الثلاثاء، 23 أبريل، 2013

ليست عذراء... الحلقة 8

الحلقة 8
خرجت ايمان ونسرين من الاوضة بعد ما سابوا مايا
"كل ده حصل وانا مش عارفة حاجة... كلام مايا حسسنى انى قصرت معاها اوى"
"ليه ياماما... انتى كنتى هتعملى ايه بس...وليه بتحملى نفسك فوق طاقتك... مش انتى المسئولة عنها لوحدك"
"انا من يوم ما جت وقلت بينى وبين نفسى انى هكون مكان امها... اه ماما وحياة مقصروش معاها بس انا حسيتها مسئولة منى"
"وانتى قصرتى ف ايه بس"
"انى مكنتش حاسة بيها"

رن موبايل نسرين
"ده ممدوح"
وردت عليه
"الو...ازيك يا ممدوح...كويسة الحمدلله...انت هتبات عند مامتك ولا ف البيت... ابقى اقفل محبس المياه قبل ما تنزل... لا انا عند ماما"
وارتبكت وهى بتتكلم وبصت لايمان
"مايا...لا لسه مروحتش لمايا... هبقى اسلملك عليهم ان شاءالله... مع السلامة"
قفلت مع ممدوح ...سألتها ايمان
"ايه اللى جاب سيرة مايا"
"بيسأل عليها هى وفارس فاكرنى روحت لهم"
"كويس انك رديتى كده...يوه كنت هنسى"
"ايه؟"
"لازم انزل اعرف فؤاد ان مايا اتكلمت...هيفرح اوى"
"وهتحكى له؟"
"مش عارفة...انتى ايه رأيك"
"مش عارفة"
"انا هقوله اللى حصل انها اتكلمت بس لسه منعرفش حاجة"
"ماشى"
"هتنزلى معايا"
                         ********************

ايمان داخلة بيت مامتها... لقيت فؤاد قاعد
دخلت قعدت
"ماما فين؟"
"نامت من شوية...اخبار مايا ايه"
"اتكلمت الحمدلله"
فؤاد بفرحة
"بجد؟؟ وحكت ايه اللى حصل ومين اللى عمل كده"
"لسه يا فؤاد... هى قعدت تتكلم معانا شوية لحد ما تعبت...بكرة ان شاءالله نبقى نعرف"
"الحمدلله انها اتكلمت... زعلانة منى؟"
"مجبتش سيرة والله...بس يعنى اللى مرت بيه مش سهل برضه"
"وانا؟؟ الصدمة اللى اتصدمتها مش سهلة ابدا"
                 ********************

فؤاد ومامته بيخبطوا على باب ايمان الصبح
فتحت لهم نسرين
فؤاد"صباح الخير يانسرين"
الجدة"صحيتوا ولا لسه نايمين"
نسرين"صباح النور ياخالو... صحينا يا نينة"
دخلوا وقعدوا وسألها فؤاد
"مايا فين"
"ف الحمام وماما بتعمل الفطار"

جت ايمان تسلم عليهم
وخرجت مايا م الحمام...شافت باباها
راحت حضنته وهى بتعيط
وبتتكلم احسن من اليوم السابق
"انا اسفة يابابا انى حطيتك ف الموقف ده... انا غلطانة"
فؤاد وهو بيحاول يتحكم ف دموعه وحزنه
"ليه يامايا عملتى فينا كده"
"والله ما عملت حاجة... كل غلطتى انى سكت كل ده"
كلهم منتبهين لكل كلمة بتقولها مايا
ايمان"احكى لنا يامايا ... قصدك ايه"
قعدت مايا جنب باباها
مايا"هحكى لكم بس اوعدونى كلكم وعد مش عايزة غيره مهما كان رأيكم فيا او لومكم عليا"
نسرين"وعد ايه"
مايا وهى بتمسح دموعها وبنبرة تحدى
"فارس ومامته وباباه ميعرفوش حاجة من اللى هقولها دى"
بصوا كلهم لبعض...ردت مايا
"زى ما اتهمنى الاول قبل ما يسمعنى ...وحكم عليا انى مذنبة... مش لازم يعرف انى بريئة ومليش ذنب"
فؤاد"طب احكى"
مايا"وعد محدش يقولهم حاجة"
ردوا كلهم
"حاضر...نوعدك"

