...انت مولع يا ابنى... مخدتش حاجة للحرارة"
"لا مخدتش بالى ان فيه حرارة... انا جسمى واجعنى من امبارح ومش قادر اقوم"
دخلت مديحة الاوضة من غير ماتسمع
"يالا ياكريم الساعة بقى 8 وربع"
ابراهيم"كريم سُخن... هاتيله حاجة للبرد من هنا لحد ما اجيبله مضاد حيوى واحنا راجعين"
مديحة"الف سلامة يا كريم... تلاقيك بردت من نومة البلكونة"
ابراهيم"نومة البلكونة؟؟!! ايه اللى ينيمه ف البلكونة"
كريم"كنت قاعد ونعست غصب عنى"
مديحة راحت ورجعت بدوا وكوباية مياه
مديحة"نام واتغطى كويس وان شاءالله هتبقى كويس... يالا يا ابراهيم هنتأخر"
                     *****************

شذى وصلت الموقف... ركبت ميكروباص اللى رايح طنطا
بتفتح الشنطة تحضر الفلوس... وافتكرت انها مخدتش مصروفها اللى حطته مديحة جنب التليفزيون فى الاوضة قبل ماتنزل

نزلت من الميكروباص... مضطرة ترجع تاخد الفلوس
                    ****************

كريم سمع جرس الباب بيرن
قام وهو تعبان يشوف مين لما افتكر ان مفيش حد ف البيت

كريم بيفتح الباب...شاف دعاء قدامه
"دعاء!!"
دخاء وهى داخلة البيت
"كده اهون عليك يا حبيبى"
كريم بجدية بيحذرها
"دعاء مفيش حد ف البيت"
ردت وهى بتقفل الباب
"وايه يعنى... مش مهم انا عايزة اتكلم معاك وافهم ايه اللى قلته لبابا ده"
"مش محتاجة كلام... احنا خلاص اللى بيننا انتهى"
دعاء بتعيط وتقرب منه
"انا بحبك يا كريم... ليه بتعمل معايا كده"
بتعيط ف حضنه... استغرب واتخض... بيبعد عنها
فى اللحظة اللى فتحت شذى الباب بالمفتاح

هناك 41 تعليقًا:

  1. أنتي لية يا دينا مصممة تعقدي الموضوع بجد نفسنا نفرح بيهم و نعيش شوية مع قصة حبهم مش يصارحوا بعض و خلاص تخلص على كدة

    ردحذف
  2. لاااااااااااااااااااااااااااااااااااااااااااااااااااااااااااا يا دينا حرررررررررررررررااااااااااام تقفلى الحلقة دى كده

    مبدعه كالعااااده بس حراااااااااااااام


    جـــــــــوبـا

    ردحذف
  3. لا بقا حرام والمصحف طولى الحلقه شويه بقا الله

    ردحذف
  4. ya lahwy :D :D el7 en fe 7l2a bokraaaa .. bgd 7elwa aweeeeeeeeeeeeeeeeeeee

    ردحذف
  5. حرااام بجد نهاية تشد اوووي و مش هقدر استني لبكره

    ردحذف
  6. لا بقى يادودو انتى كده بتعلقينا انا كل لما اقول انها خلاص قربوا يعترفوا بحبهم لبعض يحصل حاجه تزود البعد

    ردحذف
  7. تسلم ايديكي يا دودو انت شوقتيني الحمدلله بكرة في حلقة
    مستنياها بفارغ الصبر

    ردحذف
  8. can someone tell me how far is Cairo from Tanta .. can some one travel everyday to go to school there ??

    ردحذف
    الردود
    1. yes its possible... many travel from cairo to tanta or other governorates for their universities
      it takes around hour and half by train and few mins. from the station to the uni.
      #Aya B.

