الأحد، 7 أبريل، 2013

بقينا عيلة... الحلقة 30

الحلقة 30
دخلت شذى اوضتها... حطت علبة الشبكة على الكومودينو
"اتفرجى ياماما وقوليلى ايه رأيك"
مديحة قاعدة بتبص لها
"مالك ياماما"
وضحكت شذى لما افتكرت كلام كريم
"انتى صحيح جاية تحرسينى"
"بتضحكى على ايه...الحمدلله ان كلها يوم ويتكتب الكتاب"
"انتى بتتكلمى بجد...انتى مش واثقة فينا...مااحنا كنا قاعدين مع بعض عادى"
"الكلام ده قبل ما اعرف انكم بتحبوا بعض...احنا سافرنا وكل واحد فيكم كان مرتبط بحد تانى...انا لسه مش مستوعبة السرعة دى"
"ياماما الحب مش بالوقت... ووجودنا مع بعض خلانا عارفين بعض اوى كأننا نعرف بعض من زمان...ماما احنا مفرحناش من زمان...الله يخليكى خلينا نفرح من غير خوف"
"انا فرحانة لك اوى يا شذى بس انا ام ولازم اخاف عليكى...مش بايدى بكرة لما تخلفى هتعرفى ان غصب عنى خوفى عليكى"
                          ******************

تانى يوم الصبح...كلهم قاعدين ع الفطار ماعدا ضحى اللى راحت المدرسة
ابراهيم"كريم انت رايح الصيدلية النهاردة"
كريم"ان شاءالله"
ابراهيم"مش عايزين تروحوا تشوفوا الشقة"
كريم بيبص لشذى
شذى"اى وقت بس علشان كريم يتابع الصيدلية كفاية ان امبارح مراحش خالص"
ابراهيم"وانتى يا مديحة مش عايزة تروحى تشترى حاجات لكتب الكتاب"
مديحة"اه شوية كده هنزل وشذى هتقعد معاك علشان لو احتاجت حاجة"
ابراهيم"لا انا عندى فكرة تانية...احنا ننزل كلنا...كريم يودينى اقعد شوية ف الصيدلية وخدهم فرجهم ع الشقة واشتروا اللى ناقصكم"
كريم بفرحة"حاضر يابابا"
شذى"وضحى ...بتيجى الساعة 2"
مديحة"نبقى نيجى على معادها ولو لسه مخلناش نقابلها ناخدها معانا ونكمل مشاويرنا"
قطع كلامهم صوت موبايل مديحة
قامت مديحة ترد... رجعت متوترة  وهى بتقولهم
"ده خالد"
ارتبكت شذى من سيرة خالد... بصت لكريم
كريم اول ماسمع اسم خالد قام لمديحة
"هاتيه"
ابراهيم"استنى ياكريم... متتكلمش انت"
مديحة"تلاقيه عايز يعرف الرد"
سكت الاتصال... وكريم بيكمل كلامه
"رد ايه...انا هقوله ميتصلش هنا تانى"
ابراهيم"لا ياكريم...هو مغلطش ف حاجة"
اتكرر الاتصال
ابراهيم"ردى يامديحة وقوليله مفيش نصيب وخلاص... لو زود بقى ابقى اديهولى انا اكلمه"
مديحة قبل ما ترد"حاضر"
وردت"الو..اهلا ياخالد ازيك... الحمدلله ...مفيش نصيب ياخالد ..لا من غير اى شروط ولا طلبات هو النصيب وقف لحد هنا... ربنا يرزقك ببنت الحلال... مع السلامة"
قفلت مديحة مع خالد... قام ابراهيم
"انا داخل ألبس...ساعدينى يا مديحة لو سمحتى"
دخلت وراه علشان يلبسوا
شذى قامت تلم الفطار... وكريم قام يساعدها
وهما ف المطبخ لاحظت ان كريم ساكت ومتغير من بعد المكالمة
"كريم... انت اتضايقت"
"ايوه"
"انا عملت ايه يضايقك"
"انتى معملتيش... بس مجرد اتصاله ضايقنى... غصب عنى بحبك وبغير عليكى"
                       ******************

