الاثنين، 8 أبريل، 2013

بقينا عيلة... الحلقة 31

الحلقة 31
قعد كريم بعد ما خرجت دعاء
شذى مازالت ف مكانها مش مستوعبة المفاجأة
اتضايقت من وجود دعاء وغصب عنها بان عليها
"الحمدلله انها هترتبط علشان مبقاش حاسس بالذنب ناحيتها"
شذى ببرود
"تحس بالذنب ليه"
"يعنى ...الحمدلله وخلاص"
"كنت بتحبها بجد يا كريم"
"محبتش حد غيرك"
"قولى الحقيقة ومش هزعل"
"هى دى الحقيقة...بعد ما حبيتك عرفت ان احساسى ناحية دعاء مكنش حب"
"كان ايه؟"
"وهم انه حب"
"وانت فعلا حاسس بالذنب"
"انا فسخت الخطوبة وانا مقتنع انى صح...متمسكيش على كلمة عادية يا شذى"
"طيب"
سكتت شذى...وسكت كريم
توتر داخلى عند شذى انعكس على تعبيرات وشها
"كنا قاعدين كويسين ايه اللى حصلك فجأة"
"افتكرت اخر مرة شفتها فيها"
كريم بيحاول يفتكر اخر مرة شذى شافت فيها دعاء
كملت شذى سرعة
"كانت ف حضنك"
اتضايق كريم
"شذى...انتى عارفة اللى حصل يومها وانا حكيت لك انى اتفاجئت"
"ماشى"
"ماشى ايه...مش مصدقانى؟"
"مصدقاك"
"وبتتكلمى كده ليه"
"علشان وجودها ضايقنى يا كريم...نظراتها ليك وليا بتقول انها كذابة ولا اتخطبت ولا حاجة وخصوصا انها جريت بعد ماقلتلها اننا هنتجوز"
"حتى لو كل كلامك ده صح... انا بحب مين ومين مراتى"
ضحكت شذى
"انا"
"يبقى خلاص... متخليش اى حاجة ف الدنيا تضايقنا ولا تزعلنا... بدل احنا مع بعض خلاص...صح"
شذى بفرحة واقتناع
"صح"
                       *******************

دعاء داخلة البيت وهى بتعيط
مامتها شافتها
"مالك يادعاء"
دخلت على اوضتها ومامتها وراها
"فى ايه؟"
دعاء بتصرخ
"هيتجوز الفلاحة ياماما...كان معايا حق...سابنى انا علشانها"
"يابنتى انا ما صدقت انك قمتى ونزلتى... سيبك منهم يشبعوا ببعض"
"يعنى واحدة زى دى تاخده منى واقعد اتفرج"
"هو راح لها بمزاجه... يولعوا وانتى متحرقيش دمك"
"همووووووووت م الغيظ يامامااااااا"
                    *********************

شذى لابسة وخارجة م الاوضة ...قابلت كريم ع الباب
"جاهزة"
"اه"
"هنزل اسخن العربية وابقى حصلينى"
"كريم ...هتزهق انا هحضر المحاضرات وانت هتفضل قاعد تستنانى"
"متقلقيش معايا اللى يسلينى"
"مين"
"زياد"
"هو جاى معانا"
"اه... لما عرف اننا رايحين الجامعة النهاردة شبط فيا"
"شيماء مقالتليش يعنى"
"هو مقالهاش... هيعملها لها مفاجئة"
"يامفاجآتكم... بصراحة المرة اللى فاتت لما جتلى مفاجأة فرحت اوى"
"مش قلتلك ان كل اللى جاى هيبقى افراح وسعادة"
جت مديحة من المطبخ
"هتتأخروا"
شذى"هخلص على 4 ان شاءالله ونيجى على طول ... مش كده ياكريم"
كريم"اه ان شاءالله مسافة السكة...هسبقك على تحت"
                       *******************

