الأربعاء، 17 أبريل 2013

ليست عذراء... الحلقة 4

الحلقة 4
ايمان بتفتح شقتها... بتدخل وهى ماسكة مايا
"تقعدى ف اوضتى ولا اوضة نسرين..تعالى ف اوضتى احسن"
مايا مستسلمة وماشية معاها

دخلوا اوضة... قعدتها على السرير
"نامى وارتاحى يا مايا"
مايا بتبص لايمان وتعيط
"متعيطيش... انا مش هلومك دلوقتى بس ده ميمنعش انى مش زعلانة منك... غلطتى يا مايا وغلطتك كبيرة اوى... وياخوفى يكون كلامهم صح ويكون حمزة"
يزيد عياط مايا ... عياط بحرقة
وتفتكر حمزة

                     فلاش باك
مايا قاعدة ع السلم لوحدها"12 سنة"
باب البيت مقفول... بتفتحه نسرين
بتقوم مايا تجرى عليها
"عملتى ايه ف الامتحان"
"الحمدلله...بدأنا الاجازة يامايا وخلاص مفيش مذاكرة"
"انا اول واحدة اخدت الاجازة بس محسيتش بيها علشان مخلصتوش"
"انتى قاعدة لوحدك كده ليه"
"نينة مش عايزانى اطلع العب بره...بتقولى عيب"
"ما احنا كبرنا يا مايا ومعدش ينفع نلعب بره"
"ماحمزة وفارس بيلعبوا وهما كبار"
"ماما وبابا قالوا البنات عيب تلعب ف الشارع"
"وبعدين هنعمل ايه ف الاجازة... حمزة وفارس هيلعبوا مع اصحابهم واحنا لأ"
"تعالى اطلعى اقعدى معايا ف البيت"
                   *********************

مايا ونسرين داخلين البيت
نسرين"مامااااااااا"
ايمان جاية من المطبخ
"ايه يانسرين عملتى ايه"
"الحمدلله كان سهل...هدخل انا ومايا نقعد جوه "
دخلوا اوضة نسرين... غيرت نسرين هدومها
"تيجى نتفرج ع التليفزيون ولا نفتح الكاسيت"
"عندك اغانى حلوة"
"عندى... تيجى نرقص"
"ياريت"
فتحت نسرين الكاسيت... ومسكت فرشاة الشعر عملتها مايك.. وعلت الصوت
"ويااااترى يا حبيبى ...ياترى
قريب ولااااا بعيييييد ولااااااا"
واندمجوا البنتين مع صوت بهاء سلطان وهما بيغنوا ويرقصوا

اتفتح الباب عليهم فجأة
"ايه الدوشة اللى انتوا عاملينها دى"
نسرين"ايه ياحمزة بنغنى"
حمزة بيقفل الكاسيت
نسرين"ايه الغتاتة دى"
حمزة"بذاكر يا نسرين...ازيك يامايا"
نسرين وهى خارجة من الاوضة
"ياماماااااااااا.. تعالى شوفى حمزة"
حمزة"معلش يامايا...انا عايز اذاكر والصوت شتتنى"
مايا"طيب...هاخد نسرين وننزل"
حمزة"انتى مسافرة امتى"
مايا"لما بابا ييجى هسافر معاه"
حمزة"بتحبى هنا اكتر ولا لندن"
مايا"هنا اكتر... هناك ببقى لوحدى مع بابا او ماما بس ببقى عايزة ارجع اقعد معاكم"
جت ايمان
"مزعل اختك ليه"
"مش عارف اذاكر"
نسرين"واحنا عايزين نرقص...هو لا يبقى لعب ف الشارع ولا نقعد براحتنا ف البيت"
ايمان بتفكر"ما تطلع تذاكر مع فارس"
حمزة"هو علمى وانا ادبى... وهو بيذاكر بطريقة وانا بطريقة"
ايمان ساكتة
"خلاص يابنات... انزلوا دلوقتى وانا هتصرف"
                    *********************