دعاء قاعدة ف اوضتها...مامتها بتدخل عليها بصينية اكل
"دودو...حبيبتى قومى كلى"
"مشى عايزة حاجة ياماما"
"هتفضلى كده ف السرير ...علشان مين يعنى"
"علشان حاسة انى اتهانت"
"ماعاش ولا كان اللى يهينك... يا حبيبتى انتى متقلليش من نفسك وتزعلى عليه"
"وكرامتى"
"مالها"
"ضاعت ...هو اللى سابنى"
"معلش"
"انا عايزة اردهاله"
"لو مكنش استقال كنت خليت باباكى وصى على رفده"
"يعنى ايه...كده خلاص مش هشفى غليلى"
"اللى يشفى غليلك انك تقومى وتبقى كويسة ويعرف انك مش متأثرة ببعده...تعالى ننزل نشترى شوية حاجات جديدة ... ولا ايه رايك تسافرى مع بابا؟"
"لا مش عايزة اسافر... ايه رايك اخد حد من صحابى بتوع النادى واعمل انى رايحة اشترى حاجة من الصيدلية واقوله انى هتخطب قريب واغيظه"
"اللى يريحك يا حبيبتى...لو هتبقى مبسوطة اعملى اللى يريحك...بس انتى مش هتروحى الشغل تانى ولا ايه؟"
"لا مش رايحة... انا كنت بروح علشانه"
                  ******************

فى بيت ابراهيم ومديحة
واسرة ماجدة وجليلة وزياد موجودين
وكريم وشذى قاعدين جنب بعض وايديهم ف ايد بعض
قاموا الموجودين يسلموا على العروسين بعد كتب الكتاب
وبدأوا يمشوا ...لحد ما البيت فضى عليهم

ابراهيم"مبروك ياولاد... ربنا يسعدكم"
سلم عليهم واخدهم ف حضنه الاتنين
"بص ياكريم...شذى بنتى يعنى لو زعلتها هزعلك"
مديحة سمعت ابراهيم جت بسرعة
"نعم نعم...وهى تقدر تزعل ابنى؟"
كريم بيضحك"اطمن يابابا... شذى ف عنيا"
شذى"اطمنى ياماما...مقدرش ازعل كريم ابدا"
ابراهيم وهو قايم
"يالا تصبحوا على خير...انا داخل انام"
قعد كريم وشذى...ودخلت ضحى تنام
مديحة"انا مش قادرة ...مش هتناموا"
بص كريم لشذى بحب
"هنقعد ف البلكونة شوية وبعدين ننام"
مديحة"تصبحوا على خير...تعالى يا شذى اما اقولك"
راحت شذى لمديحة...وشوشتها
"شذى... البلكونة بس..اوعى تدخلى اوضته عيب"
"حاضر ياماما"
"انتى مراته ع الورق بس يعنى كتب الكتاب زيه زى الخطوبة"
"ماما انتى مكنتيش كده ايه اللى حصل"
"الشيطان شاطر"
"مالوش مكان بيننا ان شاءالله"
"ربنا يكملك بعقلك يارب...ويتمملكم بخير"

