الأحد، 21 أبريل، 2013

ليست عذراء... الحلقة 7

الحلقة 7
فرحت نسرين ان مايا اتكلمت
"الحمدلله انك اتكلمتى... احكى لى يامايا... ايه اللى حصل؟؟ ومين اللى عمل كده...جاسر؟؟"
فى نفس اللحظة اللى دخلت فيها ايمان وسمعت الجملة الاخيرة
ايمان باستغراب
"مين جاسر؟؟"
بصت مايا وايمان لبعض
ايمان"وانا اللى فاكرة انى اعرف عنكم كل حاجة...مين جاسر يا مايا؟ مين جاسر يا نسرين"
مايا بلسان تقيل
"هحكيلك يا عمتى... هحكيلكم كل حاجة حصلت من بعد موت حمزة"

قعدت ايمان تسمع الحكاية...وسرحت مايا بخيالها

                              فلاش باك
مايا ونسرين وفارس وحياة وتوفيق ومصطفى والجدة كلهم قاعدين مع بعض ف بيت الجدة
الستات لابسين اسود وقاعدين كلهم بيتكلموا ويضحكوا

صوت مايا
"بعد موت حمزة كنا بنقرب كلنا لبعض اكتر... كنا زى مانكون بنخفف عن بعض الحزن اللى دخل حياتنا فجأة... كل ده كان اول 3 شهور بس... انما بعد كده"
                   *******************

مايا ونسرين راجعين من الجامعة وداخلين البيت
مايا بتدخل بيت الجدة... نسرين بتطلع بيتها

فارس بيرجع من الجامعة ومايا قاعدة بتتغدا والباب مفتوح
يشاور لها ويطلع بيته

صوت مايا
"لما الدراسة بدأت ... كل واحد فينا بقى عنده اللى يشغله... بقينا نشوف بعض بالصدفة او لما نروح نسأل على بعض...فارس كانت اخر سنة ليه ف الكلية وطبعا زى كل السنين اللى فاتت كان مهتم بدراسته اكتر من اى حاجة تانية وبالتالى مامته وباباه علشان ميسيبهوش كانوا بينزلوا قليل اوى ... انا ونسرين كل واحدة فينا ف كلية مختلفة وسنة مختلفة وبالتالى عندنا اللى يشغلنا عن بعض
وعدت اول سنة بعد موت حمزة وبدأنا نتعود على غيابه... لحد ما رجعنا للصفر من تانى"
                        *****************

ايمان قاعدة ف اوضة حمزة... لابسة الاسود ورابطة راسها بايشارب اسود... عينيها باين عليها العياط الكتير
الباب مقفول عليها
مامتها بتخبط وهى مبتفتحش
نسرين بتعيط ف حضن مايا...ومايا كمان بتعيط

صوت مايا
"لما عمو مصطفى مات فجأة... اتصدمنا كلنا... وكأن موته رجع حزننا من اول وجديد ورجع جو الحزن من تانى ... وبقينا حاسين ان كل حاجة اتغيرت.. اسعد بيت ف العيلة بقى اتعس بيت بعد ما مات 2 فيه... وبالتالى بقي الحزن جوانا على اللى ماتوا واللى لسه عايشين... ومع الوقت... بقينا نحاول نتعلق بأى فرحة علشان نخرج من الحزن اللى احنا فيه... وكانت اول فرحة"
                      *******************

فارس داخل بيت الجدة...وراح لخالته ايمان ووشوشها
وسط كل الموجودين... قامت ايمان حضنته بفرحة

صوت مايا
"اول فرحة كانت لما جه فارس واول واحدة قالها على خبر نجاحه بتقدير عالى هو انتى ياعمتى... واتمسكنا بالفرحة دى وبقينا كلنا نفكر ف فارس وهيتعين ف الكلية ولا لأ وهيعمل ايه لو متعينش... كنا بنشغل نفسنا علشان منفكرش ف الحزن اللى تعبنا منه"
                     ********************