دعاء فى اوضتها ع السرير وعينيها معيطة
"ماشى يا كريم...والله لاوريك"
واتصلت من الموبايل
"الو.. حمادة عايزاك ف خدمة"
"ايه تانى؟"
"عايزة اعمل اى حاجة علشان كريم ميتجوزش البت دى"
"جايالى انا اعمل كده"
"ما انا قلتلك انت اكتر واحد عارفة انه ممكن يساعدنى"
"وعايزانى اعمل ايه"
"فكر معايا"
"اخطفها مثلا ولا اقتلها"
"حاسة انك بتتريق"
"اه طبعا بتريق...انتى فاكرانى مجرم يادعاء... فكك بقى من حوار كريم ده"
"يعنى الحشرة دى تنتصر عليا"
"انتوا ف حرب"
"ايوه"
"يبقى شوفى حد غيرى متدخلنيش ف الحكايات دى"
"تصدق انت مستاهلش تبقى صاحبى ولا انى اعبرك تانى...اقفل واوعى تكلمنى"
قفل التليفون قبل ماتكمل كلامها... وده غاظها اكتر وقعدت تتكلم وهى بتبص للموبايل كأنه سامعها
"وانا يعنى مش هعرف اتصرف لوحدى... طب هنتقم منهم ومن غير عيل سيس زيك"
                          ****************

زياد داخل البيت ... ملقاش جليلة
راح خبط على ماجدة
"اهلا يا زياد اتفضل"
"ازيك يا طنط...ماما عندكم"
صوت جليلة
"جاية لك اهو يازياد"

سبقها زياد على بيتهم وحصلته
اول ما دخلت
"ماما تعالى عايزك"
"خير يا زياد"
قعدت جليلة وزياد بدأ الكلام
"انا جاى من عند شيماء ف الكلية"
"ما انا عارفة...فى ايه"
"هنروح لهم امتى"
"زى ما تحب...مالك"
"قلقتنى... بتقول انها خايفة مامتها ترفض علشان هتعيش هنا"
"وترفض ليه"
"اصلها البنت الوحيدة على صبيان"
"لو هى عايزاك هتقدر تقنع مامتها"
"مش عارف"
"سيبها على الله كل واحد بياخد نصيبه"
"هى سألتنى تعمل ايه وتكلم مامتها امتى قلتلها تستنى لما اسألك... اصل انا مش عارف المفروض هى اللى تقولها ولا انتى تكلميها ولا ايه"
"هى ومامتها قريبين من بعض زى شذى ومديحة كده"
"لا بتخاف من مامتها علشان شديدة عليها ومعندهمش حاجة اسمها البنت ممكن تحب ولا تختار عريسها بارادتها"
"طب استنى لما اتكلم مع مديحة واشوف لو تعرفها تكلمها وتبقى هى الوسيط"
"اه يعرفوا بعض"
"طيب خلاص كان مديحة هى اللى رشحتكم لبعض علشان مامتها متاخدش موقف م الاول...هى باباها عايش"
"اه عايش بس اخوها الكبير هو المسئول عنهم لان باباها راجل كبير ومريض"
"ان شاءالله خير ...متشيلش هم"
                      *******************

كريم وشذى واقفين قدام محل فساتين زفاف
شذى مبهورة بكل الفساتين المعروضة
"ايه اكتر واحد عجبك"
"كلهم يجننوا ياكريم"
"هههه نجيبهم كلهم"
"بتتريق عليا"
"لا والله انا عايز افرحك بس... بصى ايه رأيك ف ده"
"يجنن"
"تعالى نشوفه"
دخلوا المحل مع بعض
                      *********************

شذى وكريم داخلين البيت
كريم ماسك الفستان
جت مديحة استقبلتهم
"ايه ده"
كريم"اشترينا فستان الفرح"
مديحة"انت حجزت القاعة وجبت الفستان ولسه مجبناش العفش ولا فرشنا"
كريم"يا طنط العفش ييجى ف يومين والفرش هياخد قد ايه يعنى...العيلة كلها ستات ماشاءالله...لو روحتوا يوم هتخلصوا كل حاجة"
شذى"هات ياكريم اما اقيس الفستان واوريه لماما الفستان"
اخدته شذى من كريم ودخلت الاوضة
مديحة"هى الشقة هتخلص امتى"
كريم"اسبوع كمان ان شاءالله وتبقى جاهزة"
مديحة"ربنا يتمم بخير يارب"
صوت شذى"ماماااااااا"

