الأربعاء، 24 أبريل، 2013

ليست عذراء... الحلقة 9

الحلقة 9
مايا بتفتح عينيها ف سرير ف اوضة مفيهاش غير السرير وشماعة وكرسى
متغطية وهدومها جنبها على الكرسى
والشيخ واقف بيكمل لبسه من ع الشماعة
كلم مايا وخرج من باب ف الاوضة

صوت مايا بنشيج عالى
"بعد ما خرجت نينة من الاوضة وورحت قعدت ف المكان بتاع المرة اللى فاتت ..فوقت لقيت نفسى ف سرير...معرفش نيمنى امتى وازاى...كل اللى فهمته انى خلاص مستقبلى ضاع واتدمرت... كان واقف ع باب الاوضة وبيهددنى... بصوت بشع وشكل ابشع
-        لو اتكلمتى هتلاقى cd  باللى حصل ف كل حتة ومستنيكى الجلسة الجاية"

انهارت مايا وهى بتفتكر...محاولاتها التماسك علشان تكمل باءت كلها بالفشل...كل الموجودين بيعيطوا حتى فؤاد
الجدة بتعيط وبتخبط على رجليها وهى قاعدة وكأنها بتضرب نفسها
"يا حبيبتى يا بنتى... قطيعة تقطعنى انا السبب"
ايمان اخدة مايا ف حضنها بتحاول تخفف عنها
نسرين بتعيط بصوت عالى...فؤاد دموعه نازلة بصمت
ايمان"اهدى ياماما... السكر هيعلى عليكى"
الجدة"انا اللى اخدتها ووديتها... مقلتيش ليه ...مقلتليش ليه يامايا... حرام عليكى تعملى فينا كده"
مايا"قلتلك مش عايزة اروح تانى... كنتى مقتنعة بيه ومش راضية تسمعينى"
الجدة بتعيط مش عارفة ترد... فكرت لحظات
"بس انتى خفيتى لما روحنا له"
فؤاد بتماسك
"كملى يامايا...لما قالك مستنيكى الجلسة الجاية...روحتى؟"
مايا بتمسح دموعها ...وكانت نسرين قامت جابت لها مياه
شربت مياه وبدأت تهدا وتكمل
"لما خرجت من الاوضة طلع الباب بيودينى على الاوضة بتاعة الشيخ اللى كنا فيها ... قعدت ونادى على الست اللى عنده دى وقالها تدخل نينة...دخلت نينة وقالها انه خلص الجلسة والجلسة الجاية بعد اسبوع ولازم اكمل الجلسات كلها... رد فعلى وقتها انى كنت ساكتة خالص مش بتكلم...مش قادرة ولا ليا نفس اتكلم ولا ارد...وطول الطريق واحنا راجعين نينة تكلمنى وانا مبردش عليها كل اللى بفكر فيه انى مش هروح له تانى ... لحد ما جينا البيت"

                        فلاش باك
الجدة بتفتح باب البيت م بره
بتشوف شقتها مفتوحة

صوت مايا
"دخلنا البيت كانت عمتى حياة وعمو توفيق قاعدين مستنيينا
واول ما دخلنا عمتى حياة لحقتنا بالكلام"

حياة"ايه ياماما اتأخرتوا ليه؟؟؟كل ده بتشوفى بلوزة لمايا"
الجدة"ملقيناش حاجة عجبتنا ...انتوا قاعدين مستنيينا ليه"
توفيق"اصل فؤاد بعت الحوالة وكنت جايبهالك"
الجدة بتاخد منه الفلوس"شكرا"
مايا داخلة اوضتها
توفيق"مايا استنى"
وقفت مايا
توفيق"لبسك عامل كده ليه"
بصت مايا برعب على هدومها وهى بتلمها
توفيق"مش قلنا بلاش لبس البناطيل دى"
الجدة"ماله البنطلون يا توفيق...ما البنات كلها بتلبس كده"
توفيق"بنات مش مظبوطة وعايزة تلتفت النظر"
مايا واقفة ...شافت الكلام بقى بينهم انسحبت ودخلت اوضتها
                            **************