دخلت مديحة اوضتها ورجعت شذى لكريم اللى سبقها ف البلكونة
كريم قاعد...قعدت شذى على الكرسى اللى جنبه
"اتأخرت عليك"
"اوى"
ضحكت شذى
"بَطل ياكريم"
شد الكرسى بتاعه... وبقى ملاصق لكرسى شذى
اتنهد وهو بيبص للسما...اخد ايديها ومسكها وهو مش بيبص لها
سابت ايدها ف ايده وهى بتبص له وبتضحك
"احمدك يارب انك رزقتنى بالزوجة الصالحة"
قرب ايدها من شفايفه وباسها
حست شذى ان قلبها هيقف
بص لها كريم وايديها على شفايفه...نزل ايدها وهو بيبص لها ف عينيها
"بحبك اوى يا شذى"
"يا حبيبى ربنا يخليك ليا... انا حاسة ان قلبى هيقف من كتر الدَق"
"الف سلامة على قلبك"
"الله يسلمك"
"شذى... انتى مش كنتى قلتيلى ان عمتك كويسة وبتحبكم... مش بتتصلى بيها ليه؟"
"لما ماما جت تتجوز خافت ان الكلام يوصل لعمى ويضايقنا ويطلب حضانتنا او على الاقل حضانة ضحى...ماما ساعتها جابت رقم تليفون تانى وشالت القديم وقطعنا كل الاتصال...بس هى كانت عارفة انى هتخطب لخالد"
اتضايق كريم
"متجيبيش سيرته يا شذى"
"اسفة مقصدتش اضايقك انا بحكيلك بس"
"كنتى بتحبيه"
"مين اللى بيجيب سيرته؟"
"خلاص متزعليش"
"انا مقدرش ازعل منك انا بس مش عايزاك انت تزعل"
"انتى فرحتى ازاى ازعل منك"
"كريم...الوقت اتأخر واحنا تعبنا النهاردة قوم نام علشان تقوم فايق بكرة ان شاءالله"
"حاضر... حضرى نفسك ان بكرة ممكن اتصل بيكى اى وقت نروح نقابل مهندس الديكور اللى هيعملنا الشقة"
"بكرة بكرة"
"اه"
"والجامعة؟"
"ضرورى يعنى"
"يعنى"
"بلاش كل يوم... لو ينفع يومين ف الاسبوع علشان ابقى اوديكى واجيبك"
"تودينى وتجيبنى ليه ياكريم... ماانا كنت بروح واجى لوحدى"
"قبل ماتبقى مراتى...انما دلوقتى مراتى حبيبتى متسافرش لوحدها"
سكتت شذى...سألها كريم
"اتضايقتى؟"
ردت شذى بابتسامة
"بالعكس... مفيش حد يتضايق لما يلاقى حبيبه بيحبه ويخاف عليه"
                    *******************

دعاء لابسة وخارجة من اوضتها
الام"ايوه كده وشك نوَر يادودو"
دعاء"بابا نزل ولا لسه"
الام"لسه..مكنش هينزل الا لما يسلم عليكى"
دعاء"هدخل اسلم عليه قبل ما انزل"
الام"انتى نازلة"
دعاء"اه رايحة النادى وهرجع بالليل ويمكن اتأخر"
الام"براحتك المهم تبقى مبسوطة"
                        ******************

كريم وشذى فى الشقة مع المهندس
بيتكلموا والمهندس بيقترح عليهم ديكورات جديدة تناسب المكان
كريم قبل ما يرد عليه يسألها عن رأيها
شذى فرحانة بكريم ومعاملته ليها
بعد ما خلصوا كلام
"وهتخلص امتى يا بشمهندس"
"يعنى الشغل مش كتير...يدوب اسبوعين تلاتة"
بعد ما خلصوا مع المهندس...نزلوا

وهما ف العربية
"عايزة الفرح فين يا شذى"
"اى مكان ... ولو حتى مش هنعمل فرح خالص هبقى مبسوطة"
"بس الفرح حلم كل البنات"
"انت فرحتى ياكريم ومش عايزة حاجة من الدنيا غير انك تفضل معايا ومتبعدش عنى"
"ده انا مش هاين عليا تغيبى عن عينى كام ساعة...على الله بس متزهقيش منى"
"مفيش حد يزهق من روحه"
"هتيجى معايا الصيدلية ونبقى نروح مع بعض...ايه رأيك"
شذى بفرحة انها هتفضل معاه
"ماشى"
                  *******************