دخلت مديحة لشذى...
"تعالى ياماما...مش عارفة ألبسه لوحدى"
ساعدتها مديحة وهى بتلبس
وقفت شذى بالفستان قدام مديحة
دمعت عيون مديحة
"الله يا شذى... جميل اوى ربنا يسعدكم يارب"
راحت شذى ع الباب...
"اوريه لعمو ابراهيم وضحى"
صرخت مديحة
"استنى متطلعيش"
"ليه"
"علشان كريم ميشوفكيش لابساه قبل يوم الفرح"
وقفت شذى ع الباب والتفتت لمديحة
"ليه... ماهو شافنى وانا بقيسه ف المحل"
قعدت مديحة على طرف السرير وحست بألم وخوف
"ليه كده يا شذى"
"فى ايه ياماما"
"مش كويس ان العريس يشوف الفستان ع العروسة قبل الفرح"
شذى بقلق بين التصديق وعدم التصديق
"ياماما متخافيش ده كلام تخاريف"
                    *******************

دعاء قاعدة مع مامتها وباباها
باباها بيديها شنطة سفر كبيرة
"حبيبة بابا كل اللى هنا ليكى"
"ميرسى يابابا"
قام الاب وقبل ما يقوم
"امال ابقى ابعتى اعلان للجرايد انى عايز ساعى"
"مش عم سيد جاب لك ابنه مكانه"
"لا طلع مسجل وعنده سَابقة سرقة ومشيته قبل ما اسافر"
"لا خلاص من بكرة هبعت الاعلان"
دعاء كانت متابعة كلامهم...اخدت شنطة الهدايا وقامت
                       ****************

دعاء داخلة منطقية شعبية بعربيتها... كل اللى ف المنطقة شكلهم مريب...سواء شباب واقفين او ستات ماشية
وقفت بعربيتها وسألت ست ماشية
"عم سيد داود ساكن هنا لو سمحتى"
"اه...انزلى وادخلى الحارة دى هتلاقى بيته تانى بيت هتلاقى الاوضة على يمين السلم"
ركنت دعاء عربيتها... شافت عيال صغيرة جروا يقعدوا على العربية تجاهلتهم
مشيت على الوصف لحد بيت سيد

الباب مفتوح...خبطت ع الباب وهى بتبص جوه
شافت سيد قاعد ع الارض وقدامه شيشة بيشربها
اول ما شافها
"اهلا يا دكتورة... اتفضلى"
دخلت دعاء... سيد بينفض كنبة موجودة علشان دعاء تقعد
"ازيك ياعم سيد"
"الحمدلله يا دكتورة وازاى البيه"
"الحمدلله"
ونادى على مراته ...وكانت قاعدة بره ف الحارة
"يا ام زكريااااااا"
جت مراته مستغربة الضيفة
"شاى للست الدكتورة"
دعاء بقرف
"لالالا شكرا... انا كنت عرفت ان ابنك اشتغل عند بابا كام يوم ومشى... انا جايباله شغل"
سيد بفرحة"الله يكرمك يارب...فين الشغل ده"
دعاء وهى بتبص على الاوضة اللى جايبة اخرها ومقسومة بملاية
"هو مش موجود"
"لا زى ما انتى شايفة مفيش حد غيرى انا وام العيال"
قامت دعاء وقفت
"معاه تليفون؟"
"اه"
"هات رقمه"


انتظروااااا الحلقة الاخيرة

هناك 52 تعليقًا:

  1. يخرب بيتك يا دعاء ,,, دة اية دة بس بالله عليكي يا دينا بلاش تنهيها نهاية حزينه وياريت دعاء دة تتسجن