                           فلاش باك
فرح نسرين وممدوح وكلهم موجودين ماعدا فارس

صوت مايا
"الفترة اللى بعد ما سبت جاسر كانت قليلة اوى وانشغلت فيها ...ونسرين اتجوزت وسافرت مع بابا لندن"
                       *****************

فؤاد وهو بيسأل
"مين جاسر"
ايمان بتلحقها "زميلها من الجامعة وكان عايز يتقدم لها بس ظروفه مكنتش مناسبة"
فؤاد"وايه علاقته باللى حصل"
مايا بتكمل"علاقته غير مباشرة لانه أثر فيا اوى"
                     
                         فلاش باك
مايا قاعدة لوحدها ف بيت مامتها
بتقلب ف التليفزيون بملل ...بتمسك المجلات الموجودة بملل اكتر

صوت مايا
"روحت عند ماما... والمرة دى كنت رايحة وبفكر انى اقعد عندها شوية زيادة بما ان مبقاش ورايا دراسة وفاضية...بس انشغالها اكتر الوقت ووجودى لوحدى خلانى مستنية اليوم اللى ارجع فيه مصر تانى... مكنتش اعرف انها اخر مرة هشوف ماما"
                       *********************

مايا قاعدة ف بيت جدتها... بتتكلم ف التليفون ودموعها نازلة

صوت مايا
"وبعد ما بابا جه وصلنى ورجع لندن تانى... اتصل بيا وقالى على وفاة ماما... واتفاجئت انى كنت بحبها اوى وموتها اثر فيا اكتر ما كنت اتخيل او بمعنى اصح مكنتش فكرت ف الموقف ده قبل كده"
                      *********************

مايا قاعدة ف اوضتها بتعيط... جنبها جدتها بتطبطب عليها
وعلامات السهر والارق على وشها

صوت مايا
"ورجع موتها يجر عليا الاحزان من اول وجديد... كل اللى بحبهم بيبعدوا عنى واحد ورا التانى... عيلتنا اتفرقت... قاعدة ف البيت على طول ومعنديش اصحاب حتى اتكلم معاهم"
                        *******************

مايا قاعدة بتحكى وكلهم منتبهين
"اسوأ فترة عشتها ف حياتى كانت بعد وفاة ماما اللى جه بعد جواز نسرين بشوية... تخيلوا قاعدة طول الليل والنهار افتكر الاوقات القليلة اللى قضيتها مع ماما ...والاوقات القليلة اللى قضيتها مع حمزة واعيط..حسيت انى مش مكتوب لى افرح... حياتى فاضية محدش معايا...نسرين اتجوزت وفارس مسافر ودول الوحيدين اللى كان ممكن اخرج معاهم لو عايزة اتفسح... مفيش حد مهتم بيا...اه نينة وعماتى بيهتموا بأكلت...نمت... عايزة حاجة نفسى فيها...انما برضه احساس الوحدة صعب... بقيت احن اوى لاهتمام جاسر بيا ومكالماته واتصالاته...فكرت كتير انى اكلمه تانى... ترددت اوى... وبعدين اتصلت بيه... قفل وبعتلى مسدج مختصرة...متتصليش بيا تانى... جرحنى ومفكرتش حتى انى اسأله ليه... بس حالتى زادت سوء...عياط على طول... مفيش نوم ...مليش نفس آكل... وطبعا كانوا نينة وعماتى حاسين"
الجدة"ايوه فعلا... انا كنت بتقطع عليكى... وقلت مش معقول موت امها اللى مقعدتش معاها يعمل فيها كده"
ايمان"انا ايامها كنت بسافر لنسرين كتير لما عرفت انها حامل"
مايا"فاكرة بقى ياعمتى لما نسرين اجهضت وروحتى قعدتى معاها شهر... وقتها حصلت المصيبة"
وانتبهوا كلهم
"ايه اللى حصل"
                           فلاش باك
مايا فى اوضتها قاعدة لوحدها كالعادة
حياة قاعدة مع مامتها بره
"ماما هى مايا لسه على حالها برضه"
"لسه يا حياة"
"البت دى محسودة...على جمالها ده ومحدش اتقدم لها خالص واهى داخلة على 22 سنة"
"معاكى حق صحيح"
"ولا تكون ياماما حد عملها حاجة"
"حد مين...هى عمرها اذت حد علشان حد يأذيها"
"الناس الوحشة كتير...نضمن منين"
"ونعمل ايه"
"معرفش انا بقولك يمكن يكون ده السبب"
                         ********************

