الثلاثاء، 16 أبريل 2013

ليست عذراء... الحلقة 3

الحلقة 3
مايا نامت بعد ما تعبها الارق والالم اللى بتعانيه
فارس نام... ومن التفكير صحا قبل مايا

فارس قاعد بيبص لمايا وهى نايمة
خيالات كتير بتيجى على باله وهو سرحان فى اللى حصل
تفكيره بيصورله ازاى كانت راضية
تفكيره بيصورله ازاى كانت بتتعامل ف الموقف

بيحاول يبعد الافكار عن خياله مش قادر
بدأت الافكار تدور حوالين مين اللى كان معاها
تفكيره المسيطر عليه...حمزة

تفكيره المتواصل..ولما شافها نايمة
هب مرة واحدة.... صحاها بعنف
"انتى نايمة وسايبانى اكل ف نفسى"
صحيت مايا على صوت زعيق فارس
وشده ليها من دراعها لدرجة انها قعدت من قوة شدته
وردت من المفاجأة
"فى ايه"
ثار اكتر
"فيه انك ضحكتى عليا... كنتى بتضحكى علينا كلنا...مع حمزة صح؟؟ هو حمزة... علشان كده انتى قاعدة عندهم على طول"
عيطت مايا... من خوفها من عصبية فارس... هزها بعنف
"كنتى بتحبيه... انا غلطان انى تناسيت انك كنتى بتحبيه...سلمتى لى نفسك باسم الحب"
وبمحاولة لرد الوجع
"ايوه كنت بحبه ...وانا غلطانة انى اتجوزتك...ندمانة انى صدقتك واتجوزتك"
ثار اكتر ومحسش بنفسه الا وهو بيضربها اكتر
                          ******************

حياة لابسة وطالعة من اوضتها
"انا نازلة لماما... كمل لبسك وابقى انزل علشان نروح للعرسان"
"طيب...هصلى الضهر وانزل"
                         ******************

حياة داخلة بيت مامتها...شافت فؤاد قاعد
"صباح الخير يا فؤاد"
"صباح النور...هو توفيق مش جاى معانا ولا ايه"
"لا جاى... شوية ونازل...هى ايمان منزلتش"
"لا لسه"
دخلت حياة المطبخ لمامتها...اول ما شافتها
"كل حاجة جاهزة... اعمليلى قهوة لحد ما البس"

خرجت الام من المطبخ ف نفس الوقت اللى دخلت فيه ايمان البيت ومعاها نسرين وجوزها
ايمان"نسرين جاية تسلم عليكم قبل ما تمشى"
الجدة"انتى لحقتى ...مش لسه جاية امبارح....ماتقعدى معانا كام يوم"
نسرين"معلش يانينة علشان شغل ممدوح"
الجدة"ما تسيبها ياممدوح كام يوم"
ممدوح"يرضيكى يعنى انها تسيبنى... اهون عليكى"
الجدة"لا يا بنى ربنا مايحرمكم من بعض"
نسرين"خالتو هنا...روحت لها عمو توفيق قال انها هنا"

حياة خارجة من المطبخ بالقهوة
"بسرعة كده يا نسرين...مش جاية معانا لفارس"
سلمت نسرين على حياة
"معلش ياخالتو...لسه قدامنا سفر"
حياة"تروحوا بالسلامة...انتى ف الكام على خير"
نسرين"السابع"
حياة"هانت ربنا يكملك على خير"
سلمت نسرين على كل الموجودين... وسلم ممدوح عليهم وخرجوا
                      *******************

مايا بتعيط ف الاوضة... من الضرب
قفلت الاوضة عليها بعد ما فارس خرج منها

فارس قاعد بره وحاسس بالاضطراب
الوقت بيمر ومش عارف هيتصرف ازاى

جرس الباب رن... حس ان مفيش مفر من مواجهه الموقف
قام وفتح الباب وهو بيحاول يبتسم

جدته كانت متقدمة وجنبها فؤاد ماسكها ف ايده
ووراهم توفيق ووراه ايمان وحياة
سلموا عليه ودخلوا قعدوا وعلامات السعادة على وشهم
فؤاد"هى مايا نايمة ولا ايه"
ارتبك فارس وتمتم بكلام مش مفهوم
فسروه الموجودين على انه احراج
الجدة"لو نايمة صحيها علشان ندخل لها"