    ردحذف
  2. لاااااااااااااااااااااا اوعي تموتيهم يا دينا بالله عليكي

    ردحذف
  3. ربنا يستر ويعديها على خير

    ردحذف
  4. تحفة يادودو ......بس بنت التيت دى هتعمل ايه ماتجيش مصيبة تاخدها ونخلص

    ردحذف
  5. eh da ba2a rabena ya5odha bet mo2refa

    ردحذف
  6. جميله اوى بس ياترى دعاءناويه على ايه يارب صبرنى عليها لانها شخصيه مستفزه جدا

    ردحذف
  7. ربنا يخلصنا من دعاء دي بس الحلقه جميله

    ردحذف
  8. ايـــــــــــــــــــــــــوه بقـــــــــــــــــى

    ربنا يسترررررررررررررررررررررررررررررررررر و كريم و شذى تتم فرحتهم يااااااااااااااااااااااااااااااااااااااااااارب :)


    aYa

    ردحذف
  9. الحلقه ابداع ورائعه بس يارب الصبر من عندك على الست دعاء دي

    ردحذف
  10. An ya feet do3aa2ttsgn w aktby el 7l2a mn dlw2ty 3shan tnzl enha bokraaaa bsor3aaa bgd el kss Gamdaa aweeeeeeeeeeeeeee ^_^ ana b3sh2haa =)) rbna m3akyy
    Ana b3ml kol mara el comment bta3y fel 7l2a el a5era 3shan btkon kol el 7l2aat Nzlt bs el mrady lsa a :'(((
    Norhan

    ردحذف
  11. مش تقولى ان حد فيهم هيموت بجد القصة جميلة وكدا النهاية هتبقى مش حلوة انا مش بحب المسلسلات اللى البطل بيموت فيها فى الاخر

    ردحذف
  12. جميله اوي يا دودو تسلم ايدك انا زعلت اوي لما عرفت ان الحلقه الاخيره اللي جايه كان نفسي تبقي اطول من كده

    ردحذف
  13. جامده اويييييييي
    ممتازه بصراحه يا دينا :)
    و مستنيه اخر حلقه

    ردحذف
  14. هاااااااااااااااااارسود ايه اللي هيحصل وحكاية الفستان ديه قلقتني انا كمان ربنا يستر
    hadil gasser

    ردحذف
  15. روووووووووووووووووعه ومستنييييييين الحلقه الاخيره :D
    بس بلاش نهايه حزينه الله يخليكي :)

    ردحذف
  16. ربنا ينتقم منك يادعاء
    ويستر ع كريم وشذي ان شاء الله
    انا عاوزه النهايه الشر دي تتقلب ع دعاء دي كرهتني ف الاسم
    موجا

    ردحذف
  17. اوباااااااااااااااااااااااااااااااااااااااااا انا كدة بدأت اقلق بجد
    حاسة ان هيحصل حاجة ربنا يسترها
    تسلم ايدك يا قلبى

    amira slama

    ردحذف
  18. رووعة اووي بقى جامدة :)
    بلااااش تموتيهم يا دينا بلاش ارجووكي :'(

    ردحذف
  19. ايه ده ناااااوية على ايه البت دى دودووو بلييييييز عايزين نهاية حلوووووووة

    ردحذف
  20. بس الحلفة جاااااااااامدة جدا

    ردحذف
  21. مش عارفه ليه حاسه ان القصه دي هتنتهي نهايه مأساويه
    او هتعملي حاجه و تسيبيلنا النهايه مفتوحه يا دودو
    بس برضه البت دعاء دي مش لاقيه حد يلمها ولا ايه

    توتا

    ردحذف
  22. حلوة اوى الحلقة تسلم ايديكى
    بس مش مرتاحة لدعاء ربنا يستر

    ردحذف
  23. يخربيتك يا دعاء ايه دة يا دينا خلصينا بقبى من الشخصية الزبالة دى

    ردحذف
  24. دينا انتى بدأتي بدايه زي الفل والنبي اللي نفسنا كلنا نزوره كمليها ع خير وخليهم يتجوزو هحس بقهره لو حصلهم حاجه وتسلم ايدك مبدعه دايما