مايا بتعيط وبتحكى
"دخلت وقفلت على نفسى وانا مش عارفة اتصرف ولا اتكلم... نينة بتاخدنى هناك من غير ما تقول علشان عمتى حياة خايفة من عمو توفيق... عمتى ايمان عند نسرين... نينة مقتنعة بالشيخ ومصدقاه...ومفيش حد ممكن احكيله ويسمعنى...وغير كل ده اتكسفت اقول ولا اتكلم... مكنتش عايزة حد يقول عليا حاجة وحشة... بقى كل تفكيرى ازاى ده ميتكررش تانى"
كلهم بيعيطوا... وفؤاد بيسألها بترجى
"وعملتى ايه؟"
"قلت ف نفسى هو ميعرفش بيتنا ولا تليفوننا ولا حاجة غير اسمى... يعنى مش ممكن ييجى مثلا او يبعت لنا حد يهددنا... ده كان كل اللى بفكر فيه وقلت لازم ابين انى بقيت كويسة علشان نينة متودنيش تانى... وفعلا بقيت اقعد واتكلم وامثل انى مبسوطة وانا بتقطع ولما نينة تنام ادخل اقفل على نفسى وافضل اعيط لحد ما انام...حتى لما بنام كنت احلم بالراجل البشع ده واقوم من النوم مرعوبة"
ايمان"ليه سكتى...ليه يامايا متكلمتيش"
مايا"هقول ايه ولمين... مفيش حد جنبى اقوله حاجة زى دى...خوفت"
فؤاد"والزفت ده انا مش هسكت له"
مايا"ارجوك يابابا بلاش فضايح...كفاية اوى لحد كده ... انا مش هستحمل حد تانى يعرف واتفضح...كفاية اللى انا فيه"
ايمان"فارس لازم يعرف يمكن يرُدِك والحكاية تتلم"
صرخت فيها مايا
"اوعى ياعمتى حد يقوله...اوعوا حد يقوله... مين قال انى عايزة ارجع له بعد اللى عمله فيا...اوعوا حد يقوله"
عيطت مايا بهيستريا...حضنتها ايمان
"خلاص مش هقول حاجة ...خلاص اهدى"
                  *******************

فارس لابس ورايح ع الباب
توفيق"رايح فين؟"
فارس"نازل شوية"
توفيق"لو حد سألك من الشارع هتقول ايه"
فارس"اى حد يابابا..مش هفضل محبوس ف البيت...اتخنقت"
حياة"امانة عليك يافارس ماتقول حاجة لحد... انت تطلقها من سكات...علشان خاطر خالك يا خويا"
فارس"متقلقيش ياماما... مش هفضح نفسى"
توفيق"اوعى تطلقها من نفسك كده"
فارس"مش فاهم"
توفيق"لو طلقتها غيابى هتبقى عايزة منك كل حقوقها لو رفعت قضية وطالبت بيهم"
حياة"واحنا برضه هندخل بعض المحاكم"
فارس"اطمن يابابا ...مالهاش عين تطالب بحاجة"
توفيق"اسمع الكلام انت بس...انت مش عارف حاجة... لازم تتنازل عن كل حاجة واجيبلك اللى صرفته كمان"
فارس باستسلام"ماشى ...انا نازل"
                     **********************

فؤاد قاعد مع مامته هو سرحان وهى قاعدة تتفرج على التليفزيون
"ماما"
"نعم"
"هو الراجل النصاب ده عنوانه ايه"
الام بفزع"وانت عايز عنوانه ليه؟"
فؤاد"عايز اروح له"
الام"تروح له تعمل ايه...متوديش نفسك ف داهية يابنى ولا تفضح بنتك"
فؤاد"متخافيش ...مش هعمل حاجة...بس عايز اروح له ع الاقل ابلغ عنه بسبب النصب والدجل"
                     *******************

