السبت، 6 أبريل 2013

بقينا عيلة... الحلقة 29

الحلقة 29
كريم دخل لابراهيم الاوضة
"صاحى يابابا"
"كنت مستنيك"
كريم بيقعد على طرف السرير
"مستنينى... خير فيه حاجة"
"اقفل الباب وتعالى اقعد جنبى... عايز اقولك كلمتين"
قفل كريم الباب...وقرب كرسى من السرير وقعد جنب باباه
"خير يابابا"
"انت ايه اللى قلته قبل ماتنزل ده"
وحس كريم ان ابراهيم متغير
"انا قلت ايه ضايق حضرتك"
"المفاجآت اللى ورا بعض... سبت دعاء...عايز شذى... احنا بنلعب"
"حضرتك معترض؟!"
"انا مستغرب...دعاء دى مش انت اللى اختارتها بمزاجك"
"ايوه... بس لقيتها متناسبنيش خالص"
"وشذى اللى تناسبك"
"ايوه"
"وده اكتشفته امتى"
"قريب"
"واحنا مسافرين"
"تقريبا"
"مش مقياس"
"يعنى ايه"
"صارحنى"
"بإيه"
"ايه اللى حصل خلاك تسيب دعاء وتبقى عايز شذى بالسرعة دى"
"حبيتها"
"ودعاء"
"بابا...حضرتك معترض على شذى ف حاجة"
"لو كانت الظروف مختلفة مكنتش اعترضت...بس انا حاسس ان فيه حاجة غلط"
"حاجة غلط ازاى يعنى؟"
"يعنى ...انتوا كنتوا لوحدكم... وممكن يكون..."
وبكل حزم رد كريم
"لا يابابا... مفيش اى حاجة اضطرتنى اعمل كده... انا حبيت شذى وهى اللى هبقى سعيد معاها"
"طيب فكر تانى... انت برضه كنت فرحان بدعاء"
"دعاء اتسرعت ف خطوبتها"
"وشذى.. متسرعتش؟؟"
"لأ... بابا لو عندك اعتراض على شذى ممكن تقولى عليه"
"اعتراضى مش على شذى...اعتراضى على تسرعك"
"حضرتك شفت طنط مديحة وبعد شهر اتجوزتوا... ساعتها مقلقتش من التسرع...انا اسف مقصدش انى اقارن بس عايز اقول ان الوقت مش مقياس وان قربى من شذى خلانى عرفت قد ايه متفاهمين وان هى اللى هكون سعيد معاها"
"يعنى ده اخر كلام عندك"
"ايوه... حضرتك عندك رأى تانى"
                        ********************

مديحة فى المطبخ بتسخن الغدا لكريم وشذى
سرحانة بعد ما لاحظت انفراد ابراهيم بكريم
"ايه بس اللى غيرُه فجأة كده؟؟ طب لو مش عايز شذى هعمل ايه؟؟ مش هيبقى لى وش اعيش معاه... معقول يقول مش عايز شذى ف البيت؟؟ لو حصلت انه يطلقنى يطلقنى مش هسيب بنتى... هو انا مبشبعش غُلب ياربى... لو بس افهم ماله؟"
حست بحد بيمسكها من وسطها
اتخضت
"مالك ياماما اتخضيتى كده ليه"
"مفيش يا شذى مسمعتكيش وانتى داخلة"
"خلصتى...احنا جايين ميتين م الجوع"
مديحة بتبص لشذى والفرحة ف عينيها وكلامها
"يارب استر وقلبك ميتكسرش"
وسألت شذى
"امتى يا شذى"
"امتى ايه"
"امتى التغيير السريع ده والحب اللى شايفاه ف عينيكم"
"معرفش امتى بالظبط... كل اللى اعرفه انى مش مصدقة نفسى من السعادة اللى انا فيها... انتى مش فرحانة ياماما"
التفتت مديحة بحجة انها بتطفى البوتاجاز علشان تتجنب مواجهه شذى
"اللى يفرحك يفرحنى يا شذى...هو كريم فين"
"عند باباه"
"طب خدى ودى الاكل ع السفرة"
خرجت مديحة من المطبخ وراحت على اوضة ابراهيم