    ردحذف
  25. دينا خلى كريم وشذى يفرحوا خلى الفرحه تكمل وتدخل قلوبهم من غير قلق وﻻ خوف خلى الحب أللى جواهم يكمل من غير أى فراق كفاية علينا القصص الواقعيه أللى بنسمع فيها بالفراق فيه أكيد مننا جرب الفراق ونفسه يسمع نهاية سعيده يمكن ترجعله الأمل من تانى ويعرف ان فيه سعاده ممكن تكتمل وأن الحب موجود وممكن يكمل

    ردحذف
  26. لالالالالالالالالا بجد حرام عليكى انا بقيت مدمنة قصصك مش معقول كده انتى فظيعة بجد ومبدعة فعلا

    ردحذف
  27. نهايه حلوة يا دودو الله يخليكي

    ردحذف
  28. علشان خاطرى خلى النهايه سعيده حرام فرحه كريم وشذى تضيع

    ردحذف
  29. رووووووووووووووووووووووووووووووعه بس يارب تكون الأخيره مفرحه وبطلب منك قصص جديده تكون رومانسيه

    ردحذف
  30. رووووووووووووووووووعه ربنا يستر على كريم وشذي يكونوا بخير وعايزين نعرف زياد وشيماء مسيرهم هيبقى إي

    ردحذف
  31. ناويه على ايه البنت دي ربنا يستر

    ردحذف
  32. من حفر حفرة ﻻخيه وقع فيها .....اكيد دعاد هتموت

    ردحذف
  33. تحفه كالعاده يا دندونه بس ياخوفى فرحه كريم وشذى متكملش ربنا يستر يااارب

    ردحذف
  34. الحلقة جميلة جدااااااااااااا زى عادتك يا دندن بس و النبى بلاش النهايات الحزينة و يا رب تدخل السجن دعاء دى ربنا يهدها

    ردحذف
  35. يا ريت الحلقة الاخيره بسرعة

    ردحذف
  36. الحقلة جميلة ومتخافوناش يادندن

    ردحذف
  37. جامده جدا بس والنبي يا دينا بلاش تخلي اخرتها حزينة موتي دعاءومتخليش شذى تتاذى بلييييييييييز

    ردحذف
  38. اوعى تكون دعاء هتعمل حاجة فى شذى ...شذى طيبة و متستاهلش حاجة وحشة

    ردحذف
  39. الحلقه جامده اوووي بس بالله مش تنهيها بحزن لان القصه جميله جدا ....... تسلم الايادي يا دودو <3

    ردحذف
  40. روووووووووووووووووووووووعة

    ردحذف
  41. جمييييييييييييييييييلة بس انا قلقانة خليها سعيدة بقى يا دوندون الله يخليكي ماتخليش دعاء الحولة دي تعمل حاكة ابتا ابتا :)

    ردحذف
  42. ♥دينا عماد♥9 أبريل، 2013 9:13 م

    دا ابليس بيتعلم من دعاء وتصرفاتها دى غبيه ومستفزه

    ردحذف
  43. جميله بس فين الحلقه الاخيره :(

    ردحذف
  44. الحلقة امتى يا دينا بقى

    ردحذف
  45. مش المفروض الحلقه الاخيره انهارده؟

    ردحذف
  46. دودووووووو ميعاد الحلقة امتى بقى مش تسيبينى مستنيين كده كتير بقى

    ردحذف
  47. جميله اوى القصه كالعاده طبعا بس اكيد شذى و كريم مش هيسيبو بعض لو دعاء عملت اى حاجه

    ردحذف
  48. ربنا يستر الحلقه جااااااااااااااااامده موووووووووووووت

    ردحذف
  49. Laaa Kareem Shakloo hygraloo 7aga 7raaaaaaaaaaaam :((((((((

    ردحذف
  50. اووووووووووف بقى الله ياخدك

    ردحذف
  51. لالالالالالا مش قادره اكمل الاخيره مش عيزاها تكون حزيييييييييييينه بئى

    ردحذف
  52. الصبررررررررررر

    ردحذف

قول رأيك بلاش تقرا وتقفل من سكات...ارائكم تهمنى