ايمان ونسرين قاعدين بيسمعوا باقى الحكاية
سكتت مايا تشرب وترتاح من الكلام
ايمان"كل ده مقلتيش مين جاسر"
نسرين"جاسر كان فتى الجامعة الاول...حاجة كده زى فتى احلام كل بنت"
ايمان"وايه علاقة مايا بيه"
نسرين"ماهى مايا كمان لما دخلت الجامعة...كانت فتاة احلام كل شاب... كانوا البنات مبيحبوش يكلموها ولا يمشوا معاها علشان بيحسوا انها اجمل منهم ولو مشيوا معاها هيبان الفرق بينهم ف الجمال...وكل الشباب بيتمنوا يكلموها ويتعرفوا عليها"
ايمان"وهى؟؟ مكنش ليها صحاب"
نسرين"كل ما تتصاحب على بنات...تدريجيا كده يبعدوا لسبب اللى قلتهولك ده...فبقينا نتقابل ف الجامعة بين محاضراتنا وبنروح ونيجى مع بعض فمكنش لمايا اصحاب غيرى"

مايا بدأت تكمل
"وبدأت مأساتى بعد ما اتخرجت نسرين... جاسر زى ما قالت نسرين كان حلم كل بنت ف الجامعة ومع ذلك عمرى ما اعجبت بيه ولا اهتميت وكده...كان شعلة نشاط والجامعة كلها تعرفه وتحبه...يعرف ناس من كل كلية...موظفين الجامعة اصحابه...دكاترة الجامعة يعرفوه ... هو كان اكبر منى لانه كان بيعيد وبياخد السنة ف اتنين...ولحظى اتقابلنا ف سنة تالتة وكان دفعتى"
                         فلاش باك
مايا ف المحاضرة... وجاسر قاعد ف الصف اللى قدامها على اليمين شوية... كل شوية يلتفت ويبص لها

صوت مايا
"كان بيحضر كل المحاضرات اللى بحضرها...ويقعد ف مكان يخليه يقدر يشوفنى...ملاحقته ليا بالنظرات لفتت نظرى"
                       *************

مايا رايحة المحاضرة...وقبل الباب بخطوات ترجع وتقرر متحضرش
وتشوف جاسر واقف ع الباب ولما يشوفها رجعت يخرج من القاعة

صوت مايا
"شغلنى اذا كان بيحضر علشانى ولا صدفة...وف يوم قررت محضرش واشوف هيعمل ايه...لقيته خرج ومحضرش هو كمان"
                *****************

مايا بتكمل الحكاية وايمان ونسرين قاعدين
ايمان"هااا وبعدين"
مايا"قعدنا ع الحال ده الترم الاول من تالتة"
ايمان"وبعدين ايه اللى حصل"
مايا"لا قبل وبعدين...لازم احكى لك عن حال البيت ايامها"
ايمان بتحاول تفتكر
"كان ايه الحال"
مايا"وقتها فارس جاله شغل السعودية وسافر...ونسرين اتخطبت وانشغلت شوية"
نسرين"انا انشغلت عنك يامايا؟"
مايا"انا مش بلومك يانسرين.. بس انتى وقتها كنتى مثلا بتخرجى مع ممدوح لما ييجى... بتكلميه ف التليفون... بييجى يزورك هو واهله..كده يعنى بقى ليكى اهتمامات تانية غصب عنك"
ايمان"كملى وبعدين"
مايا"ساعتها زاد احساسى اوى بالوحدة... اخواتى اللى كانوا بيهونوا عليا حياتى مبقوش موجودين... صحبتنا ولمتنا اختفت... احساس الوحدة ده وحش اوى "
ايمان"كل ده انتى وجاسر متكلمتوش"
مايا" لا اتكلمنا ف اخر يوم امتحان الترم الاول من سنة تالتة"
            
                       فلاش باك
مايا خارجة من الامتحان قرب عليها جاسر
توقعت زى كل مرة انهم هيتبادلوا النظرات
واتفاجئت بيه بيكلمها
"خرجتى بدرى ليه"
"خلصت"
"وعملتى ايه حليتى كويس"
"الحمدلله"
"ماتيجى نشرب حاجة ف اى مكان"
"لا شكرا...بعد اذنك"

مشيت مايا خطوات
"مايااا"
سبقها ووقف قدامها
"نعم"
"احنا اخر يوم امتحانات النهاردة"
"ما انا عارفة"
"يعنى مش هشوفك طول الاجازة"
وارتبكت مايا ومعرفتش ترد
"بصى لو مش عايزة نقعد مع بعض هاتى رقمك ابقى اكلمك"
لحظات سكوت وتردد
"مش عايزة تجيبى رقم تليفونك ليه...احنا مش زملا"
                      ********************