دعاء قاعدة ف عربيتها...جنبها شاب وسيم وشيك
دعاء بتظبط شعرها ف مراية العربية... وبتزود الميك اب
"مابلاش بقى يادودو كبرى دماغك"
"اخص عليك ياحمادة...يعنى انت الوحيد اللى اختارته يخدمنى الخدمة دى تقولى اكبر دماغى"
"اصل عبط اوى انك تغيظيه والحركات دى"
"عايزة اغيظه وخلاص... هندخل انا وانت واعرفه عليك على انك خطيبى"
"بذمتك هيصدق"
"ماانا مش عايزاه يصدق...انا بس عايزاه يحس انى هضيع منه فيحاول يصالحنى"
نزلت دعاء ونزل الشاب اللى معاها...حطت ايدها ف ايده ودخلت الصيدلية

اول ما وقفت ع الباب...شافت كريم وشذى قاعدين جنب بعض
كريم على كرسى المكتب وشذى جنبه على كرسى تانى
اتفاجئت دعاء واتغاظت...مسكت نفسها ودخلت
"مساء الخير...ازيك ياكريم"
كريم وشذى كانوا بيتكلموا ومشافوش دعاء غير بعد ما اتكلمت
انتبه كريم على صوتها... وانتبهت شذى
الاتنين متفاجئين بوجودها ومستغربينه

دعاء"انا كنت قريبة وقلت اعدى عليك اعزمك... ما احنا مهما كان زملا وعشرة"
كريم بيحاول يلاقى كلام مناسب
"اه طبعا... اهلا وسهلا"
دعاء"محمد..خطيبى...او يعنى هنتخطب قريب"
كريم بفرحة
"بجد...مبروك ربنا يسعدكم"
محمد بيبتسم من غير كلام وعايز الموقف يخلص بسرعة
كريم بيكمل كلامه
"والله يادعاء انا بتمنالك الخير... انا وشذى برضه هنتجوز قريب"
وقفت دعاء لحظات مشلولة التفكير والكلام من المفاجئة
حاولت تتكلم... قالت بسرعة
"مبروك"
وخرجت ووراها محمد

اول ما دخلت العربية قعدت تعيط وتخبط وترزع
"اهدى يادعاء...مكنش المفروض نيجى"
"شفت منظرها ...يسيبنى انا علشان دى"
"معلش ...انزلى وهسوق انا اروحك"
زعقت له
"تروحنى ايه ...عيلة صغيرة قدامك"
"معلش اهدى بس علشان تعرفى تسوقى"
دعاء وهى بتسوق بسرعة
"والله لاوريهم... زى ما كسر قلبى هكسر قلبهم...قال يتجوزوا قال...على جثتى"



هناك 32 تعليقًا:

  1. رااااااااااااااائعه

    ردحذف
  2. حلوووووووووووووووه او يا دودو بس البت دعاء دى مفيش موصيبه تشلها الهى ربنا يحرقها دى زباله

    ردحذف
  3. جامده بجد

    ردحذف
  4. ربنا يستر من الشيطانه دعاء

    ردحذف
  5. تحفة يا دودو وبصراحة انا فرحانة في دعاء عشان اتغاظت بس يارب تسيبهم في حالهم بقى متجيش يوم الفرح وتخرب كل حاجة

    hadil gasser

    ردحذف
  6. حلووووة اووووووى بجد

    ردحذف
  7. البت دي رخمه اوي اعوزو بالله
    بس حلقه جميله واحداثها حلوه
    بالتوفيق
    موجا

    ردحذف
  8. شكلة هيبقى على جثتها بجد :D :D

    salma ~

    ردحذف
  9. ده الى انا خايفه منه شكلها حتقلب كحلى يارب البت دعاء دى تتخطف
    MEMo