قابلت كريم خارج م الاوضة
"الاكل جاهز ياكريم"
دخلت لابراهيم وقفلت وراها الباب
"فى ايه ياابراهيم... من الصبح وانت سايبنى اضرب اخماس ف اسداس... اللى عندك قولهولى وخلاص انما متسبنيش كده"
"ايه يامديحة بالراحة شوية"
"انا ملاحظة من ساعة ما كريم قال اللى قاله وانت اخدت جنب ....فهمنى ف ايه"
"انتى مستغربتيش؟"
"استغربت ... بس مزعلتش"
"مين زعل؟"
"انت شكلك زعلان"
"مش زعلان...قلقان"
"من ايه"
"من تسرع كريم علشان كده اتكلمت معاه وفهمت"
ابراهيم بيتكلم بطبيعية... استغربت مديحة اكتر
"وفهمت ايه"
"انه مقتنع بقراره وانه مش قرار سريع زى ما كنت متخيل.. هى شذى فين؟"
"بتتغدا"
قام ابراهيم من السرير
"رايح فين"
"هقعد بره شوية زهقت م السرير"
                        *******************

خرج ابراهيم من الاوضة... قعد قدام التليفزيون ف الانتريه
كل شوية يختلس نظرات لكريم وشذى وهما بيتغدوا
نظرات الحب واضحة بينهم
قام كريم خلص غدا... وقامت شذى وراه تلم الاطباق
ابراهيم"شذذذذى"
شذى"نعم"
ابراهيم"تعالى"
راحت شذى تكلم ابراهيم...
"اقعدى جنبى"
جت مديحة من الاوضة...وكريم من الحمام
بيبصوا لابراهيم
ابراهيم"مالكم ...بتبصوا لنا كده ليه... اللى وراه حاجة يروح يعملها"
كريم بيقعد وهو بيبص لشذى
"موراييش حاجة"
وقعدت مديحة" ولا انا ورايا حاجة"
ابراهيم"طب ... شذى دلوقتى كريم قال انه عايز يتجوزك... رأيك ايه؟"
ابتسمت شذى بكسوف وبصت لكريم وبعدين ف الارض
ابراهيم"لا انا عايز اعرف رأيك بوضوح"
حاولت شذى تجمع الكلام مقدرتش  تتكلم...هزت راسها بس
ابراهيم"يعنى موافقة؟"
مديحة بتبص لابراهيم وشايفة علامات الرضا على وشه...ارتاحت
ابراهيم"طيب احنا يا مديحة بنخطب شذى لكريم... وبما ان الحكاية ف بيتها متهيألى نقرا الفاتحة على طول"
كريم وشذى حسوا ان قلبهم هيطير م السعادة
مديحة فرحانة بموافقة ابراهيم...ضحى جريت على شذى وباستها وبعدين باست كريم
مديحة وهى فرحانة
"طب ليه يا ابراهيم كنت مخوفنى طول اليوم"
"كنت قلقان... يالا نقرا الفاتحة"
قروا الفاتحة وهما قاعدين
باستهم مديحة وباركت لهم.... وبارك لهم ابراهيم
وقف كريم قدام شذى وهو بيسلم عليها
"مبروك"
ردت بكسوف وفرحة
"الله يبارك فيك"

ابراهيم"ربنا يسعدكم يا ولاد... انا بس عايز اقولكم حاجة... كريم شقتك وضبها بسرعة علشان تتجوزوا... انا بصراحة ميعجبنيش انكم تبقوا مخطوبين وعايشين ف بيت واحد"
كريم"متقلقش يابابا... ان شاء الله هخلص بسرعة ونتجوز"
ابراهيم"الاحسن نكتب الكتاب وتبقوا تخلصوا براحتكم"
مديحة"انا مع كلام ابراهيم"
كريم"احب ما على قلبى طبعا... بس انا عايز اعمل فرح ... انا وشذى مفرحناش ودى اول فرحة"
ابراهيم"نكتب الكتاب اليومين دول...وخلى الفرح الكبير مرة واحدة... انت بس شوف شقتك ناقصها ايه ونبدأ على طول"
مديحة بفرحة"ربنا يسعدكم يا ولاد"
كريم"انا هروح مشوار كده وارجع نروح نشترى الدبل والشبكة"
شذى لكريم بفرحة مش مصدقاها
"دبل وشبكة؟"
كريم"طبعا... هقوم البس... ساعتين وتكونى جاهزة"
ابراهيم"واتفق مع اى مأذون ييجى بعد بكرة يكتب الكتاب... وانتى يامديحة قولى لاختك وجليلة واعزميهم"
كريم"هغير هدومى وانزل... وابقى اجهزى يا شذى لما اكلمك"
قام كريم... وقامت شذى وراه
"انت رايح فين؟"
"رايح لابو دعاء"
شذى بزعل"ليه؟"
"الضهر لما كلمته قال عدى عليا بالليل... علشان كده جيت لك الكلية وهعدى اخد منه الشبكة واجى اخدك ننزل"
                         ******************