دخل فارس الاوضة
اول ما شاف مايا
"عايزينك"
وقف وضهره ليها وكأنه بيكلم نفسه
"انا مش عارف اتصرف...مش قادر اسكت واعيش معاكى وانا كل ما اشوفك الدم يغلى ف عروقى...مش طايقك ولا طايق نفَسك معايا ف حتة واحدة... ومش عارف اصدمهم واقولهم الحقيقة... ياريتك كنتى موتى ولا غورتى ف 60 داهية قبل ما اتحط ف الموقف ده"
مايا مبتردش من خوفها منه
كمل كلامه باستسلام
"خلاص معدش ييجى منه وانتى اللى عملتى ف نفسك وفينا كده"

خرج فارس م الاوضة... وبعبوس
"ادخلوا لها"

بصوا الستات لبعض على طريقته...وقاموا

الجدة ووراها ايمان وحياة داخلين الاوضة
مايا قاعدة مكانها ع السرير منكمشة
اتخضوا من شكلها
صرخت ايمان وراحت على باب الاوضة
"فااااااااااارس... ايه اللى عمل فيها كده"

سمع فؤاد صوت ايمان المفزوع...جرى على الاوضة
توفيق بيبص ل فارس
"ف ايه؟؟؟"

فؤاد لما دخل وشاف مايا وهى بتعيط
وبيسألوها ايه اللى حصل مبتردش
وايمان قاعدة جنبها اخداها ف حضنها

شك فؤاد ... وف نفس الوقت رافض يصدق
نادى بصوت عالى على فارس

توفيق لما سأل فارس وشاف دموعه ف عينيه
شك ان يكون فارس عنده مشكلة
قام متحفز وهو مستاء من ان مايا اتكلمت وحكت بسرعة كده

توفيق داخل الاوضة...ووراه فارس منكس راسه
ايمان قاعدة على السرير ومايا بتعيط ف حضنها
حياة وفؤاد ومامتهم مستنيين من فارس ييجى يقول سبب الاثار اللى على وشها دى ايه؟؟
فؤاد شك فى فارس... وانه يكون سادى
فؤاد بشك"ايه اللى حصل وايه الاثار اللى على وشها دى"
فارس بيحاول الهدوء
"مسألتهاش ليه؟"
بص لها فؤاد
"ايه اللى ف وشك ده"
مايا بتتمسك بحضن ايمان اكتر وتعيط
توفيق حس ان المشكلة مش ف ابنه....شخط ف مايا
"ما تتكلمى...فى ايه"
فؤاد لفارس
"فى ايه يافارس..انا بسألك انت"
فارس
"فيه ان مايا فضحتك وفضحتنى... بنتك مش بنت بنوت يا خالى"

كلام فارس كان صدمة لكل الموجودين
الجدة دبت ف صدرها...وحياة كتمت صرختها
ايمان بصت لمايا بتساؤل
فؤاد الكلام كان صدمة ليه... واول ما سمعه
التفت لمايا وهجم عليها يضربها بعنف اكبر
ايمان بتصرخ وبتحوش عنها وبتتضرب ف النص
الجدة بتعيط وتشد فؤاد... حياة واقفة دموعها نازلة بصمت

ايمان بتصرخ"كفاية يافؤاد... كفاية هتموت ف ايدك"
توفيق بيزعق لايمان
"سيبيه يموتها بدل العار اللى جابته لجوزها"
ايمان"بالراحة عليها ...هى لو بنتك كنت قلت كده"
فؤاد"مين ؟؟؟غلطتى مع مين؟؟ومن امتى؟...اتكلمى"
ايمان وهى بتبص لمايا
"مايا...مايا...كفاية يا فؤاد البت هتموت"
توفيق"انتى الوحيدة اللى بتدافعى عنها... علشان تدارى على غلطتها مع ابنك...مفيش غير حمزة هو اللى عمل كده"
والتفت فؤاد وحياة والجدة لايمان...بنظرات الاتهام
ايمان بتعيط
"متجيبش سيرة ابنى... ابنى ميعملش كده ابدا... اتكلمى يامايا وقولى انه مش حمزة"

مايا فاقدة الوعى ف ايد ايمان
ايمان برعب "مايا...مايا...كلمينى"
توفيق"ف ستين داهية"
فؤاد بقلق بيهز مايا "مايا...مايا"
                     **********************

توفيق وحياة وفارس وفؤاد قاعدين ساكتين محدش بيتكلم
يتفتح باب الاوضة...يخرج الدكتور والجدة بتوصله