    ردحذف
  10. ايه البت دى بجد مريضة وحيوانة ربنا ياخدها الحلقة تحفة يا دودو

    ردحذف
    الردود
    1. L2aaaa el7l2a so8ayra awy w mafeha4 a7das 5als :( :(

      حذف
  11. ايه الجمال ده انا حاسس اني عايز 5 كيلو جبس علشان وشي اللي فلق من كتر الضحك والابتسامه الجميله اللي رسمتيها علي مخيلتنا وخدودنا بجد الاحداث جميله وسعيده
    واعتقد دعاء كده حادثه ان شاء الله بس ماتنسيش تنزلي محمد اللي مالوش ذنب علشان مايحصلوش حاجه معاها . ^_^

    ردحذف
  12. أول مرة ادخل اقرأ بصراحة ... بس جميلة فعلاً .... بالتوفيق

    ردحذف
  13. الهي يحلبوها مع جموسه هبله

    ردحذف
  14. راااااااااااااااائعــــــــــــه تسلم ايدك

    ردحذف
  15. حلوة اوى الحلقة بس برضه دعاء قلقانى

    ردحذف
  16. حلوه اوي بس لو دعاء دي جرالها حاجة ياريت كريم ميحسش بالذنب عشان هيا اللي رخمة

    ردحذف
  17. اااااااه ربنا يستر
    شرانيه اوي وانانيه البت دعاء دي

    ردحذف
  18. حلوة جداااااااا انتي اساسا رائع وقصصك جامده ربنا يحميكي

    ردحذف
  19. تحفففففففففففففففففة جدااااااااااااااااا

    ردحذف
  20. بقالنا حلقتين فرحانين ومبسوطين ربنا يستر ويعديها على خير هو طبعا أكيد دعاء مش هتعديها على خير وهتعمل أى مشكلة بس ربنا يستر ونضحك فى النهاية ومتقلبش غم أحسن والله هعيط

    ردحذف
  21. جـــــــــــــــامــــــــــده جدا بس ربنا يستر من دعاء يارب تموت قبل ما تعمل اللي في راسها دي

    ردحذف
  22. رووووووووووووووووووووووووووووووووووووووووووعة بجدد يا دودو
    تسلم ايدك
    والحلقة جميلة اوى بجد

    amira slama

    ردحذف
  23. Wo0o0o0o0o0oooooooooooooo00000000000ow
    حلوة اوي كملي النهاية سعيدة وخلي البت دعاء دي تروح تتلهي ف اي حتة جتها نيلة على قرفها

    ردحذف
  24. الحلقة رووووووووووووووووووووووووووووعة بس البت اللى اسمها دعاء دى مش تعمل حادثة بالعربية و نرتاح منها بقى اصل انا قلقانة منها

    ردحذف
  25. ميرسى يا دندونةياعسل جمدة جدى انا لحد دلوقتى مبسوطة
    انا مبقدرش اقراها اول ماتنزل عشان بنام عشان المدرسة
    طبعا ثانويى عامة الامتحانات على الابواب
    لو حصل جاجة اواتفرقوا معرفش اذاكر ولاامتحن علشان خاطرى
    الحلقة الجاية دعاء يجرلها حاجة بس طالما الحب الحقيقي
    يبائه مهما حصل هايفضل الحب موجد
    معلش طولت عليكم
    من ايمى الا معجبة بدينا كتيرررررررررررررررر

    ردحذف
  26. جميله بجد برافووووووووووووووووو

    ردحذف
  27. جمييييييييييييييييله جدا جدا

    ردحذف
  28. اي داا بقاا دعاء الغبيه جى ناويه ع اييه :@@

    ردحذف
  29. انتي بجد هايلة يا دينا بس نفسي أسألك سؤال كتاباتك رائعة لية ما كتبتيش الحلقات دية كسناريو تفصيلي وقدمتية لشركة أنتاج بجد هيرحبة بكاتبة رائعة زيك على فكرة أنا بكتب أفلام وبحاول أكتب مسلسلات ربنا يوفقق بجد أنتي رائعه

    ردحذف
  30. قلقتيني من كلمة ع جثتي . هايحصلهاا حاجة?

    ردحذف

قول رأيك بلاش تقرا وتقفل من سكات...ارائكم تهمنى