دعاء فى اوضتها...بتعيط
دخل لها باباها
"دودو حبيبتى ينفع اللى انتى فيه ده"
"انا يابابا يسيبنى ...هو جالك"
"انا نازل اقابله... بس مش عايز حبيبتى تزعل كده... بكرة يجيلك احسن منه"
دعاء بتعيط
"بقولك ايه يا حبيبتى انا مسافر كمان يومين فرنسا تعالى معايا اشترى لبس جديد"
"مش عايزة ومليش نفس ...انا مقهورة يابابا"
"معلش ...يالا انا نازل اجيبلك ايه وانا جاى"
"مش عايزة حاجة"
وكملت ف سرها
"مش هرتاح الا لما اخد حقى منه"
                       ******************

كريم قاعد ف العربية...بيتكلم ف الموبايل
"الو...يالا انا مستنيكى تحت"
بعد شوية نزلت شذى وقعدت جنبه
"اتأخرت ليه هناك؟"
"وحشتينى"
"وحشتك؟"
"اه طبعا... طول ما انتى مش قدامى بتوحشينى"
ردت بفرحة وكسوف
"وانت كمان...قولى اتأخرت ليه هناك...شفت دعاء"
"لا انا روحت اخدت الحاجة ومشيت...علشان اجيلك بسرعة"
مشيوا هما الاتنين...وراح كريم وقف عند محل دهب
نزلت شذى من العربية... لف لها كريم
"مكنتش متخيلة ان كل حاجة هتبقى بالسرعة دى"
رد عليها وهو بيمسك ايدها...
"علشان نيتنا خير ربنا مسهلها"
حست شذى بقلبها بيتخطف وايديها ف ايد كريم
وقفوا قدام الفاترينة...وايديهم متشابكة
"اختارى شبكتك يا عروسة"
"كريم... انت اهم عندى من اى حاجة...كفاية ان ربنا عوضنى بيك"
"انتى مكسوفة؟؟ انتى تتمنى وانا احققلك اللى بتتمنيه"
"ياكريم بالراحة على قلبى شوية... انا بخاف من الفرحة دى"
"متخافيش يا حبيبتى....عارفة احلى حاجة بابا عملها ايه"
"ايه"
"انه اتجوز مامتك علشان اعرفك واحبك...وانه قال اننا نكتب الكتاب بعد بكرة"
ضغط على ايديها بحب وهو بيتكلم ... فرحت اكتر
"يالا اختارى اللى يعجبك... معندناش وقت كتير النهاردة نجيب الشبكة ومن بكرة تيجوا تتفرجوا ع الشقة وتشوفى عايزة تعملى فيها ايه او تغيرى ايه"
                          *****************

جليلة قاعدة ف البيت وبتتكلم ف التليفون
"الف بركة ربنا يتمم لهم بخير...ايوه كده ...دعاء دى مكنتش تناسبنا خالص... ان شاءالله يا مديحة...باركى للعيال لحد ما اشوفهم...مع السلامة"
زياد دخل البيت وهى بتتكلم ف الاواخر
"خير ياماما؟؟ مين"
ردت جليلة وهى مستغربة من الخبر
"دى مديحة ...كتب كتاب شذى وكريم بعد بكرة"
"ياولاد اللذينة... لحقتوا"
"ايه ده؟؟انت كنت عارف"
زياد بفخر
"طبعا...كريم مبيخبيش عليا حاجة"
"احكحى لى ... ايه اللى حصل"
"قبل ما احكيلك... انا عايز اخطب زيهم"
"ياريت...شاور انت بس"
"طب انا شاورت خلاص"
"مين هى؟"
"شيماء صاحبة شذى"
"مين شيماء دى وعرفتها ازاى؟"
                    *******************