يقوم فؤاد"مالها يادكتور"
الدكتور"مالها ايه...مين اللى عمل فيها كل ده حرام عليكم"
فؤاد"لو سمحت يادكتور عرفنا حالتها"
الدكتور"حالتها انها اتعرضت لضرب وحشى واثاره مش محتاجة كشف... وشها كله كدمات...بس مش دى بس المشكلة"
فؤاد"ايه تانى"
الدكتور"اللى حصل لها عملها صدمة عصبية وفقدت النطق... محدش يضغط عليها انها تتكلم... وياريت تستشيروا طبيب نفسى يتابع حالتها"
فؤاد وهو بيوصله للباب...وبيحاسبه
الدكتور"لو اللى ضربها جوزها وعايزين تقرير طبى انا ممكن اعملكم التقرير... الضرب كان عنيف جدا وواضح انه اكتر من مرة"
فؤاد"لا شكرا يادكتور.. هتتحل ان شاءالله"
                    ******************

كلهم قاعدين ف صمت ماعدا ايمان مخرجتش من الاوضة
قطع الصمت صوت توفيق
"وبعدين... الحل ايه"
فؤاد بيبص لفارس مستنى رده...وعينيه كلها رجاء
فارس"مايا طالق... مش هقدر تعيش معاها بعد ما خدعتنى"
توفيق"هو ده الصح... مينفعش تستر على غلطة ملكش دعوة بيها"
فؤاد"للدرجة دى يافارس هانت عليك... احنا منعرفش ايه اللى حصل"
فارس"اللى حصل انها فرطت ف نفسها... انا اللى كنت فاكرك هتموتها الاقيك بتتكلم بالضعف ده"
فؤاد بيعيط"منكرش ان غلطتها كبيرة اوى...بس لما حسيت انها هتموت خفت عليها"
توفيق باستهجان"خفت"
فؤاد"ايوه خفت...دى بنتى الوحيدة برضه"
                  *******************

ايمان جنب مايا... بتطبطب عليها وبتعيط
"صحيح حمزة هو السبب؟؟؟ وليه مقلتليش"
مايا بتعيط بحرقة... مش قادرة تتكلم

اتفتح باب الاوضة...ودخلت الجدة
"لبسيها يا ايمان"
ايمان"ليه؟"
الجدة"فارس طلقها خلاص... وهترجع معانا"
مايا بتعيط بحرقة اكبر... جدتها مش عارفة تتعاطف معاها ولا تقسى عليها... خرجت من الاوضة وهى محتارة
                  *******************

فؤاد بيقف بالتاكسى قدام باب البيت
بينزل وبتنزل منه ايمان ومامتها وهما ماسكين مايا
دخلوا البيت بسرعة قبل ما حد يشوفهم
فؤاد بيفتح باب الشقة
مايا خايفة تدخل وماسكة ف ايمان
"ادخلى متخافيش محدش هيعملك حاجة"
مايا بتعيط وماسكة ف ايمان
فؤاد"متخافيش...لما تخفى هنبقى نتكلم"
مايا بتبص له بخوف وماسكة ف ايمان
الجدة"ادخلى يا مايا... محدش هيضربك"
ايمان"تطلعى تقعدى معايا"
مايا بتهز راسها وكأنها كانت مستنية الحل ده
ايمان"انا هاخدها عندى... هتقعد معايا لحد ما تبقى كويسة"
فؤاد باستسلام" طيب... حتى عندك احسن بعيد عن فارس وحياة وتوفيق"
                    ********************

حياة بتلم هدوم فارس وهى بتعيط وسامعة توفيق وفارس بيتكلموا
"كويس انك قدرت تمسك نفسك ومموتهاش"
فارس حزين ومش قادر يتكلم
"انا م الاول مكنتش عايز الجوازة دى... قلتلك بلاش مايا...كنت حاسس انك مش هترتاح"
"عمر ما خطر على بالى انها ممكن تعمل كده... دى متربية قدام عنينا...ده انت اللى مربيها تقريبا"
"العرق يمد...عايز ايه من واحدة امها اجنبية وعايشة بالطول والعرض...اقلب القدرة على فمها"
خرجت حياة من الاوضة
"خلاص لميت الهدوم"
توفيق"يالا بينا... وانا هتكلم مع فؤاد ان الطلاق يتم وتتنازل عن كل حقوقها... مش كفاية الفضيحة"
حياة"راحت ولا جت بنتنا ... امانة عليكم بلاش فضايح وكفاية على قد كده...استروها ومتحكوش حاجة لحد"
توفيق"والجيران اللى كانوا ف الفرح امبارح وهيلاقوهم النهاردة كل واحد ف بيت اهله"
حياة"هقعد مع اخواتى ونفكر ف اى حاجة نقولها ... ربنا امر بالستر ياخويا الله يسترك"
توفيق باستسلام لعشرة العمر مع اخوات حياة
"امرنا لله...يالا بينا"