الجدة بتتكلم بعد ما افتكرت اللى حصل
"اه صحيح... وطلعت حياة معاها حق"
فؤاد"معاها حق ازاى؟"
الجدة"قعدت اسأل الجيران والمعارف على حد كويس بيفهم ف فك السحر علشان يشوف البت معمولها عمل بصحيح ولا لأ... ودلونى ع الشيخ خضر"
مايا بتمسح دموعها بسرعة علشان تقدر تكمل الحكاية
فؤاد بضيق"وده اسمه كلام ياماما تصدقى التخاريف دى"
الجدة"تخاريف ؟؟!! متقولش كده...بنتك كان معمولها عمل صحيح وربنا جاب الشفا على ايده"
مايا بوجع"جالى الشقا كله على ايده"
وانتبهوا لها باستغراب
                    
                          فلاش باك
الجدة وحياة قاعدين
"لا ياماما مش هقدر اجى معاكى...توفيق لو عرف حاجة زى كده تبقى مصيبة"
"وهو مين بس اللى هيقوله"
"وانا بعد العمر ده كله هخرج من وراه ومن غير ما اقول رايحة فين"
"وانتى خارجة مع حد غريب...مش مع امك"
"لا ياماما ...مش عايزة مشاكل...عايزة تاخديها وتروحى روحى"
                         ******************

مايا وجدتها قاعدين ف انتريه قديم وناس تانية قاعدين
وفيه واحدة ست ف الاربعينات بعباية سودة بتدخل وتخرج من عند الشيخ وتنظم مواعيده ومقابلاته

صوت مايا
"روحنا للشيخ خضر... البيت من اول ما دخلته وانا قلبى اتقبض... الست اللى زى سكرتيرة او مساعدته دى مريبة... نظراتها وضحكتها تخوف... وكلامها ف موضوعات غريبة... ومبتسألش اى حد عن سبب زيارته زى ما بنشوف ف الافلام"
                     *********************

مايا وجدتها داخلين اوضة الشيخ وفيها
ترابيزة صغير وقاعد وراها الشيخ و4 كراسى
محطوطين كل كرسيين جنب بعض
وكرسى تانى ف اخر الاوضة لوحده وضهره يبقى للناس

صوت مايا
"دخلنا للشيخ خضر...راجل ف الخمسينات ... اتقبضت منه اكتر من قبضتى من الست اللى شفتها بره...قعدت جنب نينة ع الكرسى اللى لازم فيها وانا ماسكة ف دراعها وخايفة اسيبها...قعدت تحكى له وقال انه لازم يرقينى الاول...وقالى اقعد على الكرسى اللى ف اخر الاوضة"
                     ********************

مايا قاعدة على الكرسى ف اخر الاوضة....ضهرها لجدتها
والشيخ حاطط ايده على راسها وبيقرا كلام مش مسموع

صوت مايا
"نظرات الشيخ ليا كانت غريبة... مرعبة... حيوانية... لما قال هيرقينى خفت يلمسنى بحجة الرقية... بس ساعتها حط ايده على راسى وهو بيقرا لحد ما خلص وقالى قومى وراح قعد مكانه"
                    *********************

الشيخ قاعد على كرسيه...ومايا وجدتها قصاده
"بنتك يا حاجة مش معمول لها عمل ولا حاجة...دى محسودة من عين مصلتش ع النبى"
"يا خبر... منهم لله اللى بيحسدوا الناس...وبعدين؟"
" كل اللى اقدر اعملهولها انى احصنها ...وده هيحتاج جلستين تلاتة يمكن اكتر"
"ازاى الجلسات دى"
"ده شغلى بقى يا حاجة... وعلشان تعرفى انى مش نصاب ولا دجال انا قلتلك الحقيقة ...كان ممكن اقولك معمولها عمل وعايز يتفك انما انا جيت معاكى صريح"
"ربنا يكرمك يا شيخ خضر... ده انت صيتك سابقك"
                      ********************