مايا بتكمل الحكاية
"واتكلمنا ف الاجازة... ولقيت الاهتمام اللى مفتقداه والحب اللى اى بنت تتمناه... من اول مكالمة فهمته انى لا بخرج لوحدى ولا انا بتاعة مقابلات وخروجات والكلام ده... مطلبش منى فعلا اننا نتقابل...كنا مكتفيين بالتليفون... حسيت اننا مع بعض لحظة بلحظة صارحنى بحبه لقيت نفسى بقوله وانا كمان... وحكيت له عن حمزة وانا خايفة انه يغير او يتغير معايا"
ايمان"وبعدين؟؟"
مايا"قالى ان احساسى ناحية حمزة كان طبيعى وخصوصا انى كنت صغيرة وكان هو قريب منى اوى علشان كده حسيت بالحب...وان سنى الصغير هيخلينى انسى الحب ده بسرعة... كلامه اقنعنى جدا وده اللى خلانى اعرف اعيش بعد كده من غير ما احس بتأنيب ضمير ناحية حمزة...حتى لما حبيت فارس كنت بفتكر كلام جاسر واقول ان مشاعرى ناحية حمزة كانت حب مراهقة وده اللى اكدتهولى نسرين بعد كده وانتى كمان ياعمتى"
نسرين"لما مايا جت تحكيلى عن علاقتها بجاسر بعد ماحكت له عن حمزة...شجعتها"
ايمان"مقولتوليش ليه"
مايا"خفت تزعلى ياعمتى...واكدت على نسرين انها متقولش"
ايمان"كملى وبعدين"
مايا"عشنا الترم التانى وسنة رابعة ف سعادة واجمل قصة حب بيتضرب بيها المثل... كل يوم مع بعض ف الكلية... وانا ف البيت بيكلمنى طول الوقت"
ايمان"وايه اللى حصل"
مايا"بعد ما اتخرجت كان هو لسه هيدخل سنة رابعة لاول مرة يعنى ياعالم هيخلص امتى"
ايمان"نسيت اسألك...هو كان ايه ظروف عيلته يعنى واحد كل ده ف الجامعة اهله بيصرفوا عليه ولا بيشتغل ولا ايه"
ابتسمت مايا بمرارة
"من غبائى انى مسألتش نفسى السؤال ده دول الفترة اللى كنا فيها مع بعض"
ايمان"ليه؟؟ ليه بتقولى من غبائى"
مايا"سميها غباء..سميها قلة خبرة ...المهم ان القفلة اللى كنتم قافلينها عليا دى خلتنى مش بفهم الناس"
ايمان"مش فاهمة"
مايا"هحكيلك"

                           فلاش باك
مايا بتتكلم ف التليفون مع جاسر ف التليفون
"جاسر بابا جاى الاسبوع الجاى وهيقعد اسبوعين وبعدين نسافر لندن"
"هتوحشينى يا حبيبتى"
"وانت كمان اكيد هتوحشنى.... بس انت ناوى تكلم بابا امتى"
"اكلم بابا اقوله ايه"
"قوله انك عايز تخطبنى"
"هو انا لسه خلصت كلية"
"يعنى ايه"
"يعنى مينفعش"
"ازاى مينفعش...قوله وتعالى اخطبنى وبعدين نبقى نتجوز بعدين لما تخلص"
"يا بنتى انتى مش عايشة ف الدنيا... هو فيه خطوبة من غير شبكة وشقة وتجهيز جواز"
"مش مستعجلين نبقى نعمل كل ده على مهلنا...مش هنفضل كده طول الوقت مستخبيين واللى بيننا تليفونات وبس"
"ما انتى اللى مش عايزة تخرجى معايا ولا اشوفك خالص"
"ايوه...اخاف حد يشوفنا وعلشان كده بقولك تعالى اتقدملى"
"ظروفى متسمحش دلوقتى"
"متسمحش ليه"
"معييش فلوس"
"اسلفك"
"لا"
"ليه...ماهى مش اول مرة"
"انت بتعايرينى انك بتسلفينى"
"والله ما اقصد...انا اقصد بس انى ممكن اسلفك حق الدبل وهقنع بابا واعمل كل حاجة تسهل اننا نتخطب"
"لما تبقى تفهمى الكلام وتعرفى تتكلمى كويس هبقى ارد عليكى"
واتقفلت السكة ف وش مايا وهى بتتكلم ومش مصدقة طريقته
                        *******************