هناك 49 تعليقًا:

  1. تحفة رووووووووووووووووووووووووووووووووووعة بجد تسلم ايديكى يا دودو

    ردحذف
    الردود
    1. بجد تحفه انا اول مرة اعيط كده بجد انتى رووووووووووووووووووووووووووووعه يا دينا

      حذف
  2. حلوووه جدااا انتى بجد فنااااااانه

    ردحذف
  3. gameeelaaa when is the next episode ?

    ردحذف
  4. 7aywan awee tawfee2 da :\

    ردحذف
  5. بجد حرااااااااااااااااام هموت من فارس دة ومتأكدة ان مايا مظلوممممممة :'(

    ردحذف
  6. بسجل اعجابى يا دودو بالحلقه جدااا
    ولو انى مش هعرف اقول راى غير اما اخلص القصه بس حابه اقولك انى بستنى الحلقه كل يوم عشان اتابع الاحداث بجد حلوة اوى :*

    ردحذف
  7. بجد القصه تحفه و مؤثرة جدا والي حساه فعلا انا مايا مظلومه وفي سوء تفاهم اكيد حاجه حصلتلها غاص بعنها
    ومتشووقه اعرف ايه هي

    ردحذف
  8. 7elwa awy
    fares da 3'aby gdn 3la fkra

    ردحذف
  9. كان المفروض ريستر عليها مهما ان كانت هيا من لحمه ودمه بس حلقة رائعة يادينا

    ردحذف
  10. انااا عاايزة الحلقة اللي بعدها مليش دعوووه :(

    ردحذف
  11. نقدر نقول حلقه انهارده روتينيه هي حاصل الحلقتين اللي فاتوا وحانبدأ بقي ان شاء اللمن اللي جايه الاحداث بالتوفيق يأجمل مؤلفه عاميه في مصر ^_^

    ردحذف
  12. حلوه اوي ياريت متتاخريش علينا في الحلقات الجايه اصلها بتشد الواحد خاااااالص تسلم ايدك وافكارك

    ردحذف
  13. روووووووووووووووووووووووووووووووعة مع إن فارس غلطان كان المفروض يسمع منها الأول بس هو كمان معذور ربنا ما يكتبها على حد يارب ويحفظ جميل بنات المسلمين ويخلوا بالهم على نفسهم أنتى بجد فنانة يا أستاذه تسلم إيدك

    ردحذف
  14. eh daa hwa ma7asalsh ay 7aga leeh nhardaaaa ???

    ردحذف
  15. حللللللللللللللللللللللللللللللوة اوي

    ردحذف
  16. فارس صدمنى بصراحه
    هو دا الحب؟!!
    الحب انك تتفهم اللى قدامك وتسمع منه قبل ما تحكم
    لكن للاسف بقى فى قناع دلوقتى باسم الحب اول ما يتشال بتبان الحقيقه
    حساها مظلومة اووووووووووووووى لانها لو بتاعه لعب ما كانت عملت عمليه قبل ما تتجوز وريحت نفسها
    مستنيين الحلقات الجايه بفارغ الصبر يا دودو

    ردحذف
  17. حلووة قوى بجد تسلم الدماغ الى ألفت

    ردحذف
  18. تحفةةةةةةةةةةةةةةةة يا دودوووووووووووووووو تجننننننننننننن

    ردحذف
  19. تحففففففففففففففففففففففففففففففففففففففففففففففففففففففففففة

    ردحذف
  20. جبااااااااااااااااااااارة :D

    ردحذف
  21. بجد حلوه قوي بس انا حاسه ان مايا مظلومه
    وبجد مستنيه الحلقات الى جايه وياريت تبقي الحلقه
    طويله شويه

    ردحذف
  22. علي فكره فارس دى غبي لانه عمل فيها كده
    هو لو كان بيحبها كان سمع منها الاول ايه
    الي حصل انا منكرش ان مايا غلطانه المفروض
    كانت صرحته من الاول لكن الى حصل حصل انا بكره
    فارس قوي ومتعاطفه جدا مع معايا
    وبجد عايزه اعرف ايه الي هيحصل بعد كده
    ورجاء خاص ممكن يا دودو تبقي الحلقه طويله
    شويه