كريم وشذى داخلين البيت... الساعة 12 بالليل
مديحة مستنياهم وهى نايمة ع الكنبة...اول ما سمعت الباب صحيت
"كنتوا فين كل ده"
شذى بفرحة بتورى ايديها لمديحة
"شفتى ياماما...كريم جاب لى شبكة حلوة اوى تعالى اوريهالك"
"طيب يا شذى ...ادخلى وانا جاية لك"
شذى وكريم واقفين
مديحة"انتوا من الصبح مع بعض...ادخلوا ناموا بقى كفاية كده... تصبح على خير ياكريم...يالا يا شذى وانا جاية انام عندكم ف الاوضة"
دخلت مديحة اوضتها...
شذى واقفة ف الطرقة...قرب منها كريم ووشوشها
"مامتك خايفة عليكى منى... هتنام ف الاوضة تحرسك"
ضحكت شذى
"تخاف منك انت... ده انت امانى"
خرجت مديحة من اوضتها رايحة على اوضة البنات
"يالا يا شذى... تصبح على خير ياكريم"
كريم"يالا ياحبيبتى روحى نامى...تصبحى على خير"
شذى"وانت من اهله"



هناك 50 تعليقًا:

  1. حلوه جدااااااااااااااااااااااا
    بس قصيره جداااااااااااااااااا

    ردحذف
  2. تحفففففففه .. بس الصراحه المره دى قصيره .. عموماً احنا مقدرين تعبك يا كبير .. ومستنيين الباقي على نار <3

    ردحذف
  3. هو ابراهيم مات ولا ايه؟
    بيبو

    ردحذف
  4. حلوة اووووووووووووى اووووووووووووووى بجد تحفة يادندن تسلم ايدك بس بالله عليكى بلاش حاجة تضيع الفرحة دى منهم

    ردحذف
  5. جمييييييييييييييييييييييييلة بقى

    اوعدناااااااااا يااااااااااااااااااارب

    aYa

    ردحذف
  6. raw3aaaaaaaaaaaaaaaaaaaaaaaaaaaaaaaaa <3 <3 <3

    ردحذف
  7. msh motf2la ya dinaaaaa 7as en f 7aga ht7sal :d
    hadir

    ردحذف
  8. الحلقه حلوه اوى بس ربنا يستر من الى جاى
    mimo

    ردحذف
  9. جميلة تسلم ايدك........بس بجد قصيرة ومفهاش احداث كتير....المفروض بعد يومين اجازه تعوضينا يا أ\دينا :)

    ردحذف
  10. جميله اووووووووووووووووووووووووووووووووى

    ردحذف
  11. ابتهال شندي6 أبريل 2013 في 11:13 م

    تحفه قوي بس انا قلقانه من دعاء دي وتسلم ايدك يا دينا

    ردحذف
  12. اجمد من كده مش هلاقى بصراحه :D

    ردحذف
  13. جميييييييييييييييييييييله

    ردحذف
  14. omg gmda aweeeeeeee y dodo tslm edk :*
    keep going :)

    ردحذف
  15. حلوة اوووووى بجد
    بستنى الحلقة كل يوم بفارغ الصبر وبفرح اوى لما بقرأ ليكى
    بالتوفييييق دايما يا رب
    انى احبك فى الله

    ردحذف
  16. ايه الحلاوه دى يا دودو يا مفرحانى دايما الحلقه جاااااااااااااااامده موووووووووووووت تسلم ايديك

    ردحذف
  17. ye5rebeet keda to7fa ya 2amar bas emta el 7ala2a el gaya

    ردحذف
  18. دينا انا هعيط :')
    مفيش واحد كمان من كريم دا انا عايزة من دا ♥


    Salma ~

    ردحذف
  19. حلوة اوووووووووووى بجد
    بس ربنا يريحينا من ست دعاء

    ردحذف
  20. جامده اخر حاجه بس انا هموت واعرف هي كام حلقه

    ردحذف
  21. جلوووووووووووه اوى يا دينا تسلم ايدك بس فصيره جدا الحلقه الجايه امتتتتتتتتتته ؟؟؟؟؟؟؟؟؟

    ردحذف
  22. روووووووووووووووووووووووووووعة بجد

    حلوة اوووووووووووووووووووووووووي

    يارب فرحني فرحة زي فرحة شذي كده ياااااااااااااااااااااااااارب

    ردحذف
  23. تححححححححححححححححححححححححححخححححححححححفة بجد يا دينا
    والله انتى كاتبة رائعة و الحلقة كمان طويلة المرة دي
    ربنا يوفقك ان شاء الله