مايا قاعدة بتحكى
"ورجعنا قولت لنينة بلاش نروح تانى وانى مرتاحتش للناس دول وشكلهم نصابين...مسمعتش كلامى وقالت انى مش فاهمة حاجة وصممت اننا نروح معاد الجلسة اللى حددها"
                    **********************

مايا داخلة مع جدتها اوضة الشيخ
بيتكلم معاهم الشيخ...وتقوم الجدة تخرج من الاوضة
مايا بتقوم تقعد على الكرسى ف اخر الاوضة

صوت مايا
"روحنا معاد الجلسة ونفس احساسى متغيرش...خايفة من الناس دول ومش عارفة ليه... اتكلم الشيخ مع نينة وقالها الجلسة لازم اكون لوحدى...وخرجت فعلا...وبعدها قالى اقعد على الكرسى اللى ف اخر الاوضة"
                  ***********************

مايا بتفتح عينيها ف سرير ف اوضة مفيهاش غير السرير وشماعة وكرسى
متغطية وهدومها جنبها على الكرسى
والشيخ واقف بيكمل لبسه من ع الشماعة
كلم مايا وخرج من باب ف الاوضة

صوت مايا بنشيج عالى
"بعد ما خرجت نينة من من الاوضة وورحت قعدت ف المكان بتاع المرة اللى فاتت ..فوقت لقيت نفسى ف سرير...معرفش نيمنى امتى وازاى...كل اللى فهمته انى خلاص مستقبلى ضاع واتدمرت... كان واقف ع باب الاوضة وبيهددنى... بصوت بشع وشكل ابشع
- لو اتكلمتى هتلاقى cd  باللى حصل ف كل حتة ومستنيكى الجلسة الجاية"

هناك 67 تعليقًا:

  1. بقى فى الاخر خضر هو السبب ياترى هتروحله كل الجلسات ولا ايه؟ رائعة يا دندون

    ردحذف
  2. يااااااااه ماتوقعتش كدا خالص :(

    ردحذف
  3. يا نهار ابيض عاللى بيحصلها ؟؟؟؟؟؟؟؟؟؟؟؟؟؟؟؟
    انا قلت انها مظلومه من الاول
    احيـــــــــــــــــــــــــــــــكى عالحلقه بجد

    ردحذف
  4. يادى المصيبة !!!!!!!!!!!!

    ردحذف
  5. يادي النيييييييييييييييله ياعيني يامايا :(

    ردحذف
  6. يالهوووووي هو في كدااااااااااا !!
    ده اسمووووووو تخللللللف
    لأ وبيقو على نفسو شييييخ !!!! :/
    حسبي الله ونعم الوكيل ف الاشكااال دي ><

    ردحذف
  7. Ya 7ywaaaaaaaan ya 5dr
    Bgd el7l2a to7faaaaaaaaaaa :'(

    ردحذف
  8. بجد زعلت اوي معقول المقرف دة السبب انا افتكرت انة سبب طبيعي مش بالشكل دة :((((
    بس سرد رااااااااااااااائع يادينا بجد تسلمي

    ردحذف
  9. ايه ده :O !

    حاجه مخطرتش على بال حد خالص :(

    بس الحلقه حلوه اوى

    ردحذف
  10. اقل ما يقال انك بجد ما اروعك انتى عبقرية

    ردحذف
  11. تحفه يا دينا
    بجد حاجه صعبه أوي :(

    ردحذف
  12. يا ابن ال تييييييييييييييييييييييييييييت

    ردحذف
  13. لا حول ولا قوه الا بالله.....ربنا يحفظ كل البنات يارب

    رائعه يا دينا تسلم ايدك

    بسكوتا

    ردحذف
  14. حسبي الله ونعم الوكيل هقول ايه غير كده حاجه تحرق الدم بجد

    ردحذف
  15. اخيرررررا عرفنا مين الساااااافل ابن السافل اللى عمل العامله دى هههههههههههه
    الحمد لله وصلنا القاهره هههههههههههههه
    بس ولله صعبت عليا وكمان طلع فى cd وشغل عاااااااالى لالالالا كده المووووضوع وسع اووووووى ^_^

    ردحذف
  16. حلقه جاااااااامده جدا وغير متوقعه

    ردحذف
  17. متوقعتش نهائي حاجة زى دى .. بجد اسلوبك مشوق و غير متوقع و.دا اللى بيميزك .. استمري