نسرين بتحضر شنطتها ومايا معاها ف الاوضة
"عايزة اقعد معاكى اكتر من كده بس ممدوح عمال يزن عليا ارجع ومش عارفة اقوله ايه"
"ارجعى يا حبيبتى لبيتك ربنا يسعدك"
"مايا.. اوعى تزعلى انى بعدت عنك"
"ازعل ايه بس... انتى بعدتى بمزاجك...دى سنة الحياة وانا خلاص هبقى كويسة"
"قوليلى صحيح"
"نعم"
"ليه مقلتيش لفارس قبل الجواز"
"خفت"
"ومخفتيش انك تتحطى ف الموقف اللى اتحطيتى فيه ده"
"متخيلتش ان فارس اللى متربى معايا وعارفنى كويس اوى ممكن يشك فيا... ومع ذلك فكرت كتير انى اقوله... قبل الخطوبة وخلال الخطوبة وكنت كل مرة أأجل الكلام على اخر لحظة"
"ليه"
"الكلام كان بيقف يانسرين ومبقدرش اطلعه ابدا...لحد ما حددنا الفرح...فضلت الاسبوع الاخرانى ده مبنمش ومش عارفة هقوله ازاى... وقلت لازم اقوله قبل كتب الكتاب...بس يوم الفرح وقبل كتب الكتاب مكنش فيه وقت ولقيت نفسى معاه وانا مش عارفة اتكلم"
"ماهى اكيد مكنتش حاجة سهلة عليه يا مايا"
"يعنى كل اللى شفته ده ومريت بيه كان سهل عليا... يا نسرين انا مفرحتش ابدا...الفرحة ف حياتى قليلة اوى"
"معلش ربنا يعوضك خير... لو فيه اى حاجة كلمينى... متخبيش عليا حاجة تانى"
"حاضر"
اخدت نسرين شنطتها...اخدتها منها مايا
"هاتى انتى مش قادرة تشيلى"
"شكرا يامايا...ماما سبقتنا على تحت؟؟"
"اه نزلت...بابا هيوصلك تركبى وابقى طمنينا عليكى لما توصلى"
"حاضر... خليكى مع ماما يامايا
"لا كفاية كده...انا هرجع اقعد تحت مع نينة تانى"
                     *******************

نسرين بتسلم على جدتها ومامتها
الجدة"سلمتى على خالتك؟"
نسرين بتبص لمايا ...خايفة تزعلها
الجدة"زى ما مايا بنت خالك وزعلانة عليها...مينفعش تقاطعى خالتك وابن خالتك"
نسرين"حاضر يا نينة هطلع لها"
                   ********************

نسرين بتسلم على حياة وتوفيق وفارس
بتسلم بسرعة علشان محدش يسألها على حاجة
فارس عينيه كلها اسئلة ومش عارف يسأل
توفيق"انتى حاجزة يا نسرين؟"
نسرين"لا ياعمو"
توفيق"طب انا نازل معاكى علشان عايز خالك"
                 *********************

مايا قاعدة مع فؤاد وايمان وجدتها
مستنيين نسرين تنزل ...نزلت نسرين ومعاها توفيق
اول ما شاف مايا بص لها باحتقار
قامت مايا دخلت اوضتها ودخلت وراها نسرين
توفيق"السلام عليكم"
ردوا كلهم السلام بعد ما لاحظوا نظرته لمايا
توفيق"عايز اتكلم معاك كلمتين"
فؤاد"خير"
قعدوا وايمان والجدة معاهم
توفيق"عايزين نروح للمأذون ونخلص وتيجى تبريه"
فؤاد"ونروح ليه...مايطلقها وخلاص... مش عايزها تحضر"
توفيق وهو بيبص لفؤاد باحتقار انه ساكت على عار بنته وخايف عليها
"لا لازم تيجى تبريه عند المأذون.... وانت كنت قلت هتدفع المصاريف اللى دفعها... متآخذنيش ابنى صرف اللى وراه واللى قدامه على انها جوازة العمر...بس عملة بنتك بقى منها لله"
شخط فيه فؤاد
"خلاااااص يا توفيق...اللى عايزه هياخده من سكات"