نسرين مع باباها ومايا ف سطح البيت
مصطفى بيعمل تندة ... وايمان بتفرش سجادة قديمة
وبتحط كراسى وترابيزة
ايمان"ايه رأيكم بقى... تقعدوا هنا براحتكم... تلعبوا ترقصوا تتنططوا براحتكم"
نسرين"فكرة حلوة اوى ياماما"
مصطفى وايمان بعد ما خلصوا نزلوا
ومسكت مايا ونسرين مجلات معاهم وقعدوا يتفرجوا
مايا"هو حمزة هيخلص امتى"
نسرين"هيخلص بكرة...وفارس هيخلص النهاردة"
"ما تيجى ننادى لحمزة يتفرج على القعدة الجديدة"
"طيب هنزل انادى لفارس وحمزة"

تنزل نسرين وتطلع ومعاها فارس وحمزة
يتفرجوا على مكانهم الجديد
حمزة كل ما يقوم ولا يقعد...مايا وراه
فارس كل ما ييجى يكلم مايا...يلاقيها منتبهه لحمزة بس
يزعل من اهتمامها الزايد بحمزة... وينزل يكمل مذاكرة
                      ***********************

مايا لابسة.... وقاعدة جنب نسرين وكل شوية تبص ع الساعة
فؤاد قاعد جنب الشنط المتحضرة مستنى العربية اللى هتوديهم المطار
مايا بهمس لنسرين"هو حمزة اتأخر كده ليه"
نسرين"بيجيب النتيجة...ربنا يستر"

يسمعوا صوت الباب الخارجى بيتفتح ويتقفل
تجرى مايا ع الباب تستقبل حمزة
تفوجئ انه فارس
"ماما فين...انا نجحت"
مايا"وحمزة فين؟"
فارس بكسرة خاطر
"معرفش...انا هروح افرح ماما زمانها قلقانة"
نسرين"مبروك يافارس"
فارس"الله يبارك فيكى ...مطلعتش من حد تانى"
مايا"معلش يافارس...مبروك...اصل خايفة حمزة يتأخر ومشوفوش قبل ما اسافر"
حمزة يوصل البيت... تنزل مايا السلم وتقابله ع الباب
"عملت ايه ياحمزة طمنى"
"الحمدلله"
"مبروك... انا مسافرة كمان شوية"
بص فارس عليهم...وعلى اهتمام مايا بحمزة وعدم اهتمامها بيه... حس ان وجوده مالوش لازمة... وطلع
                    *******************

بعد سنتين
نسرين وحمزة وفارس قاعدين ف السطح
فارس ونسرين بيلعبوا كوتشينة
فارس"مش عايز تيجى تلعب برضه"
حمزة"مش عايز"
نسرين"سيبه ياعم ده بقى نكدى"
حمزة"هى مايا بتتأخر عند مامتها كتير كده ليه...كانت بتقعد اسبوع بقوا اتنين وتلاتة... مش كتير كده"
نسرين وهى بتلعب
"انت هتبص لها ف الكام يوم ف السنة اللى هتقعدهم مع مامتها... تلاقيها بتوحشها ياعينى"
حمزة"ماهى بتوحشنا احنا كمان"
نسرين وهى بتبص له وبعدين بتغمز لفارس
"مش ملاحظ ان حمزة بقى رقيق اوى"
فارس بيبتسم بمرارة وهو كل يوم بيتأكد من احساسه
ان حمزة بيحب مايا ومايا بتحبه
                         ******************

مايا راجعة من السفر مع فؤاد...ملهوفة على حمزة
بتوصل البيت... واول ما بتدخل عند جدتها وبتسلم عليها
"حمزة ونسرين وفارس فين؟"
"خرجوا"
"كده مش مستنيينى"
"ماهو انتم مقلتوش جايين امتى..دول هيتجننوا عليكى"
"هطلع اسلم على عماتى واستناهم فوق ف السطح"
                   ******************

مايا قاعدة ف السطح تستناهم... ملل وحنين واشتياق حاساه ناحيتهم كلهم... وبالاخص حمزة
يدخل حمزة اول واحد ويسلم عليها وهو بينهج
"حمدالله ع السلامة يامايا"
"الله يسلمك...مالك"
"مفيش اصل اول ما نينة قالت انك هنا طلعت السلم جرى...وحشتينى"
"وانت كمان وحشتنى اوى"
تدخل نسرين ووراها فارس ويسلموا عليها
يقعدوا كلهم مع بعض يتكلموا ومايا بتحكى عن اجازتها