      حذف
    2. ساعتين وكده لو الكريق كويس ممكن اكتر كمان

      حذف
  9. تحفففففففففففففففففففففففففففة

    ردحذف
  10. جمييييييييييلة اوى

    ردحذف
  11. جااااااااااااااااامده أووووووووووووى بس ليه الاحداث بطيئه كده

    ردحذف
  12. حللللللللللللللللوة مستنين الباقي :)

    ردحذف
  13. المسافة بين القاهرة وطنطا 93 كم يعني ممكن أي حد يسافر كل يوم ويرجع تاني

    ردحذف
  14. يارب دعاء الحيوانة دي تبعد عنه وتكون شذى لكريم

    ردحذف
  15. جمييييييييييييييلة يا دينا تسلم ايدك

    ردحذف
  16. المسافة بين القاهرة وطنطا 93 كم يعني ممكن أي حد يسافر كل يوم ويرجع تاني

    ردحذف
  17. يادى النيله بئا :(

    دعااااء

    ردحذف
  18. لالالا يا دينا كده حرام والله هي شذى مش مكتوبلها انها تفرح شويه ودعاء ديه تستاهل الحرق عيلة بجحة اوي

    ردحذف
  19. قصة جميلة جدا

    ردحذف
  20. thank you so much girls to answer my question about Cairo and Tanta ..

    ردحذف
  21. حرام عليكى بقى يا دينا ايه دة الحلقة تحفة بس يعنى كريم هايبقى موقفه ايه ادام شذى

    ردحذف
  22. حلوة اووووووووووى ... استمرى :)

    ردحذف
  23. مدام دينا حاسس اني عايز اخنقك دعاء ايه اللي تيجي في الوقت ده
    حراااااام
    وكمان بتتحرش بيه انا لو منه اضربها بالقلم
    وربنا يستر وشذي ماتفهمش غلط

    ماتزعليش مني علي حته اخنقك دي

    ردحذف
  24. ♥دينا عماد♥3 أبريل 2013 في 10:47 ص

    لالالالالاحرااااااااام يا عينى كريم دايما مظلوم انشاء الله شذى هاتكون شافت دعاء وهى لسه طالعه عند كريم وماتفهمش غلط

    ردحذف
    الردود
    1. طمنتيني ربنا يطمنك

      حذف
  25. روعة الحلقة
    مستنية الجاية ^_^

    ردحذف
  26. الحلقه روووووووووووووووووووووووووووووعه ..
    بس البت دعاء دي عندها بجاحه ما شوفتهاش عند حد

    ردحذف
  27. اوباااااااااااااااااااا بجد تحفة
    الحلقة روعة بجد يا دينااا .. استمرى يا جميل

    amira slama

    ردحذف
  28. ررررررررررررررروعه تسلم ايديك

    ردحذف
  29. حلقة جااااااااااامدة بجد ^^

    ردحذف
  30. بسررررررعة يادييييييييييييينا :D


    rody

    ردحذف
  31. انا من المتابعين الصامتين بس بمووووت في قصصك يا دينا
    كان عندي استفسار مش كريم و شذي يعتبروا اخوات بماان مديحه متجوزه ابراهيم حيتجوزوا ازاي ؟؟

    ردحذف
  32. لا طبعا ما يعتبروش اخوات

    ردحذف
  33. بجد الحلقات اكتر من رائعـــــــــــــــــــــــــــــــــــــــــــــــــــــة

    ردحذف
  34. اوباااااااااا كده ولعت
    جميله جدا الحلقه بجد تسلم ايديكي
    موجا

    ردحذف
  35. ايه يا دودو مفيش حلقة النهاردة ولا ايه

    ردحذف
  36. لا انتى شكلك متعمدة تعقدى الموضوع

    ردحذف
  37. جاامداا

    ردحذف
  38. ميه ميه يا دينا انا مش قادره ابطل قرائه حررررام عليكي هتطرديني من بيتي بسبب اني مش سايبه الموبيل .بس بردو هكمل قرائه

    ردحذف

قول رأيك بلاش تقرا وتقفل من سكات...ارائكم تهمنى