    ردحذف
  24. جاااااااااااااااااااااااااامده بجد يا دودو
    احلى حاجه ان ربنا يعوض الواحد خير زى كريم و شذى
    وربنا يبعد عنهم دعاء الغبيه دى

    ردحذف
  25. تحفففففه بس حاسه ان ده الهدوء اللي بيسبق العاصفه

    ردحذف
  26. Gamda aweeeee ya Dina.. Bs blash t7sl 7aga tb3dhom 3am ba3d.. W 5sosn mn Du3a2

    ردحذف
  27. ان حاسة ان دعاء هتعمل حاجة تحاول ابعد بيها شذى عن كريم ؟

    ردحذف
  28. مش مطمنه للي اسمها دعاء دي و ربنا يستر

    ردحذف
  29. اكيد دعاء ديه هتهبب حاجة اكيد الموضوع مش هيمشي كده بسلام ربنا يستر
    بس الحلقة تحفة وبجد انتي في الحلقة ديه كنتي في قمة الابداع زي ما احنا متعودين منك

    ردحذف
  30. حلوه اووووى كالعاده بس البت دعاء دى عايزا تاخد بالشبشب ع دماغها علشان تتهد
    وتسلم ايدك يا دندن كالعاده متألقه

    ردحذف
  31. تحفة الحلقة
    بس دعاء دى مش مريحانى

    ردحذف
  32. ررووووووووووووووووووووووووووووووووووووووعة بجد انا تعبت خلاص منهم
    مشهد راااااااااااااائع بج
    تسلم ايدك يا قلبى

    ردحذف
  33. ماشاءالله

    ردحذف
  34. قصه رائعه وحاسه كأنها واقعيه تسلم إيديك بس عايزه أعرف هي بتتعرض كل أد إي مشكوره

    ردحذف
    الردود
    1. حلوه أوي اللحظه الرومانسيه دي

      حذف
  35. الحلقة كلها جميلة جدا و كلها مفأجااااااااااااااااااااااااااااااااات تسلم ايديكى يا دودو

    ردحذف
  36. جميله يادودى ياريت تبقى النهايه مش حزينه ياريت

    ردحذف
  37. أيوة بقى ايوة بقى يا دودو اخيرا فرحوا الاتنين

    ردحذف
  38. حلوة اوووووووووووووووووووى انا شخصيا حاسة انى قلبى هيطير من الفرحة عشانهم

    ردحذف
  39. الحلقه جميله جدا تسلم ايدك يا دودو

    ردحذف
  40. بجد جميييييييييلة موووووووت بس قصيرة شويتين مستنية الحلقة الجايه بفارغ الصبر ويا رب بس متكونش النهاية مؤساوية

    ردحذف
  41. بجد جميييييييييلة موووووووت بس قصيرة شويتين مستنية الحلقة الجايه بفارغ الصبر ويا رب بس متكونش النهاية مؤساوية

    ردحذف
  42. ايواااااااااااااااااااااااااا بقى حلوة اوي اوووووووووووووووي يارب تفضل سعيدة لالاخر عشان يفرحونا معاهم

    ردحذف
  43. حلوة القفلة دى يا دودو انا بجد نفسى فى حب كده فى الواقع لان الاحاسيس دى جميلة جدااااااااااااااا ونادر لما الواحد بيلاقيها
    dentist aya

    ردحذف
  44. الحلقه جامده يا دينا بس ابقى طوليها شويه

    ردحذف
  45. تحففففففففففففففففففففففففه اوووووووووووووووووووووووووي بس حاسة اني مش مرتاحة مش مرتاحه لحلقه النهاردة :D :D ربنا يستررررررررر

    ردحذف
  46. بصي لو قعدت اقول فظيعه من هنا للصبح مش هيكفي .. دينا انتي مبددددددعه :D

    ردحذف
  47. very nice but short

    ردحذف
  48. لالالالالالالالالالالا قلبى الصغير لا يتحمل ♥♥ يا رب بس متجيش الزفته دعاء دى وتبوظ الدنيا :(

    ردحذف
  49. واووووو انا بضحك لا تلقائيه ااااااااااااه انا فرحانه اكتر منهم

    ردحذف

قول رأيك بلاش تقرا وتقفل من سكات...ارائكم تهمنى