يقوم حمزة يقف
"مايا... تعالى عايز اقولك حاجة"
قامت مايا ... وراحت معاه بعيد عن فارس ونسرين وف نفس الوقت على مرمى بصرهم

"نعم ياحمزة"
"متبقيش تتأخرى اوى كده تانى"
"متأخرتش ولا حاجة دول كلهم 3 اسابيع"
"كتير اوى يا مايا... انا مبقدرش استحمل يوم وانتى بعيد"
ابتسمت مايا بكسوف
"بصى انا مش عارف افضل ساكت اكتر من كده"
"تسكت على ايه"
"انا عارف انك لسه صغيرة على اللى هقوله"
"صغيرة ايه يا حمزة انا رايحة تانية ثانوى"
"برضه صغيرة.. بس بحبك من وانتى اصغر كمان"
فرحة مايا بكلام حمزة اللى كانت بتتمناه... خلاها طايرة من السعادة
"اتفاجئتى؟"
"لا... يعنى... اصل.. ما احنا كلنا بنحب بعض زى الاخوات"
"لا اخوات ايه... انا قدامى سنتين ف الجامعة تكونى انتى خلصتى ثانوى واكلم ماما وبابا ونتخطب رسمى"
مايا بفرحة الدنيا كلها
"انت بتتكلم بجد ياحمزة"
"اه طبعا... بس علشان خاطرى متغيبيش تانى عند مامتك... انا كنت هتجنن وحاسس انى لوحدى من غيرك"
"انا اللى كنت هموت وارجع بس بابا كان عنده شغل وانت عارف مش بيوافق يخلينى اروح او اجى لوحدى"

فارس ونسرين قاعدين مع بعض
فارس كل شوية يبص عليهم
نسرين"هما بيرغوا ف ايه كل ده"
قامت نسرين راحت لهم
"عيب اوى تفضلوا واقفين مع بعض وسايبيننا..هو فيه اسرار علينا"
حمزة"مفيش اسرار ولا حاجة"
فارس قام نازل
حمزة"رايح فين يافارس"
فارس"نازل البيت"
نسرين"استنى يافارس... مالكم شكلكم فيه حاجة مخبيينها علينا"
حمزة"لا طبعا مفيش حاجة تستخبى عليكم"
مايا وحمزة بيبتسموا لبعض... وكمل حمزة
"انا كنت بقول لمايا انى لما اخلص هخطبها "
نسرين بفرحة
"ايه ده ايه ده... ايه المفاجئات اللى من ورانا دى"
حمزة"من وراكم ايه بس... انا لسه قايلها حالا وقلت لكم على طول"
فارس"مبروك"
حمزة"اوعوا بس تقولوا لحد دلوقتى لحد ما اخلص...لو عرفوا هيخلونا منشوفش بعض ولا نقعد مع بعض...انتوا عارفين تفكير نينة صعب وخالو فؤاد وعمو توفيق...متزعلش يا فارس بس باباك لو عرف هيقول مينفعش اختلاط ونينة هتسمع كلامه"
فارس"متخافش...السر ف بير...انا نازل"
                    *********************

فارس طالع البيت... حزنه عميق ف قلبه
وغصب عنه عيونه مليانة دموع متحجرة مبتنزلش
بص على بيت جدته المفتوح
شاف فؤاد والجدة قاعدين...دور بعنيه على مايا بحركة لا ارادية
توفيق"يالا يا فارس... لاحسن يفتكروك عايز ترجعلها...مبقاش ينفع"
حياة"هدخل لماما"
توفيق"استنى علشان اجى معاكى نتكلم ف اجراءات الطلاق...اطلع انت"

طلع فارس بشنطة وحزنه وصدمته
وهو على السلم ومعدى من قدام شقة ايمان
شاف حمزة ومايا وهما خلال فترات حياتهم اللى فاتت
الطفولة والصبا وهما داخلين او خارجين او قاعدين ع السلم