    ردحذف
  18. لا حاجه غكره غير متوقعه يا دندن تحفه مستنينك بليل بقي بسرعه خخخخخخخخخخخخخ

    ردحذف
  19. ده ايه المتخلف ده >_<

    وبعدين ازاى هى تسكت كل ده اصلاً

    وازاى توافق ع جوازها من فارس ده وهى كده مفيش تفكير خااالص مش كانت تقولهم الاول

    كم انتى غبيه يا مايا >_<

    ردحذف
  20. ya nhaaaar abyd ana dema8y ra7t fi 7tt tanyaa 5ales

    ردحذف
  21. حيوووووووووووووووووووووووووووووان
    يا حبيبتى يا مايا ربنا معاكى
    بس جامده اوووووووووووى واحساسى انها مظلومة صح الحمد لله
    بس انا حاسه انها لسه فيها لغز تانى لان دينا قالت مش هيتحل اللغز الا اخر حلقه
    مستنيييييييييييييييييييييين على ناااااااااااااااااااااااااااااااااااااااااااااااار

    ردحذف
  22. Teslam edek gamila awiiii

    ردحذف
    الردود
    1. لا حول ولا قوة الا بالله اللهم احفظ بنات المسلمين يارب
      ايه الحلقة التحفة دى
      تسلمى يا استاذة
      مستنيين الحلقة الجديدة بسرعة جداااااااااا

      حذف
  23. ايووووووووووووووووة بقي يااااااااااا دودو
    مايا بريئة ...مايا بريئة .... مايا بريئة هيااااااااااه

    ردحذف
  24. يالهوي قشعر بدني يانااااااااااااااااس
    ربنا ينتقم منه
    بس معقول رجعت خضعت لتهديده

    ردحذف
  25. جميلة اووي الحلقة تسلم ايديكي وافكارك العبقرية
    ومستنين الحلقة الجديدة بسرررعة يا دندون

    ردحذف
  26. ايه ده مش معقول بقى بعد الشك بين حمزه وجاسر او انه طبيعى
    يطلع المخلوق ده حلقه جامده
    صعبت عليا مايا اوى :(

    ردحذف
  27. وها هى القصة الغامضة تكشفها لنا الأستاذه دينا تسلم إيدك مع إنى زعلان قوى على مايا حسبى الله ونعم الوكيل فكل من عمل كده فى بنات الناس ولا حول ولاقوة إلا بالله العلى العظيم بس فارس برضو معذور بس ده يعلمنا إننا مهما حصل منسبش بناتنا مع حد غريب ولو حتى دقيقة واحدة إنشالله يكون ملاك مش شيخ

    ردحذف
  28. حسبي الله ونعم الوكييييييييييل ضيع مستقبلها
    تسلم ايدك يادندن

    ردحذف
  29. تعرفى يا دينا بجد بجد تفاصيل الحسد ونروح لواحد يفك الحاجات دى ... نفسى كل الناس تعرف انها تخلف فى زمنا ده الحسد مذكور فى القران بس الناصبين كتير

    ردحذف
  30. بجدددددددددددددددد تسلم ايدك حلوة جدا وياريت فارس يحس على دم اهله ويعرف الحقيقة ويرجعها

    ردحذف
  31. واااااااااااااااااااااو بجد تجنن برافوووووووووووووووووووووووووووووو

    ردحذف
  32. منككككككك لله يا خضر الكلببببببب اييييييييييه داااااااااا في كدا !!! دا احنا عايشين في غابة فعلا

    ردحذف
  33. ياااااااااااااااالهووووووووى ياعينى عليكى يا مايا ربنا ينتقم منه الحلقه جميييييييييييييله زى العاده تسلم ايديك

    ردحذف
  34. منك لله يا خضر واقولك فيكى ايه يا جدتها حراااام كده :(

    ردحذف
  35. حاجة صعبة اوووووووووووووي حسبى الله ونعم الوكيل

    ردحذف
  36. تحفه تحفه يادينا بس امر غير متوقع خالص وانت اسلوبك رائع

    ردحذف
  37. حلوه اووووى الحلقه بس هى غلطانه جداااا انها سكتت وماتكلمتش بعد المصيبه ده وكان الحيوان ده اخد جزائه