    ردحذف
  23. مؤثرة اوى بس جميلة جدااااا كملى الباقى ... بالتوفيق

    ردحذف
  24. انا حاسة كده ان حمزة هيتعاطف معاها ومش بعيد يتجوزها كمان
    فارس ده عايزة اولع فيه
    بس نفسى اعرف بسرعة ايه اللى حصلها

    ردحذف
  25. طبعا القصه كالعاده بتشدنا ومن نجاح لنجاح يا دودو

    ردحذف
  26. جامدة موووووت بجد تسلمي

    ردحذف
  27. انا مخنوقه اوى منها !!
    هى ساكته كدا ليه !! موش موضوع بسيط يعنى انها تعند معاه كدا ووتتكلم انه بيحبها ولالا ماهو طبيعى انه يتنرفز ويخرج عن شعووووره

    ردحذف
  28. بالنسبة لاي حد بيقول ان فارس غلطان بصراحة هو مش غلطان ابدا رغم اني عارفه ان مايا مظلومة ومتعاطفة معاها بس هو معذور اوي وباين كده ان ايمان ونسرين عارفين الموضوع امووووووووت وافهم ايه الحكاية بالظبط

    hadil gasser

    ردحذف
  29. حلوة اوي وزودتيها تشويق يا دندون

    ردحذف
  30. وبعدين بقى فى التشويق ده ...كل ما اقول مش حدخل اقرا الحلقه لحد ما تخلص اقراها مره واحه مقدرش:) تسلم ايدك دندونه♥♥

    بسكوتاااا

    ردحذف
  31. حلوة جدا بس قصيرة جدا هاموت واعرف بقيتها ارجوكى نزلى الحلقة الرابعة اطول شوية فى الاحداث ولكى كل الحب

    ردحذف
  32. حلوه جدا ماشاء الله يا ريت الحلقه الرابعه قريب

    ردحذف
  33. شكل السر مش هيبان الا اخر حلقه

    ردحذف
  34. فارس دة غبى اصلا ومتخلف اووووووى ايه دة

    ردحذف
  35. ياريت يا دندن تطولي الحلقة شوية
    انا للاسف متابعاكي من فترة قصيرة
    واتعودت اني اقرأ القصة كلها مرة واحدة

    ردحذف
  36. حلوة اووووووووووووووى حاسة ان قلبى مفطور عليها و حساها مظلومة

    ردحذف
  37. انا نفسى حمزه بقى يتدخل ف القصة حسه ان هاتيجى احاث كتيرة واحداث غامضة معاه
    وبرضة حسة انهم ها يتجوزوا وان حمزة هتعاطف معاها لانة كان بيحبها بجد وحاسة ان هى برضة كان عندها مشاعر تجاهة بس العلاقة اللى عملتها ف الاول مش معاه!!!؟
    مش عارفة كلة ازاى هييجى مع بعضة
    وبجد تسلم ايدك

    ردحذف
  38. روووووووووووووووووعة بجدتسلم ايدك يا دودو
    بجد القصة تحفة اووووووووووووى
    ربنا معاكى يارب

    amira slama

    ردحذف
  39. جميييييييييله يا دودو الحلقه جامده ومستنيين نعرف مايا ايه الي حصل فيها وياريت حمزة يتدخل والموضوع يتحل وتسلم ايدك

    ردحذف
  40. تحفه بس ياريت متتاخريش في الحلقه اللي جايه

    ردحذف
  41. حلوه اوى بس انا
    هموت واعارف مين اللى عمل كده فيها وهى مش بتتكلم ليه


    ردحذف
  42. تسلم ايدك يا دودو
    بس فين حمزه؟؟؟؟؟

    ردحذف
  43. بليييز ممكن تحكي الناا كم حلقه القصة وامتى بتنزليها مواعيدها يعني !!

    ردحذف
  44. توفيق ده منرفزني هو وابنو طيب مش يفهمو من مايا الموضوع الاول ولا هو تخلف وخلاص

    ردحذف
  45. انا قلبى وجعنى بجد اكيد مظلومه بس احسن عشان لما الحقيقه تتعرف فارس يندم ندم عمره يستاهل :/

    ردحذف
  46. فارس معذور في تصرفاته لان ارث الجاهلية عن الشرف
    هو مادفعة لفعل ذلك

    ردحذف

قول رأيك بلاش تقرا وتقفل من سكات...ارائكم تهمنى