نزلت دموعه لاول مرة من ساعة اللى حصل وصدمته
حس انه لوحده ومحدش شايفه

كمل السلم...وصل عند باب شقته...حط الشنطة جنب الباب
وكمل لحد السطح

دخل السطح... كل حاجة بقت اطلال
التندة مقطوعة من عوامل الزمن
الترابيزة مكسورة ومحطوطة على جنب
اصص الزرع اللى كان موجود... موجودة وفاضية
              
                            فلاش باك

مايا وحمزة بيبتسموا لبعض... وكمل حمزة
"انا كنت بقول لمايا انى لما اخلص هخطبها "
نسرين بفرحة
"ايه ده ايه ده... ايه المفاجئات اللى من ورانا دى"
حمزة"من وراكم ايه بس... انا لسه قايلها حالا وقلت لكم على طول"
فارس"مبروك"
حمزة"اوعوا بس تقولوا لحد دلوقتى لحد ما اخلص...لو عرفوا هيخلونا منشوفش بعض ولا نقعد مع بعض...انتوا عارفين تفكير نينة صعب وخالو فؤاد وعمو توفيق...متزعلش يا فارس بس باباك لو عرف هيقول مينفعش اختلاط ونينة هتسمع كلامه"
فارس"متخافش...السر ف بير...انا نازل"

نزل فارس...بسرعة قبل ما حد ياخد باله انه اتضايق
دخل شقتهم... ودخل على اوضته وقفل على نفسه
"ايه اللى مضايقنى كده... ما انا كنت حاسس من الاول اهتمامها بيه هو مش بيا... مش ذنبنهم انى حبيتها وسكتت... حمزة اخويا ولازم افرح لهم... مش لازم حد فيهم يحس بحاجة...ولا لازم حد من الكبار يعرف علشان مايا وحمزة ميزعلوش منى... والحمدلله ان الدراسة قربت وهركز ف المذاكرة وابعد عنهم شوية"
                     ********************

فارس قاعد بيذاكر ف اوضته...يخبط عليه الباب
"ادخل"
تدخل نسرين
"ازيك يافارس"
"الحمدلله...عاملة ايه"
"انا كويسة... انت اللى فين مبتطلعش تقعد معانا فوق ليه"
"انتى عارفة انى عندى مذاكرة كتير"
"ما كلنا عندنا مذاكرة"
فارس بيضحك علشان يدارى احساسه
"ايه جاب دراسة الهندسة للحاجات السهلة بتاعتكم دى"
"سهلة... ما مايا ثانوية عامة...مش هتبقى اصعب منها"
"لا يا ستى انا اصعب...وبعدين انا عايز اركز واذاكر كويس علشان اجيب تقدير واتعين ف الكلية"
"الله الله ده احنا راسمين على تقيل اوى"
"اوى اوى"
ضحكوا مع بعض... وسألته نسرين بتبرة جدية
"فارس...انت بجد كويس ولا زعلان من حد فينا"
"زعلان...لا طبعا هزعل ليه"
"معرفش...حسيت كده انك اخدت جنب بقالك فترة فحبيت اطمن عليك"
"ربنا يخليكى يا نسرين...طول عمرك اخت جدعة"
"احنا كلنا منستغناش عن بعض... متبقاش تغيب علينا...ابقى حتى اطلع اقعد معانا كل خميس"
"حاضر"
"يالا اسيبك علشان معطلكش"

فارس واقف وبيفتكر ايامهم الحلوة قبل ما تتبدل حياتهم
رغم انها كانت ايام صعبة عليه الا انها مكنتش اصعب من اللى فيه دلوقتى
بص لاطلال المكان اللى بيجمعهم
"اكيد اللى حصل كان هنا... كده ياحمزة تعمل كده... لو كنت حبيتها زى ما انا حبيتها مكنتش تضرها بالطريقة دى... انا ليه بعد ده كله مش عارف اكرهكم"
احساسه انه متضايق منهم من اللى عملوه...واحساسه انه بيفتكر ايامهم الحلوة وعدم قدرته على كرههم... تعبه اكتر
وخرج بسرعة من السطح...وكأنه بيهرب من ذكرياته وخيالاته اللى بتطارده



هناك 61 تعليقًا:

  1. جمبله اوى يا دندن وربنا يقويكى يارب

    دينا

    ردحذف
  2. bgd gamda ya dodo :)