مايا قاعدة ف الاوضة وسامعة كل كلمة بيقولها توفيق
كلامه بيجرح فيها... دموعها نازلة ف صمت
ولما حست ان توفيق بيعاير باباها
مسحت دموعها وخرجت م الاوضة... ونسرين بتشدها علشان متخرجش

مايا على باب الاوضة...بتتصنع القوة
"بابا... اى وقت عايزنى نروح للمأذون انا جاهزة"
ايمان والجدة ساكتين مرغمين...وبيتابعوا الموقف
توفيق بضحكة سخرية وهو خارج
"صحيح ياما تحت الساهى دواهى"
فؤاد"النهاردة بالليل نروح للمأذون"
توفيق"خليها تجيب الشبكة وانت حضر 20 الف جنيه حق الفرح... علشان نعمل بيهم فرح يليق بعروسة بنت بنوت"
خرج من البيت وكلهم بيبصوا لبعض ومتغاظين منه
التفت فؤاد لمايا
"متزعليش... انا أجلت سفرى بسبب الظروف دى... ايه رأيك ترجعى تعيشى معايا بعيد خالص عن هنا"
مايا "اعيش هناك؟؟ مبحبش هناك خالص يابابا...يمكن لو كانت ماما عايشة كنت جيت وقعدت شوية معاك وشوية معاها"
نسرين"ما تجربى تروحى شوية تغيرى جو وتهدى اعصابك ولو ارتاحتى اقعدى مرتاحتيش ارجعى"
مايا بتفكير"هفكر"
فؤاد"يالا احنا يانسرين"
                   **********************

فؤاد نازل من تاكسى ف منطقة شعبية
بيبص حواليه...شاف قهوة
راح قعد عليها

القهوجى بيبص على فؤاد
راح وشوش صاحب القهوة بشك
شاور له صاحب القهوة انه يروح له

راح لفؤاد
"اؤمر يا باشا"
"شاى لو سمحت"
"تحت امر سعادتك"
"بقولك ايه"
"اؤمرنى"
"هو الشيخ خضر فى انهى بيت هنا؟؟"

هناك 53 تعليقًا:

  1. جميله اوووى تسلم ايدك.وبجدمشتاقه انى اقرا الحلقه اللى جايه بفارغ الصبر. متتاخريش علينا

    ردحذف
  2. توفيق ده رخم اوووووووووووووووووي

    ردحذف
  3. على فكرة الحلقة مفيهاش اي حاجة جديدة بجد مش عجباني خالص و كمان قصيرة اوييييييييييي

    ردحذف
  4. رائعة ودى اقل مايقال عنها تسلمى يا دينا

    ردحذف
  5. بجد الحلقة جااااااااامدة جداااااااااااااااااااااااااا جدااااااااا تسلمى يا دودو :*

    ردحذف
  6. على فكره ابو فارس دا انسان وحش جدااااااااااااااااااااااااا وبجد مش طايقاه خاااااااااااالص
    بس الحلقه لذيذه

    ردحذف
  7. هو صحيح توفيق يغيظ بس هو مش عارف ايه اللي حصل لمايا فعلا فاكيد لازم يعمل كده هو معاه حق احنا مجتمع شرقي واي حد في مكانه هيعمل اللي بيعمله بردو ممكن اكتر كمان الراجل هنا مش هيكون ابدا زي الغربي في غيرته على بناته واهله فيه بعضهم حتى لو البنت بريئة ومش ذنبها بيقتلوها وده موجود وفي مناطق ارستقراطية بردو مش بس في الصعيد على فكرة

    ردحذف
    الردود
    1. طبعا أنا معاكى فى رأيك ومش عارفة ليه الردود متغاظين ومتضايقين من فارس وباباه ده رد فعل طبيعى جدااااااااا لكن تصرفات الست مايا هى اللى مش طبيعية يعنى هما هيضربوا الودع مش لما يعرفوا يبقوا يعذروها أو لأ هما مش ملايكة وهى كمان مش ملاك.