    ردحذف
  38. يا نهار اسود يا حبيتى يا مايا منه لله خربيتك

    ردحذف
  39. ياربنا بجد!!!!!
    روووووعه يا دودو بس هي هتكون قصيرة صح؟

    ردحذف
  40. DINE anty bgd 3asaaaaaaaaaaal we kash gamila msh kont mtok3a i like YOu

    ردحذف
  41. omg bgd wahmyaaaaaaa 7elwa aweeee bgd
    keep going y dodo :) tslm edk :*:*:*

    ردحذف
  42. كنت متأكدة انها هتكون مظلومة بجد
    روووووووووعه يا دندن مكملين معاكي يا حبيبتي

    ردحذف
  43. روووووووووووعة الحلقة-بس هي جدتها كانت فين لمن حصل اللي حصل

    ردحذف
  44. احيييييييييييييييييييييييييييه ماكانش في الحسبان دا الله يخرب بييييييتك يا خضر زي م خربت بيت البت

    حاسه ان لسة فاضل مفاجأت :)

    مستنيين حلقة النهاردة يا دينا :*

    ردحذف
  45. الحلقه رائعه يا دينا وبجد اسلوبك تحفه وتطور الاحداث زاد القصه تشويق ومستنين الحلقه الي جايه بفارغ الصبر =)

    ردحذف
  46. بجد تحفة اوووووي ياتري بقي فؤاد هيعمل ايه و هيقول لفارس ولا لا

    ردحذف
  47. ع فكرة انا متابعه كل القصص وطريقتك فى سرد الاحداث اكثر من رائعه وبجد شوقتينى مووت انى اشوف باقى القصه انتى كاتبه جميله ى دينا

    ردحذف
  48. اتمنى استبدال كلمة "شيخ" بكلمة "دجال" وشكرا

    ردحذف
  49. والله قلبى وجعنى بجد لا حول ولا قوة الا بالله ربنا يحفظ كل البنات
    بس بجد حلقة تحفة تسلم الاياااادى

    ردحذف
  50. احلى حاجه انك جبتى حاجه مش ف الحسبان خاالص

    ردحذف
  51. انا كنت حاسه انها مظلومه فى الاخر بس مكنتش متوقعه انه يكون هو دا السبب
    انا القصه دى المفروض الناستاخدها عظه ويخلوا بالهم كويس من الدجالين والنصابين دول

    ردحذف
  52. متوقعتش كدا خاااااااااااااااااالص يا نهااااااااااااااار بس ليه متكلمتش من الاول وكان الرجل ده يروح فى ستيييييين داهية

    ردحذف
  53. بس ليه متخليش فارس يعرف يعنى هو غصب عنه لازم يتصرف كده كان المفروض يعملها ايه يعنى وهى مش راضيه تبرلله وعماله تستفزه وتقوله ايون بحب حمزة

    ردحذف
  54. شكلها هتقلب قصه بوليسيه والاحداث هتبقي ضرب نار يا دودو
    توتا

    ردحذف
  55. يا نهاااار ابيض بجد الحلقة تحفه اوي ومستنيين القادم :) :)

    ردحذف
  56. لا يا دينا والله كده حرام انا قلبي وجعني :(

    hadil gasser

    ردحذف
  57. يخرب بيتك وعاملي شيخ جتك القرف

    ردحذف
  58. يانهار اسود ده سنه امه سودة ومنيلة بستين نيلة

    ردحذف
  59. الحكاية دى حصلت قبل كده ف فيلم قديم كان الشيخ ده (محمود المليجى ) وكانت البنت (مريم فخر الدين )
    انا توقعت ان هو من اول ما قالت الشيخ خضر
    بس هى حلوةة

    ردحذف
  60. الجدة غلطانة انها خرجت وسابتها لوحدها
    منه لله ابن الكلب

    ردحذف
  61. دا الدجالين دوله ولاد كاب واللي يعرف ميروحش هناك خالص
    بس بجد منه لله

    ردحذف
  62. هييييييييييييييييييق كملى

    ردحذف
  63. ينهااار يعنى ده كله بسبب الراجل الكلب ده ....... راائعه الحلقه استمرى

    ردحذف

قول رأيك بلاش تقرا وتقفل من سكات...ارائكم تهمنى