مايا سكتت وايمان ونسرين قاعدين
ايمان"هو انتى كنتى بتديله فلوس؟"
مايا"اه... مع انه مكنش بيطلب بصراحة...كان مثلا يقولى محتاج اجيب كذا وخلصت مصروفى...يقولى فلوسى اتسرقت...حاجات من دى...بس ساعات كنت الاقيه بيصرف كتير اوى"
ايمان"منين كل ده"
مايا"معرفش ... طريقة صرفه كانت مريبة ومفكرتش فيها الا بعد ما سبنا بعض"
ايمان"وسبتوا بعض امتى؟"
مايا"من وقت المكالمة اللى حكيت لك عليها"
ايمان"حتتة مكالمة عادية كده تسيبوا بعض بسببها"
مايا"اتصلت كتير بعدها مبقاش يرد عليا... وبطلت اتصل احتراما لنفسى وعلشان مقللش من نفسى اكتر من كده"
ايمان"وبعدين"
مايا"وقتها كانت نسرين قربت تتجوز فبقيت اشغل نفسى معاكم ف جهازها وفرش البيت وكل ده...وبجد دى اكتر فترة حسيت فيها انى مشغولة ومش متضايقة...كنت فرحانة اوى لنسرين ومكنتش اعرف اللى مستخبى لى بعدها"
نسرين"ايه اللى حصل بعدها...انا من ساعة ما اتجوزت وانا حسيت اننا مبقناش قريبين لبعض زى الاول"
مايا"علشان بعيد وكنتى بتيجى زيارات متباعدة فاكيد مش هنبقى زى الاول"
ايمان"يعنى يا مايا مش جاسر اللى عمل كده؟"
مايا"لا.. انا مشفتش جاسر بعد المكالمة اللى قلتلك عليها"
ايمان"اومال ايه اللى جاب سيرة جاسر"
مايا"انا بحكى لك علشان تعرفى كل حاجة مريت بيها حتى مشاعرى بحكيها دلوقتى "
ايمان"يعنى ضعفتى بعد كده"
عيطت مايا
"متظلمنيش ياعمتى زى ما كل الناس ظلمتنى"
ايمان"طب كملى ايه اللى حصل"
مايا"انا تعبت من الكلام... ممكن اخد الدوا وارتاح شوية ونبقى نكمل"
نسرين"كفاية عليها كده ياماما... احنا هنروح من بعض فين... تستريح شوية وترجع تحكى لنا"
                   

ملحوظة لمتابعى المدونة ومش متابعين من الفيس بوك
اجازة الحلقات بتكون الاتنين والجمعة من كل اسبوع

هناك 76 تعليقًا:

  1. لا بجد ؟؟؟؟ كده وبس يعنى لما جت تحكى حاجة مفيدة تعبت وقامت تاخد الدوا ده انا اللى هاشوف حاجة للشلل بجد طب قولتى انتو مستعجلين وعايزينها تخلص طب فين الاحداث طيب انا شكلى هاتابعها يوم الاتنين والجمعة بس انما كده حلقة بحلقة انا اللى هافقد النطق مش مايا

    ردحذف
    الردود
    1. hhhhhhhhhhhhhhhhhhhhhhhhhhhhhhhhhhhhhh ana awl mara a3ml comment bs wallahe enty 3ssssssssssssssssl :-*

      حذف
    2. wa ana kaman 2owel mara 2a3mel comment bs enta 5alaseet el kalam ya kabeer

      حذف
    3. هههههههههههههههههههههههههههه

      حذف
    4. هههههههههههههههههههههههههه طب والله انا كمان اول مرة اعلق و اطلع صاحبة اول كومنت متزعليش منى انا بحب قصصك والله يا دينا وبحب اسلوبك بس بجد القصة دى واللى فاتت جابولى الشلل بسبب المط والتطويل و النهاردة بجد قفلة الحلقة دى شلتنى اوى ياريتها ما نطقت كانت فضلت تهز راسها يمين وشمال و تعيط كان بقى احسن

      حذف
  2. ليييييييييييييييييييييييه كدة يعني لسة هنستني ليوم التلات ياااااااه عاوزين نعرف ايه اللي هيحصل

    ردحذف
  3. (YY) KIU <3

    ردحذف
  4. استغفر الله العظيم انا مش هاتابع تاني لحد ما تخلص خالص علشان بيتحرق دمي