      حذف
  8. أزال المؤلف هذا التعليق.

    ردحذف
  9. بجد فوق الخيال انتي بجد روووووووووووووووعه وكاتبه ممتازه
    والراجل الرخم الي اسمه توفيق دا يكش ياكلو قطر

    ردحذف
  10. بصي يادينا لو عرفتي تموتي الراجل الي اسمو توفيق دا موتيه لو قدرتي
    دا راجل يقرف

    ردحذف
  11. واااااااااااااااو جميله

    ردحذف
  12. الحلقة حلوة لكن م مشوقة زي الحلقات اللي فاتت عايزين تشويق بقى يسلمو دينا لكن نفسي فارس يعرف اللي حصل ونفسي اعرف ردة فعله ايه

    ردحذف
  13. حلووووووووووووووووووة اوووووووووي يا دودو..............بس انا عايزاهم يرجعواااا لبعض :(

    ردحذف
  14. تحفففففففففففففففففة متوقعتش خالص انها كدة بس كنت حاسة ان مايا مظلومة

    تسلم ايدك يا دودو

    ردحذف
  15. أحلى حلقة يا أستاذه بجد الكل كان منتظر يعرف إية حصل لمايا دلوقتى الكل عايز يعرف إية حصل للدجال مينفعش أقول شيخ حرام رووووووووووووووووووووووووعة تسلم إيدك

    ردحذف
  16. جميل يا دينا وأنا متابعة بصمت .. بس توفيق دا لا يُطاق @:
    اعملي فيه حاجة الراجل دا =))

    ردحذف
  17. جميلة جداااااااا يا دندونة تسلم ايديك ياجميل

    ردحذف
  18. حلوووووووووووووووة اوووووووووووووووووي تسلم ايييييدك وربنا ينتقم من كل ظاااالم زي توفيق وامثاله

    ردحذف
  19. تححححححححححححححححححححححححححححححححفة بجد وكل اللي هقوله عن توفيق ............................. بلاش عشان انا محترمة بس هههه :D

    ردحذف
  20. تحفه يا دندونه تسلم ايدك وكل مره حلقه مشوقه اكتر من اللى قبلهاااا

    بسكوتا

    ردحذف
  21. حلوة اوووووووووى بجد

    ردحذف
  22. جميلة اوووى يا استاذة
    بس مش عارفة ليه حاسه ان فى حاجة مش مظبوطة
    ليه مايا مصممة ان فارس ما يعرفش وان الدجال ده ما يتقبضش عليه
    مجرد احساس
    7abiba

    ردحذف
  23. دينا بجد انتى فظيعة
    ازاى يبقى عندك تفكير كل شخصية الكداب والمنافق والطيب والجرم والبريء بجد موهوبة بتمنالك كل توفيق
    على فكرة قصصك كانت سبب فى ابتسامتى او ادتنى امل فى وقت من الاوقات انا بتمنالك كل خير وياب فى تقدم وعقبال ما توصلى لكتابة افلام ومسلسلات كمان

    ردحذف
  24. ارخم ما فى الموضوع الجدة ... توفيق معاه حق ايا كان هو اصلا ميعرفش حاجة ..بس الجدة رخمة اوى قاعدة بتتفرج التليفزيون ولا كأنها السبب فى ضياع مستقبل بنت ......بس الحلقة والمسلسل اصلا كله جامد ربنا يوفقك

    ردحذف
  25. تحف بجد تسلم ايدددددددددديك انتى فنانه

    ردحذف
  26. اللـه يحـرق قلـب امـكـ عليـكـ يـاآ توفيـق :)
    هى امـه صحيـح اسمهـا ايـه يـاآ دينـا ؟! :D

    ردحذف
  27. جميييييييييله تسلم ايديك توفيق زباله ورخم

    ردحذف
  28. bgd gamela ya dodo teslm edk :)