    ردحذف
  3. حلوووووووه اوووووي يا دينا
    بس بجد همووووووووووت واعرف ايه اللي حصل

    ردحذف
  4. الله الله الله عليكي بجد انتي بتعزفي مش بتكتبي

    ردحذف
  5. بس انا عندى احساس انوا مش حمزه مش اعرف ليه ؟؟؟؟؟؟؟؟

    ردحذف
  6. جاامده اووى يا دينا وياريت نعرف الى هيحصل بقى مش مستحمله عاايزه اعرف :)

    ردحذف
  7. الله يا دودو تحفةةةةةةةةةةةةة

    ردحذف
  8. الله حلوه اوى اوى

    ردحذف
  9. طب هو حمزه راح فين طيب .. هو طلع عفريت ف الأخر ولا ايه :D .. بس تحففففففه يادودي ... بعشق القصص تبعك

    ردحذف
  10. جامدة يا دندن ونفسي اعرف اللي هيحصل بعد كده بسرعة

    ردحذف
  11. الله عليكي يا دودو بس الحلقه كلها الغاز مفيش حاجه باينه لحد ناوو

    ردحذف
  12. حلوة اوى صعابنين عليا اوى :(

    ردحذف
  13. حلو اوى يا دودو وربنا يوفقك

    ردحذف
  14. حلوه قوى ومحتاجه اعرف الباقى

    ردحذف
  15. الحلقه تحفه بس انا ممكن اخمن ان ممكن يكو حصل معاها حاجه وهيا مسافره عند مامتها وخافت تتكلم وتحكى دا توقعى

    ردحذف
  16. 7lwa awee 3aiza el 7l2a el gdeeda bsor3aa :D

    ردحذف
  17. انا حاسه انها حصل معاها حادثه من الحوادث اللى بتفقد للبنات عذريتهم والله اعلم
    بس جامده ومشووقه
    متابعه معاكى آ جميييييييييل

    ردحذف
  18. هى القصة دى كام حلقة انا نفسى اعرف النهاية

    ردحذف
  19. جميله اوي
    بجد عايزه اعرف اخرها

    ردحذف
  20. جميييييييييييله ياترى ايه اللى حصل مشوقه جدا

    ردحذف
  21. جمييييييييييلة
    متشوقة اووووي بجد

    ردحذف
  22. ديناااااااا هتحننيني
    بلاش الفلاش باكات الكتييير دي ادخلي على المفيد بقى :D
    بس برضه لازم اعترف انها ابهرتني :) :*

    ردحذف
  23. مليون لايك يا دودوووو

    ردحذف
  24. el 7l2a gamila awy w kesa gamila bs yareet tetwely el 7l2a aktar mn keda w yareet fe a5er yrga3o lb3ad w msh ytla2oo bs yslam 2edk gamila awy :)

    ردحذف
  25. 7elwa awy bs 2oly b2a 3latol el 7al2a elgaya eh 7asal 5ala 7amza maytgwzhash we fars hwa elly etgwzha :D

    ردحذف
  26. حلقة جميلة جدا يادينا بس ياريت حمزة ده يظهر بقى

    ردحذف
  27. :( بصى يا دندن انا قرأت الاربع حلقات مع بعض

    لحلقه الى فاتت بجد عيطت معاها

    مش عاارفه صعبانين عليا اوى هما الاتنين

    مستنيه االبااقى :)

    ردحذف
  28. مش عارفة ليه حاسة انه هيبقه جوز نسرين !!

    ردحذف
  29. واااااااااااااااااااااااو بجد جميله بس ياريت تطولي الحلقات شويه كمان

    ردحذف
  30. مافيش احلى من كده :)

    ردحذف
  31. جمميللللللللللللللللللللللللللللللللللة اوى اوى بجد يا ديناااا
    تسلم ايدك ياقمر
    بس لية حمزة لاحد ناو مظهرش ف القصة كدة خالص ...؟؟؟

    amira slama

    ردحذف
  32. طولت اوى القصه راى لازم نهايتها الحلقه الجايه هتطلع من جو الاثاره للملل

    ردحذف
  33. الحلقه مش قصيره بس حساها مفيهاش احداث!!!