    ردحذف
  5. اللى بعدها هتنزل امتى يا دينا انا عايزة اعرف الباقي بليززززززززز

    ردحذف
  6. حسبي الله و نعم الوكيل .... يعني انا قاعده و ورايا امتحان بكره علشان في الاخر تفضل تحكي عن سي جاسر و تقولك عايزه ارتاح انا لو مكان ايمان دي كنت نىةلت فيها ضرب و المصحف هتشل بجد حراآاآاآاآام ؟:O >_<

    ردحذف
  7. جميلة جدااااا متشوقة للباقي

    ردحذف
  8. انتي اسلوبك بارد في الكتابة وضايقني بجد

    ردحذف
  9. ليييييييييييييييييييييييه كده يا دينا حرااااااااااااااااااااااااااااااااام :((((((((((((((((((((((((((((((((((

    ردحذف
  10. روووووعه انا متبعاكي فيس ومدونه قمه الجمال حرام عليكي متاخديش اجازه o_O

    ردحذف
  11. يوووووووووه وكمان بكرة اجازة...هوووففففففففففففف

    ردحذف
  12. بس جمييييلة وممتشوقين للبقيييييييييييييية :)

    ردحذف
  13. جمليه اوووي يا دوندون

    ردحذف
  14. حلقة جااااااااااااامدة يادندن تسلم ايديكي

    ردحذف
  15. كل مرة تشوقينا اكتر من الاول يا دينا

    بس يارب تطلع فعلا مظلومة

    و ربنا يحمي كل البنات يارب

    ردحذف
  16. طب ليه الكلام الكتير اللي مالوش لازمه ده ما تدخلي في الحكتيه على طزل

    ردحذف
  17. انا عايزة اعرررررررررررررررررررررف مين اللى عمل كدة لما مش حمزة ولا جاسر و لا فارس اكييييد يبقى ايييييه لسه فى حد تانى هيطلع عااااااا لا احسن يكون ممدوح جوز نسرين وهما بيظبطوا الشقة مش مهم اجازة بكرة وخليها خميس وجمعة احسن :D

    ردحذف
    الردود
    1. بس الصراحة انتى تحفة فى كتباااتك

      حذف
    2. ياجماعة دى قصة لازم يبقى فيها تشويق ..حلوة يادينا الحلقة وكويس ان مايا بدات تنطق فيه امل يعنى نعرف الحقيقة

      حذف
  18. متشوقين لايه يا هبلة منك لها له بجد اسلوب بارد

    ردحذف
    الردود
    1. وانت مااااااالك انت ولا انتي مش عاجبك يبقى متقراش حاجة
      حاجة تنقط

      حذف
    2. وانتي ايه اللي دخلك ولا هو اي رشق وخلاص

      حذف
    3. من حقي كواحدة من اشد معجبينها اني ارد على اي إساءة ليها

      حذف
  19. إلهى تاخد الدواء وتموت البعيده يعنى خلاص تعبت مش عارفه تقولينى هو مين إية إل جصل ههههههههههههههههههههههههه رووووووووووووووووووعة تسلم إيدك يا أستاذه بجد والله يارب تكون مظلومة بس أنا عاذر فارس بجد لحد دلوقتى نفس أمسك طرف الخيط

    ردحذف
  20. بس يا دينا احنا كده بنحس بملل

    كترى الاحداث في الحلقة شوية

    او نستنا لما تخلصي الحلقات و نبقى نقراها كلها على بعض

    ردحذف
  21. بجد تحفة مش عارفة حستنى ليوم التلاتاء ازاى والله =D

    ردحذف
  22. يلهوي انا عاوزه اعرف ايه اللي هيحصل بعد كده مليش دعوه بقي

    ردحذف
  23. الحلقة جميلة جداً بجد كل كتاباتك روعة تسلم اديكي ويارب دايماً من نجاح لنجاح

    ردحذف
  24. جميلة جدااااااااا تسلم الايادى يا دينا

    ردحذف
  25. حلووووووووة اوي بس بجد كفاية تشويق احنا زهقنا

    ردحذف
  26. الحلقة كلها عن جاسر وفي الاخر يطلع مش هو اللي عمل كدا مكنش له لازمه اصلا يتذكر

    ردحذف
  27. حلوة الحلقة يا دينا
    مايا كانت فعلا خبرتها بالدنيا قليلة و جاسر ده استغلها
    بس عايزين نعرف الباقى