    ردحذف
  29. اوبااااااااا انا متشوقة لمشهد الطلاق اكيد هيبقى مؤثر اوي بين فارس ومايا شوقتينا يا دينا

    hadil gasser

    ردحذف
  30. ياسلام على الجمال بجد حلقة تحفة وقمة فى الروعة يادينا

    ردحذف
  31. تحفه يا دندن يا قمر
    عايزه الحلقه الجديده بقي
    Reem

    ردحذف
  32. حلوة اوى اوى الحلقه يا دينا مايا صعبانه عليا اوى فعلا كل حياتها حزن :( اما توفيق ده عايز الحرق مهما كان بردوا البنت قربته وبردوا البنت كانت عايشه معاه من غير باباها يعنى المفروض هو اللى كان مسئول عنها وزى بتوه ازاى مش فارقه معاه كده راجل مش عنده دم

    ردحذف
  33. ايوووووووووووون بقى هتحلو اهى شكلها

    ردحذف
  34. حلوة الحلقة
    بس برضو مايا صعبانة عليا هو توفيق عايز منها ايه تانى هيفضل يعايرها العمر كله يعنى و انا كنت متاكده من اول القصة انها مظلومة

    ردحذف
  35. amazing amazing amazing bgd to7faaaaaaaaaaaa
    tslm edk y dodo :) keep going :*

    ردحذف
  36. بجد تجنن يادوندن انا بجد جسمي بيقشعر كل ما اقراء الحلقه ديه واللي فاتت بجد حرام اللي حصل لمايا ده بس انا مش معها انها خبت اللي حصلها وانا لو مكانها كنت هبلغ عنه في لحظتها وأهلي كانو يعرفو يجبو حقي وافضل رفعه راسي ديما وسط الناس مش افضل ساكته لحد الفرح وكمان فارس اتغبي عليها وابوه عامل زي اللي بيصطاد في المياه العكره ما صدق الجوازه باظت عشان ياخد كل حاجه كته قرف في شكله. بس سيبك انتي انتي بجد موهبه جامده ربنا يوفقك واشوفلك مسلسلات وافلام مكسره الدنيا

    ردحذف
  37. يا توفيق انت فين يا توفيق

    ردحذف
  38. والله يا دينا بتتعبي بجد . وعشان تعبك ده ربنا هيحقق لك حلم وتبقي مؤلفه سيناريوهات المسلسلات ونشوف اسمك منور ف التتر .. سيناريو و حوار (الكاتبه : دينا عماد)

    ردحذف
  39. كتيييييير حلوة عنجد تسلم ايدك

    ردحذف
  40. امتي هتنزل الحلقة الجديدة

    ردحذف
  41. جميله اوى حلقه وبحب اتابع كل قصصك وده اول تعليق ليا هنا ف مدونه وياريت مش تاخرى الحلقه جديده علشان عندى مذاكره ومش بعرف اسهر كتير وتسلمى يا دينا ع كل قصص الى انتى كتبتيها بجد تحفه

    ردحذف
  42. تسلم ايييدك ..
    مااات الكلام :)

    ردحذف
  43. حلووووووووووووووووة اوى
    بس ياريت فارس يعرف
    والحقلة الجديدة تنزل بدرى

    ردحذف
  44. حلوه
    بس فين بقي الحلقه الجديده
    بليز نزليها بدري
    Reem

    ردحذف
  45. بجد القصة جامدة يادينا استمري (Y)
    مستنية الحلقة الجديدة بفروغ صبر ^^ ,,

    ردحذف
  46. بجد بجد قصة روعة جدا وتحبس الانفاس وجميلة جدا تسلم ايديكى

    ردحذف
  47. ستها ولا عندها اى احساس انا لو مكان ابوها كنت بهدلتها

    ردحذف
  48. بصراحة توفيق ده راجل نتن المفروض يخش موسوعة (غلس)

    ردحذف
  49. انتى انسانه جميله

    ردحذف

قول رأيك بلاش تقرا وتقفل من سكات...ارائكم تهمنى