    ردحذف
  34. روووووووووووووووووووووووووووووعة بس نفسى أعرف السر بقى غامضة جداَ

    ردحذف
  35. بجد حلوة خلى بقى عيزين نعرف اية ال حصل

    ردحذف
  36. تحفة يا دينا والحلقة طويلة اوي انهارده محدش يقدر يتكلم بس نفسي افهم ولو شئ بسيط انا حتى مش عارفه اخمن عشان عارفه ان حمزة مش هو اللي عمل كده

    hadil gasser

    ردحذف
  37. انا عايزه بقا اعرف ايه اللى حصل لحمزه بققققاا

    ردحذف
  38. جميلة اوى بس انا اعتقد وبخمن ان مامتها هى السبب او هى غصبت عليها ومايا خافت تقول لباباها او تتكلم مع حد

    ردحذف
    الردود
    1. تصدقى ممكن يكون معاكى حق
      اكيد مامتها دى السبب فى اللى حصل
      azza weza

      حذف
  39. انا حاسه كدا ان القصه هتفضل فلاش باك ويفتكروا ذكرياتهم مع بعض
    وحاسه ان حمزه مات او مسافر وتقريبا مظلوم والله أعلم :D
    .
    .
    .
    azza weza

    ردحذف
  40. تححححححححححححححححححححححفة جداااااااااااااا نفسي اعرف القصة كلها

    ردحذف
  41. بتجنن كتيييييييييييييييير تسلم ايدك

    ردحذف
  42. حلللللللللللللوة اووي نفسي تطلع مظلومة

    ردحذف
  43. حلوه اووووى بس قصيره اوووى و نفسى اعرف ايه اللى هيحصل بسرعه

    ردحذف
  44. جميله اوووووووووي ي دودو بجد .. مايا دي غريبه اوي بس صعبانه عليا اوي وايه خلاها تتجوز فارس وحمزه راح فين .. يلا اكيد هنعرف استمري ي مبدعه :-*

    ردحذف
    الردود
    1. شكل كده مايا اتعلقت بحد ف لندن وحمزه حس وانفصلوا وبعدين لما الشخص اللى ف لندن دحك عليها رجعت وفارس اعترفلة بحبها واتجوزه
      انا حسة كده بصراحه وبرضة حسة ف نفس الوقت ان مامتها ليها ايد ف الموضوع

      حذف
  45. 7elwaaaaaaaa awiiiii

    ردحذف
  46. قصصك حلوة اوى

    ردحذف
  47. انا قريت قصصك كلها وحلوة اوى بعضها عرفت اتوقع نهايتها وبعضها لا وكانت النهاية مفاجاة القصة دى بدايتها حلوة وكلها تشويق بس جزء من الحقيقة يبدء يظهر هيزيد من الاثارة وفكرة الفلاش باك انا بحبها جدا وبتدى للقصة جو حلو بس ياريت يبدء الاحداث تبان

    ردحذف
  48. هوفى حلقة النهاردة ولا النهاردة اجازة

    ردحذف
  49. هى حلقة النهارده فييييييين

    ردحذف
  50. حلقه انهارده فييييييييييييين ؟؟

    ردحذف
  51. انا اللى مضايقنى ان مايا مقلتلوش فى الاول خالص ايه اللى حصل لو قالت فى الاول مكنش حصل ده كله لا دى بتستفزه اكتر يعنى :@ :@

    ردحذف
  52. جميلللللللللللللللللللللله

    ردحذف
  53. جلوة اووووووووووووووووووى

    ردحذف
  54. رووووووووووووووووووعه ومتابعه كل كتاباتك

    ردحذف
  55. يا بختك يا مايا باهل باباكى اتحدى الاقى عيله مصريه فيها عمات بالمنظر ده :)

    ردحذف
  56. يا دينا حرام عليكي يا دينا انا تعبت ايه الجمال ده اسلوبك روعه

    ردحذف
  57. الله جميلة جدا ومستنيين نعرف مين هو بفارغ الصبر

    ردحذف
  58. مجدي فريد حسن16 سبتمبر 2014 في 2:42 م

    الحب الوحيد الذي يعلم في القلب
    هو حب الطفولة والمراهقه

    ردحذف

قول رأيك بلاش تقرا وتقفل من سكات...ارائكم تهمنى