    ردحذف
  28. اسلوبك بجد بااااااارد اووووووووووووووووي ومينفعش كده خاااااااااالص وزودي اﻻحداث وللاسف بقولك انتي كنتي بتكتبي احسن من كده بكتييييير ومعجبتنيش الخلقة وده مش تشويييق خاااااااااالص ده بقى ملل

    ردحذف

  29. بلاش اجازأت يا دينا ياريت

    ردحذف
  30. نهايه فظيعه

    ردحذف
  31. طيب نتابع من الفيس ازاى ؟؟؟؟؟؟؟؟؟؟؟ظ

    ردحذف
  32. حلقة النهاردة جميلة جميلة جميلة يادينا

    ردحذف
  33. و اهو مش جاسر :) و لا حمزة :)

    توضيح بس للى بيقولوا عايزين يعرفوا مين اللى عمل ؟؟؟

    هى لو قالت مين اللى عمل كده القصه انتهت :D

    بجد يا دينا الحلقة جباااااااااااارة و مش تركزى فى كلام حد ... دول اعداء نجاح مش اكتر :)

    ردحذف
  34. مع احترامي لكل واحد او واحده بس عايزه اعرف
    ليه الهجوم ده كله علي القصه ؟؟!!!
    القصه مش مجرد حكايه وعايزين نعرف نهايتها وخلاص
    لأ
    باين ان القصه ليها أهداف و أهم هدف توعيه البنات من الي ممكن يحصل
    معاها أو تشوفه في مجتمعنا في الوقت الي إحنا فيه
    وده مش هيتحقق غير بذكر أحداث كتيييير و مواقف متعدده
    يعني محدش هيستفيد حاجه لو عرفنا ايه الي حصل لمايا علي طول
    لازم يبقي فيه توجيه و توعيه للبنات من خلال القصه
    مع احترامي للجميع ولكن هذا رأيي

    وفي الآخر الحلقة رأئعه يا ديناااااا ومنتظرين المزييييييد =)

    ردحذف
    الردود
    1. كلامك صح جدا

      حذف
  35. دينا الحلقة مش حلوة ابدا بجد .... انا حاسة ان الاحداث مملة و عاملة زى المسلسلات التركى كلام من غير فايدة

    القصص اللى فاتت كانت حلقاتها احلى و كل حلقة بأحداث و تشويق دى لأ

    بجد ياريت تختصرى فيها القصة دى و تبقى اقل من 30 حلقة عشان هنتشل احنا كدة

    ردحذف
  36. يااااااه طب كانت تقول و بعدين اقفلي الحلقة ههههههههههههههه :D

    ردحذف
  37. جامده يا دودو تسلم ايدك يا قمرايه استمري ..وبلاش تدايقي من الاراء السلبيه في عالكفه التانيه ناس بيحبوكي جدااا ومقدرين تعبك فالكتابه... ربنا يوفقك ان شاء الله

    ردحذف
  38. ana 3ayzaaaa asaaas elmawdo3

    ردحذف
  39. اول مره اقرا حلقه واتخنق منها
    حتى مفهمتيش بعض الاجزاء مكنشى فيه توضيح كفايه حسيت ان الاحداث متلخبطه
    ربنا يوفقك يا دينا يا قمر وان شاء الله الجايه تكون احلى

    ردحذف
  40. شكلها مرت بتجارب كتير وهتحكى عن ناس كتير بس برضه متشوقه اعرف باقى القصه

    ردحذف
  41. بجد حلقه واااااااااو جنان
    الفلاش باك عامل شغل جامد اوي اوي اوووووووووووي
    بتشدي ال بيقرا غصب عنو انتي فنااااااانه بجد
    تحياتي
    موجا

    ردحذف
  42. روووووووووووووووووووووعة يادينا بس فعلا فعلا شوقنا جننا يسلمووووووووو ايديكي ياسكر مبدعة بجد <3

    ردحذف
  43. يا مسهل الحاااااااال ^_^ تسلمى يا دينا

    ردحذف
  44. خدعتينا يا ديييييييييييييييييييييينااااااااااااااا هههههههههههههههههههههههههههههههههههههه قال وانا اللي مستنية تقول اللي حصلها من جاسر

    ردحذف
  45. وبعدين لسه هنستني عاوزه اعرف اللي حصل

    ردحذف
  46. يا سلااااا لا يا دينا بدك عضة كبيرة عن جد وانا اللي بقرا بسرعة عشان اشوف هو والا لا والحلو انه بعدها اجازة الله يسعدك حلي هاللغز وبعدين مديها زي ما بدك على فكرة بقينا عيلة رائعة جدا قريتها يمكن 10 مرات لاني ما تابعتها زي اللي قبل لكن مرة وحدة بعد ما خلصت يسلموا ايديكي انا متابعاك من سنة وشوية بس كلهم قريتهم ماعدا قصة الرعب القصر الهادئ لاني بخاف كتير وبموت في الرومانسية

    ردحذف
  47. انا يتوقع لما سافرت عند امها صار معها شي وكمان بتوقع ظهور حمزة وفي كل الاحوال ما لازم ترجع لفارس رغم انه معاه كل الحق لانها في آخر يوم نوت تحكي له والعلاقة بينهم مش حتبقى طبيعية ابدا

    ردحذف
  48. تحفةةةةةةةةةةةةةةةةةة يا دودو تجنن والله وهي كدة احسن عشان التشويق ووملكيش دعوة بلي يقولك سرعي الاحداث ... وانا الاحداث دي ملهاش لازمة ... احنا لازم نعرف مشاعرها ايه وايه اللي خلها كدة وليه د حصل ... يعني براحتك يا دودو احنا معاكي :-*

    ردحذف
  49. يا جماعة فى ايه...ماهو لازم يكون فى عنصر التشويق ده عشان تحسوا بالقصه وتنتظروها ومتملوش منها ....هى بس اصلها مشووووقه اوووى واحنا طبعنا مستعجل

    ردحذف
  50. أزال المؤلف هذا التعليق.

    ردحذف
  51. الحلقه جميله مشوقه بس انا هتشل من بطي الاحداث

    بس اي كانت النهايه او ايه اللي هيحصل الغلط كله عنده عند مايا او اي بنت تعمل كدا ما عندش اي عذر او ظروف تديها الحق انها تعمل كدا

    انا مش عجباني الطريقه اللي هما بيعملوها بيها لانها غلاطنه وتستحقق العقاب هي مش ضحيه

    ردحذف
  52. انا مكنش ليا نفس اعلق النهارده لان الحلقة بجد مملة ف التشويق

    ردحذف
  53. انا لو اتشليت ذنبي هيبقى في رقبة ماااايا :)
    هههههههههههههه

    ردحذف
  54. هتشل يادينا الاحداث بطيئه اوي

    ردحذف
  55. لا بجد معنتش قادرة استنى هموت واعرف (معقولة تكون حادث) يارب بقى بكرة ان شاء الله نعرف

    ردحذف
  56. وااااااااااااااااااااااااااااااااااااااااااااو هموث واعرف

    ردحذف
  57. جميييييييييييله تسلم ايديك

    ردحذف
  58. جاااااااااااوب ع ام السؤااااال XD باسم يوسف استايل
    الاء

    ردحذف
  59. دينا انتى رائعة بجد وكتابتك بتجننى بس يومين اجازة كتيييييييييييييييييييييييييييير :D

    ردحذف
  60. اعتقد ان مايا علشان محدش كان جنبها و التهويل اللى بيحل للجوزا فهى كانت خايفة و الرعب ده اتفسر انها مش بنت
    ممكن تكون هى مش عذراء فى مشاعرها لمرورها بتجارب كتير يعنى جسديا محدش لمسها بس مشاعرها مش بقيت نقيه و هى كانت عايزة تحكى لفارس انه مش اول حب فى حياتها بس هو اتسرع و افتكرها غلطت مع حد
    شكلها هاتحكى على كل اللى عرفتهم

    ردحذف
  61. انا كمان رايى انها هتطلع شريفه جدا جدا بس انا معجبه جدا باسلوبك يا دينا زى الآف المعجبين

    ردحذف
  62. الحلقة بجد تحفةةةة يا دينا ربنا يخلييكي :D أنا قريت كل قصصك في الأسبوعين تلاتة الفاتو دول بس أول مرة أحس بتشويق جامددددد عشان الحلقة لسة منزلتش

    ردحذف
  63. واللة كل حد مش عجبة القصة ما يقرئهاش

    ردحذف
  64. انا اعتقد انها مظلومة
    واسلوبك روووووووعة

    ردحذف
  65. بجد القصة شديتنى وعايزة اكملها لأخرها تسلمى على قصصك

    ردحذف

قول رأيك بلاش تقرا وتقفل من سكات...ارائكم تهمنى